𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑍋𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌮𑌿𑌨𑍍𑌯𑌾𑌤𑍇 𑌬𑌲𑍇 𑌘𑍋𑌰𑌮𑌶𑌿𑌵𑌂 𑌶𑍋𑌣𑌿𑌤𑍋𑌦𑌕𑌮𑍍 ।
𑌅𑌭𑍍𑌯𑌵𑌰𑍍𑌷𑌨𑍍𑌮𑌹𑌾𑌮𑍇𑌘𑌸𑍍𑌤𑍁𑌮𑍁𑌲𑍋 𑌗𑌰𑍍𑌦𑌭𑌾𑌰𑍁𑌣𑌃 ॥ 1 ॥
𑌨𑌿𑌪𑍇𑌤𑍁𑌸𑍍𑌤𑍁𑌰𑌗𑌾𑌸𑍍𑌤𑌸𑍍𑌯 𑌰𑌥𑌯𑍁𑌕𑍍𑌤𑌾 𑌮𑌹𑌾𑌜𑌵𑌾𑌃 ।
𑌸𑌮𑍇 𑌪𑍁𑌷𑍍𑌪𑌚𑌿𑌤𑍇 𑌦𑍇𑌶𑍇 𑌰𑌾𑌜𑌮𑌾𑌰𑍍𑌗𑍇 𑌯𑌦𑍃𑌚𑍍𑌛𑌯𑌾 ॥ 2 ॥
𑌶𑍍𑌯𑌾𑌮𑌂 𑌰𑍁𑌧𑌿𑌰𑌪𑌰𑍍𑌯𑌂𑌤𑌂 𑌬𑌭𑍂𑌵 𑌪𑌰𑌿𑌵𑍇𑌷𑌣𑌮𑍍 ।
𑌅𑌲𑌾𑌤𑌚𑌕𑍍𑌰𑌪𑍍𑌰𑌤𑌿𑌮𑌂 𑌪𑌰𑌿𑌗𑍃𑌹𑍍𑌯 𑌦𑌿𑌵𑌾𑌕𑌰𑌮𑍍 ॥ 3 ॥
𑌤𑌤𑍋 𑌧𑍍𑌵𑌜𑌮𑍁𑌪𑌾𑌗𑌮𑍍𑌯 𑌹𑍇𑌮𑌦𑌂𑌡𑌂 𑌸𑌮𑍁𑌚𑍍𑌛𑍍𑌰𑌿𑌤𑌮𑍍 ।
𑌸𑌮𑌾𑌕𑍍𑌰𑌮𑍍𑌯 𑌮𑌹𑌾𑌕𑌾𑌯𑌸𑍍𑌤𑌸𑍍𑌥𑍌 𑌗𑍃𑌧𑍍𑌰𑌸𑍍𑌸𑍁𑌦𑌾𑌰𑍁𑌣𑌃 ॥ 4 ॥
𑌜𑌨𑌸𑍍𑌥𑌾𑌨𑌸𑌮𑍀𑌪𑍇 𑌤𑍁 𑌸𑌮𑌾𑌗𑌮𑍍𑌯 𑌖𑌰𑌸𑍍𑌵𑌨𑌾𑌃 ।
𑌵𑌿𑌸𑍍𑌵𑌰𑌾𑌨𑍍𑌵𑌿𑌵𑌿𑌧𑌾𑌂𑌶𑍍𑌚𑌕𑍍𑌰𑍁𑌰𑍍𑌮𑌾𑌂𑌸𑌾𑌦𑌾 𑌮𑍃𑌗𑌪𑌕𑍍𑌷𑌿𑌣𑌃 ॥ 5 ॥
𑌵𑍍𑌯𑌾𑌜𑌹𑍍𑌰𑍁𑌶𑍍𑌚 𑌪𑍍𑌰𑌦𑍀𑌪𑍍𑌤𑌾𑌯𑌾𑌂 𑌦𑌿𑌶𑌿 𑌵𑍈 𑌭𑍈𑌰𑌵𑌸𑍍𑌵𑌨𑌮𑍍 ।
𑌅𑌶𑌿𑌵𑌂 𑌯𑌾𑌤𑍁𑌧𑌾𑌨𑌾𑌨𑌾𑌂 𑌶𑌿𑌵𑌾 𑌘𑍋𑌰𑌾 𑌮𑌹𑌾𑌸𑍍𑌵𑌨𑌾𑌃 ॥ 6 ॥
𑌪𑍍𑌰𑌭𑌿𑌨𑍍𑌨𑌗𑌿𑌰𑌿𑌸𑌂𑌕𑌾𑌶𑌾𑌸𑍍𑌤𑍋𑌯𑌶𑍋𑌣𑌿𑌤𑌧𑌾𑌰𑌿𑌣𑌃 ।
𑌆𑌕𑌾𑌶𑌂 𑌤𑌦𑌨𑌾𑌕𑌾𑌶𑌂 𑌚𑌕𑍍𑌰𑍁𑌰𑍍𑌭𑍀𑌮𑌾 𑌵𑌲𑌾𑌹𑌕𑌾𑌃 ॥ ॥
𑌬𑌭𑍂𑌵 𑌤𑌿𑌮𑌿𑌰𑌂 𑌘𑍋𑌰𑌮𑍁𑌦𑍍𑌧𑌤𑌂 𑌰𑍋𑌮𑌹𑌰𑍍𑌷𑌣𑌮𑍍 ।
𑌦𑌿𑌶𑍋 𑌵𑌾 𑌵𑌿𑌦𑌿𑌶𑍋 𑌵𑌾𑌪𑌿 𑌨 𑌚 𑌵𑍍𑌯𑌕𑍍𑌤𑌂 𑌚𑌕𑌾𑌶𑌿𑌰𑍇 ॥ ॥
𑌕𑍍𑌷𑌤𑌜𑌾𑌰𑍍𑌦𑍍𑌰𑌸𑌵𑌰𑍍𑌣𑌾𑌭𑌾 𑌸𑌂𑌧𑍍𑌯𑌾𑌕𑌾𑌲𑌂 𑌵𑌿𑌨𑌾 𑌬𑌭𑍌 ।
𑌖𑌰𑌸𑍍𑌯𑌾𑌭𑌿𑌮𑍁𑌖𑌾 𑌨𑍇𑌦𑍁𑌸𑍍𑌤𑌦𑌾 𑌘𑍋𑌰𑌮𑍃𑌗𑌾𑌃 𑌖𑌗𑌾𑌃 ॥ ॥
𑌕𑌂𑌕𑌗𑍋𑌮𑌾𑌯𑍁𑌗𑍃𑌧𑍍𑌰𑌾𑌶𑍍𑌚 𑌚𑍁𑌕𑍍𑌰𑍁𑌶𑍁𑌰𑍍𑌭𑌯𑌶𑌂𑌸𑌿𑌨𑌃 ।
𑌨𑌿𑌤𑍍𑌯𑌾𑌶𑍁𑌭𑌕𑌰𑌾 𑌯𑍁𑌦𑍍𑌧𑍇 𑌶𑌿𑌵𑌾 𑌘𑍋𑌰𑌨𑌿𑌦𑌰𑍍𑌶𑌨𑌾𑌃 ॥ 10 ॥
𑌨𑍇𑌦𑍁𑌰𑍍𑌬𑌲𑌸𑍍𑌯𑌾𑌭𑌿𑌮𑍁𑌖𑌂 𑌜𑍍𑌵𑌾𑌲𑍋𑌦𑍍𑌗𑌾𑌰𑌿𑌭𑌿𑌰𑌾𑌨𑌨𑍈𑌃 ।
𑌕𑌬𑌂𑌧𑌃 𑌪𑌰𑌿𑌘𑌾𑌭𑌾𑌸𑍋 𑌦𑍃𑌶𑍍𑌯𑌤𑍇 𑌭𑌾𑌸𑍍𑌕𑌰𑌾𑌂𑌤𑌿𑌕𑍇 ॥ 11 ॥
𑌜𑌗𑍍𑌰𑌾𑌹 𑌸𑍂𑌰𑍍𑌯𑌂 𑌸𑍍𑌵𑌰𑍍𑌭𑌾𑌨𑍁𑌰𑌪𑌰𑍍𑌵𑌣𑌿 𑌮𑌹𑌾𑌗𑍍𑌰𑌹𑌃 ।
𑌪𑍍𑌰𑌵𑌾𑌤𑌿 𑌮𑌾𑌰𑍁𑌤𑌶𑍍𑌶𑍀𑌘𑍍𑌰𑌂 𑌨𑌿𑌷𑍍𑌪𑍍𑌰𑌭𑍋𑌽𑌭𑍂𑌦𑍍𑌦𑌿𑌵𑌾𑌕𑌰𑌃 ॥ 12 ॥
𑌉𑌤𑍍𑌪𑍇𑌤𑍁𑌶𑍍𑌚 𑌵𑌿𑌨𑌾 𑌰𑌾𑌤𑍍𑌰𑌿𑌂 𑌤𑌾𑌰𑌾𑌃 𑌖𑌦𑍍𑌯𑍋𑌤𑌸𑌪𑍍𑌰𑌭𑌾𑌃 ।
𑌸𑌂𑌲𑍀𑌨𑌮𑍀𑌨𑌵𑌿𑌹𑌗𑌾 𑌨𑌲𑌿𑌨𑍍𑌯𑌶𑍍𑌶𑍁𑌷𑍍𑌕𑌪𑌂𑌕𑌜𑌾𑌃 ॥ 13 ॥
𑌤𑌸𑍍𑌮𑌿𑌨𑍍 𑌕𑍍𑌷𑌣𑍇 𑌬𑌭𑍂𑌵𑍁𑌶𑍍𑌚 𑌵𑌿𑌨𑌾 𑌪𑍁𑌷𑍍𑌪𑌫𑌲𑍈𑌰𑍍𑌦𑍍𑌰𑍁𑌮𑌾𑌃 ।
𑌉𑌦𑍍𑌧𑍂𑌤𑌶𑍍𑌚 𑌵𑌿𑌨𑌾 𑌵𑌾𑌤𑌂 𑌰𑍇𑌣𑍁𑌰𑍍𑌜𑌲𑌧𑌰𑌾𑌰𑍁𑌣𑌃 ॥ 14 ॥
𑌵𑍀𑌚𑍀𑌕𑍂𑌚𑍀𑌤𑌿 𑌵𑌾𑌶𑍍𑌯𑌂𑌤𑍍𑌯𑍋 𑌬𑌭𑍂𑌵𑍁𑌸𑍍𑌤𑌤𑍍𑌰 𑌶𑌾𑌰𑌿𑌕𑌾𑌃 ।
𑌉𑌲𑍍𑌕𑌾𑌶𑍍𑌚𑌾𑌪𑌿 𑌸𑌨𑌿𑌰𑍍𑌘𑌾𑌤𑌾 𑌨𑌿𑌪𑍇𑌤𑍁𑌰𑍍𑌘𑍋𑌰𑌦𑌰𑍍𑌶𑌨𑌾𑌃 ॥ 15 ॥
𑌪𑍍𑌰𑌚𑌚𑌾𑌲 𑌮𑌹𑍀 𑌸𑌰𑍍𑌵𑌾 𑌸𑌶𑍈𑌲𑌵𑌨𑌕𑌾𑌨𑌨𑌾 ।
𑌖𑌰𑌸𑍍𑌯 𑌚 𑌰𑌥𑌸𑍍𑌥𑌸𑍍𑌯 𑌨𑌰𑍍𑌦𑌮𑌾𑌨𑌸𑍍𑌯 𑌧𑍀𑌮𑌤𑌃 ॥ 16 ॥
𑌪𑍍𑌰𑌾𑌕𑌂𑌪𑌤 𑌭𑍁𑌜𑌸𑍍𑌸𑌵𑍍𑌯𑌸𑍍𑌸𑍍𑌵𑌰𑌶𑍍𑌚𑌾𑌸𑍍𑌯𑌾𑌵𑌸𑌜𑍍𑌜𑌤 ।
𑌸𑌾𑌸𑍍𑌰𑌾 𑌸𑌂𑌪𑌦𑍍𑌯𑌤𑍇 𑌦𑍃𑌷𑍍𑌟𑌿𑌃 𑌪𑌶𑍍𑌯𑌮𑌾𑌨𑌸𑍍𑌯 𑌸𑌰𑍍𑌵𑌤𑌃 ॥ 1 ॥
𑌲𑌲𑌾𑌟𑍇 𑌚 𑌰𑍁𑌜𑌾 𑌜𑌾𑌤𑌾 𑌨 𑌚 𑌮𑍋𑌹𑌾𑌨𑍍𑌯𑌵𑌰𑍍𑌤𑌤 ।
𑌤𑌾𑌨𑍍𑌸𑌮𑍀𑌕𑍍𑌷𑌯 𑌮𑌹𑍋𑌤𑍍𑌪𑌾𑌤𑌾𑌨𑍁𑌤𑍍𑌥𑌿𑌤𑌾𑌨𑍍𑌰𑍋𑌮𑌹𑌰𑍍𑌷𑌣𑌾𑌨𑍍 ॥ 1 ॥
𑌅𑌬𑍍𑌰𑌵𑍀𑌦𑍍𑌰𑌾𑌕𑍍𑌷𑌸𑌾𑌨𑍍𑌸𑌰𑍍𑌵𑌾𑌨𑍍𑌪𑍍𑌰𑌹𑌸𑌨𑍍𑌸𑌖𑌰𑌸𑍍𑌤𑌦𑌾 ।
𑌮𑌹𑍋𑌤𑍍𑌪𑌾𑌤𑌾𑌨𑌿𑌮𑌾𑌨𑍍𑌸𑌰𑍍𑌵𑌾𑌨𑍁𑌤𑍍𑌥𑌿𑌤𑌾𑌨𑍍𑌘𑍋𑌰𑌦𑌰𑍍𑌶𑌨𑌾𑌨𑍍 ॥ 1 ॥
𑌨 𑌚𑌿𑌂𑌤𑌯𑌾𑌮𑍍𑌯𑌹𑌂 𑌵𑍀𑌰𑍍𑌯𑌾𑌦𑍍𑌬𑌲𑌵𑌾𑌂𑌦𑍁𑌰𑍍𑌬𑌲𑌾𑌨𑌿𑌵 ।
𑌤𑌾𑌰𑌾 𑌅𑌪𑌿 𑌶𑌰𑍈𑌸𑍍𑌤𑍀𑌕𑍍𑌷𑍍𑌣𑍈𑌃 𑌪𑌾𑌤𑌯𑌾𑌮𑌿 𑌨𑌭𑌸𑍍𑌸𑍍𑌥𑌲𑌾𑌤𑍍 ॥ 20 ॥
𑌮𑍃𑌤𑍍𑌯𑍁𑌂 𑌮𑌰𑌣𑌧𑌰𑍍𑌮𑍇𑌣 𑌸𑌂𑌕𑍍𑌰𑍁𑌦𑍍𑌧𑍋 𑌯𑍋𑌜𑌯𑌾𑌮𑍍𑌯𑌹𑌮𑍍 ।
𑌰𑌾𑌘𑌵𑌂 𑌤𑌂 𑌬𑌲𑍋𑌤𑍍𑌸𑌿𑌕𑍍𑌤𑌂 𑌭𑍍𑌰𑌾𑌤𑌰𑌂 𑌚𑌾𑌸𑍍𑌯 𑌲𑌕𑍍𑌷𑍍𑌮𑌣𑌮𑍍 ॥ 21 ॥
𑌅𑌹𑌤𑍍𑌵𑌾 𑌸𑌾𑌯𑌕𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑍍𑌨𑍋𑌪𑌾𑌵𑌰𑍍𑌤𑌿𑌤𑍁𑌮𑍁𑌤𑍍𑌸𑌹𑍇 ।
𑌸𑌕𑌾𑌮𑌾 𑌭𑌗𑌿𑌨𑍀 𑌮𑍇𑌽𑌸𑍍𑌤𑍁 𑌪𑍀𑌤𑍍𑌵𑌾 𑌤𑍁 𑌰𑍁𑌧𑌿𑌰𑌂 𑌤𑌯𑍋𑌃 ॥ 22 ॥
𑌯𑌨𑍍𑌨𑌿𑌮𑌿𑌤𑍍𑌤𑌸𑍍𑌤𑍁 𑌰𑌾𑌮𑌸𑍍𑌯 𑌲𑌕𑍍𑌷𑍍𑌮𑌣𑌸𑍍𑌯 𑌵𑌿𑌪𑌰𑍍𑌯𑌯𑌃 ।
𑌨 𑌕𑍍𑌵𑌚𑌿𑌤𑍍𑌪𑍍𑌰𑌾𑌪𑍍𑌤𑌪𑍂𑌰𑍍𑌵𑍋 𑌮𑍇 𑌸𑌂𑌯𑍁𑌗𑍇𑌷𑍁 𑌪𑌰𑌾𑌜𑌯𑌃 ॥ 23 ॥
𑌯𑍁𑌷𑍍𑌮𑌾𑌕𑌮𑍇𑌤𑌤𑍍𑌪𑍍𑌰𑌤𑍍𑌯𑌕𑍍𑌷𑌂 𑌨𑌾𑌨𑍃𑌤𑌂 𑌕𑌥𑌯𑌾𑌮𑍍𑌯𑌹𑌮𑍍 ।
𑌦𑍇𑌵𑌰𑌾𑌜𑌮𑌪𑌿 𑌕𑍍𑌰𑍁𑌦𑍍𑌧𑍋 𑌮𑌤𑍍𑌤𑍈𑌰𑌾𑌵𑌤𑌯𑌾𑌯𑌿𑌨𑌮𑍍 ॥ 24 ॥
𑌵𑌜𑍍𑌰𑌹𑌸𑍍𑌤𑌂 𑌰𑌣𑍇 𑌹𑌨𑍍𑌯𑌾𑌂 𑌕𑌿𑌂 𑌪𑍁𑌨𑌸𑍍𑌤𑍌 𑌕𑍁𑌮𑌾𑌨𑍁𑌷𑍌 ।
𑌸𑌾 𑌤𑌸𑍍𑌯 𑌗𑌰𑍍𑌜𑌿𑌤𑌂 𑌶𑍍𑌰𑍁𑌤𑍍𑌵𑌾 𑌰𑌾𑌕𑍍𑌷𑌸𑌸𑍍𑌯 𑌮𑌹𑌾𑌚𑌮𑍂𑌃 ॥ 25 ॥
𑌪𑍍𑌰𑌹𑌰𑍍𑌷𑌮𑌤𑍁𑌲𑌂 𑌲𑍇𑌭𑍇 𑌮𑍃𑌤𑍍𑌯𑍁𑌪𑌾𑌶𑌾𑌵𑌪𑌾𑌶𑌿𑌤𑌾 ।
𑌸𑌮𑍀𑌯𑍁𑌶𑍍𑌚 𑌮𑌹𑌾𑌤𑍍𑌮𑌾𑌨𑍋 𑌯𑍁𑌦𑍍𑌧𑌦𑌰𑍍𑌶𑌨𑌕𑌾𑌂𑌕𑍍𑌷𑌿𑌣𑌃 ॥ 26 ॥
𑌋𑌷𑌯𑍋 𑌦𑍇𑌵𑌗𑌂𑌦𑌰𑍍𑌵𑌾𑌸𑍍𑌸𑌿𑌦𑍍𑌧𑌾𑌶𑍍𑌚 𑌸𑌹𑌚𑌾𑌰𑌣𑍈𑌃 ।
𑌸𑌮𑍇𑌤𑍍𑌯 𑌚𑍋𑌚𑍁𑌸𑍍𑌸𑌹𑌿𑌤𑌾𑌸𑍍𑌤𑍇𑌽𑌨𑍍𑌯𑍋𑌨𑍍𑌯𑌂 𑌪𑍁𑌣𑍍𑌯𑌕𑌰𑍍𑌮𑌣𑌃 ।
𑌸𑍍𑌵𑌸𑍍𑌤𑌿 𑌗𑍋𑌬𑍍𑌰𑌾𑌹𑍍𑌮𑌣𑍇𑌭𑍍𑌯𑍋𑌽𑌸𑍍𑌤𑍁 𑌲𑍋𑌕𑌾𑌨𑌾𑌂 𑌯𑍇𑌽𑌭𑌿𑌸𑌂𑌗𑌤𑌾𑌃 ॥ 2 ॥
𑌜𑌯𑌤𑌾𑌂 𑌰𑌾𑌘𑌵𑌸𑍍𑌸𑌂𑌖𑍍𑌯𑍇 𑌪𑍌𑌲𑌸𑍍𑌤𑍍𑌯𑌾𑌨𑍍 𑌰𑌜𑌨𑍀𑌚𑌰𑌾𑌨𑍍 ॥ 2 ॥
𑌚𑌕𑍍𑌰𑌹𑌸𑍍𑌤𑍋 𑌯𑌥𑌾 𑌯𑍁𑌦𑍍𑌧𑍇 𑌸𑌰𑍍𑌵𑌾𑌨𑌸𑍁𑌰𑌪𑍁𑌂𑌗𑌵𑌾𑌨𑍍 ।
𑌏𑌤𑌚𑍍𑌚𑌾𑌨𑍍𑌯𑌚𑍍𑌚 𑌬𑌹𑍁𑌶𑍋 𑌬𑍍𑌰𑍁𑌵𑌾𑌣𑌾𑌃 𑌪𑌰𑌮𑌰𑍍𑌷𑌯𑌃 ॥ 2 ॥
𑌜𑌾𑌤𑌕𑍌𑌤𑍂𑌹𑌲𑌾𑌸𑍍𑌤𑌤𑍍𑌰 𑌵𑌿𑌮𑌾𑌨𑌸𑍍𑌥𑌾𑌶𑍍𑌚 𑌦𑍇𑌵𑌤𑌾𑌃 ।
𑌦𑌦𑍃𑌶𑍁𑌰𑍍𑌵𑌾𑌹𑌿𑌨𑍀𑌂 𑌤𑍇𑌷𑌾𑌂 𑌰𑌾𑌕𑍍𑌷𑌸𑌾𑌨𑌾𑌂 𑌗𑌤𑌾𑌯𑍁𑌷𑌾𑌮𑍍 ॥ 30 ॥
𑌰𑌥𑍇𑌨 𑌤𑍁 𑌖𑌰𑍋 𑌵𑍇𑌗𑌾𑌦𑍁𑌗𑍍𑌰𑌸𑍈𑌨𑍍𑌯𑍋 𑌵𑌿𑌨𑌿𑌸𑍍𑌸𑍃𑌤𑌃 ।
𑌤𑌂 𑌦𑍃𑌷𑍍𑌟𑍍𑌵𑌾 𑌰𑌾𑌕𑍍𑌷𑌸𑌂 𑌭𑍂𑌯𑍋 𑌰𑌾𑌕𑍍𑌷𑌸𑌾𑌶𑍍𑌚 𑌵𑌿𑌨𑌿𑌸𑍍𑌸𑍃𑌤𑌾𑌃 ॥ 31 ॥
𑌶𑍍𑌯𑍇𑌨𑌗𑌾𑌮𑍀 𑌪𑍃𑌥𑍁𑌗𑍍𑌰𑍀𑌵𑍋 𑌯𑌜𑍍𑌞𑌶𑌤𑍍𑌰𑍁𑌰𑍍𑌵𑌿𑌹𑌂𑌗𑌮𑌃 ।
𑌦𑍁𑌰𑍍𑌜𑌯𑌃 𑌕𑌰𑌵𑍀𑌰𑌾𑌕𑍍𑌷𑌃 𑌪𑌰𑍁𑌷𑌃 𑌕𑌾𑌲𑌕𑌾𑌰𑍍𑌮𑍁𑌕𑌃 ॥ 32 ॥
𑌮𑍇𑌘𑌮𑌾𑌲𑍀 𑌮𑌹𑌾𑌮𑌾𑌲𑍀 𑌸𑌰𑍍𑌵𑌾𑌸𑍍𑌯𑍋 𑌰𑍁𑌧𑌿𑌰𑌾𑌶𑌨𑌃 ।
𑌦𑍍𑌵𑌾𑌦𑌶𑍈𑌤𑍇 𑌮𑌹𑌾𑌵𑍀𑌰𑍍𑌯𑌾𑌃 𑌪𑍍𑌰𑌤𑌸𑍍𑌥𑍁𑌰𑌭𑌿𑌤𑌃 𑌖𑌰𑌮𑍍 ॥ 33 ॥
𑌮𑌹𑌾𑌕𑌪𑌾𑌲𑌿𑌸𑍍𑌸𑍍𑌥𑍂𑌲𑌾𑌕𑍍𑌷𑌃 𑌪𑍍𑌰𑌮𑌾𑌥𑍀 𑌤𑍍𑌰𑌿𑌶𑌿𑌰𑌾𑌸𑍍𑌤𑌥𑌾 ।
𑌚𑌤𑍍𑌵𑌾𑌰 𑌏𑌤𑍇 𑌸𑍇𑌨𑌾𑌨𑍍𑌯𑍋 𑌦𑍂𑌷𑌣𑌂 𑌪𑍃𑌷𑍍𑌠𑌤𑍋 𑌯𑌯𑍁𑌃 ॥ 34 ॥
𑌸𑌾 𑌭𑍀𑌮𑌵𑍇𑌗𑌾 𑌸𑌮𑌰𑌾𑌭𑌿𑌕𑌾𑌮𑌾 𑌮𑌹𑌾𑌬𑌲𑌾 𑌰𑌾𑌕𑍍𑌷𑌸𑌵𑍀𑌰𑌸𑍇𑌨𑌾 ।
𑌤𑍌 𑌰𑌾𑌜𑌪𑍁𑌤𑍍𑌰𑍌 𑌸𑌹𑌸𑌾𑌭𑍍𑌯𑍁𑌪𑍇𑌤𑌾 𑌮𑌾𑌲𑌾 𑌗𑍍𑌰𑌹𑌾𑌣𑌾𑌮𑌿𑌵 𑌚𑌂𑌦𑍍𑌰𑌸𑍂𑌰𑍍𑌯𑍌 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍍𑌰𑌯𑍋𑌵𑌿𑌂𑌶𑌸𑍍𑌸𑌰𑍍𑌗𑌃 ॥
