𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌭𑌿𑌤𑍍𑌤𑍍𑌵𑌾 𑌤𑍁 𑌤𑌾𑌂 𑌗𑌦𑌾𑌂 𑌬𑌾𑌣𑍈 𑌰𑌾𑌘𑌵𑍋 𑌧𑌰𑍍𑌮𑌵𑌤𑍍𑌸𑌲𑌃 ।
𑌸𑍍𑌮𑌯𑌮𑌾𑌨𑌃 𑌖𑌰𑌂 𑌵𑌾𑌕𑍍𑌯𑌂 𑌸𑌂𑌰𑌬𑍍𑌧𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 1 ॥
𑌏𑌤𑌤𑍍𑌤𑍇 𑌬𑌲𑌸𑌰𑍍𑌵𑌸𑍍𑌵𑌂 𑌦𑌰𑍍𑌶𑌿𑌤𑌂 𑌰𑌾𑌕𑍍𑌷𑌸𑌾𑌧𑌮 ।
𑌶𑌕𑍍𑌤𑌿𑌹𑍀𑌨𑌤𑌰𑍋 𑌮𑌤𑍍𑌤𑍋 𑌵𑍃𑌥𑌾 𑌤𑍍𑌵𑌮𑌵𑌗𑌰𑍍𑌜𑌸𑌿 ॥ 2 ॥
𑌏𑌷𑌾 𑌬𑌾𑌣𑌵𑌿𑌨𑌿𑌰𑍍𑌭𑌿𑌨𑍍𑌨𑌾 𑌗𑌦𑌾 𑌭𑍂𑌮𑌿𑌤𑌲𑌂 𑌗𑌤𑌾 ।
𑌅𑌭𑌿𑌧𑌾𑌨𑌪𑍍𑌰𑌗𑌲𑍍𑌭𑌸𑍍𑌯 𑌤𑌵 𑌪𑍍𑌰𑌤𑍍𑌯𑌯𑌘𑌾𑌤𑌿𑌨𑍀 ॥ 3 ॥
𑌯𑌤𑍍𑌤𑍍𑌵𑌯𑍋𑌕𑍍𑌤𑌂 𑌵𑌿𑌨𑌷𑍍𑌟𑌾𑌨𑌾𑌮𑌹𑌮𑌶𑍍𑌰𑍁𑌪𑍍𑌰𑌮𑌾𑌰𑍍𑌜𑌨𑌮𑍍 ।
𑌰𑌾𑌕𑍍𑌷𑌸𑌾𑌨𑌾𑌂 𑌕𑌰𑍋𑌮𑍀𑌤𑌿 𑌮𑌿𑌥𑍍𑌯𑌾 𑌤𑌦𑌪𑌿 𑌤𑍇 𑌵𑌚𑌃 ॥ 4 ॥
𑌨𑍀𑌚𑌸𑍍𑌯 𑌕𑍍𑌷𑍁𑌦𑍍𑌰𑌶𑍀𑌲𑌸𑍍𑌯 𑌮𑌿𑌥𑍍𑌯𑌾𑌵𑍃𑌤𑍍𑌤𑌸𑍍𑌯 𑌰𑌕𑍍𑌷𑌸𑌃 ।
𑌪𑍍𑌰𑌾𑌣𑌾𑌨𑌹𑌂 𑌹𑌰𑌿𑌷𑍍𑌯𑌾𑌮𑌿 𑌗𑌰𑍁𑌤𑍍𑌮𑌾𑌨𑌮𑍃𑌤𑌂 𑌯𑌥𑌾 ॥ 5 ॥
𑌅𑌦𑍍𑌯 𑌤𑍇 𑌛𑌿𑌨𑍍𑌨𑌕𑌂𑌠𑌸𑍍𑌯 𑌫𑍇𑌨𑌬𑍁𑌦𑍍𑌬𑍁𑌦𑌭𑍂𑌷𑌿𑌤𑌮𑍍 ।
𑌵𑌿𑌦𑌾𑌰𑌿𑌤𑌸𑍍𑌯 𑌮𑌦𑍍𑌬𑌾𑌣𑍈𑌰𑍍𑌮𑌹𑍀 𑌪𑌾𑌸𑍍𑌯𑌤𑌿 𑌶𑍋𑌣𑌿𑌤𑌮𑍍 ॥ 6 ॥
𑌪𑌾𑌂𑌸𑍁𑌰𑍂𑌷𑌿𑌤𑌸𑌰𑍍𑌵𑌾𑌂𑌗𑌸𑍍𑌸𑍍𑌰𑌸𑍍𑌤𑌨𑍍𑌯𑌸𑍍𑌤 𑌭𑍁𑌜𑌦𑍍𑌵𑌯𑌃 ।
𑌸𑍍𑌵𑌪𑍍𑌸𑍍𑌯𑌸𑍇 𑌗𑌾𑌂 𑌸𑌮𑌾𑌲𑌿𑌂𑌗𑍍𑌯 𑌦𑍁𑌰𑍍𑌲𑌭𑌾𑌂 𑌪𑍍𑌰𑌮𑌦𑌾𑌮𑌿𑌵 ॥ ॥
𑌪𑍍𑌰𑌬𑌦𑍍𑌧𑌨𑌿𑌦𑍍𑌰𑍇 𑌶𑌯𑌿𑌤𑍇 𑌤𑍍𑌵𑌯𑌿 𑌰𑌾𑌕𑍍𑌷𑌸𑌪𑌾𑌂𑌸𑌨𑍇 ।
𑌭𑌵𑌿𑌷𑍍𑌯𑌂𑌤𑌿𑌶𑌰𑌣𑍍𑌯𑌾𑌨𑌾𑌂 𑌶𑌰𑌣𑍍𑌯𑌾 𑌦𑌂𑌡𑌕𑌾 𑌇𑌮𑍇 ॥ ॥
𑌜𑌨𑌸𑍍𑌥𑌾𑌨𑍇 𑌹𑌤𑌸𑍍𑌥𑌾𑌨𑍇 𑌤𑌵 𑌰𑌾𑌕𑍍𑌷𑌸 𑌮𑌚𑍍𑌛𑌰𑍈𑌃 ।
𑌨𑌿𑌰𑍍𑌭𑌯𑌾 𑌵𑌿𑌚𑌰𑌿𑌷𑍍𑌯𑌂𑌤𑌿 𑌸𑌰𑍍𑌵𑌤𑍋 𑌮𑍁𑌨𑌯𑍋 𑌵𑌨𑍇 ॥ ॥
𑌅𑌦𑍍𑌯 𑌵𑌿𑌪𑍍𑌰𑌸𑌰𑌿𑌷𑍍𑌯𑌂𑌤𑌿 𑌰𑌾𑌕𑍍𑌷𑌸𑍍𑌯𑍋 𑌹𑌤𑌬𑌾𑌂𑌧𑌵𑌾𑌃 ।
𑌬𑌾𑌷𑍍𑌪𑌾𑌰𑍍𑌦𑍍𑌰𑌵𑌦𑌨𑌾 𑌦𑍀𑌨𑌾 𑌭𑌯𑌾𑌦𑌨𑍍𑌯𑌭𑌯𑌾𑌵𑌹𑌾𑌃 ॥ 10 ॥
𑌅𑌦𑍍𑌯 𑌶𑍋𑌕𑌰𑌸𑌜𑍍𑌞𑌾𑌸𑍍𑌤𑌾 𑌭𑌵𑌿𑌷𑍍𑌯𑌂𑌤𑌿 𑌨𑌿𑌰𑌰𑍍𑌥𑌕𑌾𑌃 ।
𑌅𑌨𑍁𑌰𑍂𑌪𑌕𑍁𑌲𑌾𑌃 𑌪𑌤𑍍𑌨𑍍𑌯𑍋 𑌯𑌾𑌸𑌾𑌂 𑌤𑍍𑌵𑌂 𑌪𑌤𑌿𑌰𑍀𑌦𑍃𑌶𑌃 ॥ 11 ॥
𑌨𑍃𑌶𑌂𑌸 𑌨𑍀𑌚 𑌕𑍍𑌷𑍁𑌦𑍍𑌰𑌾𑌤𑍍𑌮𑌨𑍍𑌨𑌿𑌤𑍍𑌯𑌂 𑌬𑍍𑌰𑌾𑌹𑍍𑌮𑌣𑌕𑌂𑌟𑌕 ।
𑌯𑌤𑍍𑌕𑍃𑌤𑍇 𑌶𑌂𑌕𑌿𑌤𑍈𑌰𑌗𑍍𑌨𑍌 𑌮𑍁𑌨𑌿𑌭𑌿𑌃 𑌪𑌾𑌤𑍍𑌯𑌤𑍇 𑌹𑌵𑌿𑌃 ॥ 12 ॥
𑌤𑌮𑍇𑌵𑌮𑌭𑌿𑌸𑌂𑌰𑌬𑍍𑌧𑌂 𑌬𑍍𑌰𑍁𑌵𑌾𑌣𑌂 𑌰𑌾𑌘𑌵𑌂 𑌰𑌣𑍇 ।
𑌖𑌰𑍋 𑌨𑌿𑌰𑍍𑌭𑌰𑍍𑌤𑍍𑌸𑌯𑌾𑌮𑌾𑌸 𑌰𑍋𑌷𑌾𑌤𑍍𑌖𑌰𑌤𑌰𑌸𑍍𑌵𑌰𑌃 ॥ 13 ॥
𑌦𑍃𑌢𑌂 𑌖𑌲𑍍𑌵𑌵𑌲𑌿𑌪𑍍𑌤𑍋𑌽𑌸𑌿 𑌭𑌯𑍇𑌷𑍍𑌵𑌪𑌿 𑌚 𑌨𑌿𑌰𑍍𑌭𑌯𑌃 ।
𑌵𑌾𑌚𑍍𑌯𑌾𑌵𑌾𑌚𑍍𑌯𑌂 𑌤𑌤𑍋 𑌹𑌿 𑌤𑍍𑌵𑌂 𑌮𑍃𑌤𑍍𑌯𑍁𑌵𑌶𑍍𑌯𑍋 𑌨 𑌬𑍁𑌧𑍍𑌯𑌸𑍇 ॥ 14 ॥
𑌕𑌾𑌲𑌪𑌾𑌶𑌪𑌰𑌿𑌕𑍍𑌷𑌿𑌪𑍍𑌤𑌾 𑌭𑌵𑌂𑌤𑌿 𑌪𑍁𑌰𑍁𑌷𑌾 𑌹𑌿 𑌯𑍇 ।
𑌕𑌾𑌰𑍍𑌯𑌾𑌕𑌾𑌰𑍍𑌯𑌂 𑌨 𑌜𑌾𑌨𑌂𑌤𑌿 𑌤𑍇 𑌨𑌿𑌰𑌸𑍍𑌤𑌷𑌡𑌿𑌂𑌦𑍍𑌰𑌿𑌯𑌾𑌃 ॥ 15 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑌤𑍋 𑌰𑌾𑌮𑌂 𑌸𑌂𑌰𑍁𑌧𑍍𑌯 𑌭𑍍𑌰𑍁𑌕𑍁𑌟𑍀𑌂 𑌤𑌤𑌃 ।
𑌸 𑌦𑌦𑌰𑍍𑌶 𑌮𑌹𑌾𑌸𑌾𑌲𑌮𑌵𑌿𑌦𑍂𑌰𑍇 𑌨𑌿𑌶𑌾𑌚𑌰𑌃 ॥ 16 ॥
𑌰𑌣𑍇 𑌪𑍍𑌰𑌹𑌰𑌣𑌸𑍍𑌯𑌾𑌰𑍍𑌥𑍇 𑌸𑌰𑍍𑌵𑌤𑍋 𑌹𑍍𑌯𑌵𑌲𑍋𑌕𑌯𑌨𑍍 ।
𑌸 𑌤𑌮𑍁𑌤𑍍𑌪𑌾𑌟𑌯𑌾𑌮𑌾𑌸 𑌸𑌂𑌦𑌶𑍍𑌯 𑌦𑌶𑌨𑌚𑍍𑌛𑌦𑌮𑍍 ॥ 1 ॥
𑌤𑌂 𑌸𑌮𑍁𑌤𑍍𑌕𑍍𑌷𑌿𑌪𑍍𑌯 𑌬𑌾𑌹𑍁𑌭𑍍𑌯𑌾𑌂 𑌵𑌿𑌨𑌦𑍍𑌯 𑌚 𑌮𑌹𑌾𑌬𑌲𑌃 ।
𑌰𑌾𑌮𑌮𑍁𑌦𑍍𑌦𑌿𑌶𑍍𑌯 𑌚𑌿𑌕𑍍𑌷𑍇𑌪 𑌹𑌤𑌸𑍍𑌤𑍍𑌵𑌮𑌿𑌤𑌿 𑌚𑌾𑌬𑍍𑌰𑌵𑍀𑌤𑍍 ॥ 1 ॥
𑌤𑌮𑌾𑌪𑌤𑌂𑌤𑌂 𑌬𑌾𑌣𑍌𑌘𑍈𑌚𑍍𑌛𑌿𑌤𑍍𑌵𑌾 𑌰𑌾𑌮𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌰𑍋𑌷𑌮𑌾𑌹𑌾𑌰𑌯𑌤𑍍𑌤𑍀𑌵𑍍𑌰𑌂 𑌨𑌿𑌹𑌂𑌤𑍁𑌂 𑌸𑌮𑌰𑍇 𑌖𑌰𑌮𑍍 ॥ 1 ॥
𑌜𑌾𑌤𑌸𑍍𑌵𑍇𑌦𑌸𑍍𑌤𑌤𑍋 𑌰𑌾𑌮𑍋 𑌰𑍋𑌷𑌾𑌦𑍍𑌰𑌕𑍍𑌤𑌾𑌂𑌤𑌲𑍋𑌚𑌨𑌃 ।
𑌨𑌿𑌰𑍍𑌭𑌿𑌭𑍇𑌦 𑌸𑌹𑌸𑍍𑌰𑍇𑌣 𑌬𑌾𑌣𑌾𑌨𑌾𑌂 𑌸𑌮𑌰𑍇 𑌖𑌰𑌮𑍍 ॥ 20 ॥
𑌤𑌸𑍍𑌯 𑌬𑌾𑌣𑌾𑌂𑌤𑌰𑌾𑌦𑍍𑌰𑌕𑍍𑌤𑌂 𑌬𑌹𑍁 𑌸𑍁𑌸𑍍𑌰𑌾𑌵 𑌫𑍇𑌨𑌿𑌲𑌮𑍍 ।
𑌗𑌿𑌰𑍇𑌃 𑌪𑍍𑌰𑌸𑍍𑌰𑌵𑌣𑌸𑍍𑌯𑍇𑌵 𑌤𑍋𑌯𑌧𑌾𑌰𑌾𑌪𑌰𑌿𑌸𑍍𑌰𑌵𑌃 ॥ 21 ॥
𑌵𑌿𑌹𑍍𑌵𑌲𑌸𑍍𑌸𑌕𑍃𑌤𑍋 𑌬𑌾𑌣𑍈𑌃 𑌖𑌰𑍋 𑌰𑌾𑌮𑍇𑌣 𑌸𑌂𑌯𑍁𑌗𑍇 ।
𑌮𑌤𑍍𑌤𑍋 𑌰𑍁𑌧𑌿𑌰𑌗𑌂𑌧𑍇𑌨 𑌤𑌮𑍇𑌵𑌾𑌭𑍍𑌯𑌦𑍍𑌰𑌵𑌦𑍍𑌦𑍍𑌰𑍁𑌤𑌮𑍍 ॥ 22 ॥
𑌤𑌮𑌾𑌪𑌤𑌂𑌤𑌂 𑌸𑌂𑌰𑌬𑍍𑌧𑌂 𑌕𑍃𑌤𑌾𑌸𑍍𑌤𑍍𑌰𑍋 𑌰𑍁𑌧𑌿𑌰𑌾𑌪𑍍𑌲𑍁𑌤𑌮𑍍 ।
𑌅𑌪𑌾𑌸𑌰𑍍𑌪𑌤𑍍𑌪𑍍𑌰𑌤𑌿𑌪𑌦𑌂 𑌕𑌿𑌂𑌚𑌿𑌤𑍍𑌵𑌰𑌿𑌤𑌵𑌿𑌕𑍍𑌰𑌮𑌃 ॥ 23 ॥
𑌤𑌤𑌃 𑌪𑌾𑌵𑌕𑌸𑌂𑌕𑌾𑌶𑌂 𑌵𑌧𑌾𑌯 𑌸𑌮𑌰𑍇 𑌶𑌰𑌮𑍍 ।
𑌖𑌰𑌸𑍍𑌯 𑌰𑌾𑌮𑍋 𑌜𑌗𑍍𑌰𑌾𑌹 𑌬𑍍𑌰𑌹𑍍𑌮𑌦𑌂𑌡𑌮𑌿𑌵𑌾𑌪𑌰𑌮𑍍 ॥ 24 ॥
𑌸 𑌤𑌂 𑌦𑌤𑍍𑌤𑌂 𑌮𑌘𑌵𑌤𑌾 𑌸𑍁𑌰𑌰𑌾𑌜𑍇𑌨 𑌧𑍀𑌮𑌤𑌾 ।
𑌸𑌂𑌦𑌧𑍇 𑌚𑌾𑌪𑌿 𑌧𑌰𑍍𑌮𑌾𑌤𑍍𑌮𑌾 𑌮𑍁𑌮𑍋𑌚 𑌚 𑌖𑌰𑌂 𑌪𑍍𑌰𑌤𑌿 ॥ 25 ॥
𑌸 𑌵𑌿𑌮𑍁𑌕𑍍𑌤𑍋 𑌮𑌹𑌾𑌬𑌾𑌣𑍋 𑌨𑌿𑌰𑍍𑌘𑌾𑌤𑌸𑌮𑌨𑌿𑌸𑍍𑌵𑌨𑌃 ।
𑌰𑌾𑌮𑍇𑌣 𑌧𑌨𑍁𑌰𑌾𑌯𑌮𑍍𑌯 𑌖𑌰𑌸𑍍𑌯𑍋𑌰𑌸𑌿𑌚𑌾𑌪𑌤𑌤𑍍 ॥ 26 ॥
𑌸 𑌪𑌪𑌾𑌤 𑌖𑌰𑍋 𑌭𑍂𑌮𑍌 𑌦𑌹𑍍𑌯𑌮𑌾𑌨𑌶𑍍𑌶𑌰𑌾𑌨𑌗𑍍𑌨𑌿𑌨𑌾 ।
𑌰𑍁𑌦𑍍𑌰𑍇𑌣𑍇𑌵 𑌵𑌿𑌨𑌿𑌰𑍍𑌦𑌗𑍍𑌧𑌶𑍍𑌵𑍇𑌤𑌾𑌰𑌣𑍍𑌯𑍇 𑌯𑌥𑌾𑌂𑌤𑌕𑌃 ॥ 2 ॥
𑌸 𑌵𑍃𑌤𑍍𑌰 𑌇𑌵 𑌵𑌜𑍍𑌰𑍇𑌣 𑌫𑍇𑌨𑍇𑌨 𑌨𑌮𑍁𑌚𑌿𑌰𑍍𑌯𑌥𑌾 ।
𑌬𑌲𑍋 𑌵𑍇𑌂𑌦𑍍𑌰𑌾𑌶𑌨𑌿𑌹𑌤𑍋 𑌨𑌿𑌪𑌪𑌾𑌤 𑌹𑌤𑌃 𑌖𑌰𑌃 ॥ 2 ॥
𑌤𑌤𑍋 𑌰𑌾𑌜𑌰𑍍𑌷𑌯𑌸𑍍𑌸𑌰𑍍𑌵𑍇 𑌸𑌂𑌗𑌤𑌾𑌃 𑌪𑌰𑌮𑌰𑍍𑌷𑌯𑌃 ।
𑌸𑌭𑌾𑌜𑍍𑌯 𑌮𑍁𑌦𑌿𑌤𑌾 𑌰𑌾𑌮𑌮𑌿𑌦𑌂 𑌵𑌚𑌨𑌮𑌬𑍍𑌰𑍁𑌵𑌨𑍍 ॥ 2 ॥
𑌏𑌤𑌦𑌰𑍍𑌥𑌂 𑌮𑌹𑌾𑌤𑍇𑌜𑌾 𑌮𑌹𑍇𑌂𑌦𑍍𑌰𑌃 𑌪𑌾𑌕𑌶𑌾𑌸𑌨𑌃 ।
𑌶𑌰𑌭𑌂𑌗𑌾𑌶𑍍𑌰𑌮𑌂 𑌪𑍁𑌣𑍍𑌯𑌮𑌾𑌜𑌗𑌾𑌮 𑌪𑍁𑌰𑌂𑌦𑌰𑌃 ॥ 30 ॥
𑌆𑌨𑍀𑌤𑌸𑍍𑌤𑍍𑌵𑌮𑌿𑌮𑌂 𑌦𑍇𑌶𑌮𑍁𑌪𑌾𑌯𑍇𑌨 𑌮𑌹𑌰𑍍𑌷𑌿𑌭𑌿𑌃 ।
𑌏𑌷𑌾𑌂 𑌵𑌧𑌾𑌰𑍍𑌥𑌂 𑌕𑍍𑌰𑍂𑌰𑌾𑌣𑌾𑌂 𑌰𑌕𑍍𑌷𑌸𑌾𑌂 𑌪𑌾𑌪𑌕𑌰𑍍𑌮𑌣𑌾𑌮𑍍 ॥ 31 ॥
𑌤𑌦𑌿𑌦𑌂 𑌨𑌃 𑌕𑍃𑌤𑌂 𑌕𑌾𑌰𑍍𑌯𑌂 𑌤𑍍𑌵𑌯𑌾 𑌦𑌶𑌰𑌥𑌾𑌤𑍍𑌮𑌜 ।
𑌸𑍁𑌖𑌂 𑌧𑌰𑍍𑌮𑌂 𑌚𑌰𑌿𑌷𑍍𑌯𑌂𑌤𑌿 𑌦𑌂𑌡𑌕𑍇𑌷𑍁 𑌮𑌹𑌰𑍍𑌷𑌯𑌃 ॥ 32 ॥
𑌏𑌤𑌸𑍍𑌮𑌿𑌂𑌤𑌰𑍇 𑌦𑍇𑌵𑌾𑌶𑍍𑌚𑌾𑌰𑌣𑍈𑌸𑍍𑌸𑌹 𑌸𑌂𑌗𑌤𑌾𑌃 ।
𑌦𑍁𑌂𑌦𑍁𑌭𑍀𑌂𑌶𑍍𑌚𑌾𑌭𑌿𑌨𑌿𑌘𑍍𑌨𑌂𑌤𑌃 𑌪𑍁𑌷𑍍𑌪𑌵𑌰𑍍𑌷𑌂 𑌸𑌮𑌂𑌤𑌤𑌃 ॥ 33 ॥
𑌰𑌾𑌮𑌸𑍍𑌯𑍋𑌪𑌰𑌿 𑌸𑌂𑌹𑍍𑌰𑍁𑌷𑍍𑌟𑌾 𑌵𑌵𑍃𑌷𑍁𑌰𑍍𑌵𑌿𑌸𑍍𑌮𑌿𑌤𑌾𑌸𑍍𑌤𑌦𑌾 ।
𑌅𑌰𑍍𑌧𑌾𑌧𑌿𑌕𑌮𑍁𑌹𑍂𑌰𑍍𑌤𑍇𑌨 𑌰𑌾𑌮𑍇𑌣 𑌨𑌿𑌶𑌿𑌤𑍈𑌶𑍍𑌶𑌰𑍈𑌃 ॥ 34 ॥
𑌚𑌤𑍁𑌰𑍍𑌦𑌶𑌸𑌹𑌸𑍍𑌰𑌾𑌣𑌿 𑌰𑌕𑍍𑌷𑌸𑌾𑌂 𑌭𑍀𑌮𑌕𑌰𑍍𑌮𑌣𑌾𑌮𑍍 ।
𑌖𑌰𑌦𑍂𑌷𑌣𑌮𑍁𑌖𑍍𑌯𑌾𑌨𑌾𑌂 𑌨𑌿𑌹𑌤𑌾𑌨𑌿 𑌮𑌹𑌾𑌹𑌵𑍇 ॥ 35 ॥
𑌅𑌹𑍋 𑌬𑌤 𑌮𑌹𑌤𑍍𑌕𑌰𑍍𑌮 𑌰𑌾𑌮𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌅𑌹𑍋 𑌵𑍀𑌰𑍍𑌯𑌮𑌹𑍋 𑌦𑌾𑌕𑍍𑌷𑍍𑌯𑌂 𑌵𑌿𑌷𑍍𑌣𑍋𑌰𑌿𑌵 𑌹𑌿 𑌦𑍃𑌶𑍍𑌯𑌤𑍇 ॥ 36 ॥
𑌇𑌤𑍍𑌯𑍇𑌵𑌮𑍁𑌕𑍍𑌤𑍍𑌵𑌾 𑌤𑍇 𑌸𑌰𑍍𑌵𑍇 𑌯𑌯𑍁𑌰𑍍𑌦𑍇𑌵𑌾 𑌯𑌥𑌾𑌗𑌤𑌮𑍍 ।
𑌤𑌸𑍍𑌮𑌿𑌨𑍍𑌨𑌂𑌤𑌰𑍇 𑌵𑍀𑌰𑍋 𑌲𑌕𑍍𑌷𑍍𑌮𑌣𑌸𑍍𑌸𑌹 𑌸𑍀𑌤𑌯𑌾 ।
𑌗𑌿𑌰𑌿𑌦𑍁𑌰𑍍𑌗𑌾𑌦𑍍𑌵𑌿𑌨𑌿𑌷𑍍𑌕𑍍𑌰𑌮𑍍𑌯 𑌸𑌂𑌵𑌿𑌵𑍇𑌶𑌾𑌶𑍍𑌰𑌮𑌂 𑌸𑍁𑌖𑍀 ॥ 3 ॥
𑌤𑌤𑍋 𑌰𑌾𑌮𑌸𑍍𑌤𑍁 𑌵𑌿𑌜𑌯𑍀 𑌪𑍂𑌜𑍍𑌯𑌮𑌾𑌨𑍋 𑌮𑌹𑌰𑍍𑌷𑌿𑌭𑌿𑌃 ।
𑌪𑍍𑌰𑌵𑌿𑌵𑍇𑌶𑌾𑌶𑍍𑌰𑌮𑌂 𑌵𑍀𑌰𑍋 𑌲𑌕𑍍𑌷𑍍𑌮𑌣𑍇𑌨𑌾𑌭𑌿𑌪𑍂𑌜𑌿𑌤𑌃 ॥ 3 ॥
𑌤𑌂 𑌦𑍃𑌷𑍍𑌟𑍍𑌵𑌾 𑌶𑌤𑍍𑌰𑍁𑌹𑌂𑌤𑌾𑌰𑌂 𑌮𑌹𑌰𑍍𑌷𑍀𑌣𑌾𑌂 𑌸𑍁𑌖𑌾𑌵𑌹𑌮𑍍 ।
𑌬𑌭𑍂𑌵 𑌹𑍃𑌷𑍍𑌟𑌾 𑌵𑍈𑌦𑍇𑌹𑍀 𑌭𑌰𑍍𑌤𑌾𑌰𑌂 𑌪𑌰𑌿𑌷𑌸𑍍𑌵𑌜𑍇 ॥ 3 ॥
𑌮𑍁𑌦𑌾 𑌪𑌰𑌮𑌯𑌾 𑌯𑍁𑌕𑍍𑌤𑌾 𑌦𑍃𑌷𑍍𑌟𑍍𑌵𑌾 𑌰𑌕𑍍𑌷𑍋𑌗𑌣𑌾𑌨𑍍𑌹𑌤𑌾𑌨𑍍 ।
𑌰𑌾𑌮𑌂 𑌚𑍈𑌵𑌾𑌵𑍍𑌯𑌥𑌂 𑌦𑍃𑌷𑍍𑌟𑍍𑌵𑌾 𑌤𑍁𑌤𑍋𑌷 𑌜𑌨𑌕𑌾𑌤𑍍𑌮𑌜𑌾 ॥ 40 ॥
𑌤𑌤𑌸𑍍𑌤𑍁 𑌤𑌂 𑌰𑌾𑌕𑍍𑌷𑌸𑌸𑌂𑌘𑌮𑌰𑍍𑌦𑌨𑌂 𑌸𑌭𑌾𑌜𑍍𑌯𑌮𑌾𑌨𑌂 𑌮𑍁𑌦𑌿𑌤𑍈𑌰𑍍𑌮𑌹𑌰𑍍𑌷𑌿𑌭𑌿𑌃 ।
𑌪𑍁𑌨𑌃 𑌪𑌰𑌿𑌷𑍍𑌵𑌜𑍍𑌯 𑌶𑌶𑌿𑌪𑍍𑌰𑌭𑌾𑌨𑌨𑌾 𑌬𑌭𑍂𑌵 𑌹𑍃𑌷𑍍𑌟𑌾 𑌜𑌨𑌕𑌾𑌤𑍍𑌮𑌜𑌾 𑌤𑌦𑌾 ॥ 41 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
