𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑍌 𑌕𑌬𑌂𑌧𑍇𑌨 𑌤𑌂 𑌮𑌾𑌰𑍍𑌗𑌂 𑌪𑌂𑌪𑌾𑌯𑌾 𑌦𑌰𑍍𑌶𑌿𑌤𑌂 𑌵𑌨𑍇 ।
𑌪𑍍𑌰𑌤𑌸𑍍𑌥𑌤𑍁𑌰𑍍𑌦𑌿𑌶𑌂 𑌗𑍃𑌹𑍍𑌯 𑌪𑍍𑌰𑌤𑍀𑌚𑍀𑌂 𑌨𑍃𑌵𑌰𑌾𑌤𑍍𑌮𑌜𑍌 ॥ 1 ॥
𑌤𑍌 𑌶𑍈𑌲𑍇𑌷𑍍𑌵𑌾𑌚𑌿𑌤𑌾𑌨𑍇𑌕𑌾𑌨𑍍 𑌕𑍍𑌷𑍌𑌦𑍍𑌰𑌕𑌲𑍍𑌪𑌫𑌲𑌾𑌂𑌦𑍍𑌰𑍁𑌮𑌾𑌨𑍍 ।
𑌵𑍀𑌕𑍍𑌷𑌂𑌤𑍌 𑌜𑌗𑍍𑌮𑌤𑍁𑌰𑍍𑌧𑍍𑌰𑌷𑍍𑌟𑍁𑌂 𑌸𑍁𑌗𑍍𑌰𑍀𑌵𑌂 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 2 ॥
𑌕𑍃𑌤𑍍𑌵𑌾 𑌚 𑌶𑍈𑌲𑌪𑍃𑌷𑍍𑌠𑍇 𑌤𑍁 𑌤𑍌 𑌵𑌾𑌸𑌂 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌪𑌂𑌪𑌾𑌯𑌾𑌃 𑌪𑌶𑍍𑌚𑌿𑌮𑌂 𑌤𑍀𑌰𑌂 𑌰𑌾𑌘𑌵𑌾𑌵𑍁𑌪𑌤𑌸𑍍𑌥𑌤𑍁𑌃 ॥ 3 ॥
𑌤𑍌 𑌪𑍁𑌷𑍍𑌕𑌰𑌿𑌣𑍍𑌯𑌾𑌃 𑌪𑌂𑌪𑌾𑌯𑌾𑌸𑍍𑌤𑍀𑌰𑌮𑌾𑌸𑌾𑌦𑍍𑌯 𑌪𑌶𑍍𑌚𑌿𑌮𑌮𑍍 ।
𑌅𑌪𑌶𑍍𑌯𑌤𑌾𑌂 𑌤𑌤𑌸𑍍𑌤𑌤𑍍𑌰 𑌶𑌬𑌰𑍍𑌯𑌾 𑌰𑌮𑍍𑌯𑌮𑌾𑌶𑍍𑌰𑌮𑌮𑍍 ॥ 4 ॥
𑌤𑍌 𑌤𑌮𑌾𑌶𑍍𑌰𑌮𑌮𑌾𑌸𑌾𑌦𑍍𑌯 𑌦𑍍𑌰𑍁𑌮𑍈𑌰𑍍𑌬𑌹𑍁𑌭𑍀𑌰𑌾𑌵𑍃𑌤𑌮𑍍 ।
𑌸𑍁𑌰𑌮𑍍𑌯𑌮𑌭𑌿𑌵𑍀𑌕𑍍𑌷𑌂𑌤𑍌 𑌶𑌬𑌰𑍀𑌮𑌭𑍍𑌯𑍁𑌪𑍇𑌯𑌤𑍁𑌃 ॥ 5 ॥
𑌤𑍌 𑌚 𑌦𑍃𑌷𑍍𑌟𑍍𑌵𑌾 𑌤𑌦𑌾 𑌸𑌿𑌦𑍍𑌧𑌾 𑌸𑌮𑍁𑌤𑍍𑌥𑌾𑌯 𑌕𑍃𑌤𑌾𑌂𑌜𑌲𑌿𑌃 ।
𑌰𑌾𑌮𑌸𑍍𑌯 𑌪𑌾𑌦𑍌 𑌜𑌗𑍍𑌰𑌾𑌹 𑌲𑌕𑍍𑌷𑍍𑌮𑌣𑌸𑍍𑌯 𑌚 𑌧𑍀𑌮𑌤𑌃 ॥ 6 ॥
𑌪𑌾𑌦𑍍𑌯𑌮𑌾𑌚𑌮𑌨𑍀𑌯𑌂 𑌚 𑌸𑌰𑍍𑌵𑌂 𑌪𑍍𑌰𑌾𑌦𑌾𑌦𑍍𑌯𑌥𑌾𑌵𑌿𑌧𑌿 ।
𑌤𑌾𑌮𑍁𑌵𑌾𑌚 𑌤𑌤𑍋 𑌰𑌾𑌮𑌶𑍍𑌶𑍍𑌰𑌮𑌣𑍀𑌂 𑌸𑌂𑌶𑌿𑌤𑌵𑍍𑌰𑌤𑌾𑌮𑍍 ॥ ॥
𑌕𑌚𑍍𑌚𑌿𑌤𑍍𑌤𑍇 𑌨𑌿𑌰𑍍𑌜𑌿𑌤𑌾 𑌵𑌿𑌘𑍍𑌨𑌾𑌃 𑌕𑌚𑍍𑌚𑌿𑌤𑍍𑌤𑍇 𑌵𑌰𑍍𑌧𑌤𑍇 𑌤𑌪𑌃 ।
𑌕𑌚𑍍𑌚𑌿𑌤𑍍𑌤𑍇 𑌨𑌿𑌯𑌤𑌃 𑌕𑍍𑌰𑍋𑌧 𑌆𑌹𑌾𑌰𑌶𑍍𑌚 𑌤𑌪𑍋𑌧𑌨𑍇 ॥ ॥
𑌕𑌚𑍍𑌚𑌿𑌤𑍍𑌤𑍇 𑌨𑌿𑌯𑌮𑌾𑌃 𑌪𑍍𑌰𑌾𑌪𑍍𑌤𑌾𑌃 𑌕𑌚𑍍𑌚𑌿𑌤𑍍𑌤𑍇 𑌮𑌨𑌸𑌃 𑌸𑍁𑌖𑌮𑍍 ।
𑌕𑌚𑍍𑌚𑌿𑌤𑍍𑌤𑍇 𑌗𑍁𑌰𑍁𑌶𑍁𑌶𑍍𑌰𑍂𑌷𑌾 𑌸𑌫𑌲𑌾 𑌚𑌾𑌰𑍁𑌭𑌾𑌷𑌿𑌣𑌿 ॥ ॥
𑌰𑌾𑌮𑍇𑌣 𑌤𑌾𑌪𑌸𑍀 𑌪𑍃𑌷𑍍𑌟𑌾 𑌸𑌾 𑌸𑌿𑌦𑍍𑌧𑌾 𑌸𑌿𑌦𑍍𑌧𑌸𑌮𑍍𑌮𑌤𑌾 ।
𑌶𑌶𑌂𑌸 𑌶𑌬𑌰𑍀 𑌵𑍃𑌦𑍍𑌧𑌾 𑌰𑌾𑌮𑌾𑌯 𑌪𑍍𑌰𑌤𑍍𑌯𑍁𑌪𑌸𑍍𑌥𑌿𑌤𑌾 ॥ 10 ॥
𑌅𑌦𑍍𑌯 𑌪𑍍𑌰𑌾𑌪𑍍𑌤𑌾 𑌤𑌪𑌸𑍍𑌸𑌿𑌦𑍍𑌧𑌿𑌸𑍍𑌤𑌵 𑌸𑌂𑌦𑌰𑍍𑌶𑌨𑌾𑌨𑍍𑌮𑌯𑌾 ।
𑌅𑌦𑍍𑌯 𑌮𑍇 𑌸𑌫𑌲𑌂 𑌤𑌪𑍍𑌤𑌂 𑌗𑍁𑌰𑌵𑌶𑍍𑌚 𑌸𑍁𑌪𑍂𑌜𑌿𑌤𑌾𑌃 ॥ 11 ॥
𑌅𑌦𑍍𑌯 𑌮𑍇 𑌸𑌫𑌲𑌂 𑌜𑌨𑍍𑌮 𑌸𑍍𑌵𑌰𑍍𑌗𑌶𑍍𑌚𑍈𑌵 𑌭𑌵𑌿𑌷𑍍𑌯𑌤𑌿 ।
𑌤𑍍𑌵𑌯𑌿 𑌦𑍇𑌵𑌵𑌰𑍇 𑌰𑌾𑌮 𑌪𑍂𑌜𑌿𑌤𑍇 𑌪𑍁𑌰𑍁𑌷𑌰𑍍𑌷𑌭 ॥ 12 ॥
𑌚𑌕𑍍𑌷𑍁𑌷𑌾 𑌤𑌵 𑌸𑍌𑌮𑍍𑌯𑍇𑌨 𑌪𑍂𑌤𑌾𑌸𑍍𑌮𑌿 𑌰𑌘𑍁𑌨𑌂𑌦𑌨 ।
𑌗𑌮𑌿𑌷𑍍𑌯𑌾𑌮𑍍𑌯𑌕𑍍𑌷𑌯𑌾𑌨𑍍𑌲𑍋𑌕𑌾𑌂𑌸𑍍𑌤𑍍𑌵𑌤𑍍𑌪𑍍𑌰𑌸𑌾𑌦𑌾𑌦𑌰𑌿𑌂𑌦𑌮 ॥ 13 ॥
𑌚𑌿𑌤𑍍𑌰𑌕𑍂𑌟𑌂 𑌤𑍍𑌵𑌯𑌿 𑌪𑍍𑌰𑌾𑌪𑍍𑌤𑍇 𑌵𑌿𑌮𑌾𑌨𑍈𑌰𑌤𑍁𑌲𑌪𑍍𑌰𑌭𑍈𑌃 ।
𑌇𑌤𑌸𑍍𑌤𑍇 𑌦𑌿𑌵𑌮𑌾𑌰𑍂𑌢𑌾 𑌯𑌾𑌨𑌹𑌂 𑌪𑌰𑍍𑌯𑌚𑌾𑌰𑌿𑌷𑌮𑍍 ॥ 14 ॥
𑌤𑍈𑌶𑍍𑌚𑌾𑌹𑌮𑍁𑌕𑍍𑌤𑌾 𑌧𑌰𑍍𑌮𑌜𑍍𑌞𑍈𑌰𑍍𑌮𑌹𑌾𑌭𑌾𑌗𑍈𑌰𑍍𑌮𑌹𑌰𑍍𑌷𑌿𑌭𑌿𑌃 ।
𑌆𑌗𑌮𑌿𑌷𑍍𑌯𑌤𑌿 𑌤𑍇 𑌰𑌾𑌮𑌸𑍍𑌸𑍁𑌪𑍁𑌣𑍍𑌯𑌮𑌿𑌮𑌮𑌾𑌶𑍍𑌰𑌮𑌮𑍍 ॥ 15 ॥
𑌸 𑌤𑍇 𑌪𑍍𑌰𑌤𑌿𑌗𑍍𑌰𑌹𑍀𑌤𑌵𑍍𑌯𑌸𑍍𑌸𑍌𑌮𑌿𑌤𑍍𑌰𑌿𑌸𑌹𑌿𑌤𑍋𑌤𑌿𑌥𑌿𑌃 ।
𑌤𑌂 𑌚 𑌦𑍃𑌷𑍍𑌟𑍍𑌵𑌾 𑌵𑌰𑌾𑌨𑍍𑌲𑍋𑌕𑌾𑌨𑌕𑍍𑌷𑌯𑌾𑌂𑌸𑍍𑌤𑍍𑌵𑌂 𑌗𑌮𑌿𑌷𑍍𑌯𑌸𑌿 ॥ 16 ॥
𑌮𑌯𑌾 𑌤𑍁 𑌵𑌿𑌵𑌿𑌧𑌂 𑌵𑌨𑍍𑌯𑌂 𑌸𑌂𑌚𑌿𑌤𑌂 𑌪𑍁𑌰𑍁𑌷𑌰𑍍𑌷𑌭 ।
𑌤𑌵𑌾𑌰𑍍𑌥𑍇 𑌪𑍁𑌰𑍁𑌷𑌵𑍍𑌯𑌾𑌘𑍍𑌰 𑌪𑌂𑌪𑌾𑌯𑌾𑌸𑍍𑌤𑍀𑌰𑌸𑌂𑌭𑌵𑌮𑍍 ॥ 1 ॥
𑌏𑌵𑌮𑍁𑌕𑍍𑌤𑌸𑍍𑌸 𑌧𑌰𑍍𑌮𑌾𑌤𑍍𑌮𑌾 𑌶𑌬𑌰𑍍𑌯𑌾 𑌶𑌬𑌰𑍀𑌮𑌿𑌦𑌮𑍍 ।
𑌰𑌾𑌘𑌵𑌃 𑌪𑍍𑌰𑌾𑌹 𑌵𑌿𑌜𑍍𑌞𑌾𑌨𑍇 𑌤𑌾𑌂 𑌨𑌿𑌤𑍍𑌯𑌮𑌬𑌹𑌿𑌷𑍍𑌕𑍃𑌤𑌾𑌮𑍍 ॥ 1 ॥
𑌦𑌨𑍋𑌸𑍍𑌸𑌕𑌾𑌶𑌾𑌤𑍍𑌤𑌤𑍍𑌤𑍍𑌵𑍇𑌨 𑌪𑍍𑌰𑌭𑌾𑌵𑌂 𑌤𑍇 𑌮𑌹𑌾𑌤𑍍𑌮𑌨𑌃 ।
𑌶𑍍𑌰𑍁𑌤𑌂 𑌪𑍍𑌰𑌤𑍍𑌯𑌕𑍍𑌷𑌮𑌿𑌚𑍍𑌛𑌾𑌮𑌿 𑌸𑌂𑌦𑍍𑌰𑌷𑍍𑌟𑍁𑌂 𑌯𑌦𑌿 𑌮𑌨𑍍𑌯𑌸𑍇 ॥ 1 ॥
𑌏𑌤𑌤𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌤𑌾 𑌰𑌾𑌮𑌵𑌕𑍍𑌤𑍍𑌰𑌾𑌦𑍍𑌵𑌿𑌨𑌿𑌸𑍍𑌸𑍃𑌤𑌮𑍍 ।
𑌶𑌬𑌰𑍀 𑌦𑌰𑍍𑌶𑌯𑌾𑌮𑌾𑌸 𑌤𑌾𑌵𑍁𑌭𑍌 𑌤𑌦𑍍𑌵𑌨𑌂 𑌮𑌹𑌤𑍍 ॥ 20 ॥
𑌪𑌶𑍍𑌯 𑌮𑍇𑌘𑌘𑌨𑌪𑍍𑌰𑌖𑍍𑌯𑌂 𑌮𑍃𑌗𑌪𑌕𑍍𑌷𑌿𑌸𑌮𑌾𑌕𑍁𑌲𑌮𑍍 ।
𑌮𑌤𑌂𑌗𑌵𑌨𑌮𑌿𑌤𑍍𑌯𑍇𑌵 𑌵𑌿𑌶𑍍𑌰𑍁𑌤𑌂 𑌰𑌘𑍁𑌨𑌂𑌦𑌨 ॥ 21 ॥
𑌇𑌹 𑌤𑍇 𑌭𑌾𑌵𑌿𑌤𑌾𑌤𑍍𑌮𑌾𑌨𑍋 𑌗𑍁𑌰𑌵𑍋 𑌮𑍇 𑌮𑌹𑌾𑌵𑌨𑍇 ।
𑌜𑍁𑌹𑌵𑌾𑌂𑌚𑌕𑍍𑌰𑌿𑌰𑍇 𑌤𑍀𑌰𑍍𑌥𑌂 𑌮𑌂𑌤𑍍𑌰𑌵𑌨𑍍𑌮𑌂𑌤𑍍𑌰𑌪𑍂𑌜𑌿𑌤𑌮𑍍 ॥ 22 ॥
𑌇𑌯𑌂 𑌪𑍍𑌰𑌤𑍍𑌯𑌕𑍍𑌥𑍍𑌸𑌲𑍀 𑌵𑍇𑌦𑌿𑌰𑍍𑌯𑌤𑍍𑌰 𑌤𑍇 𑌮𑍇 𑌸𑍁𑌸𑌤𑍍𑌕𑍃𑌤𑌾𑌃 ।
𑌪𑍁𑌷𑍍𑌪𑍋𑌪𑌹𑌾𑌰𑌂 𑌕𑍁𑌰𑍍𑌵𑌂𑌤𑌿 𑌶𑍍𑌰𑌮𑌾𑌦𑍁𑌦𑍍𑌵𑍇𑌪𑌿𑌭𑌿𑌃 𑌕𑌰𑍈𑌃 ॥ 23 ॥
𑌤𑍇𑌷𑌾𑌂 𑌤𑌪𑌃𑌪𑍍𑌰𑌭𑌾𑌵𑍇𑌣 𑌪𑌶𑍍𑌯𑌾𑌦𑍍𑌯𑌾𑌪𑌿 𑌰𑌘𑍂𑌦𑍍𑌵𑌹 ।
𑌦𑍍𑌯𑍋𑌤𑌯𑌂𑌤𑌿 𑌦𑌿𑌶𑌸𑍍𑌸𑌰𑍍𑌵𑌾𑌶𑍍𑌶𑍍𑌰𑌿𑌯𑌾 𑌵𑍇𑌦𑍍𑌯𑍋𑌽𑌤𑍁𑌲𑌪𑍍𑌰𑌭𑌾𑌃 ॥ 24 ॥
𑌅𑌶𑌕𑍍𑌨𑍁𑌵𑌦𑍍𑌭𑌿𑌸𑍍𑌤𑍈𑌰𑍍𑌗𑌂𑌤𑍁𑌮𑍁𑌪𑌵𑌾𑌸𑌶𑍍𑌰𑌮𑌾𑌲𑌸𑍈𑌃 ।
𑌚𑌿𑌂𑌤𑌿𑌤𑍇𑌽𑌭𑍍𑌯𑌾𑌗𑌤𑌾𑌨𑍍𑌪𑌶𑍍𑌯 𑌸𑌹𑌿𑌤𑌾𑌨𑍍𑌸𑌪𑍍𑌤𑌸𑌾𑌗𑌰𑌾𑌨𑍍 ॥ 25 ॥
𑌕𑍃𑌤𑌾𑌭𑌿𑌷𑍇𑌕𑍈𑌸𑍍𑌤𑍈𑌰𑍍𑌨𑍍𑌯𑌸𑍍𑌤𑌾 𑌵𑌲𑍍𑌕𑌲𑌾𑌃 𑌪𑌾𑌦𑌪𑍇𑌷𑍍𑌵𑌿𑌹 ।
𑌅𑌦𑍍𑌯𑌾𑌪𑌿 𑌨𑌾𑌵𑌶𑍁𑌷𑍍𑌯𑌂𑌤𑌿 𑌪𑍍𑌰𑌦𑍇𑌶𑍇 𑌰𑌘𑍁𑌨𑌂𑌦𑌨 ॥ 26 ॥
𑌦𑍇𑌵𑌕𑌾𑌰𑍍𑌯𑌾𑌣𑌿 𑌕𑍁𑌰𑍍𑌵𑌦𑍍𑌭𑌿𑌰𑍍𑌯𑌾𑌨𑍀𑌮𑌾𑌨𑌿 𑌕𑍃𑌤𑌾𑌨𑌿 𑌵𑍈 ।
𑌪𑍁𑌷𑍍𑌪𑍈𑌃𑌕𑍁𑌵𑌲𑌯𑍈𑌸𑍍𑌸𑌾𑌰𑍍𑌧𑌂 𑌮𑍍𑌲𑌾𑌨𑌤𑍍𑌵𑌂 𑌨𑍋𑌪𑌯𑌾𑌂𑌤𑌿𑌵𑍈 ॥ 2 ॥
𑌕𑍃𑌤𑍍𑌸𑍍𑌨𑌂 𑌵𑌨𑌮𑌿𑌦𑌂 𑌦𑍃𑌷𑍍𑌟𑌂 𑌶𑍍𑌰𑍋𑌤𑌵𑍍𑌯𑌂 𑌚 𑌶𑍍𑌰𑍁𑌤𑌂 𑌤𑍍𑌵𑌯𑌾 ।
𑌤𑌦𑌿𑌚𑍍𑌛𑌾𑌮𑍍𑌯𑌭𑍍𑌯𑌨𑍁𑌜𑍍𑌞𑌾𑌤𑌾 𑌤𑍍𑌯𑌕𑍍𑌤𑍁𑌮𑍇𑌤𑌤𑍍𑌕𑌲𑍇𑌬𑌰𑌮𑍍 ॥ 2 ॥
𑌤𑍇𑌷𑌾𑌮𑌿𑌚𑍍𑌛𑌾𑌮𑍍𑌯𑌹𑌂 𑌗𑌂𑌤𑍁𑌂 𑌸𑌮𑍀𑌪𑌂 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ।
𑌮𑍁𑌨𑍀𑌨𑌾𑌮𑌾𑌶𑍍𑌰𑌮𑍋 𑌯𑍇𑌷𑌾𑌮𑌹𑌂 𑌚 𑌪𑌰𑌿𑌚𑌾𑌰𑌿𑌣𑍀 ॥ 2 ॥
𑌧𑌰𑍍𑌮𑌿𑌷𑍍𑌠𑌂 𑌤𑍁 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌰𑌾𑌘𑌵𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ।
𑌪𑍍𑌰𑌹𑌰𑍍𑌷𑌮𑌤𑍁𑌲𑌂 𑌲𑍇𑌭𑍇 𑌆𑌶𑍍𑌚𑌰𑍍𑌯𑌮𑌿𑌤𑌿 𑌤𑌤𑍍𑌤𑍍𑌵𑌤𑌃 ॥ 30 ॥
𑌤𑌾𑌮𑍁𑌵𑌾𑌚 𑌤𑌤𑍋 𑌰𑌾𑌮𑌶𑍍𑌶𑍍𑌰𑌮𑌣𑍀𑌂 𑌸𑌂𑌶𑌿𑌤𑌵𑍍𑌰𑌤𑌾𑌮𑍍 ।
𑌅𑌰𑍍𑌚𑌿𑌤𑍋𑌽𑌹𑌂 𑌤𑍍𑌵𑌯𑌾 𑌭𑌕𑍍𑌤𑍍𑌯𑌾 𑌗𑌚𑍍𑌛𑌕𑌾𑌮𑌂 𑌯𑌥𑌾𑌸𑍁𑌖𑌮𑍍 ॥ 31 ॥
𑌇𑌤𑍍𑌯𑍁𑌕𑍍𑌤𑌾 𑌜𑌟𑌿𑌲𑌾 𑌵𑍃𑌦𑍍𑌧𑌾 𑌚𑍀𑌰𑌕𑍃𑌷𑍍𑌣𑌾𑌜𑌿𑌨𑌾𑌂𑌬𑌰𑌾 ।
𑌤𑌸𑍍𑌮𑌿𑌨𑍍𑌮𑍁𑌹𑍂𑌰𑍍𑌤𑍇 𑌶𑌬𑌰𑍀 𑌦𑍇𑌹𑌂 𑌜𑍀𑌰𑍍𑌣𑌂 𑌜𑌿𑌹𑌾𑌸𑌤𑍀 ॥ 32 ॥
𑌅𑌨𑍁𑌜𑍍𑌞𑌾𑌤𑌾 𑌤𑍁 𑌰𑌾𑌮𑍇𑌣 𑌹𑍁𑌤𑍍𑌵𑌾𑌤𑍍𑌮𑌾𑌨𑌂 𑌹𑍁𑌤𑌾𑌶𑌨𑍇 ।
𑌜𑍍𑌵𑌲𑌤𑍍𑌪𑌾𑌵𑌕𑌸𑌂𑌕𑌾𑌶𑌾 𑌸𑍍𑌵𑌰𑍍𑌗𑌮𑍇𑌵 𑌜𑌗𑌾𑌮 𑌸𑌾 ॥ 33 ॥
𑌦𑌿𑌵𑍍𑌯𑌾𑌭𑌰𑌣𑌸𑌂𑌯𑍁𑌕𑍍𑌤𑌾 𑌦𑌿𑌵𑍍𑌯𑌮𑌾𑌲𑍍𑌯𑌾𑌨𑍁𑌲𑍇𑌪𑌨𑌾 ।
𑌦𑌿𑌵𑍍𑌯𑌾𑌂𑌬𑌰𑌧𑌰𑌾 𑌤𑌤𑍍𑌰 𑌬𑌭𑍂𑌵 𑌪𑍍𑌰𑌿𑌯𑌦𑌰𑍍𑌶𑌨𑌾 ॥ 34 ॥
𑌵𑌿𑌰𑌾𑌜𑌯𑌂𑌤𑍀 𑌤𑌂 𑌦𑍇𑌶𑌂 𑌵𑌿𑌦𑍍𑌯𑍁𑌤𑍍𑌸𑍌𑌦𑌾𑌮𑌿𑌨𑍀 𑌯𑌥𑌾 ।
𑌯𑌤𑍍𑌰 𑌤𑍇 𑌸𑍁𑌕𑍃𑌤𑌾𑌤𑍍𑌮𑌾𑌨𑍋 𑌵𑌿𑌹𑌰𑌂𑌤𑌿 𑌮𑌹𑌰𑍍𑌷𑌯𑌃 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌚𑌤𑍁𑌃𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
