𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑍇 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌚𑍋𑌦𑌿𑌤𑌾 𑌮𑌂𑌤𑍍𑌰𑌿𑌣𑌸𑍍𑌸𑍁𑌤𑌾𑌃 ।
𑌨𑌿𑌰𑍍𑌯𑌯𑍁𑌰𑍍𑌭𑌵𑌨𑌾𑌤𑍍𑌤𑌸𑍍𑌮𑌾𑌤𑍍𑌸𑌪𑍍𑌤𑌸𑌪𑍍𑌤𑌾𑌰𑍍𑌚𑌿𑌵𑌰𑍍𑌚𑌸𑌃 ॥ 1 ॥
𑌮𑌹𑌾𑌬𑌲𑌪𑌰𑍀𑌵𑌾𑌰𑌾 𑌧𑌨𑍁𑌷𑍍𑌮𑌂𑌤𑍋 𑌮𑌹𑌾𑌬𑌲𑌾𑌃 ।
𑌕𑍃𑌤𑌾𑌸𑍍𑌤𑍍𑌰𑌾𑌸𑍍𑌤𑍍𑌰𑌵𑌿𑌦𑌾𑌂 𑌶𑍍𑌰𑍇𑌷𑍍𑌠𑌾𑌃 𑌪𑌰𑌸𑍍𑌪𑌰𑌜𑌯𑍈𑌷𑌿𑌣𑌃 ॥ 2 ॥
𑌹𑍇𑌮𑌜𑌾𑌲𑌪𑌰𑌿𑌕𑍍𑌷𑌿𑌪𑍍𑌤𑍈𑌰𑍍𑌧𑍍𑌵𑌜𑌵𑌦𑍍𑌭𑌿𑌃 𑌪𑌤𑌾𑌕𑌿𑌭𑌿𑌃 ।
𑌤𑍋𑌯𑌦𑌸𑍍𑌵𑌨𑌨𑌿𑌰𑍍𑌘𑍋𑌷𑍈𑌰𑍍𑌵𑌾𑌜𑌿𑌯𑍁𑌕𑍍𑌤𑍈𑌰𑍍𑌮𑌹𑌾𑌰𑌥𑍈𑌃 ॥ 3 ॥
𑌤𑌪𑍍𑌤𑌕𑌾𑌂𑌚𑌨𑌚𑌿𑌤𑍍𑌰𑌾𑌣𑌿 𑌚𑌾𑌪𑌾𑌨𑍍𑌯𑌮𑌿𑌤𑌵𑌿𑌕𑍍𑌰𑌮𑌾𑌃 ।
𑌵𑌿𑌸𑍍𑌫𑌾𑌰𑌯𑌂𑌤𑌸𑍍𑌸𑌂𑌹𑍃𑌷𑍍𑌟𑌾𑌸𑍍𑌤𑌟𑌿𑌤𑍍𑌵𑌂𑌤 𑌇𑌵𑌾𑌂𑌬𑍁𑌦𑌾𑌃 ॥ 4 ॥
𑌜𑌨𑌨𑍍𑌯𑌸𑍍𑌤𑍁 𑌤𑌤𑌸𑍍𑌤𑍇𑌷𑌾𑌂 𑌵𑌿𑌦𑌿𑌤𑍍𑌵𑌾 𑌕𑌿𑌂𑌕𑌰𑌾𑌨𑍍𑌹𑌤𑌾𑌨𑍍 ।
𑌬𑌭𑍂𑌵𑍁𑌶𑍍𑌶𑍋𑌕𑌸𑌂𑌭𑍍𑌰𑌾𑌂𑌤𑌾𑌸𑍍𑌸𑌬𑌾𑌂𑌧𑌵𑌸𑍁𑌹𑍃𑌜𑍍𑌜𑌨𑌾𑌃 ॥ 5 ॥
𑌤𑍇 𑌪𑌰𑌸𑍍𑌪𑌰𑌸𑌂𑌘𑌰𑍍𑌷𑌾𑌤𑍍𑌤𑌪𑍍𑌤𑌕𑌾𑌂𑌚𑌨𑌭𑍂𑌷𑌣𑌾𑌃 ।
𑌅𑌭𑌿𑌪𑍇𑌤𑍁𑌰𑍍𑌹𑌨𑍂𑌮𑌂𑌤𑌂 𑌤𑍋𑌰𑌣𑌸𑍍𑌥𑌮𑌵𑌸𑍍𑌥𑌿𑌤𑌮𑍍 ॥ 6 ॥
𑌸𑍃𑌜𑌂𑌤𑍋 𑌬𑌾𑌣𑌵𑍃𑌷𑍍𑌟𑌿𑌂 𑌤𑍇 𑌰𑌥𑌗𑌰𑍍𑌜𑌿𑌤𑌨𑌿𑌸𑍍𑌸𑍍𑌵𑌨𑌾𑌃 ।
𑌵𑍃𑌷𑍍𑌟𑌿𑌮𑌂𑌤 𑌇𑌵𑌾𑌂𑌭𑍋𑌦𑌾 𑌵𑌿𑌚𑍇𑌰𑍁𑌰𑍍𑌨𑍈𑌋𑌤𑌾𑌂𑌬𑍁𑌦𑌾𑌃 ॥ ॥
𑌅𑌵𑌕𑍀𑌰𑍍𑌣𑌸𑍍𑌤𑌤𑌸𑍍𑌤𑌾𑌭𑌿𑌰𑍍𑌹𑌨𑍁𑌮𑌾𑌨𑍍𑌶𑌰𑌵𑍃𑌷𑍍𑌟𑌿𑌭𑌿𑌃 ।
𑌅𑌭𑌵𑌤𑍍𑌸𑌂𑌵𑍃𑌤𑌾𑌕𑌾𑌰𑌶𑍍𑌶𑍈𑌲𑌰𑌾𑌡𑌿𑌵 𑌵𑍃𑌷𑍍𑌟𑌿𑌭𑌿𑌃 ॥ ॥
𑌸 𑌶𑌰𑌾𑌨𑍍𑌮𑍋𑌘𑌯𑌾𑌮𑌾𑌸 𑌤𑍇𑌷𑌾𑌮𑌾𑌶𑍁𑌚𑌰𑌃 𑌕𑌪𑌿𑌃 ।
𑌰𑌥𑌵𑍇𑌗𑌂 𑌚 𑌵𑍀𑌰𑌾𑌣𑌾𑌂 𑌵𑌿𑌚𑌰𑌨𑍍𑌵𑌿𑌮𑌲𑍇𑌽𑌂𑌬𑌰𑍇 ॥ ॥
𑌸 𑌤𑍈𑌃 𑌕𑍍𑌰𑍀𑌡𑌂𑌧𑌨𑍁𑌷𑍍𑌮𑌦𑍍𑌭𑌿𑌰𑍍𑌵𑍍𑌯𑍋𑌮𑍍𑌨𑌿 𑌵𑍀𑌰𑌃 𑌪𑍍𑌰𑌕𑌾𑌶𑌤𑍇 ।
𑌧𑌨𑍁𑌷𑍍𑌮𑌦𑍍𑌭𑌿𑌰𑍍𑌯𑌥𑌾 𑌮𑍇𑌘𑍈𑌰𑍍𑌮𑌾𑌰𑍁𑌤𑌃 𑌪𑍍𑌰𑌭𑍁𑌰𑌂𑌬𑌰𑍇 ॥ 10 ॥
𑌸 𑌕𑍃𑌤𑍍𑌵𑌾 𑌨𑌿𑌨𑌦𑌂 𑌘𑍋𑌰𑌂 𑌤𑍍𑌰𑌾𑌸𑌯𑌂𑌸𑍍𑌤𑌾𑌂 𑌮𑌹𑌾𑌚𑌮𑍂𑌮𑍍 ।
𑌚𑌕𑌾𑌰 𑌹𑌨𑍁𑌮𑌾𑌨𑍍𑌵𑍇𑌗𑌂 𑌤𑍇𑌷𑍁 𑌰𑌕𑍍𑌷𑌸𑍍𑌸𑍁 𑌵𑍀𑌰𑍍𑌯𑌵𑌾𑌨𑍍 ॥ 11 ॥
𑌤𑌲𑍇𑌨𑌾𑌭𑍍𑌯𑌹𑌨𑌤𑍍𑌕𑌾𑌂𑌶𑍍𑌚𑌿𑌤𑍍𑌪𑌾𑌦𑍈𑌃 𑌕𑌾𑌂𑌶𑍍𑌚𑌿𑌤𑍍𑌪𑌰𑌂𑌤𑌪𑌃 ।
𑌮𑍁𑌷𑍍𑌟𑌿𑌨𑌾𑌭𑍍𑌯𑌹𑌨𑌤𑍍𑌕𑌾𑌂𑌶𑍍𑌚𑌿𑌨𑍍𑌨𑌖𑍈𑌃 𑌕𑌾𑌂𑌶𑍍𑌚𑌿𑌦𑍍𑌵𑍍𑌯𑌦𑌾𑌰𑌯𑌤𑍍 ॥ 12 ॥
𑌪𑍍𑌰𑌮𑌮𑌾𑌥𑍋𑌰𑌸𑌾 𑌕𑌾𑌂𑌶𑍍𑌚𑌿𑌦𑍂𑌰𑍁𑌭𑍍𑌯𑌾𑌮𑌪𑌰𑌾𑌨𑍍𑌕𑌪𑌿𑌃 ।
𑌕𑍇𑌚𑌿𑌤𑍍𑌤𑌸𑍍𑌯 𑌨𑌿𑌨𑌾𑌦𑍇𑌨 𑌤𑌤𑍍𑌰𑍈𑌵 𑌪𑌤𑌿𑌤𑌾 𑌭𑍁𑌵𑌿 ॥ 13 ॥
𑌤𑌤𑌸𑍍𑌤𑍇𑌷𑍍𑌵𑌵𑌸𑌨𑍍𑌨𑍇𑌷𑍁 𑌭𑍂𑌮𑍌 𑌨𑌿𑌪𑌤𑌿𑌤𑍇𑌷𑍁 𑌚 ।
𑌤𑌤𑍍𑌸𑍈𑌨𑍍𑌯𑌮𑌗𑌮𑌤𑍍𑌸𑌰𑍍𑌵𑌂 𑌦𑌿𑌶𑍋𑌦𑌶 𑌭𑌯𑌾𑌰𑍍𑌦𑌿𑌤𑌮𑍍 ॥ 14 ॥
𑌵𑌿𑌨𑍇𑌦𑍁𑌰𑍍𑌵𑌿𑌸𑍍𑌵𑌰𑌂 𑌨𑌾𑌗𑌾 𑌨𑌿𑌪𑍇𑌤𑍁𑌰𑍍𑌭𑍁𑌵𑌿 𑌵𑌾𑌜𑌿𑌨𑌃 ।
𑌭𑌗𑍍𑌨𑌨𑍀𑌡𑌧𑍍𑌵𑌜𑌚𑍍𑌛𑌤𑍍𑌰𑍈𑌰𑍍𑌭𑍂𑌶𑍍𑌚 𑌕𑍀𑌰𑍍𑌣𑌾𑌽𑌭𑌵𑌦𑍍𑌰𑌥𑍈𑌃 ॥ 15 ॥
𑌸𑍍𑌰𑌵𑌤𑌾 𑌰𑍁𑌧𑌿𑌰𑍇𑌣𑌾𑌥 𑌸𑍍𑌰𑌵𑌂𑌤𑍍𑌯𑍋 𑌦𑌰𑍍𑌶𑌿𑌤𑌾𑌃 𑌪𑌥𑌿 ।
𑌵𑌿𑌵𑌿𑌧𑍈𑌶𑍍𑌚 𑌸𑍍𑌵𑌰𑍈𑌰𑍍𑌲𑌂𑌕𑌾 𑌨𑌨𑌾𑌦 𑌵𑌿𑌕𑍃𑌤𑌂 𑌤𑌦𑌾 ॥ 16 ॥
𑌸 𑌤𑌾𑌨𑍍𑌪𑍍𑌰𑌵𑍃𑌦𑍍𑌧𑌾𑌨𑍍𑌵𑌿𑌨𑌿𑌹𑌤𑍍𑌯 𑌰𑌾𑌕𑍍𑌷𑌸𑌾𑌨𑍍 𑌮𑌹𑌾𑌬𑌲𑌶𑍍𑌚𑌂𑌡𑌪𑌰𑌾𑌕𑍍𑌰𑌮𑌃 𑌕𑌪𑌿𑌃 ।
𑌯𑍁𑌯𑍁𑌤𑍍𑌸𑍁𑌰𑌨𑍍𑌯𑍈𑌃 𑌪𑍁𑌨𑌰𑍇𑌵 𑌰𑌾𑌕𑍍𑌷𑌸𑍈 𑌸𑍍𑌤𑌮𑍇𑌵 𑌵𑍀𑌰𑍋𑌽𑌭𑌿𑌜𑌗𑌾𑌮 𑌤𑍋𑌰𑌣𑌮𑍍 ॥ 1 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
