𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌨𑌵𑌮𑌸𑍍𑌸𑌰𑍍𑌗𑌃 ।
𑌵𑌾𑌲𑍀 𑌨𑌾𑌮 𑌮𑌮 𑌭𑍍𑌰𑌾𑌤𑌾 𑌜𑍍𑌯𑍇𑌷𑍍𑌠𑌶𑍍𑌶𑌤𑍍𑌰𑍁𑌨𑌿𑌷𑍂𑌦𑌨𑌃 ।
𑌪𑌿𑌤𑍁𑌰𑍍𑌬𑌹𑍁𑌮𑌤𑍋 𑌨𑌿𑌤𑍍𑌯𑌂 𑌮𑌮𑌾𑌪𑌿 𑌚 𑌤𑌥𑌾 𑌪𑍁𑌰𑌾 ॥ 1 ॥
𑌪𑌿𑌤𑌰𑍍𑌯𑍁𑌪𑌰𑌤𑍇𑌽𑌸𑍍𑌮𑌾𑌕𑌂 𑌜𑍍𑌯𑍇𑌷𑍍𑌠𑍋𑌽𑌯𑌮𑌿𑌤𑌿 𑌮𑌂𑌤𑍍𑌰𑌿𑌭𑌿𑌃 ।
𑌕𑌪𑍀𑌨𑌾𑌮𑍀𑌶𑍍𑌵𑌰𑍋 𑌰𑌾𑌜𑍍𑌯𑍇 𑌕𑍃𑌤𑌃 𑌪𑌰𑌮𑌸𑌮𑍍𑌮𑌤𑌃 ॥ 2 ॥
𑌰𑌾𑌜𑍍𑌯𑌂 𑌪𑍍𑌰𑌶𑌾𑌸𑌤𑌸𑍍𑌤𑌸𑍍𑌯 𑌪𑌿𑌤𑍃𑌪𑍈𑌤𑌾𑌮𑌹𑌂 𑌮𑌹𑌤𑍍 ।
𑌅𑌹𑌂 𑌸𑌰𑍍𑌵𑍇𑌷𑍁 𑌕𑌾𑌲𑍇𑌷𑍁 𑌪𑍍𑌰𑌣𑌤𑌃 𑌪𑍍𑌰𑍇𑌷𑍍𑌯𑌵𑌤𑍍 𑌸𑍍𑌥𑌿𑌤𑌃 ॥ 3 ॥
𑌮𑌾𑌯𑌾𑌵𑍀 𑌨𑌾𑌮 𑌤𑍇𑌜𑌸𑍍𑌵𑍀 𑌪𑍂𑌰𑍍𑌵𑌜𑍋 𑌦𑍁𑌂𑌦𑍁𑌭𑍇𑌃 𑌸𑍁𑌤𑌃 ।
𑌤𑍇𑌨 𑌤𑌸𑍍𑌯 𑌮𑌹𑌦𑍍𑌵𑍈𑌰𑌂 𑌸𑍍𑌤𑍍𑌰𑍀𑌕𑍃𑌤𑌂 𑌵𑌿𑌶𑍍𑌶𑍍𑌰𑍁𑌤𑌂 𑌪𑍁𑌰𑌾 ॥ 4 ॥
𑌸 𑌤𑍁 𑌸𑍁𑌪𑍍𑌤𑌜𑌨𑍇 𑌰𑌾𑌤𑍍𑌰𑍌 𑌕𑌿𑌷𑍍𑌕𑌿𑌂𑌧𑌾𑌦𑍍𑌵𑌾𑌰𑌮𑌾𑌗𑌤𑌃 ।
𑌨𑌰𑍍𑌦𑌤𑌿 𑌸𑍍𑌮 𑌸𑍁𑌸𑌂𑌰𑌬𑍍𑌧𑍋 𑌵𑌾𑌲𑌿𑌨𑌂 𑌚𑌾𑌹𑍍𑌵𑌯𑌦𑍍𑌰𑌣𑍇 ॥ 5 ॥
𑌪𑍍𑌰𑌸𑍁𑌪𑍍𑌤𑌸𑍍𑌤𑍁 𑌮𑌮 𑌭𑍍𑌰𑌾𑌤𑌾 𑌨𑌰𑍍𑌦𑌿𑌤𑌂 𑌭𑍈𑌰𑌵𑌸𑍍𑌵𑌨𑌮𑍍 ।
𑌶𑍍𑌰𑍁𑌤𑍍𑌵𑌾 𑌨 𑌮𑌮𑍃𑌷𑍇 𑌵𑌾𑌲𑍀 𑌨𑌿𑌷𑍍𑌪𑌪𑌾𑌤 𑌜𑌵𑌾𑌤𑍍𑌤𑌦𑌾 ॥ 6 ॥
𑌸 𑌤𑍁 𑌵𑍈 𑌨𑌿𑌸𑍍𑌸𑍃𑌤𑌃 𑌕𑍍𑌰𑍋𑌧𑌾𑌤𑍍𑌤𑌂 𑌹𑌂𑌤𑍁𑌮𑌸𑍁𑌰𑍋𑌤𑍍𑌤𑌮𑌮𑍍 ।
𑌵𑌾𑌰𑍍𑌯𑌮𑌾𑌣𑌸𑍍𑌤𑌤 𑌸𑍍𑌤𑍍𑌰𑍀𑌭𑌿𑌰𑍍𑌮𑌯𑌾 𑌚 𑌪𑍍𑌰𑌣𑌤𑌾𑌤𑍍𑌮𑌨𑌾 ॥ ॥
𑌸 𑌤𑍁 𑌨𑌿𑌰𑍍𑌧𑍂𑌯 𑌤𑌾𑌃 𑌸𑌰𑍍𑌵𑌾 𑌨𑌿𑌰𑍍𑌜𑌗𑌾𑌮 𑌮𑌹𑌾𑌬𑌲𑌃 ।
𑌤𑌤𑍋𑌽𑌹𑌮𑌪𑌿 𑌸𑍌𑌹𑌾𑌰𑍍𑌦𑌾𑌨𑍍𑌨𑌿𑌸𑍍𑌸𑍃𑌤𑍋 𑌵𑌾𑌲𑌿𑌨𑌾 𑌸𑌹 ॥ ॥
𑌸 𑌤𑍁 𑌮𑍇 𑌭𑍍𑌰𑌾𑌤𑌰𑌂 𑌦𑍃𑌷𑍍𑌟𑍍𑌵𑌾 𑌮𑌾𑌂 𑌚 𑌦𑍂𑌰𑌾𑌦𑌵𑌸𑍍𑌥𑌿𑌤𑌮𑍍 ।
𑌅𑌸𑍁𑌰𑍋 𑌜𑌾𑌤𑌸𑌂𑌤𑍍𑌰𑌾𑌸𑌃 𑌪𑍍𑌰𑌦𑍁𑌦𑍍𑌰𑌾𑌵 𑌤𑌤𑍋 𑌭𑍃𑌶𑌮𑍍 ॥ ॥
𑌤𑌸𑍍𑌮𑌿𑌨𑍍 𑌦𑍍𑌰𑌵𑌤𑌿 𑌸𑌂𑌤𑍍𑌰𑌸𑍍𑌤𑍇 𑌹𑍍𑌯𑌾𑌵𑌾𑌂 𑌦𑍍𑌰𑍁𑌤𑌤𑌰𑌂 𑌗𑌤𑍌 ।
𑌪𑍍𑌰𑌕𑌾𑌶𑌶𑍍𑌚 𑌕𑍃𑌤𑍋 𑌮𑌾𑌰𑍍𑌗𑌶𑍍𑌚𑌂𑌦𑍍𑌰𑍇𑌣𑍋𑌦𑍍𑌗𑌚𑍍𑌛𑌤𑌾 𑌤𑌦𑌾 ॥ 10 ॥
𑌸 𑌤𑍃𑌣𑍈𑌰𑌾𑌵𑍃𑌤𑌂 𑌦𑍁𑌰𑍍𑌗𑌂 𑌧𑌰𑌣𑍍𑌯𑌾 𑌵𑌿𑌵𑌰𑌂 𑌮𑌹𑌤𑍍 ।
𑌪𑍍𑌰𑌵𑌿𑌵𑍇𑌶𑌾𑌸𑍁𑌰𑍋 𑌵𑍇𑌗𑌾𑌦𑌾𑌵𑌾𑌮𑌾𑌸𑌾𑌦𑍍𑌯 𑌵𑌿𑌷𑍍𑌠𑌿𑌤𑍌 ॥ 11 ॥
𑌤𑌂 𑌪𑍍𑌰𑌵𑌿𑌷𑍍𑌟𑌂 𑌰𑌿𑌪𑍁𑌂 𑌦𑍃𑌷𑍍𑌟𑍍𑌵𑌾 𑌬𑌿𑌲𑌂 𑌰𑍋𑌷𑌵𑌶𑌂 𑌗𑌤𑌃 ।
𑌮𑌾𑌮𑍁𑌵𑌾𑌚 𑌤𑌦𑌾 𑌵𑌾𑌲𑍀 𑌵𑌚𑌨𑌂 𑌕𑍍𑌷𑍁𑌭𑌿𑌤𑍇𑌂𑌦𑍍𑌰𑌿𑌯𑌃 ॥ 12 ॥
𑌇𑌹 𑌤𑍍𑌵𑌂 𑌤𑌿𑌷𑍍𑌠 𑌸𑍁𑌗𑍍𑌰𑍀𑌵 𑌬𑌿𑌲𑌦𑍍𑌵𑌾𑌰𑌿 𑌸𑌮𑌾𑌹𑌿𑌤𑌃 ।
𑌯𑌾𑌵𑌤𑍍𑌤𑌤𑍍𑌰 𑌪𑍍𑌰𑌵𑌿𑌶𑍍𑌯𑌾𑌹𑌂 𑌨𑌿𑌹𑌨𑍍𑌮𑌿 𑌸𑌹𑌸𑌾 𑌰𑌿𑌪𑍁𑌮𑍍 ॥ 13 ॥
𑌮𑌯𑌾 𑌤𑍍𑌵𑍇𑌤𑌦𑍍𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌯𑌾𑌚𑌿𑌤𑌸𑍍𑌸 𑌪𑌰𑌂𑌤𑌪𑌃 ।
𑌶𑌾𑌪𑌯𑌿𑌤𑍍𑌵𑌾 𑌤𑍁 𑌮𑌾𑌂 𑌪𑌦𑍍𑌭𑍍𑌯𑌾𑌂 𑌪𑍍𑌰𑌵𑌿𑌵𑍇𑌶 𑌬𑌿𑌲𑌂 𑌮𑌹𑌤𑍍 ॥ 14 ॥
𑌤𑌸𑍍𑌯 𑌪𑍍𑌰𑌵𑌿𑌷𑍍𑌟𑌸𑍍𑌯 𑌬𑌿𑌲𑌂 𑌸𑌾𑌗𑍍𑌰𑌸𑍍𑌸𑌂𑌵𑌤𑍍𑌸𑌰𑍋 𑌗𑌤𑌃 ।
𑌸𑍍𑌥𑌿𑌤𑌸𑍍𑌯 𑌮𑌮 𑌬𑌿𑌲𑌦𑍍𑌵𑌾𑌰𑌿 𑌸 𑌕𑌾𑌲𑍋 𑌵𑍍𑌯𑌤𑍍𑌯𑌵𑌰𑍍𑌤𑌤 ॥ 15 ॥
𑌅𑌹𑌂 𑌤𑍁 𑌨𑌷𑍍𑌟𑌂 𑌜𑍍𑌞𑌾𑌤𑍍𑌵𑌾 𑌤𑌂 𑌸𑍍𑌨𑍇𑌹𑌾𑌦𑌾𑌗𑌤𑌸𑌂𑌭𑍍𑌰𑌮𑌃 ।
𑌭𑍍𑌰𑌾𑌤𑌰𑌂 𑌨 𑌚 𑌪𑌶𑍍𑌯𑌾𑌮𑌿 𑌪𑌾𑌪𑌾𑌶𑌂𑌕𑌿 𑌚 𑌮𑍇 𑌮𑌨𑌃 ॥ 16 ॥
𑌅𑌥 𑌦𑍀𑌰𑍍𑌘𑌸𑍍𑌯 𑌕𑌾𑌲𑌸𑍍𑌯 𑌬𑌿𑌲𑌾𑌤𑍍𑌤𑌸𑍍𑌮𑌾𑌦𑍍𑌵𑌿𑌨𑌿𑌸𑍍𑌸𑍃𑌤𑌮𑍍 ।
𑌸𑌫𑍇𑌨𑌂 𑌰𑍁𑌧𑌿𑌰𑌂 𑌰𑌕𑍍𑌤𑌮𑌹𑌂 𑌦𑍃𑌷𑍍𑌟𑍍𑌵𑌾 𑌸𑍁𑌦𑍁𑌃𑌖𑌿𑌤𑌃 ॥ 1 ॥
𑌨𑌰𑍍𑌦𑌤𑌾𑌮𑌸𑍁𑌰𑌾𑌣𑌾𑌂 𑌚 𑌧𑍍𑌵𑌨𑌿𑌰𑍍𑌮𑍇 𑌶𑍍𑌰𑍋𑌤𑍍𑌰𑌮𑌾𑌗𑌤𑌃 ।
𑌨𑌿𑌰𑌸𑍍𑌤𑌸𑍍𑌯 𑌚 𑌸𑌂𑌗𑍍𑌰𑌾𑌮𑍇 𑌕𑍍𑌰𑍋𑌶𑌤𑍋𑌨𑌿𑌸𑍍𑌸𑍍𑌵𑌨𑍋 𑌗𑍁𑌰𑍋𑌃 ॥ 1 ॥
𑌅𑌹𑌂 𑌤𑍍𑌵𑌵𑌗𑌤𑍋 𑌬𑍁𑌦𑍍𑌧𑍍𑌯𑌾 𑌚𑌿𑌹𑍍𑌨𑍈𑌸𑍍𑌤𑍈𑌰𑍍𑌭𑍍𑌰𑌾𑌤𑌰𑌂 𑌹𑌤𑌮𑍍 ।
𑌪𑌿𑌧𑌾𑌯 𑌚 𑌬𑌿𑌲𑌦𑍍𑌵𑌾𑌰𑌂 𑌶𑌿𑌲𑌯𑌾 𑌗𑌿𑌰𑌿𑌮𑌾𑌤𑍍𑌰𑌯𑌾 ॥ 1 ॥
𑌶𑍋𑌕𑌾𑌰𑍍𑌤𑌶𑍍𑌚𑍋𑌦𑌕𑌂 𑌕𑍃𑌤𑍍𑌵𑌾 𑌕𑌿𑌷𑍍𑌕𑌿𑌂𑌧𑌾𑌮𑌾𑌗𑌤𑌸𑍍𑌸𑌖𑍇 ।
𑌗𑍂𑌹𑌮𑌾𑌨𑌸𑍍𑌯 𑌮𑍇 𑌤𑌤𑍍𑌤𑍍𑌵𑌂 𑌯𑌤𑍍𑌨𑌤𑍋 𑌮𑌂𑌤𑍍𑌰𑌿𑌭𑌿𑌶𑍍𑌶𑍍𑌰𑍁𑌤𑌮𑍍 ॥ 20 ॥
𑌤𑌤𑍋𑌽𑌹𑌂 𑌤𑍈𑌸𑍍𑌸𑌮𑌾𑌗𑌮𑍍𑌯 𑌸𑌮𑍍𑌮𑌤𑍈𑌰𑌭𑌿𑌷𑍇𑌚𑌿𑌤𑌃 ।
𑌰𑌾𑌜𑍍𑌯𑌂 𑌪𑍍𑌰𑌶𑌾𑌸𑌤𑌸𑍍𑌤𑌸𑍍𑌯 𑌨𑍍𑌯𑌾𑌯𑌤𑍋 𑌮𑌮 𑌰𑌾𑌘𑌵 ॥ 21 ॥
𑌆𑌜𑌗𑌾𑌮 𑌰𑌿𑌪𑍁𑌂 𑌹𑌤𑍍𑌵𑌾 𑌵𑌾𑌲𑍀 𑌤𑌮𑌸𑍁𑌰𑍋𑌤𑍍𑌤𑌮𑌮𑍍 ।
𑌅𑌭𑌿𑌷𑌿𑌕𑍍𑌤𑌂 𑌤𑍁 𑌮𑌾𑌂 𑌦𑍃𑌷𑍍𑌟𑍍𑌵𑌾 𑌵𑌾𑌲𑍀 𑌸𑌂𑌰𑌕𑍍𑌤𑌲𑍋𑌚𑌨𑌃 ।
𑌮𑌦𑍀𑌯𑌾𑌨𑍍𑌮𑌂𑌤𑍍𑌰𑌿𑌣𑍋 𑌬𑌦𑍍𑌧𑍍𑌵𑌾 𑌪𑌰𑍁𑌷𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 22 ॥
𑌨𑌿𑌗𑍍𑌰𑌹𑍇𑌽𑌪𑌿 𑌸𑌮𑌰𑍍𑌥𑌸𑍍𑌯 𑌤𑌂 𑌪𑌾𑌪𑌂 𑌪𑍍𑌰𑌤𑌿 𑌰𑌾𑌘𑌵 ।
𑌨 𑌪𑍍𑌰𑌾𑌵𑌰𑍍𑌤𑌤 𑌮𑍇 𑌬𑍁𑌦𑍍𑌧𑌿𑌰𑍍𑌭𑍍𑌰𑌾𑌤𑍁𑌰𑍍𑌗𑍌𑌰𑌵𑌯𑌂𑌤𑍍𑌰𑌿𑌤𑌾 ॥ 23 ॥
𑌹𑌤𑍍𑌵𑌾 𑌶𑌤𑍍𑌰𑍁𑌂 𑌸 𑌮𑍇 𑌭𑍍𑌰𑌾𑌤𑌾 𑌪𑍍𑌰𑌵𑌿𑌵𑍇𑌶 𑌪𑍁𑌰𑌂 𑌤𑌦𑌾 ॥ 24 ॥
𑌮𑌾𑌨𑌯𑌂𑌸𑍍𑌤𑌂 𑌮𑌹𑌾𑌤𑍍𑌮𑌾𑌨𑌂 𑌯𑌥𑌾𑌵𑌚𑍍𑌚𑌾𑌭𑍍𑌯𑌵𑌾𑌦𑌯𑌮𑍍 ।
𑌉𑌕𑍍𑌤𑌾𑌶𑍍𑌚 𑌨𑌾𑌶𑌿𑌷𑌸𑍍𑌤𑍇𑌨 𑌸𑌂𑌤𑍁𑌷𑍍𑌟𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 25 ॥
𑌨𑌤𑍍𑌵𑌾 𑌪𑌾𑌦𑌾𑌵𑌹𑌂 𑌤𑌸𑍍𑌯 𑌮𑌕𑍁𑌟𑍇𑌨𑌾𑌸𑍍𑌪𑍃𑌶𑌂 𑌪𑍍𑌰𑌭𑍋 𑌅𑌪𑌿 𑌵𑌾𑌲𑍀 𑌮𑌮 𑌕𑍍𑌰𑍋𑌧𑌾𑌨𑍍𑌨 𑌪𑍍𑌰𑌸𑌾𑌦𑌂 𑌚𑌕𑌾𑌰 𑌸𑌃 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌨𑌵𑌮𑌸𑍍𑌸𑌰𑍍𑌗𑌃 ॥
