𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑍋𑌽𑌵𑌤𑍀𑌰𑍍𑌯 𑌦𑍍𑌰𑍁𑌮𑌾𑌤𑍍𑌤𑌸𑍍𑌮𑌾𑌦𑍍𑌵𑌿𑌦𑍍𑌰𑍁𑌮𑌪𑍍𑌰𑌤𑌿𑌮𑌾𑌨𑌨𑌃 ।
𑌵𑌿𑌨𑍀𑌤𑌵𑍇𑌷𑌃 𑌕𑍃𑌪𑌣𑌃 𑌪𑍍𑌰𑌣𑌿𑌪𑌤𑍍𑌯𑍋𑌪𑌸𑍃𑌤𑍍𑌯 𑌚 ॥ 1 ॥
𑌤𑌾𑌮𑌬𑍍𑌰𑌵𑍀𑌨𑍍𑌮𑌹𑌾𑌤𑍇𑌜𑌾 𑌹𑌨𑍂𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌶𑌿𑌰𑌸𑍍𑌯𑌂𑌜𑌲𑌿𑌮𑌾𑌧𑌾𑌯 𑌸𑍀𑌤𑌾𑌂 𑌮𑌧𑍁𑌰𑌯𑌾 𑌗𑌿𑌰𑌾 ॥ 2 ॥
𑌕𑌾 𑌨𑍁 𑌪𑌦𑍍𑌮𑌪𑌲𑌾𑌶𑌾𑌕𑍍𑌷𑌿 𑌕𑍍𑌲𑌿𑌷𑍍𑌟𑌕𑍌𑌶𑍇𑌯𑌵𑌾𑌸𑌿𑌨𑌿 ।
𑌦𑍍𑌰𑍁𑌮𑌸𑍍𑌯 𑌶𑌾𑌖𑌾𑌮𑌾𑌲𑌂𑌬𑍍𑌯 𑌤𑌿𑌷𑍍𑌠𑌸𑌿 𑌤𑍍𑌵𑌮𑌨𑌿𑌂𑌦𑌿𑌤𑍇 ॥ 3 ॥
𑌕𑌿𑌮𑌰𑍍𑌥𑌂 𑌤𑌵 𑌨𑍇𑌤𑍍𑌰𑌾𑌭𑍍𑌯𑌾𑌂 𑌵𑌾𑌰𑌿 𑌸𑍍𑌰𑌵𑌤𑌿 𑌶𑍋𑌕𑌜𑌮𑍍 ।
𑌪𑍁𑌂𑌡𑌰𑍀𑌕𑌪𑌲𑌾𑌶𑌾𑌭𑍍𑌯𑌾𑌂 𑌵𑌿𑌪𑍍𑌰𑌕𑍀𑌰𑍍𑌣𑌮𑌿𑌵𑍋𑌦𑌕𑌮𑍍 ॥ 4 ॥
𑌸𑍁𑌰𑌾𑌣𑌾𑌮𑌸𑍁𑌰𑌾𑌣𑌾𑌂 𑌵𑌾 𑌨𑌾𑌗𑌗𑌂𑌧𑌰𑍍𑌵𑌰𑌕𑍍𑌷𑌸𑌾𑌮𑍍 ।
𑌯𑌕𑍍𑌷𑌾𑌣𑌾𑌂 𑌕𑌿𑌨𑍍𑌨𑌰𑌾𑌣𑌾𑌂 𑌵𑌾 𑌕𑌾 𑌤𑍍𑌵𑌂 𑌭𑌵𑌸𑌿 𑌶𑍋𑌭𑌨𑍇 ॥ 5 ॥
𑌕𑌾 𑌤𑍍𑌵𑌂 𑌭𑌵𑌸𑌿 𑌰𑍁𑌦𑍍𑌰𑌾𑌣𑌾𑌂 𑌮𑌰𑍁𑌤𑌾𑌂 𑌵𑌾 𑌵𑌰𑌾𑌨𑌨𑍇 ।
𑌵𑌸𑍂𑌨𑌾𑌂 𑌹𑌿 𑌵𑌰𑌾𑌰𑍋𑌹𑍇 𑌦𑍇𑌵𑌤𑌾 𑌪𑍍𑌰𑌤𑌿𑌭𑌾𑌸𑌿 𑌮𑍇 ॥ 6 ॥
𑌕𑌿 𑌨𑍁 𑌚𑌂𑌦𑍍𑌰𑌮𑌸𑌾 𑌹𑍀𑌨𑌾 𑌪𑌤𑌿𑌤𑌾 𑌵𑌿𑌬𑍁𑌧𑌾𑌲𑌯𑌾𑌤𑍍 ।
𑌰𑍋𑌹𑌿𑌣𑍀 𑌜𑍍𑌯𑍋𑌤𑌿𑌷𑌾𑌂 𑌶𑍍𑌰𑍇𑌷𑍍𑌠𑌾 𑌶𑍍𑌰𑍇𑌷𑍍𑌠𑌸𑌰𑍍𑌵𑌗𑍁𑌣𑌾𑌨𑍍𑌵𑌿𑌤𑌾 ॥ ॥
𑌕𑌾 𑌤𑍍𑌵𑌂 𑌭𑌵𑌸𑌿 𑌕𑌲𑍍𑌯𑌾𑌣𑌿 𑌤𑍍𑌵𑌮𑌨𑌿𑌂𑌦𑌿𑌤𑌲𑍋𑌚𑌨𑍇 ।
𑌕𑍋𑌪𑌾𑌦𑍍𑌵𑌾 𑌯𑌦𑌿 𑌵𑌾 𑌮𑍋𑌹𑌾𑌦𑍍𑌭𑌰𑍍𑌤𑌾𑌰𑌮𑌸𑌿𑌤𑍇𑌕𑍍𑌷𑌣𑍇 ॥ ॥
𑌵𑌸𑌿𑌷𑍍𑌠𑌂 𑌕𑍋𑌪𑌯𑌿𑌤𑍍𑌵𑌾 𑌤𑍍𑌵𑌂 𑌨𑌾𑌸𑌿 𑌕𑌲𑍍𑌯𑌾𑌣𑍍𑌯𑌰𑍁𑌂𑌧𑌤𑍀 ।
𑌕𑍋 𑌨𑍁 𑌪𑍁𑌤𑍍𑌰𑌃 𑌪𑌿𑌤𑌾 𑌭𑍍𑌰𑌾𑌤𑌾 𑌭𑌰𑍍𑌤𑌾 𑌵𑌾 𑌤𑍇 𑌸𑍁𑌮𑌧𑍍𑌯𑌮𑍇 ॥ ॥
𑌅𑌸𑍍𑌮𑌾𑌲𑍍𑌲𑍋𑌕𑌾𑌦𑌮𑍁𑌂 𑌲𑍋𑌕𑌂 𑌗𑌤𑌂 𑌤𑍍𑌵𑌮𑌨𑍁𑌶𑍋𑌚𑌸𑌿 ।
𑌰𑍋𑌦𑌨𑌾𑌦𑌤𑌿𑌨𑌿𑌶𑍍𑌶𑍍𑌵𑌾𑌸𑌾𑌦𑍍𑌭𑍂𑌮𑌿𑌸𑌂𑌸𑍍𑌪𑌰𑍍𑌶𑌨𑌾𑌦𑌪𑌿 ॥ 10 ॥
𑌨 𑌤𑍍𑌵𑌾𑌂 𑌦𑍇𑌵𑍀𑌮𑌹𑌂 𑌮𑌨𑍍𑌯𑍇 𑌰𑌾𑌜𑍍𑌞 𑌸𑍍𑌸𑌰𑍍𑌵𑌜𑍍𑌞𑌾𑌵𑌧𑌾𑌰𑌣𑌾𑌤𑍍 ।
𑌵𑍍𑌯𑌂𑌜𑌨𑌾𑌨𑌿 𑌚 𑌤𑍇 𑌯𑌾𑌨𑌿 𑌲𑌕𑍍𑌷𑌣𑌾𑌨𑌿 𑌚 𑌲𑌕𑍍𑌷𑌯𑍇 ॥ 11 ॥
𑌮𑌹𑌿𑌷𑍀 𑌭𑍂𑌮𑌿𑌪𑌾𑌲𑌸𑍍𑌯 𑌰𑌾𑌜𑌕𑌨𑍍𑌯𑌾 𑌚 𑌮𑍇 𑌮𑌤𑌾 ।
𑌰𑌾𑌵𑌣𑍇𑌨 𑌜𑌨𑌸𑍍𑌥𑌾𑌨𑌾𑌦𑍍𑌬𑌲𑌾𑌦𑌪𑌦𑌹𑍃𑌤𑌾 𑌯𑌦𑌿 ॥ 12 ॥
𑌸𑍀𑌤𑌾 𑌤𑍍𑌵𑌮𑌸𑌿 𑌭𑌦𑍍𑌰𑌂 𑌤𑍇 𑌤𑌨𑍍𑌮𑌮𑌾𑌚𑌕𑍍𑌷𑍍𑌵 𑌪𑍃𑌚𑍍𑌛𑌤𑌃 ।
𑌯𑌥𑌾 𑌹𑌿 𑌤𑌵 𑌵𑍈 𑌦𑍈𑌨𑍍𑌯𑌂 𑌰𑍂𑌪𑌂 𑌚𑌾𑌪𑍍𑌯𑌤𑌿𑌮𑌾𑌨𑍁𑌷𑌮𑍍 ॥ 13 ॥
𑌤𑌪𑌸𑌾 𑌚𑌾𑌨𑍍𑌵𑌿𑌤𑍋 𑌵𑍇𑌷𑌸𑍍𑌤𑍍𑌵𑌂 𑌰𑌾𑌮𑌮𑌹𑌿𑌷𑍀 𑌧𑍍𑌰𑍁𑌵𑌮𑍍 ।
𑌸𑌾 𑌤𑌸𑍍𑌯 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌮𑌕𑍀𑌰𑍍𑌤𑌨𑌹𑌰𑍍𑌷𑌿𑌤𑌾 ॥ 14 ॥
𑌉𑌵𑌾𑌚 𑌵𑌾𑌕𑍍𑌯𑌂 𑌵𑍈𑌦𑍇𑌹𑍀 𑌹𑌨𑍁𑌮𑌂𑌤𑌂 𑌦𑍍𑌰𑍁𑌮𑌾𑌶𑍍𑌰𑌿𑌤𑌮𑍍 ।
𑌪𑍃𑌥𑌿𑌵𑍍𑌯𑌾𑌂 𑌰𑌾𑌜𑌸𑌿𑌂𑌹𑌾𑌨𑌾𑌂 𑌮𑍁𑌖𑍍𑌯𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ॥ 15 ॥
𑌸𑍍𑌨𑍁𑌷𑌾 𑌦𑌶𑌰𑌥𑌸𑍍𑌯𑌾𑌹𑌂 𑌶𑌤𑍍𑌰𑍁𑌸𑍈𑌨𑍍𑌯𑌪𑍍𑌰𑌤𑌾𑌪𑌿𑌨𑌃 ।
𑌦𑍁𑌹𑌿𑌤𑌾 𑌜𑌨𑌕𑌸𑍍𑌯𑌾𑌹𑌂 𑌵𑍈𑌦𑍇𑌹𑌸𑍍𑌯 𑌮𑌹𑌾𑌤𑍍𑌮𑌨𑌃 ॥ 16 ॥
𑌸𑍀𑌤𑍇𑌤𑌿 𑌨𑌾𑌮 𑌨𑌾𑌮𑍍𑌨𑌾𑌽𑌹𑌂 𑌭𑌾𑌰𑍍𑌯𑌾 𑌰𑌾𑌮𑌸𑍍𑌯 𑌧𑍀𑌮𑌤𑌃 ।
𑌸𑌮𑌾 𑌦𑍍𑌵𑌾𑌦𑌶 𑌤𑌤𑍍𑌰𑌾𑌹𑌂 𑌰𑌾𑌘𑌵𑌸𑍍𑌯 𑌨𑌿𑌵𑍇𑌶𑌨𑍇 ॥ 1 ॥
𑌭𑍁𑌂𑌜𑌾𑌨𑌾 𑌮𑌾𑌨𑍁𑌷𑌾𑌨𑍍𑌭𑍋𑌗𑌾𑌨𑍍𑌸𑌰𑍍𑌵𑌕𑌾𑌮𑌸𑌮𑍃𑌦𑍍𑌧𑌿𑌨𑍀 ।
𑌤𑌤𑍍𑌰 𑌤𑍍𑌰𑌯𑍋𑌦𑌶𑍇 𑌵𑌰𑍍𑌷𑍇 𑌰𑌾𑌜𑍍𑌯𑍇𑌨𑍇𑌕𑍍𑌷𑍍𑌵𑌾𑌕𑍁𑌨𑌂𑌦𑌨𑌮𑍍 ॥ 1 ॥
𑌅𑌭𑌿𑌷𑍇𑌚𑌯𑌿𑌤𑍁𑌂 𑌰𑌾𑌜𑌾 𑌸𑍋𑌪𑌾𑌧𑍍𑌯𑌾𑌯𑌃 𑌪𑍍𑌰𑌚𑌕𑍍𑌰𑌮𑍇 ।
𑌤𑌸𑍍𑌮𑌿𑌨𑍍𑌸𑌂𑌭𑍍𑌰𑌿𑌯𑌮𑌾𑌣𑍇 𑌤𑍁 𑌰𑌾𑌘𑌵𑌸𑍍𑌯𑌾𑌭𑌿𑌷𑍇𑌚𑌨𑍇 ॥ 1 ॥
𑌕𑍈𑌕𑌯𑍀 𑌨𑌾𑌮 𑌭𑌰𑍍𑌤𑌾𑌰𑌂 𑌦𑍇𑌵𑍀 𑌵𑌚𑌨𑌮𑌬𑍍𑌰𑌵𑍀𑌤𑍍 ।
𑌨 𑌪𑌿𑌬𑍇𑌯𑌂 𑌨 𑌖𑌾𑌦𑍇𑌯𑌂 𑌪𑍍𑌰𑌤𑍍𑌯𑌹𑌂 𑌮𑌮 𑌭𑍋𑌜𑌨𑌮𑍍 ॥ 20 ॥
𑌏𑌷 𑌮𑍇 𑌜𑍀𑌵𑌿𑌤𑌸𑍍𑌯𑌾𑌂𑌤𑍋 𑌰𑌾𑌮𑍋 𑌯𑌦𑍍𑌯𑌭𑌿𑌷𑌿𑌚𑍍𑌯𑌤𑍇 ।
𑌯𑌤𑍍𑌤𑌦𑍁𑌕𑍍𑌤𑌂 𑌤𑍍𑌵𑌯𑌾 𑌵𑌾𑌕𑍍𑌯𑌂 𑌪𑍍𑌰𑍀𑌤𑍍𑌯𑌾 𑌨𑍃𑌪𑌤𑌿𑌸𑌤𑍍𑌤𑌮 ॥ 21 ॥
𑌤𑌚𑍍𑌛𑍇𑌨𑍍𑌨 𑌵𑌿𑌤𑌥𑌂 𑌕𑌾𑌰𑍍𑌯𑌂 𑌵𑌨𑌂 𑌗𑌚𑍍𑌛𑌤𑍁 𑌰𑌾𑌘𑌵𑌃 ।
𑌸 𑌰𑌾𑌜𑌾 𑌸𑌤𑍍𑌯𑌵𑌾𑌗𑍍𑌦𑍇𑌵𑍍𑌯𑌾 𑌵𑌰𑌦𑌾𑌨𑌮𑌨𑍁𑌸𑍍𑌮𑌰𑌨𑍍 ॥ 22 ॥
𑌮𑍁𑌮𑍋𑌹 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑍈𑌕𑍇𑌯𑍍𑌯𑌾𑌃 𑌕𑍍𑌰𑍂𑌰𑌮𑌪𑍍𑌰𑌿𑌯𑌮𑍍 ।
𑌤𑌤𑌸𑍍𑌤𑍁 𑌸𑍍𑌥𑌵𑌿𑌰𑍋 𑌰𑌾𑌜𑌾 𑌸𑌤𑍍𑌯𑍇 𑌧𑌰𑍍𑌮𑍇 𑌵𑍍𑌯𑌵𑌸𑍍𑌥𑌿𑌤𑌃 ॥ 23 ॥
𑌜𑍍𑌯𑍇𑌷𑍍𑌠𑌂 𑌯𑌶𑌸𑍍𑌵𑌿𑌨𑌂 𑌪𑍁𑌤𑍍𑌰𑌂 𑌰𑍁𑌦𑌨𑍍𑌰𑌾𑌜𑍍𑌯𑌮𑌯𑌾𑌚𑌤 ।
𑌸 𑌪𑌿𑌤𑍁𑌰𑍍𑌵𑌚𑌨𑌂 𑌶𑍍𑌰𑍀𑌮𑌾𑌨𑌭𑌿𑌷𑍇𑌕𑌾𑌤𑍍𑌪𑌰𑌂 𑌪𑍍𑌰𑌿𑌯𑌮𑍍 ॥ 24 ॥
𑌮𑌨𑌸𑌾 𑌪𑍂𑌰𑍍𑌵𑌮𑌾𑌸𑌾𑌦𑍍𑌯 𑌵𑌾𑌚𑌾 𑌪𑍍𑌰𑌤𑌿𑌗𑍃𑌹𑍀𑌤𑌵𑌾𑌨𑍍 ।
𑌦𑌦𑍍𑌯𑌾𑌨𑍍𑌨 𑌪𑍍𑌰𑌤𑌿𑌗𑍃𑌹𑍍𑌣𑍀𑌯𑌾𑌨𑍍𑌨 𑌬𑍍𑌰𑍂𑌯𑌾𑌤𑍍𑌕𑌿𑌂𑌚𑌿𑌦𑌪𑍍𑌰𑌿𑌯𑌮𑍍 ॥ 25 ॥
𑌅𑌪𑌿 𑌜𑍀𑌵𑌿𑌤𑌹𑍇𑌤𑍋𑌰𑍍𑌵𑌾 𑌰𑌾𑌮𑌸𑍍𑌸𑌤𑍍𑌯𑌪𑌰𑌾𑌕𑍍𑌰𑌮𑌃 ।
𑌸 𑌵𑌿𑌹𑌾𑌯𑍋𑌤𑍍𑌤𑌰𑍀𑌯𑌾𑌣𑌿 𑌮𑌹𑌾𑌰𑍍𑌹𑌾𑌣𑌿 𑌮𑌹𑌾𑌯𑌶𑌾𑌃 ॥ 26 ॥
𑌵𑌿𑌸𑍃𑌜𑍍𑌯 𑌮𑌨𑌸𑌾 𑌰𑌾𑌜𑍍𑌯𑌂 𑌜𑌨𑌨𑍍𑌯𑍈 𑌮𑌾𑌂 𑌸𑌮𑌾𑌦𑌿𑌶𑌤𑍍 ।
𑌸𑌾𑌹𑌂 𑌤𑌸𑍍𑌯𑌾𑌗𑍍𑌰𑌤𑌸𑍍𑌤𑍂𑌰𑍍𑌣𑌂 𑌪𑍍𑌰𑌸𑍍𑌥𑌿𑌤𑌾 𑌵𑌨𑌚𑌾𑌰𑌿𑌣𑍀 ॥ 2 ॥
𑌨 𑌹𑌿 𑌮𑍇 𑌤𑍇𑌨 𑌹𑍀𑌨𑌾𑌯𑌾 𑌵𑌾𑌸𑌸𑍍𑌸𑍍𑌵𑌰𑍍𑌗𑍇𑌽𑌪𑌿 𑌰𑍋𑌚𑌤𑍇 ।
𑌪𑍍𑌰𑌾𑌗𑍇𑌵 𑌤𑍁 𑌮𑌹𑌾𑌭𑌾𑌗𑌸𑍍𑌸𑍌𑌮𑌿𑌤𑍍𑌰𑌿𑌰𑍍𑌮𑌿𑌤𑍍𑌰𑌨𑌂𑌦𑌨𑌃 ॥ 2 ॥
𑌪𑍂𑌰𑍍𑌵𑌜𑌸𑍍𑌯𑌾𑌨𑍁𑌯𑌾𑌤𑍍𑌰𑌾𑌰𑍍𑌥𑍇 𑌦𑍍𑌰𑍁𑌮𑌚𑍀𑌰𑍈𑌰𑌲𑌂𑌕𑍃𑌤𑌃 ।
𑌤𑍇 𑌵𑌯𑌂 𑌭𑌰𑍍𑌤𑍁𑌰𑌾𑌦𑍇𑌶𑌂 𑌬𑌹𑍁𑌮𑌾𑌨𑍍𑌯 𑌦𑍃𑌢𑌵𑍍𑌰𑌤𑌾𑌃 ॥ 2 ॥
𑌪𑍍𑌰𑌵𑌿𑌷𑍍𑌟𑌾𑌸𑍍𑌸𑍍𑌮 𑌪𑍁𑌰𑌾𑌦𑍃𑌷𑍍𑌟𑌂 𑌵𑌨𑌂 𑌗𑌂𑌭𑍀𑌰𑌦𑌰𑍍𑌶𑌨𑌮𑍍 ।
𑌵𑌸𑌤𑍋 𑌦𑌂𑌡𑌕𑌾𑌰𑌣𑍍𑌯𑍇 𑌤𑌸𑍍𑌯𑌾𑌹𑌮𑌮𑌿𑌤𑍌𑌜𑌸𑌃 ॥ 30 ॥
𑌰𑌕𑍍𑌷𑌸𑌾𑌽𑌪𑌹𑍃𑌤𑌾 𑌭𑌾𑌰𑍍𑌯𑌾 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ।
𑌦𑍍𑌵𑍌 𑌮𑌾𑌸𑍌 𑌤𑍇𑌨 𑌮𑍇 𑌕𑌾𑌲𑍋 𑌜𑍀𑌵𑌿𑌤𑌾𑌨𑍁𑌗𑍍𑌰𑌹𑌃 𑌕𑍃𑌤𑌃 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
