𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌃𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌥𑌾 𑌬𑍍𑌰𑍁𑌵𑌤𑌿 𑌤𑌾𑌰𑍇 𑌤𑍁 𑌤𑌾𑌰𑌾𑌧𑌿𑌪𑌤𑌿𑌵𑌰𑍍𑌚𑌸𑌿 ।
𑌅𑌥 𑌮𑍇𑌨𑍇 𑌹𑍃𑌤𑌂 𑌰𑌾𑌜𑍍𑌯𑌂 𑌹𑌨𑍂𑌮𑌾𑌨𑌂𑌗𑌦𑍇𑌨 𑌤𑌤𑍍 ॥ 1 ॥
𑌬𑍁𑌦𑍍𑌧𑍍𑌯𑌾 𑌹𑍍𑌯𑌷𑍍𑌟𑌾𑌂𑌗𑌯𑌾 𑌯𑍁𑌕𑍍𑌤𑌂 𑌚𑌤𑍁𑌰𑍍𑌬𑌲𑌸𑌮𑌨𑍍𑌵𑌿𑌤𑌮𑍍 ।
𑌚𑌤𑍁𑌰𑍍𑌦𑌶𑌗𑍁𑌣𑌂 𑌮𑍇𑌨𑍇 𑌹𑌨𑍂𑌮𑌾𑌨𑍍𑌵𑌾𑌲𑌿𑌨𑌸𑍍𑌸𑍁𑌤𑌮𑍍 ॥ 2 ॥
𑌆𑌪𑍂𑌰𑍍𑌯𑌮𑌾𑌣𑌂 𑌶𑌶𑍍𑌵𑌚𑍍𑌚 𑌤𑍇𑌜𑍋𑌬𑌲𑌪𑌰𑌾𑌕𑍍𑌰𑌮𑍈𑌃 ।
𑌶𑌶𑌿𑌨𑌂 𑌶𑍁𑌕𑍍𑌲𑌪𑌕𑍍𑌷𑌾𑌦𑍌 𑌵𑌰𑍍𑌧𑌮𑌾𑌨𑌮𑌿𑌵 𑌶𑍍𑌰𑌿𑌯𑌾 ॥ 3 ॥
𑌬𑍃𑌹𑌸𑍍𑌪𑌤𑌿𑌸𑌮𑌂 𑌬𑍁𑌦𑍍𑌧𑍍𑌯𑌾 𑌵𑌿𑌕𑍍𑌰𑌮𑍇 𑌸𑌦𑍃𑌶𑌂 𑌪𑌿𑌤𑍁𑌃 ।
𑌶𑍁𑌶𑍍𑌰𑍂𑌷𑌮𑌾𑌣𑌂 𑌤𑌾𑌰𑌸𑍍𑌯 𑌶𑌕𑍍𑌰𑌸𑍍𑌯𑍇𑌵 𑌪𑍁𑌰𑌂𑌦𑌰𑌮𑍍 ॥ 4 ॥
𑌭𑌰𑍍𑌤𑍁𑌰𑌰𑍍𑌥𑍇 𑌪𑌰𑌿𑌶𑍍𑌰𑌾𑌂𑌤𑌂 𑌸𑌰𑍍𑌵𑌶𑌾𑌸𑍍𑌤𑍍𑌰𑌵𑌿𑌦𑌾𑌂𑌵𑌰𑌮𑍍 ।
𑌅𑌭𑌿𑌸𑌂𑌧𑌾𑌤𑍁𑌮𑌾𑌰𑍇𑌭𑍇 𑌹𑌨𑍂𑌮𑌾𑌨𑌂𑌗𑌦𑌂 𑌤𑌤𑌃 ॥ 5 ॥
𑌸 𑌚𑌤𑍁𑌰𑍍𑌣𑌾𑌮𑍁𑌪𑌾𑌯𑌾𑌨𑌾𑌂 𑌤𑍃𑌤𑍀𑌯𑌮𑍁𑌪𑌵𑌰𑍍𑌣𑌯𑌨𑍍 ।
𑌭𑍇𑌦𑌯𑌾𑌮𑌾𑌸 𑌤𑌾𑌨𑍍𑌸𑌰𑍍𑌵𑌾𑌨𑍍 𑌵𑌾𑌨𑌰𑌾𑌨𑍍𑌵𑌾𑌕𑍍𑌯𑌸𑌂𑌪𑌦𑌾 ॥ 6 ॥
𑌤𑍇𑌷𑍁 𑌸𑌰𑍍𑌵𑍇𑌷𑍁 𑌭𑌿𑌨𑍍𑌨𑍇𑌷𑍁 𑌤𑌤𑍋𑌽𑌭𑍀𑌷𑌯𑌦𑌂𑌗𑌦𑌮𑍍 ।
𑌭𑍀𑌷𑌣𑍈𑌰𑍍𑌭𑌹𑍁𑌭𑌿𑌰𑍍𑌵𑌾𑌕𑍍𑌯𑍈𑌃 𑌕𑍋𑌪𑍋𑌪𑌾𑌯𑌸𑌮𑌨𑍍𑌵𑌿𑌤𑍈𑌃 ॥ ॥
𑌤𑍍𑌵𑌂 𑌸𑌮𑌰𑍍𑌥𑌤𑌰𑌃 𑌪𑌿𑌤𑍍𑌰𑌾 𑌯𑍁𑌦𑍍𑌧𑍇 𑌤𑌾𑌰𑍇𑌯 𑌵𑍈 𑌧𑍁𑌰𑌮𑍍 ।
𑌦𑍃𑌢𑌂 𑌧𑌾𑌰𑌯𑌿𑌤𑍁𑌂 𑌶𑌕𑍍𑌤𑌃 𑌕𑌪𑌿𑌰𑌾𑌜𑍍𑌯𑌂 𑌯𑌥𑌾 𑌪𑌿𑌤𑌾 ॥ ॥
𑌨𑌿𑌤𑍍𑌯𑌮𑌸𑍍𑌥𑌿𑌰𑌚𑌿𑌤𑍍𑌤𑌾 𑌹𑌿 𑌕𑌪𑌯𑍋 𑌹𑌰𑌿𑌪𑍁𑌂𑌗𑌵 ।
𑌨𑌾𑌜𑍍𑌞𑌾𑌪𑍍𑌯𑌂 𑌵𑌿𑌷𑌹𑌿𑌷𑍍𑌯𑌂𑌤𑌿 𑌪𑍁𑌤𑍍𑌰𑌦𑌾𑌰𑌾𑌨𑍍𑌵𑌿𑌨𑌾 𑌤𑍍𑌵𑌯𑌾 ॥ ॥
𑌤𑍍𑌵𑌾𑌂 𑌨𑍈𑌤𑍇𑌹𑍍𑌯𑌨𑍁𑌯𑍁𑌂𑌜𑍇𑌯𑍁𑌃 𑌪𑍍𑌰𑌤𑍍𑌯𑌕𑍍𑌷𑌂 𑌪𑍍𑌰𑌵𑌦𑌾𑌮𑌿 𑌤𑍇 ।
𑌯𑌥𑌾𑌯𑌂 𑌜𑌾𑌂𑌬𑌵𑌾𑌨𑍍𑌨𑍀𑌲𑌸𑍍𑌸𑍁𑌹𑍋𑌤𑍍𑌰𑌶𑍍𑌚 𑌮𑌹𑌾𑌕𑌪𑌿𑌃 ॥ 10 ॥
𑌨 𑌹𑍍𑌯𑌹𑌂 𑌤𑍇 𑌇𑌮𑍇 𑌸𑌰𑍍𑌵𑍇 𑌸𑌾𑌮𑌦𑌾𑌨𑌾𑌦𑌿𑌭𑌿𑌰𑍍𑌗𑍁𑌣𑍈𑌃 ।
𑌦𑌂𑌡𑍇𑌨 𑌵𑌾 𑌤𑍍𑌵𑌯𑌾 𑌶𑌕𑍍𑌯𑌾𑌸𑍍𑌸𑍁𑌗𑍍𑌰𑍀𑌵𑌾𑌦𑌪𑌕𑌰𑍍𑌷𑌿𑌤𑌮𑍍 ॥ 11 ॥
𑌵𑌿𑌗𑍃𑌹𑍍𑌯𑌾𑌸𑌨𑌮𑌪𑍍𑌯𑌾𑌹𑍁𑌰𑍍𑌦𑍁𑌰𑍍𑌬𑌲𑍇𑌨 𑌬𑌲𑍀𑌯𑌸𑌃 ।
𑌆𑌤𑍍𑌮𑌰𑌕𑍍𑌷𑌾𑌕𑌰𑌸𑍍𑌤𑌸𑍍𑌮𑌾𑌨𑍍𑌨 𑌵𑌿𑌗𑍃𑌹𑍍𑌣𑍀𑌤 𑌦𑍁𑌰𑍍𑌬𑌲𑌃 ॥ 12 ॥
𑌯𑌾𑌂 𑌚𑍇𑌮𑌾𑌂 𑌮𑌨𑍍𑌯𑌸𑍇 𑌧𑌾𑌤𑍍𑌰𑍀𑌮𑍇𑌤𑌦𑍍𑌬𑌿𑌲𑌮𑌿𑌤𑌿 𑌶𑍍𑌰𑍁𑌤𑌮𑍍 ।
𑌏𑌤𑌲𑍍𑌲𑌕𑍍𑌷𑍍𑌮𑌣𑌬𑌾𑌣𑌾𑌨𑌾𑌮𑍀𑌷𑌤𑍍𑌕𑌾𑌰𑍍𑌯𑌂 𑌵𑌿𑌦𑌾𑌰𑌣𑍇 ॥ 13 ॥
𑌸𑍍𑌵𑌲𑍍𑌪𑌂 𑌹𑌿 𑌕𑍃𑌤𑌮𑌿𑌂𑌦𑍍𑌰𑍇𑌣 𑌕𑍍𑌷𑌿𑌪𑌤𑌾 𑌹𑍍𑌯𑌶𑌨𑌿𑌂 𑌪𑍁𑌰𑌾 ।
𑌲𑌕𑍍𑌷𑍍𑌮𑌣𑍋 𑌨𑌿𑌶𑌿𑌤𑍈𑌰𑍍𑌬𑌾𑌣𑍈𑌰𑍍𑌭𑌿𑌂𑌧𑍍𑌯𑌾𑌤𑍍𑌪𑌤𑍍𑌰𑌪𑍁𑌟𑌂 𑌯𑌥𑌾 ॥ 14 ॥
𑌲𑌕𑍍𑌷𑍍𑌮𑌣𑌸𑍍𑌯 𑌚 𑌨𑌾𑌰𑌾𑌚𑌾 𑌬𑌹𑌵𑌸𑍍𑌸𑌂𑌤𑌿 𑌤𑌦𑍍𑌵𑌿𑌧𑌾𑌃 ।
𑌵𑌜𑍍𑌰𑌾𑌶𑌨𑌿𑌸𑌮𑌸𑍍𑌪𑌰𑍍𑌶𑌾 𑌗𑌿𑌰𑍀𑌣𑌾𑌮𑌪𑌿 𑌦𑌾𑌰𑌣𑌾𑌃 ॥ 15 ॥
𑌅𑌵𑌸𑍍𑌥𑌾𑌨𑍇 𑌯𑌦𑍈𑌵 𑌤𑍍𑌵𑌮𑌾𑌸𑌿𑌷𑍍𑌯𑌸𑌿 𑌪𑌰𑌂𑌤𑌪 ।
𑌤𑌦𑍈𑌵 𑌹𑌰𑌯𑌸𑍍𑌸𑌰𑍍𑌵𑍇 𑌤𑍍𑌯𑌕𑍍𑌷𑍍𑌯𑌂𑌤𑌿 𑌕𑍃𑌤𑌨𑌿𑌶𑍍𑌚𑌯𑌾𑌃 ॥ 16 ॥
𑌸𑍍𑌮𑌰𑌂𑌤𑌃 𑌪𑍁𑌤𑍍𑌰𑌦𑌾𑌰𑌾𑌣𑌾𑌂 𑌨𑌿𑌤𑍍𑌯𑍋𑌦𑍍𑌵𑌿𑌗𑍍𑌨𑌾 𑌬𑍁𑌭𑍁𑌕𑍍𑌷𑌿𑌤𑌾𑌃 ।
𑌖𑍇𑌦𑌿𑌤𑌾 𑌦𑍁𑌃𑌖𑌶𑌯𑍍𑌯𑌾𑌭𑌿𑌸𑍍𑌤𑍍𑌵𑌾𑌂 𑌕𑌰𑌿𑌷𑍍𑌯𑌂𑌤𑌿 𑌪𑍃𑌷𑍍𑌠𑌤𑌃 ॥ 1 ॥
𑌸 𑌤𑍍𑌵𑌂 𑌹𑍀𑌨𑌸𑍍𑌸𑍁𑌹𑍃𑌦𑍍𑌭𑌿𑌶𑍍𑌚 𑌹𑌿𑌤𑌕𑌾𑌮𑍈𑌶𑍍𑌚 𑌬𑌂𑌧𑍁𑌭𑌿𑌃 ।
𑌤𑍃𑌣𑌾𑌦𑌪𑌿 𑌭𑍃𑌶𑍋𑌦𑍍𑌵𑌿𑌗𑍍𑌨𑌸𑍍𑌸𑍍𑌪𑌂𑌦𑌮𑌾𑌨𑌾𑌦𑍍𑌭𑌵𑌿𑌷𑍍𑌯𑌸𑌿 ॥ 1 ॥
𑌨 𑌚 𑌜𑌾𑌤𑍁 𑌨 𑌹𑌿𑌂𑌸𑍍𑌯𑍁𑌸𑍍𑌤𑍍𑌵𑌾𑌂 𑌘𑍋𑌰𑌾 𑌲𑌕𑍍𑌷𑍍𑌮𑌣𑌸𑌾𑌯𑌕𑌾𑌃 ।
𑌅𑌪𑌵𑍃𑌤𑍍𑌤𑌂 𑌜𑌿𑌘𑌾𑌂𑌸𑌂𑌤𑍋 𑌮𑌹𑌾𑌵𑍇𑌗𑌾 𑌦𑍁𑌰𑌾𑌸𑌦𑌾𑌃 ॥ 1 ॥
𑌨 𑌚 𑌜𑌾𑌤𑍁 𑌨 𑌹𑌿𑌂𑌸𑍍𑌯𑍁𑌸𑍍𑌤𑍍𑌵𑌾 𑌘𑍋𑌰𑌾 𑌲𑌕𑍍𑌷𑍍𑌮𑌣𑌸𑌾𑌯𑌕𑌾𑌃 ।
𑌅𑌪𑌾𑌵𑍃𑌤𑍍𑌤𑌂 𑌜𑌿𑌘𑌾𑌂𑌸𑌂𑌤𑍋 𑌮𑌹𑌾𑌵𑍇𑌗𑌾 𑌦𑍁𑌰𑌾𑌸𑌦𑌾𑌃 ॥ 20 ॥
𑌅𑌸𑍍𑌮𑌾𑌭𑌿𑌸𑍍𑌤𑍁 𑌗𑌤𑌂 𑌸𑌾𑌰𑍍𑌧𑌂 𑌵𑌿𑌨𑍀𑌤𑌵𑌦𑍁𑌪𑌸𑍍𑌥𑌿𑌤𑌮𑍍 ।
𑌆𑌨𑍁𑌪𑍂𑌰𑍍𑌵𑍍𑌯𑌾𑌤𑍍𑌤𑍁 𑌸𑍁𑌗𑍍𑌰𑍀𑌵𑍋 𑌰𑌾𑌜𑍍𑌯𑍇 𑌤𑍍𑌵𑌾𑌂 𑌸𑍍𑌥𑌾𑌪𑌯𑌿𑌷𑍍𑌯𑌤𑌿 ॥ 21 ॥
𑌧𑌰𑍍𑌮𑌕𑌾𑌮𑌃 𑌪𑌿𑌤𑍃𑌵𑍍𑌯𑌸𑍍𑌤𑍇 𑌪𑍍𑌰𑍀𑌤𑌿𑌕𑌾𑌮𑍋 𑌦𑍃𑌢𑌵𑍍𑌰𑌤𑌃 ।
𑌶𑍁𑌚𑌿𑌸𑍍𑌸𑌤𑍍𑌯𑌪𑍍𑌰𑌤𑌿𑌜𑍍𑌞𑌶𑍍𑌚 𑌨 𑌤𑍍𑌵𑌾𑌂 𑌜𑌾𑌤𑍁 𑌜𑌿𑌘𑌾𑌂𑌸𑌤𑌿 ॥ 22 ॥
𑌪𑍍𑌰𑌿𑌯𑌕𑌾𑌮𑌶𑍍𑌚 𑌤𑍇 𑌮𑌾𑌤𑍁𑌸𑍍𑌤𑌦𑌰𑍍𑌥𑌂 𑌚𑌾𑌸𑍍𑌯 𑌜𑍀𑌵𑌿𑌤𑌮𑍍 ।
𑌤𑌸𑍍𑌯𑌾𑌪𑌤𑍍𑌯𑌂 𑌚 𑌨𑌾𑌸𑍍𑌤𑍍𑌯𑌨𑍍𑌯𑌤𑍍𑌤𑌸𑍍𑌮𑌾𑌦𑌂𑌗𑌦 𑌗𑌮𑍍𑌯𑌤𑌾𑌮𑍍 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌚𑌤𑍁𑌃𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
