𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌏𑌕𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸 𑌚 𑌵𑌾𑌗𑍍𑌭𑌿𑌃 𑌪𑍍𑌰𑌶𑌸𑍍𑌤𑌾𑌭𑌿𑌰𑍍𑌗𑌮𑌿𑌷𑍍𑌯𑌨𑍍𑌪𑍂𑌜𑌿𑌤𑌸𑍍𑌤𑌯𑌾 ।
𑌤𑌸𑍍𑌮𑌾𑌦𑍍𑌦𑍇𑌶𑌾𑌦𑌪𑌕𑍍𑌰𑌮𑍍𑌯 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 1 ॥
𑌅𑌲𑍍𑌪𑌶𑍇𑌷𑌮𑌿𑌦𑌂 𑌕𑌾𑌰𑍍𑌯𑌂 𑌦𑍃𑌷𑍍𑌟𑍇𑌯𑌮𑌸𑌿𑌤𑍇𑌕𑍍𑌷𑌣𑌾 ।
𑌤𑍍𑌰𑍀𑌨𑍁𑌪𑌾𑌯𑌾𑌨𑌤𑌿𑌕𑍍𑌰𑌮𑍍𑌯 𑌚𑌤𑍁𑌰𑍍𑌥𑌃 𑌇𑌹 𑌵𑌿𑌦𑍍𑌯𑌤𑍇 ॥ 2 ॥
𑌨 𑌸𑌾𑌮 𑌰𑌕𑍍𑌷𑌸𑍍𑌸𑍁 𑌗𑍁𑌣𑌾𑌯 𑌕𑌲𑍍𑌪𑌤𑍇 𑌨 𑌦𑌾𑌨𑌮𑌰𑍍𑌥𑍋𑌪𑌚𑌿𑌤𑍇𑌷𑍁 𑌯𑍁𑌜𑍍𑌯𑌤𑍇 ।
𑌨 𑌭𑍇𑌦𑌸𑌾𑌧𑍍𑌯𑌾 𑌬𑌲𑌦𑌰𑍍𑌪𑌿𑌤𑌾 𑌜𑌨𑌾𑌃 𑌪𑌰𑌾𑌕𑍍𑌰𑌮𑌸𑍍𑌤𑍍𑌵𑍇𑌵 𑌮𑌮𑍇𑌹 𑌰𑍋𑌚𑌤𑍇 ॥ 3 ॥
𑌨 𑌚𑌾𑌸𑍍𑌯 𑌕𑌾𑌰𑍍𑌯𑌸𑍍𑌯 𑌪𑌰𑌾𑌕𑍍𑌰𑌮𑌾𑌦𑍃𑌤𑍇 𑌵𑌿𑌨𑌿𑌶𑍍𑌚𑌯𑌃 𑌕𑌶𑍍𑌚𑌿𑌦𑌿𑌹𑍋𑌪𑌪𑌦𑍍𑌯𑌤𑍇 ।
𑌹𑌤𑌪𑍍𑌰𑌵𑍀𑌰𑌾 𑌹𑌿 𑌰𑌣𑍇 𑌹𑌿 𑌰𑌾𑌕𑍍𑌷𑌸𑌾𑌃 𑌕𑌥𑌂𑌚𑌿𑌦𑍀𑌯𑍁𑌰𑍍𑌯𑌦𑌿𑌹𑌾𑌦𑍍𑌯 𑌮𑌾𑌰𑍍𑌦𑌵𑌮𑍍 ॥ 4 ॥
𑌕𑌾𑌰𑍍𑌯𑍇 𑌕𑌰𑍍𑌮𑌣𑌿 𑌨𑌿𑌰𑍍𑌦𑌿𑌷𑍍𑌟𑍇 𑌯𑍋 𑌬𑌹𑍂𑌨𑍍𑌯𑌪𑌿 𑌸𑌾𑌧𑌯𑍇𑌤𑍍 ।
𑌪𑍂𑌰𑍍𑌵𑌕𑌾𑌰𑍍𑌯𑌾𑌵𑌿𑌰𑍋𑌧𑍇𑌨 𑌸 𑌕𑌾𑌰𑍍𑌯𑌂 𑌕𑌰𑍍𑌤𑍁𑌮𑌰𑍍𑌹𑌤𑌿 ॥ 5 ॥
𑌨 𑌹𑍍𑌯𑍇𑌕𑌸𑍍𑌸𑌾𑌧𑌕𑍋 𑌹𑍇𑌤𑍁𑌸𑍍𑌸𑍍𑌵𑌲𑍍𑌪𑌸𑍍𑌯𑌾𑌪𑍀𑌹 𑌕𑌰𑍍𑌮𑌣𑌃 ।
𑌯𑍋 𑌹𑍍𑌯𑌰𑍍𑌥𑌂 𑌬𑌹𑍁𑌧𑌾 𑌵𑍇𑌦 𑌸 𑌸𑌮𑌰𑍍𑌥𑍋𑌽𑌰𑍍𑌥𑌸𑌾𑌧𑌨𑍇 ॥ 6 ॥
𑌇𑌹𑍈𑌵 𑌤𑌾𑌵𑌤𑍍𑌕𑍃𑌤𑌨𑌿𑌶𑍍𑌚𑌯𑍋 𑌹𑍍𑌯𑌹𑌂 𑌯𑌦𑌿 𑌵𑍍𑌰𑌜𑍇𑌯𑌂 𑌪𑍍𑌲𑌵𑌗𑍇𑌶𑍍𑌵𑌰𑌾𑌲𑌯𑌮𑍍 ।
𑌪𑌰𑌾𑌤𑍍𑌮𑌸𑌮𑍍𑌮𑌰𑍍𑌦𑌵𑌿𑌶𑍇𑌷𑌤𑌤𑍍𑌤𑍍𑌵𑌵𑌿𑌤𑍍𑌤𑌤𑌃 𑌕𑍃𑌤𑌂 𑌸𑍍𑌯𑌾𑌨𑍍𑌮𑌮 𑌭𑌰𑍍𑌤𑍃𑌶𑌾𑌸𑌨𑌮𑍍 ॥ ॥
𑌕𑌥𑌂 𑌨𑍁 𑌖𑌲𑍍𑌵𑌦𑍍𑌯 𑌭𑌵𑍇𑌤𑍍𑌸𑍁𑌖𑌾𑌗𑌤𑌂 𑌪𑍍𑌰𑌸𑌹𑍍𑌯 𑌯𑍁𑌦𑍍𑌧𑌂 𑌮𑌮 𑌰𑌾𑌕𑍍𑌷𑌸𑍈𑌃 𑌸𑌹 ।
𑌤𑌥𑍈𑌵 𑌖𑌲𑍍𑌵𑌾𑌤𑍍𑌮𑌬𑌲𑌂 𑌚 𑌸𑌾𑌰𑌵𑌤𑍍𑌸𑌮𑍍𑌮𑌾𑌨𑌯𑍇𑌨𑍍𑌮𑌾𑌂 𑌚 𑌰𑌣𑍇 𑌦𑌶𑌾𑌨𑌨𑌃 ॥ ॥
𑌤𑌤𑌸𑍍𑌸𑌮𑌾𑌸𑌾𑌦𑍍𑌯 𑌰𑌣𑍇 𑌦𑌶𑌾𑌨𑌨𑌂 𑌸𑌮𑌂𑌤𑍍𑌰𑌿𑌵𑌰𑍍𑌗𑌂 𑌸𑌬𑌲𑌪𑍍𑌰𑌯𑌾𑌯𑌿𑌨𑌮𑍍 ।
𑌹𑍃𑌦𑌿 𑌸𑍍𑌥𑌿𑌤𑌂 𑌤𑌸𑍍𑌯 𑌮𑌤𑌂 𑌬𑌲𑌂 𑌚 𑌵𑍈 𑌸𑍁𑌖𑍇𑌨 𑌮𑌤𑍍𑌤𑍍𑌵𑌾𑌽𑌹𑌮𑌿𑌤𑌃 𑌪𑍁𑌨𑌰𑍍𑌵𑍍𑌰𑌜𑍇 ॥ ॥
𑌇𑌦𑌮𑌸𑍍𑌯 𑌨𑍃𑌶𑌂𑌸𑌸𑍍𑌯 𑌨𑌂𑌦𑌨𑍋𑌪𑌮𑌮𑍁𑌤𑍍𑌤𑌮𑌮𑍍 ।
𑌵𑌨𑌂 𑌨𑍇𑌤𑍍𑌰𑌮𑌨𑌃𑌕𑌾𑌂𑌤𑌂 𑌨𑌾𑌨𑌾𑌦𑍍𑌰𑍁𑌮𑌲𑌤𑌾𑌯𑍁𑌤𑌮𑍍 ॥ 10 ॥
𑌇𑌦𑌂 𑌵𑌿𑌧𑍍𑌵𑌂𑌸𑌯𑌿𑌷𑍍𑌯𑌾𑌮𑌿 𑌶𑍁𑌷𑍍𑌕𑌂 𑌵𑌨𑌮𑌿𑌵𑌾𑌨𑌲𑌃 ।
𑌅𑌸𑍍𑌮𑌿𑌨𑍍𑌭𑌗𑍍𑌨𑍇 𑌤𑌤𑌃 𑌕𑍋𑌪𑌂 𑌕𑌰𑌿𑌷𑍍𑌯𑌤𑌿 𑌦𑌶𑌾𑌨𑌨𑌃 ॥ 11 ॥
𑌤𑌤𑍋 𑌮𑌹𑌤𑍍𑌸𑌾𑌶𑍍𑌵𑌮𑌹𑌾𑌰𑌥𑌦𑍍𑌵𑌿𑌪𑌂 𑌬𑌲𑌂 𑌸𑌮𑌾𑌦𑍇𑌕𑍍𑌷𑍍𑌯𑌤𑌿 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌤𑍍𑌰𑌿𑌶𑍂𑌲𑌕𑌾𑌲𑌾𑌯𑌸𑌪𑌟𑍍𑌟𑌿𑌸𑌾𑌯𑍁𑌧𑌂 𑌤𑌤𑍋 𑌮𑌹𑌦𑍍𑌯𑍁𑌦𑍍𑌧𑌮𑌿𑌦𑌂 𑌭𑌵𑌿𑌷𑍍𑌯𑌤𑌿 ॥ 12 ॥
𑌅𑌹𑌂 𑌤𑍁 𑌤𑍈𑌃 𑌸𑌂𑌯𑌤𑌿 𑌚𑌂𑌡𑌵𑌿𑌕𑍍𑌰𑌮𑍈 𑌸𑍍𑌸𑌮𑍇𑌤𑍍𑌯 𑌰𑌕𑍍𑌷𑍋𑌭𑌿𑌰𑌸𑌹𑍍𑌯 𑌵𑌿𑌕𑍍𑌰𑌮𑌃 ।
𑌨𑌿𑌹𑌤𑍍𑌯 𑌤𑌦𑍍𑌰𑌾𑌵𑌣𑌚𑍋𑌦𑌿𑌤𑌂 𑌬𑌲𑌂 𑌸𑍁𑌖𑌂 𑌗𑌮𑌿𑌷𑍍𑌯𑌾𑌮𑌿 𑌕𑌪𑍀𑌶𑍍𑌵𑌰𑌾𑌲𑌯𑌮𑍍 ॥ 13 ॥
𑌤𑌤𑍋 𑌮𑌾𑌰𑍁𑌤𑌵𑌤𑍍𑌕𑍃𑌦𑍍𑌧𑍋 𑌮𑌾𑌰𑍁𑌤𑌿𑌰𑍍𑌭𑍀𑌮𑌵𑌿𑌕𑍍𑌰𑌮𑌃 ।
𑌊𑌰𑍁𑌵𑍇𑌗𑍇𑌨 𑌮𑌹𑌤𑌾 𑌦𑍍𑌰𑍁𑌮𑌾𑌨𑍍𑌕𑍍𑌷𑍇𑌪𑍍𑌤𑍁𑌮𑌥𑌾𑌰𑌭𑌤𑍍 ॥ 14 ॥
𑌤𑌤𑌸𑍍𑌤𑍁 𑌹𑌨𑍁𑌮𑌾𑌨𑍍𑌵𑍀𑌰𑍋 𑌬𑌭𑌂𑌜 𑌪𑍍𑌰𑌮𑌦𑌾𑌵𑌨𑌮𑍍 ।
𑌮𑌤𑍍𑌤𑌦𑍍𑌵𑌿𑌜𑌸𑌮𑌾𑌘𑍁𑌷𑍍𑌟𑌂 𑌨𑌾𑌨𑌾𑌦𑍍𑌰𑍁𑌮𑌲𑌤𑌾𑌯𑍁𑌤𑌮𑍍 ॥ 15 ॥
𑌤𑌦𑍍𑌵𑌨𑌂 𑌮𑌥𑌿𑌤𑍈𑌰𑍍𑌵𑍃𑌕𑍍𑌷𑍈𑌰𑍍𑌭𑌿𑌨𑍍𑌨𑍈𑌶𑍍𑌚 𑌸𑌲𑌿𑌲𑌾𑌶𑌯𑍈𑌃 ।
𑌚𑍂𑌰𑍍𑌣𑌿𑌤𑍈𑌃 𑌪𑌰𑍍𑌵𑌤𑌾𑌗𑍍𑌰𑍈𑌶𑍍𑌚 𑌬𑌭𑍂𑌵𑌾𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ॥ 16 ॥
𑌨𑌾𑌨𑌾𑌶𑌕𑍁𑌂𑌤𑌵𑌿𑌰𑍁𑌤𑍈𑌃 𑌪𑍍𑌰𑌭𑌿𑌨𑍍𑌨𑍈𑌸𑍍𑌸𑌲𑌿𑌲𑌾𑌶𑌯𑍈𑌃 ।
𑌤𑌾𑌮𑍍𑌰𑍈𑌃 𑌕𑌿𑌸𑌲𑌯𑍈𑌃 𑌕𑍍𑌲𑌾𑌂𑌤𑍈𑌃 𑌕𑍍𑌲𑌾𑌂𑌤𑌦𑍍𑌰𑍁𑌮𑌲𑌤𑌾𑌯𑍁𑌤𑌮𑍍 ॥ 1 ॥
𑌨 𑌬𑌭𑍌 𑌤𑌦𑍍𑌵𑌨𑌂 𑌤𑌤𑍍𑌰 𑌦𑌾𑌵𑌾𑌨𑌲𑌹𑌤𑌂 𑌯𑌥𑌾 ।
𑌵𑍍𑌯𑌾𑌕𑍁𑌲𑌾𑌵𑌰𑌣𑌾 𑌰𑍇𑌜𑍁𑌰𑍍𑌵𑌿𑌹𑍍𑌵𑌲𑌾 𑌇𑌵 𑌤𑌾 𑌲𑌤𑌾𑌃 ॥ 1 ॥
𑌲𑌤𑌾𑌗𑍃𑌹𑍈𑌶𑍍𑌚𑌿𑌤𑍍𑌰𑌗𑍃𑌹𑍈𑌶𑍍𑌚 𑌨𑌾𑌶𑌿𑌤𑍈𑌰𑍍𑌮𑌹𑍋𑌰𑌗𑍈𑌰𑍍𑌵𑍍𑌯𑌾𑌲𑌮𑍃𑌗𑍈𑌶𑍍𑌚 𑌨𑌿𑌰𑍍𑌧𑍁𑌤𑍈𑌃 ।
𑌶𑌿𑌲𑌾𑌗𑍃𑌹𑍈𑌰𑍁𑌨𑍍𑌮𑌥𑌿𑌤𑍈𑌸𑍍𑌤𑌥𑌾 𑌗𑍃𑌹𑍈𑌃 𑌪𑍍𑌰𑌣𑌷𑍍𑌟𑌰𑍂𑌪𑌂 𑌤𑌦𑌭𑍂𑌨𑍍𑌮𑌹𑌦𑍍𑌵𑌨𑌮𑍍 ॥ 1 ॥
𑌸𑌾 𑌵𑌿𑌹𑍍𑌵𑌲𑌾𑌽𑌶𑍋𑌕𑌲𑌤𑌾𑌪𑍍𑌰𑌤𑌾𑌨𑌾 𑌵𑌨𑌸𑍍𑌥𑌲𑍀 𑌶𑍋𑌕𑌲𑌤𑌾𑌪𑍍𑌰𑌤𑌾𑌨𑌾 ।
𑌜𑌾𑌤𑌾 𑌦𑌶𑌾𑌸𑍍𑌯𑌪𑍍𑌰𑌮𑌦𑌾𑌵𑌨𑌸𑍍𑌯 𑌕𑌪𑍇𑌰𑍍𑌬𑌲𑌾𑌦𑍍𑌧𑌿 𑌪𑍍𑌰𑌮𑌦𑌾𑌵𑌨𑌸𑍍𑌯 ॥ 20 ॥
𑌸 𑌤𑌸𑍍𑌯 𑌕𑍃𑌤𑍍𑌵𑌾𑌰𑍍𑌥𑌪𑌤𑍇𑌰𑍍𑌮𑌹𑌾𑌕𑌪𑌿𑌰𑍍𑌮𑌹𑌦𑍍𑌵𑍍𑌯𑌲𑍀𑌕𑌂 𑌮𑌨𑌸𑍋 𑌮𑌹𑌾𑌤𑍍𑌮𑌨𑌃 ।
𑌯𑍁𑌯𑍁𑌤𑍍𑌸𑍁𑌰𑍇𑌕𑍋 𑌬𑌹𑍁𑌭𑌿𑌰𑍍𑌮𑌹𑌾𑌬𑌲𑍈𑌶𑍍𑌶𑌿𑌯𑌾 𑌜𑍍𑌵𑌲𑌂𑌸𑍍𑌤𑍋𑌰𑌣𑌮𑌾𑌸𑍍𑌥𑌿𑌤𑌃 𑌕𑌪𑌿𑌃 ॥ 21 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌏𑌕𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
