𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌨𑌿𑌦𑌰𑍍𑌶𑌯𑌿𑌤𑍍𑌵𑌾 𑌰𑌾𑌮𑌾𑌯 𑌸𑍀𑌤𑌾𑌯𑌾𑌃 𑌪𑍍𑌰𑌤𑌿𑌪𑌾𑌦𑌨𑍇 ।
𑌵𑌾𑌕𑍍𑌯𑌮𑌨𑍍𑌵𑌰𑍍𑌥𑌮𑌰𑍍𑌥𑌜𑍍𑌞𑌃 𑌕𑌬𑌂𑌧𑌃 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ 1 ॥
𑌏𑌷 𑌰𑌾𑌮 𑌶𑌿𑌵𑌃 𑌪𑌂𑌥𑌾 𑌯𑌤𑍍𑌰𑍈𑌤𑍇 𑌪𑍁𑌷𑍍𑌪𑌿𑌤𑌾 𑌦𑍍𑌰𑍁𑌮𑌾𑌃 ।
𑌪𑍍𑌰𑌤𑍀𑌚𑍀𑌂 𑌦𑌿𑌶𑌮𑌾𑌶𑍍𑌰𑌿𑌤𑍍𑌯 𑌪𑍍𑌰𑌕𑌾𑌶𑌂𑌤𑍇 𑌮𑌨𑍋𑌰𑌮𑌾𑌃 ॥ 2 ॥
𑌜𑌂𑌬𑍂𑌪𑍍𑌰𑌿𑌯𑌾𑌲𑌪𑌨𑌸𑌪𑍍𑌲𑌕𑍍𑌷𑌨𑍍𑌯𑌗𑍍𑌰𑍋𑌧𑌤𑌿𑌂𑌧𑍁𑌕𑌾𑌃 ।
𑌅𑌶𑍍𑌵𑌤𑍍𑌥𑌾𑌃 𑌕𑌰𑍍𑌣𑌿𑌕𑌾𑌰𑌾𑌶𑍍𑌚 𑌚𑍂𑌤𑌾𑌶𑍍𑌚𑌾𑌨𑍍𑌯𑍇 𑌚 𑌪𑌾𑌦𑌾𑌪𑌾𑌃 ॥ 3 ॥
𑌧𑌨𑍍𑌵𑌨𑌾 𑌨𑌾𑌗𑌵𑍃𑌕𑍍𑌷𑌾𑌶𑍍𑌚 𑌤𑌿𑌲𑌕𑌾 𑌨𑌕𑍍𑌤𑌮𑌾𑌲𑌕𑌾𑌃 ।
𑌨𑍀𑌲𑌾𑌶𑍋𑌕𑌾𑌃 𑌕𑌦𑌂𑌬𑌾𑌶𑍍𑌚 𑌕𑌰𑌵𑍀𑌰𑌾𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ॥ 4 ॥
𑌅𑌗𑍍𑌨𑌿𑌮𑍁𑌖𑍍𑌯𑌾 𑌅𑌶𑍋𑌕𑌾𑌶𑍍𑌚 𑌸𑍁𑌰𑌕𑍍𑌤𑌾𑌃 𑌪𑌾𑌰𑌿𑌭𑌦𑍍𑌰𑌕𑌾𑌃 ।
𑌤𑌾𑌨𑌾𑌰𑍁𑌹𑍍𑌯𑌾𑌥𑌵𑌾 𑌭𑍂𑌮𑍌 𑌪𑌾𑌤𑌯𑌿𑌤𑍍𑌵𑌾 𑌚 𑌤𑌾𑌨𑍍𑌬𑌲𑌾𑌤𑍍 ॥ 5 ॥
𑌫𑌲𑌾𑌨𑍍𑌯𑌮𑍃𑌤𑌕𑌲𑍍𑌪𑌾𑌨𑌿 𑌭𑌕𑍍𑌷𑌯𑌂𑌤𑍌 𑌗𑌮𑌿𑌷𑍍𑌯𑌥𑌃 ।
𑌤𑌦𑌤𑌿𑌕𑍍𑌰𑌮𑍍𑌯 𑌕𑌾𑌕𑍁𑌤𑍍𑌸𑍍𑌥 𑌵𑌨𑌂 𑌪𑍁𑌷𑍍𑌪𑌿𑌤𑌪𑌾𑌦𑌪𑌮𑍍 ॥ 6 ॥
𑌨𑌂𑌦𑌨𑌪𑍍𑌰𑌤𑌿𑌮𑌂 𑌚𑌾𑌨𑍍𑌯𑌤𑍍𑌕𑍁𑌰𑌵𑍋 𑌹𑍍𑌯𑍁𑌤𑍍𑌤𑌰𑌾 𑌇𑌵 ।
𑌸𑌰𑍍𑌵𑌕𑌾𑌲𑌫𑌲𑌾 𑌯𑌤𑍍𑌰 𑌪𑌾𑌦𑌪𑌾𑌸𑍍𑌤𑍁 𑌮𑌧𑍁𑌸𑍍𑌰𑌵𑌾𑌃 ॥ ॥
𑌸𑌰𑍍𑌵𑍇 𑌚 𑌋𑌤𑌵𑌸𑍍𑌤𑌤𑍍𑌰 𑌵𑌨𑍇 𑌚𑍈𑌤𑍍𑌰𑌰𑌥𑍇 𑌯𑌥𑌾 ।
𑌫𑌲𑌭𑌾𑌰𑌾𑌨𑌤𑌾𑌸𑍍𑌤𑌤𑍍𑌰 𑌮𑌹𑌾𑌵𑌿𑌟𑌪𑌧𑌾𑌰𑌿𑌣𑌃 ॥ ॥
𑌶𑍋𑌭𑌂𑌤𑍇 𑌸𑌰𑍍𑌵𑌤𑌸𑍍𑌤𑌤𑍍𑌰 𑌮𑍇𑌘𑌪𑌰𑍍𑌵𑌤𑌸𑌨𑍍𑌨𑌿𑌭𑌾𑌃 ।
𑌤𑌾𑌨𑌾𑌰𑍁𑌹𑍍𑌯𑌾𑌥𑌵𑌾 𑌭𑍂𑌮𑍌 𑌪𑌾𑌤𑌯𑌿𑌤𑍍𑌵𑌾 𑌯𑌥𑌾𑌸𑍁𑌖𑌮𑍍 ॥ ॥
𑌫𑌲𑌾𑌨𑍍𑌯𑌮𑍃𑌤𑌕𑌲𑍍𑌪𑌾𑌨𑌿 𑌲𑌕𑍍𑌷𑍍𑌮𑌣𑌸𑍍𑌤𑍇 𑌪𑍍𑌰𑌦𑌾𑌸𑍍𑌯𑌤𑌿 ।
𑌚𑌂𑌕𑍍𑌰𑌮𑌂𑌤𑍌 𑌵𑌰𑌾𑌂𑌦𑍇𑌶𑌾𑌨𑍍𑌶𑍈𑌲𑌾𑌚𑍍𑌛𑍈𑌲𑌂 𑌵𑌨𑌾𑌦𑍍𑌵𑌨𑌮𑍍 ॥ 10 ॥
𑌤𑌤𑌃 𑌪𑍁𑌷𑍍𑌕𑌰𑌿𑌣𑍀𑌂 𑌵𑍀𑌰𑍌 𑌪𑌂𑌪𑌾𑌂 𑌨𑌾𑌮 𑌗𑌮𑌿𑌷𑍍𑌯𑌥𑌃 ।
𑌅𑌶𑌰𑍍𑌕𑌰𑌾𑌮𑌵𑌿𑌭𑍍𑌰𑌂𑌶𑌾𑌂 𑌸𑌮𑌤𑍀𑌰𑍍𑌥𑌾𑌮𑌶𑍈𑌵𑌲𑌾𑌮𑍍 ॥ 11 ॥
𑌰𑌾𑌮 𑌸𑌂𑌜𑌾𑌤𑌵𑌾𑌲𑍂𑌕𑌾𑌂 𑌕𑌮𑌲𑍋𑌤𑍍𑌪𑌲𑌶𑌾𑌲𑌿𑌨𑍀𑌮𑍍 ।
𑌤𑌤𑍍𑌰 𑌹𑌂𑌸𑌾𑌃 𑌪𑍍𑌲𑌵𑌾𑌃 𑌕𑍍𑌰𑍌𑌂𑌚𑌾𑌃 𑌕𑍁𑌰𑌰𑌾𑌶𑍍𑌚𑍈𑌵 𑌰𑌾𑌘𑌵 ॥ 12 ॥
𑌵𑌲𑍍𑌗𑍁𑌸𑍍𑌵𑌨𑌾 𑌵𑌿𑌕𑍂𑌜𑌂𑌤𑌿 𑌪𑌂𑌪𑌾𑌸𑌲𑌿𑌲𑌗𑍋𑌚𑌰𑌾𑌃 ।
𑌨𑍋𑌦𑍍𑌵𑌿𑌜𑌂𑌤𑍇 𑌨𑌰𑌾𑌂𑌦𑍃𑌷𑍍𑌟𑍍𑌵𑌾 𑌵𑌧𑌸𑍍𑌯𑌾𑌕𑍋𑌵𑌿𑌦𑌾𑌶𑍍𑌶𑍁𑌭𑌾𑌃 ॥ 13 ॥
𑌘𑍃𑌤𑌪𑌿𑌂𑌡𑍋𑌪𑌮𑌾𑌨𑍍 𑌸𑍍𑌥𑍂𑌲𑌾𑌂𑌸𑍍𑌤𑌾𑌂𑌦𑍍𑌵𑌿𑌜𑌾𑌨𑍍𑌭𑌕𑍍𑌷𑌯𑌿𑌷𑍍𑌯𑌥𑌃 ।
𑌰𑍋𑌹𑌿𑌤𑌾𑌨𑍍𑌵𑌕𑍍𑌰𑌤𑍁𑌂𑌡𑌾𑌂𑌶𑍍𑌚 𑌨𑌡𑌮𑍀𑌨𑌾𑌂𑌶𑍍𑌚 𑌰𑌾𑌘𑌵 ॥ 14 ॥
𑌪𑌂𑌪𑌾𑌯𑌾𑌮𑌿𑌷𑍁𑌭𑌿𑌰𑍍𑌮𑌤𑍍𑌸𑍍𑌯𑌾𑌂𑌸𑍍𑌤𑌤𑍍𑌰 𑌰𑌾𑌮 𑌵𑌰𑌾𑌨𑍍𑌹𑌤𑌾𑌨𑍍 ।
𑌨𑌿𑌸𑍍𑌤𑍍𑌵𑌕𑍍𑌪𑌕𑍍𑌷𑌾𑌨𑌯𑌸𑍍𑌤𑌪𑍍𑌤𑌾𑌨𑌕𑍃𑌶𑌾𑌨𑍇𑌕𑌕𑌂𑌟𑌕𑌾𑌨𑍍 ॥ 15 ॥
𑌤𑌵 𑌭𑌕𑍍𑌤𑍍𑌯𑌾 𑌸𑌮𑌾𑌯𑍁𑌕𑍍𑌤𑍋 𑌲𑌕𑍍𑌷𑍍𑌮𑌣𑌸𑍍𑌸𑌂𑌪𑍍𑌰𑌦𑌾𑌸𑍍𑌯𑌤𑌿 ।
𑌭𑍃𑌶𑌤𑍇 𑌖𑌾𑌦𑌤𑍋 𑌮𑌤𑍍𑌸𑍍𑌯𑌾𑌨𑍍𑌪𑌂𑌪𑌾𑌯𑌾𑌃 𑌪𑍁𑌷𑍍𑌪𑌸𑌂𑌚𑌯𑍇 ॥ 16 ॥
𑌪𑌦𑍍𑌮𑌗𑌂𑌧𑌿 𑌶𑌿𑌵𑌂 𑌵𑌾𑌰𑌿 𑌸𑍁𑌖𑌶𑍀𑌤𑌮𑌨𑌾𑌮𑌯𑌮𑍍 ।
𑌉𑌦𑍍𑌧𑍃𑌤𑍍𑌯 𑌸𑌤𑌤𑌾𑌕𑍍𑌲𑌿𑌷𑍍𑌟𑌂 𑌰𑍌𑌪𑍍𑌯𑌸𑍍𑌫𑌾𑌟𑌿𑌕𑌸𑌨𑍍𑌨𑌿𑌭𑌮𑍍 ॥ 1 ॥
𑌅𑌸𑍌 𑌪𑍁𑌷𑍍𑌕𑌰𑌪𑌰𑍍𑌣𑍇𑌨 𑌲𑌕𑍍𑌷𑍍𑌮𑌣𑌃 𑌪𑌾𑌯𑌯𑌿𑌷𑍍𑌯𑌤𑌿 ।
𑌸𑍍𑌥𑍂𑌲𑌾𑌨𑍍𑌗𑌿𑌰𑌿𑌗𑍁𑌹𑌾𑌶𑌯𑍍𑌯𑌾𑌨𑍍𑌵𑌰𑌾𑌹𑌾𑌨𑍍𑌵𑌨𑌚𑌾𑌰𑌿𑌣𑌃 ॥ 1 ॥
𑌅𑌪𑌾𑌂 𑌲𑍋𑌭𑌾𑌦𑍁𑌪𑌾𑌵𑍃𑌤𑍍𑌤𑌾𑌨𑍍𑌵𑍃𑌷𑌭𑌾𑌨𑌿𑌵 𑌨𑌰𑍍𑌦𑌤𑌃 ।
𑌰𑍂𑌪𑌾𑌵𑌨𑌿𑌤𑌾𑌂𑌶𑍍𑌚 𑌪𑌂𑌪𑌾𑌯𑌾𑌂𑌦𑍍𑌰𑌕𑍍𑌷𑍍𑌯𑌸𑌿 𑌤𑍍𑌵𑌂 𑌨𑌰𑍋𑌤𑍍𑌤𑌮 ॥ 1 ॥
𑌸𑌾𑌯𑌾𑌹𑍍𑌨𑍇 𑌵𑌿𑌚𑌰𑌨𑍍𑌰𑌾𑌮 𑌵𑌿𑌟𑌪𑍀𑌨𑍍𑌮𑌾𑌲𑍍𑌯𑌧𑌾𑌰𑌿𑌣𑌃 ।
𑌶𑍀𑌤𑍋𑌦𑌕𑌂 𑌚 𑌪𑌂𑌪𑌾𑌯𑌾 𑌦𑍃𑌷𑍍𑌟𑍍𑌵𑌾 𑌶𑍋𑌕𑌂 𑌵𑌿𑌹𑌾𑌸𑍍𑌯𑌸𑌿 ॥ 20 ॥
𑌸𑍁𑌮𑌨𑍋𑌭𑌿𑌶𑍍𑌚𑌿𑌤𑌾𑌂𑌸𑍍𑌤𑌤𑍍𑌰 𑌤𑌿𑌲𑌕𑌾𑌨𑍍𑌨𑌕𑍍𑌤𑌮𑌾𑌲𑌕𑌾𑌨𑍍 ।
𑌉𑌤𑍍𑌪𑌲𑌾𑌨𑌿 𑌚 𑌫𑍁𑌲𑍍𑌲𑌾𑌨𑌿 𑌪𑌂𑌕𑌜𑌾𑌨𑌿 𑌚 𑌰𑌾𑌘𑌵 ॥ 21 ॥
𑌨 𑌤𑌾𑌨𑌿 𑌕𑌶𑍍𑌚𑌿𑌨𑍍𑌮𑌾𑌲𑍍𑌯𑌾𑌨𑌿 𑌤𑌤𑍍𑌰𑌾𑌰𑍋𑌪𑌯𑌿𑌤𑌾 𑌨𑌰𑌃 ।
𑌨 𑌚 𑌵𑍈 𑌮𑍍𑌲𑌾𑌨𑌤𑌾𑌂 𑌯𑌾𑌂𑌤𑌿 𑌨 𑌚 𑌶𑍀𑌰𑍍𑌯𑌂𑌤𑌿 𑌰𑌾𑌘𑌵 ॥ 22 ॥
𑌮𑌤𑌂𑌗𑌶𑌿𑌷𑍍𑌯𑌾𑌸𑍍𑌤𑌤𑍍𑌰𑌾𑌽𑌸𑌨𑍍𑌨𑍃𑌷𑌯𑌸𑍍𑌸𑍁𑌸𑌮𑌾𑌹𑌿𑌤𑌾𑌃 ।
𑌤𑍇𑌷𑌾𑌂 𑌭𑌾𑌰𑌾𑌭𑌿𑌤𑌪𑍍𑌤𑌾𑌨𑌾𑌂 𑌵𑌨𑍍𑌯𑌮𑌾𑌹𑌰𑌤𑌾𑌂 𑌗𑍁𑌰𑍋𑌃 ॥ 23 ॥
𑌯𑍇 𑌪𑍍𑌰𑌪𑍇𑌤𑍁𑌰𑍍𑌮𑌹𑍀𑌂 𑌤𑍂𑌰𑍍𑌣𑌂 𑌶𑌰𑍀𑌰𑌾𑌤𑍍𑌸𑍍𑌵𑍇𑌦𑌬𑌿𑌂𑌦𑌵𑌃 ।
𑌤𑌾𑌨𑌿 𑌜𑌾𑌤𑌾𑌨𑌿 𑌮𑌾𑌲𑍍𑌯𑌾𑌨𑌿 𑌮𑍁𑌨𑍀𑌨𑌾𑌂 𑌤𑌪𑌸𑌾 𑌤𑌦𑌾 ॥ 24 ॥
𑌸𑍍𑌵𑍇𑌦𑌬𑌿𑌂𑌦𑍁𑌸𑌮𑍁𑌤𑍍𑌥𑌾𑌨𑌿 𑌨 𑌵𑌿𑌨𑌶𑍍𑌯𑌂𑌤𑌿 𑌰𑌾𑌘𑌵 ।
𑌤𑍇𑌷𑌾𑌂 𑌗𑌤𑌾𑌨𑌾𑌮𑌦𑍍𑌯𑌾𑌪𑌿 𑌦𑍃𑌶𑍍𑌯𑌤𑍇 𑌪𑌰𑌿𑌚𑌾𑌰𑌿𑌣𑍀 ॥ 25 ॥
𑌶𑍍𑌰𑌮𑌣𑍀 𑌶𑌬𑌰𑍀 𑌨𑌾𑌮 𑌕𑌾𑌕𑍁𑌤𑍍𑌸𑍍𑌥 𑌚𑌿𑌰𑌜𑍀𑌵𑌿𑌨𑍀 ।
𑌤𑍍𑌵𑌾𑌂 𑌤𑍁 𑌧𑌰𑍍𑌮𑍇 𑌸𑍍𑌥𑌿𑌤𑌾 𑌨𑌿𑌤𑍍𑌯𑌂 𑌸𑌰𑍍𑌵𑌭𑍂𑌤𑌨𑌮𑌸𑍍𑌕𑍃𑌤𑌮𑍍 ॥ 26 ॥
𑌦𑍃𑌷𑍍𑌟𑍍𑌵𑌾 𑌦𑍇𑌵𑍋𑌪𑌮𑌂 𑌰𑌾𑌮 𑌸𑍍𑌵𑌰𑍍𑌗𑌲𑍋𑌕𑌂 𑌗𑌮𑌿𑌷𑍍𑌯𑌤𑌿 ।
𑌤𑌤𑌸𑍍𑌤𑌦𑍍𑌰𑌾𑌮 𑌪𑌂𑌪𑌾𑌯𑌾𑌸𑍍𑌤𑍀𑌰𑌮𑌾𑌸𑌾𑌦𑍍𑌯 𑌪𑌶𑍍𑌚𑌿𑌮𑌮𑍍 ॥ 2 ॥
𑌆𑌶𑍍𑌰𑌮𑌸𑍍𑌥𑌾𑌨𑌮𑌤𑍁𑌲𑌂 𑌗𑍁𑌹𑍍𑌯𑌂 𑌕𑌾𑌕𑍁𑌤𑍍𑌸𑍍𑌥 𑌪𑌶𑍍𑌯𑌸𑌿 ।
𑌨 𑌤𑌤𑍍𑌰𑌾𑌕𑍍𑌰𑌮𑌿𑌤𑍁𑌂 𑌨𑌾𑌗𑌾𑌶𑍍𑌶𑌕𑍍𑌨𑍁𑌵𑌂𑌤𑌿 𑌤𑌮𑌾𑌶𑍍𑌰𑌮𑌮𑍍 ॥ 2 ॥
𑌵𑌿𑌵𑌿𑌧𑌾𑌸𑍍𑌤𑌤𑍍𑌰 𑌵𑍈 𑌨𑌾𑌗𑌾 𑌵𑌨𑍇 𑌤𑌸𑍍𑌮𑌿𑌂𑌶𑍍𑌚 𑌪𑌰𑍍𑌵𑌤𑍇 ।
𑌋𑌷𑍇𑌸𑍍𑌤𑌤𑍍𑌰 𑌮𑌤𑌂𑌗𑌸𑍍𑌯 𑌵𑌿𑌧𑌾𑌨𑌾𑌤𑍍𑌤𑌚𑍍𑌚 𑌕𑌾𑌨𑌨𑌮𑍍 ॥ 2 ॥
𑌤𑌸𑍍𑌮𑌿𑌨𑍍𑌨𑌂𑌦𑌨𑌸𑌂𑌕𑌾𑌶𑍇 𑌦𑍇𑌵𑌾𑌰𑌣𑍍𑌯𑍋𑌪𑌮𑍇 𑌵𑌨𑍇 ।
𑌨𑌾𑌨𑌾𑌵𑌿𑌹𑌗𑌸𑌂𑌕𑍀𑌰𑍍𑌣𑍇 𑌰𑌂𑌸𑍍𑌯𑌸𑍇 𑌰𑌾𑌮 𑌨𑌿𑌰𑍍𑌵𑍃𑌤𑌃 ॥ 30 ॥
𑌋𑌷𑍍𑌯𑌮𑍂𑌕𑌶𑍍𑌚 𑌪𑌂𑌪𑌾𑌯𑌾𑌃 𑌪𑍁𑌰𑌸𑍍𑌤𑌾𑌤𑍍𑌪𑍁𑌷𑍍𑌪𑌿𑌤𑌦𑍍𑌰𑍁𑌮𑌃 ।
𑌸𑍁𑌦𑍁𑌃𑌖𑌾𑌰𑍋𑌹𑌣𑍋 𑌨𑌾𑌮 𑌶𑌿𑌶𑍁𑌨𑌾𑌗𑌾𑌭𑌿𑌰𑌕𑍍𑌷𑌿𑌤𑌃 ॥ 31 ॥
𑌉𑌦𑌾𑌰𑍋 𑌬𑍍𑌰𑌹𑍍𑌮𑌣𑌾 𑌚𑍈𑌵 𑌪𑍂𑌰𑍍𑌵𑌕𑌾𑌲𑍇 𑌵𑌿𑌨𑌿𑌰𑍍𑌮𑌿𑌤𑌃 ।
𑌶𑌯𑌾𑌨𑌃 𑌪𑍁𑌰𑍁𑌷𑍋 𑌰𑌾𑌮 𑌤𑌸𑍍𑌯 𑌶𑍈𑌲𑌸𑍍𑌯 𑌮𑍂𑌰𑍍𑌧𑌨𑌿 ॥ 32 ॥
𑌯𑌤𑍍𑌸𑍍𑌵𑌪𑍍𑌨𑍇 𑌲𑌭𑌤𑍇 𑌵𑌿𑌤𑍍𑌤𑌂 𑌤𑌤𑍍𑌪𑍍𑌰𑌬𑍁𑌦𑍍𑌧𑍋𑌽𑌧𑌿𑌗𑌚𑍍𑌛𑌤𑌿 ।
𑌨𑌤𑍍𑌵𑍇𑌨𑌂 𑌵𑌿𑌷𑌮𑌾𑌚𑌾𑌰 𑌪𑌾𑌪𑌕𑌰𑍍𑌮𑌾𑌽𑌧𑌿𑌰𑍋𑌹𑌤𑌿 ॥ 33 ॥
𑌯𑌸𑍍𑌤𑍁 𑌤𑌂 𑌵𑌿𑌷𑌮𑌾𑌚𑌾𑌰𑌃 𑌪𑌾𑌪𑌕𑌰𑍍𑌮𑌾𑌽𑌧𑌿𑌰𑍋𑌹𑌤𑌿 ।
𑌤𑌤𑍍𑌰𑍈𑌵 𑌪𑍍𑌰𑌹𑌂𑌤𑍍𑌯𑍇𑌨𑌂 𑌸𑍁𑌪𑍍𑌤𑌮𑌾𑌦𑌾𑌯 𑌰𑌾𑌕𑍍𑌷𑌸𑌾𑌃 ॥ 34 ॥
𑌤𑌤𑍍𑌰𑌾𑌪𑌿 𑌶𑌿𑌶𑍁𑌨𑌾𑌗𑌾𑌨𑌾𑌮𑌾𑌕𑍍𑌰𑌂𑌧𑌶𑍍𑌶𑍍𑌰𑍂𑌯𑌤𑍇 𑌮𑌹𑌾𑌨𑍍 ।
𑌕𑍍𑌰𑍀𑌡𑌤𑌾𑌂 𑌰𑌾𑌮 𑌪𑌂𑌪𑌾𑌯𑌾𑌂 𑌮𑌤𑌂𑌗𑌾𑌰𑌣𑍍𑌯𑌵𑌾𑌸𑌿𑌨𑌾𑌮𑍍 ॥ 35 ॥
𑌸𑌿𑌕𑍍𑌤𑌾 𑌰𑍁𑌧𑌿𑌰𑌧𑌾𑌰𑌾𑌭𑌿𑌸𑍍𑌸𑌂𑌹𑍃𑌤𑍍𑌯 𑌪𑌰𑌮𑌦𑍍𑌵𑌿𑌪𑌾𑌃 ।
𑌪𑍍𑌰𑌚𑌰𑌂𑌤𑌿 𑌪𑍃𑌥𑌕𑍍𑌕𑍀𑌰𑍍𑌣𑌾 𑌮𑍇𑌘𑌵𑌰𑍍𑌣𑌾𑌸𑍍𑌤𑌰𑌸𑍍𑌵𑌿𑌨𑌃 ॥ 36 ॥
𑌤𑍇 𑌤𑌤𑍍𑌰 𑌪𑍀𑌤𑍍𑌵𑌾 𑌪𑌾𑌨𑍀𑌯𑌂 𑌵𑌿𑌮𑌲𑌂 𑌶𑍀𑌤𑌮𑌵𑍍𑌯𑌯𑌮𑍍 ।
𑌨𑌿𑌰𑍍𑌵𑍃𑌤𑌾𑌸𑍍𑌸𑌂𑌵𑌿𑌗𑌾𑌹𑌂𑌤𑍇 𑌵𑌨𑌾𑌨𑌿 𑌵𑌨𑌗𑍋𑌚𑌰𑌾𑌃 ॥ 3 ॥
𑌋𑌕𑍍𑌷𑌾𑌂𑌶𑍍𑌚 𑌦𑍍𑌵𑍀𑌪𑌿𑌨𑌶𑍍𑌚𑍈𑌵 𑌨𑍀𑌲𑌕𑍋𑌮𑌲𑌕𑌪𑍍𑌰𑌭𑌾𑌨𑍍 ।
𑌰𑍁𑌰𑍂𑌨𑌪𑍇𑌤𑌾𑌪𑌜𑌯𑌾𑌨𑍍 𑌦𑍃𑌷𑍍𑌟𑍍𑌵𑌾 𑌶𑍋𑌕𑌂 𑌜𑌯𑌿𑌷𑍍𑌯𑌸𑌿 ॥ 3 ॥
𑌰𑌾𑌮 𑌤𑌸𑍍𑌯 𑌤𑍁 𑌶𑍈𑌲𑌸𑍍𑌯 𑌮𑌹𑌤𑍀 𑌶𑍋𑌭𑌤𑍇 𑌗𑍁𑌹𑌾 ।
𑌶𑌿𑌲𑌾𑌪𑌿𑌧𑌾𑌨𑌾 𑌕𑌾𑌕𑍁𑌤𑍍𑌸𑍍𑌥 𑌦𑍁𑌃𑌖𑌂 𑌚𑌾𑌸𑍍𑌯𑌾𑌃 𑌪𑍍𑌰𑌵𑍇𑌶𑌨𑌮𑍍 ॥ 3 ॥
𑌤𑌸𑍍𑌯𑌾 𑌗𑍁𑌹𑌾𑌯𑌾𑌃 𑌪𑍍𑌰𑌾𑌗𑍍𑌦𑍍𑌵𑌾𑌰𑍇 𑌮𑌹𑌾𑌨𑍍𑌶𑍀𑌤𑍋𑌦𑌕𑍋 𑌹𑍍𑌰𑌦𑌃 ।
𑌫𑌲𑌮𑍂𑌲𑌾𑌨𑍍𑌵𑌿𑌤𑍋 𑌰𑌮𑍍𑌯𑍋 𑌨𑌾𑌨𑌾𑌮𑍃𑌗𑌸𑌮𑌾𑌵𑍃𑌤𑌃 ॥ 40 ॥
𑌤𑌸𑍍𑌯𑌾𑌂 𑌵𑌸𑌤𑌿 𑌸𑍁𑌗𑍍𑌰𑍀𑌵𑌶𑍍𑌚𑌤𑍁𑌰𑍍𑌭𑌿𑌸𑍍𑌸𑌹 𑌵𑌾𑌨𑌰𑍈𑌃 ।
𑌕𑌦𑌾𑌚𑌿𑌚𑍍𑌛𑌿𑌖𑌰𑍇 𑌤𑌸𑍍𑌯 𑌪𑌰𑍍𑌵𑌤𑌸𑍍𑌯𑌾𑌵𑌤𑌿𑌷𑍍𑌠𑌤𑍇 ॥ 41 ॥
𑌕𑌬𑌂𑌧𑌸𑍍𑌤𑍍𑌵𑌨𑍁𑌶𑌾𑌸𑍍𑌯𑍈𑌵𑌂 𑌤𑌾𑌵𑍁𑌭𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌸𑍍𑌰𑌗𑍍𑌵𑍀 𑌭𑌾𑌸𑍍𑌕𑌰𑌵𑌰𑍍𑌣𑌾𑌭𑌃 𑌖𑍇 𑌵𑍍𑌯𑌰𑍋𑌚𑌤 𑌵𑍀𑌰𑍍𑌯𑌵𑌾𑌨𑍍 ॥ 42 ॥
𑌤𑌂 𑌤𑍁 𑌖𑌸𑍍𑌥𑌂 𑌮𑌹𑌾𑌭𑌾𑌗𑌂 𑌕𑌬𑌂𑌧𑌂 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌪𑍍𑌰𑌸𑍍𑌥𑌿𑌤𑍌 𑌤𑍍𑌵𑌂 𑌵𑍍𑌰𑌜𑌸𑍍𑌵𑍇𑌤𑌿 𑌵𑌾𑌕𑍍𑌯𑌮𑍂𑌚𑌤𑍁𑌰𑌂𑌤𑌿𑌕𑍇 ॥ 43 ॥
𑌗𑌮𑍍𑌯𑌤𑌾𑌂 𑌕𑌾𑌰𑍍𑌯𑌸𑌿𑌦𑍍𑌧𑍍𑌯𑌰𑍍𑌥𑌮𑌿𑌤𑌿 𑌤𑌾𑌵𑌬𑍍𑌰𑌵𑍀𑌤𑍍𑌸 𑌚 ।
𑌸𑍁𑌪𑍍𑌰𑍀𑌤𑍌 𑌤𑌾𑌵𑌨𑍁𑌜𑍍𑌞𑌾𑌪𑍍𑌯 𑌕𑌬𑌂𑌧𑌃 𑌪𑍍𑌰𑌸𑍍𑌥𑌿𑌤𑌸𑍍𑌤𑌦𑌾 ॥ 44 ॥
𑌸 𑌤𑌤𑍍𑌕𑌬𑌂𑌧𑌃 𑌪𑍍𑌰𑌤𑌿𑌪𑌦𑍍𑌯 𑌰𑍂𑌪𑌂 𑌵𑍃𑌤𑌶𑍍𑌶𑍍𑌰𑌿𑌯𑌾 𑌭𑌾𑌸𑍍𑌕𑌰𑌤𑍁𑌲𑍍𑌯𑌦𑍇𑌹𑌃 ।
𑌨𑌿𑌦𑌰𑍍𑌶𑌯𑌨𑍍𑌰𑌾𑌮𑌮𑌵𑍇𑌕𑍍𑌷𑍍𑌯 𑌖𑌸𑍍𑌥𑌃 𑌸𑌖𑍍𑌯𑌂 𑌕𑍁𑌰𑍁𑌷𑍍𑌵𑍇𑌤𑌿 𑌤𑌦𑌾𑌭𑍍𑌯𑍁𑌵𑌾𑌚 ॥ 45 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍍𑌰𑌿𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
