𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌸𑍀𑌤𑌾𑌯𑌾 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌦𑌶𑌗𑍍𑌰𑍀𑌵𑌃 𑌪𑍍𑌰𑌤𑌾𑌪𑌵𑌾𑌮𑍍 ।
𑌹𑌸𑍍𑌤𑍇 𑌹𑌸𑍍𑌤𑌂 𑌸𑌮𑌾𑌹𑌤𑍍𑌯 𑌚𑌕𑌾𑌰 𑌸𑍁𑌮𑌹𑌦𑍍𑌵𑌪𑍁𑌃 ॥ 1 ॥
𑌸 𑌮𑍈𑌥𑌿𑌲𑍀𑌂 𑌪𑍁𑌨𑌰𑍍𑌵𑌾𑌕𑍍𑌯𑌂 𑌬𑌭𑌾𑌷𑍇 𑌚 𑌤𑌤𑍋 𑌭𑍃𑌶𑌮𑍍 ।
𑌨𑍋𑌨𑍍𑌮𑌤𑍍𑌤𑌯𑌾 𑌶𑍍𑌰𑍁𑌤𑍌 𑌮𑌨𑍍𑌯𑍇 𑌮𑌮 𑌵𑍀𑌰𑍍𑌯𑌪𑌰𑌾𑌕𑍍𑌰𑌮𑍌 ॥ 2 ॥
𑌉𑌦𑍍𑌵𑌹𑍇𑌯𑌂 𑌭𑍁𑌜𑌾𑌭𑍍𑌯𑌾𑌂 𑌤𑍁 𑌮𑍇𑌦𑌿𑌨𑍀𑌮𑌂𑌬𑌰𑍇 𑌸𑍍𑌥𑌿𑌤𑌃 ।
𑌆𑌪𑌿𑌬𑍇𑌯𑌂 𑌸𑌮𑍁𑌦𑍍𑌰𑌂 𑌚 𑌹𑌨𑍍𑌯𑌾𑌂 𑌮𑍃𑌤𑍍𑌯𑍁𑌂 𑌰𑌣𑍇 𑌸𑍍𑌥𑌿𑌤𑌃 ॥ 3 ॥
𑌅𑌰𑍍𑌕𑌂 𑌤𑍁𑌂𑌦𑍍𑌯𑌾𑌂 𑌶𑌰𑍈𑌃 𑌤𑍀𑌕𑍍𑌷𑍍𑌣𑍈𑌰𑍍 𑌵𑌿𑌭𑌿𑌂𑌦𑍍𑌯𑌾𑌂 𑌹𑌿 𑌮𑌹𑍀𑌤𑌲𑌮𑍍 ।
𑌕𑌾𑌮 𑌰𑍂𑌪𑌿𑌣𑌂 𑌉𑌨𑍍𑌮𑌤𑍍𑌤𑍇 𑌪𑌶𑍍𑌯 𑌮𑌾𑌂 𑌕𑌾𑌮𑌦𑌂 𑌪𑌤𑌿𑌮𑍍 ॥ 4 ॥
𑌏𑌵𑌮𑍁𑌕𑍍𑌤𑌵𑌤𑌸𑍍𑌤𑌸𑍍𑌯 𑌸𑍂𑌰𑍍𑌯𑌕𑌲𑍍𑌪𑍇 𑌶𑌿𑌖𑌿𑌪𑍍𑌰𑌭𑍇 ।
𑌕𑍍𑌰𑍁𑌦𑍍𑌧𑌸𑍍𑌯 𑌹𑌰𑌿𑌪𑌰𑍍𑌯𑌂𑌤𑍇 𑌰𑌕𑍍𑌤𑍇 𑌨𑍇𑌤𑍍𑌰𑍇 𑌬𑌭𑍂𑌵𑌤𑍁𑌃 ॥ 5 ॥
𑌸𑌦𑍍𑌯𑌸𑍍𑌸𑍌𑌮𑍍𑌯𑌂 𑌪𑌰𑌿𑌤𑍍𑌯𑌜𑍍𑌯 𑌭𑌿𑌕𑍍𑌷𑍁𑌰𑍂𑌪𑌂 𑌸 𑌰𑌾𑌵𑌣𑌃 ।
𑌸𑍍𑌵𑌂 𑌰𑍂𑌪𑌂 𑌕𑌾𑌲𑌰𑍂𑌪𑌾𑌭𑌂 𑌭𑍇𑌜𑍇 𑌵𑍈𑌶𑍍𑌰𑌵𑌣𑌾𑌨𑍁𑌜𑌃 ॥ 6 ॥
𑌸𑌂𑌰𑌕𑍍𑌤𑌨𑌯𑌨𑌶𑍍𑌶𑍍𑌰𑍀𑌮𑌾𑌂𑌸𑍍𑌤𑌪𑍍𑌤𑌕𑌾𑌂𑌚𑌨𑌭𑍂𑌷𑌣𑌃 ।
𑌕𑍍𑌰𑍋𑌧𑍇𑌨 𑌮𑌹𑌤𑌾𑌵𑌿𑌷𑍍𑌟𑍋 𑌨𑍀𑌲𑌜𑍀𑌮𑍂𑌤𑌸𑌨𑍍𑌨𑌿𑌭𑌃 ॥ ॥
𑌦𑌶𑌾𑌸𑍍𑌯𑌃 𑌕𑌾𑌰𑍍𑌮𑍁𑌕𑍀 𑌬𑌾𑌣𑍀 𑌬𑌭𑍂𑌵 𑌕𑍍𑌷𑌣𑌦𑌾𑌚𑌰𑌃 ।
𑌸 𑌪𑌰𑌿𑌵𑍍𑌰𑌾𑌜𑌕𑌚𑍍𑌛𑌦𑍍𑌮 𑌮𑌹𑌾𑌕𑌾𑌯𑍋 𑌵𑌿𑌹𑌾𑌯 𑌤𑌤𑍍 ॥ ॥
𑌪𑍍𑌰𑌤𑌿𑌪𑌦𑍍𑌯 𑌸𑍍𑌵𑌕𑌂 𑌰𑍂𑌪𑌂 𑌰𑌾𑌵𑌣𑍋 𑌰𑌾𑌕𑍍𑌷𑌸𑌾𑌧𑌿𑌪𑌃 ।
𑌸𑌂𑌰𑌕𑍍𑌤𑌨𑌯𑌨𑌃 𑌕𑍍𑌰𑍋𑌧𑌾𑌜𑍍𑌜𑍀𑌮𑍂𑌤𑌨𑌿𑌚𑌯𑌪𑍍𑌰𑌭𑌃 ॥ ॥
𑌰𑌕𑍍𑌤𑌾𑌂𑌬𑌰𑌧𑌰𑌸𑍍𑌤𑌸𑍍𑌥𑍌 𑌸𑍍𑌤𑍍𑌰𑍀𑌰𑌤𑍍𑌨𑌂 𑌪𑍍𑌰𑍇𑌕𑍍𑌷𑍍𑌯 𑌮𑍈𑌥𑌿𑌲𑍀𑌮𑍍 ।
𑌸 𑌤𑌾𑌮𑌸𑌿𑌤𑌕𑍇𑌶𑌾𑌂𑌤𑌾𑌂 𑌭𑌾𑌸𑍍𑌕𑌰𑌸𑍍𑌯 𑌪𑍍𑌰𑌭𑌾𑌮𑌿𑌵 ॥ 10 ॥
𑌵𑌸𑌨𑌾𑌭𑌰𑌣𑍋𑌪𑍇𑌤𑌾𑌂 𑌮𑍈𑌥𑌿𑌲𑍀𑌂 𑌰𑌾𑌵𑌣𑍋𑌽𑌬𑍍𑌰𑌵𑍀𑌤𑍍 ।
𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌵𑌿𑌖𑍍𑌯𑌾𑌤𑌂 𑌯𑌦𑌿 𑌭𑌰𑍍𑌤𑌾𑌰𑌮𑌿𑌚𑍍𑌛𑌸𑌿 ॥ 11 ॥
𑌮𑌾𑌮𑌾𑌶𑍍𑌰𑌯 𑌵𑌰𑌾𑌰𑍋𑌹𑍇 𑌤𑌵𑌾𑌹𑌂 𑌸𑌦𑍃𑌶𑌃 𑌪𑌤𑌿𑌃 ।
𑌮𑌾𑌂 𑌭𑌜𑌸𑍍𑌵 𑌚𑌿𑌰𑌾𑌯 𑌤𑍍𑌵𑌮𑌹𑌂 𑌶𑍍𑌲𑌾𑌘𑍍𑌯𑌃 𑌪𑍍𑌰𑌿𑌯𑌸𑍍𑌤𑌵 ॥ 12 ॥
𑌨𑍈𑌵 𑌚𑌾𑌹𑌂 𑌕𑍍𑌵𑌚𑌿𑌦𑍍𑌭𑌦𑍍𑌰𑍇 𑌕𑌰𑌿𑌷𑍍𑌯𑍇 𑌤𑌵 𑌵𑌿𑌪𑍍𑌰𑌿𑌯𑌮𑍍 ।
𑌤𑍍𑌯𑌜𑍍𑌯𑌤𑌾𑌂 𑌮𑌾𑌨𑍁𑌷𑍇 𑌭𑌾𑌵𑍋 𑌮𑌯𑌿 𑌭𑌾𑌵𑌃 𑌪𑍍𑌰𑌣𑍀𑌯𑌤𑌾𑌮𑍍 ॥ 13 ॥
𑌰𑌾𑌜𑍍𑌯𑌾𑌚𑍍𑌚𑍍𑌯𑍁𑌤𑌮𑌸𑌿𑌦𑍍𑌧𑌾𑌰𑍍𑌥𑌂 𑌰𑌾𑌮𑌂 𑌪𑌰𑌿𑌮𑌿𑌤𑌾𑌯𑍁𑌷𑌮𑍍 ।
𑌕𑍈𑌰𑍍𑌗𑍁𑌣𑍈𑌰𑌨𑍁𑌰𑌕𑍍𑌤𑌾𑌸𑌿 𑌮𑍂𑌢𑍇 𑌪𑌂𑌡𑌿𑌤𑌮𑌾𑌨𑌿𑌨𑌿 ॥ 14 ॥
𑌯𑌃 𑌸𑍍𑌤𑍍𑌰𑌿𑌯𑌾 𑌵𑌚𑌨𑌾𑌦𑍍𑌰𑌾𑌜𑍍𑌯𑌂 𑌵𑌿𑌹𑌾𑌯 𑌸𑌸𑍁𑌹𑍃𑌜𑍍𑌜𑌨𑌮𑍍 ।
𑌅𑌸𑍍𑌮𑌿𑌨𑍍𑌵𑍍𑌯𑌾𑌲𑌾𑌨𑍁𑌚𑌰𑌿𑌤𑍇 𑌵𑌨𑍇 𑌵𑌸𑌤𑌿 𑌦𑍁𑌰𑍍𑌮𑌤𑌿𑌃 ॥ 15 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌮𑍈𑌥𑌿𑌲𑍀𑌂 𑌵𑌾𑌕𑍍𑌯𑌂 𑌪𑍍𑌰𑌿𑌯𑌾𑌰𑍍𑌹𑌾𑌂 𑌪𑍍𑌰𑌿𑌯𑌵𑌾𑌦𑌿𑌨𑍀𑌮𑍍 ।
𑌅𑌭𑌿𑌗𑌮𑍍𑌯 𑌸𑍁𑌦𑍁𑌷𑍍𑌟𑌾𑌤𑍍𑌮𑌾 𑌰𑌾𑌕𑍍𑌷𑌸𑌃 𑌕𑌾𑌮𑌮𑍋𑌹𑌿𑌤𑌃 ॥ 16 ॥
𑌜𑌗𑍍𑌰𑌾𑌹 𑌰𑌾𑌵𑌣𑌸𑍍𑌸𑍀𑌤𑌾𑌂 𑌬𑍁𑌧𑌃 𑌖𑍇 𑌰𑍋𑌹𑌿𑌣𑍀𑌮𑌿𑌵 ।
𑌵𑌾𑌮𑍇𑌨 𑌸𑍀𑌤𑌾𑌂 𑌪𑌦𑍍𑌮𑌾𑌕𑍍𑌷𑍀𑌂 𑌮𑍂𑌰𑍍𑌧𑌜𑍇𑌷𑍁 𑌕𑌰𑍇𑌣 𑌸𑌃 ॥ 1 ॥
𑌊𑌰𑍍𑌵𑍋𑌸𑍍𑌤𑍁 𑌦𑌕𑍍𑌷𑌿𑌣𑍇𑌨𑍈𑌵 𑌪𑌰𑌿𑌜𑌗𑍍𑌰𑌾𑌹 𑌪𑌾𑌣𑌿𑌨𑌾 ।
𑌤𑌂 𑌦𑍃𑌷𑍍𑌟𑍍𑌵𑌾 𑌮𑍃𑌤𑍍𑌯𑍁𑌸𑌂𑌕𑌾𑌶𑌂 𑌤𑍀𑌕𑍍𑌷𑍍𑌣𑌦𑌂𑌷𑍍𑌟𑍍𑌰𑌂 𑌮𑌹𑌾𑌭𑍁𑌜𑌮𑍍 ॥ 1 ॥
𑌪𑍍𑌰𑌾𑌦𑍍𑌰𑌵𑌨𑍍𑌗𑌿𑌰𑌿𑌸𑌂𑌕𑌾𑌶𑌂 𑌭𑌯𑌾𑌰𑍍𑌤𑌾 𑌵𑌨𑌦𑍇𑌵𑌤𑌾𑌃 ।
𑌸 𑌚 𑌮𑌾𑌯𑌾𑌮𑌯𑍋 𑌦𑌿𑌵𑍍𑌯𑌃 𑌖𑌰𑌯𑍁𑌕𑍍𑌤𑌃 𑌖𑌰𑌸𑍍𑌵𑌨𑌃 ॥ 1 ॥
𑌪𑍍𑌰𑌤𑍍𑌯𑌦𑍃𑌶𑍍𑌯𑌤 𑌹𑍇𑌮𑌾𑌂𑌗𑍋 𑌰𑌾𑌵𑌣𑌸𑍍𑌯 𑌮𑌹𑌾𑌰𑌥𑌃 ।
𑌤𑌤𑌸𑍍𑌤𑌾𑌂 𑌪𑌰𑍁𑌷𑍈𑌰𑍍𑌵𑌾𑌕𑍍𑌯𑍈𑌰𑍍𑌭𑌰𑍍𑌤𑍍𑌸𑌯𑌨𑍍𑌸 𑌮𑌹𑌾𑌸𑍍𑌵𑌨𑌃 ॥ 20 ॥
𑌅𑌂𑌕𑍇𑌨𑌾𑌦𑌾𑌯 𑌵𑍈𑌦𑍇𑌹𑍀𑌂 𑌰𑌥𑌮𑌾𑌰𑍋𑌪𑌯𑌤𑍍𑌤𑌦𑌾 ।
𑌸𑌾 𑌗𑍃𑌹𑍀𑌤𑌾 𑌵𑌿𑌚𑍁𑌕𑍍𑌰𑍋𑌶 𑌰𑌾𑌵𑌣𑍇𑌨 𑌯𑌶𑌸𑍍𑌸𑍍𑌵𑌿𑌨𑍀 ॥ 21 ॥
𑌰𑌾𑌮𑍇𑌤𑌿 𑌸𑍀𑌤𑌾 𑌦𑍁𑌃𑌖𑌾𑌰𑍍𑌤𑌾 𑌰𑌾𑌮𑌂 𑌦𑍂𑌰𑌗𑌤𑌂𑌵𑌨𑍇 ।
𑌤𑌾𑌮𑌕𑌾𑌮𑌾𑌂 𑌸 𑌕𑌾𑌮𑌾𑌰𑍍𑌤𑌃 𑌪𑌨𑍍𑌨𑌗𑍇𑌂𑌦𑍍𑌰𑌵𑌧𑍂𑌮𑌿𑌵 ॥ 22 ॥
𑌵𑌿𑌵𑍇𑌷𑍍𑌟𑌮𑌾𑌨𑌾𑌮𑌾𑌦𑌾𑌯 𑌉𑌤𑍍𑌪𑌪𑌾𑌤𑌾𑌥 𑌰𑌾𑌵𑌣𑌃 ।
𑌤𑌤𑌸𑍍𑌸𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌹𑍍𑌰𑌿𑌯𑌮𑌾𑌣𑌾 𑌵𑌿𑌹𑌾𑌯𑌸𑌾 ॥ 23 ॥
𑌭𑍃𑌶𑌂 𑌚𑍁𑌕𑍍𑌰𑍋𑌶 𑌮𑌤𑍍𑌤𑍇𑌵 𑌭𑍍𑌰𑌾𑌂𑌤𑌚𑌿𑌤𑍍𑌤𑌾 𑌯𑌥𑌾𑌽𑌽𑌤𑍁𑌰𑌾 ।
𑌹𑌾 𑌲𑌕𑍍𑌷𑍍𑌮𑌣 𑌮𑌹𑌾𑌬𑌾𑌹𑍋 𑌗𑍁𑌰𑍁𑌚𑌿𑌤𑍍𑌤𑌪𑍍𑌰𑌸𑌾𑌦𑌕 ॥ 24 ॥
𑌹𑍍𑌰𑌿𑌯𑌮𑌾𑌣𑌾𑌂 𑌨 𑌜𑌾𑌨𑍀𑌷𑍇 𑌰𑌕𑍍𑌷𑌸𑌾 𑌮𑌾𑌮𑌮𑌰𑍍𑌷𑌿𑌣𑌾 ।
𑌜𑍀𑌵𑌿𑌤𑌂 𑌸𑍁𑌖𑌮𑌰𑍍𑌥𑌾𑌂𑌶𑍍𑌚 𑌧𑌰𑍍𑌮𑌹𑍇𑌤𑍋𑌃 𑌪𑌰𑌿𑌤𑍍𑌯𑌜𑌨𑍍 ॥ 25 ॥
𑌹𑍍𑌰𑌿𑌯𑌮𑌾𑌣𑌾𑌮𑌧𑌰𑍍𑌮𑍇𑌣 𑌮𑌾𑌂 𑌰𑌾𑌘𑌵 𑌨 𑌪𑌶𑍍𑌯𑌸𑌿 ।
𑌨𑌨𑍁 𑌨𑌾𑌮𑌾𑌵𑌿𑌨𑍀𑌤𑌾𑌨𑌾𑌂 𑌵𑌿𑌨𑍇𑌤𑌾𑌸𑌿 𑌪𑌰𑌂𑌤𑌪 ॥ 26 ॥
𑌕𑌥𑌮𑍇𑌵𑌂𑌵𑌿𑌧𑌂 𑌪𑌾𑌪𑌂 𑌨 𑌤𑍍𑌵𑌂 𑌶𑌾𑌸𑌿 𑌹𑌿 𑌰𑌾𑌵𑌣𑌮𑍍 ।
𑌨𑌨𑍁 𑌸𑌦𑍍𑌯𑍋𑌽𑌵𑌿𑌨𑍀𑌤𑌸𑍍𑌯 𑌦𑍃𑌶𑍍𑌯𑌤𑍇 𑌕𑌰𑍍𑌮𑌣𑌃𑌫𑌲𑌮𑍍 ॥ 2 ॥
𑌕𑌾𑌲𑍋𑌽𑌪𑍍𑌯𑌂𑌗𑍀𑌭𑌵𑌤𑍍𑌯𑌤𑍍𑌰 𑌸𑌸𑍍𑌯𑌾𑌨𑌾𑌮𑌿𑌵 𑌪𑌕𑍍𑌤𑌯𑍇 ।
𑌤𑍍𑌵𑌂 𑌕𑌰𑍍𑌮 𑌕𑍃𑌤𑌵𑌾𑌨𑍇𑌤𑌤𑍍𑌕𑌾𑌲𑍋𑌪𑌹𑌤𑌚𑍇𑌤𑌨𑌃 ॥ 2 ॥
𑌜𑍀𑌵𑌿𑌤𑌾𑌂𑌤𑌕𑌰𑌂 𑌘𑍋𑌰𑌂 𑌰𑌾𑌮𑌾𑌦𑍍𑌵𑍍𑌯𑌸𑌨𑌮𑌾𑌪𑍍𑌨𑍁𑌹𑌿 ।
𑌹𑌂𑌤𑍇𑌦𑌾𑌨𑍀𑌂 𑌸𑌕𑌾𑌮𑌾𑌸𑍍𑌤𑍁 𑌕𑍈𑌕𑍇𑌯𑍀 𑌸𑌹 𑌬𑌾𑌂𑌧𑌵𑍈𑌃 ॥ 2 ॥
𑌹𑍍𑌰𑌿𑌯𑍇 𑌯𑌦𑍍𑌧𑌰𑍍𑌮𑌕𑌾𑌮𑌸𑍍𑌯 𑌧𑌰𑍍𑌮𑌪𑌤𑍍𑌨𑍀 𑌯𑌶𑌸𑍍𑌵𑌿𑌨𑌃 ।
𑌆𑌮𑌂𑌤𑍍𑌰𑌯𑍇 𑌜𑌨𑌸𑍍𑌥𑌾𑌨𑍇 𑌕𑌰𑍍𑌣𑌿𑌕𑌾𑌰𑌾𑌨𑍍𑌸𑍁𑌪𑍁𑌷𑍍𑌪𑌿𑌤𑌾𑌨𑍍 ॥ 30 ॥
𑌕𑍍𑌷𑌿𑌪𑍍𑌰𑌂 𑌰𑌾𑌮𑌾𑌯 𑌶𑌂𑌸𑌧𑍍𑌵𑌂 𑌸𑍀𑌤𑌾𑌂 𑌹𑌰𑌤𑌿 𑌰𑌾𑌵𑌣𑌃 ।
𑌮𑌾𑌲𑍍𑌯𑌵𑌂𑌤𑌂 𑌶𑌿𑌖𑌰𑌿𑌣𑌂 𑌵𑌂𑌦𑍇 𑌪𑍍𑌰𑌸𑍍𑌰𑌵𑌣𑌂 𑌗𑌿𑌰𑌿𑌮𑍍 ॥ 31 ॥
𑌕𑍍𑌷𑌿𑌪𑍍𑌰𑌂 𑌰𑌾𑌮𑌾𑌯 𑌶𑌂𑌸 𑌤𑍍𑌵𑌂 𑌸𑍀𑌤𑌾𑌂 𑌹𑌰𑌤𑌿 𑌰𑌾𑌵𑌣𑌃 ।
𑌹𑌂𑌸𑌕𑌾𑌰𑌂𑌡𑌵𑌾𑌕𑍀𑌰𑍍𑌣𑌾𑌂 𑌵𑌂𑌦𑍇 𑌗𑍋𑌦𑌾𑌵𑌰𑍀𑌂 𑌨𑌦𑍀𑌮𑍍 ॥ 32 ॥
𑌕𑍍𑌷𑌿𑌪𑍍𑌰𑌂 𑌰𑌾𑌮𑌾𑌯 𑌶𑌂𑌸 𑌤𑍍𑌵𑌂 𑌸𑍀𑌤𑌾𑌂 𑌹𑌰𑌤𑌿 𑌰𑌾𑌵𑌣𑌃 ।
𑌦𑍈𑌵𑌤𑌾𑌨𑌿 𑌚 𑌯𑌾𑌨𑍍𑌯𑌸𑍍𑌮𑌿𑌨𑍍𑌵𑌨𑍇 𑌵𑌿𑌵𑌿𑌧𑌪𑌾𑌦𑌪𑍇 ॥ 33 ॥
𑌨𑌮𑌸𑍍𑌕𑌰𑍋𑌮𑍍𑌯𑌹𑌂 𑌤𑍇𑌭𑍍𑌯𑍋𑌭𑌰𑍍𑌤𑍁𑌶𑍍𑌶𑌂𑌸𑌤 𑌮𑌾𑌂 𑌹𑍃𑌤𑌾𑌮𑍍 ।
𑌯𑌾𑌨𑌿 𑌕𑌾𑌨𑌿 𑌚𑌿𑌦𑌪𑍍𑌯𑌤𑍍𑌰 𑌸𑌤𑍍𑌤𑍍𑌵𑌾𑌨𑌿 𑌨𑌿𑌵𑌸𑌂𑌤𑍍𑌯𑍁𑌤 ॥ 34 ॥
𑌸𑌰𑍍𑌵𑌾𑌣𑌿 𑌶𑌰𑌣𑌂 𑌯𑌾𑌮𑌿 𑌮𑍃𑌗𑌪𑌕𑍍𑌷𑌿𑌗𑌣𑌾𑌨𑌪𑌿 ।
𑌹𑍍𑌰𑌿𑌯𑌮𑌾𑌣𑌾𑌂 𑌪𑍍𑌰𑌿𑌯𑌾𑌂 𑌭𑌰𑍍𑌤𑍁𑌃 𑌪𑍍𑌰𑌾𑌣𑍇𑌭𑍍𑌯𑍋𑌽𑌪𑌿 𑌗𑌰𑍀𑌯𑌸𑍀𑌮𑍍 ॥ 35 ॥
𑌵𑌿𑌵𑌶𑌾𑌽𑌪𑌹𑍃𑌤𑌾 𑌸𑍀𑌤𑌾 𑌰𑌾𑌵𑌣𑍇𑌨𑍇𑌤𑌿 𑌶𑌂𑌸𑌤 ।
𑌵𑌿𑌦𑌿𑌤𑍍𑌵𑌾 𑌮𑌾𑌂 𑌮𑌹𑌾𑌬𑌾𑌹𑍁𑌰𑌮𑍁𑌤𑍍𑌰𑌾𑌪𑌿 𑌮𑌹𑌾𑌬𑌲𑌃 ॥ 36 ॥
𑌆𑌨𑍇𑌷𑍍𑌯𑌤𑌿 𑌪𑌰𑌾𑌕𑍍𑌰𑌮𑍍𑌯 𑌵𑍈𑌵𑌸𑍍𑌵𑌤𑌹𑍃𑌤𑌾𑌮𑌪𑌿 ।
𑌸𑌾 𑌤𑌦𑌾 𑌕𑌰𑍁𑌣𑌾 𑌵𑌾𑌚𑍋 𑌵𑌿𑌲𑌪𑌂𑌤𑍀 𑌸𑍁𑌦𑍁𑌃𑌖𑌿𑌤𑌾 ॥ 3 ॥
𑌵𑌨𑌸𑍍𑌪𑌤𑌿𑌗𑌤𑌂 𑌗𑍃𑌧𑍍𑌰𑌂 𑌦𑌦𑌰𑍍𑌶𑌾𑌽𑌯𑌤𑌲𑍋𑌚𑌨𑌾 ।
𑌸𑌾 𑌤𑌮𑍁𑌦𑍍𑌵𑍀𑌕𑍍𑌷𑍍𑌯 𑌸𑍁𑌶𑍍𑌰𑍋𑌣𑍀 𑌰𑌾𑌵𑌣𑌸𑍍𑌯 𑌵𑌶𑌂 𑌗𑌤𑌾 ॥ 3 ॥
𑌸𑌮𑌾𑌕𑍍𑌰𑌂𑌦𑌦𑍍𑌭𑌯𑌪𑌰𑌾 𑌦𑍁𑌃𑌖𑍋𑌪𑌹𑌤𑌯𑌾 𑌗𑌿𑌰𑌾 ।
𑌜𑌟𑌾𑌯𑍋 𑌪𑌶𑍍𑌯 𑌮𑌾𑌮𑌦𑍍𑌯 𑌹𑍍𑌰𑌿𑌯𑌮𑌾𑌣𑌾𑌮𑌨𑌾𑌥𑌵𑌤𑍍 ॥ 3 ॥
𑌅𑌨𑍇𑌨 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌕𑌰𑍁𑌣𑌂 𑌪𑌾𑌪𑌕𑌰𑍍𑌮𑌣𑌾 ।
𑌨𑍈𑌷 𑌵𑌾𑌰𑌯𑌿𑌤𑍁𑌂 𑌶𑌕𑍍𑌯𑌸𑍍𑌤𑌵 𑌕𑍍𑌰𑍂𑌰𑍋 𑌨𑌿𑌶𑌾𑌚𑌰𑌃 ॥ 40 ॥
𑌸𑌤𑍍𑌤𑍍𑌵𑌾𑌂𑌜𑌿𑌤𑌕𑌾𑌶𑍀 𑌚 𑌸𑌾𑌯𑍁𑌧𑌶𑍍𑌚𑍈𑌵 𑌦𑍁𑌰𑍍𑌮𑌤𑌿𑌃 ।
𑌰𑌾𑌮𑌾𑌯 𑌤𑍁 𑌯𑌥𑌾𑌤𑌤𑍍𑌤𑍍𑌵𑌂 𑌜𑌟𑌾𑌯𑍋 𑌹𑌰𑌣𑌂 𑌮𑌮 ॥ 41 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌏𑌕𑍋𑌨𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
