𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌂 𑌜𑌾𑌗𑍍𑌰𑌤𑌮𑌦𑌂𑌭𑍇𑌨 𑌭𑍍𑌰𑌾𑌤𑍁𑌰𑌰𑍍𑌥𑌾𑌯 𑌲𑌕𑍍𑌷𑍍𑌮𑌣𑌮𑍍 ।
𑌗𑍁𑌹𑌃 𑌸𑌂𑌤𑌾𑌪𑌸𑌂𑌤𑌪𑍍𑌤𑍋 𑌰𑌾𑌘𑌵𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 1 ॥
𑌇𑌯𑌂 𑌤𑌾𑌤 𑌸𑍁𑌖𑌾 𑌶𑌯𑍍𑌯𑌾 𑌤𑍍𑌵𑌦𑌰𑍍𑌥𑌮𑍁𑌪𑌕𑌲𑍍𑌪𑌿𑌤𑌾 ।
𑌪𑍍𑌰𑌤𑍍𑌯𑌾𑌶𑍍𑌵𑌸𑌿𑌹𑌿 𑌸𑌾𑌧𑍍𑌵𑌸𑍍𑌯𑌾𑌂 𑌰𑌾𑌜𑌪𑍁𑌤𑍍𑌰 𑌯𑌥𑌾𑌸𑍁𑌖𑌮𑍍 ॥ 2 ॥
𑌉𑌚𑌿𑌤𑍋𑌽𑌯𑌂 𑌜𑌨𑌸𑍍𑌸𑌰𑍍𑌵𑌃 𑌕𑍍𑌲𑍇𑌶𑌾𑌨𑌾𑌂 𑌤𑍍𑌵𑌂 𑌸𑍁𑌖𑍋𑌚𑌿𑌤𑌃 ।
𑌗𑍁𑌪𑍍𑌤𑍍𑌯𑌰𑍍𑌥𑌂 𑌜𑌾𑌗𑌰𑌿𑌷𑍍𑌯𑌾𑌮𑌃 𑌕𑌾𑌕𑍁𑌤𑍍𑌸𑍍𑌥𑌸𑍍𑌯 𑌵𑌯𑌂 𑌨𑌿𑌶𑌾𑌮𑍍 ॥ 3 ॥
𑌨 𑌹𑌿 𑌰𑌾𑌮𑌾𑌤𑍍𑌪𑍍𑌰𑌿𑌯𑌤𑌮𑍋 𑌮𑌮𑌾𑌸𑍍𑌤𑌿 𑌭𑍁𑌵𑌿 𑌕𑌶𑍍𑌚𑌨 ।
𑌬𑍍𑌰𑌵𑍀𑌮𑍍𑌯𑍇𑌤𑌦𑌹𑌂 𑌸𑌤𑍍𑌯𑌂 𑌸𑌤𑍍𑌯𑍇𑌨𑍈𑌵 𑌚 𑌤𑍇 𑌶𑌪𑍇 ॥ 4 ॥
𑌅𑌸𑍍𑌯 𑌪𑍍𑌰𑌸𑌾𑌦𑌾𑌦𑌾𑌶𑌂𑌸𑍇 𑌲𑍋𑌕𑍇𑌸𑍍𑌮𑌿𑌨𑍍 𑌸𑍁𑌮𑍁𑌹𑌦𑍍𑌯𑌶𑌃 ।
𑌧𑌰𑍍𑌮𑌾𑌵𑌾𑌪𑍍𑌤𑌿𑌂 𑌚 𑌵𑌿𑌪𑍁𑌲𑌾𑌮𑌰𑍍𑌥𑌾𑌵𑌾𑌪𑍍𑌤𑌿𑌂 𑌚 𑌕𑍇𑌵𑌲𑌮𑍍 ॥ 5 ॥
𑌸𑍋𑌽𑌹𑌂 𑌪𑍍𑌰𑌿𑌯𑌸𑌖𑌂 𑌰𑌾𑌮𑌂 𑌶𑌯𑌾𑌨𑌂 𑌸𑌹 𑌸𑍀𑌤𑌯𑌾 ।
𑌰𑌕𑍍𑌷𑌿𑌷𑍍𑌯𑌾𑌮𑌿 𑌧𑌨𑍁𑌷𑍍𑌪𑌾𑌣𑌿 𑌸𑍍𑌸𑌰𑍍𑌵𑌤𑍋 𑌜𑍍𑌞𑌾𑌤𑌿𑌭𑌿 𑌸𑍍𑌸𑌹 ॥ 6 ॥
𑌨 𑌹𑌿 𑌮𑍇𑌽𑌵𑌿𑌦𑌿𑌤𑌂 𑌕𑌿𑌂𑌚𑌿𑌦𑍍𑌵𑌨𑍇𑌽𑌸𑍍𑌮𑌿𑌂𑌶𑍍𑌚𑌰𑌤𑌸𑍍𑌸𑌦𑌾 ।
𑌚𑌤𑍁𑌰𑌂𑌗𑌂 𑌹𑍍𑌯𑌪𑌿𑌬𑌲𑌂 𑌸𑍁𑌮𑌹𑌤𑍍𑌪𑍍𑌰𑌸𑌹𑍇𑌮𑌹𑌿 ॥ ॥
𑌲𑌕𑍍𑌷𑍍𑌮𑌣𑌸𑍍𑌤𑌂 𑌤𑌦𑍋𑌵𑌾𑌚 𑌰𑌕𑍍𑌷𑍍𑌯𑌮𑌾𑌣𑌾𑌸𑍍𑌤𑍍𑌵𑌯𑌾𑌨𑌘 ।
𑌨𑌾𑌤𑍍𑌰 𑌭𑍀𑌤𑌾 𑌵𑌯𑌂 𑌸𑌰𑍍𑌵𑍇 𑌧𑌰𑍍𑌮𑌮𑍇𑌵𑌾𑌨𑍁𑌪𑌶𑍍𑌯𑌤𑌾 ॥ ॥
𑌕𑌥𑌂 𑌦𑌶𑌰𑌥𑍌 𑌭𑍂𑌮𑍌 𑌶𑌯𑌾𑌨𑍇 𑌸𑌹 𑌸𑍀𑌤𑌯𑌾 ।
𑌶𑌕𑍍𑌯𑌾 𑌨𑌿𑌦𑍍𑌰𑌾 𑌮𑌯𑌾 𑌲𑌬𑍍𑌧𑍁𑌂 𑌜𑍀𑌵𑌿𑌤𑌂 𑌵𑌾 𑌸𑍁𑌖𑌾𑌨𑌿 𑌵𑌾 ॥ ॥
𑌯𑍋 𑌨 𑌦𑍇𑌵𑌾𑌸𑍁𑌰𑍈𑌃 𑌸𑌰𑍍𑌵𑍈𑌃 𑌶𑌕𑍍𑌯𑌃 𑌪𑍍𑌰𑌸𑌹𑌿𑌤𑍁𑌂 𑌯𑍁𑌧𑌿 ।
𑌤𑌂 𑌪𑌶𑍍𑌯 𑌸𑍁𑌖𑌸𑌂𑌵𑌿𑌷𑍍𑌟𑌂 𑌤𑍃𑌣𑍇𑌷𑍁 𑌸𑌹 𑌸𑍀𑌤𑌯𑌾 ॥ 10 ॥
𑌯𑍋 𑌮𑌂𑌤𑍍𑌰𑌤𑌪𑌸𑌾 𑌲𑌬𑍍𑌧𑍋 𑌵𑌿𑌵𑌿𑌧𑍈𑌶𑍍𑌚 𑌪𑌰𑌾𑌶𑍍𑌰𑌮𑍈𑌃 ।
𑌏𑌕𑍋 𑌦𑌶𑌰𑌥𑌸𑍍𑌯𑍇𑌷𑍍𑌟𑌃 𑌪𑍁𑌤𑍍𑌰𑌃 𑌸𑌦𑍃𑌶𑌲𑌕𑍍𑌷𑌣𑌃 ॥ 11 ॥
𑌅𑌸𑍍𑌮𑌿𑌨𑍍 𑌪𑍍𑌰𑌵𑍍𑌰𑌾𑌜𑌿𑌤𑍇 𑌰𑌾𑌜𑌾 𑌨 𑌚𑌿𑌰𑌂 𑌵𑌰𑍍𑌤𑌯𑌿𑌷𑍍𑌯𑌤𑌿 ।
𑌵𑌿𑌧𑌵𑌾 𑌮𑍇𑌦𑌿𑌨𑍀 𑌨𑍂𑌨𑌂 𑌕𑍍𑌷𑌿𑌪𑍍𑌰𑌮𑍇𑌵 𑌭𑌵𑌿𑌷𑍍𑌯𑌤𑌿 ॥ 12 ॥
𑌵𑌿𑌨𑌦𑍍𑌯 𑌸𑍁𑌮𑌹𑌾𑌨𑌾𑌦𑌂 𑌶𑍍𑌰𑌮𑍇𑌣𑍋𑌪𑌰𑌤𑌾𑌃 𑌸𑍍𑌤𑍍𑌰𑌿𑌯𑌃 ।
𑌨𑌿𑌰𑍍𑌘𑍋𑌷𑍋𑌪𑌰𑌤𑌂 𑌚𑌾𑌤𑍋 𑌮𑌨𑍍𑌯𑍇 𑌰𑌾𑌜𑌨𑌿𑌵𑍇𑌶𑌨𑌮𑍍 ॥ 13 ॥
𑌕𑍌𑌶𑌲𑍍𑌯𑌾 𑌚𑍈𑌵 𑌰𑌾𑌜𑌾 𑌚 𑌤𑌥𑍈𑌵 𑌜𑌨𑌨𑍀 𑌮𑌮 ।
𑌨𑌾𑌶𑌂𑌸𑍇 𑌯𑌦𑌿 𑌜𑍀𑌵𑌂𑌤𑌿 𑌸𑌰𑍍𑌵𑍇 𑌤𑍇 𑌶𑌰𑍍𑌵𑌰𑍀𑌮𑌿𑌮𑌾𑌮𑍍 ॥ 14 ॥
𑌜𑍀𑌵𑍇𑌦𑌪𑌿 𑌹𑌿 𑌮𑍇 𑌮𑌾𑌤𑌾 𑌶𑌤𑍍𑌰𑍁𑌘𑍍𑌨𑌸𑍍𑌯𑌾𑌨𑍍𑌵𑌵𑍇𑌕𑍍𑌷𑌯𑌾 ।
𑌤𑌦𑍍𑌦𑍁𑌃𑌖𑌂 𑌯𑌤𑍍𑌤𑍁 𑌕𑍌𑌶𑌲𑍍𑌯𑌾 𑌵𑍀𑌰𑌸𑍂𑌰𑍍𑌵𑌿𑌨𑌶𑌿𑌷𑍍𑌯𑌤𑌿 ॥ 15 ॥
𑌅𑌨𑍁𑌰𑌕𑍍𑌤𑌜𑌨𑌾𑌕𑍀𑌰𑍍𑌣𑌾 𑌸𑍁𑌖𑌾𑌲𑍋𑌕𑌪𑍍𑌰𑌿𑌯𑌾𑌵𑌹𑌾 ।
𑌰𑌾𑌜𑌵𑍍𑌯𑌸𑌨𑌸𑌂𑌸𑍃𑌷𑍍𑌟𑌾 𑌸𑌾 𑌪𑍁𑌰𑍀 𑌵𑌿𑌨𑌶𑌿𑌷𑍍𑌯𑌤𑌿 ॥ 16 ॥
𑌕𑌥𑌂 𑌪𑍁𑌤𑍍𑌰𑌂 𑌮𑌹𑌾𑌤𑍍𑌮𑌾𑌨𑌂 𑌜𑍍𑌯𑍇𑌷𑍍𑌠𑌂 𑌪𑍍𑌰𑌿𑌯𑌮𑌪𑌶𑍍𑌯𑌤𑌃 ।
𑌶𑌰𑍀𑌰𑌂 𑌧𑌾𑌰𑌯𑌿𑌷𑍍𑌯𑌂𑌤𑌿 𑌪𑍍𑌰𑌾𑌣𑌾 𑌰𑌾𑌜𑍍𑌞𑍋 𑌮𑌹𑌾𑌤𑍍𑌮𑌨𑌃 ॥ 1 ॥
𑌵𑌿𑌨𑌷𑍍𑌟𑍇 𑌨𑍃𑌪𑌤𑍌 𑌪𑌶𑍍𑌚𑌾𑌤𑍍𑌕𑍌𑌸𑌲𑍍𑌯𑌾 𑌵𑌿𑌨𑌶𑌿𑌷𑍍𑌯𑌤𑌿 ।
𑌅𑌨𑌂𑌤𑌰𑌂 𑌚 𑌮𑌾𑌤𑌾𑌽𑌪𑌿 𑌮𑌮 𑌨𑌾𑌶𑌮𑍁𑌪𑍈𑌷𑍍𑌯𑌤𑌿 ॥ 1 ॥
𑌅𑌤𑌿𑌕𑍍𑌰𑌾𑌂𑌤𑌮𑌤𑌿𑌕𑍍𑌰𑌾𑌂𑌤𑌮𑌨𑌵𑌾𑌪𑍍𑌯 𑌮𑌨𑍋𑌰𑌥𑌮𑍍 ।
𑌰𑌾𑌜𑍍𑌯𑍇 𑌰𑌾𑌮𑌮𑌨𑌿𑌕𑍍𑌷𑌿𑌪𑍍𑌯 𑌪𑌿𑌤𑌾 𑌮𑍇 𑌵𑌿𑌨𑌶𑌿𑌷𑍍𑌯𑌤𑌿 ॥ 1 ॥
𑌸𑌿𑌦𑍍𑌧𑌾𑌰𑍍𑌥𑌾𑌃 𑌪𑌿𑌤𑌰𑌂 𑌵𑍃𑌤𑍍𑌤𑌂 𑌤𑌸𑍍𑌮𑌿𑌨𑍍𑌕𑌾𑌲𑍇𑌽𑌪𑍍𑌯𑍁𑌪𑌸𑍍𑌥𑌿𑌤𑍇 ।
𑌪𑍍𑌰𑍇𑌤𑌕𑌾𑌰𑍍𑌯𑍇𑌷𑍁 𑌸𑌰𑍍𑌵𑍇𑌷𑍁 𑌸𑌂𑌸𑍍𑌕𑌰𑌿𑌷𑍍𑌯𑌂𑌤𑌿 𑌭𑍂𑌮𑌿𑌪𑌮𑍍 ॥ 20 ॥
𑌰𑌮𑍍𑌯𑌚𑌤𑍍𑌵𑌰𑌸𑌂𑌸𑍍𑌥𑌾𑌨𑌾𑌂 𑌸𑍁𑌵𑌿𑌭𑌕𑍍𑌤𑌮𑌹𑌾𑌪𑌥𑌾𑌮𑍍 ।
𑌹𑌰𑍍𑌮𑍍𑌯𑌪𑍍𑌰𑌾𑌸𑌾𑌦𑌸𑌂𑌪𑌨𑍍𑌨𑌾𑌂 𑌗𑌣𑌿𑌕𑌾𑌵𑌰𑌶𑍋𑌭𑌿𑌤𑌾𑌮𑍍 ॥ 21 ॥
𑌰𑌥𑌾𑌶𑍍𑌵𑌗𑌜𑌸𑌂𑌬𑌾𑌧𑌾𑌂 𑌤𑍂𑌰𑍍𑌯𑌨𑌾𑌦𑌵𑌿𑌨𑌾𑌦𑌿𑌤𑌾𑌮𑍍 ।
𑌸𑌰𑍍𑌵𑌕𑌲𑍍𑌯𑌾𑌣𑌸𑌂𑌪𑍂𑌰𑍍𑌣𑌾𑌂 𑌹𑍃𑌷𑍍𑌟𑌪𑍁𑌷𑍍𑌟𑌜𑌨𑌾𑌕𑍁𑌲𑌾𑌮𑍍 ॥ 22 ॥
𑌆𑌰𑌾𑌮𑍋𑌦𑍍𑌯𑌾𑌨𑌸𑌂𑌪𑌨𑍍𑌨𑌾𑌂 𑌸𑌮𑌾𑌜𑍋𑌤𑍍𑌸𑌵𑌶𑌾𑌲𑌿𑌨𑍀𑌮𑍍 ।
𑌸𑍁𑌖𑌿𑌤𑌾 𑌵𑌿𑌚𑌰𑌿𑌷𑍍𑌯𑌂𑌤𑌿 𑌰𑌾𑌜𑌧𑌾𑌨𑍀𑌂 𑌪𑌿𑌤𑍁𑌰𑍍𑌮𑌮 ॥ 23 ॥
𑌅𑌪𑌿 𑌜𑍀𑌵𑍇𑌦𑍍𑌦𑌶𑌰𑌥𑍋 𑌵𑌨𑌵𑌾𑌸𑌾𑌤𑍍𑌪𑍁𑌨𑌰𑍍𑌵𑌯𑌮𑍍 ।
𑌪𑍍𑌰𑌤𑍍𑌯𑌾𑌗𑌮𑍍𑌯 𑌮𑌹𑌾𑌤𑍍𑌮𑌾𑌨𑌮𑌪𑌿 𑌪𑌶𑍍𑌯𑍇𑌮 𑌸𑍁𑌵𑍍𑌰𑌤𑌮𑍍 ॥ 24 ॥
𑌅𑌪𑌿 𑌸𑌤𑍍𑌯𑌪𑍍𑌰𑌤𑌿𑌜𑍍𑌞𑍇𑌨 𑌸𑌾𑌰𑍍𑌧𑌂 𑌕𑍁𑌶𑌲𑌿𑌨𑌾 𑌵𑌯𑌮𑍍 ।
𑌨𑌿𑌵𑍃𑌤𑍍𑌤𑍇 𑌵𑌨𑌵𑌾𑌸𑍇𑌽𑌸𑍍𑌮𑌿𑌨𑍍𑌨𑌯𑍋𑌧𑍍𑌯𑌾𑌂 𑌪𑍍𑌰𑌵𑌿𑌶𑍇𑌮𑌹𑌿 ॥ 25 ॥
𑌪𑌰𑌿𑌦𑍇𑌵𑌯𑌮𑌾𑌨𑌸𑍍𑌯 𑌦𑍁𑌖𑌾𑌰𑍍𑌤𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌤𑌿𑌷𑍍𑌠𑌤𑍋 𑌰𑌾𑌜𑌪𑍁𑌤𑍍𑌰𑌸𑍍𑌯 𑌶𑌰𑍍𑌵𑌰𑍀 𑌸𑌾𑌽𑌤𑍍𑌯𑌵𑌰𑍍𑌤𑌤 ॥ 26 ॥
𑌤𑌥𑌾 𑌹𑌿 𑌸𑌤𑍍𑌯𑌂 𑌬𑍍𑌰𑍁𑌵𑌤𑌿 𑌪𑍍𑌰𑌜𑌾𑌹𑌿𑌤𑍇 𑌨𑌰𑍇𑌂𑌦𑍍𑌰𑌪𑍁𑌤𑍍𑌰𑍇 𑌗𑍁𑌰𑍁𑌸𑍌𑌹𑍃𑌦𑌾𑌦𑍍𑌗𑍁𑌹𑌃 ।
𑌮𑍁𑌮𑍋𑌚 𑌬𑌾𑌷𑍍𑌪𑌂 𑌵𑍍𑌯𑌸𑌨𑌾𑌭𑌿𑌪𑍀𑌡𑌿𑌤𑍋 𑌜𑍍𑌵𑌰𑌾𑌤𑍁𑌰𑍋 𑌨𑌾𑌗 𑌇𑌵 𑌵𑍍𑌯𑌥𑌾𑌤𑍁𑌰𑌃 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
