𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌦𑌶𑌸𑍍𑌸𑌰𑍍𑌗𑌃 ।
𑌅𑌥 𑌤𑌸𑍍𑌯 𑌨𑌿𑌨𑌾𑌦𑌂 𑌤𑌂 𑌸𑍁𑌗𑍍𑌰𑍀𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌶𑍁𑌶𑍍𑌰𑌾𑌵𑌾𑌂𑌤𑌃 𑌪𑍁𑌰 𑌗𑌤𑍋 𑌵𑌾𑌲𑍀 𑌭𑍍𑌰𑌾𑌤𑍁𑌰𑌮𑌰𑍍𑌷𑌣𑌃 ॥ 1 ॥
𑌶𑍍𑌰𑍁𑌤𑍍𑌵𑌾 𑌤𑍁 𑌤𑌸𑍍𑌯 𑌨𑌿𑌨𑌦𑌂 𑌸𑌰𑍍𑌵𑌭𑍂𑌤𑌪𑍍𑌰𑌕𑌂𑌪𑌨𑌮𑍍 ।
𑌮𑌦𑌶𑍍𑌚𑍈𑌕𑌪𑌦𑍇 𑌨𑌷𑍍𑌟𑌃 𑌕𑍍𑌰𑍋𑌧𑌶𑍍𑌚𑌾𑌪𑌤𑌿𑌤𑍋 𑌮𑌹𑌾𑌨𑍍 ॥ 2 ॥
𑌸 𑌤𑍁 𑌰𑍋𑌷𑌪𑌰𑍀𑌤𑌾𑌂𑌗𑍋 𑌵𑌾𑌲𑍀 𑌸𑌂𑌧𑍍𑌯𑌾𑌕𑌨𑌕𑌪𑍍𑌰𑌭𑌃 ।
𑌉𑌪𑌰𑌕𑍍𑌤 𑌇𑌵𑌾𑌦𑌿𑌤𑍍𑌯𑌸𑍍𑌸𑌦𑍍𑌯𑍋 𑌨𑌿𑌷𑍍𑌪𑍍𑌰𑌭𑌤𑌾𑌂 𑌗𑌤𑌃 ॥ 3 ॥
𑌵𑌾𑌲𑍀 𑌦𑌂𑌷𑍍𑌟𑍍𑌰𑌾 𑌕𑌰𑌾𑌲𑌃 𑌤𑍁 𑌕𑍍𑌰𑍋𑌧𑌾𑌦𑍍 𑌦𑍀𑌪𑍍𑌤 𑌅𑌗𑍍𑌨𑌿 𑌲𑍋𑌚𑌨𑌃 ।
𑌭𑌾𑌤𑌿 𑌉𑌤𑍍𑌪𑌤𑌿𑌤 𑌪𑌦𑍍𑌮𑌾𑌭𑌃 𑌸𑌮𑍃𑌣𑌾𑌲 𑌇𑌵 𑌹𑍍𑌰𑌦𑌃 ॥ 4 ॥
𑌶𑌬𑍍𑌦𑌂 𑌦𑍁𑌰𑍍𑌮𑌰𑍍𑌷𑌣𑌂 𑌶𑍍𑌰𑍁𑌤𑍍𑌵𑌾 𑌨𑌿𑌷𑍍𑌪𑌪𑌾𑌤 𑌤𑌤𑍋 𑌹𑌰𑌿𑌃 ।
𑌵𑍇𑌗𑍇𑌨 𑌚𑌰𑌣𑌨𑍍𑌯𑌾𑌸𑍈𑌰𑍍𑌦𑌾𑌰𑌯𑌨𑍍𑌨𑌿𑌵 𑌮𑍇𑌦𑌿𑌨𑍀𑌮𑍍 ॥ 5 ॥
𑌤𑌂 𑌤𑍁 𑌤𑌾𑌰𑌾 𑌪𑌰𑌿𑌷𑍍𑌵𑌜𑍍𑌯 𑌸𑍍𑌨𑍇𑌹𑌾𑌦𑍍𑌦𑌰𑍍𑌶𑌿𑌤𑌸𑍌𑌹𑍃𑌦𑌾𑌃 ।
𑌉𑌵𑌾𑌚 𑌤𑍍𑌰𑌸𑍍𑌤𑌸𑌂𑌭𑍍𑌰𑌾𑌂𑌤𑌾 𑌹𑌿𑌤𑍋𑌦𑌰𑍍𑌕𑌮𑌿𑌦𑌂 𑌵𑌚𑌃 ॥ 6 ॥
𑌸𑌾𑌧𑍁 𑌕𑍍𑌰𑍋𑌧𑌮𑌿𑌮𑌂 𑌵𑍀𑌰 𑌨𑌦𑍀𑌵𑍇𑌗𑌮𑌿𑌵𑌾𑌗𑌤𑌮𑍍 ।
𑌶𑌯𑌨𑌾𑌦𑍁𑌤𑍍𑌥𑌿𑌤𑌃 𑌕𑌾𑌲𑍍𑌯𑌂 𑌤𑍍𑌯𑌜 𑌭𑍁𑌕𑍍𑌤𑌾𑌮𑌿𑌵 𑌸𑍍𑌰𑌜𑌮𑍍 ॥ ॥
𑌕𑌾𑌲𑍍𑌯𑌮𑍇𑌤𑍇𑌨 𑌸𑌂𑌗𑍍𑌰𑌾𑌮𑌂 𑌕𑌰𑌿𑌷𑍍𑌯𑌸𑌿 𑌚 𑌵𑌾𑌨𑌰 ।
𑌵𑍀𑌰 𑌤𑍇 𑌶𑌤𑍍𑌰𑍁𑌬𑌾𑌹𑍁𑌲𑍍𑌯𑌂 𑌫𑌲𑍍𑌗𑍁𑌤𑌾 𑌵𑌾 𑌨 𑌵𑌿𑌦𑍍𑌯𑌤𑍇 ॥ ॥
𑌸𑌹𑌸𑌾 𑌤𑌵 𑌨𑌿𑌷𑍍𑌕𑍍𑌰𑌾𑌮𑍋 𑌮𑌮 𑌤𑌾𑌵𑌨𑍍𑌨 𑌰𑍋𑌚𑌤𑍇 ।
𑌶𑍍𑌰𑍂𑌯𑌤𑌾𑌂 𑌚𑌾𑌭𑌿𑌧𑌾𑌸𑍍𑌯𑌾𑌮𑌿 𑌯𑌨𑍍𑌨𑌿𑌮𑌿𑌤𑍍𑌤𑌂 𑌨𑌿𑌵𑌾𑌰𑍍𑌯𑌸𑍇 ॥ ॥
𑌪𑍂𑌰𑍍𑌵𑌮𑌾𑌪𑌤𑌿𑌤𑌃 𑌕𑍍𑌰𑍋𑌧𑌾𑌤𑍍𑌸 𑌤𑍍𑌵𑌾𑌮𑌾𑌹𑍍𑌵𑌯𑌤𑍇 𑌯𑍁𑌧𑌿 ।
𑌨𑌿𑌷𑍍𑌪𑌤𑍍𑌯 𑌚 𑌨𑌿𑌰𑌸𑍍𑌤𑌸𑍍𑌤𑍇 𑌹𑌨𑍍𑌯𑌮𑌾𑌨𑍋 𑌦𑌿𑌶𑍋 𑌗𑌤𑌃 ॥ 10 ॥
𑌤𑍍𑌵𑌯𑌾 𑌤𑌸𑍍𑌯 𑌨𑌿𑌰𑌸𑍍𑌤𑌸𑍍𑌯 𑌪𑍀𑌡𑌿𑌤𑌸𑍍𑌯 𑌵𑌿𑌶𑍇𑌷𑌤𑌃 ।
𑌇𑌹𑍈𑌤𑍍𑌯 𑌪𑍁𑌨𑌰𑌾𑌹𑍍𑌵𑌾𑌨𑌂 𑌶𑌂𑌕𑌾𑌂 𑌜𑌨𑌯𑌤𑍀𑌵 𑌮𑍇 ॥ 11 ॥
𑌦𑌰𑍍𑌪𑌶𑍍𑌚 𑌵𑍍𑌯𑌵𑌸𑌾𑌯𑌶𑍍𑌚 𑌯𑌾𑌦𑍃𑌶𑌸𑍍𑌤𑌸𑍍𑌯 𑌨𑌰𑍍𑌦𑌤𑌃 ।
𑌨𑌿𑌨𑌾𑌦𑌶𑍍𑌚𑌾𑌪𑌿 𑌸𑌂𑌰𑌂𑌭𑍋 𑌨𑍈𑌤𑌦𑌲𑍍𑌪𑌂 𑌹𑌿 𑌕𑌾𑌰𑌣𑌮𑍍 ॥ 12 ॥
𑌨𑌾𑌸𑌹𑌾𑌯𑌮𑌹𑌂 𑌮𑌨𑍍𑌯𑍇 𑌸𑍁𑌗𑍍𑌰𑍀𑌵𑌂 𑌤𑌮𑌿𑌹𑌾𑌗𑌤𑌮𑍍 ।
𑌅𑌵𑌷𑍍𑌟𑌬𑍍𑌧𑌸𑌹𑌾𑌯𑌶𑍍𑌚 𑌯𑌮𑌾𑌶𑍍𑌰𑌿𑌤𑍍𑌯𑍈𑌷 𑌗𑌰𑍍𑌜𑌤𑌿 ॥ 13 ॥
𑌪𑍍𑌰𑌕𑍃𑌤𑍍𑌯𑌾 𑌨𑌿𑌪𑍁𑌣𑌶𑍍𑌚𑍈𑌵 𑌬𑍁𑌦𑍍𑌧𑌿𑌮𑌾𑌂𑌶𑍍𑌚𑍈𑌵 𑌵𑌾𑌨𑌰𑌃 ।
𑌅𑌪𑌰𑍀𑌕𑍍𑌷𑌿𑌤𑌵𑍀𑌰𑍍𑌯𑍇𑌣 𑌸𑍁𑌗𑍍𑌰𑍀𑌵𑌸𑍍𑌸𑌹𑌨𑍈𑌷𑍍𑌯𑌤𑌿 ॥ 14 ॥
𑌪𑍂𑌰𑍍𑌵𑌮𑍇𑌵 𑌮𑌯𑌾 𑌵𑍀𑌰 𑌶𑍍𑌰𑍁𑌤𑌂 𑌕𑌥𑌯𑌤𑍋 𑌵𑌚𑌃 ।
𑌅𑌂𑌗𑌦𑌸𑍍𑌯 𑌕𑍁𑌮𑌾𑌰𑌸𑍍𑌯 𑌵𑌕𑍍𑌷𑍍𑌯𑌾𑌮𑌿𑌤𑍍𑌵𑌾 𑌹𑌿𑌤𑌂 𑌵𑌚𑌃 ॥ 15 ॥
𑌅𑌂𑌗𑌦𑌸𑍍𑌤𑍁 𑌕𑍁𑌮𑌾𑌰𑍋𑌽𑌯𑌂 𑌵𑌨𑌾𑌂𑌤𑌮𑍁𑌪𑌨𑌿𑌰𑍍𑌗𑌤𑌃 ।
𑌪𑍍𑌰𑌵𑍃𑌤𑍍𑌤𑌿𑌸𑍍𑌤𑍇𑌨 𑌕𑌥𑌿𑌤𑌾 𑌚𑌾𑌰𑍈 𑌰𑌾𑌪𑍍𑌤𑍈𑌰𑍍𑌨𑌿𑌵𑍇𑌦𑌿𑌤𑌾 ॥ 16 ॥
𑌅𑌯𑍋𑌧𑍍𑌯𑌾𑌧𑌿𑌪𑌤𑍇𑌃 𑌪𑍁𑌤𑍍𑌰𑍌 𑌶𑍂𑌰𑍌 𑌸𑌮𑌰𑌦𑍁𑌰𑍍𑌜𑌯𑍌 ।
𑌇𑌕𑍍𑌷𑍍𑌵𑌾𑌕𑍂𑌣𑌾𑌂 𑌕𑍁𑌲𑍇 𑌜𑌾𑌤𑍌 𑌪𑍍𑌰𑌥𑌿𑌤𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 1 ॥
𑌸𑍁𑌗𑍍𑌰𑍀𑌵𑌪𑍍𑌰𑌿𑌯𑌕𑌾𑌮𑌾𑌰𑍍𑌥𑌂 𑌪𑍍𑌰𑌾𑌪𑍍𑌤𑍌 𑌤𑌤𑍍𑌰 𑌦𑍁𑌰𑌾𑌸𑌦𑍌 ।
𑌤𑌵 𑌭𑍍𑌰𑌾𑌤𑍁𑌰𑍍𑌹𑌿 𑌵𑌿𑌖𑍍𑌯𑌾𑌤𑌸𑍍𑌸𑌹𑌾𑌯𑍋 𑌰𑌣𑌕𑌰𑍍𑌕𑌶𑌃 ।
𑌰𑌾𑌮𑌃 𑌪𑌰𑌬𑌲𑌾𑌮𑌰𑍍𑌦𑍀 𑌯𑍁𑌗𑌾𑌂𑌤𑌾𑌗𑍍𑌨𑌿𑌰𑌿𑌵𑍋𑌤𑍍𑌥𑌿𑌤𑌃 ॥ 1 ॥
𑌨𑌿𑌵𑌾𑌸𑌵𑍃𑌕𑍍𑌷𑌃 𑌸𑌾𑌧𑍂𑌨𑌾𑌮𑌾𑌪𑌨𑍍𑌨𑌾𑌨𑌾𑌂 𑌪𑌰𑌾 𑌗𑌤𑌿𑌃 ।
𑌆𑌰𑍍𑌤𑌾𑌨𑌾𑌂 𑌸𑌂𑌶𑍍𑌰𑌯𑌶𑍍𑌚𑍈𑌵 𑌯𑌶𑌸𑌶𑍍𑌚𑍈𑌕𑌭𑌾𑌜𑌨𑌮𑍍 ॥ 1 ॥
𑌜𑍍𑌞𑌾𑌨𑌵𑌿𑌜𑍍𑌞𑌾𑌨𑌸𑌂𑌪𑌨𑍍𑌨𑍋 𑌨𑌿𑌦𑍇𑌶𑍇 𑌨𑌿𑌰𑌤𑌃 𑌪𑌿𑌤𑍁𑌃 ।
𑌧𑌾𑌤𑍂𑌨𑌾𑌮𑌿𑌵 𑌶𑍈𑌲𑍇𑌂𑌦𑍍𑌰𑍋 𑌗𑍁𑌣𑌾𑌨𑌾𑌮𑌾𑌕𑌰𑍋 𑌮𑌹𑌾𑌨𑍍 ॥ 20 ॥
𑌤𑌤𑍍𑌕𑍍𑌷𑌮𑌂 𑌨 𑌵𑌿𑌰𑍋𑌧𑌸𑍍𑌤𑍇 𑌸𑌹 𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌦𑍁𑌰𑍍𑌜𑌯𑍇𑌨𑌾𑌪𑍍𑌰𑌮𑍇𑌯𑍇𑌨 𑌰𑌾𑌮𑍇𑌣 𑌰𑌣𑌕𑌰𑍍𑌮𑌸𑍁 ॥ 21 ॥
𑌶𑍂𑌰 𑌵𑌕𑍍𑌷𑍍𑌯𑌾𑌮𑌿 𑌤𑍇 𑌕𑌿𑌂𑌚𑌿𑌨𑍍𑌨 𑌚𑍇𑌚𑍍𑌛𑌾𑌮𑍍𑌯𑌭𑍍𑌯𑌸𑍂𑌯𑌿𑌤𑍁𑌮𑍍 ।
𑌶𑍍𑌰𑍂𑌯𑌤𑌾𑌂 𑌕𑍍𑌰𑌿𑌯𑌤𑌾𑌂 𑌚𑍈𑌵 𑌤𑌵 𑌵𑌕𑍍𑌷𑍍𑌯𑌾𑌮𑌿 𑌯𑌦𑍍𑌧𑌿𑌤𑌮𑍍 ॥ 22 ॥
𑌯𑍌𑌵𑌰𑌾𑌜𑍍𑌯𑍇𑌨 𑌸𑍁𑌗𑍍𑌰𑍀𑌵𑌂 𑌤𑍂𑌰𑍍𑌣𑌂 𑌸𑌾𑌧𑍍𑌵𑌭𑌿𑌷𑍇𑌚𑌯 ।
𑌵𑌿𑌗𑍍𑌰𑌹𑌂 𑌮𑌾 𑌕𑍃𑌥𑌾 𑌵𑍀𑌰 𑌭𑍍𑌰𑌾𑌤𑍍𑌰𑌾 𑌰𑌾𑌜𑌨𑍍𑌬𑌲𑍀𑌯𑌸𑌾 ॥ 23 ॥
𑌅𑌹𑌂 𑌹𑌿 𑌤𑍇 𑌕𑍍𑌷𑌮𑌂 𑌮𑌨𑍍𑌯𑍇 𑌤𑍇𑌨 𑌰𑌾𑌮𑍇𑌣 𑌸𑍌𑌹𑍃𑌦𑌮𑍍 ।
𑌸𑍁𑌗𑍍𑌰𑍀𑌵𑍇𑌣 𑌚 𑌸𑌂𑌪𑍍𑌰𑍀𑌤𑌿𑌂 𑌵𑍈𑌰𑌮𑍁𑌤𑍍𑌸𑍃𑌜𑍍𑌯 𑌦𑍂𑌰𑌤𑌃 ॥ 24 ॥
𑌲𑌾𑌲𑌨𑍀𑌯𑍋 𑌹𑌿 𑌤𑍇 𑌭𑍍𑌰𑌾𑌤𑌾 𑌯𑌵𑍀𑌯𑌾𑌨𑍇𑌷 𑌵𑌾𑌨𑌰𑌃 ।
𑌤𑌤𑍍𑌰 𑌵𑌾 𑌸𑌨𑍍𑌨𑌿𑌹𑌸𑍍𑌥𑍋 𑌵𑌾 𑌸𑌰𑍍𑌵𑌥𑌾 𑌬𑌂𑌧𑍁𑌰𑍇𑌵 𑌤𑍇 ॥ 25 ॥
𑌨 𑌹𑌿 𑌤𑍇𑌨 𑌸𑌮𑌂 𑌬𑌂𑌧𑍁𑌂 𑌭𑍁𑌵𑌿 𑌪𑌶𑍍𑌯𑌾𑌮𑌿 𑌕𑌂𑌚𑌨 ॥ 26 ॥
𑌦𑌾𑌨𑌮𑌾𑌨𑌾𑌦𑌿𑌸𑌤𑍍𑌕𑌾𑌰𑍈𑌃 𑌕𑍁𑌰𑍁𑌷𑍍𑌵 𑌪𑍍𑌰𑌤𑍍𑌯𑌨𑌂𑌤𑌰𑌮𑍍 ।
𑌵𑍈𑌰𑌮𑍇𑌤𑌤𑍍𑌸𑌮𑍁𑌤𑍍𑌸𑍃𑌜𑍍𑌯 𑌤𑌵 𑌪𑌾𑌰𑍍𑌶𑍍𑌵𑍇 𑌸 𑌤𑌿𑌷𑍍𑌠𑌤𑍁 ॥ 2 ॥
𑌸𑍁𑌗𑍍𑌰𑍀𑌵𑍋 𑌵𑌿𑌪𑍁𑌲𑌗𑍍𑌰𑍀𑌵𑌸𑍍𑌤𑌵𑌬𑌂𑌧𑍁𑌸𑍍𑌸𑌦𑌾 𑌮𑌤𑌃 ।
𑌭𑍍𑌰𑌾𑌤𑍃𑌸𑍍𑌸𑍌𑌹𑍃𑌦𑌮𑌾𑌲𑌂𑌬 𑌨𑌾𑌨𑍍𑌯𑌾 𑌗𑌤𑌿𑌰𑌿𑌹𑌾𑌸𑍍𑌤𑌿 𑌤𑍇 ॥ 2 ॥
𑌯𑌦𑌿 𑌤𑍇 𑌮𑌤𑍍𑌪𑍍𑌰𑌿𑌯𑌂 𑌕𑌾𑌰𑍍𑌯𑌂 𑌯𑌦𑌿 𑌚𑌾𑌵𑍈𑌷𑌿 𑌮𑌾𑌂 𑌹𑌿𑌤𑌾𑌮𑍍 ।
𑌯𑌾𑌚𑍍𑌯𑌮𑌾𑌨𑌃 𑌪𑍍𑌰𑌯𑌤𑍍𑌨𑍇𑌨 𑌸𑌾𑌧𑍁 𑌵𑌾𑌕𑍍𑌯𑌂 𑌕𑍁𑌰𑍁𑌷𑍍𑌵 𑌮𑍇 ॥ 2 ॥
𑌪𑍍𑌰𑌸𑍀𑌦 𑌪𑌥𑍍𑌯𑌂 𑌶𑍃𑌣𑍁 𑌜𑌲𑍍𑌪𑌿𑌤𑌂 𑌹𑌿 𑌮𑍇 𑌨 𑌰𑍋𑌷 𑌮𑍇𑌵𑌾𑌨𑍁𑌵𑌿𑌧𑌾𑌤𑍁𑌮𑌰𑍍𑌹𑌸𑌿 ।
𑌕𑍍𑌷𑌮𑍋 𑌹𑌿 𑌤𑍇 𑌕𑍋𑌸𑌲𑌰𑌾𑌜𑌸𑍂𑌨𑍁𑌨𑌾 𑌨 𑌵𑌿𑌗𑍍𑌰𑌹𑌶𑍍𑌶𑌕𑍍𑌰𑌸𑌮𑌾𑌨𑌤𑍇𑌜𑌸𑌾 ॥ 30 ॥
𑌤𑌦𑌾 𑌹𑌿 𑌤𑌾𑌰𑌾 𑌹𑌿𑌤𑌮𑍇𑌵 𑌵𑌾𑌕𑍍𑌯𑌂 𑌤𑌂 𑌵𑌾𑌲𑌿𑌨𑌂 𑌪𑌥𑍍𑌯𑌮𑌿𑌦𑌂 𑌬𑌭𑌾𑌷𑍇 ।
𑌨 𑌰𑍋𑌚𑌤𑍇 𑌤𑌦𑍍𑌵𑌚𑌨𑌂 𑌹𑌿 𑌤𑌸𑍍𑌯 𑌕𑌾𑌲𑌾𑌭𑌿𑌪𑌨𑍍𑌨𑌸𑍍𑌯 𑌵𑌿𑌨𑌾𑌶𑌕𑌾𑌲𑍇 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌪𑌂𑌚𑌦𑌶𑌸𑍍𑌸𑌰𑍍𑌗𑌃 ॥
