𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌵𑌾𑌨𑌰𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌆𑌜𑍍𑌞𑌾𑌪𑌯𑌦𑍍𑌵𑌧𑌂 𑌤𑌸𑍍𑌯 𑌰𑌾𑌵𑌣𑌃 𑌕𑍍𑌰𑍋𑌧𑌮𑍂𑌰𑍍𑌛𑌿𑌤𑌃 ॥ 1 ॥
𑌵𑌧𑍇 𑌤𑌸𑍍𑌯 𑌸𑌮𑌾𑌜𑍍𑌞𑌪𑍍𑌤𑍇 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ।
𑌨𑌿𑌵𑍇𑌦𑌿𑌤𑌵𑌤𑍋 𑌦𑍌𑌤𑍍𑌯𑌂 𑌨𑌾𑌨𑍁𑌮𑍇𑌨𑍇 𑌵𑌿𑌭𑍀𑌷𑌣𑌃 ॥ 2 ॥
𑌤𑌂 𑌰𑌕𑍍𑌷𑍋𑌧𑌿𑌪𑌤𑌿𑌂 𑌕𑍍𑌰𑍁𑌦𑍍𑌧𑌂 𑌤𑌚𑍍𑌚 𑌕𑌾𑌰𑍍𑌯𑌮𑍁𑌪𑌸𑍍𑌥𑌿𑌤𑌮𑍍 ।
𑌵𑌿𑌦𑌿𑌤𑍍𑌵𑌾 𑌚𑌿𑌂𑌤𑌯𑌾𑌮𑌾𑌸 𑌕𑌾𑌰𑍍𑌯𑌂 𑌕𑌾𑌰𑍍𑌯𑌵𑌿𑌧𑍌 𑌸𑍍𑌥𑌿𑌤𑌃 ॥ 3 ॥
𑌨𑌿𑌶𑍍𑌚𑌿𑌤𑌾𑌰𑍍𑌥𑌸𑍍𑌤𑌤𑌸𑍍𑌸𑌾𑌮𑍍𑌨𑌾 𑌪𑍂𑌜𑍍𑌯𑌂 𑌶𑌤𑍍𑌰𑍁𑌜𑌿𑌦𑌗𑍍𑌰𑌜𑌮𑍍 ।
𑌉𑌵𑌾𑌚 𑌹𑌿𑌤𑌮𑌤𑍍𑌯𑌰𑍍𑌥𑌂 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌃 ॥ 4 ॥
𑌕𑍍𑌷𑌮𑌸𑍍𑌵 𑌰𑍋𑌷𑌂 𑌤𑍍𑌯𑌜 𑌰𑌾𑌕𑍍𑌷𑌸𑍇𑌂𑌦𑍍𑌰 𑌪𑍍𑌰𑌸𑍀𑌦 𑌮𑌦𑍍𑌵𑌾𑌕𑍍𑌯𑌮𑌿𑌦𑌂 𑌶𑍃𑌣𑍁𑌷𑍍𑌵 ।
𑌵𑌧𑌂 𑌨 𑌕𑍁𑌰𑍍𑌵𑌂𑌤𑌿 𑌪𑌰𑌾𑌵𑌰𑌜𑍍𑌞𑌾 𑌦𑍂𑌤𑌸𑍍𑌯 𑌸𑌂𑌤𑍋 𑌵𑌸𑍁𑌧𑌾𑌧𑌿𑌪𑍇𑌂𑌦𑍍𑌰𑌾𑌃 ॥ 5 ॥
𑌰𑌾𑌜𑌧𑌰𑍍𑌮𑌵𑌿𑌰𑍁𑌦𑍍𑌧𑌂 𑌚 𑌲𑍋𑌕𑌵𑍃𑌤𑍍𑌤𑍇𑌶𑍍𑌚 𑌗𑌰𑍍𑌹𑌿𑌤𑌮𑍍 ।
𑌤𑌵 𑌚𑌾𑌸𑌦𑍃𑌶𑌂 𑌵𑍀𑌰 𑌕𑌪𑍇𑌰𑌸𑍍𑌯 𑌪𑍍𑌰𑌮𑌾𑌪𑌣𑌮𑍍 ॥ 6 ॥
𑌧𑌰𑍍𑌮𑌜𑍍𑌞𑌶𑍍𑌚 𑌕𑍃𑌤𑌜𑍍𑌞𑌶𑍍𑌚 𑌰𑌾𑌜𑌧𑌰𑍍𑌮𑌵𑌿𑌶𑌾𑌰𑌦𑌃 ।
𑌪𑌰𑌾𑌵𑌰𑌜𑍍𑌞𑍋 𑌭𑍂𑌤𑌾𑌨𑌾𑌂 𑌤𑍍𑌵𑌮𑍇𑌵 𑌪𑌰𑌮𑌾𑌰𑍍𑌥𑌵𑌿𑌤𑍍 ॥ ॥
𑌗𑍃𑌹𑍍𑌯𑌂𑌤𑍇 𑌯𑌦𑌿 𑌰𑍋𑌷𑍇𑌣 𑌤𑍍𑌵𑌾𑌦𑍃𑌶𑍋𑌽𑌪𑌿 𑌵𑌿𑌚𑌕𑍍𑌷𑌣𑌃 ।
𑌤𑌤 𑌶𑍍𑌶𑌾𑌸𑍍𑌤𑍍𑌰𑌵𑌿𑌪𑌶𑍍𑌚𑌿𑌤𑍍𑌤𑍍𑌵𑌂 𑌶𑍍𑌰𑌮 𑌏𑌵 𑌹𑌿 𑌕𑍇𑌵𑌲𑌮𑍍 ॥ ॥
𑌤𑌸𑍍𑌮𑌾𑌤𑍍𑌪𑍍𑌰𑌸𑍀𑌦 𑌶𑌤𑍍𑌰𑍁𑌘𑍍𑌨 𑌰𑌾𑌕𑍍𑌷𑌸𑍇𑌂𑌦𑍍𑌰 𑌦𑍁𑌰𑌾𑌸𑌦 ।
𑌯𑍁𑌕𑍍𑌤𑌾𑌯𑍁𑌕𑍍𑌤𑌂 𑌵𑌿𑌨𑌿𑌶𑍍𑌚𑌿𑌤𑍍𑌯 𑌦𑍂𑌤𑌦𑌂𑌡𑍋 𑌵𑌿𑌧𑍀𑌯𑌤𑌾𑌮𑍍 ॥ ॥
𑌵𑌿𑌭𑍀𑌷𑌣𑌵𑌚𑌃 𑌶𑍍𑌰𑍁𑌤𑍍𑌵𑌾 𑌰𑌾𑌵𑌣𑍋 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌰𑍋𑌷𑍇𑌣 𑌮𑌹𑌤𑌾𑌵𑌿𑌷𑍍𑌟𑍋 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 10 ॥
𑌨 𑌪𑌾𑌪𑌾𑌨𑌾𑌂 𑌵𑌧𑍇 𑌪𑌾𑌪𑌂 𑌵𑌿𑌦𑍍𑌯𑌤𑍇 𑌶𑌤𑍍𑌰𑍁𑌸𑍂𑌦𑌨 ।
𑌤𑌸𑍍𑌮𑌾𑌦𑍇𑌨𑌂 𑌵𑌧𑌿𑌷𑍍𑌯𑌾𑌮𑌿 𑌵𑌾𑌨𑌰𑌂 𑌪𑌾𑌪𑌚𑌾𑌰𑌿𑌣𑌮𑍍 ॥ 11 ॥
𑌅𑌧𑌰𑍍𑌮𑌮𑍂𑌲𑌂 𑌬𑌹𑍁𑌦𑍋𑌷𑌯𑍁𑌕𑍍𑌤𑌮𑌨𑌾𑌰𑍍𑌯𑌜𑍁𑌷𑍍𑌟𑌂 𑌵𑌚𑌨𑌂 𑌨𑌿𑌶𑌮𑍍𑌯 ।
𑌉𑌵𑌾𑌚 𑌵𑌾𑌕𑍍𑌯𑌂 𑌪𑌰𑌮𑌾𑌰𑍍𑌥𑌤𑌤𑍍𑌤𑍍𑌵𑌂 𑌵𑌿𑌭𑍀𑌷𑌣𑍋 𑌬𑍁𑌦𑍍𑌧𑌿𑌮𑌤𑌾𑌂 𑌵𑌰𑌿𑌷𑍍𑌠𑌃 ॥ 12 ॥
𑌪𑍍𑌰𑌸𑍀𑌦 𑌲𑌂𑌕𑍇𑌶𑍍𑌵𑌰 𑌰𑌾𑌕𑍍𑌷𑌸𑍇𑌂𑌦𑍍𑌰 𑌧𑌰𑍍𑌮𑌾𑌰𑍍𑌥𑌯𑍁𑌕𑍍𑌤𑌂 𑌵𑌚𑌨𑌂 𑌶𑍃𑌣𑍁𑌷𑍍𑌵 ।
𑌦𑍂𑌤𑌾𑌨𑌵𑌧𑍍𑌯𑌾𑌨𑍍 𑌸𑌮𑌯𑍇𑌷𑍁 𑌰𑌾𑌜𑌨𑍍 𑌸𑌰𑍍𑌵𑍇𑌷𑍁 𑌸𑌰𑍍𑌵𑌤𑍍𑌰 𑌵𑌦𑌂𑌤𑌿 𑌸𑌂𑌤𑌃 ॥ 13 ॥
𑌅𑌸𑌂𑌶𑌯𑌂 𑌶𑌤𑍍𑌰𑍁𑌰𑌯𑌂 𑌪𑍍𑌰𑌵𑍃𑌦𑍍𑌧𑌃 𑌕𑍃𑌤𑌂 𑌹𑍍𑌯𑌨𑍇𑌨𑌾𑌪𑍍𑌰𑌿𑌯𑌮𑌪𑍍𑌰𑌮𑍇𑌯𑌮𑍍 ।
𑌨 𑌦𑍂𑌤𑌵𑌧𑍍𑌯𑌾𑌂 𑌪𑍍𑌰𑌵𑌦𑌂𑌤𑌿 𑌸𑌂𑌤𑍋 𑌦𑍂𑌤𑌸𑍍𑌯 𑌦𑍃𑌷𑍍𑌟𑌾 𑌬𑌹𑌵𑍋 𑌹𑌿 𑌦𑌂𑌡𑌾𑌃 ॥ 14 ॥
𑌵𑍈𑌰𑍂𑌪𑍍𑌯𑌮𑌂𑌗𑍇𑌷𑍁 𑌕𑌶𑌾𑌭𑌿𑌘𑌾𑌤𑍋 𑌮𑍌𑌂𑌡𑍍𑌯𑌂 𑌤𑌥𑌾 𑌲𑌕𑍍𑌷𑌣𑌸𑌨𑍍𑌨𑌿𑌪𑌾𑌤𑌃 ।
𑌏𑌤𑌾𑌨𑍍 𑌹𑌿 𑌦𑍂𑌤𑍇 𑌪𑍍𑌰𑌵𑌦𑌂𑌤𑌿 𑌦𑌂𑌡𑌾𑌨𑍍 𑌵𑌧𑌸𑍍𑌤𑍁 𑌦𑍂𑌤𑌸𑍍𑌯 𑌨 𑌨𑌃 𑌶𑍍𑌰𑍁𑌤𑍋𑌽𑌸𑍍𑌤𑌿 ॥ 15 ॥
𑌕𑌥𑌂 𑌚 𑌧𑌰𑍍𑌮𑌾𑌰𑍍𑌥𑌵𑌿𑌨𑍀𑌤𑌬𑍁𑌦𑍍𑌧𑌿𑌃 𑌪𑌰𑌾𑌵𑌰𑌪𑍍𑌰𑌤𑍍𑌯𑌯𑌨𑌿𑌶𑍍𑌚𑌿𑌤𑌾𑌰𑍍𑌥𑌃 ।
𑌭𑌵𑌦𑍍𑌵𑌿𑌧𑌃 𑌕𑍋𑌪𑌵𑌶𑍇 𑌹𑌿 𑌤𑌿𑌷𑍍𑌠𑍇𑌤𑍍 𑌕𑍋𑌪𑌂 𑌨𑌿𑌯𑌚𑍍𑌛𑌂𑌤𑌿 𑌹𑌿 𑌸𑌤𑍍𑌤𑍍𑌵𑌵𑌂𑌤𑌃 ॥ 16 ॥
𑌨 𑌧𑌰𑍍𑌮𑌵𑌾𑌦𑍇 𑌨 𑌚 𑌲𑍋𑌕𑌵𑍃𑌤𑍍𑌤𑍇 𑌨 𑌶𑌾𑌸𑍍𑌤𑍍𑌰𑌬𑍁𑌦𑍍𑌧𑌿𑌗𑍍𑌰𑌹𑌣𑍇𑌷𑍁 𑌚𑌾𑌪𑌿 ।
𑌵𑌿𑌦𑍍𑌯𑍇𑌤 𑌕𑌶𑍍𑌚𑌿𑌤𑍍𑌤𑌵 𑌵𑍀𑌰 𑌤𑍁𑌲𑍍𑌯 𑌸𑍍𑌤𑍍𑌵𑌂𑌹𑍍𑌯𑍁𑌤𑍍𑌤𑌮𑌸𑍍𑌸𑌰𑍍𑌵𑌸𑍁𑌰𑌾𑌸𑍁𑌰𑌾𑌣𑌾𑌮𑍍 ॥ 1 ॥
𑌶𑍂𑌰𑍇𑌣 𑌵𑍀𑌰𑍇𑌣 𑌨𑌿𑌶𑌾𑌚𑌰𑍇𑌂𑌦𑍍𑌰 𑌸𑍁𑌰𑌾𑌸𑍁𑌰𑌾𑌣𑌾𑌮𑌪𑌿 𑌦𑍁𑌰𑍍𑌜𑌯𑍇𑌨 ।
𑌤𑍍𑌵𑌯𑌾 𑌪𑍍𑌰𑌗𑌲𑍍𑌭𑌾𑌃 𑌸𑍁𑌰𑌦𑍈𑌤𑍍𑌯𑌸𑌂𑌘𑌾 𑌜𑌿𑌤𑌾𑌶𑍍𑌚 𑌯𑍁𑌦𑍍𑌧𑍇𑌷𑍍𑌵𑌸𑌕𑍃𑌨𑍍𑌨𑌰𑍇𑌂𑌦𑍍𑌰𑌾𑌃 ॥ 1 ॥
𑌨 𑌚𑌾𑌪𑍍𑌯𑌸𑍍𑌯 𑌕𑌪𑍇𑌰𑍍𑌘𑌾𑌤𑍇 𑌕𑌂𑌚𑌿𑌤𑍍𑌪𑌶𑍍𑌯𑌾𑌮𑍍𑌯𑌹𑌂 𑌗𑍁𑌣𑌮𑍍 ।
𑌤𑍇𑌷𑍍𑌵𑌯𑌂 𑌪𑌾𑌤𑍍𑌯𑌤𑌾𑌂 𑌦𑌂𑌡𑍋 𑌯𑍈𑌰𑌯𑌂 𑌪𑍍𑌰𑍇𑌷𑌿𑌤𑌃 𑌕𑌪𑌿𑌃 ॥ 1 ॥
𑌸𑌾𑌧𑍁𑌰𑍍𑌵𑌾 𑌯𑌦𑌿 𑌵𑌾𑌽𑌸𑌾𑌧𑍁𑌃 𑌪𑌰𑍈𑌰𑍇𑌷 𑌸𑌮𑌰𑍍𑌪𑌿𑌤𑌃 ।
𑌬𑍍𑌰𑍁𑌵𑌨𑍍 𑌪𑌰𑌾𑌰𑍍𑌥𑌂 𑌪𑌰𑌵𑌾𑌨𑍍𑌨 𑌦𑍂𑌤𑍋 𑌵𑌧𑌮𑌰𑍍𑌹𑌤𑌿 ॥ 20 ॥
𑌅𑌪𑌿 𑌚𑌾𑌸𑍍𑌮𑌿𑌨𑍍 𑌹𑌤𑍇 𑌰𑌾𑌜𑌨𑍍𑌨𑌾𑌨𑍍𑌯𑌂 𑌪𑌶𑍍𑌯𑌾𑌮𑌿 𑌖𑍇𑌚𑌰𑌮𑍍 ।
𑌇𑌹 𑌯𑌃 𑌪𑍁𑌨𑌰𑌾𑌗𑌚𑍍𑌛𑍇𑌤𑍍𑌪𑌰𑌂 𑌪𑌾𑌰𑌂 𑌮𑌹𑍋𑌦𑌧𑍇𑌃 ॥ 21 ॥
𑌤𑌸𑍍𑌮𑌾𑌨𑍍𑌨𑌾𑌸𑍍𑌯 𑌵𑌧𑍇 𑌯𑌤𑍍𑌨𑌃 𑌕𑌾𑌰𑍍𑌯𑌃 𑌪𑌰𑌪𑍁𑌰𑌂𑌜𑌯 ।
𑌭𑌵𑌾𑌨𑍍 𑌸𑍇𑌂𑌦𑍍𑌰𑍇𑌷𑍁 𑌦𑍇𑌵𑍇𑌷𑍁 𑌯𑌤𑍍𑌨𑌮𑌾𑌸𑍍𑌥𑌾𑌤𑍁𑌮𑌰𑍍𑌹𑌤𑌿 ॥ 22 ॥
𑌅𑌸𑍍𑌮𑌿𑌨𑍍𑌵𑌿𑌨𑌷𑍍𑌟𑍇 𑌨 𑌹𑌿 𑌵𑍀𑌰𑌮𑌨𑍍𑌯𑌂 𑌪𑌶𑍍𑌯𑌾𑌮𑌿 𑌯𑌸𑍍𑌤𑍌 𑌵𑌰𑌰𑌾𑌜𑌪𑍁𑌤𑍍𑌰𑍌 ।
𑌯𑍁𑌦𑍍𑌧𑌾𑌯 𑌯𑍁𑌦𑍍𑌧𑌪𑍍𑌰𑌿𑌯𑌦𑍁𑌰𑍍𑌵𑌿𑌨𑍀𑌤𑌾𑌵𑍁𑌦𑍍𑌯𑍋𑌜𑌯𑍇𑌦𑍍𑌧𑍀𑌰𑍍𑌘𑌪𑌥𑌾𑌵𑌰𑍁𑌦𑍍𑌧𑍌 ॥ 23 ॥
𑌪𑌰𑌾𑌕𑍍𑌰𑌮𑍋𑌤𑍍𑌸𑌾𑌹𑌮𑌨𑌸𑍍𑌵𑌿𑌨𑌾𑌂 𑌚 𑌸𑍁𑌰𑌾𑌸𑍁𑌰𑌾𑌣𑌾𑌮𑌪𑌿 𑌦𑍁𑌰𑍍𑌜𑌯𑍇𑌨 ।
𑌤𑍍𑌵𑌯𑌾 𑌮𑌨𑍋𑌨𑌂𑌦𑌨 𑌨𑍈𑌤𑌾𑌨𑌾𑌂 𑌯𑍁𑌦𑍍𑌧𑌾𑌯𑌤𑌿𑌰𑍍𑌨𑌾𑌶𑌯𑌤𑍁𑌂 𑌨 𑌯𑍁𑌕𑍍𑌤𑌾 ॥ 24 ॥
𑌹𑌿𑌤𑌾𑌶𑍍𑌚 𑌶𑍂𑌰𑌾𑌶𑍍𑌚 𑌸𑌮𑌾𑌹𑌿𑌤𑌾𑌶𑍍𑌚 𑌕𑍁𑌲𑍇𑌷𑍁 𑌜𑌾𑌤𑌾𑌶𑍍𑌚 𑌮𑌹𑌾𑌗𑍁𑌣𑍇𑌷𑍁 ।
𑌮𑌨𑌸𑍍𑌵𑌿𑌨𑌶𑍍𑌶𑌸𑍍𑌤𑍍𑌰𑌭𑍃𑌤𑌾𑌂 𑌵𑌰𑌿𑌷𑍍𑌠𑌾𑌃 𑌕𑍋𑌟𑍍𑌯𑌗𑍍𑌰𑌤𑌸𑍍𑌤𑍇 𑌸𑍁𑌭𑍃𑌤𑌾𑌶𑍍𑌚 𑌯𑍋𑌧𑌾𑌃 ॥ 25 ॥
𑌤𑌦𑍇𑌕𑌦𑍇𑌶𑍇𑌨 𑌬𑌲𑌸𑍍𑌯 𑌤𑌾𑌵𑌤𑍍𑌕𑍇𑌚𑌿𑌤𑍍𑌤𑌵𑌾𑌽𑌽𑌦𑍇𑌶𑌕𑍃𑌤𑍋𑌽𑌭𑌿𑌯𑌾𑌂𑌤𑍁 𑌤𑍌 𑌰𑌾𑌜𑌪𑍁𑌤𑍍𑌰𑍌 𑌵𑌿𑌨𑌿𑌗𑍃𑌹𑍍𑌯 𑌮𑍂𑌢𑍌 𑌪𑌰𑍇𑌷𑍁 𑌤𑍇 𑌭𑌾𑌵𑌯𑌿𑌤𑍁𑌂 𑌪𑍍𑌰𑌭𑌾𑌵𑌮𑍍 ॥ 26 ॥
𑌨𑌿𑌶𑌾𑌚𑌰𑌾𑌣𑌾𑌮𑌧𑌿𑌪𑍋𑌽𑌨𑍁𑌜𑌸𑍍𑌯 𑌵𑌿𑌭𑍀𑌷𑌣𑌸𑍍𑌯𑍋𑌤𑍍𑌤𑌮𑌵𑌾𑌕𑍍𑌯𑌮𑌿𑌷𑍍𑌟𑌮𑍍 ।
𑌜𑌗𑍍𑌰𑌾𑌹 𑌬𑍁𑌦𑍍𑌧𑍍𑌯𑌾 𑌸𑍁𑌰𑌲𑍋𑌕𑌶𑌤𑍍𑌰𑍁 𑌰𑍍𑌮𑌹𑌾𑌬𑌲𑍋 𑌰𑌾𑌕𑍍𑌷𑌸𑌰𑌾𑌜𑌮𑍁𑌖𑍍𑌯𑌃 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌦𑍍𑌵𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
