𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑍍𑌰𑌿𑌶𑌂𑌕𑍋𑌰𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑍍𑌰𑍋𑌧𑌸𑌮𑌨𑍍𑌵𑌿𑌤𑌮𑍍 ।
𑌋𑌷𑌿𑌪𑍁𑌤𑍍𑌰𑌶𑌤𑌂 𑌰𑌾𑌮 𑌰𑌾𑌜𑌾𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍋 𑌹𑌿 𑌦𑍁𑌰𑍍𑌬𑍁𑌦𑍍𑌧𑍇 𑌗𑍁𑌰𑍁𑌣𑌾 𑌸𑌤𑍍𑌯𑌵𑌾𑌦𑌿𑌨𑌾 ।
𑌤𑌂 𑌕𑌥𑌂 𑌸𑌮𑌤𑌿𑌕𑍍𑌰𑌮𑍍𑌯 𑌶𑌾𑌖𑌾𑌂𑌤𑌰𑌮𑍁𑌪𑍇𑌯𑌿𑌵𑌾𑌨𑍍 ॥ 2 ॥
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌹𑌿 𑌸𑌰𑍍𑌵𑍇𑌷𑌾𑌂 𑌪𑍁𑌰𑍋𑌧𑌾𑌃 𑌪𑌰𑌮𑍋 𑌗𑍁𑌰𑍁𑌃 ।
𑌨 𑌚𑌾𑌤𑌿𑌕𑍍𑌰𑌮𑌿𑌤𑍁𑌂 𑌶𑌕𑍍𑌯𑌂 𑌵𑌚𑌨𑌂 𑌸𑌤𑍍𑌯𑌵𑌾𑌦𑌿𑌨𑌃 ॥ 3 ॥
𑌅𑌶𑌕𑍍𑌯𑌮𑌿𑌤𑌿 𑌚𑍋𑌵𑌾𑌚 𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍃𑌷𑌿𑌃 ।
𑌤𑌂 𑌵𑌯𑌂 𑌵𑍈 𑌸𑌮𑌾𑌹𑌰𑍍𑌤𑍁𑌂 𑌕𑍍𑌰𑌤𑍁𑌂 𑌶𑌕𑍍𑌤𑌾𑌃𑌕𑌥𑌂 𑌤𑌵 ॥ 4 ॥
𑌬𑌾𑌲𑌿𑌶𑌸𑍍𑌤𑍍𑌵𑌂 𑌨𑌰𑌶𑍍𑌰𑍇𑌷𑍍𑌠 𑌗𑌮𑍍𑌯𑌤𑌾𑌂 𑌸𑍍𑌵𑌪𑍁𑌰𑌂 𑌪𑍁𑌨𑌃 ।
𑌯𑌾𑌜𑌨𑍇 𑌭𑌗𑌵𑌾𑌂𑌛𑌕𑍍𑌤𑌸𑍍𑌤𑍍𑌰𑍈𑌲𑍋𑌕𑍍𑌯𑌸𑍍𑌯𑌾𑌪𑌿 𑌪𑌾𑌰𑍍𑌥𑌿𑌵 ॥ 5 ॥
𑌅𑌵𑌮𑌾𑌨𑌂 𑌚 𑌤𑌤𑍍𑌕𑌰𑍍𑌤𑍁𑌂 𑌤𑌸𑍍𑌯 𑌶𑌕𑍍𑌷𑍍𑌯𑌾𑌮𑌹𑍇 𑌕𑌥𑌮𑍍 ।
𑌤𑍇𑌷𑌾𑌂 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑍍𑌰𑍋𑌧𑌪𑌰𑍍𑌯𑌾𑌕𑍁𑌲𑌾𑌕𑍍𑌷𑌰𑌮𑍍 ॥ 6 ॥
𑌸 𑌰𑌾𑌜𑌾 𑌪𑍁𑌨𑌰𑍇𑌵𑍈𑌤𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍋𑌽𑌸𑍍𑌮𑌿 𑌗𑍁𑌰𑍁𑌣𑌾 𑌗𑍁𑌰𑍁𑌪𑍁𑌤𑍍𑌰𑍈𑌸𑍍𑌤𑌥𑍈𑌵 𑌚 ॥ ॥
𑌅𑌨𑍍𑌯𑌾𑌂 𑌗𑌤𑌿𑌂 𑌗𑌮𑌿𑌷𑍍𑌯𑌾𑌮𑌿 𑌸𑍍𑌵𑌸𑍍𑌤𑌿 𑌵𑍋𑌽𑌸𑍍𑌤𑍁 𑌤𑌪𑍋𑌧𑌨𑌾𑌃 ।
𑌋𑌷𑌿𑌪𑍁𑌤𑍍𑌰𑌾𑌸𑍍𑌤𑍁 𑌤𑌚𑍍𑌛𑍍𑌰𑍁𑌤𑍍𑌵𑌾 𑌵𑌾𑌕𑍍𑌯𑌂 𑌘𑍋𑌰𑌾𑌭𑌿𑌸𑌂𑌹𑌿𑌤𑌮𑍍 ॥ ॥
𑌶𑍇𑌪𑍁𑌃 𑌪𑌰𑌮𑌸𑌂𑌕𑍃𑌦𑍍𑌧𑌾𑌶𑍍𑌚𑌂𑌡𑌾𑌲𑌤𑍍𑌵𑌂 𑌗𑌮𑌿𑌷𑍍𑌯𑌸𑌿 ।
𑌏𑌵𑌮𑍁𑌕𑍍𑌤𑍍𑌵𑌾 𑌮𑌹𑌾𑌤𑍍𑌮𑌨𑍋 𑌵𑌿𑌵𑌿𑌶𑍁𑌸𑍍𑌤𑍇 𑌸𑍍𑌵𑌮𑌾𑌶𑍍𑌰𑌮𑌮𑍍 ॥ ॥
𑌅𑌥 𑌰𑌾𑌤𑍍𑌰𑍍𑌯𑌾𑌂 𑌵𑍍𑌯𑌤𑍀𑌤𑌾𑌯𑌾𑌂 𑌰𑌾𑌜𑌾 𑌚𑌂𑌡𑌾𑌲𑌤𑌾𑌂 𑌗𑌤𑌃 ।
𑌨𑍀𑌲𑌵𑌸𑍍𑌤𑍍𑌰𑌧𑌰𑍋 𑌨𑍀𑌲𑌃 𑌪𑍁𑌰𑍁𑌷𑍋 𑌧𑍍𑌵𑌸𑍍𑌤𑌮𑍂𑌰𑍍𑌧𑌜𑌃 ॥ 10 ॥
𑌚𑌿𑌤𑍍𑌯𑌮𑌾𑌲𑍍𑌯𑌾𑌨𑍁𑌲𑍇𑌪𑌶𑍍𑌚 𑌆𑌯𑌸𑌾𑌭𑌰𑌣𑍋𑌽𑌭𑌵𑌤𑍍 ।
𑌤𑌂 𑌦𑍃𑌷𑍍𑌟𑌵𑌾 𑌮𑌂𑌤𑍍𑌰𑌿𑌣𑌸𑍍𑌸𑌰𑍍𑌵𑍇 𑌤𑍍𑌯𑌜𑍍𑌯 𑌚𑌂𑌡𑌾𑌲𑌰𑍂𑌪𑌿𑌣𑌮𑍍 ॥ 11 ॥
𑌪𑍍𑌰𑌾𑌦𑍍𑌰𑌵𑌨𑍍 𑌸𑌹𑌿𑌤𑌾 𑌰𑌾𑌮 𑌪𑍌𑌰𑌾 𑌯𑍇𑌽𑌸𑍍𑌯𑌾𑌨𑍁𑌗𑌾𑌮𑌿𑌨𑌃 ।
𑌏𑌕𑍋 𑌹𑌿 𑌰𑌾𑌜𑌾 𑌕𑌾𑌕𑍁𑌤𑍍𑌸𑍍𑌥 𑌜𑌗𑌾𑌮 𑌪𑌰𑌮𑌾𑌤𑍍𑌮𑌵𑌾𑌨𑍍 ॥ 12 ॥
𑌦𑌹𑍍𑌯𑌮𑌾𑌨𑍋 𑌦𑌿𑌵𑌾𑌰𑌾𑌤𑍍𑌰𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌤𑌪𑍋𑌨𑌿𑌧𑌿𑌮𑍍 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌸𑍍𑌤𑍁 𑌤𑌂 𑌦𑍃𑌷𑍍𑌟𑍍𑌵𑌾 𑌰𑌾𑌜𑌾𑌨𑌂 𑌵𑌿𑌫𑌲𑍀𑌕𑍃𑌤𑌮𑍍 ।
𑌚𑌂𑌡𑌾𑌲𑌰𑍂𑌪𑌿𑌣𑌂 𑌰𑌾𑌮 𑌮𑍁𑌨𑌿𑌃 𑌕𑌾𑌰𑍁𑌣𑍍𑌯𑌮𑌾𑌗𑌤𑌃 ॥ 13 ॥
𑌕𑌾𑌰𑍁𑌣𑍍𑌯𑌾𑌤𑍍𑌸 𑌮𑌹𑌾𑌤𑍇𑌜𑌾 𑌵𑌾𑌕𑍍𑌯𑌂 𑌪𑌰𑌮𑌧𑌾𑌰𑍍𑌮𑌿𑌕𑌃 ।
𑌇𑌦𑌂 𑌜𑌗𑌾𑌦 𑌭𑌦𑍍𑌰𑌂 𑌤𑍇 𑌰𑌾𑌜𑌾𑌨𑌂 𑌘𑍋𑌰𑌰𑍂𑌪𑌿𑌣𑌮𑍍 ॥ 14 ॥
𑌕𑌿𑌮𑌾𑌗𑌮𑌨𑌕𑌾𑌰𑍍𑌯𑌂 𑌤𑍇 𑌰𑌾𑌜𑌪𑍁𑌤𑍍𑌰 𑌮𑌹𑌾𑌬𑌲 ।
𑌅𑌯𑍋𑌧𑍍𑌯𑌾𑌧𑌿𑌪𑌤𑍇 𑌵𑍀𑌰 𑌶𑌾𑌪𑌾𑌚𑍍𑌚𑌂𑌡𑌾𑌲𑌤𑌾𑌂 𑌗𑌤𑌃 ॥ 15 ॥
𑌅𑌥 𑌤𑌦𑍍𑌵𑌾𑌕𑍍𑌯𑌮𑌾𑌜𑍍𑌞𑌾𑌯 𑌰𑌾𑌜𑌾 𑌚𑌂𑌡𑌾𑌲𑌤𑌾𑌂 𑌗𑌤𑌃 ।
𑌅𑌬𑍍𑌰𑌵𑍀𑌤𑍍𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌂 𑌵𑌾𑌕𑍍𑌯𑌜𑍍𑌞𑍋 𑌵𑌾𑌕𑍍𑌯𑌕𑍋𑌵𑌿𑌦𑌮𑍍 ॥ 16 ॥
𑌪𑍍𑌰𑌤𑍍𑌯𑌾𑌖𑍍𑌯𑌾𑌤𑍋𑌽𑌸𑍍𑌮𑌿 𑌗𑍁𑌰𑍁𑌣𑌾 𑌗𑍁𑌰𑍁𑌪𑍁𑌤𑍍𑌰𑍈𑌸𑍍𑌤𑌥𑍈𑌵 𑌚 ।
𑌅𑌨𑌵𑌾𑌪𑍍𑌯𑍈𑌵 𑌤𑌂 𑌕𑌾𑌮𑌂 𑌮𑌯𑌾 𑌪𑍍𑌰𑌾𑌪𑍍𑌤𑍋 𑌵𑌿𑌪𑌰𑍍𑌯𑌯𑌃 ॥ 1 ॥
𑌸𑌶𑌰𑍀𑌰𑍋 𑌦𑌿𑌵𑌂 𑌯𑌾𑌯𑌾𑌮𑌿𑌤𑌿 𑌮𑍇 𑌸𑍌𑌮𑍍𑌯𑌦𑌰𑍍𑌶𑌨𑌮𑍍 ।
𑌮𑌯𑌾 𑌚𑍇𑌷𑍍𑌟𑌂 𑌕𑍍𑌰𑌤𑍁𑌶𑌤𑌂 𑌤𑌚𑍍𑌚 𑌨𑌾𑌽𑌵𑌾𑌪𑍍𑌯𑌤𑍇 𑌫𑌲𑌮𑍍 ॥ 1 ॥
𑌅𑌨𑍃𑌤𑌂 𑌨𑍋𑌕𑍍𑌤𑌪𑍂𑌰𑍍𑌵𑌂 𑌮𑍇 𑌨 𑌚 𑌵𑌕𑍍𑌷𑍍𑌯𑍇 𑌕𑌦𑌾𑌚𑌨 ।
𑌕𑍃𑌚𑍍𑌛𑍍𑌰𑍇𑌷𑍍𑌵𑌪𑌿 𑌗𑌤 𑌸𑍍𑌸𑍌𑌮𑍍𑌯 𑌕𑍍𑌷𑌤𑍍𑌰𑌧𑌰𑍍𑌮𑍇𑌣 𑌤𑍇 𑌶𑌪𑍇 ॥ 1 ॥
𑌯𑌜𑍍𑌞𑍈𑌰𑍍𑌬𑌹𑍁𑌵𑌿𑌧𑍈𑌰𑌿𑌷𑍍𑌟𑌂 𑌪𑍍𑌰𑌜𑌾 𑌧𑌰𑍍𑌮𑍇𑌣 𑌪𑌾𑌲𑌿𑌤𑌾𑌃 ॥ 20 ॥
𑌗𑍁𑌰𑌵𑌶𑍍𑌚 𑌮𑌹𑌾𑌤𑍍𑌮𑌾𑌨 𑌶𑍍𑌶𑍀𑌲𑌵𑍃𑌤𑍍𑌤𑍇𑌨 𑌤𑍋𑌷𑌿𑌤𑌾𑌃 ।
𑌧𑌰𑍍𑌮𑍇 𑌪𑍍𑌰𑌯𑌤𑌮𑌾𑌨𑌸𑍍𑌯 𑌯𑌜𑍍𑌞𑌂 𑌚𑌾𑌹𑌰𑍍𑌤𑍁𑌮𑌿𑌚𑍍𑌛𑌤𑌃 ॥ 21 ॥
𑌪𑌰𑌿𑌤𑍋𑌷𑌂 𑌨 𑌗𑌚𑍍𑌛𑌂𑌤𑌿 𑌗𑍁𑌰𑌵𑍋 𑌮𑍁𑌨𑌿𑌪𑍁𑌂𑌗𑌵 ।
𑌦𑍈𑌵𑌮𑍇𑌵 𑌪𑌰𑌂 𑌮𑌨𑍍𑌯𑍇 𑌪𑍌𑌰𑍁𑌷𑌂 𑌤𑍁 𑌨𑌿𑌰𑌰𑍍𑌥𑌕𑌮𑍍 ॥ 22 ॥
𑌦𑍈𑌵𑍇𑌨𑌾𑌕𑍍𑌰𑌮𑍍𑌯𑌤𑍇 𑌸𑌰𑍍𑌵𑌂 𑌦𑍈𑌵𑌂 𑌹𑌿 𑌪𑌰𑌮𑌾 𑌗𑌤𑌿𑌃 ।
𑌤𑌸𑍍𑌯 𑌮𑍇 𑌪𑌰𑌮𑌾𑌰𑍍𑌤𑌸𑍍𑌯 𑌪𑍍𑌰𑌸𑌾𑌦𑌮𑌭𑌿𑌕𑌾𑌂𑌕𑍍𑌷𑌤𑌃 ॥ 23 ॥
𑌕𑌰𑍍𑌤𑍁𑌮𑌰𑍍𑌹𑌸𑌿 𑌭𑌦𑍍𑌰𑌂 𑌤𑍇 𑌦𑍈𑌵𑍋𑌪𑌹𑌤𑌕𑌰𑍍𑌮𑌣𑌃 ।
𑌨𑌾𑌨𑍍𑌯𑌾𑌂 𑌗𑌤𑌿𑌂 𑌗𑌮𑌿𑌷𑍍𑌯𑌾𑌮𑌿 𑌨𑌾𑌨𑍍𑌯𑌶𑍍𑌶𑌰𑌣𑌮𑌸𑍍𑌤𑌿 𑌮𑍇 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
