𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌥𑌾 𑌬𑍍𑌰𑍁𑌵𑌾𑌣𑌂 𑌸𑍌𑌮𑌿𑌤𑍍𑌰𑌿𑌂 𑌪𑍍𑌰𑌦𑍀𑌪𑍍𑌤𑌮𑌿𑌵 𑌤𑍇𑌜𑌸𑌾 ।
𑌅𑌬𑍍𑌰𑌵𑍀𑌲𑍍𑌲𑌕𑍍𑌷𑍍𑌮𑌣𑌂 𑌤𑌾𑌰𑌾 𑌤𑌾𑌰𑌾𑌧𑌿𑌪𑌨𑌿𑌭𑌾𑌨𑌨𑌾 ॥ 1 ॥
𑌨𑍈𑌵𑌂 𑌲𑌕𑍍𑌷𑍍𑌮𑌣 𑌵𑌕𑍍𑌤𑌵𑍍𑌯𑍋 𑌨𑌾𑌯𑌂 𑌪𑌰𑍁𑌷𑌮𑌰𑍍𑌹𑌤𑌿 ।
𑌹𑌰𑍀𑌣𑌾𑌮𑍀𑌶𑍍𑌵𑌰𑌶𑍍𑌶𑍍𑌰𑍋𑌤𑍁𑌂 𑌤𑌵 𑌵𑌕𑍍𑌤𑍍𑌰𑌾𑌦𑍍𑌵𑌿𑌶𑍇𑌷𑌤𑌃 ॥ 2 ॥
𑌨𑍈𑌵𑌾𑌕𑍃𑌤𑌜𑍍𑌞𑌸𑍍𑌸𑍁𑌗𑍍𑌰𑍀𑌵𑍋 𑌨 𑌶𑌠𑍋 𑌨𑌾𑌪𑌿 𑌦𑌾𑌰𑍁𑌣𑌃 ।
𑌨𑍈𑌵𑌾𑌨𑍃𑌤𑌕𑌥𑍋 𑌵𑍀𑌰 𑌨 𑌜𑌿𑌹𑍍𑌮𑌶𑍍𑌚 𑌕𑌪𑍀𑌶𑍍𑌵𑌰𑌃 ॥ 3 ॥
𑌉𑌪𑌕𑌾𑌰𑌂 𑌕𑍃𑌤𑌂 𑌵𑍀𑌰𑍋 𑌨𑌾𑌪𑍍𑌯𑌯𑌂 𑌵𑌿𑌸𑍍𑌮𑍃𑌤𑌃 𑌕𑌪𑌿𑌃 ।
𑌰𑌾𑌮𑍇𑌣 𑌵𑍀𑌰 𑌸𑍁𑌗𑍍𑌰𑍀𑌵𑍋 𑌯𑌦𑌨𑍍𑌯𑍈𑌰𑍍𑌦𑍁𑌷𑍍𑌕𑌰𑌂 𑌰𑌣𑍇 ॥ 4 ॥
𑌰𑌾𑌮𑌪𑍍𑌰𑌸𑌾𑌦𑌾𑌤𑍍𑌕𑍀𑌰𑍍𑌤𑌿𑌂𑌚 𑌕𑌪𑌿𑌰𑌾𑌜𑍍𑌯𑌂 𑌚 𑌶𑌾𑌶𑍍𑌵𑌤𑌮𑍍 ।
𑌪𑍍𑌰𑌾𑌪𑍍𑌤𑌵𑌾𑌨𑌿𑌹 𑌸𑍁𑌗𑍍𑌰𑍀𑌵𑍋 𑌰𑍁𑌮𑌾𑌂 𑌮𑌾𑌂 𑌚 𑌪𑌰𑌂𑌤𑌪 ॥ 5 ॥
𑌸𑍁𑌦𑍁𑌃𑌖𑌂 𑌶𑌯𑌿𑌤𑌃 𑌪𑍂𑌰𑍍𑌵𑌂 𑌪𑍍𑌰𑌾𑌪𑍍𑌯𑍇𑌦𑌂 𑌸𑍁𑌖𑌮𑍁𑌤𑍍𑌤𑌮𑌮𑍍 ।
𑌪𑍍𑌰𑌾𑌪𑍍𑌤𑌕𑌾𑌲𑌂 𑌨 𑌜𑌾𑌨𑍀𑌤𑍇 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌯𑌥𑌾 𑌮𑍁𑌨𑌿𑌃 ॥ 6 ॥
𑌘𑍃𑌤𑌾𑌚𑍍𑌯𑌾𑌂 𑌕𑌿𑌲 𑌸𑌂𑌸𑌕𑍍𑌤𑍋 𑌦𑌶𑌵𑌰𑍍𑌷𑌾𑌣𑌿 𑌲𑌕𑍍𑌷𑍍𑌮𑌣 ।
𑌅𑌹𑍋𑌽𑌮𑌨𑍍𑌯𑌤 𑌧𑌰𑍍𑌮𑌾𑌤𑍍𑌮𑌾 𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌮𑍁𑌨𑌿𑌃 ॥ ॥
𑌸 𑌹𑌿 𑌪𑍍𑌰𑌾𑌪𑍍𑌤𑌂 𑌨 𑌜𑌾𑌨𑍀𑌤𑍇 𑌕𑌾𑌲𑌂 𑌕𑌾𑌲𑌵𑌿𑌦𑌾𑌂 𑌵𑌰𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌮𑌹𑌾𑌤𑍇𑌜𑌾𑌃 𑌕𑌿𑌂 𑌪𑍁𑌨𑌰𑍍𑌯𑌃 𑌪𑍃𑌥𑌗𑍍𑌜𑌨𑌃 ॥ ॥
𑌦𑍇𑌹𑌧𑌰𑍍𑌮𑌂 𑌗𑌤𑌸𑍍𑌯𑌾𑌸𑍍𑌯 𑌪𑌰𑌿𑌶𑍍𑌰𑌾𑌂𑌤𑌸𑍍𑌯 𑌲𑌕𑍍𑌷𑍍𑌮𑌣 ।
𑌅𑌵𑌿𑌤𑍃𑌪𑍍𑌤𑌸𑍍𑌯 𑌕𑌾𑌮𑍇𑌷𑍁 𑌕𑌾𑌮𑌂 𑌕𑍍𑌷𑌂𑌤𑍁𑌮𑌿𑌹𑌾𑌰𑍍𑌹𑌸𑌿 ॥ ॥
𑌨 𑌚 𑌰𑍋𑌷𑌵𑌶𑌂 𑌤𑌾𑌤 𑌗𑌂𑌤𑍁𑌮𑌰𑍍𑌹𑌸𑌿 𑌲𑌕𑍍𑌷𑍍𑌮𑌣 ।
𑌨𑌿𑌶𑍍𑌚𑌯𑌾𑌰𑍍𑌥𑌮𑌵𑌿𑌜𑍍𑌞𑌾𑌯 𑌸𑌹𑌸𑌾 𑌪𑍍𑌰𑌾𑌕𑍃𑌤𑍋 𑌯𑌥𑌾 ॥ 10 ॥
𑌸𑌤𑍍𑌤𑍍𑌵𑌯𑍁𑌕𑍍𑌤𑌾 𑌹𑌿 𑌪𑍁𑌰𑍁𑌷𑌾𑌸𑍍𑌤𑍍𑌵𑌦𑍍𑌵𑌿𑌧𑌾𑌃 𑌪𑍁𑌰𑍁𑌷𑌰𑍍𑌷𑌭 ।
𑌅𑌵𑌿𑌮𑍃𑌶𑍍𑌯 𑌨 𑌰𑍋𑌷𑌸𑍍𑌯 𑌸𑌹𑌸𑌾 𑌯𑌾𑌂𑌤𑌿 𑌵𑌶𑍍𑌯𑌤𑌾𑌮𑍍 ॥ 11 ॥
𑌪𑍍𑌰𑌸𑌾𑌦𑌯𑍇 𑌤𑍍𑌵𑌾𑌂 𑌧𑌰𑍍𑌮𑌜𑍍𑌞 𑌸𑍁𑌗𑍍𑌰𑍀𑌵𑌾𑌰𑍍𑌥𑍇 𑌸𑌮𑌾𑌹𑌿𑌤𑌾 ।
𑌮𑌹𑌾𑌨𑍍𑌰𑍋𑌷𑌸𑌮𑍁𑌤𑍍𑌪𑌨𑍍𑌨 𑌸𑍍𑌸𑌂𑌰𑌂𑌭𑌸𑍍𑌤𑍍𑌯𑌜𑍍𑌯𑌤𑌾𑌮𑌯𑌮𑍍 ॥ 12 ॥
𑌰𑍁𑌮𑌾𑌂 𑌮𑌾𑌂 𑌕𑌪𑌿 𑌰𑌾𑌜𑍍𑌯𑌂 𑌚 𑌧𑌨𑌧𑌾𑌨𑍍𑌯𑌵𑌸𑍂𑌨𑌿 𑌚 ।
𑌰𑌾𑌮𑌪𑍍𑌰𑌿𑌯𑌾𑌰𑍍𑌥𑌂 𑌸𑍁𑌗𑍍𑌰𑍀𑌵𑌸𑍍𑌤𑍍𑌯𑌜𑍇𑌦𑌿𑌤𑌿 𑌮𑌤𑌿𑌰𑍍𑌮𑌮 ॥ 13 ॥
𑌸𑌮𑌾𑌨𑍇𑌷𑍍𑌯𑌤𑌿 𑌸𑍁𑌗𑍍𑌰𑍀𑌵 𑌸𑍍𑌸𑍀𑌤𑌯𑌾 𑌸𑌹 𑌰𑌾𑌘𑌵𑌮𑍍 ।
𑌶𑌶𑌾𑌂𑌕𑌮𑌿𑌵 𑌰𑍋𑌹𑌿𑌣𑍍𑌯𑌾 𑌨𑌿𑌹𑌤𑍍𑌵𑌾 𑌰𑌾𑌵𑌣𑌂 𑌰𑌣𑍇 ॥ 14 ॥
𑌶𑌤𑌕𑍋𑌟𑌿𑌸𑌹𑌸𑍍𑌰𑌾𑌣𑌿 𑌲𑌂𑌕𑌾𑌯𑌾𑌂 𑌕𑌿𑌲 𑌰𑌾𑌕𑍍𑌷𑌸𑌾𑌃 ।
𑌆𑌯𑍁𑌤𑌾𑌨𑌿 𑌚 𑌷𑌟𑍍𑌤𑍍𑌰𑌿𑌂𑌶𑌤𑍍𑌸𑌹𑌸𑍍𑌰𑌾𑌣𑌿 𑌶𑌤𑌾𑌨𑌿 𑌚 ॥ 15 ॥
𑌅𑌹𑌤𑍍𑌵𑌾 𑌤𑌾𑌂𑌶𑍍𑌚 𑌦𑍁𑌰𑍍𑌧𑌰𑍍𑌷𑌾𑌨𑍍𑌰𑌾𑌕𑍍𑌷𑌸𑌾𑌨𑍍𑌕𑌾𑌮𑌰𑍂𑌪𑌿𑌣𑌃 ।
𑌨 𑌶𑌕𑍍𑌯𑍋 𑌰𑌾𑌵𑌣𑍋 𑌹𑌂𑌤𑍁𑌂 𑌯𑍇𑌨 𑌸𑌾 𑌮𑍈𑌥𑌿𑌲𑍀 𑌹𑍃𑌤𑌾 ॥ 16 ॥
𑌤𑍇 𑌨 𑌶𑌕𑍍𑌯𑌾 𑌰𑌣𑍇 𑌹𑌂𑌤𑍁𑌮𑌸𑌹𑌾𑌯𑍇𑌨 𑌲𑌕𑍍𑌷𑍍𑌮𑌣 ।
𑌰𑌾𑌵𑌣𑌃 𑌕𑍍𑌰𑍂𑌰𑌕𑌰𑍍𑌮𑌾 𑌚 𑌸𑍁𑌗𑍍𑌰𑍀𑌵𑍇𑌣 𑌵𑌿𑌶𑍇𑌷𑌤𑌃 ॥ 1 ॥
𑌏𑌵𑌮𑌾𑌖𑍍𑌯𑌾𑌤𑌵𑌾𑌨𑍍𑌵𑌾𑌲𑍀 𑌸 𑌹𑍍𑌯𑌭𑌿𑌜𑍍𑌞𑍋 𑌹𑌰𑍀𑌶𑍍𑌵𑌰𑌃 ।
𑌆𑌗𑌮𑌸𑍍𑌤𑍁 𑌨 𑌮𑍇 𑌵𑍍𑌯𑌕𑍍𑌤𑌶𑍍𑌶𑍍𑌰𑌵𑌾𑌤𑍍𑌤𑌸𑍍𑌮𑌾𑌦𑍍𑌬𑍍𑌰𑌵𑍀𑌮𑍍𑌯𑌹𑌮𑍍 ॥ 1 ॥
𑌤𑍍𑌵𑌤𑍍𑌸𑌹𑌾𑌯𑌨𑌿𑌮𑌿𑌤𑍍𑌤𑌂 𑌵𑍈 𑌪𑍍𑌰𑍇𑌷𑌿𑌤𑌾 𑌹𑌰𑌿𑌪𑍁𑌂𑌗𑌵𑌾𑌃 ।
𑌆𑌨𑍇𑌤𑍁𑌂 𑌵𑌾𑌨𑌰𑌾𑌨𑍍𑌯𑍁𑌦𑍍𑌧𑍇 𑌸𑍁𑌬𑌹𑍂𑌨𑍍𑌹𑌰𑌿𑌯𑍂𑌧𑌪𑌾𑌨𑍍 ॥ 1 ॥
𑌤𑌾𑌂𑌶𑍍𑌚 𑌪𑍍𑌰𑌤𑍀𑌕𑍍𑌷𑌮𑌾𑌣𑍋𑌽𑌯𑌂 𑌵𑌿𑌕𑍍𑌰𑌾𑌂𑌤𑌾𑌤𑍍𑌸𑍁𑌮𑌹𑌾𑌬𑌲𑌾𑌨𑍍 ।
𑌰𑌾𑌘𑌵𑌸𑍍𑌯𑌾𑌰𑍍𑌥𑌸𑌿𑌧𑍍𑌯𑌰𑍍𑌥𑌂 𑌨 𑌨𑌿𑌰𑍍𑌯𑌾𑌤𑌿 𑌹𑌰𑍀𑌶𑍍𑌵𑌰𑌃 ॥ 20 ॥
𑌕𑍃𑌤𑌾 𑌤𑍁 𑌸𑌂𑌸𑍍𑌥𑌾 𑌸𑍌𑌮𑌿𑌤𑍍𑌰𑍇 𑌸𑍁𑌗𑍍𑌰𑍀𑌵𑍇𑌣 𑌪𑍁𑌰𑌾 𑌯𑌥𑌾 ।
𑌅𑌦𑍍𑌯 𑌤𑍈𑌰𑍍𑌵𑌾𑌨𑌰𑍈𑌸𑍍𑌸𑌰𑍍𑌵𑍈𑌰𑌾𑌗𑌂𑌤𑌵𑍍𑌯𑌂 𑌮𑌹𑌾𑌬𑌲𑍈𑌃 ॥ 21 ॥
𑌋𑌕𑍍𑌷𑌕𑍋𑌟𑌿𑌸𑌹𑌸𑍍𑌰𑌾𑌣𑌿 𑌗𑍋𑌲𑌾𑌂𑌗𑍂𑌲𑌶𑌤𑌾𑌨𑌿 𑌚 ।
𑌅𑌦𑍍𑌯 𑌤𑍍𑌵𑌾𑌮𑍁𑌪𑌯𑌾𑌸𑍍𑌯𑌂𑌤𑌿 𑌜𑌹𑌿 𑌕𑍋𑌪𑌮𑌰𑌿𑌂𑌦𑌮 ।
𑌕𑍋𑌟𑍍𑌯𑍋𑌽𑌨𑍇𑌕𑌾𑌸𑍍𑌤𑍁 𑌕𑌾𑌕𑍁𑌤𑍍𑌸𑍍𑌥 𑌕𑌪𑍀𑌨𑌾𑌂 𑌦𑍀𑌪𑍍𑌤𑌤𑍇𑌜𑌸𑌾𑌮𑍍 ॥ 22 ॥
𑌤𑌵 𑌹𑌿 𑌮𑍁𑌖𑌮𑌿𑌦𑌂 𑌨𑌿𑌰𑍀𑌕𑍍𑌷𑍍𑌯 𑌕𑍋𑌪𑌾𑌤𑍍 𑌕𑍍𑌷𑌤𑌜𑌨𑌿𑌭𑍇 𑌨𑌯𑌨𑍇 𑌨𑌿𑌰𑍀𑌕𑍍𑌷𑌮𑌾𑌣𑌾𑌃 ।
𑌹𑌰𑌿𑌵𑌰𑌵𑌨𑌿𑌤𑌾 𑌨 𑌯𑌾𑌂𑌤𑌿 𑌶𑌾𑌂𑌤𑌿𑌂 𑌪𑍍𑌰𑌥𑌮𑌭𑌯𑌸𑍍𑌯 𑌹𑌿 𑌶𑌂𑌕𑌿𑌤𑌾𑌸𑍍𑌤𑍁 𑌸𑌰𑍍𑌵𑌾𑌃 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑌂𑌚𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
