𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌏𑌵𑌮𑍁𑌕𑍍𑌤𑌸𑍍𑌤𑍁 𑌸𑍁𑌗𑍍𑌰𑍀𑌵𑍋 𑌲𑌕𑍍𑌷𑍍𑌮𑌣𑍇𑌨 𑌮𑌹𑌾𑌤𑍍𑌮𑌨𑌾 ।
𑌹𑌨𑍂𑌮𑌂𑌤𑌂 𑌸𑍍𑌥𑌿𑌤𑌂 𑌪𑌾𑌰𑍍𑌶𑍍𑌵𑍇 𑌸𑌚𑌿𑌵𑌂𑌤𑍍𑌵𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌮𑌹𑍇𑌂𑌦𑍍𑌰𑌹𑌿𑌮𑌵𑌦𑍍𑌵𑌿𑌂𑌧𑍍𑌯𑌕𑍈𑌲𑌾𑌸𑌶𑌿𑌖𑌰𑍇𑌷𑍁 𑌚 ।
𑌮𑌂𑌦𑌰𑍇 𑌪𑌾𑌂𑌡𑍁𑌶𑌿𑌖𑌰𑍇 𑌪𑌂𑌚𑌶𑍈𑌲𑍇𑌷𑍁 𑌯𑍇 𑌸𑍍𑌥𑌿𑌤𑌾𑌃 ॥ 2 ॥
𑌤𑌰𑍁𑌣𑌾𑌦𑌿𑌤𑍍𑌯𑌵𑌰𑍍𑌣𑍇𑌷𑍁 𑌭𑍍𑌰𑌾𑌜𑌮𑌾𑌨𑍇𑌷𑍁 𑌸𑌰𑍍𑌵𑌤𑌃 ।
𑌪𑌰𑍍𑌵𑌤𑍇𑌷𑍁 𑌸𑌮𑍁𑌦𑍍𑌰𑌾𑌂𑌤𑍇 𑌪𑌶𑍍𑌚𑌿𑌮𑌾𑌯𑌾𑌂 𑌚 𑌯𑍇 𑌦𑌿𑌶𑌿 ॥ 3 ॥
𑌆𑌦𑌿𑌤𑍍𑌯𑌭𑌵𑌨𑍇 𑌚𑍈𑌵 𑌗𑌿𑌰𑍌 𑌸𑌂𑌧𑍍𑌯𑌾𑌭𑍍𑌰𑌸𑌨𑍍𑌨𑌿𑌭𑍇 ।
𑌪𑌦𑍍𑌮𑌾𑌤𑌾𑌲𑌵𑌨𑌂 𑌭𑍀𑌮𑌂 𑌸𑌂𑌶𑍍𑌰𑌿𑌤𑌾 𑌹𑌰𑌿𑌪𑍁𑌂𑌗𑌵𑌾𑌃 ॥ 4 ॥
𑌅𑌂𑌜𑌨𑌾𑌂𑌬𑍁𑌦𑌸𑌂𑌕𑌾𑌶𑌾𑌃 𑌕𑍁𑌂𑌜𑌰𑌪𑍍𑌰𑌤𑌿𑌮𑍌𑌜𑌸𑌃 ।
𑌅𑌂𑌜𑌨𑍇 𑌪𑌰𑍍𑌵𑌤𑍇 𑌚𑍈𑌵 𑌯𑍇 𑌵𑌸𑌂𑌤𑌿 𑌪𑍍𑌲𑌵𑌂𑌗𑌮𑌾𑌃 ॥ 5 ॥
𑌮𑌨𑌶𑍍𑌶𑌿𑌲𑌾 𑌗𑍁𑌹𑌾𑌵𑌾𑌸𑌾 𑌵𑌾𑌨𑌰𑌾𑌃 𑌕𑌨𑌕𑌪𑍍𑌰𑌭𑌾𑌃 ।
𑌮𑍇𑌰𑍁𑌪𑌾𑌰𑍍𑌶𑍍𑌵𑌗𑌤𑌾𑌶𑍍𑌚𑍈𑌵 𑌯𑍇 𑌧𑍂𑌮𑍍𑌰𑌗𑌿𑌰𑌿𑌂 𑌸𑌂𑌶𑍍𑌰𑌿𑌤𑌾𑌃 ॥ 6 ॥
𑌤𑌰𑍁𑌣𑌾𑌦𑌿𑌤𑍍𑌯𑌵𑌰𑍍𑌣𑌾𑌶𑍍𑌚 𑌪𑌰𑍍𑌵𑌤𑍇 𑌯𑍇 𑌮𑌹𑌾𑌰𑍁𑌣𑍇 ।
𑌪𑌿𑌬𑌂𑌤𑍋 𑌮𑌧𑍁𑌮𑍈𑌰𑍇𑌯𑌂 𑌭𑍀𑌮𑌵𑍇𑌗𑌾𑌃 𑌪𑍍𑌲𑌵𑌂𑌗𑌮𑌾𑌃 ॥ ॥
𑌵𑌨𑍇𑌷𑍁 𑌚 𑌸𑍁𑌰𑌮𑍍𑌯𑍇𑌷𑍁 𑌸𑍁𑌗𑌂𑌧𑌿𑌷𑍁 𑌮𑌹𑌤𑍍𑌸𑍁 𑌚 ।
𑌤𑌾𑌪𑌸𑌾𑌨𑌾𑌂 𑌚 𑌰𑌮𑍍𑌯𑍇𑌷𑍁 𑌵𑌨𑌾𑌂𑌤𑍇𑌷𑍁 𑌸𑌮𑌂𑌤𑌤𑌃 ॥ ॥
𑌤𑌾𑌂𑌸𑍍𑌤𑌾𑌂 𑌸𑍍𑌤𑍍𑌵𑌮𑌾𑌨𑌯 𑌕𑍍𑌷𑌿𑌪𑍍𑌰𑌂 𑌪𑍃𑌥𑌿𑌵𑍍𑌯𑌾𑌂 𑌸𑌰𑍍𑌵𑌵𑌾𑌨𑌰𑌾𑌨𑍍 ।
𑌸𑌾𑌮𑌦𑌾𑌨𑌾𑌦𑌿𑌭𑌿𑌃 𑌸𑍍𑌸𑌰𑍍𑌵𑍈𑌰𑌾𑌶𑍁 𑌪𑍍𑌰𑍇𑌷𑌯 𑌵𑌾𑌨𑌰𑌾𑌨𑍍 ॥ ॥
𑌪𑍍𑌰𑍇𑌷𑌿𑌤𑌾𑌃 𑌪𑍍𑌰𑌥𑌮𑌂 𑌯𑍇 𑌚 𑌮𑌯𑌾𑌦𑍂𑌤𑌾 𑌮𑌹𑌾𑌜𑌵𑌾𑌃 ।
𑌤𑍍𑌵𑌰𑌣𑌾𑌰𑍍𑌥𑌂 𑌤𑍁 𑌭𑍂𑌯𑌸𑍍𑌤𑍍𑌵𑌂 𑌹𑌰𑍀𑌨𑍍 𑌸𑌂𑌪𑍍𑌰𑍇𑌷𑌯𑌾𑌪𑌰𑌾𑌨𑍍 ॥ 10 ॥
𑌯𑍇 𑌪𑍍𑌰𑌸𑌕𑍍𑌤𑌾𑌶𑍍𑌚 𑌕𑌾𑌮𑍇𑌷𑍁 𑌦𑍀𑌰𑍍𑌘𑌸𑍂𑌤𑍍𑌰𑌾𑌶𑍍𑌚 𑌵𑌾𑌨𑌰𑌾𑌃 ।
𑌇𑌹𑌾𑌽𑌨𑌯𑌸𑍍𑌵 𑌤𑌾𑌨𑍍 𑌸𑌰𑍍𑌵𑌾𑌨𑍍 𑌶𑍀𑌘𑍍𑌰𑌂 𑌤𑍁 𑌮𑌮 𑌶𑌾𑌸𑌨𑌾𑌤𑍍 ॥ 11 ॥
𑌅𑌹𑍋𑌭𑌿𑌰𑍍𑌦𑌶𑌭𑌿𑌰𑍍𑌯𑍇 𑌚 𑌨𑌾𑌗𑌚𑍍𑌛𑌂𑌤𑌿 𑌮𑌮𑌾𑌜𑍍𑌞𑌯𑌾 ।
𑌹𑌂𑌤𑌵𑍍𑌯𑌾𑌸𑍍𑌤𑍇 𑌦𑍁𑌰𑌾𑌤𑍍𑌮𑌾𑌨𑍋 𑌰𑌾𑌜𑌶𑌾𑌸𑌨𑌦𑍂𑌷𑌕𑌾𑌃 ॥ 12 ॥
𑌶𑌤𑌾𑌨𑍍𑌯𑌥 𑌸𑌹𑌸𑍍𑌰𑌾𑌣𑌾𑌂 𑌕𑍋𑌟𑍍𑌯𑌶𑍍𑌚 𑌮𑌮 𑌶𑌾𑌸𑌨𑌾𑌤𑍍 ।
𑌪𑍍𑌰𑌯𑌾𑌂𑌤𑍁 𑌕𑌪𑌿𑌸𑌿𑌂𑌹𑌾𑌨𑌾𑌂 𑌦𑌿𑌶𑍋 𑌮𑌮 𑌮𑌤𑍇 𑌸𑍍𑌥𑌿𑌤𑌾𑌃 ॥ 13 ॥
𑌮𑍇𑌘𑌪𑌰𑍍𑌵𑌤𑌸𑌂𑌕𑌾𑌶𑌾𑌶𑍍𑌛𑌾𑌦𑌯𑌂𑌤 𑌇𑌵𑌾𑌂𑌬𑌰𑌮𑍍 ।
𑌘𑍋𑌰𑌰𑍂𑌪𑌾𑌃 𑌕𑌪𑌿𑌶𑍍𑌰𑍇𑌷𑍍𑌠𑌾 𑌯𑌾𑌂𑌤𑍁 𑌮𑌚𑍍𑌛𑌾𑌸𑌨𑌾𑌦𑌿𑌤𑌃 ॥ 14 ॥
𑌤𑍇 𑌗𑌤𑌿𑌜𑍍𑌞𑌾 𑌗𑌤𑌿𑌂 𑌜𑍍𑌞𑌾𑌤𑍍𑌵𑌾 𑌪𑍃𑌥𑌿𑌵𑍍𑌯𑌾𑌂 𑌸𑌰𑍍𑌵𑌵𑌾𑌨𑌰𑌾𑌃 ।
𑌆𑌨𑌯𑌂𑌤𑍁 𑌹𑌰𑍀𑌨𑍍 𑌸𑌰𑍍𑌵𑌾𑌂𑌸𑍍𑌤𑍍𑌵𑌰𑌿𑌤𑌾 𑌶𑌸𑌨𑌾𑌨𑍍𑌮𑌮 ॥ 15 ॥
𑌤𑌸𑍍𑌯 𑌵𑌾𑌨𑌰 𑌰𑌾𑌜𑌸𑍍𑌯 𑌶𑍍𑌰𑍁𑌤𑍍𑌵𑌾 𑌵𑌾𑌯𑍁𑌸𑍁𑌤𑍋 𑌵𑌚𑌃 ।
𑌦𑌿𑌕𑍍𑌷𑍁 𑌸𑌰𑍍𑌵𑌾𑌸𑍁 𑌵𑌿𑌕𑍍𑌰𑌾𑌂𑌤𑌾𑌨𑍍𑌪𑍍𑌰𑍇𑌷𑌯𑌾𑌮𑌾𑌸 𑌵𑌾𑌨𑌰𑌾𑌨𑍍 ॥ 16 ॥
𑌤𑍇 𑌪𑌦𑌂 𑌵𑌿𑌷𑍍𑌣𑍁𑌵𑌿𑌕𑍍𑌰𑌾𑌂𑌤𑌂 𑌪𑌤𑌤𑍍𑌰𑌿𑌜𑍍𑌯𑍋𑌤𑌿𑌰𑌧𑍍𑌵𑌗𑌾𑌃 ।
𑌪𑍍𑌰𑌯𑌾𑌤𑌾𑌃 𑌪𑍍𑌰𑌹𑌿𑌤𑌾 𑌰𑌾𑌜𑍍𑌞𑌾 𑌹𑌰𑌯𑌸𑍍𑌤𑌤𑍍𑌕𑍍𑌷𑌣𑍇𑌨 𑌵𑍈 ॥ 1 ॥
𑌤𑍇 𑌸𑌮𑍁𑌦𑍍𑌰𑍇𑌷𑍁 𑌗𑌿𑌰𑌿𑌷𑍁 𑌵𑌨𑍇𑌷𑍁 𑌚 𑌸𑌰𑌸𑍍𑌸𑍁 𑌚 ।
𑌵𑌾𑌨𑌰𑌾 𑌵𑌾𑌨𑌰𑌾𑌨𑍍𑌸𑌰𑍍𑌵𑌾𑌨𑍍𑌰𑌾𑌮𑌹𑍇𑌤𑍋𑌰𑌚𑍋𑌦𑌯𑌨𑍍 ॥ 1 ॥
𑌮𑍃𑌤𑍍𑌯𑍁𑌕𑌾𑌲𑍋𑌪𑌮𑌸𑍍𑌯𑌾𑌽𑌜𑍍𑌞𑌾𑌂 𑌰𑌾𑌜𑌰𑌾𑌜𑌸𑍍𑌯 𑌵𑌾𑌨𑌰𑌾𑌃 ।
𑌸𑍁𑌗𑍍𑌰𑍀𑌵𑌸𑍍𑌯𑌾𑌯𑌯𑍁 𑌶𑍍𑌶𑍍𑌰𑍁𑌤𑍍𑌵𑌾 𑌸𑍁𑌗𑍍𑌰𑍀𑌵𑌭𑌯𑌦𑌰𑍍𑌶𑌿𑌨𑌃 ॥ 1 ॥
𑌤𑌤𑌸𑍍𑌤𑍇𑌽𑌂𑌜𑌨𑌸𑌂𑌕𑌾𑌶𑌾 𑌗𑌿𑌰𑍇𑌸𑍍𑌤𑌸𑍍𑌮𑌾𑌨𑍍𑌮𑌹𑌾𑌜𑌵𑌾𑌃 ।
𑌤𑌿𑌸𑍍𑌰𑌃 𑌕𑍋𑌟𑍍𑌯𑌃 𑌪𑍍𑌲𑌵𑌂𑌗𑌾𑌨𑌾𑌂 𑌨𑌿𑌰𑍍𑌯𑌯𑍁𑌰𑍍𑌯𑌤𑍍𑌰 𑌰𑌾𑌘𑌵𑌃 ॥ 20 ॥
𑌅𑌸𑍍𑌤𑌂 𑌗𑌚𑍍𑌛𑌤𑌿 𑌯𑌤𑍍𑌰𑌾𑌰𑍍𑌕𑌸𑍍𑌤𑌸𑍍𑌮𑌿𑌨𑍍𑌗𑌿𑌰𑌿𑌵𑌰𑍇 𑌸𑍍𑌥𑌿𑌤𑌾𑌃 ।
𑌸𑌂𑌤𑌪𑍍𑌤 𑌹𑍇𑌮𑌮𑌹𑌾𑌭𑌾𑌸𑌸𑍍𑌤𑌸𑍍𑌮𑌾𑌤𑍍𑌕𑍋𑌟𑍍𑌯𑍋 𑌦𑌶 𑌚𑍍𑌯𑍁𑌤𑌾𑌃 ॥ 21 ॥
𑌕𑍈𑌲𑌾𑌸𑌶𑌿𑌖𑌰𑍇𑌭𑍍𑌯𑌶𑍍𑌚 𑌸𑌿𑌂𑌹𑌕𑍇𑌸𑌰𑌵𑌰𑍍𑌚𑌸𑌾𑌮𑍍 ।
𑌤𑌤𑌃 𑌕𑍋𑌟𑌿𑌸𑌹𑌸𑍍𑌰𑌾𑌣𑌿 𑌵𑌾𑌨𑌰𑌾𑌣𑌾𑌮𑍁𑌪𑌾𑌗𑌮𑌨𑍍 ॥ 22 ॥
𑌫𑌲𑌮𑍂𑌲𑍇𑌨 𑌜𑍀𑌵𑌂𑌤𑍋 𑌹𑌿𑌮𑌵𑌂𑌤𑌮𑍁𑌪𑌾𑌶𑍍𑌰𑌿𑌤𑌾𑌃 ।
𑌤𑍇𑌷𑌾𑌂 𑌕𑍋𑌟𑌿𑌸𑌹𑌸𑍍𑌰𑌾𑌣𑌾𑌂 𑌸𑌹𑌸𑍍𑌰𑌂 𑌸𑌮𑌵𑌰𑍍𑌤𑌤 ॥ 23 ॥
𑌅𑌂𑌗𑌾𑌰𑌕𑌸𑌮𑌾𑌨𑌾𑌨𑌾𑌂 𑌭𑍀𑌮𑌾𑌨𑌾𑌂 𑌭𑍀𑌮𑌕𑌰𑍍𑌮𑌣𑌾𑌮𑍍 ।
𑌵𑌿𑌂𑌧𑍍𑌯𑌾𑌦𑍍𑌵𑌾𑌨𑌰𑌕𑍋𑌟𑍀𑌨𑌾𑌂 𑌸𑌹𑌸𑍍𑌰𑌾𑌣𑍍𑌯𑌪𑌤𑌂𑌦𑍍𑌰𑍁𑌤𑌮𑍍 ॥ 24 ॥
𑌕𑍍𑌷𑍀𑌰𑍋𑌦𑌵𑍇𑌲𑌾𑌨𑌿𑌲𑌯𑌾𑌸𑍍𑌤𑌮𑌾𑌲𑌵𑌨𑌵𑌾𑌸𑌿𑌨𑌃 ।
𑌨𑌾𑌰𑌿𑌕𑍇𑌲𑌾𑌶𑌨𑌾𑌶𑍍𑌚𑍈𑌵 𑌤𑍇𑌷𑌾𑌂 𑌸𑌂𑌖𑍍𑌯𑌾 𑌨 𑌵𑌿𑌦𑍍𑌯𑌤𑍇 ॥ 25 ॥
𑌵𑌨𑍇𑌭𑍍𑌯𑍋 𑌗𑌹𑍍𑌵𑌰𑍇𑌭𑍍𑌯𑌶𑍍𑌚 𑌸𑌰𑌿𑌦𑍍𑌭𑍍𑌯𑌶𑍍𑌚 𑌮𑌹𑌾𑌜𑌵𑌾 ।
𑌆𑌗𑌚𑍍𑌛𑌦𑍍𑌵𑌾𑌨𑌰𑍀 𑌸𑍇𑌨𑌾 𑌪𑌿𑌬𑌂𑌤𑍀𑌵 𑌦𑌿𑌵𑌾𑌕𑌰𑌮𑍍 ॥ 26 ॥
𑌯𑍇 𑌤𑍁 𑌤𑍍𑌵𑌰𑌯𑌿𑌤𑍁𑌂 𑌯𑌾𑌤𑌾 𑌵𑌾𑌨𑌰𑌾𑌸𑍍𑌸𑌰𑍍𑌵𑌵𑌾𑌨𑌰𑌾𑌨𑍍 ।
𑌤𑍇 𑌵𑍀𑌰𑌾 𑌹𑌿𑌮𑌵𑌚𑍍𑌛𑍈𑌲𑌂 𑌦𑌦𑍃𑌶𑍁𑌸𑍍𑌤𑌂 𑌮𑌹𑌾𑌦𑍍𑌰𑍁𑌮𑌮𑍍 ॥ 2 ॥
𑌤𑌸𑍍𑌮𑌿𑌨𑍍𑌗𑌿𑌰𑌿𑌵𑌰𑍇 𑌰𑌮𑍍𑌯𑍇 𑌯𑌜𑍍𑌞𑍋 𑌮𑌾𑌹𑍇𑌶𑍍𑌵𑌰𑌃 𑌪𑍁𑌰𑌾 ।
𑌸𑌰𑍍𑌵𑌦𑍇𑌵𑌮𑌨𑌸𑍍𑌤𑍋𑌷𑍋 𑌬𑌭𑍌 𑌦𑌿𑌵𑍍𑌯𑍋 𑌮𑌨𑍋𑌹𑌰𑌃 ॥ 2 ॥
𑌅𑌨𑍍𑌨𑌨𑌿𑌷𑍍𑌯𑌂𑌦𑌜𑌾𑌤𑌾𑌨𑌿 𑌮𑍂𑌲𑌾𑌨𑌿 𑌚 𑌫𑌲𑌾𑌨𑌿 𑌚 ।
𑌅𑌮𑍃𑌤𑌾𑌸𑍍𑌵𑌾𑌦𑌕𑌲𑍍𑌪𑌾𑌨𑌿 𑌦𑌦𑍃𑌶𑍁𑌸𑍍𑌤𑌤𑍍𑌰 𑌵𑌾𑌨𑌰𑌾𑌃 ॥ 2 ॥
𑌤𑌦𑌨𑍍𑌨𑌸𑌂𑌭𑌵𑌂 𑌦𑌿𑌵𑍍𑌯𑌂 𑌫𑌲𑌮𑍂𑌲𑌂 𑌮𑌨𑍋𑌹𑌰𑌮𑍍 ।
𑌯𑌃 𑌕𑌶𑍍𑌚𑌿𑌤𑍍𑌸𑌕𑍃𑌦𑌶𑍍𑌨𑌾𑌤𑌿 𑌮𑌾𑌸𑌂 𑌭𑌵𑌤𑌿 𑌤𑌰𑍍𑌪𑌿𑌤𑌃 ॥ 30 ॥
𑌤𑌾𑌨𑌿 𑌮𑍂𑌲𑌾𑌨𑌿 𑌦𑌿𑌵𑍍𑌯𑌾𑌨𑌿 𑌫𑌲𑌾𑌨𑌿 𑌚 𑌫𑌲𑌾𑌶𑌨𑌾𑌃 ।
𑌔𑌷𑌧𑌾𑌨𑌿 𑌚 𑌦𑌿𑌵𑍍𑌯𑌾𑌨𑌿 𑌜𑌗𑍃𑌹𑍁𑌰𑍍𑌹𑌰𑌿𑌯𑍂𑌥𑌪𑌾𑌃 ॥ 31 ॥
𑌤𑌸𑍍𑌮𑌾𑌚𑍍𑌚 𑌯𑌜𑍍𑌞𑌾𑌯𑌤𑌨𑌾𑌤𑍍𑌪𑍁𑌷𑍍𑌪𑌾𑌣𑌿 𑌸𑍁𑌰𑌭𑍀𑌣𑌿 𑌚 ।
𑌆𑌨𑌿𑌨𑍍𑌯𑍁𑌰𑍍𑌵𑌾𑌨𑌰𑌾 𑌗𑌤𑍍𑌵𑌾 𑌸𑍁𑌗𑍍𑌰𑍀𑌵𑌪𑍍𑌰𑌿𑌯𑌕𑌾𑌰𑌣𑌾𑌤𑍍 ॥ 32 ॥
𑌤𑍇 𑌤𑍁 𑌸𑌰𑍍𑌵𑍇 𑌹𑌰𑌿𑌵𑌰𑌾𑌃 𑌪𑍃𑌥𑌿𑌵𑍍𑌯𑌾𑌂 𑌸𑌰𑍍𑌵𑌵𑌾𑌨𑌰𑌾𑌨𑍍 ।
𑌸𑌂𑌚𑍋𑌦𑌯𑌿𑌤𑍍𑌵𑌾 𑌤𑍍𑌵𑌰𑌿𑌤𑌾 𑌯𑍂𑌥𑌾𑌨𑌾𑌂 𑌜𑌗𑍍𑌮𑍁𑌰𑌗𑍍𑌰𑌤𑌃 ॥ 33 ॥
𑌤𑍇 𑌤𑍁 𑌤𑍇𑌨 𑌮𑍁𑌹𑍂𑌰𑍍𑌤𑍇𑌨 𑌯𑍂𑌥𑌪𑌾𑌶𑍍𑌶𑍀𑌘𑍍𑌰𑌗𑌾𑌮𑌿𑌨𑌃 ।
𑌕𑌿𑌷𑍍𑌕𑌿𑌂𑌧𑌾𑌂 𑌤𑍍𑌵𑌰𑌯𑌾 𑌪𑍍𑌰𑌾𑌪𑍍𑌤𑌾 𑌸𑍍𑌸𑍁𑌗𑍍𑌰𑍀𑌵𑍋 𑌯𑌤𑍍𑌰 𑌵𑌾𑌨𑌰𑌃 ॥ 34 ॥
𑌤𑍇 𑌗𑍃𑌹𑍀𑌤𑍍𑌵𑍌𑌷𑌧𑍀𑌸𑍍𑌸𑌰𑍍𑌵𑌾𑌃 𑌫𑌲𑌮𑍂𑌲𑌂 𑌚 𑌵𑌾𑌨𑌰𑌾𑌃 ।
𑌤𑌂 𑌪𑍍𑌰𑌤𑌿𑌗𑍍𑌰𑌾𑌹𑌯𑌾𑌮𑌾𑌸𑍁𑌰𑍍𑌵𑌚𑌨𑌂 𑌚𑍇𑌦𑌮𑌬𑍍𑌰𑍁𑌵𑌨𑍍 ॥ 35 ॥
𑌸𑌰𑍍𑌵𑍇 𑌪𑌰𑌿𑌗𑌤𑌾𑌶𑍍𑌶𑍈𑌲𑌾𑌸𑍍𑌸𑌮𑍁𑌦𑍍𑌰𑌾𑌶𑍍𑌚 𑌵𑌨𑌾𑌨𑌿 𑌚 ।
𑌪𑍃𑌥𑌿𑌵𑍍𑌯𑌾𑌂 𑌵𑌾𑌨𑌰𑌾𑌸𑍍𑌸𑌰𑍍𑌵𑍇 𑌶𑌾𑌸𑌨𑌾𑌦𑍁𑌪𑌯𑌾𑌂𑌤𑌿 𑌤𑍇 ॥ 36 ॥
𑌏𑌵𑌂 𑌶𑍍𑌰𑍁𑌤𑍍𑌵𑌾 𑌤𑌤𑍋 𑌹𑍃𑌷𑍍𑌟 𑌸𑍍𑌸𑍁𑌗𑍍𑌰𑍀𑌵𑌃 𑌪𑍍𑌲𑌵𑌗𑌾𑌧𑌿𑌪𑌃 ।
𑌪𑍍𑌰𑌤𑌿𑌜𑌗𑍍𑌰𑌾𑌹 𑌤𑌤𑍍𑌪𑍍𑌰𑌤𑍀𑌤𑌸𑍍𑌤𑍇𑌷𑌾𑌂 𑌸𑌰𑍍𑌵𑌮𑍁𑌪𑌾𑌯𑌨𑌮𑍍 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌸𑌪𑍍𑌤𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
