𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌸 𑌤𑌦𑌾 𑌵𑌾𑌲𑌿𑌨𑌂 𑌹𑌤𑍍𑌵𑌾 𑌸𑍁𑌗𑍍𑌰𑍀𑌵𑌮𑌭𑌿𑌷𑌿𑌚𑍍𑌯 𑌚 ।
𑌵𑌸𑌨𑍍𑌮𑌾𑌲𑍍𑌯𑌵𑌤𑌃 𑌪𑍃𑌷𑍍𑌠𑍇 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ॥ 1 ॥
𑌅𑌯𑌂 𑌸 𑌕𑌾𑌲𑌸𑍍𑌸𑌂𑌪𑍍𑌰𑌾𑌪𑍍𑌤𑌸𑍍𑌸𑌮𑌯𑍋𑌽𑌦𑍍𑌯 𑌜𑌲𑌾𑌗𑌮𑌃 ।
𑌸𑌂𑌪𑌶𑍍𑌯 𑌤𑍍𑌵𑌂 𑌨𑌭𑍋 𑌮𑍇𑌘𑍈𑌸𑍍𑌸𑌂𑌵𑍃𑌤𑌂 𑌗𑌿𑌰𑌿𑌸𑌨𑍍𑌨𑌿𑌭𑍈𑌃 ॥ 2 ॥
𑌨𑌵𑌮𑌾𑌸𑌧𑍃𑌤𑌂 𑌗𑌰𑍍𑌭𑌂 𑌭𑌾𑌸𑍍𑌕𑌰𑌸𑍍𑌯 𑌗𑌭𑌸𑍍𑌤𑌿𑌭𑌿𑌃 ।
𑌪𑍀𑌤𑍍𑌵𑌾 𑌰𑌸𑌂 𑌸𑌮𑍁𑌦𑍍𑌰𑌾𑌣𑌾𑌂 𑌦𑍍𑌯𑍌𑌃 𑌪𑍍𑌰𑌸𑍂𑌤𑍇 𑌰𑌸𑌾𑌯𑌨𑌮𑍍 ॥ 3 ॥
𑌶𑌕𑍍𑌯𑌮𑌂𑌬𑌰𑌮𑌾𑌰𑍁𑌹𑍍𑌯 𑌮𑍇𑌘𑌸𑍋𑌪𑌾𑌨𑌪𑌂𑌕𑍍𑌤𑌿𑌭𑌿𑌃 ।
𑌕𑍁𑌟𑌜𑌾𑌰𑍍𑌜𑍁𑌨𑌮𑌾𑌲𑌾𑌭𑌿𑌰𑌲𑌂𑌕𑌰𑍍𑌤𑍁𑌂 𑌦𑌿𑌵𑌾𑌕𑌰𑌮𑍍 ॥ 4 ॥
𑌸𑌂𑌧𑍍𑌯𑌾𑌰𑌾𑌗𑍋𑌤𑍍𑌥𑌿𑌤𑍈𑌸𑍍𑌤𑌾𑌮𑍍𑌰𑍈𑌰𑌂𑌤𑍇𑌷𑍍𑌵𑌧𑌿𑌕 𑌪𑌾𑌂𑌡𑌰𑍈𑌃 ।
𑌸𑍍𑌨𑌿𑌗𑍍𑌧𑍈𑌰𑌭𑍍𑌰𑌪𑌟𑌚𑍍𑌛𑍇𑌦𑍈𑌰𑍍𑌬𑌦𑍍𑌧𑌵𑍍𑌰𑌣𑌮𑌿𑌵𑌾𑌂𑌬𑌰𑌮𑍍 ॥ 5 ॥
𑌮𑌂𑌦𑌮𑌾𑌰𑍁𑌤 𑌨𑌿𑌶𑍍𑌵𑌾𑌸𑌂 𑌸𑌂𑌧𑍍𑌯𑌾𑌚𑌂𑌦𑌨𑌰𑌂𑌜𑌿𑌤𑌮𑍍 ।
𑌆𑌪𑌾𑌂𑌡𑍁𑌜𑌲𑌦𑌂 𑌭𑌾𑌤𑌿 𑌕𑌾𑌮𑌾𑌤𑍁𑌰𑌮𑌿𑌵𑌾𑌂𑌬𑌰𑌮𑍍 ॥ 6 ॥
𑌏𑌷𑌾 𑌘𑌰𑍍𑌮𑌪𑌰𑌿𑌕𑍍𑌲𑌿𑌷𑍍𑌟𑌾 𑌨𑌵𑌵𑌾𑌰𑌿𑌪𑌰𑌿𑌪𑍍𑌲𑍁𑌤𑌾 ।
𑌸𑍀𑌤𑍇𑌵 𑌶𑍋𑌕𑌸𑌂𑌤𑌪𑍍𑌤𑌾 𑌮𑌹𑍀 𑌬𑌾𑌷𑍍𑌪𑌂 𑌵𑌿𑌮𑍁𑌂𑌚𑌤𑌿 ॥ ॥
𑌮𑍇𑌘𑍋𑌦𑌰𑌵𑌿𑌨𑌿𑌰𑍍𑌮𑍁𑌕𑍍𑌤𑌾𑌃 𑌕𑌹𑍍𑌲𑌾𑌰𑌸𑍁𑌖𑌶𑍀𑌤𑌲𑌾𑌃 ।
𑌶𑌕𑍍𑌯𑌮𑌂𑌜𑌲𑌿𑌭𑌿𑌃 𑌪𑌾𑌤𑍁𑌂 𑌵𑌾𑌤𑌾𑌃 𑌕𑍇𑌤𑌕𑌿𑌗𑌂𑌧𑌿𑌨𑌃 ॥ ॥
𑌏𑌷 𑌫𑍁𑌲𑍍𑌲𑌾𑌰𑍍𑌜𑍁𑌨𑌶𑍍𑌶𑍈𑌲𑌃 𑌕𑍇𑌤𑌕𑍈𑌰𑌧𑌿𑌵𑌾𑌸𑌿𑌤𑌃 ।
𑌸𑍁𑌗𑍍𑌰𑍀𑌵 𑌇𑌵 𑌶𑌾𑌂𑌤𑌾𑌰𑌿𑌰𑍍𑌧𑌾𑌰𑌾𑌭𑌿𑌰𑌭𑌿𑌷𑌿𑌚𑍍𑌯𑌤𑍇 ॥ ॥
𑌮𑍇𑌘𑌕𑍃𑌷𑍍𑌣𑌾𑌜𑌿𑌨𑌧𑌰𑌾𑌃 𑌧𑌾𑌰𑌾𑌯𑌜𑍍𑌞𑍋𑌪𑌵𑍀𑌤𑌿𑌨𑌃 ।
𑌮𑌾𑌰𑍁𑌤𑌾𑌪𑍂𑌰𑌿𑌤𑌗𑍁𑌹𑌾𑌃 𑌪𑍍𑌰𑌾𑌧𑍀𑌤𑌾 𑌇𑌵 𑌪𑌰𑍍𑌵𑌤𑌾𑌃 ॥ 10 ॥
𑌕𑌶𑌾𑌭𑌿𑌰𑌿𑌵 𑌹𑍈𑌮𑍀𑌭𑌿𑌰𑍍𑌵𑌿𑌦𑍍𑌯𑍁𑌦𑍍𑌭𑌿𑌰𑌿𑌵𑌤𑌾𑌡𑌿𑌤𑌮𑍍 ।
𑌅𑌂𑌤𑌸𑍍𑌤𑍍𑌸𑌤𑌨𑌿𑌰𑍍𑌘𑍋𑌷𑌂 𑌸𑌵𑍇𑌦𑌨𑌮𑌿𑌵𑌾𑌂𑌬𑌰𑌮𑍍 ॥ 11 ॥
𑌨𑍀𑌲𑌮𑍇𑌘𑌾𑌶𑍍𑌰𑌿𑌤𑌾 𑌵𑌿𑌦𑍍𑌯𑍁𑌤𑍍𑌸𑍍𑌫𑍁𑌰𑌂𑌤𑍀 𑌪𑍍𑌰𑌤𑌿𑌭𑌾𑌤𑌿 𑌮𑌾 ।
𑌸𑍍𑌫𑍁𑌰𑌂𑌤𑍀 𑌰𑌾𑌵𑌣𑌸𑍍𑌯𑌾𑌂𑌕𑍇 𑌵𑍈𑌦𑍇𑌹𑍀𑌵 𑌤𑌪𑌸𑍍𑌵𑌿𑌨𑍀 ॥ 12 ॥
𑌇𑌮𑌾𑌸𑍍𑌤𑌾 𑌮𑌨𑍍𑌮𑌥𑌵𑌤𑌾𑌂 𑌹𑌿𑌤𑌾𑌃 𑌪𑍍𑌰𑌤𑌿𑌹𑌤𑌾 𑌦𑌿𑌶𑌃 ।
𑌅𑌨𑍁𑌲𑌿𑌪𑍍𑌤𑌾 𑌇𑌵 𑌘𑌨𑍈𑌰𑍍𑌨𑌷𑍍𑌟𑌗𑍍𑌰𑌹𑌨𑌿𑌶𑌾𑌕𑌰𑌾𑌃 ॥ 13 ॥
𑌚𑌿𑌦𑍍𑌬𑌾𑌷𑍍𑌪𑌾𑌭𑌿𑌸𑌂𑌰𑍁𑌦𑍍𑌧𑌾𑌨𑍍 𑌵𑌰𑍍𑌷𑌾𑌗𑌮𑌸𑌮𑍁𑌤𑍍𑌸𑍁𑌕𑌾𑌨𑍍 ।
𑌕𑍁𑌟𑌜𑌾𑌨𑍍𑌪𑌶𑍍𑌯 𑌸𑍌𑌮𑌿𑌤𑍍𑌰𑍇 𑌪𑍁𑌷𑍍𑌪𑌿𑌤𑌾𑌨𑍍𑌗𑌿𑌰𑌿𑌸𑌾𑌨𑍁𑌷𑍁 ॥ 14 ॥
𑌮𑌮 𑌶𑍋𑌕𑌾𑌭𑌿𑌭𑍂𑌤𑌸𑍍𑌯 𑌕𑌾𑌮𑌸𑌂𑌦𑍀𑌪𑌨𑌾𑌨𑍍 𑌸𑍍𑌥𑌿𑌤𑌾𑌨𑍍 ।
𑌰𑌜𑌃 𑌪𑍍𑌰𑌶𑌾𑌂𑌤𑌂 𑌸𑌹𑌿𑌮𑍋𑌽𑌦𑍍𑌯 𑌵𑌾𑌯𑍁 𑌰𑍍𑌨𑌿𑌦𑌾𑌘𑌦𑍋𑌷𑌪𑍍𑌰𑌸𑌰𑌾𑌃 𑌪𑍍𑌰𑌶𑌾𑌂𑌤𑌾𑌃 ।
𑌸𑍍𑌥𑌿𑌤𑌾 𑌹𑌿 𑌯𑌾𑌤𑍍𑌰𑌾 𑌵𑌸𑍁𑌧𑌾𑌧𑌿𑌪𑌾𑌨𑌾𑌂 𑌪𑍍𑌰𑌵𑌾𑌸𑌿𑌨𑍋 𑌯𑌾𑌂𑌤𑌿 𑌨𑌰𑌾𑌸𑍍𑌸𑍍𑌵𑌦𑍇𑌶𑌾𑌨𑍍 ॥ 15 ॥
𑌸𑌂𑌪𑍍𑌰𑌸𑍍𑌥𑌿𑌤𑌾 𑌮𑌾𑌨𑌸𑌵𑌾𑌸𑌲𑍁𑌬𑍍𑌧𑌾𑌃 𑌪𑍍𑌰𑌿𑌯𑌾𑌨𑍍𑌵𑌿𑌤𑌾𑌃 𑌸𑌂𑌪𑍍𑌰𑌤𑌿 𑌚𑌕𑍍𑌰𑌵𑌾𑌕𑌾𑌃 ।
𑌅𑌭𑍀𑌕𑍍𑌷𑍍𑌣𑌵𑌰𑍍𑌷𑍋𑌦𑌕𑌵𑌿𑌕𑍍𑌷𑌤𑍇𑌷𑍁 𑌯𑌾𑌨𑌾𑌨𑌿 𑌮𑌾𑌰𑍍𑌗𑍇𑌷𑍁 𑌨 𑌸𑌂𑌪𑌤𑌂𑌤𑌿 ॥ 16 ॥
𑌕𑍍𑌵𑌚𑌿𑌤𑍍𑌪𑍍𑌰𑌕𑌾𑌶𑌂 𑌕𑍍𑌵𑌚𑌿𑌦𑌪𑍍𑌰𑌕𑌾𑌶𑌂 𑌨𑌭𑌃 𑌪𑍍𑌰𑌕𑍀𑌰𑍍𑌣𑌾𑌂𑌬𑍁𑌧𑌰𑌂 𑌵𑌿𑌭𑌾𑌤𑌿 ।
𑌕𑍍𑌵𑌚𑌿𑌤𑍍𑌕𑍍𑌵𑌚𑌿𑌤𑍍𑌪𑌰𑍍𑌵𑌤𑌸𑌨𑍍𑌨𑌿𑌰𑍁𑌦𑍍𑌧𑌂 𑌰𑍂𑌪𑌂 𑌯𑌥𑌾 𑌶𑌾𑌂𑌤𑌮𑌹𑌾𑌰𑍍𑌣𑌵𑌸𑍍𑌯 ॥ 1 ॥
𑌵𑍍𑌯𑌾𑌮𑌿𑌶𑍍𑌰𑌿𑌤𑌂 𑌸𑌾𑌰𑍍𑌜𑌕𑌦𑌂𑌬𑌪𑍁𑌷𑍍𑌪𑍈 𑌰𑍍𑌨𑌵𑌂 𑌜𑌲𑌂 𑌪𑌰𑍍𑌵𑌤𑌧𑌾𑌤𑍁𑌤𑌾𑌮𑍍𑌰𑌮𑍍 ।
𑌮𑌯𑍂𑌰𑌕𑍇𑌕𑌾𑌭𑌿𑌰𑌨𑍁𑌪𑍍𑌰𑌯𑌾𑌤𑌂 𑌶𑍈𑌲𑌾𑌪𑌗𑌾𑌶𑍍𑌶𑍀𑌘𑍍𑌰𑌤𑌰𑌂 𑌵𑌹𑌂𑌤𑌿 ॥ 1 ॥
𑌰𑌸𑌾𑌕𑍁𑌲𑌂 𑌷𑌟𑍍𑌪𑌦𑌸𑌨𑍍𑌨𑌿𑌕𑌾𑌶𑌂 𑌪𑍍𑌰𑌭𑍁𑌜𑍍𑌯𑌤𑍇 𑌜𑌂𑌬𑍁𑌫𑌲𑌂 𑌪𑍍𑌰𑌕𑌾𑌮𑌮𑍍 ।
𑌅𑌨𑍇𑌕𑌵𑌰𑍍𑌣𑌂 𑌪𑌵𑌨𑌾𑌵𑌧𑍂𑌤𑌂 𑌭𑍂𑌮𑍌 𑌪𑌤𑌤𑍍𑌯𑌾𑌮𑍍𑌰𑌫𑌲𑌂 𑌵𑌿𑌪𑌕𑍍𑌵𑌮𑍍 ॥ 1 ॥
𑌵𑌿𑌦𑍍𑌯𑍁𑌤𑍍𑌪𑌤𑌾𑌕𑌾𑌸𑍍𑌸𑌬𑌲𑌾𑌕𑌮𑌾𑌲𑌾𑌃 𑌶𑍈𑌲𑍇𑌂𑌦𑍍𑌰𑌕𑍂𑌟𑌾𑌕𑍃𑌤𑌿𑌸𑌨𑍍𑌨𑌿𑌕𑌾𑌶𑌾𑌃 ।
𑌗𑌰𑍍𑌜𑌂𑌤𑌿 𑌮𑍇𑌘𑌾𑌃 𑌸𑌮𑍁𑌦𑍀𑌰𑍍𑌣𑌨𑌾𑌦𑌾𑌃 𑌮𑌤𑍍𑌤𑌾 𑌗𑌜𑍇𑌂𑌦𑍍𑌰𑌾 𑌇𑌵 𑌸𑌂𑌯𑍁𑌗𑌸𑍍𑌥𑌾𑌃 ॥ 20 ॥
𑌵𑌰𑍍𑌷𑍋𑌦𑌕𑌾𑌪𑍍𑌯𑌾𑌯𑌿𑌤𑌶𑌾𑌦𑍍𑌵𑌲𑌾𑌨𑌿 𑌪𑍍𑌰𑌵𑍃𑌤𑍍𑌤𑌨𑍃𑌤𑍍𑌤𑍋𑌤𑍍𑌸𑌵𑌬𑌰𑍍𑌹𑌿𑌣𑌾𑌨𑌿 ।
𑌵𑌨𑌾𑌨𑌿 𑌨𑌿𑌰𑍍𑌵𑍃𑌷𑍍𑌟𑌵𑌲𑌾𑌹𑌕𑌾𑌨𑌿 𑌪𑌶𑍍𑌯𑌾𑌪𑌰𑌾𑌹𑍍𑌣𑍇𑌷𑍍𑌵𑌧𑌿𑌕𑌂 𑌵𑌿𑌭𑌾𑌂𑌤𑌿 ॥ 21 ॥
𑌸𑌮𑍁𑌦𑍍𑌵𑌹𑌂𑌤 𑌸𑍍𑌸𑌲𑌿𑌲𑌾𑌤𑌿𑌭𑌾𑌰𑌂 𑌬𑌲𑌾𑌕𑌿𑌨𑍋 𑌵𑌾𑌰𑌿𑌧𑌰𑌾 𑌨𑌦𑌂𑌤𑌃 ।
𑌮𑌹𑌤𑍍𑌸𑍁 𑌶𑍃𑌂𑌗𑍇𑌷𑍁 𑌮𑌹𑍀𑌧𑌰𑌾𑌣𑌾𑌂 𑌵𑌿𑌶𑍍𑌰𑌮𑍍𑌯 𑌵𑌿𑌶𑍍𑌰𑌮𑍍𑌯 𑌪𑍁𑌨𑌃 𑌪𑍍𑌰𑌯𑌾𑌂𑌤𑌿 ॥ 22 ॥
𑌮𑍇𑌘𑌾𑌭𑌿𑌕𑌾𑌮𑌾 𑌪𑌰𑌿𑌸𑌂𑌪𑌤𑌂𑌤𑍀 𑌸𑌮𑍍𑌮𑍋𑌦𑌿𑌤𑌾 𑌭𑌾𑌤𑌿 𑌬𑌲𑌾𑌕𑌪𑌂𑌕𑍍𑌤𑌿𑌃 ।
𑌵𑌾𑌤𑌾𑌵𑌧𑍂𑌤𑌾 𑌵𑌰𑌪𑍌𑌂𑌡𑌰𑍀𑌕𑍀 𑌲𑌂𑌬𑍇𑌵 𑌮𑌾𑌲𑌾 𑌰𑌚𑌿𑌤𑌾𑌂𑌬𑌰𑌸𑍍𑌯 ॥ 23 ॥
𑌬𑌾𑌲𑍇𑌂𑌦𑍍𑌰𑌗𑍋𑌪𑌾𑌂𑌤𑌰𑌚𑌿𑌤𑍍𑌰𑌿𑌤𑍇𑌨 𑌵𑌿𑌭𑌾𑌤𑌿 𑌭𑍂𑌮𑌿𑌰𑍍𑌨𑌵𑌶𑌾𑌦𑍍𑌵𑌲𑍇𑌨 ।
𑌗𑌾𑌤𑍍𑌰𑌾𑌨𑍁𑌪𑍃𑌕𑍍𑌤𑍇𑌨 𑌶𑍁𑌕𑌪𑍍𑌰𑌭𑍇𑌣 𑌨𑌾𑌰𑍀𑌵 𑌲𑌾𑌕𑍍𑌷𑍋𑌕𑍍𑌷𑌿𑌤𑌕𑌂𑌬𑌲𑍇𑌨 ॥ 24 ॥
𑌨𑌿𑌦𑍍𑌰𑌾 𑌶𑌨𑍈𑌃 𑌕𑍇𑌶𑌵𑌮𑌭𑍍𑌯𑍁𑌪𑍈𑌤𑌿 𑌦𑍍𑌰𑍁𑌤𑌂 𑌨𑌦𑍀 𑌸𑌾𑌗𑌰𑌮𑌭𑍍𑌯𑍁𑌪𑍈𑌤𑌿 ।
𑌹𑍃𑌷𑍍𑌟𑌾 𑌬𑌲𑌾𑌕𑌾 𑌘𑌨𑌮𑌭𑍍𑌯𑍁𑌪𑍈𑌤𑌿 𑌕𑌾𑌂𑌤𑌾 𑌸𑌕𑌾𑌮𑌾 𑌪𑍍𑌰𑌿𑌯𑌮𑌭𑍍𑌯𑍁𑌪𑍈𑌤𑌿 ॥ 25 ॥
𑌜𑌾𑌤𑌾 𑌵𑌨𑌾𑌂𑌤𑌾𑌶𑍍𑌶𑌿𑌖𑌿𑌸𑌂𑌪𑍍𑌰𑌨𑍃𑌤𑍍𑌤𑌾 𑌜𑌾𑌤𑌾𑌃 𑌕𑌦𑌂𑌬𑌾𑌃 𑌸𑌕𑌦𑌂𑌬𑌶𑌾𑌖𑌾𑌃 ।
𑌜𑌾𑌤𑌾 𑌵𑍃𑌷𑌾 𑌗𑍋𑌷𑍁 𑌸𑌮𑌾𑌨𑌕𑌾𑌮𑌾 𑌜𑌾𑌤𑌾 𑌮𑌹𑍀 𑌸𑌸𑍍𑌯𑌵𑌨𑌾𑌭𑌿𑌰𑌾𑌮𑌾 ॥ 26 ॥
𑌵𑌹𑌂𑌤𑌿 𑌵𑌰𑍍𑌷𑌂𑌤𑌿 𑌨𑌦𑌂𑌤𑌿 𑌭𑌾𑌂𑌤𑌿 𑌧𑍍𑌯𑌾𑌯𑌂𑌤𑌿 𑌨𑍃𑌤𑍍𑌯𑌂𑌤𑌿 𑌸𑌮𑌾𑌶𑍍𑌵𑌸𑌂𑌤𑌿 ।
𑌨𑌦𑍍𑌯𑍋 𑌘𑌨𑌾 𑌮𑌤𑍍𑌤𑌗𑌜𑌾 𑌵𑌨𑌾𑌂𑌤𑌾𑌃 𑌪𑍍𑌰𑌿𑌯𑌾𑌵𑌿𑌹𑍀𑌨𑌾𑌶𑍍𑌶𑌿𑌖𑌿𑌨𑌃 𑌪𑍍𑌲𑌵𑌂𑌗𑌮𑌾𑌃 ॥ 2 ॥
𑌪𑍍𑌰𑌹𑌰𑍍𑌷𑌿𑌤𑌾𑌃 𑌕𑍇𑌤𑌕𑌪𑍁𑌷𑍍𑌪𑌗𑌂𑌧 𑌮𑌾𑌘𑍍𑌰𑌾𑌯 𑌹𑍃𑌷𑍍𑌟𑌾 𑌵𑌨𑌨𑌿𑌰𑍍𑌝𑌰𑍇𑌷𑍁 ।
𑌪𑍍𑌰𑌪𑌾𑌤𑌶𑌬𑍍𑌦𑌾𑌕𑍁𑌲𑌿𑌤𑌾 𑌗𑌜𑍇𑌂𑌦𑍍𑌰𑌾 𑌸𑍍𑌸𑌾𑌰𑍍𑌧𑌂 𑌮𑌯𑍂𑌰𑍈 𑌸𑍍𑌸𑌮𑌦𑌾 𑌨𑌦𑌂𑌤𑌿 ॥ 2 ॥
𑌧𑌾𑌰𑌾𑌨𑌿𑌪𑌾𑌤𑍈𑌰𑌭𑌿𑌹𑌨𑍍𑌯𑌮𑌾𑌨𑌾𑌃 𑌕𑌦𑌂𑌬𑌶𑌾𑌖𑌾𑌸𑍁 𑌵𑌿𑌲𑌂𑌬𑌮𑌾𑌨𑌾𑌃 ।
𑌕𑍍𑌷𑌣𑌾𑌰𑍍𑌜𑌿𑌤𑌂 𑌪𑍁𑌷𑍍𑌪𑌰𑌸𑌾𑌵𑌗𑌾𑌢𑌂 𑌶𑌨𑍈𑌰𑍍𑌮𑌦𑌂 𑌷𑌟𑍍𑌚𑌰𑌣𑌾𑌸𑍍𑌤𑍍𑌯𑌜𑌂𑌤𑌿 ॥ 2 ॥
𑌅𑌂𑌗𑌾𑌰𑌚𑍂𑌰𑍍𑌣𑍋𑌤𑍍𑌕𑌰𑌸𑌨𑍍𑌨𑌿𑌕𑌾𑌶𑍈𑌃 𑌫𑌲𑍈𑌸𑍍𑌸𑍁𑌪𑌰𑍍𑌯𑌾𑌪𑍍𑌤𑌰𑌸𑍈𑌸𑍍𑌸𑌮𑍃𑌦𑍍𑌧𑍈𑌃 ।
𑌜𑌂𑌬𑍂𑌦𑍍𑌰𑍁𑌮𑌾𑌣𑌾𑌂 𑌪𑍍𑌰𑌵𑌿𑌭𑌾𑌂𑌤𑌿 𑌶𑌾𑌖𑌾𑌃 𑌨𑌿𑌲𑍀𑌯𑌮𑌾𑌨𑌾 𑌇𑌵 𑌷𑌟𑍍𑌪𑌦𑍌𑌘𑍈𑌃 ॥ 30 ॥
𑌤𑌟𑌿𑌤𑍍𑌪𑌤𑌾𑌕𑌾𑌭𑌿𑌰𑌲𑌂𑌕𑍃𑌤𑌾𑌨𑌾 𑌮𑍁𑌦𑍀𑌰𑍍𑌣𑌗𑌂𑌭𑍀𑌰𑌮𑌹𑌾𑌰𑌵𑌾𑌣𑌾𑌮𑍍 ।
𑌵𑌿𑌭𑌾𑌂𑌤𑌿 𑌰𑍂𑌪𑌾𑌣𑌿 𑌬𑌲𑌾𑌹𑌕𑌾𑌨𑌾𑌂 𑌰𑌣𑍋𑌦𑍍𑌯𑌤𑌾𑌨𑌾𑌮𑌿𑌵 𑌵𑌾𑌨𑌰𑌣𑌾𑌨𑌾𑌮𑍍 ॥ 31 ॥
𑌮𑌾𑌰𑍍𑌗𑌾𑌨𑍁𑌗𑌶𑍍𑌶𑍈𑌲𑌵𑌨𑌾𑌨𑍁𑌸𑌾𑌰𑍀 𑌸𑌂𑌪𑍍𑌰𑌸𑍍𑌥𑌿𑌤𑍋 𑌮𑍇𑌘𑌰𑌵𑌂 𑌨𑌿𑌶𑌮𑍍𑌯 ।
𑌯𑍁𑌦𑍍𑌧𑌾𑌭𑌿𑌕𑌾𑌮𑌃 𑌪𑍍𑌰𑌤𑌿𑌨𑌾𑌦𑌶𑌂𑌕𑍀 𑌮𑌤𑍍𑌤𑍋 𑌗𑌜𑍇𑌂𑌦𑍍𑌰𑌃 𑌪𑍍𑌰𑌤𑌿𑌸𑌨𑍍𑌨𑌿𑌵𑍃𑌤𑍍𑌤𑌃 ॥ 32 ॥
𑌕𑍍𑌵𑌚𑌿𑌤𑍍𑌪𑍍𑌰𑌗𑍀𑌤𑌾 𑌇𑌵 𑌷𑌟𑍍𑌪𑌦𑍌𑌘𑍈𑌃 𑌕𑍍𑌵𑌚𑌿𑌤𑍍𑌪𑍍𑌰𑌨𑍃𑌤𑍍𑌤𑌾 𑌇𑌵 𑌨𑍀𑌲𑌕𑌂𑌠𑍈𑌃 ।
𑌕𑍍𑌵𑌚𑌿𑌤𑍍𑌪𑍍𑌰𑌮𑌤𑍍𑌤𑌾 𑌇𑌵 𑌵𑌾𑌰𑌣𑍇𑌂𑌦𑍍𑌰𑍈 𑌰𑍍𑌵𑌿𑌭𑌾𑌂𑌤𑍍𑌯𑌨𑍇𑌕𑌾𑌶𑍍𑌰𑌯𑌿𑌣𑍋 𑌵𑌨𑌾𑌂𑌤𑌾𑌃 ॥ 33 ॥
𑌕𑌦𑌂𑌬𑌸𑌰𑍍𑌜𑌾𑌰𑍍𑌜𑍁𑌨𑌕𑌂𑌦𑌲𑌾𑌢𑍍𑌯𑌾 𑌵𑌨𑌾𑌂𑌤𑌭𑍂𑌮𑌿𑌰𑍍𑌨𑌵𑌵𑌾𑌰𑌿𑌪𑍂𑌰𑍍𑌣𑌾 ।
𑌮𑌯𑍂𑌰𑌮𑌤𑍍𑌤𑌾𑌭𑌿𑌰𑍁𑌤𑌪𑍍𑌰𑌨𑍃𑌤𑍍𑌤𑍈 𑌰𑌾𑌪𑌾𑌨𑌭𑍂𑌮𑌿𑌪𑍍𑌰𑌤𑌿𑌮𑌾 𑌵𑌿𑌭𑌾𑌤𑌿 ॥ 34 ॥
𑌮𑍁𑌕𑍍𑌤𑌾𑌸𑌕𑌾𑌶𑌂 𑌸𑌲𑌿𑌲𑌂 𑌪𑌤𑌦𑍍𑌵𑍈 𑌸𑍁𑌨𑌿𑌰𑍍𑌮𑌲𑌂 𑌪𑌤𑍍𑌰𑌪𑍁𑌟𑍇𑌷𑍁 𑌲𑌗𑍍𑌨𑌮𑍍 ।
𑌹𑍃𑌷𑍍𑌟𑌾 𑌵𑌿𑌵𑌰𑍍𑌣𑌚𑍍𑌛𑌦𑌨𑌾 𑌵𑌿𑌹𑌂𑌗𑌾 𑌸𑍍𑌸𑍁𑌰𑍇𑌂𑌦𑍍𑌰𑌦𑌤𑍍𑌤𑌂 𑌤𑍃𑌷𑌿𑌤𑌾𑌃 𑌪𑌿𑌬𑌂𑌤𑌿 ॥ 35 ॥
𑌷𑌟𑍍𑌪𑌾𑌦𑌤𑌂𑌤𑍍𑌰𑍀𑌮𑌧𑍁𑌰𑌾𑌭𑌿𑌧𑌾𑌨𑌂 𑌪𑍍𑌲𑌵𑌂𑌗𑌮𑍋𑌦𑍀𑌰𑌿𑌤𑌕𑌂𑌠𑌤𑌾𑌲𑌮𑍍 ।
𑌆𑌵𑌿𑌷𑍍𑌕𑍃𑌤𑌂 𑌮𑍇𑌘𑌮𑍃𑌦𑌂𑌗𑌨𑌾𑌦𑍈 𑌰𑍍𑌵𑌨𑍇𑌷𑍁 𑌸𑌂𑌗𑍀𑌤𑌮𑌿𑌵 𑌪𑍍𑌰𑌵𑍃𑌤𑍍𑌤𑌮𑍍 ॥ 36 ॥
𑌕𑍍𑌵𑌚𑌿𑌤𑍍𑌪𑍍𑌰𑌨𑍃𑌤𑍍𑌤𑍈𑌃 𑌕𑍍𑌵𑌚𑌿𑌦𑍁𑌨𑍍𑌨𑌦𑌦𑍍𑌭𑌿𑌃 𑌕𑍍𑌵𑌚𑌿𑌚𑍍𑌚 𑌵𑍃𑌕𑍍𑌷𑌾𑌗𑍍𑌰𑌨𑌿𑌷𑌣𑍍𑌣𑌕𑌾𑌯𑍈𑌃 ।
𑌵𑍍𑌯𑌾𑌲𑌂𑌬𑌬𑌰𑍍𑌹𑌾𑌭𑌰𑌣𑍈𑌰𑍍𑌮𑌯𑍂𑌰𑍈 𑌰𑍍𑌵𑌨𑍇𑌷𑍁 𑌸𑌂𑌗𑍀𑌤𑌮𑌿𑌵 𑌪𑍍𑌰𑌵𑍃𑌤𑍍𑌤𑌮𑍍 ॥ 3 ॥
𑌸𑍍𑌵𑌨𑍈𑌰𑍍𑌘𑌨𑌾𑌨𑌾𑌂 𑌪𑍍𑌲𑌵𑌗𑌾𑌃 𑌪𑍍𑌰𑌬𑍁𑌦𑍍𑌧𑌾𑌃 𑌵𑌿𑌹𑌾𑌯 𑌨𑌿𑌦𑍍𑌰𑌾𑌂 𑌚𑌿𑌰𑌸𑌨𑍍𑌨𑌿𑌰𑍁𑌦𑍍𑌧𑌾𑌮𑍍 ।
𑌅𑌨𑍇𑌕𑌰𑍂𑌪𑌾𑌕𑍃𑌤𑌿𑌵𑌰𑍍𑌣𑌨𑌾𑌦𑌾𑌃 𑌨𑌵𑌾𑌂𑌬𑍁𑌧𑌾𑌰𑌾𑌭𑌿𑌹𑌤𑌾 𑌨𑌦𑌂𑌤𑌿 ॥ 3 ॥
𑌨𑌦𑍍𑌯𑌸𑍍𑌸𑌮𑍁𑌦𑍍𑌵𑌾𑌹𑌿𑌤𑌚𑌕𑍍𑌰𑌵𑌾𑌕𑌾 𑌸𑍍𑌤𑌟𑌾𑌨𑌿 𑌶𑍀𑌰𑍍𑌣𑌾𑌨𑍍𑌯𑌪𑌵𑌾𑌹𑌯𑌿𑌤𑍍𑌵𑌾 ।
𑌦𑍃𑌪𑍍𑌤𑌾 𑌨𑌵𑌪𑍍𑌰𑌾𑌭𑍃𑌤𑌪𑍂𑌰𑍍𑌣𑌭𑍋𑌗𑌾𑌃 𑌦𑍍𑌰𑍁𑌤𑌂 𑌸𑍍𑌵𑌭𑌰𑍍𑌤𑌾𑌰𑌮𑍁𑌪𑍋𑌪𑌯𑌾𑌂𑌤𑌿 ॥ 3 ॥
𑌨𑍀𑌲𑍇𑌷𑍁 𑌨𑍀𑌲𑌾𑌃 𑌪𑍍𑌰𑌵𑌿𑌭𑌾𑌂𑌤𑌿 𑌸𑌕𑍍𑌤𑌾𑌃 𑌮𑍇𑌘𑍇𑌷𑍁 𑌮𑍇𑌘𑌾 𑌨𑌵𑌵𑌾𑌰𑌿𑌪𑍂𑌰𑍍𑌣𑌾𑌃 ।
𑌦𑌵𑌾𑌗𑍍𑌨𑌿𑌦𑌗𑍍𑌧𑍇𑌷𑍁 𑌦𑌵𑌾𑌗𑍍𑌨𑌿𑌦𑌗𑍍𑌧𑌾 𑌶𑍍𑌶𑍈𑌲𑍇𑌷𑍁 𑌶𑍈𑌲𑌾 𑌇𑌵 𑌬𑌦𑍍𑌧𑌮𑍂𑌲𑌾𑌃 ॥ 40 ॥
𑌪𑍍𑌰𑌹𑍃𑌷𑍍𑌟𑌸𑌨𑍍𑌨𑌾𑌦𑌿𑌤𑌬𑌰𑍍𑌹𑌿𑌣𑌾𑌨𑌿 𑌸𑌶𑌕𑍍𑌰𑌗𑍋𑌪𑌾𑌕𑍁𑌲𑌶𑌾𑌦𑍍𑌵𑌲𑌾𑌨𑌿 ।
𑌚𑌰𑌂𑌤𑌿 𑌨𑍀𑌪𑌾𑌰𑍍𑌜𑍁𑌨𑌵𑌾𑌸𑌿𑌤𑌾𑌨𑌿 𑌗𑌜𑌾𑌸𑍍𑌸𑍁𑌰𑌮𑍍𑌯𑌾𑌣𑌿 𑌵𑌨𑌾𑌂𑌤𑌰𑌾𑌣𑌿 ॥ 41 ॥
𑌨𑌵𑌾𑌂𑌬𑍁𑌧𑌾𑌰𑌾𑌹𑌤𑌕𑍇𑌸𑌰𑌾𑌣𑌿 𑌦𑍍𑌰𑍁𑌤𑌂 𑌪𑌰𑌿𑌤𑍍𑌯𑌜𑍍𑌯 𑌸𑌰𑍋𑌰𑍁𑌹𑌾𑌣𑌿 ।
𑌕𑌦𑌂𑌬𑌪𑍁𑌷𑍍𑌪𑌾𑌣𑌿 𑌸𑌕𑍇𑌸𑌰𑌾𑌣𑌿 𑌨𑌵𑌾𑌨𑌿 𑌹𑍃𑌷𑍍𑌟𑌾 𑌭𑍍𑌰𑌮𑌰𑌾𑌃 𑌪𑌤𑌂𑌤𑌿𑌃 ॥ 42 ॥
𑌮𑌤𑍍𑌤𑌾 𑌗𑌜𑍇𑌂𑌦𑍍𑌰𑌾 𑌮𑍁𑌦𑌿𑌤𑌾 𑌗𑌵𑍇𑌂𑌦𑍍𑌰𑌾 𑌵𑌨𑍇𑌷𑍁 𑌵𑌿𑌶𑍍𑌰𑌾𑌂𑌤𑌤𑌰𑌾 𑌮𑍃𑌗𑍇𑌂𑌦𑍍𑌰𑌾 ।
𑌰𑌮𑍍𑌯𑌾 𑌨𑌗𑍇𑌂𑌦𑍍𑌰𑌾 𑌨𑌿𑌭𑍃𑌤𑌾 𑌨𑌰𑍇𑌂𑌦𑍍𑌰𑌾𑌃 𑌪𑍍𑌰𑌕𑍍𑌰𑍀𑌡𑌿𑌤𑍋 𑌵𑌾𑌰𑌿𑌧𑌰𑍈𑌸𑍍𑌸𑍁𑌰𑍇𑌂𑌦𑍍𑌰𑌃 ॥ 43 ॥
𑌮𑍇𑌘𑌾𑌸𑍍𑌸𑌮𑍁𑌦𑍍𑌧𑍂𑌤𑌸𑌮𑍁𑌦𑍍𑌰𑌨𑌾𑌦𑌾𑌃 𑌮𑌹𑌾𑌜𑌲𑍌𑌘𑍈𑌰𑍍𑌗𑌗𑌨𑌾𑌵𑌲𑌂𑌬𑌾𑌃 ।
𑌨𑌦𑍀𑌸𑍍𑌤𑌟𑌾𑌕𑌾𑌨𑌿 𑌸𑌰𑌾𑌂𑌸𑌿 𑌵𑌾𑌪𑍀 𑌰𑍍𑌮𑌹𑍀𑌂 𑌚 𑌕𑍃𑌤𑍍𑌸𑍍𑌨𑌾𑌮𑌪𑌵𑌾𑌹𑌯𑌂𑌤𑌿 ॥ 44 ॥
𑌵𑌰𑍍𑌷𑌪𑍍𑌰𑌵𑍇𑌗𑌾 𑌵𑌿𑌪𑍁𑌲𑌾𑌃 𑌪𑌤𑌂𑌤𑌿 𑌪𑍍𑌰𑌵𑌾𑌂𑌤𑌿 𑌵𑌾𑌤𑌾𑌸𑍍𑌸𑌮𑍁𑌦𑍀𑌰𑍍𑌣𑌘𑍋𑌷𑌾𑌃 ।
𑌪𑍍𑌰𑌣𑌷𑍍𑌟𑌕𑍂𑌲𑌾𑌃 𑌪𑍍𑌰𑌵𑌹𑌂𑌤𑌿 𑌶𑍀𑌘𑍍𑌰𑌂 𑌨𑌦𑍍𑌯𑍋𑌜𑌲𑍈𑌰𑍍𑌵𑌿𑌪𑍍𑌰𑌤𑌿𑌪𑌨𑍍𑌨𑌮𑌾𑌰𑍍𑌗𑌾𑌃 ॥ 45 ॥
𑌨𑌰𑍈𑌰𑍍𑌨𑌰𑍇𑌂𑌦𑍍𑌰𑌾 𑌇𑌵 𑌪𑌰𑍍𑌵𑌤𑍇𑌂𑌦𑍍𑌰𑌾 𑌸𑍍𑌸𑍁𑌰𑍇𑌂𑌦𑍍𑌰𑌦𑌤𑍍𑌤𑍈𑌃 𑌪𑌵𑌨𑍋𑌪𑌨𑍀𑌤𑍈𑌃 ।
𑌘𑌨𑌾𑌂𑌬𑍁𑌕𑍁𑌂𑌭𑍈𑌰𑌭𑌿𑌷𑌿𑌚𑍍𑌯𑌮𑌾𑌨𑌾 𑌰𑍂𑌪𑌂 𑌶𑍍𑌰𑌿𑌯𑌂 𑌸𑍍𑌵𑌾𑌮𑌿𑌵 𑌦𑌰𑍍𑌶𑌯𑌂𑌤𑌿 ॥ 46 ॥
𑌘𑌨𑍋𑌪𑌗𑍂𑌢𑌂 𑌗𑌗𑌨𑌂 𑌸𑌤𑌾𑌰𑌂 𑌨 𑌭𑌾𑌸𑍍𑌕𑌰𑍋 𑌦𑌰𑍍𑌶𑌨𑌮𑌭𑍍𑌯𑍁𑌪𑍈𑌤𑌿 ।
𑌨𑌵𑍈𑌰𑍍𑌜𑌲𑍌𑌘𑍈𑌰𑍍𑌧𑌰𑌣𑍀 𑌵𑌿𑌸𑍃𑌪𑍍𑌤𑌾 𑌤𑌮𑍋 𑌵𑌿𑌲𑌿𑌪𑍍𑌤𑌾 𑌨 𑌦𑌿𑌶𑌃 𑌪𑍍𑌰𑌕𑌾𑌶𑌾𑌃 ॥ 4 ॥
𑌮𑌹𑌾𑌂𑌤𑌿 𑌕𑍂𑌟𑌾𑌨𑌿 𑌮𑌹𑍀𑌧𑌰𑌾𑌣𑌾𑌂 𑌧𑌾𑌰𑌾𑌭𑌿𑌧𑍌𑌤𑌾𑌨𑍍𑌯𑌧𑌿𑌕𑌂 𑌵𑌿𑌭𑌾𑌂𑌤𑌿 ।
𑌮𑌹𑌾𑌪𑍍𑌰𑌮𑌾𑌣𑍈𑌰𑍍𑌵𑌿𑌪𑍁𑌲𑍈𑌃 𑌪𑍍𑌰𑌪𑌾𑌤𑍈 𑌰𑍍𑌮𑍁𑌕𑍍𑌤𑌾𑌕𑌲𑌾𑌪𑍈𑌰𑌿𑌵 𑌲𑌂𑌬𑌮𑌾𑌨𑍈𑌃 ॥ 4 ॥
𑌶𑍈𑌲𑍋𑌪𑌲𑌪𑍍𑌰𑌸𑍍𑌖𑌲𑌮𑌾𑌨𑌵𑍇𑌗𑌾 𑌶𑍍𑌶𑍈𑌲𑍋𑌤𑍍𑌤𑌮𑌾𑌨𑌾𑌂 𑌵𑌿𑌪𑍁𑌲𑌾𑌃 𑌪𑍍𑌰𑌪𑌾𑌤𑌾𑌃 ।
𑌗𑍁𑌹𑌾𑌸𑍁 𑌸𑌨𑍍𑌨𑌾𑌦𑌿𑌤𑌬𑌰𑍍𑌹𑌿𑌣𑌾𑌸𑍁 𑌹𑌾𑌰𑌾 𑌵𑌿𑌕𑍀𑌰𑍍𑌯𑌂𑌤 𑌇𑌵𑌾𑌵𑌭𑌾𑌂𑌤𑌿 ॥ 4 ॥
𑌶𑍀𑌘𑍍𑌰𑌪𑍍𑌰𑌵𑍇𑌗𑌾 𑌵𑌿𑌪𑍁𑌲𑌾𑌃 𑌪𑍍𑌰𑌪𑌾𑌤𑌾𑌃 𑌨𑌿𑌰𑍍𑌧𑍌𑌤𑌶𑍃𑌂𑌗𑍋𑌪𑌤𑌲𑌾 𑌗𑌿𑌰𑍀𑌣𑌾𑌮𑍍 ।
𑌮𑍁𑌕𑍍𑌤𑌾𑌕𑌲𑌾𑌪𑌪𑍍𑌰𑌤𑌿𑌮𑌾𑌃 𑌪𑌤𑌂𑌤𑍋 𑌮𑌹𑌾𑌗𑍁𑌹𑍋𑌤𑍍𑌸𑌂𑌗𑌤𑌲𑍈𑌰𑍍𑌧𑍍𑌰𑌿𑌯𑌂𑌤𑍇 ॥ 50 ॥
𑌸𑍁𑌰𑌤𑌾𑌮𑌰𑍍𑌦𑌵𑌿𑌚𑍍𑌛𑌿𑌨𑍍𑌨𑌾𑌸𑍍𑌸𑍍𑌵𑌰𑍍𑌗𑌸𑍍𑌤𑍍𑌰𑍀𑌹𑌾𑌰𑌮𑍌𑌕𑍍𑌤𑌿𑌕𑌾𑌃 ।
𑌪𑌤𑌂𑌤𑌿 𑌚𑌾𑌤𑍁𑌲𑌾 𑌦𑌿𑌕𑍍𑌷𑍁 𑌤𑍋𑌯𑌧𑌾𑌰𑌾𑌸𑍍𑌸𑌮𑌂𑌤𑌤𑌃 ॥ 51 ॥
𑌨𑌿𑌲𑍀𑌯𑌮𑌾𑌨𑍈𑌰𑍍𑌵𑌿𑌹𑌗𑍈𑌰𑍍𑌨𑌿𑌮𑍀𑌲𑌦𑍍𑌭𑌿𑌶𑍍𑌚 𑌪𑌂𑌕𑌜𑍈𑌃 ।
𑌵𑌿𑌕𑌸𑌂𑌤𑍍𑌯𑌾 𑌚 𑌮𑌾𑌲𑌤𑍍𑌯𑌾 𑌗𑌤𑍋𑌽𑌸𑍍𑌤𑌂 𑌜𑍍𑌞𑌾𑌯𑌤𑍇 𑌰𑌵𑌿𑌃 ॥ 52 ॥
𑌵𑍃𑌤𑍍𑌤𑌾 𑌯𑌾𑌤𑍍𑌰𑌾 𑌨𑌰𑍇𑌂𑌦𑍍𑌰𑌾𑌣𑌾𑌂 𑌸𑍇𑌨𑌾 𑌪𑍍𑌰𑌤𑌿𑌨𑌿𑌵𑌰𑍍𑌤𑌤𑍇 ।
𑌵𑍈𑌰𑌾𑌣𑌿 𑌚𑍈𑌵 𑌮𑌾𑌰𑍍𑌗𑌾𑌶𑍍𑌚 𑌸𑌲𑌿𑌲𑍇𑌨 𑌸𑌮𑍀𑌕𑍃𑌤𑌾𑌃 ॥ 53 ॥
𑌮𑌾𑌸𑌿 𑌪𑍍𑌰𑍋𑌷𑍍𑌠𑌪𑌦𑍇 𑌬𑍍𑌰𑌹𑍍𑌮 𑌬𑍍𑌰𑌾𑌹𑍍𑌮𑌣𑌾𑌨𑌾𑌂 𑌵𑌿𑌵𑌕𑍍𑌷𑌤𑌾𑌮𑍍 ।
𑌅𑌯𑌮𑌧𑍍𑌯𑌾𑌯𑌸𑌮𑌯𑌸𑍍𑌸𑌾𑌮𑌗𑌾𑌨𑌾𑌮𑍁𑌪𑌸𑍍𑌥𑌿𑌤𑌃 ॥ 54 ॥
𑌨𑌿𑌵𑍃𑌤𑍍𑌤𑌕𑌰𑍍𑌮𑌾𑌯𑌤𑌨𑍋 𑌨𑍂𑌨𑌂 𑌸𑌂𑌚𑌿𑌤𑌸𑌂𑌚𑌯𑌃 ।
𑌆𑌷𑌾𑌢𑍀𑌮𑌭𑍍𑌯𑍁𑌪𑌗𑌤𑍋 𑌭𑌰𑌤𑌃 𑌕𑍋𑌸𑌲𑌾𑌧𑌿𑌪𑌃 ॥ 55 ॥
𑌨𑍂𑌨𑌮𑌾𑌪𑍂𑌰𑍍𑌯𑌮𑌾𑌣𑌾𑌯𑌾𑌸𑍍𑌸𑌰𑍍𑌵𑌵𑍍𑌯𑌾 𑌵𑌰𑍍𑌧𑌤𑍇 𑌰𑌯𑌃 ।
𑌮𑌾𑌂 𑌸𑌮𑍀𑌕𑍍𑌷𑍍𑌯 𑌸𑌮𑌾𑌯𑌾𑌂𑌤𑌮𑌯𑍋𑌧𑍍𑌯𑌾𑌯𑌾 𑌇𑌵 𑌸𑍍𑌵𑌨𑌃 ॥ 56 ॥
𑌇𑌮𑌾𑌸𑍍𑌫𑍀𑌤𑌗𑍁𑌣𑌾 𑌵𑌰𑍍𑌷𑌾𑌸𑍍𑌸𑍁𑌗𑍍𑌰𑍀𑌵𑌸𑍍𑌸𑍁𑌖𑌮𑌶𑍍𑌨𑍁𑌤𑍇 ।
𑌵𑌿𑌜𑌿𑌤𑌾𑌰𑌿𑌃 𑌸𑌦𑌾𑌰𑌶𑍍𑌚 𑌰𑌾𑌜𑍍𑌯𑍇 𑌮𑌹𑌤𑌿 𑌚 𑌸𑍍𑌥𑌿𑌤𑌃 ॥ 5 ॥
𑌅𑌹𑌂 𑌤𑍁 𑌹𑍃𑌤𑌦𑌾𑌰𑌶𑍍𑌚 𑌰𑌾𑌜𑍍𑌯𑌾𑌚𑍍𑌯 𑌮𑌹𑌤𑌶𑍍𑌚𑍍𑌯𑍁𑌤𑌃 ।
𑌨𑌦𑍀𑌕𑍂𑌲𑌮𑌿𑌵 𑌕𑍍𑌲𑌿𑌨𑍍𑌨𑌮𑌵𑌸𑍀𑌦𑌾𑌮𑌿 𑌲𑌕𑍍𑌷𑍍𑌮𑌣 ॥ 5 ॥
𑌶𑍋𑌕𑌶𑍍𑌚 𑌮𑌮 𑌵𑌿𑌸𑍍𑌤𑍀𑌰𑍍𑌣𑍋 𑌵𑌰𑍍𑌷𑌾𑌶𑍍𑌚 𑌭𑍃𑌶𑌦𑍁𑌰𑍍𑌗𑌮𑌾𑌃 ।
𑌰𑌾𑌵𑌣𑌶𑍍𑌚 𑌮𑌹𑌾𑌨𑍍 𑌶𑌤𑍍𑌰𑍁𑌰𑌪𑌾𑌰𑌂 𑌪𑍍𑌰𑌤𑌿𑌭𑌾𑌤𑌿 𑌮𑍇 ॥ 5 ॥
𑌅𑌯𑌾𑌤𑍍𑌰𑌾𑌂 𑌚𑍈𑌵 𑌦𑍃𑌷𑍍𑌟𑍍𑌵𑍇𑌮𑌾𑌂 𑌮𑌾𑌰𑍍𑌗𑌾𑌂𑌶𑍍𑌚 𑌭𑍃𑌶𑌦𑍁𑌰𑍍𑌗𑌮𑌾𑌨𑍍 ।
𑌪𑍍𑌰𑌣𑌤𑍇 𑌚𑍈𑌵 𑌸𑍁𑌗𑍍𑌰𑍀𑌵𑍇 𑌨 𑌮𑌯𑌾 𑌕𑌿𑌂𑌚𑌿𑌦𑍀𑌰𑌿𑌤𑌮𑍍 ॥ 60 ॥
𑌅𑌪𑌿 𑌚𑌾𑌤𑌿𑌪𑌰𑌿𑌕𑍍𑌲𑌿𑌷𑍍𑌟𑌂 𑌚𑌿𑌰𑌾𑌦𑍍𑌦𑌾𑌰𑍈𑌸𑍍𑌸𑌮𑌾𑌗𑌤𑌮𑍍 ।
𑌆𑌤𑍍𑌮𑌕𑌾𑌰𑍍𑌯𑌗𑌰𑍀𑌯𑌸𑍍𑌤𑍍𑌵𑌾𑌦𑍍𑌵𑌕𑍍𑌤𑍁𑌂 𑌨𑍇𑌚𑍍𑌛𑌾𑌮𑌿 𑌵𑌾𑌨𑌰𑌮𑍍 ॥ 61 ॥
𑌸𑍍𑌵𑌯𑌮𑍇𑌵 𑌹𑌿 𑌵𑌿𑌶𑍍𑌰𑌮𑍍𑌯 𑌜𑍍𑌞𑌾𑌤𑍍𑌵𑌾 𑌕𑌾𑌲𑌮𑍁𑌪𑌾𑌗𑌤𑌮𑍍 ।
𑌉𑌪𑌕𑌾𑌰𑌂 𑌚 𑌸𑍁𑌗𑍍𑌰𑍀𑌵𑍋 𑌵𑍇𑌤𑍍𑌸𑍍𑌯𑌤𑍇 𑌨𑌾𑌤𑍍𑌰 𑌸𑌂𑌶𑌯𑌃 ॥ 62 ॥
𑌤𑌸𑍍𑌮𑌾𑌤𑍍𑌕𑌾𑌲𑌪𑍍𑌰𑌤𑍀𑌕𑍍𑌷𑍋𑌽𑌹𑌂 𑌸𑍍𑌥𑌿𑌤𑍋𑌽𑌸𑍍𑌮𑌿 𑌶𑍁𑌭𑌲𑌕𑍍𑌷𑌣 ।
𑌸𑍁𑌗𑍍𑌰𑍀𑌵𑌸𑍍𑌯 𑌨𑌦𑍀𑌨𑌾𑌂 𑌚 𑌪𑍍𑌰𑌸𑌾𑌦𑌮𑌮𑌨𑍁𑌪𑌾𑌲𑌯𑌨𑍍 ॥ 63 ॥
𑌉𑌪𑌕𑌾𑌰𑍇𑌣 𑌵𑍀𑌰𑌸𑍍𑌤𑍁 𑌪𑍍𑌰𑌤𑍀𑌕𑌾𑌰𑍇𑌣 𑌯𑍁𑌜𑍍𑌯𑌤𑍇 ।
𑌅𑌕𑍃𑌤𑌜𑍍𑌞𑍋𑌽𑌪𑍍𑌰𑌤𑌿𑌕𑍃𑌤𑍋 𑌹𑌂𑌤𑌿 𑌸𑌤𑍍𑌤𑍍𑌵𑌵𑌤𑌾𑌂 𑌮𑌨𑌃 ॥ 64 ॥
𑌅𑌥𑍈𑌵𑌮𑍁𑌕𑍍𑌤𑌃 𑌪𑍍𑌰𑌣𑌿𑌧𑌾𑌯 𑌲𑌕𑍍𑌷𑍍𑌮𑌣𑌃 𑌕𑍃𑌤𑌾𑌂𑌜𑌲𑌿𑌸𑍍𑌤𑌤𑍍𑌪𑍍𑌰𑌤𑌿𑌪𑍂𑌜𑍍𑌯 𑌭𑌾𑌷𑌿𑌤𑌮𑍍 ।
𑌉𑌵𑌾𑌚 𑌰𑌾𑌮𑌂 𑌸𑍍𑌵𑌭𑌿𑌰𑌾𑌮𑌦𑌰𑍍𑌶𑌨𑌂 𑌪𑍍𑌰𑌦𑌰𑍍𑌶𑌯𑌂𑌦𑌰𑍍𑌶𑌨𑌮𑌾𑌤𑍍𑌮𑌨𑌶𑍍𑌶𑍁𑌭𑌮𑍍 ॥ 65 ॥
𑌯𑌥𑍋𑌕𑍍𑌤𑌮𑍇𑌤𑌤𑍍𑌤𑌵 𑌸𑌰𑍍𑌵𑌮𑍀𑌪𑍍𑌸𑌿𑌤𑌂 𑌨𑌰𑍇𑌂𑌦𑍍𑌰 𑌕𑌰𑍍𑌤𑌾 𑌨𑌚𑌿𑌰𑌾𑌦𑍍𑌧𑌰𑍀𑌶𑍍𑌵𑌰𑌃 ।
𑌶𑌰𑌤𑍍𑌪𑍍𑌰𑌤𑍀𑌕𑍍𑌷𑌃 𑌕𑍍𑌷𑌮𑌤𑌾𑌮𑌿𑌮𑌂 𑌭𑌵𑌾𑌨𑍍 𑌜𑌲𑌪𑍍𑌰𑌪𑌾𑌤𑌂 𑌰𑌿𑌪𑍁𑌨𑌿𑌗𑍍𑌰𑌹𑍇 𑌧𑍃𑌤𑌃 ॥ 66 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌅𑌷𑍍𑌟𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ॥
