𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌸𑍀𑌤𑌾𑌮𑌪𑌶𑍍𑌯𑌂𑌧𑌰𑍍𑌮𑌾𑌤𑍍𑌮𑌾 𑌶𑍋𑌕𑍋𑌪𑌹𑌤𑌚𑍇𑌤𑌨𑌃 ।
𑌵𑌿𑌲𑌲𑌾𑌪 𑌮𑌹𑌾𑌬𑌾𑌹𑍂 𑌰𑌾𑌮𑌃 𑌕𑌮𑌲𑌲𑍋𑌚𑌨𑌃 ॥ 1 ॥
𑌪𑌶𑍍𑌯𑌨𑍍𑌨𑌿𑌵 𑌚 𑌤𑌾𑌂 𑌸𑍀𑌤𑌾𑌮𑌪𑌶𑍍𑌯𑌨𑍍𑌮𑌦𑌨𑌾𑌰𑍍𑌦𑌿𑌤𑌃 ।
𑌉𑌵𑌾𑌚 𑌰𑌾𑌘𑌵𑍋 𑌵𑌾𑌕𑍍𑌯𑌂 𑌵𑌿𑌲𑌾𑌪𑌾𑌶𑍍𑌰𑌯𑌦𑍁𑌰𑍍𑌵𑌚𑌮𑍍 ॥ 2 ॥
𑌤𑍍𑌵𑌮𑌶𑍋𑌕𑌸𑍍𑌯 𑌶𑌾𑌖𑌾𑌭𑌿𑌃 𑌪𑍁𑌷𑍍𑌪𑌪𑍍𑌰𑌿𑌯𑌤𑌯𑌾 𑌪𑍍𑌰𑌿𑌯𑍇 ।
𑌆𑌵𑍃𑌣𑍋𑌷𑌿 𑌶𑌰𑍀𑌰𑌂 𑌤𑍇 𑌮𑌮 𑌶𑍋𑌕𑌵𑌿𑌵𑌰𑍍𑌧𑌿𑌨𑍀 ॥ 3 ॥
𑌕𑌦𑌲𑍀𑌸𑍍𑌕𑌂𑌧𑌸𑌦𑍃𑌶𑍌 𑌕𑌦𑌲𑍍𑌯𑌾 𑌸𑌂𑌵𑍃𑌤𑌾𑌵𑍁𑌭𑍌 ।
𑌊𑌰𑍂 𑌪𑌶𑍍𑌯𑌾𑌮𑌿 𑌤𑍇 𑌦𑍇𑌵𑌿 𑌨𑌾𑌸𑌿 𑌶𑌕𑍍𑌤𑌾 𑌨𑌿𑌗𑍂𑌹𑌿𑌤𑍁𑌮𑍍 ॥ 4 ॥
𑌕𑌰𑍍𑌣𑌿𑌕𑌾𑌰𑌵𑌨𑌂 𑌭𑌦𑍍𑌰𑍇 𑌹𑌸𑌂𑌤𑍀 𑌦𑍇𑌵𑌿 𑌸𑍇𑌵𑌸𑍇 ।
𑌅𑌲𑌂 𑌤𑍇 𑌪𑌰𑌿𑌹𑌾𑌸𑍇𑌨 𑌮𑌮 𑌬𑌾𑌧𑌾𑌵𑌹𑍇𑌨 𑌵𑍈 ॥ 5 ॥
𑌪𑌰𑌿𑌹𑌾𑌸𑍇𑌨 𑌕𑌿𑌂 𑌸𑍀𑌤𑍇 𑌪𑌰𑌿𑌶𑍍𑌰𑌾𑌂𑌤𑌸𑍍𑌯 𑌮𑍇 𑌪𑍍𑌰𑌿𑌯𑍇 ।
𑌅𑌯𑌂 𑌸 𑌪𑌰𑌿𑌹𑌾𑌸𑍋𑌽𑌪𑌿 𑌸𑌾𑌧𑍁 𑌦𑍇𑌵𑌿 𑌨 𑌰𑍋𑌚𑌤𑍇 ॥ 6 ॥
𑌵𑌿𑌶𑍇𑌷𑍇𑌣𑌾𑌶𑍍𑌰𑌮𑌸𑍍𑌥𑌾𑌨𑍇 𑌹𑌾𑌸𑍋𑌽𑌯𑌂 𑌨 𑌪𑍍𑌰𑌶𑌸𑍍𑌯𑌤𑍇 ।
𑌅𑌵𑌗𑌚𑍍𑌛𑌾𑌮𑌿 𑌤𑍇 𑌶𑍀𑌲𑌂 𑌪𑌰𑌿𑌹𑌾𑌸𑌪𑍍𑌰𑌿𑌯𑌂 𑌪𑍍𑌰𑌿𑌯𑍇 ॥ ॥
𑌆𑌗𑌚𑍍𑌛 𑌤𑍍𑌵𑌂 𑌵𑌿𑌶𑌾𑌲𑌾𑌕𑍍𑌷𑌿 𑌶𑍂𑌨𑍍𑌯𑍋𑌽𑌯𑌮𑍁𑌟𑌜𑌸𑍍𑌤𑌵 ।
𑌸𑍁𑌵𑍍𑌯𑌕𑍍𑌤𑌂 𑌰𑌾𑌕𑍍𑌷𑌸𑍈𑌸𑍍𑌸𑍀𑌤𑌾 𑌭𑌕𑍍𑌷𑌿𑌤𑌾 𑌵𑌾 𑌹𑍃𑌤𑌾𑌪𑌿 𑌵𑌾 ॥ ॥
𑌨 𑌹𑌿 𑌸𑌾 𑌵𑌿𑌲𑌪𑌂𑌤𑌂 𑌮𑌾𑌮𑍁𑌪𑌸𑌂𑌪𑍍𑌰𑍈𑌤𑌿 𑌲𑌕𑍍𑌷𑍍𑌮𑌣 ।
𑌏𑌤𑌾𑌨𑌿 𑌮𑍃𑌗𑌯𑍂𑌥𑌾𑌨𑌿 𑌸𑌾𑌶𑍍𑌰𑍁𑌨𑍇𑌤𑍍𑌰𑌾𑌣𑌿 𑌲𑌕𑍍𑌷𑍍𑌮𑌣 ॥ ॥
𑌶𑌂𑌸𑌂𑌤𑍀𑌵 𑌹𑌿 𑌵𑍈𑌦𑍇𑌹𑍀𑌂 𑌭𑌕𑍍𑌷𑌿𑌤𑌾𑌂 𑌰𑌜𑌨𑍀𑌚𑌰𑍈𑌃 ।
𑌹𑌾 𑌮𑌮𑌾𑌰𑍍𑌯𑍇 𑌕𑍍𑌵 𑌯𑌾𑌤𑌾𑌸𑌿 𑌹𑌾 𑌸𑌾𑌧𑍍𑌵𑌿 𑌵𑌰𑌵𑌰𑍍𑌣𑌿𑌨𑌿 ॥ 10 ॥
𑌹𑌾 𑌸𑌕𑌾𑌮𑌾 𑌤𑍍𑌵𑌯𑌾 𑌦𑍇𑌵𑍀 𑌕𑍈𑌕𑍇𑌯𑍀 𑌸𑌾 𑌭𑌵𑌿𑌷𑍍𑌯𑌤𑌿 ।
𑌸𑍀𑌤𑌯𑌾 𑌸𑌹 𑌨𑌿𑌰𑍍𑌯𑌾𑌤𑍋 𑌵𑌿𑌨𑌾 𑌸𑍀𑌤𑌾𑌮𑍁𑌪𑌾𑌗𑌤𑌃 ॥ 11 ॥
𑌕𑌥𑌂 𑌨𑌾𑌮 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌶𑍂𑌨𑍍𑌯𑌮𑌂𑌤𑌃𑌪𑍁𑌰𑌂 𑌪𑍁𑌨𑌃 ।
𑌨𑌿𑌰𑍍𑌵𑍀𑌰𑍍𑌯 𑌇𑌤𑌿 𑌲𑍋𑌕𑍋 𑌮𑌾𑌂 𑌨𑌿𑌰𑍍𑌦𑌯𑌶𑍍𑌚𑍇𑌤𑌿 𑌵𑌕𑍍𑌷𑍍𑌯𑌤𑌿 ॥ 12 ॥
𑌕𑌾𑌤𑌰𑌤𑍍𑌵𑌂 𑌪𑍍𑌰𑌕𑌾𑌶𑌂 𑌹𑌿 𑌸𑍀𑌤𑌾𑌪𑌨𑌯𑌨𑍇𑌨 𑌮𑍇 ।
𑌨𑌿𑌵𑍃𑌤𑍍𑌤𑌵𑌨𑌵𑌾𑌸𑌶𑍍𑌚 𑌜𑌨𑌕𑌂 𑌮𑌿𑌥𑌿𑌲𑌾𑌧𑌿𑌪𑌮𑍍 ॥ 13 ॥
𑌕𑍁𑌶𑌲𑌂 𑌪𑌰𑌿𑌪𑍃𑌚𑍍𑌛𑌂𑌤𑌂 𑌕𑌥𑌂 𑌶𑌕𑍍𑌷𑍍𑌯𑍇 𑌨𑌿𑌰𑍀𑌕𑍍𑌷𑌿𑌤𑍁𑌮𑍍 ।
𑌵𑌿𑌦𑍇𑌹𑌰𑌾𑌜𑍋 𑌨𑍂𑌨𑌂 𑌮𑌾𑌂 𑌦𑍃𑌷𑍍𑌟𑍍𑌵𑌾 𑌵𑌿𑌰𑌹𑌿𑌤𑌂 𑌤𑌯𑌾 ॥ 14 ॥
𑌸𑍁𑌤𑌾𑌸𑍍𑌨𑍇𑌹𑍇𑌨 𑌸𑌂𑌤𑌪𑍍𑌤𑍋 𑌮𑍋𑌹𑌸𑍍𑌯 𑌵𑌶𑌮𑍇𑌷𑍍𑌯𑌤𑌿 ।
𑌅𑌥𑌵𑌾 𑌨 𑌗𑌮𑌿𑌷𑍍𑌯𑌾𑌮𑌿 𑌪𑍁𑌰𑍀𑌂 𑌭𑌰𑌤𑌪𑌾𑌲𑌿𑌤𑌾𑌮𑍍 ॥ 15 ॥
𑌸𑍍𑌵𑌰𑍍𑌗𑍋𑌽𑌪𑌿 𑌸𑍀𑌤𑌯𑌾 𑌹𑍀𑌨𑌶𑍍𑌶𑍂𑌨𑍍𑌯 𑌏𑌵 𑌮𑌤𑍋 𑌮𑌮 ।
𑌮𑌾𑌮𑌿𑌹𑍋𑌤𑍍𑌸𑍃𑌜𑍍𑌯 𑌹𑌿 𑌵𑌨𑍇 𑌗𑌚𑍍𑌛𑌾𑌯𑍋𑌧𑍍𑌯𑌾𑌂 𑌪𑍁𑌰𑍀𑌂 𑌶𑍁𑌭𑌾𑌮𑍍 ॥ 16 ॥
𑌨 𑌤𑍍𑌵𑌹𑌂 𑌤𑌾𑌂 𑌵𑌿𑌨𑌾 𑌸𑍀𑌤𑌾𑌂 𑌜𑍀𑌵𑍇𑌯𑌂 𑌹𑌿 𑌕𑌥𑌂𑌚𑌨 ।
𑌗𑌾𑌢𑌮𑌾𑌶𑍍𑌲𑌿𑌷𑍍𑌯 𑌭𑌰𑌤𑍋 𑌵𑌾𑌚𑍍𑌯𑍋 𑌮𑌦𑍍𑌵𑌚𑌨𑌾𑌤𑍍𑌤𑍍𑌵𑌯𑌾 ॥ 1 ॥
𑌅𑌨𑍁𑌜𑍍𑌞𑌾𑌤𑍋𑌽𑌸𑌿 𑌰𑌾𑌮𑍇𑌣 𑌪𑌾𑌲𑌯𑍇𑌤𑌿 𑌵𑌸𑍁𑌂𑌧𑌰𑌾𑌮𑍍 ।
𑌅𑌂𑌬𑌾 𑌚 𑌮𑌮 𑌕𑍈𑌕𑍇𑌯𑍀 𑌸𑍁𑌮𑌿𑌤𑍍𑌰𑌾 𑌚 𑌤𑍍𑌵𑌯𑌾 𑌵𑌿𑌭𑍋 ॥ 1 ॥
𑌕𑍌𑌸𑌲𑍍𑌯𑌾 𑌚 𑌯𑌥𑌾𑌨𑍍𑌯𑌾𑌯𑌮𑌭𑌿𑌵𑌾𑌦𑍍𑌯𑌾 𑌮𑌮𑌾𑌽𑌜𑍍𑌞𑌯𑌾 ।
𑌰𑌕𑍍𑌷𑌣𑍀𑌯𑌾 𑌪𑍍𑌰𑌯𑌤𑍍𑌨𑍇𑌨 𑌭𑌵𑌤𑌾 𑌸𑍂𑌕𑍍𑌤𑌕𑌾𑌰𑌿𑌣𑌾 ॥ 1 ॥
𑌸𑍀𑌤𑌾𑌯𑌾𑌶𑍍𑌚 𑌵𑌿𑌨𑌾𑌶𑍋𑌽𑌯𑌂 𑌮𑌮 𑌚𑌾𑌮𑌿𑌤𑍍𑌰𑌕𑌰𑍍𑌶𑌨 ।
𑌵𑌿𑌸𑍍𑌤𑌰𑍇𑌣 𑌜𑌨𑌨𑍍𑌯𑌾 𑌮𑍇 𑌵𑌿𑌨𑌿𑌵𑍇𑌦𑍍𑌯𑌸𑍍𑌤𑍍𑌵𑌯𑌾 𑌭𑌵𑍇𑌤𑍍 ॥ 20 ॥
𑌇𑌤𑌿 𑌵𑌿𑌲𑌪𑌤𑌿 𑌰𑌾𑌘𑌵𑍇 𑌸𑍁𑌦𑍀𑌨𑍇 𑌵𑌨𑌮𑍁𑌪𑌗𑌮𑍍𑌯 𑌤𑌯𑌾 𑌵𑌿𑌨𑌾 𑌸𑍁𑌕𑍇𑌶𑍍𑌯𑌾 ।
𑌭𑌯𑌵𑌿𑌕𑌲𑌮𑍁𑌖𑌸𑍍𑌤𑍁 𑌲𑌕𑍍𑌷𑍍𑌮𑌣𑍋𑌽𑌪𑌿 𑌵𑍍𑌯𑌥𑌿𑌤𑌮𑌨𑌾 𑌭𑍃𑌶𑌮𑌾𑌤𑍁𑌰𑍋 𑌬𑌭𑍂𑌵 ॥ 21 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌦𑍍𑌵𑌿𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
