𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑍁𑌗𑍍𑌰𑍀𑌵𑌂 𑌚𑍈𑌵 𑌤𑌾𑌰𑌾𑌂 𑌚 𑌸𑌾𑌂𑌗𑌦𑌂 𑌸𑌹𑌲𑌕𑍍𑌷𑍍𑌮𑌣𑌃 ।
𑌸𑌮𑌾𑌨𑌶𑍋𑌕𑌃 𑌕𑌾𑌕𑍁𑌤𑍍𑌸𑍍𑌥 𑌸𑍍𑌸𑌾𑌂𑌤𑍍𑌵𑌯𑌨𑍍𑌨𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌨 𑌶𑍋𑌕𑌪𑌰𑌿𑌤𑌾𑌪𑍇𑌨 𑌶𑍍𑌰𑍇𑌯𑌸𑌾 𑌯𑍁𑌜𑍍𑌯𑌤𑍇 𑌮𑍃𑌤𑌃 ।
𑌯𑌦𑌤𑍍𑌰𑌾𑌨𑌂𑌤𑌰𑌂 𑌕𑌾𑌰𑍍𑌯𑌂 𑌤𑌤𑍍𑌸𑌮𑌾𑌧𑌾𑌤𑍁𑌮𑌰𑍍𑌹𑌥 ॥ 2 ॥
𑌲𑍋𑌕𑌵𑍃𑌤𑍍𑌤𑌮𑌨𑍁𑌷𑍍𑌠𑍇𑌯𑌂 𑌕𑍃𑌤𑌂 𑌵𑍋 𑌬𑌾𑌷𑍍𑌪𑌮𑍋𑌕𑍍𑌷𑌣𑌮𑍍 ।
𑌨 𑌕𑌾𑌲𑌾𑌦𑍁𑌤𑍍𑌤𑌰𑌂 𑌕𑌿𑌂𑌚𑌿𑌤𑍍𑌕𑌰𑍍𑌮 𑌶𑌕𑍍𑌯𑌮𑍁𑌪𑌾𑌸𑌿𑌤𑍁𑌮𑍍 ॥ 3 ॥
𑌨𑌿𑌯𑌤𑌿𑌃 𑌕𑌾𑌰𑌣𑌂 𑌲𑍋𑌕𑍇 𑌨𑌿𑌯𑌤𑌿𑌃 𑌕𑌰𑍍𑌮𑌸𑌾𑌧𑌨𑌮𑍍 ।
𑌨𑌿𑌯𑌤𑌿𑌸𑍍𑌸𑌰𑍍𑌵𑌭𑍂𑌤𑌾𑌨𑌾𑌂 𑌨𑌿𑌯𑍋𑌗𑍇𑌷𑍍𑌵𑌿𑌹 𑌕𑌾𑌰𑌣𑌮𑍍 ॥ 4 ॥
𑌨 𑌕𑌰𑍍𑌤𑌾 𑌕𑌸𑍍𑌯𑌚𑌿𑌤𑍍𑌕𑌶𑍍𑌚𑌿𑌨𑍍𑌨𑌿𑌯𑍋𑌗𑍇 𑌚𑌾𑌪𑌿𑌨𑍇𑌶𑍍𑌵𑌰𑌃 ।
𑌸𑍍𑌵𑌭𑌾𑌵𑍇 𑌵𑌰𑍍𑌤𑌤𑍇 𑌲𑍋𑌕𑌸𑍍𑌤𑌸𑍍𑌯 𑌕𑌾𑌲𑌃 𑌪𑌰𑌾𑌯𑌣𑌮𑍍 ॥ 5 ॥
𑌨 𑌕𑌾𑌲𑌃 𑌕𑌾𑌲𑌮𑌤𑍍𑌯𑍇𑌤𑌿 𑌨 𑌕𑌾𑌲𑌃 𑌪𑌰𑌿𑌹𑍀𑌯𑌤𑍇 ।
𑌸𑍍𑌵𑌭𑌾𑌵𑌂 𑌚 𑌸𑌮𑌾𑌸𑌾𑌦𑍍𑌯 𑌨 𑌕𑌶𑍍𑌚𑌿𑌦𑌤𑌿𑌵𑌰𑍍𑌤𑌤𑍇 ॥ 6 ॥
𑌨 𑌕𑌾𑌲𑌸𑍍𑌯𑌾𑌸𑍍𑌤𑌿 𑌬𑌂𑌧𑍁𑌤𑍍𑌵𑌂 𑌨 𑌹𑍇𑌤𑍁𑌰𑍍𑌨 𑌪𑌰𑌾𑌕𑍍𑌰𑌮𑌃 ।
𑌨 𑌮𑌿𑌤𑍍𑌰𑌜𑍍𑌞𑌾𑌤𑌿𑌸𑌂𑌬𑌂𑌧𑌃 𑌕𑌾𑌰𑌣𑌂 𑌨𑌾𑌤𑍍𑌮𑌨𑍋 𑌵𑌶𑌃 ॥ ॥
𑌕𑌿𑌂 𑌤𑍁 𑌕𑌾𑌲𑌪𑌰𑍀𑌣𑌾𑌮𑍋 𑌦𑍍𑌰𑌷𑍍𑌟𑌵𑍍𑌯𑌸𑍍𑌸𑌾𑌧𑍁 𑌪𑌶𑍍𑌯𑌤𑌾 ।
𑌧𑌰𑍍𑌮𑌶𑍍𑌚𑌾𑌰𑍍𑌥𑌶𑍍𑌚 𑌕𑌾𑌮𑌶𑍍𑌚 𑌕𑌾𑌲𑌕𑍍𑌰𑌮𑌸𑌮𑌾𑌹𑌿𑌤𑌾𑌃 ॥ ॥
𑌇𑌤𑌸𑍍𑌸𑍍𑌵𑌾𑌂 𑌪𑍍𑌰𑌕𑍃𑌤𑌿𑌂 𑌵𑌾𑌲𑍀 𑌗𑌤𑌃𑌪𑍍𑌰𑌾𑌪𑍍𑌤𑌃 𑌕𑍍𑌰𑌿𑌯𑌾𑌫𑌲𑌮𑍍 ।
𑌧𑌰𑍍𑌮𑌾𑌰𑍍𑌥𑌕𑌾𑌮 𑌸𑌂𑌯𑍋𑌗𑍈𑌃 𑌪𑌵𑌿𑌤𑍍𑌰𑌂 𑌪𑍍𑌲𑌵𑌗𑍇𑌶𑍍𑌵𑌰𑌃 ॥ ॥
𑌸𑍍𑌵𑌧𑌰𑍍𑌮𑌸𑍍𑌯 𑌚 𑌸𑌂𑌯𑍋𑌗𑌾𑌜𑍍𑌜𑌿𑌤𑌸𑍍𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌸𑍍𑌵𑌰𑍍𑌗𑌃 𑌪𑌰𑌿𑌗𑍃𑌹𑍀𑌤𑌶𑍍𑌚 𑌪𑍍𑌰𑌾𑌣𑌾𑌨𑌪𑌰𑌿𑌰𑌕𑍍𑌷𑌤𑌾 ॥ 10 ॥
𑌏𑌷𑌾 𑌵𑍈 𑌨𑌿𑌯𑌤𑌿𑌶𑍍𑌶𑍇𑌷𑍍𑌠𑌾 𑌯𑌾𑌂 𑌗𑌤𑍋 𑌹𑌰𑌿𑌯𑍂𑌥𑌪𑌃 ।
𑌤𑌦𑌲𑌂 𑌪𑌰𑌿𑌤𑌾𑌪𑍇𑌨 𑌪𑍍𑌰𑌾𑌪𑍍𑌤𑌕𑌾𑌲𑌮𑍁𑌪𑌾𑌸𑍍𑌯𑌤𑌾𑌮𑍍 ॥ 11 ॥
𑌵𑌚𑌨𑌾𑌂𑌤𑍇 𑌤𑍁 𑌰𑌾𑌮𑌸𑍍𑌯 𑌲𑌕𑍍𑌷𑍍𑌮𑌣𑌃 𑌪𑌰𑌵𑍀𑌰𑌹𑌾 ।
𑌅𑌵𑌦𑌤𑍍𑌪𑍍𑌰𑌶𑍍𑌰𑌿𑌤𑌂 𑌵𑌾𑌕𑍍𑌯𑌂 𑌸𑍁𑌗𑍍𑌰𑍀𑌵𑌂 𑌗𑌤𑌚𑍇𑌤𑌸𑌮𑍍 ॥ 12 ॥
𑌕𑍁𑌰𑍁 𑌤𑍍𑌵𑌮𑌸𑍍𑌯 𑌸𑍁𑌗𑍍𑌰𑍀𑌵 𑌪𑍍𑌰𑍇𑌤𑌕𑌾𑌰𑍍𑌯𑌮𑌨𑌂𑌤𑌰𑌮𑍍 ।
𑌤𑌾𑌰𑌾𑌂𑌗𑌦𑌾𑌭𑍍𑌯𑌾𑌂 𑌸𑌹𑌿𑌤𑍋 𑌵𑌾𑌲𑌿𑌨𑍋 𑌦𑌹𑌨𑌂 𑌪𑍍𑌰𑌤𑌿 ॥ 13 ॥
𑌸𑌮𑌾𑌜𑍍𑌞𑌾𑌪𑌯 𑌕𑌾𑌷𑍍𑌠𑌾𑌨𑌿 𑌶𑍁𑌷𑍍𑌕𑌾𑌨𑌿 𑌚 𑌬𑌹𑍂𑌨𑌿 𑌚 ।
𑌚𑌂𑌦𑌨𑌾𑌦𑍀𑌨𑌿 𑌦𑌿𑌵𑍍𑌯𑌾𑌨𑌿 𑌵𑌾𑌲𑌿𑌸𑌂𑌸𑍍𑌕𑌾𑌰𑌕𑌾𑌰𑌣𑌾𑌤𑍍 ॥ 14 ॥
𑌸𑌮𑌾𑌶𑍍𑌵𑌾𑌸𑌯 𑌚𑍈𑌨𑌂 𑌤𑍍𑌵𑌮𑌂𑌗𑌦𑌂 𑌦𑍀𑌨𑌚𑍇𑌤𑌸𑌮𑍍 ।
𑌮𑌾 𑌭𑍂𑌰𑍍𑌬𑌾𑌲𑌿𑌶𑌬𑍁𑌦𑍍𑌧𑌿𑌸𑍍𑌤𑍍𑌵𑌂 𑌤𑍍𑌵𑌦𑌧𑍀𑌨𑌮𑌿𑌦𑌂 𑌪𑍁𑌰𑌮𑍍 ॥ 15 ॥
𑌅𑌂𑌗𑌦𑌸𑍍𑌤𑍍𑌵𑌾𑌨𑌯𑍇𑌨𑍍𑌮𑌾𑌲𑍍𑌯𑌂 𑌵𑌸𑍍𑌤𑍍𑌰𑌾𑌣𑌿 𑌵𑌿𑌵𑌿𑌧𑌾𑌨𑌿 𑌚 ।
𑌘𑍃𑌤𑌂 𑌤𑍈𑌲𑌮𑌥𑍋 𑌗𑌂𑌧𑌾𑌨𑍍𑌯𑌚𑍍𑌚𑌾𑌤𑍍𑌰 𑌸𑌮𑌨𑌂𑌤𑌰𑌮𑍍 ॥ 16 ॥
𑌤𑍍𑌵𑌂 𑌤𑌾𑌰 𑌶𑌿𑌬𑌿𑌕𑌾𑌂 𑌶𑍀𑌘𑍍𑌰𑌮𑌾𑌦𑌾𑌯𑌾𑌗𑌚𑍍𑌛 𑌸𑌂𑌭𑍍𑌰𑌮𑌾𑌤𑍍 ।
𑌤𑍍𑌵𑌰𑌾 𑌗𑍁𑌣𑌵𑌤𑍀 𑌯𑍁𑌕𑍍𑌤𑌾 𑌹𑍍𑌯𑌸𑍍𑌮𑌿𑌨𑍍𑌕𑌾𑌲𑍇 𑌵𑌿𑌶𑍇𑌷𑌤𑌃 ॥ 1 ॥
𑌸𑌜𑍍𑌜𑍀𑌭𑌵𑌂𑌤𑍁 𑌪𑍍𑌲𑌵𑌗𑌾𑌶𑍍𑌶𑌿𑌬𑌿𑌕𑌾𑌵𑌾𑌹𑌨𑍋𑌚𑌿𑌤𑌾𑌃 ।
𑌸𑌮𑌰𑍍𑌥𑌾 𑌬𑌲𑌿𑌨𑌶𑍍𑌚𑍈𑌵 𑌨𑌿𑌰𑍍𑌹𑌰𑌿𑌷𑍍𑌯𑌂𑌤𑌿 𑌵𑌾𑌲𑌿𑌨𑌮𑍍 ॥ 1 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌸𑍁𑌗𑍍𑌰𑍀𑌵𑌂 𑌸𑍁𑌮𑌿𑌤𑍍𑌰𑌾𑌨𑌂𑌦𑌵𑌰𑍍𑌧𑌨𑌃 ।
𑌤𑌸𑍌 𑌭𑍍𑌰𑌾𑌤𑍃𑌸𑌮𑍀𑌪𑌸𑍍𑌥𑍋 𑌲𑌕𑍍𑌷𑍍𑌮𑌣𑌃 𑌪𑌰𑌵𑍀𑌰𑌹𑌾 ॥ 1 ॥
𑌲𑌕𑍍𑌷𑍍𑌮𑌣𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌤𑌾𑌰𑌸𑍍𑌸𑌂𑌭𑍍𑌰𑌾𑌂𑌤𑌮𑌾𑌨𑌸𑌃 ।
𑌪𑍍𑌰𑌵𑌿𑌵𑍇𑌶 𑌗𑍁𑌹𑌾𑌂 𑌶𑍀𑌘𑍍𑌰𑌂 𑌶𑌿𑌬𑌿𑌕𑌾𑌸𑌕𑍍𑌤𑌮𑌾𑌨𑌸𑌃 ॥ 20 ॥
𑌆𑌦𑌾𑌯 𑌶𑌿𑌬𑌿𑌕𑌾𑌂 𑌤𑌾𑌰𑌸𑍍𑌸 𑌤𑍁 𑌪𑌰𑍍𑌯𑌾𑌪𑌤𑌤𑍍𑌪𑍁𑌨𑌃 ।
𑌵𑌾𑌨𑌰𑍈𑌰𑍁𑌹𑍍𑌯𑌮𑌾𑌨𑌾𑌂 𑌤𑌾𑌂 𑌶𑍂𑌰𑍈𑌰𑍁𑌦𑍍𑌵𑌹𑌨𑍋𑌚𑌿𑌤𑍈𑌃 ॥ 21 ॥
𑌦𑌿𑌵𑍍𑌯𑌾𑌂 𑌭𑌦𑍍𑌰𑌾𑌸𑌨𑌯𑍁𑌤𑌾𑌂 𑌶𑌿𑌬𑌿𑌕𑌾𑌂 𑌸𑍍𑌯𑌂𑌦𑌨𑍋𑌪𑌮𑌾𑌮𑍍 ।
𑌪𑌕𑍍𑌷𑌿𑌕𑌰𑍍𑌮𑌭𑌿𑌰𑌾𑌚𑌿𑌤𑍍𑌰𑌾𑌂 𑌦𑍍𑌰𑍁𑌮𑌕𑌰𑍍𑌮𑌵𑌿𑌭𑍂𑌷𑌿𑌤𑌾𑌮𑍍 ॥ 22 ॥
𑌆𑌚𑌿𑌤𑌾𑌂 𑌚𑌿𑌤𑍍𑌰𑌪𑌤𑍍𑌤𑍀𑌭𑌿 𑌸𑍍𑌸𑍁𑌨𑌿𑌵𑌿𑌷𑍍𑌟𑌾𑌂 𑌸𑌮𑌂𑌤𑌤𑌃 ।
𑌵𑌿𑌮𑌾𑌨𑌮𑌿𑌵 𑌸𑌿𑌦𑍍𑌧𑌾𑌨𑌾𑌂 𑌜𑌾𑌲𑌵𑌾𑌤𑌾𑌯𑌨𑌾𑌨𑍍𑌵𑌿𑌤𑌾𑌮𑍍 ॥ 23 ॥
𑌸𑍁𑌨𑌿𑌯𑍁𑌕𑍍𑌤𑌾𑌂 𑌵𑌿𑌶𑌾𑌲𑌾𑌂 𑌚 𑌸𑍁𑌕𑍃𑌤𑌾𑌂 𑌵𑌿𑌶𑍍𑌵𑌕𑌰𑍍𑌮𑌣𑌾 ।
𑌦𑌾𑌰𑍁𑌪𑌰𑍍𑌵𑌤𑌕𑍋𑌪𑍇𑌤𑌾𑌂 𑌚𑌾𑌰𑍁𑌕𑌰𑍍𑌮𑌪𑌰𑌿𑌷𑍍𑌕𑍃𑌤𑌾𑌮𑍍 ॥ 24 ॥
𑌵𑌰𑌾𑌭𑌰𑌣𑌹𑌾𑌰𑍈𑌶𑍍𑌚 𑌚𑌿𑌤𑍍𑌰𑌮𑌾𑌲𑍍𑌯𑍋𑌪𑌶𑍋𑌭𑌿𑌤𑌾𑌮𑍍 ।
𑌗𑍁𑌹𑌾𑌗𑌹𑌨𑌸𑌂𑌛𑌨𑍍𑌨𑌾𑌂 𑌰𑌕𑍍𑌤𑌚𑌂𑌦𑌨𑌭𑍂𑌷𑌿𑌤𑌾𑌮𑍍 ॥ 25 ॥
𑌪𑍁𑌷𑍍𑌪𑍌𑌘𑍈𑌸𑍍𑌸𑌮𑌭𑌿𑌚𑍍𑌛𑌨𑍍𑌨𑌾𑌂 𑌪𑌦𑍍𑌮𑌮𑌾𑌲𑌾𑌭𑌿𑌰𑍇𑌵 𑌚 ।
𑌤𑌰𑍁𑌣𑌾𑌦𑌿𑌤𑍍𑌯𑌵𑌰𑍍𑌣𑌾𑌭𑌿𑌰𑍍𑌭𑍍𑌰𑌾𑌜𑌮𑌾𑌨𑌾𑌭𑌿𑌰𑌾𑌵𑍃𑌤𑌾𑌮𑍍 ॥ 26 ॥
𑌈𑌦𑍃𑌶𑍀𑌂 𑌶𑌿𑌬𑌿𑌕𑌾𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ।
𑌕𑍍𑌷𑌿𑌪𑍍𑌰𑌂 𑌵𑌿𑌨𑍀𑌯𑌤𑌾𑌂 𑌵𑌾𑌲𑍀 𑌪𑍍𑌰𑍇𑌤𑌕𑌾𑌰𑍍𑌯𑌂 𑌵𑌿𑌧𑍀𑌯𑌤𑌾𑌮𑍍 ॥ 2 ॥
𑌤𑌤𑍋 𑌵𑌾𑌲𑌿𑌨𑌮𑍁𑌦𑍍𑌯𑌮𑍍𑌯 𑌸𑍁𑌗𑍍𑌰𑍀𑌵𑌶𑍍𑌶𑌿𑌬𑌿𑌕𑌾𑌂 𑌤𑌦𑌾 ।
𑌆𑌰𑍋𑌪𑌯𑌤 𑌵𑌿𑌕𑍍𑌰𑍋𑌶𑌨𑍍𑌨𑌂𑌗𑌦𑍇𑌨 𑌸𑌹𑍈𑌵 𑌤𑍁 ॥ 2 ॥
𑌆𑌰𑍋𑌪𑍍𑌯 𑌶𑌿𑌬𑌿𑌕𑌾𑌂 𑌚𑍈𑌵 𑌵𑌾𑌲𑌿𑌨𑌂 𑌗𑌤𑌜𑍀𑌵𑌿𑌤𑌮𑍍 ।
𑌅𑌲𑌂𑌕𑌾𑌰𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌮𑌾𑌲𑍍𑌯𑍈𑌰𑍍𑌵𑌸𑍍𑌤𑍍𑌰𑍈𑌶𑍍𑌚 𑌭𑍂𑌷𑌿𑌤𑌮𑍍 ॥ 2 ॥
𑌆𑌜𑍍𑌞𑌾𑌪𑌯𑌤𑍍𑌤𑌦𑌾 𑌰𑌾𑌜𑌾 𑌸𑍁𑌗𑍍𑌰𑍀𑌵 𑌪𑍍𑌲𑌵𑌗𑍇𑌶𑍍𑌵𑌰𑌃 ।
𑌔𑌰𑍍𑌧𑍍𑌵𑌦𑍈𑌹𑌿𑌕𑌮𑌾𑌰𑍍𑌯𑌸𑍍𑌯 𑌕𑍍𑌰𑌿𑌯𑌤𑌾𑌮𑌨𑍁𑌰𑍂𑌪𑌤𑌃 ॥ 30 ॥
𑌵𑌿𑌶𑍍𑌰𑌾𑌣𑌯𑌂𑌤𑍋 𑌰𑌤𑍍𑌨𑌾𑌨𑌿 𑌵𑌿𑌵𑌿𑌧𑌾𑌨𑌿 𑌬𑌹𑍂𑌨𑍍𑌯𑌪𑌿 ।
𑌅𑌗𑍍𑌰𑌤𑌃 𑌪𑍍𑌲𑌵𑌗𑌾 𑌯𑌾𑌂𑌤𑍁 𑌶𑌿𑌬𑌿𑌕𑌾 𑌸𑌮𑌨𑌂𑌤𑌰𑌮𑍍 ॥ 31 ॥
𑌰𑌾𑌜𑍍𑌞𑌾𑌮𑍃𑌦𑍍𑌦𑌿𑌵𑌿𑌶𑍇𑌷𑌾 𑌹𑌿 𑌦𑍃𑌶𑍍𑌯𑌂𑌤𑍇 𑌭𑍁𑌵𑌿 𑌯𑌾𑌦𑍃𑌶𑌾𑌃 ।
𑌤𑌾𑌦𑍃𑌶𑍈𑌰𑌿𑌹 𑌕𑍁𑌰𑍍𑌵𑌂𑌤𑍁 𑌵𑌾𑌨𑌰𑌾 𑌭𑌰𑍍𑌤𑍃𑌸𑌤𑍍𑌕𑍍𑌰𑌿𑌯𑌾𑌮𑍍 ॥ 32 ॥
𑌤𑌾𑌦𑍃𑌶𑌂 𑌵𑌾𑌲𑌿𑌨𑌃 𑌕𑍍𑌷𑌿𑌪𑍍𑌰𑌂 𑌪𑍍𑌰𑌾𑌕𑍁𑌰𑍍𑌵𑌨𑍍𑌨𑍌𑌰𑍍𑌧𑍍𑌵𑌦𑍈𑌹𑌿𑌕𑌮𑍍 ।
𑌅𑌂𑌗𑌦𑌂 𑌪𑌰𑌿𑌗𑍃𑌹𑍍𑌯𑌾𑌽𑌶𑍁 𑌤𑌾𑌰𑌪𑍍𑌰𑌭𑍃𑌤𑌯𑌸𑍍𑌤𑌦𑌾 ॥ 33 ॥
𑌕𑍍𑌰𑍋𑌶𑌂𑌤𑌃 𑌪𑍍𑌰𑌯𑌯𑍁𑌸𑍍𑌸𑌰𑍍𑌵𑍇 𑌵𑌾𑌨𑌰𑌾 𑌹𑌤𑌬𑌾𑌂𑌧𑌵𑌾𑌃 ।
𑌤𑌤𑌃 𑌪𑍍𑌰𑌣𑌿𑌹𑌿𑌤𑌾𑌃 𑌸𑌰𑍍𑌵𑌾 𑌵𑌾𑌨𑌰𑍍𑌯𑍋𑌸𑍍𑌯 𑌵𑌶𑌾𑌨𑍁𑌗𑌾𑌃 ॥ 34 ॥
𑌚𑍁𑌕𑍍𑌰𑍁𑌶𑍁 𑌰𑍍𑌵𑍀𑌰 𑌵𑍀𑌰𑍇𑌤𑌿 𑌭𑍂𑌯𑌃 𑌕𑍍𑌰𑍋𑌶𑌂𑌤𑌿 𑌤𑌾𑌃 𑌸𑍍𑌤𑍍𑌰𑍀𑌯𑌃 ।
𑌤𑌾𑌰𑌾𑌪𑍍𑌰𑌭𑍃𑌤𑌯𑌸𑍍𑌸𑌰𑍍𑌵𑌾 𑌵𑌾𑌨𑌰𑍍𑌯𑍋 𑌹𑌰𑌿𑌯𑍂𑌥𑌪𑌾𑌃 ।
𑌅𑌨𑍁𑌜𑌗𑍍𑌮𑍁𑌰𑍍𑌹𑌿 𑌭𑌰𑍍𑌤𑌾𑌰𑌂 𑌕𑍍𑌰𑍋𑌶𑌂𑌤𑍍𑌯𑌃 𑌕𑌰𑍁𑌣𑌸𑍍𑌵𑌨𑌾𑌃 ॥ 35 ॥
𑌤𑌾𑌸𑌾𑌂 𑌰𑍁𑌦𑌿𑌤𑌶𑌬𑍍𑌦𑍇𑌨 𑌵𑌾𑌨𑌰𑍀𑌣𑌾𑌂 𑌵𑌨𑌾𑌂𑌤𑌰𑍇 ।
𑌵𑌨𑌾𑌨𑌿 𑌗𑌿𑌰𑌯𑌶𑍍𑌚𑍈𑌵 𑌵𑌿𑌕𑍍𑌰𑍋𑌶𑌂𑌤𑍀𑌵 𑌸𑌰𑍍𑌵𑌤𑌃 ॥ 36 ॥
𑌪𑍁𑌲𑌿𑌨𑍇 𑌗𑌿𑌰𑌿𑌨𑌦𑍍𑌯𑌾𑌸𑍍𑌤𑍁 𑌵𑌿𑌵𑌿𑌕𑍍𑌤𑍇 𑌜𑌲𑌸𑌂𑌵𑍃𑌤𑍇 ॥ 3 ॥
𑌚𑌿𑌤𑌾𑌂 𑌚𑌕𑍍𑌰𑍁𑌸𑍍𑌸𑍁𑌬𑌹𑌵𑍋 𑌵𑌾𑌨𑌰𑌾𑌶𑍍𑌶𑍋𑌕𑌕𑌰𑍍𑌶𑌿𑌤𑌾𑌃 ।
𑌅𑌵𑌰𑍋𑌪𑍍𑌯 𑌤𑌤𑌸𑍍𑌸𑍍𑌕𑌂𑌧𑌾𑌚𑍍𑌛𑌿𑌬𑌿𑌕𑌾𑌂 𑌵𑌾𑌹𑌨𑍋𑌚𑌿𑌤𑌾𑌃 ।
𑌤𑌸𑍍𑌥𑍁𑌰𑍇𑌕𑌾𑌂𑌤𑌮𑌾𑌶𑍍𑌰𑌿𑌤𑍍𑌯 𑌸𑌰𑍍𑌵𑍇 𑌶𑍋𑌕𑌸𑌮𑌨𑍍𑌵𑌿𑌤𑌾𑌃 ॥ 3 ॥
𑌤𑌤𑌸𑍍𑌤𑌾𑌰𑌾 𑌪𑌤𑌿𑌂 𑌦𑍃𑌷𑍍𑌟𑍍𑌵𑌾 𑌶𑌿𑌬𑌿𑌕𑌾𑌤𑌲𑌶𑌾𑌯𑌿𑌨𑌮𑍍 ॥ 3 ॥
𑌆𑌰𑍋𑌪𑍍𑌯𑌾𑌂𑌕𑍇 𑌶𑌿𑌰𑌸𑍍𑌤𑌸𑍍𑌯 𑌵𑌿𑌲𑌲𑌾𑌪 𑌸𑍁𑌦𑍁𑌃𑌖𑌿𑌤𑌾 ।
𑌹𑌾 𑌵𑌾𑌨𑌰 𑌮𑌹𑌾𑌰𑌾𑌜 𑌹𑌾 𑌨𑌾𑌥 𑌮𑌮 𑌵𑌤𑍍𑌸𑌲 ॥ 40 ॥
𑌹𑌾 𑌮𑌹𑌾𑌰𑍍𑌹 𑌮𑌹𑌾𑌬𑌾𑌹𑍋 𑌹𑌾 𑌮𑌮 𑌪𑍍𑌰𑌿𑌯 𑌪𑌶𑍍𑌯 𑌮𑌾𑌮𑍍 ।
𑌜𑌨𑌂 𑌨 𑌪𑌶𑍍𑌯𑌸𑍀𑌮𑌂 𑌤𑍍𑌵𑌂 𑌕𑌸𑍍𑌮𑌾𑌚𑍍𑌛𑍋𑌕𑌾𑌭𑌿𑌪𑍀𑌡𑌿𑌤𑌮𑍍 ॥ 41 ॥
𑌪𑍍𑌰𑌹𑍃𑌷𑍍𑌟𑌮𑌿𑌵 𑌤𑍇 𑌵𑌕𑍍𑌤𑍍𑌰𑌂 𑌗𑌤𑌾𑌸𑍋𑌰𑌪𑌿 𑌮𑌾𑌨𑌦 𑌆𑌸𑍍𑌤𑌾𑌰𑍍𑌕𑌸𑌮𑌵𑌰𑍍𑌣𑌂 𑌚 𑌲𑌕𑍍𑌷𑍍𑌯𑌤𑍇 𑌜𑍀𑌵𑌤𑍋 𑌯𑌥𑌾 ॥ 42 ॥
𑌏𑌷 𑌤𑍍𑌵𑌾𑌂 𑌰𑌾𑌮𑌰𑍂𑌪𑍇𑌣 𑌕𑌾𑌲𑌃 𑌕𑌰𑍍𑌷𑌤𑌿 𑌵𑌾𑌨𑌰 ।
𑌯𑍇𑌨 𑌸𑍍𑌮 𑌵𑌿𑌧𑌵𑌾𑌸𑍍𑌸𑌰𑍍𑌵𑌾𑌃 𑌕𑍃𑌤𑌾 𑌏𑌕𑍇𑌷𑍁𑌣𑌾 𑌵𑌨𑍇 ॥ 43 ॥
𑌇𑌮𑌾𑌸𑍍𑌤𑌾𑌸𑍍𑌤𑌵 𑌰𑌾𑌜𑍇𑌂𑌦𑍍𑌰 𑌵𑌾𑌨𑌰𑍍𑌯𑍋𑌵𑌲𑍍𑌲𑌭𑌾𑌸𑍍𑌸𑌦𑌾 ।
𑌪𑌾𑌦𑍈𑌰𑍍𑌵𑌿𑌕𑍃𑌷𑍍𑌟 𑌮𑌧𑍍𑌵𑌾𑌨𑌮𑌾𑌗𑌤𑌾𑌃 𑌕𑌿𑌂 𑌨 𑌬𑍁𑌧𑍍𑌯𑌸𑍇 ॥ 44 ॥
𑌤𑌵𑍇𑌷𑍍𑌟𑌾 𑌨𑌨𑍁 𑌨𑌾𑌮𑍈𑌤𑌾 𑌭𑌾𑌰𑍍𑌯𑌾𑌶𑍍𑌚𑌂𑌦𑍍𑌰𑌨𑌿𑌭𑌾𑌨𑌨𑌾𑌃 ।
𑌇𑌦𑌾𑌨𑍀𑌂 𑌨𑍇𑌕𑍍𑌷𑌸𑍇 𑌕𑌸𑍍𑌤𑌾𑌤𑍍𑌸𑍁𑌗𑍍𑌰𑍀𑌵𑌂 𑌪𑍍𑌲𑌵𑌗𑍇𑌶𑍍𑌵𑌰𑌮𑍍 ॥ 45 ॥
𑌏𑌤𑍇 𑌹𑌿 𑌸𑌚𑌿𑌵𑌾 𑌰𑌾𑌜𑌂 𑌸𑍍𑌤𑌾𑌰𑌪𑍍𑌰𑌭𑍃𑌤𑌯𑌸𑍍𑌤𑌵 ।
𑌪𑍁𑌰𑌵𑌾𑌸𑍀 𑌜𑌨𑌶𑍍𑌚𑌾𑌯𑌂 𑌪𑌰𑌿𑌵𑌾𑌰𑍍𑌯𑌾𑌸𑌤𑍇𑌽𑌨𑌘 ॥ 46 ॥
𑌵𑌿𑌸𑌰𑍍𑌜𑌯𑍈𑌤𑌾𑌨𑍍 𑌪𑍍𑌲𑌵𑌗𑌾𑌨𑍍𑌯𑌥𑍋𑌚𑌿𑌤𑌮𑌰𑌿𑌂𑌦𑌮 ।
𑌤𑌤𑌃 𑌕𑍍𑌰𑍀𑌡𑌾𑌮𑌹𑍇 𑌸𑌰𑍍𑌵𑌾 𑌵𑌨𑍇𑌷𑍁 𑌮𑌦𑌨𑍋𑌤𑍍𑌕𑌟𑌾𑌃 ॥ 4 ॥
𑌏𑌵𑌂 𑌵𑌿𑌲𑌪𑌤𑍀𑌂 𑌤𑌾𑌰𑌾𑌂 𑌪𑌤𑌿𑌶𑍋𑌕𑌪𑌰𑌿𑌪𑍍𑌲𑍁𑌤𑌾𑌮𑍍 ।
𑌉𑌤𑍍𑌥𑌾𑌪𑌯𑌂𑌤𑌿 𑌸𑍍𑌮 𑌤𑌦𑌾 𑌵𑌾𑌨𑌰𑍍𑌯𑌶𑍍𑌶𑍋𑌕𑌕𑌰𑍍𑌶𑌿𑌤𑌾𑌃 ॥ 4 ॥
𑌸𑍁𑌗𑍍𑌰𑍀𑌵𑍇𑌣 𑌤𑌤𑌸𑍍𑌸𑌾𑌰𑍍𑌧𑌂𑌮𑌂𑌗𑌦𑌃 𑌪𑌿𑌤𑌰𑌂 𑌰𑍁𑌦𑌨𑍍 ।
𑌚𑌿𑌤𑌾𑌮𑌾𑌰𑍋𑌪𑌯𑌾𑌮𑌾𑌸 𑌶𑍋𑌕𑍇𑌨𑌾𑌭𑌿𑌹𑌤𑍇𑌂𑌦𑍍𑌰𑌿𑌯𑌃 ॥ 4 ॥
𑌤𑌤𑍋𑌽𑌗𑍍𑌨𑌿𑌂 𑌵𑌿𑌧𑌿𑌵𑌦𑍍𑌦𑌤𑍍𑌤𑍍𑌵𑌾 𑌸𑍋𑌽𑌪𑌸𑌵𑍍𑌯𑌂 𑌚𑌕𑌾𑌰 𑌹 ।
𑌪𑌿𑌤𑌰𑌂 𑌦𑍀𑌰𑍍𑌘𑌮𑌧𑍍𑌵𑌾𑌨𑌂 𑌪𑍍𑌰𑌸𑍍𑌥𑌿𑌤𑌂 𑌵𑍍𑌯𑌾𑌕𑍁𑌲𑍇𑌂𑌦𑍍𑌰𑌿𑌯𑌃 ॥ 50 ॥
𑌸𑌂𑌸𑍍𑌕𑍃𑌤𑍍𑌯 𑌵𑌾𑌲𑌿𑌨𑌂 𑌤𑍇 𑌤𑍁 𑌵𑌿𑌧𑌿𑌪𑍂𑌰𑍍𑌵𑌂 𑌪𑍍𑌲𑌵𑌂𑌗𑌮𑌾𑌃 ।
𑌆𑌜𑌗𑍍𑌮𑍁𑌰𑍁𑌦𑌕𑌂 𑌕𑌰𑍍𑌤𑍁𑌂 𑌨𑌦𑍀𑌂 𑌶𑍁𑌭𑌜𑌲𑌾𑌂 𑌶𑌿𑌵𑌾𑌮𑍍 ॥ 51 ॥
𑌤𑌤𑌸𑍍𑌤𑍇 𑌸𑌹𑌿𑌤𑌾𑌸𑍍𑌤𑌤𑍍𑌰 𑌹𑍍𑌯𑌂𑌗𑌦𑌂 𑌸𑍍𑌥𑌾𑌪𑍍𑌯 𑌚𑌾𑌗𑍍𑌰𑌤𑌃 ।
𑌸𑍁𑌗𑍍𑌰𑍀𑌵𑌤𑌾𑌰𑌾𑌸𑌹𑌿𑌤𑌾𑌸𑍍𑌸𑌿𑌷𑌿𑌚𑍁𑌰𑍍𑌵𑌾𑌲𑌿𑌨𑍇 𑌜𑌲𑌮𑍍 ॥ 52 ॥
𑌸𑍁𑌗𑍍𑌰𑍀𑌵𑍇𑌣𑍇𑌵 𑌦𑍀𑌨𑍇𑌨 𑌦𑍀𑌨𑍋 𑌭𑍂𑌤𑍍𑌵𑌾 𑌮𑌹𑌾𑌬𑌲𑌃 ।
𑌸𑌮𑌾𑌨𑌶𑍋𑌕𑌃 𑌕𑌾𑌕𑍁𑌤𑍍𑌸𑍍𑌥𑌃 𑌪𑍍𑌰𑍇𑌤𑌕𑌾𑌰𑍍𑌯𑌾𑌣𑍍𑌯𑌕𑌾𑌰𑌯𑌤𑍍 ॥ 53 ॥
𑌤𑌤𑌸𑍍𑌤𑍁 𑌤𑌂 𑌵𑌾𑌲𑌿𑌨𑌮𑌗𑍍𑌰𑍍𑌯𑌪𑍌𑌰𑍁𑌷𑌂 𑌪𑍍𑌰𑌕𑌾𑌶𑌮𑌿𑌕𑍍𑌷𑍍𑌵𑌾𑌕𑍁𑌵𑌰𑍇𑌷𑍁𑌣𑌾 𑌹𑌤𑌮𑍍 ।
𑌪𑍍𑌰𑌦𑍀𑌪𑍍𑌯 𑌦𑍀𑌪𑍍𑌤𑌾𑌗𑍍𑌨𑌿𑌸𑌮𑍌𑌜𑌸𑌂 𑌤𑌦𑌾 𑌸𑌲𑌕𑍍𑌷𑍍𑌮𑌣𑌂 𑌰𑌾𑌮𑌮𑍁𑌪𑍇𑌯𑌿𑌵𑌾𑌨𑍍𑌹𑌰𑌿𑌃 ॥ 54 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑌂𑌚𑌵𑌿𑌂𑌶𑌸𑍍𑌸𑌰𑍍𑌗𑌃 ॥
