𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ।

𑌤𑌤𑍋 𑌰𑌾𑌵𑌣𑌨𑍀𑌤𑌾𑌯𑌾𑌃 𑌸𑍀𑌤𑌾𑌯𑌾𑌃 𑌶𑌤𑍍𑌰𑍁𑌕𑌰𑍍𑌶𑌨𑌃 ।
𑌇𑌯𑍇𑌷 𑌪𑌦𑌮𑌨𑍍𑌵𑍇𑌷𑍍𑌟𑍁𑌂 𑌚𑌾𑌰𑌣𑌾𑌚𑌰𑌿𑌤𑍇 𑌪𑌥𑌿 ॥ 1 ॥

𑌦𑍁𑌷𑍍𑌕𑌰𑌂 𑌨𑌿𑌷𑍍𑌪𑍍𑌰𑌤𑌿𑌦𑍍𑌵𑌂𑌦𑍍𑌵𑌂 𑌚𑌿𑌕𑍀𑌰𑍍𑌷𑌨𑍍 𑌕𑌰𑍍𑌮 𑌵𑌾𑌨𑌰𑌃 ।
𑌸𑌮𑍁𑌦𑌗𑍍𑌰𑌶𑌿𑌰𑍋𑌗𑍍𑌰𑍀𑌵𑍋 𑌗𑌵𑌾𑌂𑌪𑌤𑌿𑌰𑌿𑌵𑌾𑌬𑌭𑍌 ॥ 2 ॥

𑌅𑌥 𑌵𑍈𑌡𑍂𑌰𑍍𑌯𑌵𑌰𑍍𑌣𑍇𑌷𑍁 𑌶𑌾𑌦𑍍𑌵𑌲𑍇𑌷𑍁 𑌮𑌹𑌾𑌬𑌲𑌃 ।
𑌧𑍀𑌰𑌃 𑌸𑌲𑌿𑌲𑌕𑌲𑍍𑌪𑍇𑌷𑍁 𑌵𑌿𑌚𑌚𑌾𑌰 𑌯𑌥𑌾𑌸𑍁𑌖𑌮𑍍 ॥ 3 ॥

𑌦𑍍𑌵𑌿𑌜𑌾𑌨𑍍 𑌵𑌿𑌤𑍍𑌰𑌾𑌸𑌯𑌨𑍍 𑌧𑍀𑌮𑌾𑌨𑍁𑌰𑌸𑌾 𑌪𑌾𑌦𑌪𑌾𑌨𑍍 𑌹𑌰𑌨𑍍 ।
𑌮𑍃𑌗𑌾𑌂𑌶𑍍𑌚 𑌸𑍁𑌬𑌹𑍂𑌨𑍍𑌨𑌿𑌘𑍍𑌨𑌨𑍍 𑌪𑍍𑌰𑌵𑍃𑌦𑍍𑌧 𑌇𑌵 𑌕𑍇𑌸𑌰𑍀 ॥ 4 ॥

𑌨𑍀𑌲𑌲𑍋𑌹𑌿𑌤𑌮𑌾𑌂𑌜𑌿𑌷𑍍𑌠𑌪𑌤𑍍𑌰𑌵𑌰𑍍𑌣𑍈𑌃 𑌸𑌿𑌤𑌾𑌸𑌿𑌤𑍈𑌃 ।
𑌸𑍍𑌵𑌭𑌾𑌵𑌵𑌿𑌹𑌿𑌤𑍈𑌶𑍍𑌚𑌿𑌤𑍍𑌰𑍈𑌰𑍍𑌧𑌾𑌤𑍁𑌭𑌿𑌃 𑌸𑌮𑌲𑌂𑌕𑍃𑌤𑌮𑍍 ॥ 5 ॥

𑌕𑌾𑌮𑌰𑍂𑌪𑌿𑌭𑌿𑌰𑌾𑌵𑌿𑌷𑍍𑌟𑌮𑌭𑍀𑌕𑍍𑌷𑍍𑌣𑌂 𑌸𑌪𑌰𑌿𑌚𑍍𑌛𑌦𑍈𑌃 ।
𑌯𑌕𑍍𑌷𑌕𑌿𑌨𑍍𑌨𑌰𑌗𑌂𑌧𑌰𑍍𑌵𑍈𑌰𑍍𑌦𑍇𑌵𑌕𑌲𑍍𑌪𑍈𑌶𑍍𑌚 𑌪𑌨𑍍𑌨𑌗𑍈𑌃 ॥ 6 ॥

𑌸 𑌤𑌸𑍍𑌯 𑌗𑌿𑌰𑌿𑌵𑌰𑍍𑌯𑌸𑍍𑌯 𑌤𑌲𑍇 𑌨𑌾𑌗𑌵𑌰𑌾𑌯𑍁𑌤𑍇 ।
𑌤𑌿𑌷𑍍𑌠𑌨𑍍 𑌕𑌪𑌿𑌵𑌰𑌸𑍍𑌤𑌤𑍍𑌰 𑌹𑍍𑌰𑌦𑍇 𑌨𑌾𑌗 𑌇𑌵𑌾𑌬𑌭𑍌 ॥ 𑍭 ॥

𑌸 𑌸𑍂𑌰𑍍𑌯𑌾𑌯 𑌮𑌹𑍇𑌂𑌦𑍍𑌰𑌾𑌯 𑌪𑌵𑌨𑌾𑌯 𑌸𑍍𑌵𑌯𑌂𑌭𑍁𑌵𑍇 ।
𑌭𑍂𑌤𑍇𑌭𑍍𑌯𑌶𑍍𑌚𑌾𑌂𑌜𑌲𑌿𑌂 𑌕𑍃𑌤𑍍𑌵𑌾 𑌚𑌕𑌾𑌰 𑌗𑌮𑌨𑍇 𑌮𑌤𑌿𑌮𑍍 ॥ 𑍮 ॥

𑌅𑌂𑌜𑌲𑌿𑌂 𑌪𑍍𑌰𑌾𑌙𑍍𑌮𑍁𑌖𑌃 𑌕𑍁𑌰𑍍𑌵𑌨𑍍 𑌪𑌵𑌨𑌾𑌯𑌾𑌤𑍍𑌮𑌯𑍋𑌨𑌯𑍇 ।
𑌤𑌤𑍋 𑌹𑌿 𑌵𑌵𑍃𑌧𑍇 𑌗𑌂𑌤𑍁𑌂 𑌦𑌕𑍍𑌷𑌿𑌣𑍋 𑌦𑌕𑍍𑌷𑌿𑌣𑌾𑌂 𑌦𑌿𑌶𑌮𑍍 ॥ 𑍯 ॥

𑌪𑍍𑌲𑌵𑌂𑌗𑌪𑍍𑌰𑌵𑌰𑍈𑌰𑍍𑌦𑍃𑌷𑍍𑌟𑌃 𑌪𑍍𑌲𑌵𑌨𑍇 𑌕𑍃𑌤𑌨𑌿𑌶𑍍𑌚𑌯𑌃 ।
𑌵𑌵𑍃𑌧𑍇 𑌰𑌾𑌮𑌵𑍃𑌦𑍍𑌧𑍍𑌯𑌰𑍍𑌥𑌂 𑌸𑌮𑍁𑌦𑍍𑌰 𑌇𑌵 𑌪𑌰𑍍𑌵𑌸𑍁 ॥ 10 ॥

𑌨𑌿𑌷𑍍𑌪𑍍𑌰𑌮𑌾𑌣𑌶𑌰𑍀𑌰𑌃 𑌸𑌨𑍍 𑌲𑌿𑌲𑌂𑌘𑌯𑌿𑌷𑍁𑌰𑌰𑍍𑌣𑌵𑌮𑍍 ।
𑌬𑌾𑌹𑍁𑌭𑍍𑌯𑌾𑌂 𑌪𑍀𑌡𑌯𑌾𑌮𑌾𑌸 𑌚𑌰𑌣𑌾𑌭𑍍𑌯𑌾𑌂 𑌚 𑌪𑌰𑍍𑌵𑌤𑌮𑍍 ॥ 11 ॥

𑌸 𑌚𑌚𑌾𑌲𑌾𑌚𑌲𑌶𑍍𑌚𑌾𑌪𑌿 𑌮𑍁𑌹𑍂𑌰𑍍𑌤𑌂 𑌕𑌪𑌿𑌪𑍀𑌡𑌿𑌤𑌃 ।
𑌤𑌰𑍂𑌣𑌾𑌂 𑌪𑍁𑌷𑍍𑌪𑌿𑌤𑌾𑌗𑍍𑌰𑌾𑌣𑌾𑌂 𑌸𑌰𑍍𑌵𑌂 𑌪𑍁𑌷𑍍𑌪𑌮𑌶𑌾𑌤𑌯𑌤𑍍 ॥ 12 ॥

𑌤𑍇𑌨 𑌪𑌾𑌦𑌪𑌮𑍁𑌕𑍍𑌤𑍇𑌨 𑌪𑍁𑌷𑍍𑌪𑍌𑌘𑍇𑌣 𑌸𑍁𑌗𑌂𑌧𑌿𑌨𑌾 ।
𑌸𑌰𑍍𑌵𑌤𑌃 𑌸𑌂𑌵𑍃𑌤𑌃 𑌶𑍈𑌲𑍋 𑌬𑌭𑍌 𑌪𑍁𑌷𑍍𑌪𑌮𑌯𑍋 𑌯𑌥𑌾 ॥ 13 ॥

𑌤𑍇𑌨 𑌚𑍋𑌤𑍍𑌤𑌮𑌵𑍀𑌰𑍍𑌯𑍇𑌣 𑌪𑍀𑌡𑍍𑌯𑌮𑌾𑌨𑌃 𑌸 𑌪𑌰𑍍𑌵𑌤𑌃 ।
𑌸𑌲𑌿𑌲𑌂 𑌸𑌂𑌪𑍍𑌰𑌸𑍁𑌸𑍍𑌰𑌾𑌵 𑌮𑌦𑌂 𑌮𑌤𑍍𑌤 𑌇𑌵 𑌦𑍍𑌵𑌿𑌪𑌃 ॥ 14 ॥

𑌪𑍀𑌡𑍍𑌯𑌮𑌾𑌨𑌸𑍍𑌤𑍁 𑌬𑌲𑌿𑌨𑌾 𑌮𑌹𑍇𑌂𑌦𑍍𑌰𑌸𑍍𑌤𑍇𑌨 𑌪𑌰𑍍𑌵𑌤𑌃 ।
𑌰𑍀𑌤𑍀𑌰𑍍𑌨𑌿𑌰𑍍𑌵𑌰𑍍𑌤𑌯𑌾𑌮𑌾𑌸 𑌕𑌾𑌂𑌚𑌨𑌾𑌂𑌜𑌨𑌰𑌾𑌜𑌤𑍀𑌃 ॥ 15 ॥

𑌮𑍁𑌮𑍋𑌚 𑌚 𑌶𑌿𑌲𑌾𑌃 𑌶𑍈𑌲𑍋 𑌵𑌿𑌶𑌾𑌲𑌾𑌃 𑌸𑌮𑌨𑌃𑌶𑌿𑌲𑌾𑌃 ।
𑌮𑌧𑍍𑌯𑌮𑍇𑌨𑌾𑌰𑍍𑌚𑌿𑌷𑌾 𑌜𑍁𑌷𑍍𑌟𑌾 𑌧𑍂𑌮𑌰𑌾𑌜𑍀𑌰𑌿𑌵𑌾𑌨𑌲𑌃 ॥ 16 ॥

𑌗𑌿𑌰𑌿𑌣𑌾 𑌪𑍀𑌡𑍍𑌯𑌮𑌾𑌨𑍇𑌨 𑌪𑍀𑌡𑍍𑌯𑌮𑌾𑌨𑌾𑌨𑌿 𑌸𑌰𑍍𑌵𑌤𑌃 ।
𑌗𑍁𑌹𑌾𑌵𑌿𑌷𑍍𑌟𑌾𑌨𑌿 𑌭𑍂𑌤𑌾𑌨𑌿 𑌵𑌿𑌨𑍇𑌦𑍁𑌰𑍍𑌵𑌿𑌕𑍃𑌤𑍈𑌃 𑌸𑍍𑌵𑌰𑍈𑌃 ॥ 1𑍭 ॥

𑌸 𑌮𑌹𑌾𑌸𑌤𑍍𑌤𑍍𑌵𑌸𑌨𑍍𑌨𑌾𑌦𑌃 𑌶𑍈𑌲𑌪𑍀𑌡𑌾𑌨𑌿𑌮𑌿𑌤𑍍𑌤𑌜𑌃 ।
𑌪𑍃𑌥𑌿𑌵𑍀𑌂 𑌪𑍂𑌰𑌯𑌾𑌮𑌾𑌸 𑌦𑌿𑌶𑌶𑍍𑌚𑍋𑌪𑌵𑌨𑌾𑌨𑌿 𑌚 ॥ 1𑍮 ॥

𑌶𑌿𑌰𑍋𑌭𑌿𑌃 𑌪𑍃𑌥𑍁𑌭𑌿𑌃 𑌸𑌰𑍍𑌪𑌾 𑌵𑍍𑌯𑌕𑍍𑌤𑌸𑍍𑌵𑌸𑍍𑌤𑌿𑌕𑌲𑌕𑍍𑌷𑌣𑍈𑌃 ।
𑌵𑌮𑌂𑌤𑌃 𑌪𑌾𑌵𑌕𑌂 𑌘𑍋𑌰𑌂 𑌦𑌦𑌂𑌶𑍁𑌰𑍍𑌦𑌶𑌨𑍈𑌃 𑌶𑌿𑌲𑌾𑌃 ॥ 1𑍯 ॥

𑌤𑌾𑌸𑍍𑌤𑌦𑌾 𑌸𑌵𑌿𑌷𑍈𑌰𑍍𑌦𑌷𑍍𑌟𑌾𑌃 𑌕𑍁𑌪𑌿𑌤𑍈𑌸𑍍𑌤𑍈𑌰𑍍𑌮𑌹𑌾𑌶𑌿𑌲𑌾𑌃 ।
𑌜𑌜𑍍𑌜𑍍𑌵𑌲𑍁𑌃 𑌪𑌾𑌵𑌕𑍋𑌦𑍍𑌦𑍀𑌪𑍍𑌤𑌾 𑌬𑌿𑌭𑌿𑌦𑍁𑌶𑍍𑌚 𑌸𑌹𑌸𑍍𑌰𑌧𑌾 ॥ 20 ॥

𑌯𑌾𑌨𑌿 𑌚𑍌𑌷𑌧𑌜𑌾𑌲𑌾𑌨𑌿 𑌤𑌸𑍍𑌮𑌿𑌨𑍍 𑌜𑌾𑌤𑌾𑌨𑌿 𑌪𑌰𑍍𑌵𑌤𑍇 ।
𑌵𑌿𑌷𑌘𑍍𑌨𑌾𑌨𑍍𑌯𑌪𑌿 𑌨𑌾𑌗𑌾𑌨𑌾𑌂 𑌨 𑌶𑍇𑌕𑍁𑌃 𑌶𑌮𑌿𑌤𑍁𑌂 𑌵𑌿𑌷𑌮𑍍 ॥ 21 ॥

𑌭𑌿𑌦𑍍𑌯𑌤𑍇𑌽𑌯𑌂 𑌗𑌿𑌰𑌿𑌰𑍍𑌭𑍂𑌤𑍈𑌰𑌿𑌤𑌿 𑌮𑌤𑍍𑌤𑍍𑌵𑌾 𑌤𑌪𑌸𑍍𑌵𑌿𑌨𑌃 ।
𑌤𑍍𑌰𑌸𑍍𑌤𑌾 𑌵𑌿𑌦𑍍𑌯𑌾𑌧𑌰𑌾𑌸𑍍𑌤𑌸𑍍𑌮𑌾𑌦𑍁𑌤𑍍𑌪𑍇𑌤𑍁𑌃 𑌸𑍍𑌤𑍍𑌰𑍀 𑌗𑌣𑍈𑌃 𑌸𑌹 ॥ 22 ॥

𑌪𑌾𑌨𑌭𑍂𑌮𑌿𑌗𑌤𑌂 𑌹𑌿𑌤𑍍𑌵𑌾 𑌹𑍈𑌮𑌮𑌾𑌸𑌵𑌭𑌾𑌜𑌨𑌮𑍍 ।
𑌪𑌾𑌤𑍍𑌰𑌾𑌣𑌿 𑌚 𑌮𑌹𑌾𑌰𑍍𑌹𑌾𑌣𑌿 𑌕𑌰𑌕𑌾𑌂𑌶𑍍𑌚 𑌹𑌿𑌰𑌣𑍍𑌮𑌯𑌾𑌨𑍍 ॥ 23 ॥

𑌲𑍇𑌹𑍍𑌯𑌾𑌨𑍁𑌚𑍍𑌚𑌾𑌵𑌚𑌾𑌨𑍍 𑌭𑌕𑍍𑌷𑍍𑌯𑌾𑌨𑍍 𑌮𑌾𑌂𑌸𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ।
𑌆𑌰𑍍𑌷𑌭𑌾𑌣𑌿 𑌚 𑌚𑌰𑍍𑌮𑌾𑌣𑌿 𑌖𑌡𑌗𑌾𑌂𑌶𑍍𑌚 𑌕𑌨𑌕𑌤𑍍𑌸𑌰𑍂𑌨𑍍 ॥ 24 ॥

𑌕𑍃𑌤𑌕𑌂𑌠𑌗𑍁𑌣𑌾𑌃 𑌕𑍍𑌷𑍀𑌬𑌾 𑌰𑌕𑍍𑌤𑌮𑌾𑌲𑍍𑌯𑌾𑌨𑍁𑌲𑍇𑌪𑌨𑌾𑌃 ।
𑌰𑌕𑍍𑌤𑌾𑌕𑍍𑌷𑌾𑌃 𑌪𑍁𑌷𑍍𑌕𑌰𑌾𑌕𑍍𑌷𑌾𑌶𑍍𑌚 𑌗𑌗𑌨𑌂 𑌪𑍍𑌰𑌤𑌿𑌪𑍇𑌦𑌿𑌰𑍇 ॥ 25 ॥

𑌹𑌾𑌰𑌨𑍂𑌪𑍁𑌰𑌕𑍇𑌯𑍂𑌰𑌪𑌾𑌰𑌿𑌹𑌾𑌰𑍍𑌯𑌧𑌰𑌾𑌃 𑌸𑍍𑌤𑍍𑌰𑌿𑌯𑌃 ।
𑌵𑌿𑌸𑍍𑌮𑌿𑌤𑌾𑌃 𑌸𑌸𑍍𑌮𑌿𑌤𑌾𑌸𑍍𑌤𑌸𑍍𑌥𑍁𑌰𑌾𑌕𑌾𑌶𑍇 𑌰𑌮𑌣𑍈𑌃 𑌸𑌹 ॥ 26 ॥

𑌦𑌰𑍍𑌶𑌯𑌂𑌤𑍋 𑌮𑌹𑌾𑌵𑌿𑌦𑍍𑌯𑌾𑌂 𑌵𑌿𑌦𑍍𑌯𑌾𑌧𑌰𑌮𑌹𑌰𑍍𑌷𑌯𑌃 ।
𑌸𑌹𑌿𑌤𑌾𑌸𑍍𑌤𑌸𑍍𑌥𑍁𑌰𑌾𑌕𑌾𑌶𑍇 𑌵𑍀𑌕𑍍𑌷𑌾𑌂𑌚𑌕𑍍𑌰𑍁𑌶𑍍𑌚 𑌪𑌰𑍍𑌵𑌤𑌮𑍍 ॥ 2𑍭 ॥

𑌶𑍁𑌶𑍍𑌰𑍁𑌵𑍁𑌶𑍍𑌚 𑌤𑌦𑌾 𑌶𑌬𑍍𑌦𑌮𑍃𑌷𑍀𑌣𑌾𑌂 𑌭𑌾𑌵𑌿𑌤𑌾𑌤𑍍𑌮𑌨𑌾𑌮𑍍 ।
𑌚𑌾𑌰𑌣𑌾𑌨𑌾𑌂 𑌚 𑌸𑌿𑌦𑍍𑌧𑌾𑌨𑌾𑌂 𑌸𑍍𑌥𑌿𑌤𑌾𑌨𑌾𑌂 𑌵𑌿𑌮𑌲𑍇𑌽𑌂𑌬𑌰𑍇 ॥ 2𑍮 ॥

𑌏𑌷 𑌪𑌰𑍍𑌵𑌤𑌸𑌂𑌕𑌾𑌶𑍋 𑌹𑌨𑍁𑌮𑌾𑌨𑍍 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌤𑌿𑌤𑍀𑌰𑍍𑌷𑌤𑌿 𑌮𑌹𑌾𑌵𑍇𑌗𑌸𑍍𑌸𑌮𑍁𑌦𑍍𑌰𑌂 𑌮𑌕𑌰𑌾𑌲𑌯𑌮𑍍 ॥ 2𑍯 ॥

𑌰𑌾𑌮𑌾𑌰𑍍𑌥𑌂 𑌵𑌾𑌨𑌰𑌾𑌰𑍍𑌥𑌂 𑌚 𑌚𑌿𑌕𑍀𑌰𑍍𑌷𑌨𑍍 𑌕𑌰𑍍𑌮 𑌦𑍁𑌷𑍍𑌕𑌰𑌮𑍍 ।
𑌸𑌮𑍁𑌦𑍍𑌰𑌸𑍍𑌯 𑌪𑌰𑌂 𑌪𑌾𑌰𑌂 𑌦𑍁𑌷𑍍𑌪𑍍𑌰𑌾𑌪𑌂 𑌪𑍍𑌰𑌾𑌪𑍍𑌤𑍁𑌮𑌿𑌚𑍍𑌛𑌤𑌿 ॥ 30 ॥

𑌇𑌤𑌿 𑌵𑌿𑌦𑍍𑌯𑌾𑌧𑌰𑌾𑌃 𑌶𑍍𑌰𑍁𑌤𑍍𑌵𑌾 𑌵𑌚𑌸𑍍𑌤𑍇𑌷𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌤𑌮𑌪𑍍𑌰𑌮𑍇𑌯𑌂 𑌦𑌦𑍃𑌶𑍁𑌃 𑌪𑌰𑍍𑌵𑌤𑍇 𑌵𑌾𑌨𑌰𑌰𑍍𑌷𑌭𑌮𑍍 ॥ 31 ॥

𑌦𑍁𑌧𑍁𑌵𑍇 𑌚 𑌸 𑌰𑍋𑌮𑌾𑌣𑌿 𑌚𑌕𑌂𑌪𑍇 𑌚𑌾𑌚𑌲𑍋𑌪𑌮𑌃 ।
𑌨𑌨𑌾𑌦 𑌸𑍁𑌮𑌹𑌾𑌨𑌾𑌦𑌂 𑌸𑍁𑌮𑌹𑌾𑌨𑌿𑌵 𑌤𑍋𑌯𑌦𑌃 ॥ 32 ॥

𑌆𑌨𑍁𑌪𑍂𑌰𑍍𑌵𑍍𑌯𑍇𑌣 𑌵𑍃𑌤𑍍𑌤𑌂 𑌚 𑌲𑌾𑌂𑌗𑍂𑌲𑌂 𑌲𑍋𑌮𑌭𑌿𑌶𑍍𑌚𑌿𑌤𑌮𑍍 ।
𑌉𑌤𑍍𑌪𑌤𑌿𑌷𑍍𑌯𑌨𑍍 𑌵𑌿𑌚𑌿𑌕𑍍𑌷𑍇𑌪 𑌪𑌕𑍍𑌷𑌿𑌰𑌾𑌜 𑌇𑌵𑍋𑌰𑌗𑌮𑍍 ॥ 33 ॥

𑌤𑌸𑍍𑌯 𑌲𑌾𑌂𑌗𑍂𑌲𑌮𑌾𑌵𑌿𑌦𑍍𑌧𑌮𑌾𑌤𑍍𑌤𑌵𑍇𑌗𑌸𑍍𑌯 𑌪𑍃𑌷𑍍𑌠𑌤𑌃 ।
𑌦𑌦𑍃𑌶𑍇 𑌗𑌰𑍁𑌡𑍇𑌨𑍇𑌵 𑌹𑍍𑌰𑌿𑌯𑌮𑌾𑌣𑍋 𑌮𑌹𑍋𑌰𑌗𑌃 ॥ 34 ॥

𑌬𑌾𑌹𑍂 𑌸𑌂𑌸𑍍𑌤𑌂𑌭𑌯𑌾𑌮𑌾𑌸 𑌮𑌹𑌾𑌪𑌰𑌿𑌘𑌸𑌨𑍍𑌨𑌿𑌭𑍌 ।
𑌸𑌸𑌾𑌦 𑌚 𑌕𑌪𑌿𑌃 𑌕𑌟𑍍𑌯𑌾𑌂 𑌚𑌰𑌣𑍌 𑌸𑌂𑌚𑍁𑌕𑍋𑌚 𑌚 ॥ 35 ॥

𑌸𑌂𑌹𑍃𑌤𑍍𑌯 𑌚 𑌭𑍁𑌜𑍌 𑌶𑍍𑌰𑍀𑌮𑌾𑌂𑌸𑍍𑌤𑌥𑍈𑌵 𑌚 𑌶𑌿𑌰𑍋𑌧𑌰𑌾𑌮𑍍 ।
𑌤𑍇𑌜𑌃 𑌸𑌤𑍍𑌤𑍍𑌵𑌂 𑌤𑌥𑌾 𑌵𑍀𑌰𑍍𑌯𑌮𑌾𑌵𑌿𑌵𑍇𑌶 𑌸 𑌵𑍀𑌰𑍍𑌯𑌵𑌾𑌨𑍍 ॥ 36 ॥

𑌮𑌾𑌰𑍍𑌗𑌮𑌾𑌲𑍋𑌕𑌯𑌂𑌦𑍂𑌰𑌾𑌦𑍂𑌰𑍍𑌧𑍍𑌵𑌂 𑌪𑍍𑌰𑌣𑌿𑌹𑌿𑌤𑍇𑌕𑍍𑌷𑌣𑌃 ।
𑌰𑍁𑌰𑍋𑌧 𑌹𑍃𑌦𑌯𑍇 𑌪𑍍𑌰𑌾𑌣𑌾𑌨𑌾𑌕𑌾𑌶𑌮𑌵𑌲𑍋𑌕𑌯𑌨𑍍 ॥ 3𑍭 ॥

𑌪𑌦𑍍𑌭𑍍𑌯𑌾𑌂 𑌦𑍃𑌢𑌮𑌵𑌸𑍍𑌥𑌾𑌨𑌂 𑌕𑍃𑌤𑍍𑌵𑌾 𑌸 𑌕𑌪𑌿𑌕𑍁𑌂𑌜𑌰𑌃 ।
𑌨𑌿𑌕𑍁𑌂𑌚𑍍𑌯 𑌕𑌰𑍍𑌣𑍌 𑌹𑌨𑍁𑌮𑌾𑌨𑍁𑌤𑍍𑌪𑌤𑌿𑌷𑍍𑌯𑌨𑍍 𑌮𑌹𑌾𑌬𑌲𑌃 ।
𑌵𑌾𑌨𑌰𑌾𑌨𑍍 𑌵𑌾𑌨𑌰𑌶𑍍𑌰𑍇𑌷𑍍𑌠 𑌇𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 3𑍮 ॥

𑌯𑌥𑌾 𑌰𑌾𑌘𑌵𑌨𑌿𑌰𑍍𑌮𑍁𑌕𑍍𑌤𑌃 𑌶𑌰𑌃 𑌶𑍍𑌵𑌸𑌨𑌵𑌿𑌕𑍍𑌰𑌮𑌃 ।
𑌗𑌚𑍍𑌛𑍇𑌤𑍍𑌤𑌦𑍍𑌵𑌦𑍍𑌗𑌮𑌿𑌷𑍍𑌯𑌾𑌮𑌿 𑌲𑌂𑌕𑌾𑌂 𑌰𑌾𑌵𑌣𑌪𑌾𑌲𑌿𑌤𑌾𑌮𑍍 ॥ 3𑍯 ॥

𑌨 𑌹𑌿 𑌦𑍍𑌰𑌕𑍍𑌷𑍍𑌯𑌾𑌮𑌿 𑌯𑌦𑌿 𑌤𑌾𑌂 𑌲𑌂𑌕𑌾𑌯𑌾𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌅𑌨𑍇𑌨𑍈𑌵 𑌹𑌿 𑌵𑍇𑌗𑍇𑌨 𑌗𑌮𑌿𑌷𑍍𑌯𑌾𑌮𑌿 𑌸𑍁𑌰𑌾𑌲𑌯𑌮𑍍 ॥ 40 ॥

𑌯𑌦𑌿 𑌵𑌾 𑌤𑍍𑌰𑌿𑌦𑌿𑌵𑍇 𑌸𑍀𑌤𑌾𑌂 𑌨 𑌦𑍍𑌰𑌕𑍍𑌷𑍍𑌯𑌾𑌮𑍍𑌯𑌕𑍃𑌤𑌶𑍍𑌰𑌮𑌃 ।
𑌬𑌦𑍍𑌧𑍍𑌵𑌾 𑌰𑌾𑌕𑍍𑌷𑌸𑌰𑌾𑌜𑌾𑌨𑌮𑌾𑌨𑌯𑌿𑌷𑍍𑌯𑌾𑌮𑌿 𑌰𑌾𑌵𑌣𑌮𑍍 ॥ 41 ॥

𑌸𑌰𑍍𑌵𑌥𑌾 𑌕𑍃𑌤𑌕𑌾𑌰𑍍𑌯𑍋𑌽𑌹𑌮𑍇𑌷𑍍𑌯𑌾𑌮𑌿 𑌸𑌹 𑌸𑍀𑌤𑌯𑌾 ।
𑌆𑌨𑌯𑌿𑌷𑍍𑌯𑌾𑌮𑌿 𑌵𑌾 𑌲𑌂𑌕𑌾𑌂 𑌸𑌮𑍁𑌤𑍍𑌪𑌾𑌟𑍍𑌯 𑌸𑌰𑌾𑌵𑌣𑌾𑌮𑍍 ॥ 42 ॥

𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌹𑌨𑍁𑌮𑌾𑌨𑍍𑌵𑌾𑌨𑌰𑌾𑌨𑍍𑌵𑌾𑌨𑌰𑍋𑌤𑍍𑌤𑌮𑌃 ॥ 43 ॥

𑌉𑌤𑍍𑌪𑌪𑌾𑌤𑌾𑌥 𑌵𑍇𑌗𑍇𑌨 𑌵𑍇𑌗𑌵𑌾𑌨𑌵𑌿𑌚𑌾𑌰𑌯𑌨𑍍 ।
𑌸𑍁𑌪𑌰𑍍𑌣𑌮𑌿𑌵 𑌚𑌾𑌤𑍍𑌮𑌾𑌨𑌂 𑌮𑍇𑌨𑍇 𑌸 𑌕𑌪𑌿𑌕𑍁𑌂𑌜𑌰𑌃 ॥ 44 ॥

𑌸𑌮𑍁𑌤𑍍𑌪𑌤𑌤𑌿 𑌤𑌸𑍍𑌮𑌿𑌂𑌸𑍍𑌤𑍁 𑌵𑍇𑌗𑌾𑌤𑍍𑌤𑍇 𑌨𑌗𑌰𑍋𑌹𑌿𑌣𑌃 ।
𑌸𑌂𑌹𑍃𑌤𑍍𑌯 𑌵𑌿𑌟𑌪𑌾𑌨𑍍 𑌸𑌰𑍍𑌵𑌾𑌨𑍍 𑌸𑌮𑍁𑌤𑍍𑌪𑍇𑌤𑍁𑌃 𑌸𑌮𑌂𑌤𑌤𑌃 ॥ 45 ॥

𑌸 𑌮𑌤𑍍𑌤𑌕𑍋𑌯𑌷𑍍𑌟𑌿𑌮𑌕𑌾𑌨𑍍 𑌪𑌾𑌦𑌪𑌾𑌨𑍍 𑌪𑍁𑌷𑍍𑌪𑌶𑌾𑌲𑌿𑌨𑌃 ।
𑌉𑌦𑍍𑌵𑌹𑌨𑍍𑌨𑍂𑌰𑍁𑌵𑍇𑌗𑍇𑌨 𑌜𑌗𑌾𑌮 𑌵𑌿𑌮𑌲𑍇𑌽𑌂𑌬𑌰𑍇 ॥ 46 ॥

𑌊𑌰𑍁𑌵𑍇𑌗𑍋𑌦𑍍𑌧𑌤𑌾 𑌵𑍃𑌕𑍍𑌷𑌾 𑌮𑍁𑌹𑍂𑌰𑍍𑌤𑌂 𑌕𑌪𑌿𑌮𑌨𑍍𑌵𑌯𑍁𑌃 ।
𑌪𑍍𑌰𑌸𑍍𑌥𑌿𑌤𑌂 𑌦𑍀𑌰𑍍𑌘𑌮𑌧𑍍𑌵𑌾𑌨𑌂 𑌸𑍍𑌵𑌬𑌂𑌧𑍁𑌮𑌿𑌵 𑌬𑌾𑌂𑌧𑌵𑌾𑌃 ॥ 4𑍭 ॥

𑌤𑌮𑍂𑌰𑍁𑌵𑍇𑌗𑍋𑌨𑍍𑌮𑌥𑌿𑌤𑌾𑌃 𑌸𑌾𑌲𑌾𑌶𑍍𑌚𑌾𑌨𑍍𑌯𑍇 𑌨𑌗𑍋𑌤𑍍𑌤𑌮𑌾𑌃 ।
𑌅𑌨𑍁𑌜𑌗𑍍𑌮𑍁𑌰𑍍𑌹𑌨𑍂𑌮𑌂𑌤𑌂 𑌸𑍈𑌨𑍍𑌯𑌾 𑌇𑌵 𑌮𑌹𑍀𑌪𑌤𑌿𑌮𑍍 ॥ 4𑍮 ॥

𑌸𑍁𑌪𑍁𑌷𑍍𑌪𑌿𑌤𑌾𑌗𑍍𑌰𑍈𑌰𑍍𑌬𑌹𑍁𑌭𑌿𑌃 𑌪𑌾𑌦𑌪𑍈𑌰𑌨𑍍𑌵𑌿𑌤𑌃 𑌕𑌪𑌿𑌃 ।
𑌹𑌨𑍁𑌮𑌾𑌨𑍍 𑌪𑌰𑍍𑌵𑌤𑌾𑌕𑌾𑌰𑍋 𑌬𑌭𑍂𑌵𑌾𑌦𑍍𑌭𑍁𑌤𑌦𑌰𑍍𑌶𑌨𑌃 ॥ 4𑍯 ॥

𑌸𑌾𑌰𑌵𑌂𑌤𑍋𑌽𑌥 𑌯𑍇 𑌵𑍃𑌕𑍍𑌷𑌾 𑌨𑍍𑌯𑌮𑌜𑍍𑌜𑌨𑍍 𑌲𑌵𑌣𑌾𑌂𑌭𑌸𑌿 ।
𑌭𑌯𑌾𑌦𑌿𑌵 𑌮𑌹𑍇𑌂𑌦𑍍𑌰𑌸𑍍𑌯 𑌪𑌰𑍍𑌵𑌤𑌾 𑌵𑌰𑍁𑌣𑌾𑌲𑌯𑍇 ॥ 50 ॥

𑌸 𑌨𑌾𑌨𑌾𑌕𑍁𑌸𑍁𑌮𑍈𑌃 𑌕𑍀𑌰𑍍𑌣𑌃 𑌕𑌪𑌿𑌃 𑌸𑌾𑌂𑌕𑍁𑌰𑌕𑍋𑌰𑌕𑍈𑌃 ।
𑌶𑍁𑌶𑍁𑌭𑍇 𑌮𑍇𑌘𑌸𑌂𑌕𑌾𑌶𑌃 𑌖𑌦𑍍𑌯𑍋𑌤𑍈𑌰𑌿𑌵 𑌪𑌰𑍍𑌵𑌤𑌃 ॥ 51 ॥

𑌵𑌿𑌮𑍁𑌕𑍍𑌤𑌾𑌸𑍍𑌤𑌸𑍍𑌯 𑌵𑍇𑌗𑍇𑌨 𑌮𑍁𑌕𑍍𑌤𑍍𑌵𑌾 𑌪𑍁𑌷𑍍𑌪𑌾𑌣𑌿 𑌤𑍇 𑌦𑍍𑌰𑍁𑌮𑌾𑌃 ।
𑌅𑌵𑌶𑍀𑌰𑍍𑌯𑌂𑌤 𑌸𑌲𑌿𑌲𑍇 𑌨𑌿𑌵𑍃𑌤𑍍𑌤𑌾𑌃 𑌸𑍁𑌹𑍃𑌦𑍋 𑌯𑌥𑌾 ॥ 52 ॥

𑌲𑌘𑍁𑌤𑍍𑌵𑍇𑌨𑍋𑌪𑌪𑌨𑍍𑌨𑌂 𑌤𑌦𑍍𑌵𑌿𑌚𑌿𑌤𑍍𑌰𑌂 𑌸𑌾𑌗𑌰𑍇𑌽𑌪𑌤𑌤𑍍 ।
𑌦𑍍𑌰𑍁𑌮𑌾𑌣𑌾𑌂 𑌵𑌿𑌵𑌿𑌧𑌂 𑌪𑍁𑌷𑍍𑌪𑌂 𑌕𑌪𑌿𑌵𑌾𑌯𑍁𑌸𑌮𑍀𑌰𑌿𑌤𑌮𑍍 ॥ 53 ॥

𑌤𑌾𑌰𑌾𑌚𑌿𑌤𑌮𑌿𑌵𑌾𑌕𑌾𑌶𑌂 𑌪𑍍𑌰𑌬𑌭𑍌 𑌸 𑌮𑌹𑌾𑌰𑍍𑌣𑌵𑌃 ।
𑌪𑍁𑌷𑍍𑌪𑍌𑌘𑍇𑌣𑌾𑌨𑍁𑌬𑌦𑍍𑌧𑍇𑌨 𑌨𑌾𑌨𑌾𑌵𑌰𑍍𑌣𑍇𑌨 𑌵𑌾𑌨𑌰𑌃 ।
𑌬𑌭𑍌 𑌮𑍇𑌘 𑌇𑌵𑌾𑌕𑌾𑌶𑍇 𑌵𑌿𑌦𑍍𑌯𑍁𑌦𑍍𑌗𑌣 𑌵𑌿𑌭𑍂𑌷𑌿𑌤𑌃 ॥ 54 ॥

𑌤𑌸𑍍𑌯 𑌵𑍇𑌗𑌸𑌮𑌾𑌧𑍂𑌤𑍈𑌃 𑌪𑍁𑌷𑍍𑌪𑍈𑌸𑍍𑌤𑍋𑌯𑌮𑌦𑍃𑌶𑍍𑌯𑌤 ॥ 55 ॥

𑌤𑌾𑌰𑌾𑌭𑌿𑌰𑌭𑌿𑌰𑌾𑌮𑌾𑌭𑌿𑌰𑍁𑌦𑌿𑌤𑌾𑌭𑌿𑌰𑌿𑌵𑌾𑌂𑌬𑌰𑌮𑍍 ।
𑌤𑌸𑍍𑌯𑌾𑌂𑌬𑌰𑌗𑌤𑍌 𑌬𑌾𑌹𑍂 𑌦𑌦𑍃𑌶𑌾𑌤𑍇 𑌪𑍍𑌰𑌸𑌾𑌰𑌿𑌤𑍌 ॥ 56 ॥

𑌪𑌰𑍍𑌵𑌤𑌾𑌗𑍍𑌰𑌾𑌦𑍍𑌵𑌿𑌨𑌿𑌷𑍍𑌕𑍍𑌰𑌾𑌂𑌤𑍌 𑌪𑌂𑌚𑌾𑌸𑍍𑌯𑌾𑌵𑌿𑌵 𑌪𑌨𑍍𑌨𑌗𑍌 ।
𑌪𑌿𑌬𑌨𑍍𑌨𑌿𑌵 𑌬𑌭𑍌 𑌚𑌾𑌪𑌿 𑌸𑍋𑌰𑍍𑌮𑌿𑌮𑌾𑌲𑌂 𑌮𑌹𑌾𑌰𑍍𑌣𑌵𑌮𑍍 ॥ 5𑍭 ॥

𑌪𑌿𑌪𑌾𑌸𑍁𑌰𑌿𑌵 𑌚𑌾𑌕𑌾𑌶𑌂 𑌦𑌦𑍃𑌶𑍇 𑌸 𑌮𑌹𑌾𑌕𑌪𑌿𑌃 ।
𑌤𑌸𑍍𑌯 𑌵𑌿𑌦𑍍𑌯𑍁𑌤𑍍𑌪𑍍𑌰𑌭𑌾𑌕𑌾𑌰𑍇 𑌵𑌾𑌯𑍁𑌮𑌾𑌰𑍍𑌗𑌾𑌨𑍁𑌸𑌾𑌰𑌿𑌣𑌃 ॥ 5𑍮 ॥

𑌨𑌯𑌨𑍇 𑌵𑌿𑌪𑍍𑌰𑌕𑌾𑌶𑍇𑌤𑍇 𑌪𑌰𑍍𑌵𑌤𑌸𑍍𑌥𑌾𑌵𑌿𑌵𑌾𑌨𑌲𑍌 ।
𑌪𑌿𑌂𑌗𑍇 𑌪𑌿𑌂𑌗𑌾𑌕𑍍𑌷𑌮𑍁𑌖𑍍𑌯𑌸𑍍𑌯 𑌬𑍃𑌹𑌤𑍀 𑌪𑌰𑌿𑌮𑌂𑌡𑌲𑍇 ॥ 5𑍯 ॥

𑌚𑌕𑍍𑌷𑍁𑌷𑍀 𑌸𑌂𑌪𑍍𑌰𑌾𑌕𑌾𑌶𑍇𑌤𑍇 𑌚𑌂𑌦𑍍𑌰𑌸𑍂𑌰𑍍𑌯𑌾𑌵𑌿𑌵𑍋𑌦𑌿𑌤𑍌 ।
𑌮𑍁𑌖𑌂 𑌨𑌾𑌸𑌿𑌕𑌯𑌾 𑌤𑌸𑍍𑌯 𑌤𑌾𑌮𑍍𑌰𑌯𑌾 𑌤𑌾𑌮𑍍𑌰𑌮𑌾𑌬𑌭𑍌 ॥ 60 ॥

𑌸𑌂𑌧𑍍𑌯𑌯𑌾 𑌸𑌮𑌭𑌿𑌸𑍍𑌪𑍃𑌷𑍍𑌟𑌂 𑌯𑌥𑌾 𑌤𑌤𑍍𑌸𑍂𑌰𑍍𑌯𑌮𑌂𑌡𑌲𑌮𑍍 ।
𑌲𑌾𑌂𑌗𑍂𑌲𑌂 𑌚 𑌸𑌮𑌾𑌵𑌿𑌦𑍍𑌧𑌂 𑌪𑍍𑌲𑌵𑌮𑌾𑌨𑌸𑍍𑌯 𑌶𑍋𑌭𑌤𑍇 ॥ 61 ॥

𑌅𑌂𑌬𑌰𑍇 𑌵𑌾𑌯𑍁𑌪𑍁𑌤𑍍𑌰𑌸𑍍𑌯 𑌶𑌕𑍍𑌰𑌧𑍍𑌵𑌜 𑌇𑌵𑍋𑌚𑍍𑌛𑍍𑌰𑌿𑌤𑌮𑍍 ।
𑌲𑌾𑌂𑌗𑍂𑌲𑌚𑌕𑍍𑌰𑍇𑌣 𑌮𑌹𑌾𑌨𑍍 𑌶𑍁𑌕𑍍𑌲𑌦𑌂𑌷𑍍𑌟𑍍𑌰𑍋𑌽𑌨𑌿𑌲𑌾𑌤𑍍𑌮𑌜𑌃 ॥ 62 ॥

𑌵𑍍𑌯𑌰𑍋𑌚𑌤 𑌮𑌹𑌾𑌪𑍍𑌰𑌾𑌜𑍍𑌞𑌃 𑌪𑌰𑌿𑌵𑍇𑌷𑍀𑌵 𑌭𑌾𑌸𑍍𑌕𑌰𑌃 ।
𑌸𑍍𑌫𑌿𑌗𑍍𑌦𑍇𑌶𑍇𑌨𑌾𑌭𑌿𑌤𑌾𑌮𑍍𑌰𑍇𑌣 𑌰𑌰𑌾𑌜 𑌸 𑌮𑌹𑌾𑌕𑌪𑌿𑌃 ॥ 63 ॥

𑌮𑌹𑌤𑌾 𑌦𑌾𑌰𑌿𑌤𑍇𑌨𑍇𑌵 𑌗𑌿𑌰𑌿𑌰𑍍𑌗𑍈𑌰𑌿𑌕𑌧𑌾𑌤𑍁𑌨𑌾 ।
𑌤𑌸𑍍𑌯 𑌵𑌾𑌨𑌰𑌸𑌿𑌂𑌹𑌸𑍍𑌯 𑌪𑍍𑌲𑌵𑌮𑌾𑌨𑌸𑍍𑌯 𑌸𑌾𑌗𑌰𑌮𑍍 ॥ 64 ॥

𑌕𑌕𑍍𑌷𑌾𑌂𑌤𑌰𑌗𑌤𑍋 𑌵𑌾𑌯𑍁𑌰𑍍𑌜𑍀𑌮𑍂𑌤 𑌇𑌵 𑌗𑌰𑍍𑌜𑌤𑌿 ।
𑌖𑍇 𑌯𑌥𑌾 𑌨𑌿𑌪𑌤𑌤𑍍𑌯𑍁𑌲𑍍𑌕𑌾 𑌹𑍍𑌯𑍁𑌤𑍍𑌤𑌰𑌾𑌂𑌤𑌾𑌦𑍍𑌵𑌿𑌨𑌿𑌃𑌸𑍃𑌤𑌾 ॥ 65 ॥

𑌦𑍃𑌶𑍍𑌯𑌤𑍇 𑌸𑌾𑌨𑍁𑌬𑌂𑌧𑌾 𑌚 𑌤𑌥𑌾 𑌸 𑌕𑌪𑌿𑌕𑍁𑌂𑌜𑌰𑌃 ।
𑌪𑌤𑌤𑍍𑌪𑌤𑌂𑌗𑌸𑌂𑌕𑌾𑌶𑍋 𑌵𑍍𑌯𑌾𑌯𑌤𑌃 𑌶𑍁𑌶𑍁𑌭𑍇 𑌕𑌪𑌿𑌃 ॥ 66 ॥

𑌪𑍍𑌰𑌵𑍃𑌦𑍍𑌧 𑌇𑌵 𑌮𑌾𑌤𑌂𑌗𑌃 𑌕𑌕𑍍𑌷𑍍𑌯𑌯𑌾 𑌬𑌧𑍍𑌯𑌮𑌾𑌨𑌯𑌾 ।
𑌉𑌪𑌰𑌿𑌷𑍍𑌟𑌾𑌚𑍍𑌛𑌰𑍀𑌰𑍇𑌣 𑌛𑌾𑌯𑌯𑌾 𑌚𑌾𑌵𑌗𑌾𑌢𑌯𑌾 ॥ 6𑍭 ॥

𑌸𑌾𑌗𑌰𑍇 𑌮𑌾𑌰𑍁𑌤𑌾𑌵𑌿𑌷𑍍𑌟𑌾 𑌨𑍌𑌰𑌿𑌵𑌾𑌸𑍀𑌤𑍍𑌤𑌦𑌾 𑌕𑌪𑌿𑌃 ।
𑌯𑌂 𑌯𑌂 𑌦𑍇𑌶𑌂 𑌸𑌮𑍁𑌦𑍍𑌰𑌸𑍍𑌯 𑌜𑌗𑌾𑌮 𑌸 𑌮𑌹𑌾𑌕𑌪𑌿𑌃 ।
𑌸 𑌸 𑌤𑌸𑍍𑌯𑍋𑌰𑍁𑌵𑍇𑌗𑍇𑌨 𑌸𑍋𑌨𑍍𑌮𑌾𑌦 𑌇𑌵 𑌲𑌕𑍍𑌷𑍍𑌯𑌤𑍇 ॥ 6𑍮 ॥

𑌸𑌾𑌗𑌰𑌸𑍍𑌯𑍋𑌰𑍍𑌮𑌿𑌜𑌾𑌲𑌾𑌨𑌾𑌮𑍁𑌰𑌸𑌾 𑌶𑍈𑌲𑌵𑌰𑍍𑌷𑍍𑌮𑌣𑌾𑌮𑍍 ।
𑌅𑌭𑌿𑌘𑍍𑌨𑌂𑌸𑍍𑌤𑍁 𑌮𑌹𑌾𑌵𑍇𑌗𑌃 𑌪𑍁𑌪𑍍𑌲𑍁𑌵𑍇 𑌸 𑌮𑌹𑌾𑌕𑌪𑌿𑌃 ॥ 6𑍯 ॥

𑌕𑌪𑌿𑌵𑌾𑌤𑌶𑍍𑌚 𑌬𑌲𑌵𑌾𑌨𑍍 𑌮𑍇𑌘𑌵𑌾𑌤𑌶𑍍𑌚 𑌨𑌿𑌃𑌸𑍃𑌤𑌃 ।
𑌸𑌾𑌗𑌰𑌂 𑌭𑍀𑌮𑌨𑌿𑌰𑍍𑌘𑍋𑌷𑌂 𑌕𑌂𑌪𑌯𑌾𑌮𑌾𑌸𑌤𑍁𑌰𑍍𑌭𑍃𑌶𑌮𑍍 ॥ 𑍭0 ॥

𑌵𑌿𑌕𑌰𑍍𑌷𑌨𑍍𑌨𑍂𑌰𑍍𑌮𑌿𑌜𑌾𑌲𑌾𑌨𑌿 𑌬𑍃𑌹𑌂𑌤𑌿 𑌲𑌵𑌣𑌾𑌂𑌭𑌸𑌿 ।
𑌪𑍁𑌪𑍍𑌲𑍁𑌵𑍇 𑌕𑌪𑌿𑌶𑌾𑌰𑍍𑌦𑍂𑌲𑍋 𑌵𑌿𑌕𑌿𑌰𑌨𑍍𑌨𑌿𑌵 𑌰𑍋𑌦𑌸𑍀 ॥ 𑍭1 ॥

𑌮𑍇𑌰𑍁𑌮𑌂𑌦𑌰𑌸𑌂𑌕𑌾𑌶𑌾𑌨𑍁𑌦𑍍𑌧𑌤𑌾𑌨𑍍 𑌸 𑌮𑌹𑌾𑌰𑍍𑌣𑌵𑍇 ।
𑌅𑌤𑍍𑌯𑌕𑍍𑌰𑌾𑌮𑌨𑍍𑌮𑌹𑌾𑌵𑍇𑌗𑌸𑍍𑌤𑌰𑌂𑌗𑌾𑌨𑍍 𑌗𑌣𑌯𑌨𑍍𑌨𑌿𑌵 ॥ 𑍭2 ॥

𑌤𑌸𑍍𑌯 𑌵𑍇𑌗𑌸𑌮𑍁𑌦𑍍𑌧𑍂𑌤𑌂 𑌜𑌲𑌂 𑌸𑌜𑌲𑌦𑌂 𑌤𑌦𑌾 ।
𑌅𑌂𑌬𑌰𑌸𑍍𑌥𑌂 𑌵𑌿𑌬𑌭𑍍𑌰𑌾𑌜 𑌶𑌾𑌰𑌦𑌾𑌭𑍍𑌰𑌮𑌿𑌵𑌾𑌤𑌤𑌮𑍍 ॥ 𑍭3 ॥

𑌤𑌿𑌮𑌿𑌨𑌕𑍍𑌰𑌝𑌷𑌾𑌃 𑌕𑍂𑌰𑍍𑌮𑌾 𑌦𑍃𑌶𑍍𑌯𑌂𑌤𑍇 𑌵𑌿𑌵𑍃𑌤𑌾𑌸𑍍𑌤𑌦𑌾 ।
𑌵𑌸𑍍𑌤𑍍𑌰𑌾𑌪𑌕𑌰𑍍𑌷𑌣𑍇𑌨𑍇𑌵 𑌶𑌰𑍀𑌰𑌾𑌣𑌿 𑌶𑌰𑍀𑌰𑌿𑌣𑌾𑌮𑍍 ॥ 𑍭4 ॥

𑌪𑍍𑌲𑌵𑌮𑌾𑌨𑌂 𑌸𑌮𑍀𑌕𑍍𑌷𑍍𑌯𑌾𑌥 𑌭𑍁𑌜𑌂𑌗𑌾𑌃 𑌸𑌾𑌗𑌰𑌾𑌲𑌯𑌾𑌃 ।
𑌵𑍍𑌯𑍋𑌮𑍍𑌨𑌿 𑌤𑌂 𑌕𑌪𑌿𑌶𑌾𑌰𑍍𑌦𑍂𑌲𑌂 𑌸𑍁𑌪𑌰𑍍𑌣 𑌇𑌤𑌿 𑌮𑍇𑌨𑌿𑌰𑍇 ॥ 𑍭5 ॥

𑌦𑌶𑌯𑍋𑌜𑌨𑌵𑌿𑌸𑍍𑌤𑍀𑌰𑍍𑌣𑌾 𑌤𑍍𑌰𑌿𑌂𑌶𑌦𑍍𑌯𑍋𑌜𑌨𑌮𑌾𑌯𑌤𑌾 ।
𑌛𑌾𑌯𑌾 𑌵𑌾𑌨𑌰𑌸𑌿𑌂𑌹𑌸𑍍𑌯 𑌜𑌲𑍇 𑌚𑌾𑌰𑍁𑌤𑌰𑌾𑌭𑌵𑌤𑍍 ॥ 𑍭6 ॥

𑌶𑍍𑌵𑍇𑌤𑌾𑌭𑍍𑌰𑌘𑌨𑌰𑌾𑌜𑍀𑌵 𑌵𑌾𑌯𑍁𑌪𑍁𑌤𑍍𑌰𑌾𑌨𑍁𑌗𑌾𑌮𑌿𑌨𑍀 ।
𑌤𑌸𑍍𑌯 𑌸𑌾 𑌶𑍁𑌶𑍁𑌭𑍇 𑌛𑌾𑌯𑌾 𑌵𑌿𑌤𑌤𑌾 𑌲𑌵𑌣𑌾𑌂𑌭𑌸𑌿 ॥ 𑍭𑍭 ॥

𑌶𑍁𑌶𑍁𑌭𑍇 𑌸 𑌮𑌹𑌾𑌤𑍇𑌜𑌾 𑌮𑌹𑌾𑌕𑌾𑌯𑍋 𑌮𑌹𑌾𑌕𑌪𑌿𑌃 ।
𑌵𑌾𑌯𑍁𑌮𑌾𑌰𑍍𑌗𑍇 𑌨𑌿𑌰𑌾𑌲𑌂𑌬𑍇 𑌪𑌕𑍍𑌷𑌵𑌾𑌨𑌿𑌵 𑌪𑌰𑍍𑌵𑌤𑌃 ॥ 𑍭𑍮 ॥

𑌯𑍇𑌨𑌾𑌸𑍌 𑌯𑌾𑌤𑌿 𑌬𑌲𑌵𑌾𑌨𑍍 𑌵𑍇𑌗𑍇𑌨 𑌕𑌪𑌿𑌕𑍁𑌂𑌜𑌰𑌃 ।
𑌤𑍇𑌨 𑌮𑌾𑌰𑍍𑌗𑍇𑌣 𑌸𑌹𑌸𑌾 𑌦𑍍𑌰𑍋𑌣𑍀𑌕𑍃𑌤 𑌇𑌵𑌾𑌰𑍍𑌣𑌵𑌃 ॥ 𑍭𑍯 ॥

𑌆𑌪𑌾𑌤𑍇 𑌪𑌕𑍍𑌷𑌿𑌸𑌂𑌘𑌾𑌨𑌾𑌂 𑌪𑌕𑍍𑌷𑌿𑌰𑌾𑌜 𑌇𑌵 𑌵𑍍𑌰𑌜𑌨𑍍 ।
𑌹𑌨𑍁𑌮𑌾𑌨𑍍 𑌮𑍇𑌘𑌜𑌾𑌲𑌾𑌨𑌿 𑌪𑍍𑌰𑌕𑌰𑍍𑌷𑌨𑍍 𑌮𑌾𑌰𑍁𑌤𑍋 𑌯𑌥𑌾 ॥ 𑍮0 ॥

𑌪𑌾𑌂𑌡𑍁𑌰𑌾𑌰𑍁𑌣𑌵𑌰𑍍𑌣𑌾𑌨𑌿 𑌨𑍀𑌲𑌮𑌾𑌂𑌜𑌿𑌷𑍍𑌠𑌕𑌾𑌨𑌿 𑌚 ।
𑌕𑌪𑌿𑌨𑌾𑌕𑍃𑌷𑍍𑌯𑌮𑌾𑌣𑌾𑌨𑌿 𑌮𑌹𑌾𑌭𑍍𑌰𑌾𑌣𑌿 𑌚𑌕𑌾𑌶𑌿𑌰𑍇 ॥ 𑍮1 ॥

𑌪𑍍𑌰𑌵𑌿𑌶𑌨𑍍𑌨𑌭𑍍𑌰𑌜𑌾𑌲𑌾𑌨𑌿 𑌨𑌿𑌷𑍍𑌪𑌤𑌂𑌶𑍍𑌚 𑌪𑍁𑌨𑌃 𑌪𑍁𑌨𑌃 ।
𑌪𑍍𑌰𑌚𑍍𑌛𑌨𑍍𑌨𑌶𑍍𑌚 𑌪𑍍𑌰𑌕𑌾𑌶𑌶𑍍𑌚 𑌚𑌂𑌦𑍍𑌰𑌮𑌾 𑌇𑌵 𑌲𑌕𑍍𑌷𑍍𑌯𑌤𑍇 ॥ 𑍮2 ॥

𑌪𑍍𑌲𑌵𑌮𑌾𑌨𑌂 𑌤𑍁 𑌤𑌂 𑌦𑍃𑌷𑍍𑌟𑍍𑌵𑌾 𑌪𑍍𑌲𑌵𑌂𑌗𑌂 𑌤𑍍𑌵𑌰𑌿𑌤𑌂 𑌤𑌦𑌾 ।
𑌵𑌵𑌰𑍍𑌷𑍁𑌃 𑌪𑍁𑌷𑍍𑌪𑌵𑌰𑍍𑌷𑌾𑌣𑌿 𑌦𑍇𑌵𑌗𑌂𑌧𑌰𑍍𑌵𑌦𑌾𑌨𑌵𑌾𑌃 ॥ 𑍮3 ॥

𑌤𑌤𑌾𑌪 𑌨 𑌹𑌿 𑌤𑌂 𑌸𑍂𑌰𑍍𑌯𑌃 𑌪𑍍𑌲𑌵𑌂𑌤𑌂 𑌵𑌾𑌨𑌰𑍋𑌤𑍍𑌤𑌮𑌮𑍍 ।
𑌸𑌿𑌷𑍇𑌵𑍇 𑌚 𑌤𑌦𑌾 𑌵𑌾𑌯𑍂 𑌰𑌾𑌮𑌕𑌾𑌰𑍍𑌯𑌾𑌰𑍍𑌥𑌸𑌿𑌦𑍍𑌧𑌯𑍇 ॥ 𑍮4 ॥

𑌋𑌷𑌯𑌸𑍍𑌤𑍁𑌷𑍍𑌟𑍁𑌵𑍁𑌶𑍍𑌚𑍈𑌨𑌂 𑌪𑍍𑌲𑌵𑌮𑌾𑌨𑌂 𑌵𑌿𑌹𑌾𑌯𑌸𑌾 ।
𑌜𑌗𑍁𑌶𑍍𑌚 𑌦𑍇𑌵𑌗𑌂𑌧𑌰𑍍𑌵𑌾𑌃 𑌪𑍍𑌰𑌶𑌂𑌸𑌂𑌤𑍋 𑌮𑌹𑍌𑌜𑌸𑌮𑍍 ॥ 𑍮5 ॥

𑌨𑌾𑌗𑌾𑌶𑍍𑌚 𑌤𑍁𑌷𑍍𑌟𑍁𑌵𑍁𑌰𑍍𑌯𑌕𑍍𑌷𑌾 𑌰𑌕𑍍𑌷𑌾𑌂𑌸𑌿 𑌵𑌿𑌬𑍁𑌧𑌾𑌃 𑌖𑌗𑌾𑌃 ।
𑌪𑍍𑌰𑍇𑌕𑍍𑌷𑍍𑌯 𑌸𑌰𑍍𑌵𑍇 𑌕𑌪𑌿𑌵𑌰𑌂 𑌸𑌹𑌸𑌾 𑌵𑌿𑌗𑌤𑌕𑍍𑌲𑌮𑌮𑍍 ॥ 𑍮6 ॥

𑌤𑌸𑍍𑌮𑌿𑌨𑍍 𑌪𑍍𑌲𑌵𑌗𑌶𑌾𑌰𑍍𑌦𑍂𑌲𑍇 𑌪𑍍𑌲𑌵𑌮𑌾𑌨𑍇 𑌹𑌨𑍂𑌮𑌤𑌿 ।
𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌮𑌾𑌨𑌾𑌰𑍍𑌥𑍀 𑌚𑌿𑌂𑌤𑌯𑌾𑌮𑌾𑌸 𑌸𑌾𑌗𑌰𑌃 ॥ 𑍮𑍭 ॥

𑌸𑌾𑌹𑌾𑌯𑍍𑌯𑌂 𑌵𑌾𑌨𑌰𑍇𑌂𑌦𑍍𑌰𑌸𑍍𑌯 𑌯𑌦𑌿 𑌨𑌾𑌹𑌂 𑌹𑌨𑍂𑌮𑌤𑌃 ।
𑌕𑌰𑌿𑌷𑍍𑌯𑌾𑌮𑌿 𑌭𑌵𑌿𑌷𑍍𑌯𑌾𑌮𑌿 𑌸𑌰𑍍𑌵𑌵𑌾𑌚𑍍𑌯𑍋 𑌵𑌿𑌵𑌕𑍍𑌷𑌤𑌾𑌮𑍍 ॥ 𑍮𑍮 ॥

𑌅𑌹𑌮𑌿𑌕𑍍𑌷𑍍𑌵𑌾𑌕𑍁𑌨𑌾𑌥𑍇𑌨 𑌸𑌗𑌰𑍇𑌣 𑌵𑌿𑌵𑌰𑍍𑌧𑌿𑌤𑌃 ।
𑌇𑌕𑍍𑌷𑍍𑌵𑌾𑌕𑍁𑌸𑌚𑌿𑌵𑌶𑍍𑌚𑌾𑌯𑌂 𑌨𑌾𑌵𑌸𑍀𑌦𑌿𑌤𑍁𑌮𑌰𑍍𑌹𑌤𑌿 ॥ 𑍮𑍯 ॥

𑌤𑌥𑌾 𑌮𑌯𑌾 𑌵𑌿𑌧𑌾𑌤𑌵𑍍𑌯𑌂 𑌵𑌿𑌶𑍍𑌰𑌮𑍇𑌤 𑌯𑌥𑌾 𑌕𑌪𑌿𑌃 ॥ 𑍯0 ॥

𑌶𑍇𑌷𑌂 𑌚 𑌮𑌯𑌿 𑌵𑌿𑌶𑍍𑌰𑌾𑌂𑌤𑌃 𑌸𑍁𑌖𑍇𑌨𑌾𑌤𑌿𑌪𑌤𑌿𑌷𑍍𑌯𑌤𑌿 ।
𑌇𑌤𑌿 𑌕𑍃𑌤𑍍𑌵𑌾 𑌮𑌤𑌿𑌂 𑌸𑌾𑌧𑍍𑌵𑍀𑌂𑌸𑌮𑍁𑌦𑍍𑌰 𑌶𑍍𑌛𑌨𑍍𑌨𑌮𑌂𑌭𑌸𑌿 ॥ 𑍯1 ॥

𑌹𑌿𑌰𑌣𑍍𑌯𑌨𑌾𑌭𑌂 𑌮𑍈𑌨𑌾𑌕𑌮𑍁𑌵𑌾𑌚 𑌗𑌿𑌰𑌿𑌸𑌤𑍍𑌤𑌮𑌮𑍍 ।
𑌤𑍍𑌵𑌮𑌿𑌹𑌾𑌸𑍁𑌰𑌸𑌂𑌘𑌾𑌨𑌾𑌂 𑌪𑌾𑌤𑌾𑌲𑌤𑌲𑌵𑌾𑌸𑌿𑌨𑌾𑌮𑍍 ॥ 𑍯2 ॥

𑌦𑍇𑌵𑌰𑌾𑌜𑍍𑌞𑌾 𑌗𑌿𑌰𑌿𑌶𑍍𑌰𑍇𑌷𑍍𑌠 𑌪𑌰𑌿𑌘𑌃 𑌸𑌨𑍍𑌨𑌿𑌵𑍇𑌶𑌿𑌤𑌃 ।
𑌤𑍍𑌵𑌮𑍇𑌷𑌾𑌂 𑌜𑌾𑌤𑌵𑍀𑌰𑍍𑌯𑌾𑌣𑌾𑌂 𑌪𑍁𑌨𑌰𑍇𑌵𑍋𑌤𑍍𑌪𑌤𑌿𑌷𑍍𑌯𑌤𑌾𑌮𑍍 ॥ 𑍯3 ॥

𑌪𑌾𑌤𑌾𑌲𑌸𑍍𑌯𑌾𑌪𑍍𑌰𑌮𑍇𑌯𑌸𑍍𑌯 𑌦𑍍𑌵𑌾𑌰𑌮𑌾𑌵𑍃𑌤𑍍𑌯 𑌤𑌿𑌷𑍍𑌠𑌸𑌿 ।
𑌤𑌿𑌰𑍍𑌯𑌗𑍂𑌰𑍍𑌧𑍍𑌵𑌮𑌧𑌶𑍍𑌚𑍈𑌵 𑌶𑌕𑍍𑌤𑌿𑌸𑍍𑌤𑍇 𑌶𑍈𑌲 𑌵𑌰𑍍𑌧𑌿𑌤𑍁𑌮𑍍 ॥ 𑍯4 ॥

𑌤𑌸𑍍𑌮𑌾𑌤𑍍𑌸𑌂𑌚𑍋𑌦𑌯𑌾𑌮𑌿 𑌤𑍍𑌵𑌾𑌮𑍁𑌤𑍍𑌤𑌿𑌷𑍍𑌠 𑌗𑌿𑌰𑌿𑌸𑌤𑍍𑌤𑌮 ।
𑌸 𑌏𑌷 𑌕𑌪𑌿𑌶𑌾𑌰𑍍𑌦𑍂𑌲𑌸𑍍𑌤𑍍𑌵𑌾𑌮𑍁𑌪𑌰𑍍𑌯𑍇𑌤𑌿 𑌵𑍀𑌰𑍍𑌯𑌵𑌾𑌨𑍍 ॥ 𑍯5 ॥

𑌹𑌨𑍂𑌮𑌾𑌨𑍍𑌰𑌾𑌮𑌕𑌾𑌰𑍍𑌯𑌾𑌰𑍍𑌥𑌂 𑌭𑍀𑌮𑌕𑌰𑍍𑌮𑌾 𑌖𑌮𑌾𑌪𑍍𑌲𑍁𑌤𑌃 ।
𑌅𑌸𑍍𑌯 𑌸𑌾𑌹𑍍𑌯𑌂 𑌮𑌯𑌾 𑌕𑌾𑌰𑍍𑌯𑌮𑌿𑌕𑍍𑌷𑍍𑌵𑌾𑌕𑍁𑌕𑍁𑌲𑌵𑌰𑍍𑌤𑌿𑌨𑌃 ॥ 𑍯6 ॥

𑌮𑌮 𑌹𑍀𑌕𑍍𑌷𑍍𑌵𑌾𑌕𑌵𑌃 𑌪𑍂𑌜𑍍𑌯𑌾𑌃 𑌪𑌰𑌂 𑌪𑍂𑌜𑍍𑌯𑌤𑌮𑌾𑌸𑍍𑌤𑌵 ।
𑌕𑍁𑌰𑍁 𑌸𑌾𑌚𑌿𑌵𑍍𑌯𑌮𑌸𑍍𑌮𑌾𑌕𑌂 𑌨 𑌨𑌃 𑌕𑌾𑌰𑍍𑌯𑌮𑌤𑌿𑌕𑍍𑌰𑌮𑍇𑌤𑍍 ॥ 𑍯𑍭 ॥

𑌕𑌰𑍍𑌤𑌵𑍍𑌯𑌮𑌕𑍃𑌤𑌂 𑌕𑌾𑌰𑍍𑌯𑌂 𑌸𑌤𑌾𑌂 𑌮𑌨𑍍𑌯𑍁𑌮𑍁𑌦𑍀𑌰𑌯𑍇𑌤𑍍 ।
𑌸𑌲𑌿𑌲𑌾𑌦𑍂𑌰𑍍𑌧𑍍𑌵𑌮𑍁𑌤𑍍𑌤𑌿𑌷𑍍𑌠 𑌤𑌿𑌷𑍍𑌠𑌤𑍍𑌵𑍇𑌷 𑌕𑌪𑌿𑌸𑍍𑌤𑍍𑌵𑌯𑌿 ॥ 𑍯𑍮 ॥

𑌅𑌸𑍍𑌮𑌾𑌕𑌮𑌤𑌿𑌥𑌿𑌶𑍍𑌚𑍈𑌵 𑌪𑍂𑌜𑍍𑌯𑌶𑍍𑌚 𑌪𑍍𑌲𑌵𑌤𑌾𑌂 𑌵𑌰𑌃 ।
𑌚𑌾𑌮𑍀𑌕𑌰𑌮𑌹𑌾𑌨𑌾𑌭 𑌦𑍇𑌵𑌗𑌂𑌧𑌰𑍍𑌵𑌸𑍇𑌵𑌿𑌤 ॥ 𑍯𑍯 ॥

𑌹𑌨𑍁𑌮𑌾𑌂𑌸𑍍𑌤𑍍𑌵𑌯𑌿 𑌵𑌿𑌶𑍍𑌰𑌾𑌂𑌤𑌸𑍍𑌤𑌤𑌃 𑌶𑍇𑌷𑌂 𑌗𑌮𑌿𑌷𑍍𑌯𑌤𑌿 ।
𑌕𑌾𑌕𑍁𑌤𑍍𑌸𑍍𑌥𑌸𑍍𑌯𑌾𑌨𑍃𑌶𑌂𑌸𑍍𑌯𑌂 𑌚 𑌮𑍈𑌥𑌿𑌲𑍍𑌯𑌾𑌶𑍍𑌚 𑌵𑌿𑌵𑌾𑌸𑌨𑌮𑍍 ॥ 100 ॥

𑌶𑍍𑌰𑌮𑌂 𑌚 𑌪𑍍𑌲𑌵𑌗𑍇𑌂𑌦𑍍𑌰𑌸𑍍𑌯 𑌸𑌮𑍀𑌕𑍍𑌷𑍍𑌯𑍋𑌤𑍍𑌥𑌾𑌤𑍁𑌮𑌰𑍍𑌹𑌸𑌿 ।
𑌹𑌿𑌰𑌣𑍍𑌯𑌨𑌾𑌭𑍋 𑌮𑍈𑌨𑌾𑌕𑍋 𑌨𑌿𑌶𑌮𑍍𑌯 𑌲𑌵𑌣𑌾𑌂𑌭𑌸𑌃 ॥ 101 ॥

𑌉𑌤𑍍𑌪𑌪𑌾𑌤 𑌜𑌲𑌾𑌤𑍍𑌤𑍂𑌰𑍍𑌣𑌂 𑌮𑌹𑌾𑌦𑍍𑌰𑍁𑌮𑌲𑌤𑌾𑌯𑍁𑌤𑌃 ।
𑌸 𑌸𑌾𑌗𑌰𑌜𑌲𑌂 𑌭𑌿𑌤𑍍𑌤𑍍𑌵𑌾 𑌬𑌭𑍂𑌵𑌾𑌭𑍍𑌯𑍁𑌤𑍍𑌥𑌿𑌤𑌸𑍍𑌤𑌦𑌾 ॥ 102 ॥

𑌯𑌥𑌾 𑌜𑌲𑌧𑌰𑌂 𑌭𑌿𑌤𑍍𑌤𑍍𑌵𑌾 𑌦𑍀𑌪𑍍𑌤𑌰𑌶𑍍𑌮𑌿𑌰𑍍𑌦𑌿𑌵𑌾𑌕𑌰𑌃 ।
𑌸 𑌮𑌹𑌾𑌤𑍍𑌮𑌾 𑌮𑍁𑌹𑍂𑌰𑍍𑌤𑍇𑌨 𑌸𑌰𑍍𑌵𑌤𑌃 𑌸𑌲𑌿𑌲𑌾𑌵𑍃𑌤𑌃 ॥ 103 ॥

𑌦𑌰𑍍𑌶𑌯𑌾𑌮𑌾𑌸 𑌶𑍃𑌂𑌗𑌾𑌣𑌿 𑌸𑌾𑌗𑌰𑍇𑌣 𑌨𑌿𑌯𑍋𑌜𑌿𑌤𑌃 ।
𑌆𑌦𑌿𑌤𑍍𑌯𑍋𑌦𑌯𑌸𑌂𑌕𑌾𑌶𑍈𑌰𑌾𑌲𑌿𑌖𑌦𑍍𑌭𑌿𑌰𑌿𑌵𑌾𑌂𑌬𑌰𑌮𑍍 ।
𑌶𑌾𑌤𑌕𑍁𑌂𑌭𑌮𑌯𑍈𑌃 𑌶𑍃𑌂𑌗𑍈𑌃 𑌸𑌕𑌿𑌨𑍍𑌨𑌰𑌮𑌹𑍋𑌰𑌗𑍈𑌃 ॥ 104 ॥

𑌤𑌪𑍍𑌤𑌜𑌾𑌂𑌬𑍂𑌨𑌦𑍈𑌃 𑌶𑍃𑌂𑌗𑍈𑌃 𑌪𑌰𑍍𑌵𑌤𑌸𑍍𑌯 𑌸𑌮𑍁𑌤𑍍𑌥𑌿𑌤𑍈𑌃 ॥ 105 ॥

𑌆𑌕𑌾𑌶𑌂 𑌶𑌸𑍍𑌤𑍍𑌰𑌸𑌂𑌕𑌾𑌶𑌮𑌭𑌵𑌤𑍍𑌕𑌾𑌂𑌚𑌨𑌪𑍍𑌰𑌭𑌮𑍍 ।
𑌜𑌾𑌤𑌰𑍂𑌪𑌮𑌯𑍈𑌃 𑌶𑍃𑌂𑌗𑍈𑌰𑍍𑌭𑍍𑌰𑌾𑌜𑌮𑌾𑌨𑍈𑌃 𑌸𑍍𑌵𑌯𑌂𑌪𑍍𑌰𑌭𑍈𑌃 ॥ 106 ॥

𑌆𑌦𑌿𑌤𑍍𑌯𑌶𑌤𑌸𑌂𑌕𑌾𑌶𑌃 𑌸𑍋𑌽𑌭𑌵𑌦𑍍𑌗𑌿𑌰𑌿𑌸𑌤𑍍𑌤𑌮𑌃 ।
𑌤𑌮𑍁𑌤𑍍𑌥𑌿𑌤𑌮𑌸𑌂𑌗𑍇𑌨 𑌹𑌨𑍁𑌮𑌾𑌨𑌗𑍍𑌰𑌤𑌃 𑌸𑍍𑌥𑌿𑌤𑌮𑍍 ॥ 10𑍭 ॥

𑌮𑌧𑍍𑌯𑍇 𑌲𑌵𑌣𑌤𑍋𑌯𑌸𑍍𑌯 𑌵𑌿𑌘𑍍𑌨𑍋𑌽𑌯𑌮𑌿𑌤𑌿 𑌨𑌿𑌶𑍍𑌚𑌿𑌤𑌃 ।
𑌸 𑌤𑌮𑍁𑌚𑍍𑌛𑍍𑌰𑍍𑌰𑌤𑌮𑌤𑍍𑌯𑌰𑍍𑌥𑌂 𑌮𑌹𑌾𑌵𑍇𑌗𑍋 𑌮𑌹𑌾𑌕𑌪𑌿𑌃 ॥ 10𑍮 ॥

𑌉𑌰𑌸𑌾 𑌪𑌾𑌤𑌯𑌾𑌮𑌾𑌸 𑌜𑍀𑌮𑍂𑌤𑌮𑌿𑌵 𑌮𑌾𑌰𑍁𑌤𑌃 ।
𑌸 𑌤𑌥𑌾 𑌪𑌾𑌤𑌿𑌤𑌸𑍍𑌤𑍇𑌨 𑌕𑌪𑌿𑌨𑌾 𑌪𑌰𑍍𑌵𑌤𑍋𑌤𑍍𑌤𑌮𑌃 ॥ 10𑍯 ॥

𑌬𑍁𑌦𑍍𑌧𑍍𑌵𑌾 𑌤𑌸𑍍𑌯 𑌕𑌪𑍇𑌰𑍍𑌵𑍇𑌗𑌂 𑌜𑌹𑌰𑍍𑌷 𑌚 𑌨𑌨𑌂𑌦 𑌚 ।
𑌤𑌮𑌾𑌕𑌾𑌶𑌗𑌤𑌂 𑌵𑍀𑌰𑌮𑌾𑌕𑌾𑌶𑍇 𑌸𑌮𑍁𑌪𑌸𑍍𑌥𑌿𑌤𑌃 ॥ 110 ॥

𑌪𑍍𑌰𑍀𑌤𑍋 𑌹𑍃𑌷𑍍𑌟𑌮𑌾𑌨𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍𑌪𑌰𑍍𑌵𑌤𑌃 𑌕𑌪𑌿𑌮𑍍 ।
𑌮𑌾𑌨𑍁𑌷𑌂 𑌧𑌾𑌰𑌯𑌨𑍍 𑌰𑍂𑌪𑌮𑌾𑌤𑍍𑌮𑌨𑌃 𑌶𑌿𑌖𑌰𑍇 𑌸𑍍𑌥𑌿𑌤𑌃 ॥ 111 ॥

𑌦𑍁𑌷𑍍𑌕𑌰𑌂 𑌕𑍃𑌤𑌵𑌾𑌨𑍍𑌕𑌰𑍍𑌮 𑌤𑍍𑌵𑌮𑌿𑌦𑌂 𑌵𑌾𑌨𑌰𑍋𑌤𑍍𑌤𑌮 ।
𑌨𑌿𑌪𑌤𑍍𑌯 𑌮𑌮 𑌶𑍃𑌂𑌗𑍇𑌷𑍁 𑌵𑌿𑌶𑍍𑌰𑌮𑌸𑍍𑌵 𑌯𑌥𑌾𑌸𑍁𑌖𑌮𑍍 ॥ 112 ॥

𑌰𑌾𑌘𑌵𑌸𑍍𑌯 𑌕𑍁𑌲𑍇 𑌜𑌾𑌤𑍈𑌰𑍁𑌦𑌧𑌿𑌃 𑌪𑌰𑌿𑌵𑌰𑍍𑌧𑌿𑌤𑌃 ।
𑌸 𑌤𑍍𑌵𑌾𑌂 𑌰𑌾𑌮𑌹𑌿𑌤𑍇 𑌯𑍁𑌕𑍍𑌤𑌂 𑌪𑍍𑌰𑌤𑍍𑌯𑌰𑍍𑌚𑌯𑌤𑌿 𑌸𑌾𑌗𑌰𑌃 ॥ 113 ॥

𑌕𑍃𑌤𑍇 𑌚 𑌪𑍍𑌰𑌤𑌿𑌕𑌰𑍍𑌤𑌵𑍍𑌯𑌮𑍇𑌷 𑌧𑌰𑍍𑌮𑌃 𑌸𑌨𑌾𑌤𑌨𑌃 ।
𑌸𑍋𑌽𑌯𑌂 𑌤𑍍𑌵𑌤𑍍𑌪𑍍𑌰𑌤𑌿𑌕𑌾𑌰𑌾𑌰𑍍𑌥𑍀 𑌤𑍍𑌵𑌤𑍍𑌤𑌃 𑌸𑌮𑍍𑌮𑌾𑌨𑌮𑌰𑍍𑌹𑌤𑌿 ॥ 114 ॥

𑌤𑍍𑌵𑌨𑍍𑌨𑌿𑌮𑌿𑌤𑍍𑌤𑌮𑌨𑍇𑌨𑌾𑌹𑌂 𑌬𑌹𑍁𑌮𑌾𑌨𑌾𑌤𑍍𑌪𑍍𑌰𑌚𑍋𑌦𑌿𑌤𑌃 ।
𑌤𑌿𑌷𑍍𑌠 𑌤𑍍𑌵𑌂 𑌕𑌪𑌿𑌶𑌾𑌰𑍍𑌦𑍂𑌲 𑌮𑌯𑌿 𑌵𑌿𑌶𑍍𑌰𑌮𑍍𑌯 𑌗𑌮𑍍𑌯𑌤𑌾𑌮𑍍 ॥ 115 ॥

𑌤𑌵 𑌸𑌾𑌨𑍁𑌷𑍁 𑌵𑌿𑌶𑍍𑌰𑌾𑌂𑌤𑌃 𑌶𑍇𑌷𑌂 𑌪𑍍𑌰𑌕𑍍𑌰𑌮𑌤𑌾𑌮𑌿𑌤𑌿 ।
𑌯𑍋𑌜𑌨𑌾𑌨𑌾𑌂 𑌶𑌤𑌂 𑌚𑌾𑌪𑌿 𑌕𑌪𑌿𑌰𑍇𑌷 𑌸𑌮𑌾𑌪𑍍𑌲𑍁𑌤𑌃 ॥ 116 ॥

𑌤𑌦𑌿𑌦𑌂 𑌗𑌂𑌧𑌵𑌤𑍍𑌸𑍍𑌵𑌾𑌦𑍁 𑌕𑌂𑌦𑌮𑍂𑌲𑌫𑌲𑌂 𑌬𑌹𑍁 ।
𑌤𑌦𑌾𑌸𑍍𑌵𑌾𑌦𑍍𑌯 𑌹𑌰𑌿𑌶𑍍𑌰𑍇𑌷𑍍𑌠 𑌵𑌿𑌶𑍍𑌰𑌾𑌂𑌤𑍋𑌽𑌨𑍁 𑌗𑌮𑌿𑌷𑍍𑌯𑌸𑌿 ॥ 11𑍭 ॥

𑌅𑌸𑍍𑌮𑌾𑌕𑌮𑌪𑌿 𑌸𑌂𑌬𑌂𑌧𑌃 𑌕𑌪𑌿𑌮𑍁𑌖𑍍𑌯 𑌤𑍍𑌵𑌯𑌾𑌸𑍍𑌤𑌿 𑌵𑍈 ।
𑌪𑍍𑌰𑌖𑍍𑌯𑌾𑌤𑌸𑍍𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌮𑌹𑌾𑌗𑍁𑌣𑌪𑌰𑌿𑌗𑍍𑌰𑌹𑌃 ॥ 11𑍮 ॥

𑌵𑍇𑌗𑌵𑌂𑌤𑌃 𑌪𑍍𑌲𑌵𑌂𑌤𑍋 𑌯𑍇 𑌪𑍍𑌲𑌵𑌗𑌾 𑌮𑌾𑌰𑍁𑌤𑌾𑌤𑍍𑌮𑌜 ।
𑌤𑍇𑌷𑌾𑌂 𑌮𑍁𑌖𑍍𑌯𑌤𑌮𑌂 𑌮𑌨𑍍𑌯𑍇 𑌤𑍍𑌵𑌾𑌮𑌹𑌂 𑌕𑌪𑌿𑌕𑍁𑌂𑌜𑌰 ॥ 11𑍯 ॥

𑌅𑌤𑌿𑌥𑌿𑌃 𑌕𑌿𑌲 𑌪𑍂𑌜𑌾𑌰𑍍𑌹𑌃 𑌪𑍍𑌰𑌾𑌕𑍃𑌤𑍋𑌽𑌪𑌿 𑌵𑌿𑌜𑌾𑌨𑌤𑌾 ।
𑌧𑌰𑍍𑌮𑌂 𑌜𑌿𑌜𑍍𑌞𑌾𑌸𑌮𑌾𑌨𑍇𑌨 𑌕𑌿𑌂 𑌪𑍁𑌨𑌸𑍍𑌤𑍍𑌵𑌾𑌦𑍃𑌶𑍋 𑌮𑌹𑌾𑌨𑍍 ॥ 120 ॥

𑌤𑍍𑌵𑌂 𑌹𑌿 𑌦𑍇𑌵𑌵𑌰𑌿𑌷𑍍𑌠𑌸𑍍𑌯 𑌮𑌾𑌰𑍁𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌪𑍁𑌤𑍍𑌰𑌸𑍍𑌤𑌸𑍍𑌯𑍈𑌵 𑌵𑍇𑌗𑍇𑌨 𑌸𑌦𑍃𑌶𑌃 𑌕𑌪𑌿𑌕𑍁𑌂𑌜𑌰 ॥ 121 ॥

𑌪𑍂𑌜𑌿𑌤𑍇 𑌤𑍍𑌵𑌯𑌿 𑌧𑌰𑍍𑌮𑌜𑍍𑌞 𑌪𑍂𑌜𑌾𑌂 𑌪𑍍𑌰𑌾𑌪𑍍𑌨𑍋𑌤𑌿 𑌮𑌾𑌰𑍁𑌤𑌃 ।
𑌤𑌸𑍍𑌮𑌾𑌤𑍍𑌤𑍍𑌵𑌂 𑌪𑍂𑌜𑌨𑍀𑌯𑍋 𑌮𑍇 𑌶𑍃𑌣𑍁 𑌚𑌾𑌪𑍍𑌯𑌤𑍍𑌰 𑌕𑌾𑌰𑌣𑌮𑍍 ॥ 122 ॥

𑌪𑍂𑌰𑍍𑌵𑌂 𑌕𑍃𑌤𑌯𑍁𑌗𑍇 𑌤𑌾𑌤 𑌪𑌰𑍍𑌵𑌤𑌾𑌃 𑌪𑌕𑍍𑌷𑌿𑌣𑍋𑌽𑌭𑌵𑌨𑍍 ।
𑌤𑍇 𑌹𑌿 𑌜𑌗𑍍𑌮𑍁𑌰𑍍𑌦𑌿𑌶𑌃 𑌸𑌰𑍍𑌵𑌾 𑌗𑌰𑍁𑌡𑌾𑌨𑌿𑌲𑌵𑍇𑌗𑌿𑌨𑌃 ॥ 123 ॥

𑌤𑌤𑌸𑍍𑌤𑍇𑌷𑍁 𑌪𑍍𑌰𑌯𑌾𑌤𑍇𑌷𑍁 𑌦𑍇𑌵𑌸𑌂𑌘𑌾𑌃 𑌮𑌹𑌰𑍍𑌷𑌿𑌭𑌿𑌃 ।
𑌭𑍂𑌤𑌾𑌨𑌿 𑌚 𑌭𑌯𑌂 𑌜𑌗𑍍𑌮𑍁𑌸𑍍𑌤𑍇𑌷𑌾𑌂 𑌪𑌤𑌨𑌶𑌂𑌕𑌯𑌾 ॥ 124 ॥

𑌤𑌤𑌃 𑌕𑍍𑌰𑍁𑌦𑍍𑌧𑌃 𑌸𑌹𑌸𑍍𑌰𑌾𑌕𑍍𑌷𑌃 𑌪𑌰𑍍𑌵𑌤𑌾𑌨𑌾𑌂 𑌶𑌤𑌕𑍍𑌰𑌤𑍁𑌃 ।
𑌪𑌕𑍍𑌷𑌾𑌨𑍍 𑌚𑌿𑌚𑍍𑌛𑍇𑌦 𑌵𑌜𑍍𑌰𑍇𑌣 𑌤𑌤𑍍𑌰 𑌤𑌤𑍍𑌰 𑌸𑌹𑌸𑍍𑌰𑌶𑌃 ॥ 125 ॥

𑌸 𑌮𑌾𑌮𑍁𑌪𑌾𑌗𑌤𑌃 𑌕𑍍𑌰𑍁𑌦𑍍𑌧𑍋 𑌵𑌜𑍍𑌰𑌮𑍁𑌦𑍍𑌯𑌮𑍍𑌯 𑌦𑍇𑌵𑌰𑌾𑌟𑍍 ।
𑌤𑌤𑍋𑌽𑌹𑌂 𑌸𑌹𑌸𑌾 𑌕𑍍𑌷𑌿𑌪𑍍𑌤𑌃 𑌶𑍍𑌵𑌸𑌨𑍇𑌨 𑌮𑌹𑌾𑌤𑍍𑌮𑌨𑌾 ॥ 126 ॥

𑌅𑌸𑍍𑌮𑌿𑌨𑍍𑌲𑌵𑌣𑌤𑍋𑌯𑍇 𑌚 𑌪𑍍𑌰𑌕𑍍𑌷𑌿𑌪𑍍𑌤𑌃 𑌪𑍍𑌲𑌵𑌗𑍋𑌤𑍍𑌤𑌮 ।
𑌗𑍁𑌪𑍍𑌤𑌪𑌕𑍍𑌷𑌸𑌮𑌗𑍍𑌰𑌶𑍍𑌚 𑌤𑌵 𑌪𑌿𑌤𑍍𑌰𑌾𑌭𑌿𑌰𑌕𑍍𑌷𑌿𑌤𑌃 ॥ 12𑍭 ॥

𑌤𑌤𑍋𑌽𑌹𑌂 𑌮𑌾𑌨𑌯𑌾𑌮𑌿 𑌤𑍍𑌵𑌾𑌂 𑌮𑌾𑌨𑍍𑌯𑍋 𑌹𑌿 𑌮𑌮 𑌮𑌾𑌰𑍁𑌤𑌃 ।
𑌤𑍍𑌵𑌯𑌾 𑌮𑍇 𑌹𑍍𑌯𑍇𑌷 𑌸𑌂𑌬𑌂𑌧𑌃 𑌕𑌪𑌿𑌮𑍁𑌖𑍍𑌯 𑌮𑌹𑌾𑌗𑍁𑌣𑌃 ॥ 12𑍮 ॥

𑌅𑌸𑍍𑌮𑌿𑌨𑍍𑌨𑍇𑌵𑌂𑌗𑌤𑍇 𑌕𑌾𑌰𑍍𑌯𑍇 𑌸𑌾𑌗𑌰𑌸𑍍𑌯 𑌮𑌮𑍈𑌵 𑌚 ।
𑌪𑍍𑌰𑍀𑌤𑌿𑌂 𑌪𑍍𑌰𑍀𑌤𑌮𑌨𑌾𑌃 𑌕𑌰𑍍𑌤𑍁𑌂 𑌤𑍍𑌵𑌮𑌰𑍍𑌹𑌸𑌿 𑌮𑌹𑌾𑌕𑌪𑍇 ॥ 12𑍯 ॥

𑌶𑍍𑌰𑌮𑌂 𑌮𑍋𑌕𑍍𑌷𑌯 𑌪𑍂𑌜𑌾𑌂 𑌚 𑌗𑍃𑌹𑌾𑌣 𑌕𑌪𑌿𑌸𑌤𑍍𑌤𑌮 ।
𑌪𑍍𑌰𑍀𑌤𑌿𑌂 𑌚 𑌬𑌹𑍁𑌮𑌨𑍍𑌯𑌸𑍍𑌵 𑌪𑍍𑌰𑍀𑌤𑍋𑌽𑌸𑍍𑌮𑌿 𑌤𑌵 𑌦𑌰𑍍𑌶𑌨𑌾𑌤𑍍 ॥ 130 ॥

𑌏𑌵𑌮𑍁𑌕𑍍𑌤𑌃 𑌕𑌪𑌿𑌶𑍍𑌰𑍇𑌷𑍍𑌠𑌸𑍍𑌤𑌂 𑌨𑌗𑍋𑌤𑍍𑌤𑌮𑌮𑌬𑍍𑌰𑌵𑍀𑌤𑍍 ।
𑌪𑍍𑌰𑍀𑌤𑍋𑌽𑌸𑍍𑌮𑌿 𑌕𑍃𑌤𑌮𑌾𑌤𑌿𑌥𑍍𑌯𑌂 𑌮𑌨𑍍𑌯𑍁𑌰𑍇𑌷𑍋𑌽𑌪𑌨𑍀𑌯𑌤𑌾𑌮𑍍 ॥ 131 ॥

𑌤𑍍𑌵𑌰𑌤𑍇 𑌕𑌾𑌰𑍍𑌯𑌕𑌾𑌲𑍋 𑌮𑍇 𑌅𑌹𑌶𑍍𑌚𑌾𑌪𑍍𑌯𑌤𑌿𑌵𑌰𑍍𑌤𑌤𑍇 ।
𑌪𑍍𑌰𑌤𑌿𑌜𑍍𑌞𑌾 𑌚 𑌮𑌯𑌾 𑌦𑌤𑍍𑌤𑌾 𑌨 𑌸𑍍𑌥𑌾𑌤𑌵𑍍𑌯𑌮𑌿𑌹𑌾𑌂𑌤𑌰𑍇 ॥ 132 ॥

𑌇𑌤𑍍𑌯𑍁𑌕𑍍𑌤𑍍𑌵𑌾 𑌪𑌾𑌣𑌿𑌨𑌾 𑌶𑍈𑌲𑌮𑌾𑌲𑌭𑍍𑌯 𑌹𑌰𑌿𑌪𑍁𑌂𑌗𑌵𑌃 ।
𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌵𑍀𑌰𑍍𑌯𑌵𑌾𑌨𑍍 𑌪𑍍𑌰𑌹𑌸𑌨𑍍𑌨𑌿𑌵 ॥ 133 ॥

𑌸 𑌪𑌰𑍍𑌵𑌤𑌸𑌮𑍁𑌦𑍍𑌰𑌾𑌭𑍍𑌯𑌾𑌂 𑌬𑌹𑍁𑌮𑌾𑌨𑌾𑌦𑌵𑍇𑌕𑍍𑌷𑌿𑌤𑌃 ।
𑌪𑍂𑌜𑌿𑌤𑌶𑍍𑌚𑍋𑌪𑌪𑌨𑍍𑌨𑌾𑌭𑌿𑌰𑌾𑌶𑍀𑌰𑍍𑌭𑌿𑌰𑌨𑌿𑌲𑌾𑌤𑍍𑌮𑌜𑌃 ॥ 134 ॥

𑌅𑌥𑍋𑌰𑍍𑌧𑍍𑌵𑌂 𑌦𑍂𑌰𑌮𑍁𑌤𑍍𑌪𑍍𑌲𑍁𑌤𑍍𑌯 𑌹𑌿𑌤𑍍𑌵𑌾 𑌶𑍈𑌲𑌮𑌹𑌾𑌰𑍍𑌣𑌵𑍌 ।
𑌪𑌿𑌤𑍁𑌃 𑌪𑌂𑌥𑌾𑌨𑌮𑌾𑌸𑍍𑌥𑌾𑌯 𑌜𑌗𑌾𑌮 𑌵𑌿𑌮𑌲𑍇𑌽𑌂𑌬𑌰𑍇 ॥ 135 ॥

𑌭𑍂𑌯𑌶𑍍𑌚𑍋𑌰𑍍𑌧𑍍𑌵𑌂 𑌗𑌤𑌿𑌂 𑌪𑍍𑌰𑌾𑌪𑍍𑌯 𑌗𑌿𑌰𑌿𑌂 𑌤𑌮𑌵𑌲𑍋𑌕𑌯𑌨𑍍 ।
𑌵𑌾𑌯𑍁𑌸𑍂𑌨𑍁𑌰𑍍𑌨𑌿𑌰𑌾𑌲𑌂𑌬𑍇 𑌜𑌗𑌾𑌮 𑌵𑌿𑌮𑌲𑍇𑌽𑌂𑌬𑌰𑍇 ॥ 136 ॥

𑌤𑌦𑍍 𑌦𑍍𑌵𑌿𑌤𑍀𑌯𑌂 𑌹𑌨𑍁𑌮𑌤𑍋 𑌦𑍃𑌷𑍍𑌟𑍍𑌵𑌾 𑌕𑌰𑍍𑌮 𑌸𑍁𑌦𑍁𑌷𑍍𑌕𑌰𑌮𑍍 ।
𑌪𑍍𑌰𑌶𑌶𑌂𑌸𑍁𑌃 𑌸𑍁𑌰𑌾𑌃 𑌸𑌰𑍍𑌵𑍇 𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ॥ 13𑍭 ॥

𑌦𑍇𑌵𑌤𑌾𑌶𑍍𑌚𑌾𑌭𑌵𑌨𑍍 𑌹𑍃𑌷𑍍𑌟𑌾𑌸𑍍𑌤𑌤𑍍𑌰𑌸𑍍𑌥𑌾𑌸𑍍𑌤𑌸𑍍𑌯 𑌕𑌰𑍍𑌮𑌣𑌾 ।
𑌕𑌾𑌂𑌚𑌨𑌸𑍍𑌯 𑌸𑍁𑌨𑌾𑌭𑌸𑍍𑌯 𑌸𑌹𑌸𑍍𑌰𑌾𑌕𑍍𑌷𑌶𑍍𑌚 𑌵𑌾𑌸𑌵𑌃 ॥ 13𑍮 ॥

𑌉𑌵𑌾𑌚 𑌵𑌚𑌨𑌂 𑌧𑍀𑌮𑌾𑌨𑍍 𑌪𑌰𑌿𑌤𑍋𑌷𑌾𑌤𑍍𑌸𑌗𑌦𑍍𑌗𑌦𑌮𑍍 ।
𑌸𑍁𑌨𑌾𑌭𑌂 𑌪𑌰𑍍𑌵𑌤𑌶𑍍𑌰𑍇𑌷𑍍𑌠𑌂 𑌸𑍍𑌵𑌯𑌮𑍇𑌵 𑌶𑌚𑍀𑌪𑌤𑌿𑌃 ॥ 13𑍯 ॥

𑌹𑌿𑌰𑌣𑍍𑌯𑌨𑌾𑌭 𑌶𑍈𑌲𑍇𑌂𑌦𑍍𑌰 𑌪𑌰𑌿𑌤𑍁𑌷𑍍𑌟𑍋𑌽𑌸𑍍𑌮𑌿 𑌤𑍇 𑌭𑍃𑌶𑌮𑍍 ।
𑌅𑌭𑌯𑌂 𑌤𑍇 𑌪𑍍𑌰𑌯𑌚𑍍𑌛𑌾𑌮𑌿 𑌤𑌿𑌷𑍍𑌠 𑌸𑍌𑌮𑍍𑌯 𑌯𑌥𑌾𑌸𑍁𑌖𑌮𑍍 ॥ 140 ॥

𑌸𑌾𑌹𑍍𑌯𑌂 𑌕𑍃𑌤𑌂 𑌤𑍇 𑌸𑍁𑌮𑌹𑌦𑍍𑌵𑌿𑌕𑍍𑌰𑌾𑌂𑌤𑌸𑍍𑌯 𑌹𑌨𑍂𑌮𑌤𑌃 ।
𑌕𑍍𑌰𑌮𑌤𑍋 𑌯𑍋𑌜𑌨𑌶𑌤𑌂 𑌨𑌿𑌰𑍍𑌭𑌯𑌸𑍍𑌯 𑌭𑌯𑍇 𑌸𑌤𑌿 ॥ 141 ॥

𑌰𑌾𑌮𑌸𑍍𑌯𑍈𑌷 𑌹𑌿𑌤𑌾𑌯𑍈𑌵 𑌯𑌾𑌤𑌿 𑌦𑌾𑌶𑌰𑌥𑍇𑌰𑍍𑌹𑌰𑌿𑌃 ।
𑌸𑌤𑍍𑌕𑍍𑌰𑌿𑌯𑌾𑌂 𑌕𑍁𑌰𑍍𑌵𑌤𑌾 𑌤𑌸𑍍𑌯 𑌤𑍋𑌷𑌿𑌤𑍋𑌽𑌸𑍍𑌮𑌿 𑌦𑍃𑌢𑌂 𑌤𑍍𑌵𑌯𑌾 ॥ 142 ॥

𑌤𑌤𑌃 𑌪𑍍𑌰𑌹𑌰𑍍𑌷𑌮𑌗𑌮𑌦𑍍𑌵𑌿𑌪𑍁𑌲𑌂 𑌪𑌰𑍍𑌵𑌤𑍋𑌤𑍍𑌤𑌮𑌃 ।
𑌦𑍇𑌵𑌤𑌾𑌨𑌾𑌂 𑌪𑌤𑌿𑌂 𑌦𑍃𑌷𑍍𑌟𑍍𑌵𑌾 𑌪𑌰𑌿𑌤𑍁𑌷𑍍𑌟𑌂 𑌶𑌤𑌕𑍍𑌰𑌤𑍁𑌮𑍍 ॥ 143 ॥

𑌸 𑌵𑍈 𑌦𑌤𑍍𑌤𑌵𑌰𑌃 𑌶𑍈𑌲𑍋 𑌬𑌭𑍂𑌵𑌾𑌵𑌸𑍍𑌥𑌿𑌤𑌸𑍍𑌤𑌦𑌾 ।
𑌹𑌨𑍁𑌮𑌾𑌂𑌶𑍍𑌚 𑌮𑍁𑌹𑍂𑌰𑍍𑌤𑍇𑌨 𑌵𑍍𑌯𑌤𑌿𑌚𑌕𑍍𑌰𑌾𑌮 𑌸𑌾𑌗𑌰𑌮𑍍 ॥ 144 ॥

𑌤𑌤𑍋 𑌦𑍇𑌵𑌾𑌃 𑌸𑌗𑌂𑌧𑌰𑍍𑌵𑌾𑌃 𑌸𑌿𑌦𑍍𑌧𑌾𑌶𑍍𑌚 𑌪𑌰𑌮𑌰𑍍𑌷𑌯𑌃 ।
𑌅𑌬𑍍𑌰𑍁𑌵𑌨𑍍 𑌸𑍂𑌰𑍍𑌯𑌸𑌂𑌕𑌾𑌶𑌾𑌂 𑌸𑍁𑌰𑌸𑌾𑌂 𑌨𑌾𑌗𑌮𑌾𑌤𑌰𑌮𑍍 ॥ 145 ॥

𑌅𑌯𑌂 𑌵𑌾𑌤𑌾𑌤𑍍𑌮𑌜𑌃 𑌶𑍍𑌰𑍀𑌮𑌾𑌨𑍍𑌪𑍍𑌲𑌵𑌤𑍇 𑌸𑌾𑌗𑌰𑍋𑌪𑌰𑌿 ।
𑌹𑌨𑍁𑌮𑌾𑌨𑍍𑌨𑌾𑌮 𑌤𑌸𑍍𑌯 𑌤𑍍𑌵𑌂 𑌮𑍁𑌹𑍂𑌰𑍍𑌤𑌂 𑌵𑌿𑌘𑍍𑌨𑌮𑌾𑌚𑌰 ॥ 146 ॥

𑌰𑌾𑌕𑍍𑌷𑌸𑌂 𑌰𑍂𑌪𑌮𑌾𑌸𑍍𑌥𑌾𑌯 𑌸𑍁𑌘𑍋𑌰𑌂 𑌪𑌰𑍍𑌵𑌤𑍋𑌪𑌮𑌮𑍍 ।
𑌦𑌂𑌷𑍍𑌟𑍍𑌰𑌾𑌕𑌰𑌾𑌲𑌂 𑌪𑌿𑌂𑌗𑌾𑌕𑍍𑌷𑌂 𑌵𑌕𑍍𑌤𑍍𑌰𑌂 𑌕𑍃𑌤𑍍𑌵𑌾 𑌨𑌭𑌃 𑌸𑌮𑌮𑍍 ॥ 14𑍭 ॥

𑌬𑌲𑌮𑌿𑌚𑍍𑌛𑌾𑌮𑌹𑍇 𑌜𑍍𑌞𑌾𑌤𑍁𑌂 𑌭𑍂𑌯𑌶𑍍𑌚𑌾𑌸𑍍𑌯 𑌪𑌰𑌾𑌕𑍍𑌰𑌮𑌮𑍍 ।
𑌤𑍍𑌵𑌾𑌂 𑌵𑌿𑌜𑍇𑌷𑍍𑌯𑌤𑍍𑌯𑍁𑌪𑌾𑌯𑍇𑌨 𑌵𑌿𑌷𑌾𑌦𑌂 𑌵𑌾 𑌗𑌮𑌿𑌷𑍍𑌯𑌤𑌿 ॥ 14𑍮 ॥

𑌏𑌵𑌮𑍁𑌕𑍍𑌤𑌾 𑌤𑍁 𑌸𑌾 𑌦𑍇𑌵𑍀 𑌦𑍈𑌵𑌤𑍈𑌰𑌭𑌿𑌸𑌤𑍍𑌕𑍃𑌤𑌾 ।
𑌸𑌮𑍁𑌦𑍍𑌰𑌮𑌧𑍍𑌯𑍇 𑌸𑍁𑌰𑌸𑌾 𑌬𑌿𑌭𑍍𑌰𑌤𑍀 𑌰𑌾𑌕𑍍𑌷𑌸𑌂 𑌵𑌪𑍁𑌃 ॥ 14𑍯 ॥

𑌵𑌿𑌕𑍃𑌤𑌂 𑌚 𑌵𑌿𑌰𑍂𑌪𑌂 𑌚 𑌸𑌰𑍍𑌵𑌸𑍍𑌯 𑌚 𑌭𑌯𑌾𑌵𑌹𑌮𑍍 ।
𑌪𑍍𑌲𑌵𑌮𑌾𑌨𑌂 𑌹𑌨𑍂𑌮𑌂𑌤𑌮𑌾𑌵𑍃𑌤𑍍𑌯𑍇𑌦𑌮𑍁𑌵𑌾𑌚 𑌹 ॥ 150 ॥

𑌮𑌮 𑌭𑌕𑍍𑌷𑌃 𑌪𑍍𑌰𑌦𑌿𑌷𑍍𑌟𑌸𑍍𑌤𑍍𑌵𑌮𑍀𑌶𑍍𑌵𑌰𑍈𑌰𑍍𑌵𑌾𑌨𑌰𑌰𑍍𑌷𑌭 ।
𑌅𑌹𑌂 𑌤𑍍𑌵𑌾𑌂 𑌭𑌕𑍍𑌷𑌯𑌿𑌷𑍍𑌯𑌾𑌮𑌿 𑌪𑍍𑌰𑌵𑌿𑌶𑍇𑌦𑌂 𑌮𑌮𑌾𑌨𑌨𑌮𑍍 ॥ 151 ॥

𑌏𑌵𑌮𑍁𑌕𑍍𑌤𑌃 𑌸𑍁𑌰𑌸𑌯𑌾 𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌨𑌰𑌰𑍍𑌷𑌭𑌃 ।
𑌪𑍍𑌰𑌹𑍃𑌷𑍍𑌟𑌵𑌦𑌨𑌃 𑌶𑍍𑌰𑍀𑌮𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 152 ॥

𑌰𑌾𑌮𑍋 𑌦𑌾𑌶𑌰𑌥𑌿𑌰𑍍𑌨𑌾𑌮 𑌪𑍍𑌰𑌵𑌿𑌷𑍍𑌟𑍋 𑌦𑌂𑌡𑌕𑌾𑌵𑌨𑌮𑍍 ।
𑌲𑌕𑍍𑌷𑍍𑌮𑌣𑍇𑌨 𑌸𑌹 𑌭𑍍𑌰𑌾𑌤𑍍𑌰𑌾 𑌵𑍈𑌦𑍇𑌹𑍍𑌯𑌾 𑌚𑌾𑌪𑌿 𑌭𑌾𑌰𑍍𑌯𑌯𑌾 ॥ 153 ॥

𑌅𑌨𑍍𑌯𑌕𑌾𑌰𑍍𑌯𑌵𑌿𑌷𑌕𑍍𑌤𑌸𑍍𑌯 𑌬𑌦𑍍𑌧𑌵𑍈𑌰𑌸𑍍𑌯 𑌰𑌾𑌕𑍍𑌷𑌸𑍈𑌃 ।
𑌤𑌸𑍍𑌯 𑌸𑍀𑌤𑌾 𑌹𑍃𑌤𑌾 𑌭𑌾𑌰𑍍𑌯𑌾 𑌰𑌾𑌵𑌣𑍇𑌨 𑌯𑌶𑌸𑍍𑌵𑌿𑌨𑍀 ॥ 154 ॥

𑌤𑌸𑍍𑌯𑌾𑌃 𑌸𑌕𑌾𑌶𑌂 𑌦𑍂𑌤𑍋𑌽𑌹𑌂 𑌗𑌮𑌿𑌷𑍍𑌯𑍇 𑌰𑌾𑌮𑌶𑌾𑌸𑌨𑌾𑌤𑍍 ।
𑌕𑌰𑍍𑌤𑍁𑌮𑌰𑍍𑌹𑌸𑌿 𑌰𑌾𑌮𑌸𑍍𑌯 𑌸𑌾𑌹𑍍𑌯𑌂 𑌵𑌿𑌷𑌯𑌵𑌾𑌸𑌿𑌨𑌿 ॥ 155 ॥

𑌅𑌥𑌵𑌾 𑌮𑍈𑌥𑌿𑌲𑍀𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌂 𑌚𑌾𑌕𑍍𑌲𑌿𑌷𑍍𑌟𑌕𑌾𑌰𑌿𑌣𑌮𑍍 ।
𑌆𑌗𑌮𑌿𑌷𑍍𑌯𑌾𑌮𑌿 𑌤𑍇 𑌵𑌕𑍍𑌤𑍍𑌰𑌂 𑌸𑌤𑍍𑌯𑌂 𑌪𑍍𑌰𑌤𑌿𑌶𑍃𑌣𑍋𑌮𑌿 𑌤𑍇 ॥ 156 ॥

𑌏𑌵𑌮𑍁𑌕𑍍𑌤𑌾 𑌹𑌨𑍁𑌮𑌤𑌾 𑌸𑍁𑌰𑌸𑌾 𑌕𑌾𑌮𑌰𑍂𑌪𑌿𑌣𑍀 ।
𑌅𑌬𑍍𑌰𑌵𑍀𑌨𑍍𑌨𑌾𑌤𑌿𑌵𑌰𑍍𑌤𑍇𑌨𑍍𑌮𑌾𑌂 𑌕𑌶𑍍𑌚𑌿𑌦𑍇𑌷 𑌵𑌰𑍋 𑌮𑌮 ॥ 15𑍭 ॥

𑌤𑌂 𑌪𑍍𑌰𑌯𑌾𑌂𑌤𑌂 𑌸𑌮𑍁𑌦𑍍𑌵𑍀𑌕𑍍𑌷𑍍𑌯 𑌸𑍁𑌰𑌸𑌾 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌬𑌲𑌂 𑌜𑌿𑌜𑍍𑌞𑌾𑌸𑌮𑌾𑌨𑌾 𑌵𑍈 𑌨𑌾𑌗𑌮𑌾𑌤𑌾 𑌹𑌨𑍂𑌮𑌤𑌃 ॥ 15𑍮 ॥

𑌪𑍍𑌰𑌵𑌿𑌶𑍍𑌯 𑌵𑌦𑌨𑌂 𑌮𑍇𑌽𑌦𑍍𑌯 𑌗𑌂𑌤𑌵𑍍𑌯𑌂 𑌵𑌾𑌨𑌰𑍋𑌤𑍍𑌤𑌮 ।
𑌵𑌰 𑌏𑌷 𑌪𑍁𑌰𑌾 𑌦𑌤𑍍𑌤𑍋 𑌮𑌮 𑌧𑌾𑌤𑍍𑌰𑍇𑌤𑌿 𑌸𑌤𑍍𑌵𑌰𑌾 ॥ 15𑍯 ॥

𑌵𑍍𑌯𑌾𑌦𑌾𑌯 𑌵𑌿𑌪𑍁𑌲𑌂 𑌵𑌕𑍍𑌤𑍍𑌰𑌂 𑌸𑍍𑌥𑌿𑌤𑌾 𑌸𑌾 𑌮𑌾𑌰𑍁𑌤𑍇𑌃 𑌪𑍁𑌰𑌃 ।
𑌏𑌵𑌮𑍁𑌕𑍍𑌤𑌃 𑌸𑍁𑌰𑌸𑌯𑌾 𑌕𑍍𑌰𑍁𑌦𑍍𑌧𑍋 𑌵𑌾𑌨𑌰𑌪𑍁𑌂𑌗𑌵𑌃 ॥ 160 ॥

𑌅𑌬𑍍𑌰𑌵𑍀𑌤𑍍𑌕𑍁𑌰𑍁 𑌵𑍈 𑌵𑌕𑍍𑌤𑍍𑌰𑌂 𑌯𑍇𑌨 𑌮𑌾𑌂 𑌵𑌿𑌷𑌹𑌿𑌷𑍍𑌯𑌸𑍇 ।
𑌇𑌤𑍍𑌯𑍁𑌕𑍍𑌤𑍍𑌵𑌾 𑌸𑍁𑌰𑌸𑌾𑌂 𑌕𑍍𑌰𑍁𑌦𑍍𑌧𑍋 𑌧𑌶𑌯𑍋𑌜𑌨𑌮𑌾𑌯𑌤𑌾 ॥ 161 ॥

𑌦𑌶𑌯𑍋𑌜𑌨𑌵𑌿𑌸𑍍𑌤𑌾𑌰𑍋 𑌬𑌭𑍂𑌵 𑌹𑌨𑍁𑌮𑌾𑌂𑌸𑍍𑌤𑌦𑌾 ।
𑌤𑌂 𑌦𑍃𑌷𑍍𑌟𑍍𑌵𑌾 𑌮𑍇𑌘𑌸𑌂𑌕𑌾𑌶𑌂 𑌦𑌶𑌯𑍋𑌜𑌨𑌮𑌾𑌯𑌤𑌮𑍍 ॥ 162 ॥

𑌚𑌕𑌾𑌰 𑌸𑍁𑌰𑌸𑌾 𑌚𑌾𑌸𑍍𑌯𑌂 𑌵𑌿𑌂𑌶𑌦𑍍𑌯𑍋𑌜𑌨𑌮𑌾𑌯𑌤𑌮𑍍 ।
𑌹𑌨𑍁𑌮𑌾𑌂𑌸𑍍𑌤𑍁 𑌤𑌤𑌃 𑌕𑍍𑌰𑍁𑌦𑍍𑌧𑌸𑍍𑌤𑍍𑌰𑌿𑌂𑌶𑌦𑍍𑌯𑍋𑌜𑌨𑌮𑌾𑌯𑌤𑌃 ॥ 163 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌂 𑌚𑌤𑍍𑌵𑌾𑌰𑌿𑌂𑌶𑌤𑍍𑌤𑌥𑍋𑌚𑍍𑌛𑍍𑌰𑌿𑌤𑌮𑍍 ।
𑌬𑌭𑍂𑌵 𑌹𑌨𑍁𑌮𑌾𑌵𑌨𑍀𑌰𑌃 𑌪𑌂𑌚𑌾𑌶𑌦𑍍𑌯𑍋𑌜𑌨𑍋𑌚𑍍𑌛𑍍𑌰𑌿𑌤𑌃 ॥ 164 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌂 𑌷𑌷𑍍𑌟𑌿𑌯𑍋𑌜𑌨𑌮𑌾𑌯𑌤𑌮𑍍 ।
𑌤𑌥𑍈𑌵 𑌹𑌨𑍁𑌮𑌾𑌵𑌨𑍀𑌰𑌃 𑌸𑌪𑍍𑌤𑌤𑍀𑌯𑍋𑌜𑌨𑍋𑌚𑍍𑌛𑍍𑌰𑌿𑌤𑌃 ॥ 165 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌮𑌶𑍀𑌤𑍀𑌯𑍋𑌜𑌨𑌾𑌯𑌤𑌮𑍍 ।
𑌹𑌨𑍁𑌮𑌾𑌨𑌚𑌲𑌪𑍍𑌰𑌖𑍍𑌯𑍋 𑌨𑌵𑌤𑍀𑌯𑍋𑌜𑌨𑍋𑌚𑍍𑌛𑍍𑌰𑌿𑌤𑌃 ॥ 166 ॥

𑌚𑌕𑌾𑌰 𑌸𑍁𑌰𑌸𑌾 𑌵𑌕𑍍𑌤𑍍𑌰𑌂 𑌶𑌤𑌯𑍋𑌜𑌨𑌮𑌾𑌯𑌤𑌂 𑌤𑌵 𑌸𑌾𑌨𑍁𑌷𑍁 𑌵𑌿𑌶𑍍𑌰𑌾𑌂𑌤𑌃 𑌶𑍇𑌷𑌂 𑌪𑍍𑌰𑌕𑍍𑌰𑌮𑌤𑌾𑌮𑌿𑌤𑌿 ।
𑌤𑌦𑍍𑌦𑍃𑌷𑍍𑌟𑍍𑌵𑌾 𑌵𑍍𑌯𑌾𑌦𑌿𑌤𑌂 𑌤𑍍𑌵𑌾𑌸𑍍𑌯𑌂 𑌵𑌾𑌯𑍁𑌪𑍁𑌤𑍍𑌰𑌃 𑌸𑍁𑌬𑍁𑌦𑍍𑌧𑌿𑌮𑌾𑌨𑍍 ।
𑌦𑍀𑌰𑍍𑌘𑌜𑌿𑌹𑍍𑌵𑌂 𑌸𑍁𑌰𑌸𑌯𑌾 𑌸𑍁𑌘𑍋𑌰𑌂 𑌨𑌰𑌕𑍋𑌪𑌮𑌮𑍍 ॥ 16𑍭 ॥

𑌸𑍁𑌸𑌂𑌕𑍍𑌷𑌿𑌪𑍍𑌯𑌾𑌤𑍍𑌮𑌨𑌃 𑌕𑌾𑌯𑌂 𑌬𑌭𑍂𑌵𑌾𑌂𑌗𑍁𑌷𑍍𑌠𑌮𑌾𑌤𑍍𑌰𑌕𑌃 ।
𑌸𑍋𑌽𑌭𑌿𑌪𑌤𑍍𑌯𑌾𑌶𑍁 𑌤𑌦𑍍𑌵𑌕𑍍𑌤𑍍𑌰𑌂 𑌨𑌿𑌷𑍍𑌪𑌤𑍍𑌯 𑌚 𑌮𑌹𑌾𑌬𑌲𑌃 ।
𑌅𑌂𑌤𑌰𑌿𑌕𑍍𑌷𑍇 𑌸𑍍𑌥𑌿𑌤𑌃 𑌶𑍍𑌰𑍀𑌮𑌾𑌨𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 16𑍮 ॥

𑌪𑍍𑌰𑌵𑌿𑌷𑍍𑌟𑍋𑌽𑌸𑍍𑌮𑌿 𑌹𑌿 𑌤𑍇 𑌵𑌕𑍍𑌤𑍍𑌰𑌂 𑌦𑌾𑌕𑍍𑌷𑌾𑌯𑌣𑌿 𑌨𑌮𑍋𑌽𑌸𑍍𑌤𑍁 𑌤𑍇 ।
𑌗𑌮𑌿𑌷𑍍𑌯𑍇 𑌯𑌤𑍍𑌰 𑌵𑍈𑌦𑍇𑌹𑍀 𑌸𑌤𑍍𑌯𑌂 𑌚𑌾𑌸𑍀𑌦𑍍𑌵𑌰𑌸𑍍𑌤𑌵 ॥ 16𑍯 ॥

𑌤𑌂 𑌦𑍃𑌷𑍍𑌟𑍍𑌵𑌾 𑌵𑌦𑌨𑌾𑌨𑍍𑌮𑍁𑌕𑍍𑌤𑌂 𑌚𑌂𑌦𑍍𑌰𑌂 𑌰𑌾𑌹𑍁𑌮𑍁𑌖𑌾𑌦𑌿𑌵 ।
𑌅𑌬𑍍𑌰𑌵𑍀𑌤𑍍𑌸𑍁𑌰𑌸𑌾 𑌦𑍇𑌵𑍀 𑌸𑍍𑌵𑍇𑌨 𑌰𑍂𑌪𑍇𑌣 𑌵𑌾𑌨𑌰𑌮𑍍 ॥ 1𑍭0 ॥

𑌅𑌰𑍍𑌥𑌸𑌿𑌦𑍍𑌧𑍍𑌯𑍈 𑌹𑌰𑌿𑌶𑍍𑌰𑍇𑌷𑍍𑌠 𑌗𑌚𑍍𑌛 𑌸𑍌𑌮𑍍𑌯 𑌯𑌥𑌾𑌸𑍁𑌖𑌮𑍍 ।
𑌸𑌮𑌾𑌨𑌯𑌸𑍍𑌵 𑌵𑍈𑌦𑍇𑌹𑍀𑌂 𑌰𑌾𑌘𑌵𑍇𑌣 𑌮𑌹𑌾𑌤𑍍𑌮𑌨𑌾 ॥ 1𑍭1 ॥

𑌤𑌤𑍍𑌤𑍃𑌤𑍀𑌯𑌂 𑌹𑌨𑍁𑌮𑌤𑍋 𑌦𑍃𑌷𑍍𑌟𑍍𑌵𑌾 𑌕𑌰𑍍𑌮 𑌸𑍁𑌦𑍁𑌷𑍍𑌕𑌰𑌮𑍍 ।
𑌸𑌾𑌧𑍁 𑌸𑌾𑌧𑍍𑌵𑌿𑌤𑌿 𑌭𑍂𑌤𑌾𑌨𑌿 𑌪𑍍𑌰𑌶𑌶𑌂𑌸𑍁𑌸𑍍𑌤𑌦𑌾 𑌹𑌰𑌿𑌮𑍍 ॥ 1𑍭2 ॥

𑌸 𑌸𑌾𑌗𑌰𑌮𑌨𑌾𑌧𑍃𑌷𑍍𑌯𑌮𑌭𑍍𑌯𑍇𑌤𑍍𑌯 𑌵𑌰𑍁𑌣𑌾𑌲𑌯𑌮𑍍 ।
𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌵𑍇𑌗𑍇𑌨 𑌗𑌰𑍁𑌡𑍋𑌪𑌮𑌃 ॥ 1𑍭3 ॥

𑌸𑍇𑌵𑌿𑌤𑍇 𑌵𑌾𑌰𑌿𑌧𑌾𑌰𑌾𑌭𑌿𑌃 𑌪𑌤𑌗𑍈𑌶𑍍𑌚 𑌨𑌿𑌷𑍇𑌵𑌿𑌤𑍇 ।
𑌚𑌰𑌿𑌤𑍇 𑌕𑍈𑌶𑌿𑌕𑌾𑌚𑌾𑌰𑍍𑌯𑍈𑌰𑍈𑌰𑌾𑌵𑌤𑌨𑌿𑌷𑍇𑌵𑌿𑌤𑍇 ॥ 1𑍭4 ॥

𑌸𑌿𑌂𑌹𑌕𑍁𑌂𑌜𑌰𑌶𑌾𑌰𑍍𑌦𑍂𑌲𑌪𑌤𑌗𑍋𑌰𑌗𑌵𑌾𑌹𑌨𑍈𑌃 ।
𑌵𑌿𑌮𑌾𑌨𑍈𑌃 𑌸𑌂𑌪𑌤𑌦𑍍𑌭𑌿𑌶𑍍𑌚 𑌵𑌿𑌮𑌲𑍈𑌃 𑌸𑌮𑌲𑌂𑌕𑍃𑌤𑍇 ॥ 1𑍭5 ॥

𑌵𑌜𑍍𑌰𑌾𑌶𑌨𑌿𑌸𑌮𑌾𑌘𑌾𑌤𑍈𑌃 𑌪𑌾𑌵𑌕𑍈𑌰𑍁𑌪𑌶𑍋𑌭𑌿𑌤𑍇 ।
𑌕𑍃𑌤𑌪𑍁𑌣𑍍𑌯𑍈𑌰𑍍𑌮𑌹𑌾𑌭𑌾𑌗𑍈𑌃 𑌸𑍍𑌵𑌰𑍍𑌗𑌜𑌿𑌦𑍍𑌭𑌿𑌰𑌲𑌂𑌕𑍃𑌤𑍇 ॥ 1𑍭6 ॥

𑌵𑌹𑌤𑌾 𑌹𑌵𑍍𑌯𑌮𑌤𑍍𑌯𑌰𑍍𑌧𑌂 𑌸𑍇𑌵𑌿𑌤𑍇 𑌚𑌿𑌤𑍍𑌰𑌭𑌾𑌨𑍁𑌨𑌾 ।
𑌗𑍍𑌰𑌹𑌨𑌕𑍍𑌷𑌤𑍍𑌰𑌚𑌂𑌦𑍍𑌰𑌾𑌰𑍍𑌕𑌤𑌾𑌰𑌾𑌗𑌣 𑌵𑌿𑌭𑍂𑌷𑌿𑌤𑍇 ॥ 1𑍭𑍭 ॥

𑌮𑌹𑌰𑍍𑌷𑌿𑌗𑌣𑌗𑌂𑌧𑌰𑍍𑌵𑌨𑌾𑌗𑌯𑌕𑍍𑌷𑌸𑌮𑌾𑌕𑍁𑌲𑍇 ।
𑌵𑌿𑌵𑌿𑌕𑍍𑌤𑍇 𑌵𑌿𑌮𑌲𑍇 𑌵𑌿𑌶𑍍𑌵𑍇 𑌵𑌿𑌶𑍍𑌵𑌾𑌵𑌸𑍁𑌨𑌿𑌷𑍇𑌵𑌿𑌤𑍇 ॥ 1𑍭𑍮 ॥

𑌦𑍇𑌵𑌰𑌾𑌜𑌗𑌜𑌾𑌕𑍍𑌰𑌾𑌂𑌤𑍇 𑌚𑌂𑌦𑍍𑌰𑌸𑍂𑌰𑍍𑌯𑌪𑌥𑍇 𑌶𑌿𑌵𑍇 ।
𑌵𑌿𑌤𑌾𑌨𑍇 𑌜𑍀𑌵𑌲𑍋𑌕𑌸𑍍𑌯 𑌵𑌿𑌤𑌤𑍇 𑌬𑍍𑌰𑌹𑍍𑌮𑌨𑌿𑌰𑍍𑌮𑌿𑌤𑍇 ॥ 1𑍭𑍯 ॥

𑌬𑌹𑍁𑌶𑌃 𑌸𑍇𑌵𑌿𑌤𑍇 𑌵𑍀𑌰𑍈𑌰𑍍𑌵𑌿𑌦𑍍𑌯𑌾𑌧𑌰𑌗𑌣𑍈𑌰𑍍𑌵𑌰𑍈𑌃 ।
𑌜𑌗𑌾𑌮 𑌵𑌾𑌯𑍁𑌮𑌾𑌰𑍍𑌗𑍇 𑌤𑍁 𑌗𑌰𑍁𑌤𑍍𑌮𑌾𑌨𑌿𑌵 𑌮𑌾𑌰𑍁𑌤𑌿𑌃 ॥ 1𑍮0 ॥

𑌪𑍍𑌰𑌦𑍃𑌶𑍍𑌯𑌮𑌾𑌨𑌃 𑌸𑌰𑍍𑌵𑌤𑍍𑌰𑌃 𑌹𑌨𑍁𑌮𑌾𑌨𑍍𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌭𑍇𑌜𑍇𑌽𑌂𑌬𑌰𑌂 𑌨𑌿𑌰𑌾𑌲𑌂𑌬𑌂 𑌲𑌂𑌬𑌪𑌕𑍍𑌷 𑌇𑌵𑌾𑌦𑍍𑌰𑌿𑌰𑌾𑌟𑍍 ॥ 1𑍮1 ॥

𑌪𑍍𑌲𑌵𑌮𑌾𑌨𑌂 𑌤𑍁 𑌤𑌂 𑌦𑍃𑌷𑍍𑌟𑍍𑌵𑌾 𑌸𑌿𑌂𑌹𑌿𑌕𑌾 𑌨𑌾𑌮 𑌰𑌾𑌕𑍍𑌷𑌸𑍀 ।
𑌮𑌨𑌸𑌾 𑌚𑌿𑌂𑌤𑌯𑌾𑌮𑌾𑌸 𑌪𑍍𑌰𑌵𑍃𑌦𑍍𑌧𑌾 𑌕𑌾𑌮𑌰𑍂𑌪𑌿𑌣𑍀 ॥ 1𑍮2 ॥

𑌅𑌦𑍍𑌯 𑌦𑍀𑌰𑍍𑌘𑌸𑍍𑌯 𑌕𑌾𑌲𑌸𑍍𑌯 𑌭𑌵𑌿𑌷𑍍𑌯𑌾𑌮𑍍𑌯𑌹𑌮𑌾𑌶𑌿𑌤𑌾 ।
𑌇𑌦𑌂 𑌹𑌿 𑌮𑍇 𑌮𑌹𑌤𑍍𑌸𑌤𑍍𑌤𑍍𑌵𑌂 𑌚𑌿𑌰𑌸𑍍𑌯 𑌵𑌶𑌮𑌾𑌗𑌤𑌮𑍍 ॥ 1𑍮3 ॥

𑌇𑌤𑌿 𑌸𑌂𑌚𑌿𑌂𑌤𑍍𑌯 𑌮𑌨𑌸𑌾 𑌛𑌾𑌯𑌾𑌮𑌸𑍍𑌯 𑌸𑌮𑌾𑌕𑍍𑌷𑌿𑌪𑌤𑍍 ।
𑌛𑌾𑌯𑌾𑌯𑌾𑌂 𑌗𑍃𑌹𑍍𑌯𑌮𑌾𑌣𑌾𑌯𑌾𑌂 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 1𑍮4 ॥

𑌸𑌮𑌾𑌕𑍍𑌷𑌿𑌪𑍍𑌤𑍋𑌽𑌸𑍍𑌮𑌿 𑌸𑌹𑌸𑌾 𑌪𑌂𑌗𑍂𑌕𑍃𑌤𑌪𑌰𑌾𑌕𑍍𑌰𑌮𑌃 ।
𑌪𑍍𑌰𑌤𑌿𑌲𑍋𑌮𑍇𑌨 𑌵𑌾𑌤𑍇𑌨 𑌮𑌹𑌾𑌨𑍌𑌰𑌿𑌵 𑌸𑌾𑌗𑌰𑍇 ॥ 1𑍮5 ॥

𑌤𑌿𑌰𑍍𑌯𑌗𑍂𑌰𑍍𑌧𑍍𑌵𑌮𑌧𑌶𑍍𑌚𑍈𑌵 𑌵𑍀𑌕𑍍𑌷𑌮𑌾𑌣𑌸𑍍𑌤𑌤𑌃 𑌕𑌪𑌿𑌃 ।
𑌦𑌦𑌰𑍍𑌶 𑌸 𑌮𑌹𑌤𑍍𑌸𑌤𑍍𑌤𑍍𑌵𑌮𑍁𑌤𑍍𑌥𑌿𑌤𑌂 𑌲𑌵𑌣𑌾𑌂𑌭𑌸𑌿 ॥ 1𑍮6 ॥

𑌤𑌦𑍍𑌧𑍃𑌷𑍍𑌟𑍍𑌵𑌾 𑌚𑌿𑌂𑌤𑌯𑌾𑌮𑌾𑌸 𑌮𑌾𑌰𑍁𑌤𑌿𑌰𑍍𑌵𑌿𑌕𑍃𑌤𑌾𑌨𑌨𑌮𑍍 ।
𑌕𑌪𑌿𑌰𑌾𑌜𑍇𑌨 𑌕𑌥𑌿𑌤𑌂 𑌸𑌤𑍍𑌤𑍍𑌵𑌮𑌦𑍍𑌭𑍁𑌤𑌦𑌰𑍍𑌶𑌨𑌮𑍍 ॥ 1𑍮𑍭 ॥

𑌛𑌾𑌯𑌾𑌗𑍍𑌰𑌾𑌹𑌿 𑌮𑌹𑌾𑌵𑍀𑌰𑍍𑌯𑌂 𑌤𑌦𑌿𑌦𑌂 𑌨𑌾𑌤𑍍𑌰 𑌸𑌂𑌶𑌯𑌃 ।
𑌸 𑌤𑌾𑌂 𑌬𑍁𑌦𑍍𑌧𑍍𑌵𑌾𑌰𑍍𑌥𑌤𑌤𑍍𑌤𑍍𑌵𑍇𑌨 𑌸𑌿𑌂𑌹𑌿𑌕𑌾𑌂 𑌮𑌤𑌿𑌮𑌾𑌨𑍍𑌕𑌪𑌿𑌃 ॥ 1𑍮𑍮 ॥

𑌵𑍍𑌯𑌵𑌰𑍍𑌧𑌤 𑌮𑌹𑌾𑌕𑌾𑌯𑌃 𑌪𑍍𑌰𑌾𑌵𑍃𑌷𑍀𑌵 𑌵𑌲𑌾𑌹𑌕𑌃 ।
𑌤𑌸𑍍𑌯 𑌸𑌾 𑌕𑌾𑌯𑌮𑍁𑌦𑍍𑌵𑍀𑌕𑍍𑌷𑍍𑌯 𑌵𑌰𑍍𑌧𑌮𑌾𑌨𑌂 𑌮𑌹𑌾𑌕𑌪𑍇𑌃 ॥ 1𑍮𑍯 ॥

𑌵𑌕𑍍𑌤𑍍𑌰𑌂 𑌪𑍍𑌰𑌸𑌾𑌰𑌯𑌾𑌮𑌾𑌸 𑌪𑌾𑌤𑌾𑌲𑌾𑌂𑌤𑌰𑌸𑌨𑍍𑌨𑌿𑌭𑌮𑍍 ।
𑌘𑌨𑌰𑌾𑌜𑍀𑌵 𑌗𑌰𑍍𑌜𑌂𑌤𑍀 𑌵𑌾𑌨𑌰𑌂 𑌸𑌮𑌭𑌿𑌦𑍍𑌰𑌵𑌤𑍍 ॥ 1𑍯0 ॥

𑌸 𑌦𑌦𑌰𑍍𑌶 𑌤𑌤𑌸𑍍𑌤𑌸𑍍𑌯𑌾 𑌵𑌿𑌵𑍃𑌤𑌂 𑌸𑍁𑌮𑌹𑌨𑍍𑌮𑍁𑌖𑌮𑍍 ।
𑌕𑌾𑌯𑌮𑌾𑌤𑍍𑌰𑌂 𑌚 𑌮𑍇𑌧𑌾𑌵𑍀 𑌮𑌰𑍍𑌮𑌾𑌣𑌿 𑌚 𑌮𑌹𑌾𑌕𑌪𑌿𑌃 ॥ 1𑍯1 ॥

𑌸 𑌤𑌸𑍍𑌯𑌾 𑌵𑌿𑌵𑍃𑌤𑍇 𑌵𑌕𑍍𑌤𑍍𑌰𑍇 𑌵𑌜𑍍𑌰𑌸𑌂𑌹𑌨𑌨𑌃 𑌕𑌪𑌿𑌃 ।
𑌸𑌂𑌕𑍍𑌷𑌿𑌪𑍍𑌯 𑌮𑍁𑌹𑍁𑌰𑌾𑌤𑍍𑌮𑌾𑌨𑌂 𑌨𑌿𑌷𑍍𑌪𑌪𑌾𑌤 𑌮𑌹𑌾𑌬𑌲𑌃 ॥ 1𑍯2 ॥

𑌆𑌸𑍍𑌯𑍇 𑌤𑌸𑍍𑌯𑌾 𑌨𑌿𑌮𑌜𑍍𑌜𑌂𑌤𑌂 𑌦𑌦𑍃𑌶𑍁𑌃 𑌸𑌿𑌦𑍍𑌧𑌚𑌾𑌰𑌣𑌾𑌃 ।
𑌗𑍍𑌰𑌸𑍍𑌯𑌮𑌾𑌨𑌂 𑌯𑌥𑌾 𑌚𑌂𑌦𑍍𑌰𑌂 𑌪𑍂𑌰𑍍𑌣𑌂 𑌪𑌰𑍍𑌵𑌣𑌿 𑌰𑌾𑌹𑍁𑌣𑌾 ॥ 1𑍯3 ॥

𑌤𑌤𑌸𑍍𑌤𑌸𑍍𑌯𑌾 𑌨𑌖𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑍍𑌮𑌰𑍍𑌮𑌾𑌣𑍍𑌯𑍁𑌤𑍍𑌕𑍃𑌤𑍍𑌯 𑌵𑌾𑌨𑌰𑌃 ।
𑌉𑌤𑍍𑌪𑌪𑌾𑌤𑌾𑌥 𑌵𑍇𑌗𑍇𑌨 𑌮𑌨𑌃 𑌸𑌂𑌪𑌾𑌤𑌵𑌿𑌕𑍍𑌰𑌮𑌃 ॥ 1𑍯4 ॥

𑌤𑌾𑌂 𑌤𑍁 𑌦𑍃𑌷𑍍𑌟𑍍𑌵𑌾 𑌚 𑌧𑍃𑌤𑍍𑌯𑌾 𑌚 𑌦𑌾𑌕𑍍𑌷𑌿𑌣𑍍𑌯𑍇𑌨 𑌨𑌿𑌪𑌾𑌤𑍍𑌯 𑌚 ।
𑌸 𑌕𑌪𑌿𑌪𑍍𑌰𑌵𑌰𑍋 𑌵𑍇𑌗𑌾𑌦𑍍𑌵𑌵𑍃𑌧𑍇 𑌪𑍁𑌨𑌰𑌾𑌤𑍍𑌮𑌵𑌾𑌨𑍍 ॥ 1𑍯5 ॥

𑌹𑍃𑌤𑌹𑍃𑌤𑍍𑌸𑌾 𑌹𑌨𑍁𑌮𑌤𑌾𑌪𑌪𑌾𑌤 𑌵𑌿𑌧𑍁𑌰𑌾𑌂𑌭𑌸𑌿 ।
𑌤𑌾𑌂 𑌹𑌤𑌾𑌂 𑌵𑌾𑌨𑌰𑍇𑌣𑌾𑌶𑍁 𑌪𑌤𑌿𑌤𑌾𑌂 𑌵𑍀𑌕𑍍𑌷𑍍𑌯 𑌸𑌿𑌂𑌹𑌿𑌕𑌾𑌮𑍍 ॥ 1𑍯6 ॥

𑌭𑍂𑌤𑌾𑌨𑍍𑌯𑌾𑌕𑌾𑌶𑌚𑌾𑌰𑍀𑌣𑌿 𑌤𑌮𑍂𑌚𑍁𑌃 𑌪𑍍𑌲𑌵𑌗𑍋𑌤𑍍𑌤𑌮𑌮𑍍 ।
𑌭𑍀𑌮𑌮𑌦𑍍𑌯 𑌕𑍃𑌤𑌂 𑌕𑌰𑍍𑌮 𑌮𑌹𑌤𑍍𑌸𑌤𑍍𑌤𑍍𑌵𑌂 𑌤𑍍𑌵𑌯𑌾 𑌹𑌤𑌮𑍍 ॥ 1𑍯𑍭 ॥

𑌸𑌾𑌧𑌯𑌾𑌰𑍍𑌥𑌮𑌭𑌿𑌪𑍍𑌰𑍇𑌤𑌮𑌰𑌿𑌷𑍍𑌟𑌂 𑌪𑍍𑌲𑌵𑌤𑌾𑌂 𑌵𑌰 ।
𑌯𑌸𑍍𑌯 𑌤𑍍𑌵𑍇𑌤𑌾𑌨𑌿 𑌚𑌤𑍍𑌵𑌾𑌰𑌿 𑌵𑌾𑌨𑌰𑍇𑌂𑌦𑍍𑌰 𑌯𑌥𑌾 𑌤𑌵 ॥ 1𑍯𑍮 ॥

𑌧𑍃𑌤𑌿𑌰𑍍𑌦𑍃𑌷𑍍𑌟𑌿𑌰𑍍𑌮𑌤𑌿𑌰𑍍𑌦𑌾𑌕𑍍𑌷𑍍𑌯𑌂 𑌸𑌃 𑌕𑌰𑍍𑌮𑌸𑍁 𑌨 𑌸𑍀𑌦𑌤𑌿 ।
𑌸 𑌤𑍈𑌃 𑌸𑌂𑌭𑌾𑌵𑌿𑌤𑌃 𑌪𑍂𑌜𑍍𑌯𑌃 𑌪𑍍𑌰𑌤𑌿𑌪𑌨𑍍𑌨𑌪𑍍𑌰𑌯𑍋𑌜𑌨𑌃 ॥ 1𑍯𑍯 ॥

𑌜𑌗𑌾𑌮𑌾𑌕𑌾𑌶𑌮𑌾𑌵𑌿𑌶𑍍𑌯 𑌪𑌨𑍍𑌨𑌗𑌾𑌶𑌨𑌵𑌤𑍍𑌕𑌪𑌿𑌃 ।
𑌪𑍍𑌰𑌾𑌪𑍍𑌤𑌭𑍂𑌯𑌿𑌷𑍍𑌠𑌪𑌾𑌰𑌸𑍍𑌤𑍁 𑌸𑌰𑍍𑌵𑌤𑌃 𑌪𑍍𑌰𑌤𑌿𑌲𑍋𑌕𑌯𑌨𑍍 ॥ 200 ॥

𑌯𑍋𑌜𑌨𑌾𑌨𑌾𑌂 𑌶𑌤𑌸𑍍𑌯𑌾𑌂𑌤𑍇 𑌵𑌨𑌰𑌾𑌜𑌿𑌂 𑌦𑌦𑌰𑍍𑌶 𑌸𑌃 ।
𑌦𑌦𑌰𑍍𑌶 𑌚 𑌪𑌤𑌨𑍍𑌨𑍇𑌵 𑌵𑌿𑌵𑌿𑌧𑌦𑍍𑌰𑍁𑌮𑌭𑍂𑌷𑌿𑌤𑌮𑍍 ॥ 201 ॥

𑌦𑍍𑌵𑍀𑌪𑌂 𑌶𑌾𑌖𑌾𑌮𑍃𑌗𑌶𑍍𑌰𑍇𑌷𑍍𑌠𑍋 𑌮𑌲𑌯𑍋𑌪𑌵𑌨𑌾𑌨𑌿 𑌚 ।
𑌸𑌾𑌗𑌰𑌂 𑌸𑌾𑌗𑌰𑌾𑌨𑍂𑌪𑌂 𑌸𑌾𑌗𑌰𑌾𑌨𑍂𑌪𑌜𑌾𑌨𑍍 𑌦𑍍𑌰𑍁𑌮𑌾𑌨𑍍 ॥ 202 ॥

𑌸𑌾𑌗𑌰𑌸𑍍𑌯 𑌚 𑌪𑌤𑍍𑌨𑍀𑌨𑌾𑌂 𑌮𑍁𑌖𑍍𑌯𑌾𑌨𑍍𑌯𑌪𑌿 𑌵𑌿𑌲𑍋𑌕𑌯𑌨𑍍 ।
𑌸 𑌮𑌹𑌾𑌮𑍇𑌘𑌸𑌂𑌕𑌾𑌶𑌂 𑌸𑌮𑍀𑌕𑍍𑌷𑍍𑌯𑌾𑌤𑍍𑌮𑌾𑌨𑌮𑌾𑌤𑍍𑌮𑌵𑌾𑌨𑍍 ॥ 203 ॥

𑌨𑌿𑌰𑍁𑌂𑌧𑌂𑌤𑌮𑌿𑌵𑌾𑌕𑌾𑌶𑌂 𑌚𑌕𑌾𑌰 𑌮𑌤𑌿𑌮𑌾𑌨𑍍 𑌮𑌤𑌿𑌮𑍍 ।
𑌕𑌾𑌯𑌵𑍃𑌦𑍍𑌧𑌿𑌂 𑌪𑍍𑌰𑌵𑍇𑌗𑌂 𑌚 𑌮𑌮 𑌦𑍃𑌷𑍍𑌟𑍍𑌵𑍈𑌵 𑌰𑌾𑌕𑍍𑌷𑌸𑌾𑌃 ॥ 204 ॥

𑌮𑌯𑌿 𑌕𑍌𑌤𑍂𑌹𑌲𑌂 𑌕𑍁𑌰𑍍𑌯𑌰𑌿𑌤𑌿 𑌮𑍇𑌨𑍇 𑌮𑌹𑌾𑌕𑌪𑌿𑌃 ।
𑌤𑌤𑌃 𑌶𑌰𑍀𑌰𑌂 𑌸𑌂𑌕𑍍𑌷𑌿𑌪𑍍𑌯 𑌤𑌨𑍍𑌮𑌹𑍀𑌧𑌰𑌸𑌨𑍍𑌨𑌿𑌭𑌮𑍍 ॥ 205 ॥

𑌪𑍁𑌨𑌃 𑌪𑍍𑌰𑌕𑍃𑌤𑌿𑌮𑌾𑌪𑍇𑌦𑍇 𑌵𑍀𑌤𑌮𑍋𑌹 𑌇𑌵𑌾𑌤𑍍𑌮𑌵𑌾𑌨𑍍 ।
𑌤𑌦𑍍𑌰𑍂𑌪𑌮𑌤𑌿𑌸𑌂𑌕𑍍𑌷𑌿𑌪𑍍𑌯 𑌹𑌨𑍁𑌮𑌾𑌨𑍍 𑌪𑍍𑌰𑌕𑍃𑌤𑍌 𑌸𑍍𑌥𑌿𑌤𑌃 ॥ 206 ॥

𑌤𑍍𑌰𑍀𑌨𑍍 𑌕𑍍𑌰𑌮𑌾𑌨𑌿𑌵 𑌵𑌿𑌕𑍍𑌰𑌮𑍍𑌯 𑌬𑌲𑌿𑌵𑍀𑌰𑍍𑌯𑌹𑌰𑍋 𑌹𑌰𑌿𑌃 ।
𑌸 𑌚𑌾𑌰𑍁𑌨𑌾𑌨𑌾𑌵𑌿𑌧𑌰𑍂𑌪𑌧𑌾𑌰𑍀 𑌪𑌰𑌂 𑌸𑌮𑌾𑌸𑌾𑌦𑍍𑌯 𑌸𑌮𑍁𑌦𑍍𑌰𑌤𑍀𑌰𑌮𑍍 ।
𑌪𑌰𑍈𑌰𑌶𑌕𑍍𑌯𑌃 𑌪𑍍𑌰𑌤𑌿𑌪𑌨𑍍𑌨𑌰𑍂𑌪𑌃 𑌸𑌮𑍀𑌕𑍍𑌷𑌿𑌤𑌾𑌤𑍍𑌮𑌾 𑌸𑌮𑌵𑍇𑌕𑍍𑌷𑌿𑌤𑌾𑌰𑍍𑌧𑌃 ॥ 20𑍭 ॥

𑌤𑌤𑌃 𑌸 𑌲𑌂𑌬𑌸𑍍𑌯 𑌗𑌿𑌰𑍇𑌃 𑌸𑌮𑍃𑌦𑍍𑌧𑍇 𑌵𑌿𑌚𑌿𑌤𑍍𑌰𑌕𑍂𑌟𑍇 𑌨𑌿𑌪𑌪𑌾𑌤 𑌕𑍂𑌟𑍇 ।
𑌸𑌕𑍇𑌤𑌕𑍋𑌦𑍍𑌦𑌾𑌲𑌕𑌨𑌾𑌲𑌿𑌕𑍇𑌰𑍇 𑌮𑌹𑌾𑌦𑍍𑌰𑌿𑌕𑍂𑌟𑌪𑍍𑌰𑌤𑌿𑌮𑍋 𑌮𑌹𑌾𑌤𑍍𑌮𑌾 ॥ 20𑍮 ॥

𑌤𑌤𑌸𑍍𑌤𑍁 𑌸𑌂𑌪𑍍𑌰𑌾𑌪𑍍𑌯 𑌸𑌮𑍁𑌦𑍍𑌰𑌤𑍀𑌰𑌂 𑌸𑌮𑍀𑌕𑍍𑌷𑍍𑌯 𑌲𑌂𑌕𑌾𑌂 𑌗𑌿𑌰𑌿𑌵𑌰𑍍𑌯𑌮𑍂𑌰𑍍𑌧𑍍𑌨𑌿 ।
𑌕𑌪𑌿𑌸𑍍𑌤𑍁 𑌤𑌸𑍍𑌨𑌿𑌨𑍍𑌨𑌿𑌪𑌪𑌾𑌤 𑌪𑌰𑍍𑌵𑌤𑍇 𑌵𑌿𑌧𑍂𑌯 𑌰𑍂𑌪𑌂 𑌵𑍍𑌯𑌥𑌯𑌨𑍍𑌮𑍃𑌗𑌦𑍍𑌵𑌿𑌜𑌾𑌨𑍍 ॥ 20𑍯 ॥

𑌸 𑌸𑌾𑌗𑌰𑌂 𑌦𑌾𑌨𑌵𑌪𑌨𑍍𑌨𑌗𑌾𑌯𑍁𑌤𑌂 𑌬𑌲𑍇𑌨 𑌵𑌿𑌕𑍍𑌰𑌮𑍍𑌯 𑌮𑌹𑍋𑌰𑍍𑌮𑌿𑌮𑌾𑌲𑌿𑌨𑌮𑍍 ।
𑌨𑌿𑌪𑌤𑍍𑌯 𑌤𑍀𑌰𑍇 𑌚 𑌮𑌹𑍋𑌦𑌧𑍇𑌸𑍍𑌤𑌦𑌾 𑌦𑌦𑌰𑍍𑌶 𑌲𑌂𑌕𑌾𑌮𑌮𑌰𑌾𑌵𑌤𑍀𑌮𑌿𑌵 ॥ 210 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌪𑍍𑌰𑌥𑌮𑌸𑍍𑌸𑌰𑍍𑌗𑌃 ॥