𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌖𑌮𑍁𑌤𑍍𑌪𑌤𑌂𑌤𑌂 𑌤𑌂 𑌦𑍃𑌷𑍍𑌟𑍍𑌵𑌾 𑌮𑍈𑌥𑌿𑌲𑍀 𑌜𑌨𑌕𑌾𑌤𑍍𑌮𑌜𑌾 ।
𑌦𑍁𑌃𑌖𑌿𑌤𑌾 𑌪𑌰𑌮𑍋𑌦𑍍𑌵𑌿𑌗𑍍𑌨𑌾 𑌭𑌯𑍇 𑌮𑌹𑌤𑌿 𑌵𑌰𑍍𑌤𑌿𑌨𑍀 ॥ 1 ॥
𑌰𑍋𑌷𑌰𑍋𑌦𑌨𑌤𑌾𑌮𑍍𑌰𑌾𑌕𑍍𑌷𑍀 𑌭𑍀𑌮𑌾𑌕𑍍𑌷𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ।
𑌰𑍁𑌦𑌂𑌤𑍀 𑌕𑌰𑍁𑌣𑌂 𑌸𑍀𑌤𑌾 𑌹𑍍𑌰𑌿𑌯𑌮𑌾𑌣𑍇𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌨 𑌵𑍍𑌯𑌪𑌤𑍍𑌰𑌪𑌸𑍇 𑌨𑍀𑌚 𑌕𑌰𑍍𑌮𑌣𑌾𑌨𑍇𑌨 𑌰𑌾𑌵𑌣 ।
𑌜𑍍𑌞𑌾𑌤𑍍𑌵𑌾 𑌵𑌿𑌰𑌹𑌿𑌤𑌾𑌂 𑌯𑌨𑍍𑌮𑌾𑌂 𑌚𑍋𑌰𑌯𑌿𑌤𑍍𑌵𑌾 𑌪𑌲𑌾𑌯𑌸𑍇 ॥ 3 ॥
𑌤𑍍𑌵𑌯𑍈𑌵 𑌨𑍂𑌨𑌂 𑌦𑍁𑌷𑍍𑌟𑌾𑌤𑍍𑌮𑌨𑍍 𑌭𑍀𑌰𑍁𑌣𑌾 𑌹𑌰𑍍𑌤𑍁𑌮𑌿𑌚𑍍𑌛𑌤𑌾 ।
𑌮𑌮𑌾𑌪𑌵𑌾𑌹𑌿𑌤𑍋 𑌭𑌰𑍍𑌤𑌾 𑌮𑍃𑌗𑌰𑍂𑌪𑍇𑌣 𑌮𑌾𑌯𑌯𑌾 ॥ 4 ॥
𑌯𑍋 𑌹𑌿 𑌮𑌾𑌮𑍁𑌦𑍍𑌯𑌤𑌸𑍍𑌤𑍍𑌰𑌾𑌤𑍁𑌂 𑌸𑍋𑌽𑌪𑍍𑌯𑌯𑌂 𑌵𑌿𑌨𑌿𑌪𑌾𑌤𑌿𑌤𑌃 ।
𑌗𑍃𑌧𑍍𑌰𑌰𑌾𑌜𑌃 𑌪𑍁𑌰𑌾𑌣𑍋𑌽𑌸𑍌 𑌶𑍍𑌵𑌶𑍁𑌰𑌸𑍍𑌯 𑌸𑌖𑌾 𑌮𑌮 ॥ 5 ॥
𑌪𑌰𑌮𑌂 𑌖𑌲𑍁 𑌤𑍇 𑌵𑍀𑌰𑍍𑌯𑌂 𑌦𑍃𑌶𑍍𑌯𑌤𑍇 𑌰𑌾𑌕𑍍𑌷𑌸𑌾𑌧𑌮 ।
𑌵𑌿𑌶𑍍𑌰𑌾𑌵𑍍𑌯 𑌨𑌾𑌮𑌧𑍇𑌯𑌂 𑌹𑌿 𑌯𑍁𑌦𑍍𑌧𑍇 𑌨𑌾𑌸𑍍𑌮𑌿 𑌜𑌿𑌤𑌾 𑌤𑍍𑌵𑌯𑌾 ॥ 6 ॥
𑌈𑌦𑍃𑌶𑌂 𑌗𑌰𑍍𑌹𑌿𑌤𑌂 𑌕𑌰𑍍𑌮 𑌕𑌥𑌂 𑌕𑍃𑌤𑍍𑌵𑌾 𑌨 𑌲𑌜𑍍𑌜𑌸𑍇 ।
𑌸𑍍𑌤𑍍𑌰𑌿𑌯𑌾𑌶𑍍𑌚 𑌹𑌰𑌣𑌂 𑌨𑍀𑌚 𑌰𑌹𑌿𑌤𑍇 𑌚 𑌪𑌰𑌸𑍍𑌯 𑌚 ॥ ॥
𑌕𑌥𑌯𑌿𑌷𑍍𑌯𑌂𑌤𑌿 𑌲𑍋𑌕𑍇𑌷𑍁 𑌪𑍁𑌰𑍁𑌷𑌾𑌃 𑌕𑌰𑍍𑌮 𑌕𑍁𑌤𑍍𑌸𑌿𑌤𑌮𑍍 ।
𑌸𑍁𑌨𑍃𑌶𑌂𑌸𑌮𑌧𑌰𑍍𑌮𑌿𑌷𑍍𑌠𑌂 𑌤𑌵 𑌶𑍌𑌂𑌡𑍀𑌰𑍍𑌯𑌮𑌾𑌨𑌿𑌨𑌃 ॥ ॥
𑌧𑌿𑌕𑍍𑌤𑍇 𑌶𑍌𑌰𑍍𑌯𑌂 𑌚 𑌸𑌤𑍍𑌤𑍍𑌵𑌂 𑌚 𑌯𑌤𑍍𑌤𑍍𑌵𑌂 𑌕𑌥𑌿𑌤𑌵𑌾𑌂𑌸𑍍𑌤𑌦𑌾 ।
𑌕𑍁𑌲𑌾𑌕𑍍𑌰𑍋𑌶𑌕𑌰𑌂 𑌲𑍋𑌕𑍇 𑌧𑌿𑌕𑍍𑌤𑍇 𑌚𑌾𑌰𑌿𑌤𑍍𑌰𑌮𑍀𑌦𑍃𑌶𑌮𑍍 ॥ ॥
𑌕𑌿𑌂 𑌕𑌰𑍍𑌤𑍁𑌂 𑌶𑌕𑍍𑌯𑌮𑍇𑌵𑌂 𑌹𑌿 𑌯𑌜𑍍𑌜𑌵𑍇𑌨𑍈𑌵 𑌧𑌾𑌵𑌸𑌿 ।
𑌮𑍁𑌹𑍂𑌰𑍍𑌤𑌮𑌪𑌿 𑌤𑌿𑌷𑍍𑌠𑌸𑍍𑌵 𑌨 𑌜𑍀𑌵𑌨𑍍𑌪𑍍𑌰𑌤𑌿𑌯𑌾𑌸𑍍𑌯𑌸𑌿 ॥ 10 ॥
𑌨 𑌹𑌿 𑌚𑌕𑍍𑌷𑍁𑌷𑍍𑌪𑌥𑌂 𑌪𑍍𑌰𑌾𑌪𑍍𑌯 𑌤𑌯𑍋𑌃 𑌪𑌾𑌰𑍍𑌥𑌿𑌵𑌪𑍁𑌤𑍍𑌰𑌯𑍋𑌃 ।
𑌸𑌸𑍈𑌨𑍍𑌯𑍋𑌽𑌪𑌿 𑌸𑌮𑌰𑍍𑌥𑌸𑍍𑌤𑍍𑌵𑌂 𑌮𑍁𑌹𑍂𑌰𑍍𑌤𑌮𑌪𑌿 𑌜𑍀𑌵𑌿𑌤𑍁𑌮𑍍 ॥ 11 ॥
𑌨 𑌤𑍍𑌵𑌂 𑌤𑌯𑍋𑌶𑍍𑌶𑌰𑌸𑍍𑌪𑌰𑍍𑌶𑌂 𑌸𑍋𑌢𑍁𑌂 𑌶𑌕𑍍𑌤𑌃 𑌕𑌥𑌂𑌚𑌨 ।
𑌵𑌨𑍇 𑌪𑍍𑌰𑌜𑍍𑌵𑌲𑌿𑌤𑌸𑍍𑌯𑍇𑌵 𑌸𑍍𑌪𑌰𑍍𑌶𑌮𑌗𑍍𑌨𑍇𑌰𑍍𑌵𑌿𑌹𑌂𑌗𑌮𑌃 ॥ 12 ॥
𑌸𑌾𑌧𑍁 𑌕𑍁𑌰𑍍𑌵𑌾𑌽𑌽𑌤𑍍𑌮𑌨𑌃 𑌪𑌥𑍍𑌯𑌂 𑌸𑌾𑌧𑍁 𑌮𑌾𑌂 𑌮𑍁𑌂𑌚 𑌰𑌾𑌵𑌣 ।
𑌮𑌤𑍍𑌪𑍍𑌰𑌧𑌰𑍍𑌷𑌣𑌰𑍁𑌷𑍍𑌟𑍋 𑌹𑌿 𑌭𑍍𑌰𑌾𑌤𑍍𑌰𑌾 𑌸𑌹 𑌪𑌤𑌿𑌰𑍍𑌮𑌮 ॥ 13 ॥
𑌵𑌿𑌧𑌾𑌸𑍍𑌯𑌤𑌿 𑌵𑌿𑌨𑌾𑌶𑌾𑌯 𑌤𑍍𑌵𑌂 𑌮𑌾𑌂 𑌯𑌦𑌿 𑌨 𑌮𑍁𑌂𑌚𑌸𑌿 ।
𑌯𑍇𑌨 𑌤𑍍𑌵𑌂 𑌵𑍍𑌯𑌵𑌸𑌾𑌯𑍇𑌨 𑌬𑌲𑌾𑌨𑍍𑌮𑌾𑌂 𑌹𑌰𑍍𑌤𑍁𑌮𑌿𑌚𑍍𑌛𑌸𑌿 ॥ 14 ॥
𑌵𑍍𑌯𑌵𑌸𑌾𑌯𑌸𑍍𑌸 𑌤𑍇 𑌨𑍀𑌚 𑌭𑌵𑌿𑌷𑍍𑌯𑌤𑌿 𑌨𑌿𑌰𑌰𑍍𑌥𑌕𑌃 ।
𑌨 𑌹𑍍𑌯𑌹𑌂 𑌤𑌮𑌪𑌶𑍍𑌯𑌂𑌤𑍀 𑌭𑌰𑍍𑌤𑌾𑌰𑌂 𑌵𑌿𑌬𑍁𑌧𑍋𑌪𑌮𑌮𑍍 ॥ 15 ॥
𑌉𑌤𑍍𑌸𑌹𑍇 𑌶𑌤𑍍𑌰𑍁𑌵𑌶𑌗𑌾 𑌪𑍍𑌰𑌾𑌣𑌾𑌂𑌧𑌾𑌰𑌯𑌿𑌤𑍁𑌂 𑌚𑌿𑌰𑌮𑍍 ।
𑌨 𑌨𑍂𑌨𑌂 𑌚𑌾𑌤𑍍𑌮𑌨𑌃 𑌪𑌥𑍍𑌯𑌂 𑌶𑍍𑌰𑍇𑌯𑍋 𑌵𑌾 𑌸𑌮𑌵𑍇𑌕𑍍𑌷𑌸𑍇 ॥ 16 ॥
𑌮𑍃𑌤𑍍𑌯𑍁𑌕𑌾𑌲𑍇 𑌯𑌥𑌾 𑌮𑌰𑍍𑌤𑍍𑌯𑍋 𑌵𑌿𑌪𑌰𑍀𑌤𑌾𑌨𑌿 𑌸𑍇𑌵𑌤𑍇 ।
𑌮𑍁𑌮𑍂𑌰𑍍𑌷𑍂𑌣𑌾𑌂 𑌹𑌿 𑌸𑌰𑍍𑌵𑍇𑌷𑌾𑌂 𑌯𑌤𑍍𑌪𑌥𑍍𑌯𑌂 𑌤𑌨𑍍𑌨 𑌰𑍋𑌚𑌤𑍇 ॥ 1 ॥
𑌪𑌶𑍍𑌯𑌾𑌮𑍍𑌯𑌦𑍍𑌯 𑌹𑌿 𑌕𑌂𑌠𑍇𑌤𑍍𑌵𑌾𑌂 𑌕𑌾𑌲𑌪𑌾𑌶𑌾𑌵𑌪𑌾𑌶𑌿𑌤𑌮𑍍 ।
𑌯𑌥𑌾 𑌚𑌾𑌸𑍍𑌮𑌿𑌨𑍍𑌭𑌯𑌸𑍍𑌥𑌾𑌨𑍇 𑌨 𑌬𑌿𑌭𑍇𑌷𑌿 𑌦𑌶𑌾𑌨𑌨 ॥ 1 ॥
𑌵𑍍𑌯𑌕𑍍𑌤𑌂 𑌹𑌿𑌰𑌣𑍍𑌮𑌯𑌾𑌨𑍍 𑌹𑌿 𑌤𑍍𑌵𑌂 𑌸𑌂𑌪𑌶𑍍𑌯𑌸𑌿 𑌮𑌹𑍀𑌰𑍁𑌹𑌾𑌨𑍍 ।
𑌨𑌦𑍀𑌂 𑌵𑍈𑌤𑌰𑌣𑍀𑌂 𑌘𑍋𑌰𑌾𑌂 𑌰𑍁𑌧𑌿𑌰𑍌𑌘𑌨𑌿𑌵𑌾𑌹𑌿𑌨𑍀𑌮𑍍 ॥ 1 ॥
𑌅𑌸𑌿𑌪𑌤𑍍𑌰𑌵𑌨𑌂 𑌚𑍈𑌵 𑌭𑍀𑌮𑌂 𑌪𑌶𑍍𑌯𑌸𑌿 𑌰𑌾𑌵𑌣 ।
𑌤𑌪𑍍𑌤𑌕𑌾𑌂𑌚𑌨𑌪𑍁𑌷𑍍𑌪𑌾𑌂 𑌚 𑌵𑍈𑌡𑍂𑌰𑍍𑌯𑌪𑍍𑌰𑌵𑌰𑌚𑍍𑌛𑌦𑌾𑌮𑍍 ॥ 20 ॥
𑌦𑍍𑌰𑌕𑍍𑌷𑍍𑌯𑌸𑍇 𑌶𑌾𑌲𑍍𑌮𑌲𑍀𑌂 𑌤𑍀𑌕𑍍𑌷𑍍𑌣𑌾𑌮𑌾𑌯𑌸𑍈𑌃 𑌕𑌂𑌟𑌕𑍈𑌶𑍍𑌚𑌿𑌤𑌾𑌮𑍍 ।
𑌨 𑌹𑌿 𑌤𑍍𑌵𑌮𑍀𑌦𑍃𑌶𑌂 𑌕𑍃𑌤𑍍𑌵𑌾 𑌤𑌸𑍍𑌯𑌾𑌲𑍀𑌕𑌂 𑌮𑌹𑌾𑌤𑍍𑌮𑌨𑌃 ॥ 21 ॥
𑌧𑌰𑌿𑌤𑍁𑌂 𑌶𑌕𑍍𑌷𑍍𑌯𑌸𑌿 𑌚𑌿𑌰𑌂 𑌵𑌿𑌷𑌂 𑌪𑍀𑌤𑍍𑌵𑍇𑌵 𑌨𑌿𑌰𑍍𑌘𑍃𑌣𑌃 ।
𑌬𑌦𑍍𑌧𑌸𑍍𑌤𑍍𑌵𑌂 𑌕𑌾𑌲𑌪𑌾𑌶𑍇𑌨 𑌦𑍁𑌰𑍍𑌨𑌿𑌵𑌾𑌰𑍇𑌣 𑌰𑌾𑌵𑌣 ॥ 22 ॥
𑌕𑍍𑌵𑌗𑌤𑍋 𑌲𑌪𑍍𑌸𑍍𑌯𑌸𑍇 𑌶𑌰𑍍𑌮 𑌭𑌰𑍍𑌤𑍁𑌰𑍍𑌮𑌮 𑌮𑌹𑌾𑌤𑍍𑌮𑌨𑌃 ।
𑌨𑌿𑌮𑍇𑌷𑌾𑌂𑌤𑌰𑌮𑌾𑌤𑍍𑌰𑍇𑌣 𑌵𑌿𑌨𑌾 𑌭𑍍𑌰𑌾𑌤𑍍𑌰𑌾 𑌮𑌹𑌾𑌵𑌨𑍇 ॥ 23 ॥
𑌰𑌾𑌕𑍍𑌷𑌸𑌾 𑌨𑌿𑌹𑌤𑌾 𑌯𑍇𑌨 𑌸𑌹𑌸𑍍𑌰𑌾𑌣𑌿 𑌚𑌤𑍁𑌰𑍍𑌦𑌶 ।
𑌸 𑌕𑌥𑌂 𑌰𑌾𑌘𑌵𑍋 𑌵𑍀𑌰𑌸𑍍𑌸𑌰𑍍𑌵𑌾𑌸𑍍𑌤𑍍𑌰𑌕𑍁𑌶𑌲𑍋 𑌬𑌲𑍀 ॥ 24 ॥
𑌨 𑌤𑍍𑌵𑌾𑌂 𑌹𑌨𑍍𑌯𑌾𑌚𑍍𑌛𑌰𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑌿𑌷𑍍𑌟𑌭𑌾𑌰𑍍𑌯𑌾𑌪𑌹𑌾𑌰𑌿𑌣𑌮𑍍 ।
𑌤𑌚𑍍𑌚𑌾𑌨𑍍𑌯𑌚𑍍𑌚 𑌪𑌰𑍁𑌷𑌂 𑌵𑍈𑌦𑍇𑌹𑍀 𑌰𑌾𑌵𑌣𑌾𑌂𑌕𑌗𑌾 ॥ 25 ॥
𑌭𑌯𑌶𑍋𑌕𑌸𑌮𑌾𑌵𑌿𑌷𑍍𑌟𑌾 𑌕𑌰𑍁𑌣𑌂 𑌵𑌿𑌲𑌲𑌾𑌪 𑌹 ।
𑌤𑌥𑌾 𑌭𑍃𑌶𑌾𑌰𑍍𑌤𑌾𑌂 𑌬𑌹𑍁𑌚𑍈𑌵 𑌭𑌾𑌷𑌿𑌣𑍀𑌂 𑌵𑌿𑌲𑌾𑌪𑌪𑍂𑌰𑍍𑌵𑌂 𑌕𑌰𑍁𑌣𑌂 𑌚 𑌭𑌾𑌮𑌿𑌨𑍀𑌮𑍍 ।
𑌜𑌹𑌾𑌰 𑌪𑌾𑌪𑌃 𑌕𑌰𑍁𑌣𑌂 𑌵𑌿𑌚𑍇𑌷𑍍𑌟𑌤𑍀𑌂 𑌨𑍃𑌪𑌾𑌤𑍍𑌮𑌜𑌾𑌮𑌾𑌗𑌤𑌗𑌾𑌤𑍍𑌰𑌵𑍇𑌪𑌥𑍁𑌮𑍍 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍍𑌰𑌿𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
