𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌾𑌂 𑌤𑍁 𑌰𑌾𑌮𑌕𑌥𑌾𑌂 𑌶𑍍𑌰𑍁𑌤𑍍𑌵𑌾 𑌵𑍈𑌦𑍇𑌹𑍀 𑌵𑌾𑌨𑌰𑌰𑍍𑌷𑌭𑌾𑌤𑍍 ।
𑌉𑌵𑌾𑌚 𑌵𑌚𑌨𑌂 𑌸𑌾𑌂𑌤𑍍𑌵𑌮𑌿𑌦𑌂 𑌮𑌧𑍁𑌰𑌯𑌾 𑌗𑌿𑌰𑌾 ॥ 1 ॥
𑌕𑍍𑌵 𑌤𑍇 𑌰𑌾𑌮𑍇𑌣 𑌸𑌂𑌸𑌰𑍍𑌗𑌃 𑌕𑌥𑌂 𑌜𑌾𑌨𑌾𑌸𑌿 𑌲𑌕𑍍𑌷𑍍𑌮𑌣𑌮𑍍 ।
𑌵𑌾𑌨𑌰𑌾𑌣𑌾𑌂 𑌨𑌰𑌾𑌣𑌾𑌂 𑌚 𑌕𑌥𑌮𑌾𑌸𑍀𑌤𑍍𑌸𑌮𑌾𑌗𑌮𑌃 ॥ 2 ॥
𑌯𑌾𑌨𑌿 𑌰𑌾𑌮𑌸𑍍𑌯 𑌲𑌿𑌂𑌗𑌾𑌨𑌿 𑌲𑌕𑍍𑌷𑍍𑌮𑌣𑌸𑍍𑌯 𑌚 𑌵𑌾𑌨𑌰 ।
𑌤𑌾𑌨𑌿 𑌭𑍂𑌯𑌸𑍍𑌸𑌮𑌾𑌚𑌕𑍍𑌷𑍍𑌵 𑌨 𑌮𑌾𑌂 𑌶𑍋𑌕𑌸𑍍𑌸𑌮𑌾𑌵𑌿𑌶𑍇𑌤𑍍 ॥ 3 ॥
𑌕𑍀𑌦𑍃𑌶𑌂 𑌤𑌸𑍍𑌯 𑌸𑌂𑌸𑍍𑌥𑌾𑌨𑌂 𑌰𑍂𑌪𑌂 𑌰𑌾𑌮𑌸𑍍𑌯 𑌕𑍀𑌦𑍃𑌶𑌮𑍍 ।
𑌕𑌥𑌮𑍂𑌰𑍂 𑌕𑌥𑌂 𑌬𑌾𑌹𑍂 𑌲𑌕𑍍𑌷𑍍𑌮𑌣𑌸𑍍𑌯 𑌚 𑌶𑌂𑌸 𑌮𑍇 ॥ 4 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌵𑍈𑌦𑍇𑌹𑍍𑌯𑌾 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌤𑌤𑍋 𑌰𑌾𑌮𑌂 𑌯𑌥𑌾𑌤𑌤𑍍𑌤𑍍𑌵𑌮𑌾𑌖𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ॥ 5 ॥
𑌜𑌾𑌨𑌂𑌤𑍀 𑌬𑌤 𑌦𑌿𑌷𑍍𑌟𑍍𑌯𑌾 𑌮𑌾𑌂 𑌵𑍈𑌦𑍇𑌹𑌿 𑌪𑌰𑌿𑌪𑍃𑌚𑍍𑌛𑌸𑌿 ।
𑌭𑌰𑍍𑌤𑍁𑌃 𑌕𑌮𑌲𑌪𑌤𑍍𑌤𑍍𑌰𑌾𑌕𑍍𑌷𑌿 𑌸𑌂𑌸𑍍𑌥𑌾𑌨𑌂 𑌲𑌕𑍍𑌷𑍍𑌮𑌣𑌸𑍍𑌯 𑌚 ॥ 6 ॥
𑌯𑌾𑌨𑌿 𑌰𑌾𑌮𑌸𑍍𑌯 𑌚𑌿𑌹𑍍𑌨𑌾𑌨𑌿 𑌲𑌕𑍍𑌷𑍍𑌮𑌣𑌸𑍍𑌯 𑌚 𑌯𑌾𑌨𑌿 𑌵𑍈 ।
𑌲𑌕𑍍𑌷𑌿𑌤𑌾𑌨𑌿 𑌵𑌿𑌶𑌾𑌲𑌾𑌕𑍍𑌷𑌿 𑌵𑌦𑌤𑌶𑍍𑌶𑍃𑌣𑍁 𑌤𑌾𑌨𑌿 𑌮𑍇 ॥ ॥
𑌰𑌾𑌮𑌃 𑌕𑌮𑌲𑌪𑌤𑍍𑌤𑍍𑌰𑌾𑌕𑍍𑌷 𑌸𑍍𑌸𑌰𑍍𑌵𑌸𑌤𑍍𑌤𑍍𑌵𑌮𑌨𑍋𑌹𑌰𑌃 ।
𑌰𑍂𑌪𑌦𑌾𑌕𑍍𑌷𑌿𑌣𑍍𑌯𑌸𑌂𑌪𑌨𑍍𑌨𑌃 𑌪𑍍𑌰𑌸𑍂𑌤𑍋 𑌜𑌨𑌕𑌾𑌤𑍍𑌮𑌜𑍇 ॥ ॥
𑌤𑍇𑌜𑌸𑌾𑌽𑌦𑌿𑌤𑍍𑌯 𑌸𑌂𑌕𑌾𑌶𑌃 𑌕𑍍𑌷𑌮𑌯𑌾 𑌪𑍃𑌥𑌿𑌵𑍀𑌸𑌮𑌃 ।
𑌬𑍃𑌹𑌸𑍍𑌪𑌤𑌿𑌸𑌮𑍋 𑌬𑍁𑌦𑍍𑌧𑍍𑌯𑌾 𑌯𑌶𑌸𑌾 𑌵𑌾𑌸𑌵𑍋𑌪𑌮𑌃 ॥ ॥
𑌰𑌕𑍍𑌷𑌿𑌤𑌾 𑌜𑍀𑌵𑌲𑍋𑌕𑌸𑍍𑌯 𑌸𑍍𑌵𑌜𑌨𑌸𑍍𑌯𑌾𑌭𑌿𑌰𑌕𑍍𑌷𑌿𑌤𑌾 ।
𑌰𑌕𑍍𑌷𑌿𑌤𑌾 𑌸𑍍𑌵𑌸𑍍𑌯 𑌵𑍃𑌤𑍍𑌤𑌸𑍍𑌯 𑌧𑌰𑍍𑌮𑌸𑍍𑌯 𑌚 𑌪𑌰𑌂𑌤𑌪𑌃 ॥ 10 ॥
𑌰𑌾𑌮𑍋 𑌭𑌾𑌮𑌿𑌨𑌿 𑌲𑍋𑌕𑌸𑍍𑌯 𑌚𑌾𑌤𑍁𑌰𑍍𑌵𑌰𑍍𑌣𑍍𑌯𑌸𑍍𑌯 𑌰𑌕𑍍𑌷𑌿𑌤𑌾 ।
𑌮𑌰𑍍𑌯𑌾𑌦𑌾𑌨𑌾𑌂 𑌚 𑌲𑍋𑌕𑌸𑍍𑌯 𑌕𑌰𑍍𑌤𑌾 𑌕𑌾𑌰𑌯𑌿𑌤𑌾 𑌚 𑌸𑌃 ॥ 11 ॥
𑌅𑌰𑍍𑌚𑌿𑌷𑍍𑌮𑌾𑌨𑌰𑍍𑌚𑌿𑌤𑍋𑌽𑌤𑍍𑌯𑌰𑍍𑌥𑌂 𑌬𑍍𑌰𑌹𑍍𑌮𑌚𑌰𑍍𑌯𑌵𑍍𑌰𑌤𑍇 𑌸𑍍𑌥𑌿𑌤𑌃 ।
𑌸𑌾𑌧𑍂𑌨𑌾𑌮𑍁𑌪𑌕𑌾𑌰𑌜𑍍𑌞𑌃 𑌪𑍍𑌰𑌚𑌾𑌰𑌜𑍍𑌞𑌶𑍍𑌚 𑌕𑌰𑍍𑌮𑌣𑌾𑌮𑍍 ॥ 12 ॥
𑌰𑌾𑌜𑌵𑌿𑌦𑍍𑌯𑌾𑌵𑌿𑌨𑍀𑌤𑌶𑍍𑌚 𑌬𑍍𑌰𑌾𑌹𑍍𑌮𑌣𑌾𑌨𑌾𑌮𑍁𑌪𑌾𑌸𑌿𑌤𑌾 ।
𑌶𑍍𑌰𑍁𑌤𑌵𑌾𑌨𑍍𑌶𑍀𑌲𑌸𑌂𑌪𑌨𑍍𑌨𑍋 𑌵𑌿𑌨𑍀𑌤𑌶𑍍𑌚 𑌪𑌰𑌂𑌤𑌪𑌃 ॥ 13 ॥
𑌯𑌜𑍁𑌰𑍍𑌵𑍇𑌦𑌵𑌿𑌨𑍀𑌤𑌶𑍍𑌚 𑌵𑍇𑌦𑌵𑌿𑌦𑍍𑌭𑌿𑌸𑍍𑌸𑍁𑌪𑍂𑌜𑌿𑌤𑌃 ।
𑌧𑌨𑍁𑌰𑍍𑌵𑍇𑌦𑍇 𑌚 𑌵𑍇𑌦𑍇𑌷𑍁 𑌵𑍇𑌦𑌾𑌂𑌗𑍇𑌷𑍁 𑌚 𑌨𑌿𑌷𑍍𑌠𑌿𑌤𑌃 ॥ 14 ॥
𑌵𑌿𑌪𑍁𑌲𑌾𑌂𑌸𑍋 𑌮𑌹𑌾𑌬𑌾𑌹𑍁𑌃 𑌕𑌂𑌬𑍁𑌗𑍍𑌰𑍀𑌵𑌶𑍍𑌶𑍁𑌭𑌾𑌨𑌨𑌃 ।
𑌗𑍂𑌢𑌜𑌤𑍍𑌰𑍁𑌸𑍍𑌸𑍁𑌤𑌾𑌮𑍍𑌰𑌾𑌕𑍍𑌷𑍋 𑌰𑌾𑌮𑍋 𑌦𑍇𑌵𑌿 𑌜𑌨𑍈 𑌶𑍍𑌶𑍍𑌰𑍁𑌤𑌃 ॥ 15 ॥
𑌦𑍁𑌂𑌦𑍁𑌭𑌿𑌸𑍍𑌵𑌨𑌨𑌿𑌰𑍍𑌘𑍋𑌷 𑌸𑍍𑌸𑍍𑌨𑌿𑌗𑍍𑌧𑌵𑌰𑍍𑌣𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌸𑌮 𑌸𑍍𑌸𑌮𑌵𑌿𑌭𑌕𑍍𑌤𑌾𑌂𑌗𑍋 𑌵𑌰𑍍𑌣𑌂 𑌶𑍍𑌯𑌾𑌮𑌂 𑌸𑌮𑌾𑌶𑍍𑌰𑌿𑌤𑌃 ॥ 16 ॥
𑌤𑍍𑌰𑌿𑌸𑍍𑌥𑌿𑌰𑌸𑍍𑌤𑍍𑌰𑌿𑌪𑍍𑌰𑌲𑌂𑌬𑌶𑍍𑌚 𑌤𑍍𑌰𑌿𑌸𑌮𑌸𑍍𑌤𑍍𑌰𑌿𑌷𑍁 𑌚𑍋𑌨𑍍𑌨𑌤𑌃 ।
𑌤𑍍𑌰𑌿𑌤𑌾𑌮𑍍𑌰𑌸𑍍𑌤𑍍𑌰𑌿𑌷𑍁 𑌚 𑌸𑍍𑌨𑌿𑌗𑍍𑌧𑍋 𑌗𑌂𑌭𑍀𑌰𑌸𑍍𑌤𑍍𑌰𑌿𑌷𑍁 𑌨𑌿𑌤𑍍𑌯𑌶𑌃 ॥ 1 ॥
𑌤𑍍𑌰𑌿𑌵𑌲𑍀𑌵𑌾𑌂𑌸𑍍𑌤𑍍𑌰𑍍𑌯𑌵𑌨𑌤𑌶𑍍𑌚𑌤𑍁𑌰𑍍𑌵𑍍𑌯𑌂𑌗𑌸𑍍𑌤𑍍𑌰𑌿𑌶𑍀𑌰𑍍𑌷𑌵𑌾𑌨𑍍 ।
𑌚𑌤𑍁𑌷𑍍𑌕𑌲𑌶𑍍𑌚𑌤𑍁𑌰𑍍𑌲𑍇𑌖𑌶𑍍𑌚𑌤𑍁𑌷𑍍𑌕𑌿𑌷𑍍𑌕𑍁𑌶𑍍𑌚𑌤𑍁 𑌸𑍍𑌸𑌮𑌃 ॥ 1 ॥
𑌚𑌤𑍁𑌰𑍍𑌦𑌶𑌸𑌮𑌦𑍍𑌵𑌂𑌦𑍍𑌵𑌶𑍍𑌚𑌤𑍁𑌰𑍍𑌦𑌂𑌷𑍍𑌟𑍍𑌰𑌶𑍍𑌚𑌤𑍁𑌰𑍍𑌗𑌤𑌿𑌃 ।
𑌮𑌹𑍋𑌷𑍍𑌠𑌹𑌨𑍁𑌨𑌾𑌸𑌶𑍍𑌚 𑌪𑌂𑌚𑌸𑍍𑌨𑌿𑌗𑍍𑌧𑍋𑌽𑌷𑍍𑌟𑌵𑌂𑌶𑌵𑌾𑌨𑍍 ॥ 1 ॥
𑌦𑌶𑌪𑌦𑍍𑌮𑍋 𑌦𑌶𑌬𑍃𑌹𑌤𑍍𑌤𑍍𑌰𑌿𑌭𑌿𑌰𑍍𑌵𑍍𑌯𑌾𑌪𑍍𑌤𑍋 𑌦𑍍𑌵𑌿𑌶𑍁𑌕𑍍𑌲𑌵𑌾𑌨𑍍 ।
𑌷𑌡𑍁𑌨𑍍𑌨𑌤𑍋 𑌨𑌵𑌤𑌨𑍁𑌸𑍍𑌤𑍍𑌰𑌿𑌭𑌿𑌰𑍍𑌵𑍍𑌯𑌾𑌪𑍍𑌨𑍋𑌤𑌿 𑌰𑌾𑌘𑌵𑌃 ॥ 20 ॥
𑌸𑌤𑍍𑌯𑌧𑌰𑍍𑌮𑌪𑌰𑌶𑍍𑌶𑍍𑌰𑍀𑌮𑌾𑌨𑍍 𑌸𑌂𑌗𑍍𑌰𑌹𑌾𑌨𑍁𑌗𑍍𑌰𑌹𑍇 𑌰𑌤𑌃 ।
𑌦𑍇𑌶𑌕𑌾𑌲𑌵𑌿𑌭𑌾𑌗𑌜𑍍𑌞𑌸𑍍𑌸𑌰𑍍𑌵𑌲𑍋𑌕𑌪𑍍𑌰𑌿𑌯𑌂𑌵𑌦𑌃 ॥ 21 ॥
𑌭𑍍𑌰𑌾𑌤𑌾 𑌤𑌸𑍍𑌯 𑌚 𑌦𑍍𑌵𑍈𑌮𑌾𑌤𑍍𑌰𑌸𑍍𑌸𑍌𑌮𑌿𑌤𑍍𑌰𑌿𑌰𑌪𑌰𑌾𑌜𑌿𑌤𑌃 ।
𑌅𑌨𑍁𑌰𑌾𑌗𑍇𑌣 𑌰𑍂𑌪𑍇𑌣 𑌗𑍁𑌣𑍈𑌶𑍍𑌚𑍈𑌵 𑌤𑌥𑌾𑌵𑌿𑌧𑌃 ॥ 22 ॥
𑌤𑌾𑌵𑍁𑌭𑍌 𑌨𑌰𑌶𑌾𑌰𑍍𑌦𑍂𑌲𑍌 𑌤𑍍𑌵𑌦𑍍𑌦𑌰𑍍𑌶𑌨𑌸𑌮𑍁𑌤𑍍𑌸𑍁𑌕𑍌 ।
𑌵𑌿𑌚𑌿𑌨𑍍𑌵𑌂𑌤𑍌 𑌮𑌹𑍀𑌂 𑌕𑍃𑌤𑍍𑌸𑍍𑌨𑌾𑌮𑌸𑍍𑌮𑌾𑌭𑌿𑌰𑌭𑌿𑌸𑌂𑌗𑌤𑍌 ॥ 23 ॥
𑌤𑍍𑌵𑌾𑌮𑍇𑌵 𑌮𑌾𑌰𑍍𑌗𑌮𑌾𑌣𑍌 𑌤𑍌 𑌵𑌿𑌚𑌰𑌂𑌤𑍌 𑌵𑌸𑍁𑌂𑌧𑌰𑌾𑌮𑍍 ।
𑌦𑌦𑌰𑍍𑌶𑌤𑍁𑌰𑍍𑌮𑍃𑌗𑌪𑌤𑌿𑌂 𑌪𑍂𑌰𑍍𑌵𑌜𑍇𑌨𑌾𑌵𑌰𑍋𑌪𑌿𑌤𑌮𑍍 ॥ 24 ॥
𑌋𑌶𑍍𑌯𑌮𑍂𑌕𑌸𑍍𑌯 𑌪𑍃𑌷𑍍𑌠𑍇 𑌤𑍁 𑌬𑌹𑍁𑌪𑌾𑌦𑌪𑌸𑌂𑌕𑍁𑌲𑍇 ।
𑌭𑍍𑌰𑌾𑌤𑍁𑌰𑍍𑌭𑌯𑌾𑌰𑍍𑌤𑌮𑌾𑌸𑍀𑌨𑌂 𑌸𑍁𑌗𑍍𑌰𑍀𑌵𑌂 𑌪𑍍𑌰𑌿𑌯𑌦𑌰𑍍𑌶𑌨𑌮𑍍 ॥ 25 ॥
𑌵𑌯𑌂 𑌤𑍁 𑌹𑌰𑌿𑌰𑌾𑌜𑌂 𑌤𑌂 𑌸𑍁𑌗𑍍𑌰𑍀𑌵𑌂 𑌸𑌤𑍍𑌯𑌸𑌂𑌗𑌰𑌮𑍍 ।
𑌪𑌰𑌿𑌚𑌰𑍍𑌯𑌾𑌮𑌹𑍇 𑌰𑌾𑌜𑍍𑌯𑌾𑌤𑍍𑌪𑍂𑌰𑍍𑌵𑌜𑍇𑌨𑌾𑌵𑌰𑍋𑌪𑌿𑌤𑌮𑍍 ॥ 26 ॥
𑌤𑌤𑌸𑍍𑌤𑍌 𑌚𑍀𑌰𑌵𑌸𑌨𑍌 𑌧𑌨𑍁𑌃 𑌪𑍍𑌰𑌵𑌰𑌪𑌾𑌣𑌿𑌨𑍌 ।
𑌋𑌶𑍍𑌯𑌮𑍂𑌕𑌸𑍍𑌯 𑌶𑍈𑌲𑌸𑍍𑌯 𑌰𑌮𑍍𑌯𑌂 𑌦𑍇𑌶𑌮𑍁𑌪𑌾𑌗𑌤𑍌 ॥ 2 ॥
𑌸 𑌤𑍌 𑌦𑍃𑌷𑍍𑌟𑍍𑌵𑌾 𑌨𑌰𑌵𑍍𑌯𑌾𑌘𑍍𑌰𑍌 𑌧𑌨𑍍𑌵𑌿𑌨𑍌 𑌵𑌾𑌨𑌰𑌰𑍍𑌷𑌭𑌃 ।
𑌅𑌵𑌪𑍍𑌲𑍁𑌤𑍋 𑌗𑌿𑌰𑍇𑌸𑍍𑌤𑌸𑍍𑌯 𑌶𑌿𑌖𑌰𑌂 𑌭𑌯𑌮𑍋𑌹𑌿𑌤𑌃 ॥ 2 ॥
𑌤𑌤𑌸𑍍𑌸 𑌶𑌿𑌖𑌰𑍇 𑌤𑌸𑍍𑌮𑌿𑌨𑍍𑌵𑌾𑌨𑌰𑍇𑌂𑌦𑍍𑌰𑍋 𑌵𑍍𑌯𑌵𑌸𑍍𑌥𑌿𑌤𑌃 ।
𑌤𑌯𑍋𑌸𑍍𑌸𑌮𑍀𑌪𑌂 𑌮𑌾𑌮𑍇𑌵 𑌪𑍍𑌰𑍇𑌷𑌯𑌾𑌮𑌾𑌸 𑌸𑌤𑍍𑌵𑌰𑌮𑍍 ॥ 2 ॥
𑌤𑌾𑌵𑌹𑌂 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍌 𑌸𑍁𑌗𑍍𑌰𑍀𑌵𑌵𑌚𑌨𑌾𑌤𑍍𑌪𑍍𑌰𑌭𑍂 ।
𑌰𑍂𑌪𑌲𑌕𑍍𑌷𑌣𑌸𑌂𑌪𑌨𑍍𑌨𑍌 𑌕𑍃𑌤𑌾𑌂𑌜𑌲𑌿𑌰𑍁𑌪𑌸𑍍𑌥𑌿𑌤𑌃 ॥ 30 ॥
𑌤𑍌 𑌪𑌰𑌿𑌜𑍍𑌞𑌾𑌤𑌤𑌤𑍍𑌤𑍍𑌵𑌾𑌰𑍍𑌥𑍌 𑌮𑌯𑌾 𑌪𑍍𑌰𑍀𑌤𑌿𑌸𑌮𑌨𑍍𑌵𑌿𑌤𑍌 ।
𑌪𑍃𑌷𑍍𑌠𑌮𑌾𑌰𑍋𑌪𑍍𑌯 𑌤𑌂 𑌦𑍇𑌶𑌂 𑌪𑍍𑌰𑌾𑌪𑌿𑌤𑍌 𑌪𑍁𑌰𑍁𑌷𑌰𑍍𑌷𑌭𑍌 ॥ 31 ॥
𑌨𑌿𑌵𑍇𑌦𑌿𑌤𑍌 𑌚 𑌤𑌤𑍍𑌤𑍍𑌵𑍇𑌨 𑌸𑍁𑌗𑍍𑌰𑍀𑌵𑌾𑌯 𑌮𑌹𑌾𑌤𑍍𑌮𑌨𑍇 ।
𑌤𑌯𑍋𑌰𑌨𑍍𑌯𑍋𑌨𑍍𑌯𑌸𑌲𑍍𑌲𑌾𑌪𑌾𑌦𑍍𑌭𑍃𑌶𑌂 𑌪𑍍𑌰𑍀𑌤𑌿𑌰𑌜𑌾𑌯𑌤 ॥ 32 ॥
𑌤𑌤𑌸𑍍𑌤𑍌 𑌪𑍍𑌰𑍀𑌤𑌿𑌸𑌂𑌪𑌨𑍍𑌨𑍌 𑌹𑌰𑍀𑌶𑍍𑌵𑌰𑌨𑌰𑍇𑌶𑍍𑌵𑌰𑍌 ।
𑌪𑌰𑌸𑍍𑌪𑌰𑌕𑍃𑌤𑌾𑌶𑍍𑌵𑌾𑌸𑍌 𑌕𑌥𑌯𑌾 𑌪𑍂𑌰𑍍𑌵𑌵𑍃𑌤𑍍𑌤𑌯𑌾 ॥ 33 ॥
𑌤𑌤𑌸𑍍𑌸 𑌸𑌾𑌂𑌤𑍍𑌵𑌯𑌾𑌮𑌾𑌸 𑌸𑍁𑌗𑍍𑌰𑍀𑌵𑌂 𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑌃 ।
𑌸𑍍𑌤𑍍𑌰𑍀𑌹𑍇𑌤𑍋𑌰𑍍𑌵𑌾𑌲𑌿𑌨𑌾 𑌭𑍍𑌰𑌾𑌤𑍍𑌰𑌾 𑌨𑌿𑌰𑌸𑍍𑌤𑌮𑍁𑌰𑍁𑌤𑍇𑌜𑌸𑌾 ॥ 34 ॥
𑌤𑌤𑌸𑍍𑌤𑍍𑌵𑌨𑍍𑌨𑌾𑌶𑌜𑌂 𑌶𑍋𑌕𑌂 𑌰𑌾𑌮𑌸𑍍𑌯𑌾𑌕𑍍𑌲𑌿𑌷𑍍𑌟𑌕𑌰𑍍𑌮𑌣𑌃 ।
𑌲𑌕𑍍𑌷𑍍𑌮𑌣𑍋 𑌵𑌾𑌨𑌰𑍇𑌂𑌦𑍍𑌰𑌾𑌯 𑌸𑍁𑌗𑍍𑌰𑍀𑌵𑌾𑌯 𑌨𑍍𑌯𑌵𑍇𑌦𑌯𑌤𑍍 ॥ 35 ॥
𑌸 𑌶𑍍𑌰𑍁𑌤𑍍𑌵𑌾 𑌵𑌾𑌨𑌰𑍇𑌂𑌦𑍍𑌰𑌸𑍍𑌤𑍁 𑌲𑌕𑍍𑌷𑍍𑌮𑌣𑍇𑌨𑍇𑌰𑌿𑌤𑌂 𑌵𑌚𑌃 ।
𑌤𑌦𑌾𑌸𑍀𑌨𑍍𑌨𑌿𑌷𑍍𑌪𑍍𑌰𑌭𑍋𑌽𑌤𑍍𑌯𑌰𑍍𑌥𑌂 𑌗𑍍𑌰𑌹𑌗𑍍𑌰𑌸𑍍𑌤 𑌇𑌵𑌾𑌂𑌶𑍁𑌮𑌾𑌨𑍍 ॥ 36 ॥
𑌤𑌤𑌸𑍍𑌤𑍍𑌵𑌦𑍍𑌗𑌾𑌤𑍍𑌰𑌶𑍋𑌭𑍀𑌨𑌿 𑌰𑌕𑍍𑌷𑌸𑌾 𑌹𑍍𑌰𑌿𑌯𑌮𑌾𑌣𑌯𑌾 ।
𑌯𑌾𑌨𑍍𑌯𑌾𑌭𑌰𑌣𑌜𑌾𑌲𑌾𑌨𑌿 𑌪𑌾𑌤𑌿𑌤𑌾𑌨𑌿 𑌮𑌹𑍀𑌤𑌲𑍇 ॥ 3 ॥
𑌤𑌾𑌨𑌿 𑌸𑌰𑍍𑌵𑌾𑌣𑌿 𑌰𑌾𑌮𑌾𑌯 𑌆𑌨𑍀𑌯 𑌹𑌰𑌿𑌯𑍂𑌥𑌪𑌾𑌃 ।
𑌸𑌂𑌹𑍃𑌷𑍍𑌟𑌾 𑌦𑌰𑍍𑌶𑌯𑌾𑌮𑌾𑌸𑍁𑌰𑍍𑌗𑌤𑌿𑌂 𑌤𑍁 𑌨 𑌵𑌿𑌦𑍁𑌸𑍍𑌤𑌵 ॥ 3 ॥
𑌤𑌾𑌨𑌿 𑌰𑌾𑌮𑌾𑌯 𑌦𑌤𑍍𑌤𑌾𑌨𑌿 𑌮𑌯𑍈𑌵𑍋𑌪𑌹𑍃𑌤𑌾𑌨𑌿 𑌚 ।
𑌸𑍍𑌵𑌨𑌵𑌂𑌤𑍍𑌯𑌵𑌕𑍀𑌰𑍍𑌣𑌾𑌨𑌿 𑌤𑌸𑍍𑌮𑌿𑌨𑍍𑌵𑌿𑌗𑌤𑌚𑍇𑌤𑌸𑌿 ॥ 3 ॥
𑌤𑌾𑌨𑍍𑌯𑌂𑌕𑍇 𑌦𑌰𑍍𑌶𑌨𑍀𑌯𑌾𑌨𑌿 𑌕𑍃𑌤𑍍𑌵𑌾 𑌬𑌹𑍁𑌵𑌿𑌧𑌂 𑌤𑌵 ।
𑌤𑍇𑌨 𑌦𑍇𑌵𑌪𑍍𑌰𑌕𑌾𑌶𑍇𑌨 𑌦𑍇𑌵𑍇𑌨 𑌪𑌰𑌿𑌦𑍇𑌵𑌿𑌤𑌮𑍍 ॥ 40 ॥
𑌪𑌶𑍍𑌯𑌤𑌸𑍍𑌤𑌾𑌨𑌿 𑌰𑍁𑌦𑌤𑌸𑍍𑌤𑌾𑌮𑍍𑌯𑌤𑌶𑍍𑌚 𑌪𑍁𑌨𑌃 𑌪𑍁𑌨𑌃 ।
𑌪𑍍𑌰𑌾𑌦𑍀𑌪𑌯𑌂𑌦𑌾𑌶𑌰𑌥𑍇𑌸𑍍𑌤𑌾𑌨𑌿 𑌶𑍋𑌕𑌹𑍁𑌤𑌾𑌶𑌨𑌮𑍍 ॥ 41 ॥
𑌶𑌯𑌿𑌤𑌂 𑌚 𑌚𑌿𑌰𑌂 𑌤𑍇𑌨 𑌦𑍁𑌃𑌖𑌾𑌰𑍍𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌮𑌯𑌾𑌪𑌿 𑌵𑌿𑌵𑌿𑌧𑍈𑌰𑍍𑌵𑌾𑌕𑍍𑌯𑍈𑌃 𑌕𑍃𑌚𑍍𑌛𑍍𑌰𑌾𑌦𑍁𑌤𑍍𑌥𑌾𑌪𑌿𑌤𑌃 𑌪𑍁𑌨𑌃 ॥ 42 ॥
𑌤𑌾𑌨𑌿 𑌦𑍃𑌷𑍍𑌟𑍍𑌵𑌾 𑌮𑌹𑌾𑌬𑌾𑌹𑍁𑌰𑍍𑌦𑌰𑍍𑌶𑌯𑌿𑌤𑍍𑌵𑌾 𑌮𑍁𑌹𑍁𑌰𑍍𑌮𑍁𑌹𑍁𑌃 ।
𑌰𑌾𑌘𑌵𑌸𑍍𑌸𑌹 𑌸𑍌𑌮𑌿𑌤𑍍𑌰𑌿𑌸𑍍𑌸𑍁𑌗𑍍𑌰𑍀𑌵𑍇 𑌸 𑌨𑍍𑌯𑌵𑍇𑌦𑌯𑌤𑍍 ॥ 43 ॥
𑌸 𑌤𑌵𑌾𑌦𑌰𑍍𑌶𑌨𑌾𑌦𑌾𑌰𑍍𑌯𑍇 𑌰𑌾𑌘𑌵𑌃 𑌪𑌰𑌿𑌤𑌪𑍍𑌯𑌤𑍇 ।
𑌮𑌹𑌤𑌾 𑌜𑍍𑌵𑌲𑌤𑌾 𑌨𑌿𑌤𑍍𑌯𑌮𑌗𑍍𑌨𑌿𑌨𑍇𑌵𑌾𑌗𑍍𑌨𑌿𑌪𑌰𑍍𑌵𑌤𑌃 ॥ 44 ॥
𑌤𑍍𑌵𑌤𑍍𑌕𑍃𑌤𑍇 𑌤𑌮𑌨𑌿𑌦𑍍𑌰𑌾 𑌚 𑌶𑍋𑌕𑌶𑍍𑌚𑌿𑌂𑌤𑌾 𑌚 𑌰𑌾𑌘𑌵𑌮𑍍 ।
𑌤𑌾𑌪𑌯𑌂𑌤𑌿 𑌮𑌹𑌾𑌤𑍍𑌮𑌾𑌨𑌮𑌗𑍍𑌨𑍍𑌯𑌗𑌾𑌰𑌮𑌿𑌵𑌾𑌗𑍍𑌨𑌯𑌃 ॥ 45 ॥
𑌤𑌵𑌾𑌦𑌰𑍍𑌶𑌨𑌶𑍋𑌕𑍇𑌨 𑌰𑌾𑌘𑌵𑌃 𑌪𑍍𑌰𑌵𑌿𑌚𑌾𑌲𑍍𑌯𑌤𑍇 ।
𑌮𑌹𑌤𑌾 𑌭𑍂𑌮𑌿𑌕𑌂𑌪𑍇𑌨 𑌮𑌹𑌾𑌨𑌿𑌵 𑌶𑌿𑌲𑍋𑌚𑍍𑌚𑌯𑌃 ॥ 46 ॥
𑌕𑌾𑌨𑌨𑌾𑌨𑌿 𑌸𑍁𑌰𑌮𑍍𑌯𑌾𑌣𑌿 𑌨𑌦𑍀𑌃 𑌪𑍍𑌰𑌸𑍍𑌰𑌵𑌣𑌾𑌨𑌿 𑌚 ।
𑌚𑌰𑌨𑍍𑌨 𑌰𑌤𑌿𑌮𑌾𑌪𑍍𑌨𑍋𑌤𑌿 𑌤𑍍𑌵𑌾𑌮𑌪𑌶𑍍𑌯𑌨𑍍𑌨𑍃𑌪𑌾𑌤𑍍𑌮𑌜𑍇 ॥ 4 ॥
𑌸 𑌤𑍍𑌵𑌾𑌂 𑌮𑌨𑍁𑌜𑌶𑌾𑌰𑍍𑌦𑍂𑌲𑌃 𑌕𑍍𑌷𑌿𑌪𑍍𑌰𑌂 𑌪𑍍𑌰𑌾𑌪𑍍𑌸𑍍𑌯𑌤𑌿 𑌰𑌾𑌘𑌵𑌃 ।
𑌸𑌮𑌿𑌤𑍍𑌰𑌬𑌾𑌂𑌧𑌵𑌂 𑌹𑌤𑍍𑌵𑌾 𑌰𑌾𑌵𑌣𑌂 𑌜𑌨𑌕𑌾𑌤𑍍𑌮𑌜𑍇 ॥ 4 ॥
𑌸𑌹𑌿𑌤𑍌 𑌰𑌾𑌮𑌸𑍁𑌗𑍍𑌰𑍀𑌵𑌾𑌵𑍁𑌭𑌾𑌵𑌕𑍁𑌰𑍁𑌤𑌾𑌂 𑌤𑌦𑌾 ।
𑌸𑌮𑌯𑌂 𑌵𑌾𑌲𑌿𑌨𑌂 𑌹𑌂𑌤𑍁𑌂 𑌤𑌵 𑌚𑌾𑌨𑍍𑌵𑍇𑌷𑌣𑌂 𑌤𑌥𑌾 ॥ 4 ॥
𑌤𑌤𑌸𑍍𑌤𑌾𑌭𑍍𑌯𑌾𑌂 𑌕𑍁𑌮𑌾𑌰𑌾𑌭𑍍𑌯𑌾𑌂 𑌵𑍀𑌰𑌾𑌭𑍍𑌯𑌾𑌂 𑌸 𑌹𑌰𑍀𑌶𑍍𑌵𑌰𑌃 ।
𑌕𑌿𑌷𑍍𑌕𑌿𑌂𑌧𑌾𑌂 𑌸𑌮𑍁𑌪𑌾𑌗𑌮𑍍𑌯 𑌵𑌾𑌲𑍀 𑌯𑍁𑌦𑍍𑌧𑍇 𑌨𑌿𑌪𑌾𑌤𑌿𑌤𑌃 ॥ 50 ॥
𑌤𑌤𑍋 𑌨𑌿𑌹𑌤𑍍𑌯 𑌤𑌰𑌸𑌾 𑌰𑌾𑌮𑍋 𑌵𑌾𑌲𑌿𑌨𑌮𑌾𑌹𑌵𑍇 ।
𑌸𑌰𑍍𑌵𑌰𑍍𑌕𑍍𑌷𑌹𑌰𑌿𑌸𑌂𑌘𑌾𑌨𑌾𑌂 𑌸𑍁𑌗𑍍𑌰𑍀𑌵𑌮𑌕𑌰𑍋𑌤𑍍𑌪𑌤𑌿𑌮𑍍 ॥ 51 ॥
𑌰𑌾𑌮𑌸𑍁𑌗𑍍𑌰𑍀𑌵𑌯𑍋𑌰𑍈𑌕𑍍𑌯𑌂 𑌦𑍇𑌵𑍍𑌯𑍇𑌵𑌂 𑌸𑌮𑌜𑌾𑌯𑌤 ।
𑌹𑌨𑍁𑌮𑌂𑌤𑌂 𑌚 𑌮𑌾𑌂 𑌵𑌿𑌦𑍍𑌧𑌿 𑌤𑌯𑍋𑌰𑍍𑌦𑍂𑌤𑌮𑌿𑌹𑌾𑌗𑌤𑌮𑍍 ॥ 52 ॥
𑌸𑍍𑌵𑌰𑌾𑌜𑍍𑌯𑌂 𑌪𑍍𑌰𑌾𑌪𑍍𑌯 𑌸𑍁𑌗𑍍𑌰𑍀𑌵𑌸𑍍𑌸𑌮𑌾𑌨𑍀𑌯 𑌹𑌰𑍀𑌶𑍍𑌵𑌰𑌾𑌨𑍍 ।
𑌤𑍍𑌵𑌦𑌰𑍍𑌥𑌂 𑌪𑍍𑌰𑍇𑌷𑌯𑌾𑌮𑌾𑌸 𑌦𑌿𑌶𑍋 𑌦𑌶 𑌮𑌹𑌾𑌬𑌲𑌾𑌨𑍍 ॥ 53 ॥
𑌆𑌦𑌿𑌷𑍍𑌟𑌾 𑌵𑌾𑌨𑌰𑍇𑌂𑌦𑍍𑌰𑍇𑌣 𑌸𑍁𑌗𑍍𑌰𑍀𑌵𑍇𑌣 𑌮𑌹𑍌𑌜𑌸𑌾 ।
𑌅𑌦𑍍𑌰𑌿𑌰𑌾𑌜𑌪𑍍𑌰𑌤𑍀𑌕𑌾𑌶𑌾𑌸𑍍𑌸𑌰𑍍𑌵𑌤𑌃 𑌪𑍍𑌰𑌸𑍍𑌥𑌿𑌤𑍌 𑌮𑌹𑍀𑌮𑍍 ॥ 54 ॥
𑌤𑌤𑌸𑍍𑌤𑍇 𑌮𑌾𑌰𑍍𑌗𑌮𑌾𑌣𑌾 𑌵𑍈 𑌸𑍁𑌗𑍍𑌰𑍀𑌵𑌵𑌚𑌨𑌾𑌤𑍁𑌰𑌾𑌃 ।
𑌚𑌰𑌂𑌤𑌿 𑌵𑌸𑍁𑌧𑌾𑌂 𑌕𑍃𑌤𑍍𑌸𑍍𑌨𑌾𑌂 𑌵𑌯𑌮𑌨𑍍𑌯𑍇 𑌚 𑌵𑌾𑌨𑌰𑌾𑌃 ॥ 55 ॥
𑌅𑌂𑌗𑌦𑍋 𑌨𑌾𑌮 𑌲𑌕𑍍𑌷𑍍𑌮𑍀𑌵𑌾𑌨𑍍𑌵𑌾𑌲𑌿𑌸𑍂𑌨𑍁𑌰𑍍𑌮𑌹𑌾𑌬𑌲𑌃 ।
𑌪𑍍𑌰𑌸𑍍𑌥𑌿𑌤𑌃 𑌕𑌪𑌿𑌶𑌾𑌰𑍍𑌦𑍂𑌲𑌸𑍍𑌤𑍍𑌰𑌿𑌭𑌾𑌗𑌬𑌲𑌸𑌂𑌵𑍃𑌤𑌃 ॥ 56 ॥
𑌤𑍇𑌷𑌾𑌂 𑌨𑍋 𑌵𑌿𑌪𑍍𑌰𑌣𑌷𑍍𑌟𑌾𑌨𑌾𑌂 𑌵𑌿𑌂𑌧𑍍𑌯𑍇 𑌪𑌰𑍍𑌵𑌤𑌸𑌤𑍍𑌤𑌮𑍇 ।
𑌭𑍃𑌶𑌂 𑌶𑍋𑌕𑌪𑌰𑍀𑌤𑌾𑌨𑌾𑌮𑌹𑍋𑌰𑌾𑌤𑍍𑌰𑌗𑌣𑌾 𑌗𑌤𑌾𑌃 ॥ 5 ॥
𑌤𑍇 𑌵𑌯𑌂 𑌕𑌾𑌰𑍍𑌯𑌨𑍈𑌰𑌾𑌶𑍍𑌯𑌾𑌤𑍍𑌕𑌾𑌲𑌸𑍍𑌯𑌾𑌤𑌿𑌕𑍍𑌰𑌮𑍇𑌣 𑌚 ।
𑌭𑌯𑌾𑌚𑍍𑌚 𑌕𑌪𑌿𑌰𑌾𑌜𑌸𑍍𑌯 𑌪𑍍𑌰𑌾𑌣𑌾𑌂𑌸𑍍𑌤𑍍𑌯𑌕𑍍𑌤𑍁𑌂 𑌵𑍍𑌯𑌵𑌸𑍍𑌥𑌿𑌤𑌾𑌃 ॥ 5 ॥
𑌵𑌿𑌚𑌿𑌤𑍍𑌯 𑌵𑌨𑌦𑍁𑌰𑍍𑌗𑌾𑌣𑌿 𑌗𑌿𑌰𑌿𑌪𑍍𑌰𑌸𑍍𑌰𑌵𑌣𑌾𑌨𑌿 𑌚 ।
𑌅𑌨𑌾𑌸𑌾𑌦𑍍𑌯 𑌪𑌦𑌂 𑌦𑍇𑌵𑍍𑌯𑌾𑌃 𑌪𑍍𑌰𑌾𑌣𑌾𑌂𑌸𑍍𑌤𑍍𑌯𑌕𑍍𑌤𑍁𑌂 𑌸𑌮𑍁𑌦𑍍𑌯𑌤𑌾𑌃 ॥ 5 ॥
𑌦𑍃𑌷𑍍𑌟𑍍𑌵𑌾 𑌪𑍍𑌰𑌾𑌯𑍋𑌪𑌵𑌿𑌷𑍍𑌟𑌾𑌂𑌶𑍍𑌚 𑌸𑌰𑍍𑌵𑌾𑌨𑍍𑌵𑌾𑌨𑌰𑌪𑍁𑌂𑌗𑌵𑌾𑌨𑍍 ।
𑌭𑍃𑌶𑌂 𑌶𑍋𑌕𑌾𑌰𑍍𑌣𑌵𑍇 𑌮𑌗𑍍𑌨𑌃 𑌪𑌰𑍍𑌯𑌦𑍇𑌵𑌯𑌦𑌂𑌗𑌦𑌃 ॥ 60 ॥
𑌤𑌵 𑌨𑌾𑌶𑌂 𑌚 𑌵𑍈𑌦𑍇𑌹𑌿 𑌵𑌾𑌲𑌿𑌨𑌶𑍍𑌚 𑌵𑌧𑌂 𑌤𑌥𑌾 ।
𑌪𑍍𑌰𑌾𑌯𑍋𑌪𑌵𑍇𑌶𑌮𑌸𑍍𑌮𑌾𑌕𑌂 𑌮𑌰𑌣𑌂 𑌚 𑌜𑌟𑌾𑌯𑍁𑌷𑌃 ॥ 61 ॥
𑌤𑍇𑌷𑌾𑌂 𑌨𑌸𑍍𑌵𑌾𑌮𑌿𑌸𑌂𑌦𑍇𑌶𑌾𑌨𑍍𑌨𑌿𑌰𑌾𑌶𑌾𑌨𑌾𑌂 𑌮𑍁𑌮𑍂𑌰𑍍𑌷𑌤𑌾𑌮𑍍 ।
𑌕𑌾𑌰𑍍𑌯𑌹𑍇𑌤𑍋𑌰𑌿𑌵𑌾𑌯𑌾𑌤𑌶𑍍𑌶𑌕𑍁𑌨𑌿𑌰𑍍𑌵𑍀𑌰𑍍𑌯𑌵𑌾𑌨𑍍𑌮𑌹𑌾𑌨𑍍 ॥ 62 ॥
𑌗𑍃𑌧𑍍𑌰𑌰𑌾𑌜𑌸𑍍𑌯 𑌸𑍋𑌦𑌰𑍍𑌯𑌃 𑌸𑌂𑌪𑌾𑌤𑌿𑌰𑍍𑌨𑌾𑌮 𑌗𑍃𑌧𑍍𑌰𑌰𑌾𑌟𑍍 ।
𑌶𑍍𑌰𑍁𑌤𑍍𑌵𑌾 𑌭𑍍𑌰𑌾𑌤𑍃𑌵𑌧𑌂 𑌕𑍋𑌪𑌾𑌦𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 63 ॥
𑌯𑌵𑍀𑌯𑌾𑌨𑍍𑌕𑍇𑌨 𑌮𑍇 𑌭𑍍𑌰𑌾𑌤𑌾 𑌹𑌤𑌃 𑌕𑍍𑌵 𑌚 𑌨𑌿𑌪𑌾𑌤𑌿𑌤𑌃 ।
𑌏𑌤𑌦𑌾𑌖𑍍𑌯𑌾𑌤𑍁𑌮𑌿𑌚𑍍𑌛𑌾𑌮𑌿 𑌭𑌵𑌦𑍍𑌭𑌿𑌰𑍍𑌵𑌾𑌨𑌰𑍋𑌤𑍍𑌤𑌮𑌾𑌃 ॥ 64 ॥
𑌅𑌂𑌗𑌦𑍋𑌽𑌕𑌥𑌯𑌤𑍍𑌤𑌸𑍍𑌯 𑌜𑌨𑌸𑍍𑌥𑌾𑌨𑍇 𑌮𑌹𑌦𑍍𑌵𑌧𑌮𑍍 ।
𑌰𑌕𑍍𑌷𑌸𑌾 𑌭𑍀𑌮𑌰𑍂𑌪𑍇𑌣 𑌤𑍍𑌵𑌾𑌮𑍁𑌦𑍍𑌦𑌿𑌶𑍍𑌯 𑌯𑌥𑌾𑌤𑌥𑌮𑍍 ॥ 65 ॥
𑌜𑌟𑌾𑌯𑍁𑌷𑍋 𑌵𑌧𑌂 𑌶𑍍𑌰𑍁𑌤𑍍𑌵𑌾 𑌦𑍁𑌃𑌖𑌿𑌤𑌸𑍍𑌸𑍋𑌽𑌰𑍁𑌣𑌾𑌤𑍍𑌮𑌜𑌃 ।
𑌤𑍍𑌵𑌾𑌂 𑌶𑌶𑌂𑌸 𑌵𑌰𑌾𑌰𑍋𑌹𑍇 𑌵𑌸𑌂𑌤𑍀𑌂 𑌰𑌾𑌵𑌣𑌾𑌲𑌯𑍇 ॥ 66 ॥
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑌂𑌪𑌾𑌤𑍇𑌃 𑌪𑍍𑌰𑍀𑌤𑌿𑌵𑌰𑍍𑌧𑌨𑌮𑍍 ।
𑌅𑌂𑌗𑌦𑌪𑍍𑌰𑌮𑍁𑌖𑌾𑌸𑍍𑌤𑍂𑌰𑍍𑌣𑌂 𑌤𑌤𑌸𑍍𑌸𑌂𑌪𑍍𑌰𑌸𑍍𑌥𑌿𑌤𑌾 𑌵𑌯𑌮𑍍 ॥ 6 ॥
𑌵𑌿𑌂𑌧𑍍𑌯𑌾𑌦𑍁𑌤𑍍𑌥𑌾𑌯 𑌸𑌂𑌪𑍍𑌰𑌾𑌪𑍍𑌤𑌾 𑌸𑍍𑌸𑌾𑌗𑌰𑌸𑍍𑌯𑌾𑌂𑌤𑌮𑍁𑌤𑍍𑌤𑌰𑌮𑍍 ।
𑌤𑍍𑌵𑌦𑍍𑌧𑌰𑍍𑌶𑌨𑌕𑍃𑌤𑍋𑌤𑍍𑌸𑌾𑌹𑌾 𑌹𑍃𑌷𑍍𑌟𑌾𑌸𑍍𑌤𑍁𑌷𑍍𑌟𑌾𑌃 𑌪𑍍𑌲𑌵𑌂𑌗𑌮𑌾𑌃 ॥ 6 ॥
𑌅𑌂𑌗𑌦𑌪𑍍𑌰𑌮𑍁𑌖𑌾𑌸𑍍𑌸𑌰𑍍𑌵𑍇 𑌵𑍇𑌲𑍋𑌪𑌾𑌂𑌤𑌮𑍁𑌪𑌸𑍍𑌥𑌿𑌤𑌾𑌃 ।
𑌚𑌿𑌂𑌤𑌾𑌂 𑌜𑌗𑍍𑌮𑍁𑌃 𑌪𑍁𑌨𑌰𑍍𑌭𑍀𑌤𑌾𑌸𑍍𑌤𑍍𑌵𑌦𑍍𑌦𑌰𑍍𑌶𑌨𑌸𑌮𑍁𑌤𑍍𑌸𑍁𑌕𑌾𑌃 ॥ 6 ॥
𑌅𑌥𑌾𑌹𑌂 𑌹𑌰𑌿𑌸𑍈𑌨𑍍𑌯𑌸𑍍𑌯 𑌸𑌾𑌗𑌰𑌂 𑌪𑍍𑌰𑍇𑌕𑍍𑌷𑍍𑌯 𑌸𑍀𑌦𑌤𑌃 ।
𑌵𑍍𑌯𑌵𑌧𑍂𑌯 𑌭𑌯𑌂 𑌤𑍀𑌵𑍍𑌰𑌂 𑌯𑍋𑌜𑌨𑌾𑌨𑌾𑌂 𑌶𑌤𑌂 𑌪𑍍𑌲𑍁𑌤𑌃 ॥ 0 ॥
𑌲𑌂𑌕𑌾 𑌚𑌾𑌪𑌿 𑌮𑌯𑌾 𑌰𑌾𑌤𑍍𑌰𑍌 𑌪𑍍𑌰𑌵𑌿𑌷𑍍𑌟𑌾 𑌰𑌾𑌕𑍍𑌷𑌸𑌾𑌕𑍁𑌲𑌾 ।
𑌰𑌾𑌵𑌣𑌶𑍍𑌚 𑌮𑌯𑌾 𑌦𑍃𑌷𑍍𑌟𑌸𑍍𑌤𑍍𑌵𑌂 𑌚 𑌶𑍋𑌕𑌪𑌰𑌿𑌪𑍍𑌲𑍁𑌤𑌾 ॥ 1 ॥
𑌏𑌤𑌤𑍍𑌤𑍇 𑌸𑌰𑍍𑌵𑌮𑌾𑌖𑍍𑌯𑌾𑌤𑌂 𑌯𑌥𑌾𑌵𑍃𑌤𑍍𑌤𑌮𑌨𑌂𑌦𑌿𑌤𑍇 ।
𑌅𑌭𑌿𑌭𑌾𑌷𑌸𑍍𑌵 𑌮𑌾𑌂 𑌦𑍇𑌵𑌿 𑌦𑍂𑌤𑍋 𑌦𑌾𑌶𑌰𑌥𑍇𑌰𑌹𑌮𑍍 ॥ 2 ॥
𑌤𑌂 𑌮𑌾𑌂 𑌰𑌾𑌮𑌕𑍃𑌤𑍋𑌦𑍍𑌯𑍋𑌗𑌂 𑌤𑍍𑌵𑌨𑍍𑌨𑌿𑌮𑌿𑌤𑍍𑌤𑌮𑌿𑌹𑌾𑌗𑌤𑌮𑍍 ।
𑌸𑍁𑌗𑍍𑌰𑍀𑌵𑌸𑌚𑌿𑌵𑌂 𑌦𑍇𑌵𑌿 𑌬𑍁𑌦𑍍𑌧𑍍𑌯𑌸𑍍𑌵 𑌪𑌵𑌨𑌾𑌤𑍍𑌮𑌜𑌮𑍍 ॥ 3 ॥
𑌕𑍁𑌶𑌲𑍀 𑌤𑌵 𑌕𑌾𑌕𑍁𑌤𑍍𑌸𑍍𑌥𑌸𑍍𑌸𑌰𑍍𑌵𑌶𑌸𑍍𑌤𑍍𑌰𑌭𑍃𑌤𑌾𑌂 𑌵𑌰𑌃 ।
𑌗𑍁𑌰𑍋𑌰𑌾𑌰𑌾𑌧𑌨𑍇 𑌯𑍁𑌕𑍍𑌤𑍋 𑌲𑌕𑍍𑌷𑍍𑌮𑌣𑌶𑍍𑌚 𑌸𑍁𑌲𑌕𑍍𑌷𑌣𑌃 ॥ 4 ॥
𑌤𑌸𑍍𑌯 𑌵𑍀𑌰𑍍𑌯𑌵𑌤𑍋 𑌦𑍇𑌵𑌿 𑌭𑌰𑍍𑌤𑍁𑌸𑍍𑌤𑌵 𑌹𑌿𑌤𑍇 𑌰𑌤𑌃 ।
𑌅𑌹𑌮𑍇𑌕𑌸𑍍𑌤𑍁 𑌸𑌂𑌪𑍍𑌰𑌾𑌪𑍍𑌤 𑌸𑍍𑌸𑍁𑌗𑍍𑌰𑍀𑌵𑌵𑌚𑌨𑌾𑌦𑌿𑌹 ॥ 5 ॥
𑌮𑌯𑍇𑌯𑌮𑌸𑌹𑌾𑌯𑍇𑌨 𑌚𑌰𑌤𑌾 𑌕𑌾𑌮𑌰𑍂𑌪𑌿𑌣𑌾 ।
𑌦𑌕𑍍𑌷𑌿𑌣𑌾 𑌦𑌿𑌗𑌨𑍁𑌕𑍍𑌰𑌾𑌂𑌤𑌾 𑌤𑍍𑌵𑌨𑍍𑌮𑌾𑌰𑍍𑌗𑌵𑌿𑌚𑌯𑍈𑌷𑌿𑌣𑌾 ॥ 6 ॥
𑌦𑌿𑌷𑍍𑌟𑍍𑌯𑌾𑌹𑌂 𑌹𑌰𑌿𑌸𑍈𑌨𑍍𑌯𑌾𑌨𑌾𑌂 𑌤𑍍𑌵𑌨𑍍𑌨𑌾𑌶𑌮𑌨𑍁𑌶𑍋𑌚𑌤𑌾𑌮𑍍 ।
𑌅𑌪𑌨𑍇𑌷𑍍𑌯𑌾𑌮𑌿 𑌸𑌂𑌤𑌾𑌪𑌂 𑌤𑌵𑌾𑌭𑌿𑌗𑌮𑌶𑌂𑌸𑌨𑌾𑌤𑍍 ॥ ॥
𑌦𑌿𑌷𑍍𑌟𑍍𑌯𑌾 𑌹𑌿 𑌮𑌮 𑌨 𑌵𑍍𑌯𑌰𑍍𑌥𑌂 𑌦𑍇𑌵𑌿 𑌸𑌾𑌗𑌰𑌲𑌂𑌘𑌨𑌮𑍍 ।
𑌪𑍍𑌰𑌾𑌪𑍍𑌸𑍍𑌯𑌾𑌮𑍍𑌯𑌹𑌮𑌿𑌦𑌂 𑌦𑌿𑌷𑍍𑌟𑍍𑌯𑌾 𑌤𑍍𑌵𑌦𑍍𑌦𑌰𑍍𑌶𑌨𑌕𑍃𑌤𑌂 𑌯𑌶𑌃 ॥ ॥
𑌰𑌾𑌘𑌵𑌶𑍍𑌚 𑌮𑌹𑌾𑌵𑍀𑌰𑍍𑌯𑌃 𑌕𑍍𑌷𑌿𑌪𑍍𑌰𑌂 𑌤𑍍𑌵𑌾𑌮𑌭𑌿𑌪𑌤𑍍𑌸𑍍𑌯𑌤𑍇 ।
𑌸𑌮𑌿𑌤𑍍𑌰𑌬𑌾𑌂𑌧𑌵𑌂 𑌹𑌤𑍍𑌵𑌾 𑌰𑌾𑌵𑌣𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ॥ ॥
𑌮𑌾𑌲𑍍𑌯𑌵𑌾𑌨𑍍𑌨𑌾𑌮 𑌵𑍈𑌦𑍇𑌹𑌿 𑌗𑌿𑌰𑍀𑌣𑌾𑌮𑍁𑌤𑍍𑌤𑌮𑍋 𑌗𑌿𑌰𑌿𑌃 ।
𑌤𑌤𑍋 𑌗𑌚𑍍𑌛𑌤𑌿 𑌗𑍋𑌕𑌰𑍍𑌣𑌂 𑌪𑌰𑍍𑌵𑌤𑌂 𑌕𑍇𑌸𑌰𑍀 𑌹𑌰𑌿𑌃 ॥ 0 ॥
𑌸 𑌚 𑌦𑍇𑌵𑌰𑍍𑌷𑌿𑌭𑌿𑌰𑍍𑌦𑌿𑌷𑍍𑌟𑌃 𑌪𑌿𑌤𑌾 𑌮𑌮 𑌮𑌹𑌾𑌕𑌪𑌿𑌃 ।
𑌤𑍀𑌰𑍍𑌥𑍇 𑌨𑌦𑍀𑌪𑌤𑍇𑌃 𑌪𑍁𑌣𑍍𑌯𑍇 𑌶𑌂𑌬𑌸𑌾𑌦𑌨𑌮𑍁𑌦𑍍𑌧𑌰𑌤𑍍 ॥ 1 ॥
𑌤𑌸𑍍𑌯𑌾𑌹𑌂 𑌹𑌰𑌿𑌣𑌃 𑌕𑍍𑌷𑍇𑌤𑍍𑌰𑍇 𑌜𑌾𑌤𑍋 𑌵𑌾𑌤𑍇𑌨 𑌮𑍈𑌥𑌿𑌲𑌿 ।
𑌹𑌨𑍁𑌮𑌾𑌨𑌿𑌤𑌿 𑌵𑌿𑌖𑍍𑌯𑌾𑌤𑍋 𑌲𑍋𑌕𑍇 𑌸𑍍𑌵𑍇𑌨𑍈𑌵 𑌕𑌰𑍍𑌮𑌣𑌾 ॥ 2 ॥
𑌵𑌿𑌶𑍍𑌵𑌾𑌸𑌾𑌰𑍍𑌥𑌂 𑌤𑍁 𑌵𑍈𑌦𑍇𑌹𑌿 𑌭𑌰𑍍𑌤𑍁𑌰𑍁𑌕𑍍𑌤𑌾 𑌮𑌯𑌾 𑌗𑍁𑌣𑌾𑌃 ।
𑌅𑌚𑌿𑌰𑌾𑌦𑍍𑌰𑌾𑌘𑌵𑍋 𑌦𑍇𑌵𑌿 𑌤𑍍𑌵𑌾𑌮𑌿𑌤𑍋 𑌨𑌯𑌿𑌤𑌾𑌽𑌨𑌘𑍇 ॥ 3 ॥
𑌏𑌵𑌂 𑌵𑌿𑌶𑍍𑌵𑌾𑌸𑌿𑌤𑌾 𑌸𑍀𑌤𑌾 𑌹𑍇𑌤𑍁𑌭𑌿𑌶𑍍𑌶𑍋𑌕𑌕𑌰𑍍𑌶𑌿𑌤𑌾 ।
𑌉𑌪𑌪𑌨𑍍𑌨𑍈𑌰𑌭𑌿𑌜𑍍𑌞𑌾𑌨𑍈𑌰𑍍𑌦𑍂𑌤𑌂 𑌤𑌮𑌵𑌗𑌚𑍍𑌛𑌤𑌿 ॥ 4 ॥
𑌅𑌤𑍁𑌲𑌂 𑌚 𑌗𑌤𑌾 𑌹𑌰𑍍𑌷𑌂 𑌪𑍍𑌰𑌹𑌰𑍍𑌷𑍇𑌣 𑌚 𑌜𑌾𑌨𑌕𑍀 ।
𑌨𑍇𑌤𑍍𑌰𑌾𑌭𑍍𑌯𑌾𑌂 𑌵𑌕𑍍𑌰𑌪𑌕𑍍𑌷𑍍𑌮𑌾𑌭𑍍𑌯𑌾𑌂 𑌮𑍁𑌮𑍋𑌚𑌾𑌨𑌂𑌦𑌜𑌂 𑌜𑌲𑌮𑍍 ॥ 5 ॥
𑌚𑌾𑌰𑍁 𑌤𑌦𑍍𑌵𑌦𑌨𑌂 𑌤𑌸𑍍𑌯𑌾𑌸𑍍𑌤𑌾𑌮𑍍𑌰𑌶𑍁𑌕𑍍𑌲𑌾𑌯𑌤𑍇𑌕𑍍𑌷𑌣𑌮𑍍 ।
𑌅𑌶𑍋𑌭𑌤 𑌵𑌿𑌶𑌾𑌲𑌾𑌕𑍍𑌷𑍍𑌯𑌾 𑌰𑌾𑌹𑍁𑌮𑍁𑌕𑍍𑌤 𑌇𑌵𑍋𑌡𑍁𑌰𑌾𑌟𑍍 ॥ 6 ॥
𑌹𑌨𑍁𑌮𑌂𑌤𑌂 𑌕𑌪𑌿𑌂 𑌵𑍍𑌯𑌕𑍍𑌤𑌂 𑌮𑌨𑍍𑌯𑌤𑍇 𑌨𑌾𑌨𑍍𑌯𑌥𑍇𑌤𑌿 𑌸𑌾 ।
𑌅𑌥𑍋𑌵𑌾𑌚 𑌹𑌨𑍂𑌮𑌾𑌂𑌸𑍍𑌤𑌾𑌮𑍁𑌤𑍍𑌤𑌰𑌂 𑌪𑍍𑌰𑌿𑌯𑌦𑌰𑍍𑌶𑌨𑌾𑌮𑍍 ॥ ॥
𑌏𑌤𑌤𑍍𑌤𑍇 𑌸𑌰𑍍𑌵𑌮𑌾𑌖𑍍𑌯𑌾𑌤𑌂 𑌸𑌮𑌾𑌶𑍍𑌵𑌸𑌿𑌹𑌿 𑌮𑍈𑌥𑌿𑌲𑌿 ।
𑌕𑌿𑌂 𑌕𑌰𑍋𑌮𑌿 𑌕𑌥𑌂 𑌵𑌾 𑌤𑍇 𑌰𑍋𑌚𑌤𑍇 𑌪𑍍𑌰𑌤𑌿𑌯𑌾𑌮𑍍𑌯𑌹𑌮𑍍 ॥ ॥
𑌹𑌤𑍇𑌽𑌸𑍁𑌰𑍇 𑌸𑌂𑌯𑌤𑌿 𑌶𑌂𑌬𑌸𑌾𑌦𑌨𑍇 𑌕𑌪𑌿𑌪𑍍𑌰𑌵𑍀𑌰𑍇𑌣 𑌮𑌹𑌰𑍍𑌷𑌿𑌚𑍋𑌦𑌨𑌾𑌤𑍍 ।
𑌤𑌤𑍋𑌽𑌸𑍍𑌮𑌿 𑌵𑌾𑌯𑍁𑌪𑍍𑌰𑌭𑌵𑍋 𑌹𑌿 𑌮𑍈𑌥𑌿𑌲𑌿 𑌪𑍍𑌰𑌭𑌾𑌵𑌤𑌸𑍍𑌤𑌤𑍍𑌪𑍍𑌰𑌤𑌿𑌮𑌶𑍍𑌚 𑌵𑌾𑌨𑌰𑌃 ॥ ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
