𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌏𑌵𑌮𑍁𑌕𑍍𑌤𑍌𑌤𑍁 𑌤𑍌 𑌵𑍀𑌰𑍌 𑌕𑌬𑌂𑌧𑍇𑌨 𑌨𑌰𑍇𑌶𑍍𑌵𑌰𑍌 ।
𑌗𑌿𑌰𑌿𑌪𑍍𑌰𑌦𑌰𑌮𑌾𑌸𑌾𑌦𑍍𑌯 𑌪𑌾𑌵𑌕𑌂 𑌵𑌿𑌸𑌸𑌰𑍍𑌜𑌤𑍁𑌃 ॥ 1 ॥
𑌲𑌕𑍍𑌷𑍍𑌮𑌣𑌸𑍍𑌤𑍁 𑌮𑌹𑍋𑌲𑍍𑌕𑌾𑌭𑌿𑌰𑍍𑌜𑍍𑌵𑌲𑌿𑌤𑌾𑌭𑌿𑌸𑍍𑌸𑌮𑌂𑌤𑌤𑌃 ।
𑌚𑌿𑌤𑌾𑌮𑌾𑌦𑍀𑌪𑌯𑌾𑌮𑌾𑌸 𑌸𑌾 𑌪𑍍𑌰𑌜𑌜𑍍𑌵𑌾𑌲 𑌸𑌰𑍍𑌵𑌤𑌃 ॥ 2 ॥
𑌤𑌚𑍍𑌛𑌰𑍀𑌰𑌂 𑌕𑌬𑌂𑌧𑌸𑍍𑌯 𑌘𑍃𑌤𑌪𑌿𑌂𑌡𑍋𑌪𑌮𑌂 𑌮𑌹𑌤𑍍 ।
𑌮𑍇𑌦𑌸𑌾 𑌪𑌚𑍍𑌯𑌮𑌾𑌨𑌸𑍍𑌯 𑌮𑌂𑌦𑌂 𑌦𑌹𑌤𑌿 𑌪𑌾𑌵𑌕𑌃 ॥ 3 ॥
𑌸 𑌵𑌿𑌧𑍂𑌯 𑌚𑌿𑌤𑌾𑌮𑌾𑌶𑍁 𑌵𑌿𑌧𑍂𑌮𑍋𑌽𑌗𑍍𑌨𑌿𑌰𑌿𑌵𑍋𑌤𑍍𑌥𑌿𑌤𑌃 ।
𑌅𑌰𑌜𑍇 𑌵𑌾𑌸𑌸𑍀 𑌬𑌿𑌭𑍍𑌰𑌨𑍍𑌮𑌾𑌲𑌾𑌂 𑌦𑌿𑌵𑍍𑌯𑌾𑌂 𑌮𑌹𑌾𑌬𑌲𑌃 ॥ 4 ॥
𑌤𑌤𑌶𑍍𑌚𑌿𑌤𑌾𑌯𑌾 𑌵𑍇𑌗𑍇𑌨 𑌭𑌾𑌸𑍍𑌵𑌰𑍋 𑌵𑌿𑌮𑌲𑌾𑌂𑌬𑌰𑌃 ।
𑌉𑌤𑍍𑌪𑌪𑌾𑌤𑌾𑌶𑍁 𑌸𑌂𑌹𑍃𑌷𑍍𑌟𑌸𑍍𑌸𑌰𑍍𑌵𑌪𑍍𑌰𑌤𑍍𑌯𑌂𑌗𑌭𑍂𑌷𑌣𑌃 ॥ 5 ॥
𑌵𑌿𑌮𑌾𑌨𑍇 𑌭𑌾𑌸𑍍𑌵𑌰𑍇 𑌤𑌿𑌷𑍍𑌠𑌨𑍍𑌹𑌂𑌸𑌯𑍁𑌕𑍍𑌤𑍇 𑌯𑌶𑌸𑍍𑌕𑌰𑍇 ।
𑌪𑍍𑌰𑌭𑌯𑌾 𑌚 𑌮𑌹𑌾𑌤𑍇𑌜𑌾 𑌦𑌿𑌶𑍋 𑌦𑌶 𑌵𑌿𑌰𑌾𑌜𑌯𑌨𑍍 ॥ 6 ॥
𑌸𑍋𑌽𑌂𑌤𑌰𑌿𑌕𑍍𑌷𑌗𑌤𑍋 𑌰𑌾𑌮𑌂 𑌕𑌬𑌂𑌧𑍋 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌶𑍃𑌣𑍁 𑌰𑌾𑌘𑌵 𑌤𑌤𑍍𑌤𑍍𑌵𑍇𑌨 𑌯𑌥𑌾 𑌸𑍀𑌤𑌾𑌮𑌵𑌾𑌪𑍍𑌸𑍍𑌯𑌸𑌿 ॥ ॥
𑌰𑌾𑌮 𑌷𑌡𑍍𑌯𑍁𑌕𑍍𑌤𑌯𑍋 𑌲𑍋𑌕𑍇 𑌯𑌾𑌭𑌿𑌸𑍍𑌸𑌰𑍍𑌵𑌂 𑌵𑌿𑌮𑍃𑌶𑍍𑌯𑌤𑍇 ।
𑌪𑌰𑌿𑌮𑍃𑌷𑍍𑌟𑍋 𑌦𑌶𑌾𑌂𑌤𑍇𑌨 𑌦𑌶𑌾𑌭𑌾𑌗𑍇𑌨 𑌸𑍇𑌵𑍍𑌯𑌤𑍇 ॥ ॥
𑌦𑌶𑌾𑌭𑌾𑌗𑌗𑌤𑍋 𑌹𑍀𑌨𑌸𑍍𑌤𑍍𑌵𑌂 𑌹𑌿 𑌰𑌾𑌮 𑌸𑌲𑌕𑍍𑌷𑍍𑌮𑌣𑌃 ।
𑌯𑌤𑍍𑌕𑍃𑌤𑍇 𑌵𑍍𑌯𑌸𑌨𑌂 𑌪𑍍𑌰𑌾𑌪𑍍𑌤𑌂 𑌤𑍍𑌵𑌯𑌾 𑌦𑌾𑌰𑌪𑍍𑌰𑌧𑌰𑍍𑌷𑌣𑌮𑍍 ॥ ॥
𑌤𑌦𑌵𑌶𑍍𑌯𑌂 𑌤𑍍𑌵𑌯𑌾 𑌕𑌾𑌰𑍍𑌯𑌸𑍍𑌸𑌸𑍁𑌹𑍃𑌤𑍍𑌸𑍁𑌹𑍃𑌦𑌾𑌂 𑌵𑌰 ।
𑌅𑌕𑍃𑌤𑍍𑌵𑌾 𑌹𑌿 𑌨 𑌤𑍇 𑌸𑌿𑌦𑍍𑌧𑌿𑌮𑌹𑌂 𑌪𑌶𑍍𑌯𑌾𑌮𑌿 𑌚𑌿𑌂𑌤𑌯𑌨𑍍 ॥ 10 ॥
𑌶𑍍𑌰𑍂𑌯𑌤𑌾𑌂 𑌰𑌾𑌮 𑌵𑌕𑍍𑌷𑍍𑌯𑌾𑌮𑌿 𑌸𑍁𑌗𑍍𑌰𑍀𑌵𑍋 𑌨𑌾𑌮 𑌵𑌾𑌨𑌰𑌃 ।
𑌭𑍍𑌰𑌾𑌤𑍍𑌰𑌾 𑌨𑌿𑌰𑌸𑍍𑌤𑌃 𑌕𑍍𑌰𑍁𑌦𑍍𑌧𑍇𑌨 𑌵𑌾𑌲𑌿𑌨𑌾 𑌶𑌕𑍍𑌰𑌸𑍂𑌨𑍁𑌨𑌾 ॥ 11 ॥
𑌋𑌶𑍍𑌯𑌮𑍂𑌕𑍇 𑌗𑌿𑌰𑌿𑌵𑌰𑍇 𑌪𑌂𑌪𑌾𑌪𑌰𑍍𑌯𑌂𑌤𑌶𑍋𑌭𑌿𑌤𑍇 ।
𑌨𑌿𑌵𑌸𑌤𑍍𑌯𑌾𑌤𑍍𑌮𑌵𑌾𑌨𑍍𑌵𑍀𑌰𑌶𑍍𑌚𑌤𑍁𑌰𑍍𑌭𑌿𑌸𑍍𑌸𑌹 𑌵𑌾𑌨𑌰𑍈𑌃 ॥ 12 ॥
𑌵𑌾𑌨𑌰𑍇𑌂𑌦𑍍𑌰𑍋 𑌮𑌹𑌾𑌵𑍀𑌰𑍍𑌯𑌸𑍍𑌤𑍇𑌜𑍋𑌵𑌾𑌨𑌮𑌿𑌤𑌪𑍍𑌰𑌭𑌃 ।
𑌸𑌤𑍍𑌯𑌸𑌂𑌧𑍋 𑌵𑌿𑌨𑍀𑌤𑌶𑍍𑌚 𑌧𑍃𑌤𑌿𑌮𑌾𑌨𑍍𑌮𑌤𑌿𑌮𑌾𑌨𑍍𑌮𑌹𑌾𑌨𑍍 ॥ 13 ॥
𑌦𑌕𑍍𑌷𑌃 𑌪𑍍𑌰𑌗𑌲𑍍𑌭𑍋 𑌦𑍍𑌯𑍁𑌤𑌿𑌮𑌾𑌨𑍍𑌮𑌹𑌾𑌬𑌲𑌪𑌰𑌾𑌕𑍍𑌰𑌮𑌃 ।
𑌭𑍍𑌰𑌾𑌤𑍍𑌰𑌾 𑌵𑌿𑌵𑌾𑌸𑌿𑌤𑍋 𑌰𑌾𑌮 𑌰𑌾𑌜𑍍𑌯𑌹𑍇𑌤𑍋𑌰𑍍𑌮𑌹𑌾𑌬𑌲𑌃 ॥ 14 ॥
𑌸 𑌤𑍇 𑌸𑌹𑌾𑌯𑍋 𑌮𑌿𑌤𑍍𑌰𑌂 𑌚 𑌸𑍀𑌤𑌾𑌯𑌾𑌃 𑌪𑌰𑌿𑌮𑌾𑌰𑍍𑌗𑌣𑍇 ।
𑌭𑌵𑌿𑌷𑍍𑌯𑌤𑌿 𑌹𑌿𑌤𑍇 𑌰𑌾𑌮 𑌮𑌾 𑌚 𑌶𑍋𑌕𑍇 𑌮𑌨𑌃 𑌕𑍃𑌥𑌾𑌃 ॥ 15 ॥
𑌭𑌵𑌿𑌤𑌵𑍍𑌯𑌂 𑌹𑌿 𑌯𑌚𑍍𑌚𑌾𑌪𑌿 𑌨 𑌤𑌚𑍍𑌛𑌕𑍍𑌯𑌮𑌿𑌹𑌾𑌨𑍍𑌯𑌥𑌾 ।
𑌕𑌰𑍍𑌤𑍁𑌮𑌿𑌕𑍍𑌷𑍍𑌵𑌾𑌕𑍁𑌶𑌾𑌰𑍍𑌦𑍂𑌲 𑌕𑌾𑌲𑍋 𑌹𑌿 𑌦𑍁𑌰𑌤𑌿𑌕𑍍𑌰𑌮𑌃 ॥ 16 ॥
𑌗𑌚𑍍𑌛 𑌶𑍍𑌰𑍀𑌘𑍍𑌰𑌮𑌿𑌤𑍋 𑌰𑌾𑌮 𑌸𑍁𑌗𑍍𑌰𑍀𑌵𑌂 𑌤𑌂 𑌮𑌹𑌾𑌬𑌲𑌮𑍍 ।
𑌵𑌯𑌸𑍍𑌯𑌂 𑌤𑌂 𑌕𑍁𑌰𑍁 𑌕𑍍𑌷𑌿𑌪𑍍𑌰𑌮𑌿𑌤𑍋 𑌗𑌤𑍍𑌵𑌾𑌽𑌦𑍍𑌯 𑌰𑌾𑌘𑌵 ॥ 1 ॥
𑌅𑌦𑍍𑌰𑍋𑌹𑌾𑌯 𑌸𑌮𑌾𑌗𑌮𑍍𑌯 𑌦𑍀𑌪𑍍𑌯𑌮𑌾𑌨𑍇 𑌵𑌿𑌭𑌾𑌵𑌸𑍌 ।
𑌸 𑌚 𑌤𑍇 𑌨𑌾𑌵𑌮𑌂𑌤𑌵𑍍𑌯𑌸𑍍𑌸𑍁𑌗𑍍𑌰𑍀𑌵𑍋 𑌵𑌾𑌨𑌰𑌾𑌧𑌿𑌪𑌃 ॥ 1 ॥
𑌕𑍃𑌤𑌜𑍍𑌞𑌃 𑌕𑌾𑌮𑌰𑍂𑌪𑍀 𑌚 𑌸𑌹𑌾𑌯𑌾𑌰𑍍𑌥𑍀 𑌚 𑌵𑍀𑌰𑍍𑌯𑌵𑌾𑌨𑍍 ।
𑌶𑌕𑍍𑌤𑍌𑌹𑍍𑌯𑌦𑍍𑌯 𑌯𑍁𑌵𑌾𑌂 𑌕𑌰𑍍𑌤𑍁𑌂 𑌕𑌾𑌰𑍍𑌯𑌂 𑌤𑌸𑍍𑌯 𑌚𑌿𑌕𑍀𑌰𑍍𑌷𑌿𑌤𑌮𑍍 ॥ 1 ॥
𑌕𑍃𑌤𑌾𑌰𑍍𑌥𑍋 𑌵𑌾𑌽𑌕𑍃𑌤𑌾𑌰𑍍𑌥𑍋 𑌵𑌾 𑌕𑍃𑌤𑍍𑌯𑌂 𑌤𑌵 𑌕𑌰𑌿𑌷𑍍𑌯𑌤𑌿 ।
𑌸 𑌋𑌕𑍍𑌷𑌰𑌜𑌸𑌃 𑌪𑍁𑌤𑍍𑌰𑌃 𑌪𑌂𑌪𑌾𑌮𑌟𑌤𑌿 𑌶𑌂𑌕𑌿𑌤𑌃 ॥ 20 ॥
𑌭𑌾𑌸𑍍𑌕𑌰𑌸𑍍𑌯𑍌𑌰𑌸𑌃 𑌪𑍁𑌤𑍍𑌰𑍋 𑌵𑌾𑌲𑌿𑌨𑌾 𑌕𑍃𑌤𑌕𑌿𑌲𑍍𑌬𑌿𑌷𑌃 ।
𑌸𑌨𑍍𑌨𑌿𑌧𑌾𑌯𑌾𑌯𑍁𑌧𑌂 𑌕𑍍𑌷𑌿𑌪𑍍𑌰𑌮𑍃𑌷𑍍𑌯𑌮𑍂𑌕𑌾𑌲𑌯𑌂 𑌕𑌪𑌿𑌮𑍍 ॥ 21 ॥
𑌕𑍁𑌰𑍁 𑌰𑌾𑌘𑌵 𑌸𑌤𑍍𑌯𑍇𑌨 𑌵𑌯𑌸𑍍𑌯𑌂 𑌵𑌨𑌚𑌾𑌰𑌿𑌣𑌮𑍍 ।
𑌸 𑌹𑌿 𑌸𑍍𑌥𑌾𑌨𑌾𑌨𑌿 𑌸𑌰𑍍𑌵𑌾𑌣𑌿 𑌕𑌾𑌰𑍍𑌤𑍍𑌸𑍍𑌨𑍍𑌯𑍇𑌨 𑌕𑌪𑌿𑌕𑍁𑌂𑌜𑌰𑌃 ॥ 22 ॥
𑌨𑌰𑌮𑌾𑌂𑌸𑌾𑌶𑌿𑌨𑌾𑌂 𑌲𑍋𑌕𑍇 𑌨𑍈𑌪𑍁𑌣𑍍𑌯𑌾𑌦𑌧𑌿𑌗𑌚𑍍𑌛𑌤𑌿 ।
𑌨 𑌤𑌸𑍍𑌯𑌾𑌵𑌿𑌦𑌿𑌤𑌂 𑌲𑍋𑌕𑍇𑌕𑌿𑌂𑌚𑌿𑌦𑌸𑍍𑌤𑌿 𑌹𑌿 𑌰𑌾𑌘𑌵 ॥ 23 ॥
𑌯𑌾𑌵𑌤𑍍𑌸𑍂𑌰𑍍𑌯𑌃 𑌪𑍍𑌰𑌤𑌪𑌤𑌿 𑌸𑌹𑌸𑍍𑌰𑌾𑌂𑌶𑍁𑌰𑌰𑌿𑌂𑌦𑌮 ।
𑌸 𑌨𑌦𑍀𑌰𑍍𑌵𑌿𑌪𑍁𑌲𑌾𑌨𑍍𑌶𑍈𑌲𑌾𑌨𑍍 𑌗𑌿𑌰𑌿𑌦𑍁𑌰𑍍𑌗𑌾𑌣𑌿 𑌕𑌂𑌦𑌰𑌾𑌨𑍍 ॥ 24 ॥
𑌅𑌨𑍍𑌵𑍀𑌕𑍍𑌷𑍍𑌯 𑌵𑌾𑌨𑌰𑍈𑌸𑍍𑌸𑌾𑌰𑍍𑌧𑌂 𑌪𑌤𑍍𑌨𑍀𑌂 𑌤𑍇𑌽𑌧𑌿𑌗𑌮𑌿𑌷𑍍𑌯𑌤𑌿 ।
𑌵𑌾𑌨𑌰𑌾𑌂𑌶𑍍𑌚 𑌮𑌹𑌾𑌕𑌾𑌯𑌾𑌨𑍍𑌪𑍍𑌰𑍇𑌷𑌯𑌿𑌷𑍍𑌯𑌤𑌿 𑌰𑌾𑌘𑌵 ॥ 25 ॥
𑌦𑌿𑌶𑍋 𑌵𑌿𑌚𑍇𑌤𑍁𑌂 𑌤𑌾𑌂 𑌸𑍀𑌤𑌾𑌂 𑌤𑍍𑌵𑌦𑍍𑌵𑌿𑌯𑍋𑌗𑍇𑌨 𑌶𑍋𑌚𑌤𑍀𑌮𑍍 ।
𑌸 𑌜𑍍𑌞𑌾𑌸𑍍𑌯𑌤𑌿 𑌵𑌰𑌾𑌰𑍋𑌹𑌾𑌂 𑌨𑌿𑌰𑍍𑌮𑌲𑌾𑌂 𑌰𑌾𑌵𑌣𑌾𑌲𑌯𑍇 ॥ 26 ॥
𑌸 𑌮𑍇𑌰𑍁𑌶𑍃𑌂𑌗𑌾𑌗𑍍𑌰𑌗𑌤𑌾𑌮𑌨𑌿𑌂𑌦𑌿𑌤𑌾𑌂 𑌪𑍍𑌰𑌵𑌿𑌶𑍍𑌯 𑌪𑌾𑌤𑌾𑌲𑌤𑌲𑍇𑌽𑌪𑌿 𑌵𑌾 𑌶𑍍𑌰𑌿𑌤𑌾𑌮𑍍 ।
𑌪𑍍𑌲𑌵𑌂𑌗𑌮𑌾𑌨𑌾𑌂 𑌪𑍍𑌰𑌵𑌰𑌸𑍍𑌤𑌵 𑌪𑍍𑌰𑌿𑌯𑌾𑌂 𑌨𑌿𑌹𑌤𑍍𑌯 𑌰𑌕𑍍𑌷𑌾𑌂𑌸𑌿 𑌪𑍁𑌨𑌃 𑌪𑍍𑌰𑌦𑌾𑌸𑍍𑌯𑌤𑌿 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌦𑍍𑌵𑌿𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
