𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌦𑌶𑌸𑍍𑌸𑌰𑍍𑌗𑌃 ।
𑌅𑌥 𑌪𑌂𑌚𑌵𑌟𑍀𑌂 𑌗𑌚𑍍𑌛𑌨𑍍𑌨𑌂𑌤𑌰𑌾 𑌰𑌘𑍁𑌨𑌂𑌦𑌨𑌃 ।
𑌆𑌸𑌸𑌾𑌦 𑌮𑌹𑌾𑌕𑌾𑌯𑌂 𑌗𑍃𑌧𑍍𑌰𑌂 𑌭𑍀𑌮𑌪𑌰𑌾𑌕𑍍𑌰𑌮𑌮𑍍 ॥ 1 ॥
𑌤𑌂 𑌦𑍃𑌷𑍍𑌟𑍍𑌵𑌾 𑌤𑍌 𑌮𑌹𑌾𑌭𑌾𑌗𑍌 𑌵𑌟𑌸𑍍𑌥𑌂 𑌰𑌾𑌮𑌲𑌕𑍍𑌷𑍍𑌮𑌣𑍌 ।
𑌮𑍇𑌨𑌾𑌤𑍇 𑌰𑌾𑌕𑍍𑌷𑌸𑌂 𑌪𑌕𑍍𑌷𑌿𑌂 𑌬𑍍𑌰𑍁𑌵𑌾𑌣𑍌 𑌕𑍋 𑌭𑌵𑌾𑌨𑌿𑌤𑌿 ॥ 2 ॥
𑌸 𑌤𑍌 𑌮𑌧𑍁𑌰𑌯𑌾 𑌵𑌾𑌚𑌾 𑌸𑍌𑌮𑍍𑌯𑌯𑌾 𑌪𑍍𑌰𑍀𑌣𑌯𑌨𑍍𑌨𑌿𑌵 ।
𑌉𑌵𑌾𑌚 𑌵𑌤𑍍𑌸 𑌮𑌾𑌂 𑌵𑌿𑌦𑍍𑌧𑌿 𑌵𑌯𑌸𑍍𑌯𑌂 𑌪𑌿𑌤𑍁𑌰𑌾𑌤𑍍𑌮𑌨𑌃 ॥ 3 ॥
𑌸 𑌤𑌂 𑌪𑌿𑌤𑍃𑌸𑌖𑌂 𑌬𑍁𑌦𑍍𑌧𑍍𑌵𑌾 𑌪𑍂𑌜𑌯𑌾𑌮𑌾𑌸 𑌰𑌾𑌘𑌵𑌃 ।
𑌸 𑌤𑌸𑍍𑌯 𑌕𑍁𑌲𑌮𑌵𑍍𑌯𑌗𑍍𑌰𑌮𑌥 𑌪𑌪𑍍𑌰𑌚𑍍𑌛 𑌨𑌾𑌮 𑌚 ॥ 4 ॥
𑌰𑌾𑌮𑌸𑍍𑌯 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑌰𑍍𑌵𑌭𑍂𑌤𑌸𑌮𑍁𑌦𑍍𑌭𑌵𑌮𑍍 ।
𑌆𑌚𑌚𑌕𑍍𑌷𑍇 𑌦𑍍𑌵𑌿𑌜𑌸𑍍𑌤𑌸𑍍𑌮𑍈 𑌕𑍁𑌲𑌮𑌾𑌤𑍍𑌮𑌾𑌨𑌮𑍇𑌵 𑌚 ॥ 5 ॥
𑌪𑍂𑌰𑍍𑌵𑌕𑌾𑌲𑍇 𑌮𑌹𑌾𑌬𑌾𑌹𑍋 𑌯𑍇 𑌪𑍍𑌰𑌜𑌾𑌪𑌤𑌯𑍋𑌽𑌭𑌵𑌨𑍍 ।
𑌤𑌾𑌨𑍍𑌮𑍇 𑌨𑌿𑌗𑌦𑌤𑌸𑍍𑌸𑌰𑍍𑌵𑌾𑌨𑌾𑌦𑌿𑌤𑌶𑍍𑌶𑍃𑌣𑍁 𑌰𑌾𑌘𑌵 ॥ 6 ॥
𑌕𑌰𑍍𑌦𑌮𑌃 𑌪𑍍𑌰𑌥𑌮𑌸𑍍𑌤𑍇𑌷𑌾𑌂 𑌵𑌿𑌕𑍍𑌰𑍀𑌤𑌸𑍍𑌤𑌦𑌨𑌂𑌤𑌰𑌃 ।
𑌶𑍇𑌷𑌶𑍍𑌚 𑌸𑌂𑌶𑍍𑌰𑌯𑌶𑍍𑌚𑍈𑌵 𑌬𑌹𑍁𑌪𑍁𑌤𑍍𑌰𑌶𑍍𑌚 𑌵𑍀𑌰𑍍𑌯𑌵𑌾𑌨𑍍 ॥ ॥
𑌸𑍍𑌥𑌾𑌣𑍁𑌰𑍍𑌮𑌰𑍀𑌚𑌿𑌰𑌤𑍍𑌰𑌿𑌶𑍍𑌚 𑌕𑍍𑌰𑌤𑍁𑌶𑍍𑌚𑍈𑌵 𑌮𑌹𑌾𑌬𑌲𑌃 ।
𑌪𑍁𑌲𑌸𑍍𑌤𑍍𑌯𑌶𑍍𑌚𑌾𑌂𑌗𑌿𑌰𑌾𑌶𑍍𑌚𑍈𑌵 𑌪𑍍𑌰𑌚𑍇𑌤𑌾𑌃 𑌪𑍂𑌲𑌹𑌸𑍍𑌤𑌥𑌾 ॥ ॥
𑌦𑌕𑍍𑌷𑍋 𑌵𑌿𑌵𑌸𑍍𑌵𑌾𑌨𑌪𑌰𑍋𑌽𑌰𑌿𑌷𑍍𑌟𑌨𑍇𑌮𑌿𑌶𑍍𑌚 𑌰𑌾𑌘𑌵 ।
𑌕𑌾𑌶𑍍𑌯𑌪𑌶𑍍𑌚 𑌮𑌹𑌾𑌤𑍇𑌜𑌾𑌸𑍍𑌤𑍇𑌷𑌾𑌮𑌾𑌸𑍀𑌚𑍍𑌚 𑌪𑌶𑍍𑌚𑌿𑌮𑌃 ॥ ॥
𑌪𑍍𑌰𑌜𑌾𑌪𑌤𑍇𑌸𑍍𑌤𑍁 𑌦𑌕𑍍𑌷𑌸𑍍𑌯 𑌬𑌭𑍂𑌵𑍁𑌰𑌿𑌤𑌿 𑌵𑌿𑌶𑍍𑌰𑍁𑌤𑌮𑍍 ।
𑌷𑌷𑍍𑌟𑌿𑌰𑍍𑌦𑍁𑌹𑌿𑌤𑌰𑍋 𑌰𑌾𑌮 𑌯𑌶𑌸𑍍𑌵𑌿𑌨𑍍𑌯𑍋 𑌮𑌹𑌾𑌯𑌶𑌃 ॥ 10 ॥
𑌕𑌾𑌶𑍍𑌯𑌪𑌃 𑌪𑍍𑌰𑌤𑌿𑌜𑌗𑍍𑌰𑌾𑌹 𑌤𑌾𑌸𑌾𑌮𑌷𑍍𑌟𑍌 𑌸𑍁𑌮𑌧𑍍𑌯𑌮𑌾𑌃 ।
𑌅𑌦𑌿𑌤𑌿𑌂 𑌚 𑌦𑌿𑌤𑌿𑌂 𑌚𑍈𑌵 𑌦𑌨𑍁𑌮𑌪𑍍𑌯𑌥 𑌕𑌾𑌲𑌿𑌕𑌾𑌮𑍍 ॥ 11 ॥
𑌤𑌾𑌮𑍍𑌰𑌾𑌂 𑌕𑍍𑌰𑍋𑌧𑌵𑌶𑌾𑌂 𑌚𑍈𑌵 𑌮𑌨𑍁𑌂 𑌚𑌾𑌪𑍍𑌯𑌨𑌲𑌾𑌮𑌪𑌿 ।
𑌤𑌾𑌸𑍍𑌤𑍁 𑌕𑌨𑍍𑌯𑌾𑌸𑍍𑌤𑌤𑌃 𑌪𑍍𑌰𑍀𑌤𑌃 𑌕𑌾𑌶𑍍𑌯𑌪𑌃 𑌪𑍁𑌨𑌰𑌬𑍍𑌰𑌵𑍀𑌤𑍍 ॥ 12 ॥
𑌪𑍁𑌤𑍍𑌰𑌾𑌂 𑌸𑍍𑌸𑍍𑌰𑍈𑌲𑍋𑌕𑍍𑌯𑌭𑌰𑍍𑌤𑍃𑌨𑍍𑌵𑍈 𑌜𑌨𑌯𑌿𑌷𑍍𑌯𑌥 𑌮𑌤𑍍𑌸𑌮𑌾𑌨𑍍 ।
𑌅𑌦𑌿𑌤𑌿𑌸𑍍𑌤𑌨𑍍𑌮𑌨𑌾 𑌰𑌾𑌮 𑌦𑌿𑌤𑌿𑌶𑍍𑌚 𑌮𑌨𑍁𑌜𑌰𑍍𑌷𑌭 ॥ 13 ॥
𑌕𑌾𑌲𑌿𑌕𑌾 𑌚 𑌮𑌹𑌾𑌬𑌾𑌹𑍋 𑌶𑍇𑌷𑌾𑌸𑍍𑌤𑍍𑌵𑌮𑌨𑌸𑍋𑌽𑌭𑌵𑌨𑍍 ।
𑌅𑌦𑌿𑌤𑍍𑌯𑌾𑌂 𑌜𑌜𑍍𑌞𑌿𑌰𑍇 𑌦𑍇𑌵𑌾𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑌦𑌰𑌿𑌂𑌦𑌮 ॥ 14 ॥
𑌆𑌦𑌿𑌤𑍍𑌯𑌾 𑌵𑌸𑌵𑍋 𑌰𑍁𑌦𑍍𑌰𑌾 𑌹𑍍𑌯𑌶𑍍𑌵𑌿𑌨𑍌 𑌚 𑌪𑌰𑌂𑌤𑌪 ।
𑌦𑌿𑌤𑌿𑌸𑍍𑌤𑍍𑌵𑌜𑌨𑌯𑌤𑍍𑌪𑍁𑌤𑍍𑌰𑌾𑌨𑍍 𑌦𑍈𑌤𑍍𑌯𑌾𑌂𑌸𑍍𑌤𑌾𑌤 𑌯𑌶𑌸𑍍𑌵𑌿𑌨𑌃 ॥ 15 ॥
𑌤𑍇𑌷𑌾𑌮𑌿𑌯𑌂 𑌵𑌸𑍁𑌮𑌤𑍀 𑌪𑍁𑌰𑌾𑌽𑌸𑍀𑌤𑍍𑌸𑌵𑌨𑌾𑌰𑍍𑌣𑌵𑌾 ।
𑌦𑌨𑍁𑌸𑍍𑌤𑍍𑌵𑌜𑌨𑌯𑌤𑍍𑌪𑍁𑌤𑍍𑌰𑌮𑌶𑍍𑌵𑌗𑍍𑌰𑍀𑌵𑌮𑌰𑌿𑌂𑌦𑌮 ॥ 16 ॥
𑌨𑌰𑌕𑌂 𑌕𑌾𑌲𑌕𑌂𑌚𑍈𑌵 𑌕𑌾𑌲𑌿𑌕𑌾𑌪𑌿 𑌵𑍍𑌯𑌜𑌾𑌯𑌤 ।
𑌕𑍍𑌰𑍌𑌂𑌚𑍀𑌂 𑌭𑌾𑌸𑍀𑌂 𑌤𑌥𑌾 𑌶𑍍𑌯𑍇𑌨𑍀𑌂 𑌧𑍃𑌤𑌰𑌾𑌷𑍍𑌟𑍍𑌰𑍀𑌂 𑌤𑌥𑌾 𑌶𑍁𑌕𑍀𑌮𑍍 ॥ 1 ॥
𑌤𑌾𑌮𑍍𑌰𑌾𑌪𑌿 𑌸𑍁𑌷𑍁𑌵𑍇 𑌕𑌨𑍍𑌯𑌾𑌃 𑌪𑌂𑌚𑍈𑌤𑌾 𑌲𑍋𑌕𑌵𑌿𑌶𑍍𑌰𑍁𑌤𑌾𑌃 ।
𑌉𑌲𑍂𑌕𑌾𑌂𑌜𑌨𑌯𑌤𑍍𑌕𑍍𑌰𑍌𑌂𑌚𑍀 𑌭𑌾𑌸𑍀 𑌭𑌾𑌸𑌾𑌨𑍍𑌵𑍍𑌯𑌜𑌾𑌯𑌤 ॥ 1 ॥
𑌶𑍍𑌯𑍇𑌨𑍀 𑌶𑍍𑌯𑍇𑌨𑌾𑌂𑌶𑍍𑌚 𑌗𑍃𑌧𑍍𑌰𑌾𑌂𑌶𑍍𑌚 𑌵𑍍𑌯𑌜𑌾𑌯𑌤 𑌸𑍁𑌤𑍇𑌜𑌸𑌃 ।
𑌧𑍃𑌤𑌰𑌾𑌷𑍍𑌟𑍍𑌰𑍀𑌤𑍁 𑌹𑌂𑌸𑌾𑌂𑌶𑍍𑌚 𑌕𑌲𑌹𑌂𑌸𑌾𑌂𑌶𑍍𑌚 𑌸𑌰𑍍𑌵𑌶𑌃 ॥ 1 ॥
𑌚𑌕𑍍𑌰𑌵𑌾𑌕𑌾𑌂𑌶𑍍𑌚 𑌭𑌦𑍍𑌰𑌂 𑌤𑍇 𑌵𑌿𑌜𑌜𑍍𑌞𑍇 𑌸𑌾𑌪𑌿 𑌭𑌾𑌮𑌿𑌨𑍀 ।
𑌶𑍁𑌕𑍀 𑌨𑌤𑌾𑌂 𑌵𑌿𑌜𑌜𑍍𑌞𑍇 𑌤𑍁 𑌨𑌤𑌾𑌯𑌾 𑌵𑌿𑌨𑌤𑌾 𑌸𑍁𑌤𑌾 ॥ 20 ॥
𑌦𑌶 𑌕𑍍𑌰𑍋𑌧𑌵𑌶𑌾 𑌰𑌾𑌮 𑌵𑌿𑌜𑌜𑍍𑌞𑍇 𑌹𑍍𑌯𑌾𑌤𑍍𑌮𑌸𑌂𑌭𑌵𑌾𑌃 ।
𑌮𑍃𑌗𑍀𑌂 𑌚 𑌮𑍃𑌗𑌮𑌂𑌦𑌾𑌂 𑌚 𑌹𑌰𑍀𑌂 𑌭𑌦𑍍𑌰𑌮𑌦𑌾𑌮𑌪𑌿 ॥ 21 ॥
𑌮𑌾𑌤𑌂𑌗𑍀𑌮𑌪𑌿 𑌶𑌾𑌰𑍍𑌦𑍂𑌲𑍀𑌂 𑌶𑍍𑌵𑍇𑌤𑌾𑌂 𑌚 𑌸𑍁𑌰𑌭𑌿𑌂 𑌤𑌥𑌾 ।
𑌸𑌰𑍍𑌵𑌲𑌕𑍍𑌷𑌣𑌸𑌂𑌪𑌨𑍍𑌨𑌾𑌂 𑌸𑍁𑌰𑌸𑌾𑌂 𑌕𑌦𑍍𑌰𑍁𑌕𑌾𑌮𑌪𑌿 ॥ 22 ॥
𑌅𑌪𑌤𑍍𑌯𑌂 𑌤𑍁 𑌮𑍃𑌗𑌾𑌸𑍍𑌸𑌰𑍍𑌵𑍇 𑌮𑍃𑌗𑍍𑌯𑌾 𑌨𑌰𑌵𑌰𑍋𑌤𑍍𑌤𑌮 ।
𑌋𑌕𑍍𑌷𑌾𑌶𑍍𑌚 𑌮𑍃𑌗𑌮𑌂𑌦𑌾𑌯𑌾𑌸𑍍𑌸𑍃𑌮𑌰𑌾𑌶𑍍𑌚𑌮𑌰𑌾 𑌸𑍍𑌤𑌥𑌾 ॥ 23 ॥
𑌹𑌰𑍍𑌯𑌾𑌶𑍍𑌚 𑌹𑌰𑌯𑍋𑌽𑌪𑌤𑍍𑌯𑌂 𑌵𑌾𑌨𑌰𑌾𑌶𑍍𑌚 𑌤𑌰𑌸𑍍𑌸𑍍𑌵𑌿𑌨𑌃 ।
𑌤𑌤𑌸𑍍𑌤𑍍𑌵𑌿𑌰𑌾𑌵𑌤𑍀𑌂 𑌨𑌾𑌮 𑌜𑌜𑍍𑌞𑍇 𑌭𑌦𑍍𑌰𑌮𑌦𑌾 𑌸𑍁𑌤𑌾𑌮𑍍 ॥ 24 ॥
𑌤𑌸𑍍𑌯𑌾𑌸𑍍𑌤𑍍𑌵𑍈𑌰𑌾𑌵𑌤𑌃 𑌪𑍁𑌤𑍍𑌰𑍋 𑌲𑍋𑌕𑌨𑌾𑌥𑍋 𑌮𑌹𑌾𑌗𑌜𑌃 ।
𑌮𑌾𑌤𑌂𑌗𑍍𑌯𑌾 𑌸𑍍𑌤𑍍𑌵𑌥 𑌮𑌾𑌤𑌂𑌗𑌾 𑌅𑌪𑌤𑍍𑌯𑌂 𑌮𑌨𑍁𑌜𑌰𑍍𑌷𑌭 ॥ 25 ॥
𑌗𑍋𑌲𑌾𑌂𑌗𑍂𑌲𑌾𑌂𑌶𑍍𑌚 𑌶𑌾𑌰𑍍𑌦𑍂𑌲𑍀 𑌵𑍍𑌯𑌾𑌘𑍍𑌰𑌾𑌂𑌶𑍍𑌚𑌾𑌜𑌨𑌯𑌤𑍍𑌸𑍁𑌤𑌾𑌨𑍍 ।
𑌦𑌿𑌶𑌾𑌗𑌜𑌾𑌂𑌶𑍍𑌚 𑌕𑌾𑌕𑍁𑌤𑍍𑌸𑍍𑌥 𑌶𑍍𑌵𑍇𑌤𑌾𑌪𑍍𑌯𑌜𑌨𑌯𑌤𑍍𑌸𑍁𑌤𑌾𑌨𑍍 ॥ 26 ॥
𑌤𑌤𑍋 𑌦𑍁𑌹𑌿𑌤𑌰𑍌 𑌰𑌾𑌮 𑌸𑍁𑌰𑌭𑌿𑌰𑍍𑌦𑍍𑌵𑍇𑌵𑍍𑌯𑌜𑌾𑌯𑌤 ।
𑌰𑍋𑌹𑌿𑌣𑍀𑌂 𑌨𑌾𑌮 𑌭𑌦𑍍𑌰𑌂 𑌤𑍇 𑌗𑌂𑌧𑌰𑍍𑌵𑍀𑌂 𑌚 𑌯𑌶𑌸𑍍𑌸𑍍𑌵𑌿𑌨𑍀𑌮𑍍 ॥ 2 ॥
𑌰𑍋𑌹𑌿𑌣𑍍𑌯𑌜𑌨𑌯𑌦𑍍 𑌗𑌾𑌵𑍋 𑌗𑌂𑌧𑌰𑍍𑌵𑍀 𑌵𑌾𑌜𑌿𑌨𑌃 𑌸𑍁𑌤𑌾𑌨𑍍 ।
𑌸𑍁𑌰𑌸𑌾𑌽𑌜𑌨𑌯𑌨𑍍𑌨𑌾𑌗𑌾𑌨𑍍𑌰𑌾𑌮 𑌕𑌦𑍍𑌰𑍂𑌸𑍍𑌤𑍁 𑌪𑌨𑍍𑌨𑌗𑌾𑌨𑍍 ॥ 2 ॥
𑌮𑌨𑍁𑌰𑍍𑌮𑌨𑍁𑌷𑍍𑌯𑌾𑌨𑍍 𑌜𑌨𑌯𑌦𑍍𑌰𑌾𑌮 𑌪𑍁𑌤𑍍𑌰𑌾𑌨𑍍 𑌯𑌶𑌸𑍍𑌵𑌿𑌨𑌃 ।
𑌬𑍍𑌰𑌾𑌹𑍍𑌮𑌣𑌾𑌨𑍍 𑌕𑍍𑌷𑌤𑍍𑌰𑌿𑌯𑌾𑌨𑍍 𑌵𑍈𑌶𑍍𑌯𑌾𑌨𑍍 𑌶𑍂𑌦𑍍𑌰𑌾𑌂𑌶𑍍𑌚 𑌮𑌨𑍁𑌜𑌰𑍍𑌷𑌭 ॥ 2 ॥
𑌸𑌰𑍍𑌵𑌾𑌨𑍍 𑌪𑍁𑌣𑍍𑌯𑌫𑌲𑌾𑌨𑍍𑌵𑍃𑌕𑍍𑌷𑌾𑌨𑌨𑌲𑌾𑌪𑌿 𑌵𑍍𑌯𑌜𑌾𑌯𑌤 ।
𑌵𑌿𑌨𑌤𑌾 𑌚 𑌶𑍁𑌕𑍀𑌪𑍌𑌤𑍍𑌰𑍀 𑌕𑌦𑍍𑌰𑍂𑌶𑍍𑌚 𑌸𑍁𑌰𑌸𑌾𑌸𑍍𑌵𑌸𑌾 ॥ 30 ॥
𑌕𑌦𑍍𑌰𑍂𑌰𑍍𑌨𑌾𑌗𑌂 𑌸𑌹𑌸𑍍𑌰𑌾𑌸𑍍𑌯𑌂 𑌵𑌿𑌜𑌜𑍍𑌞𑍇 𑌧𑌰𑌣𑍀𑌧𑌰𑌮𑍍 ।
𑌦𑍍𑌵𑍌 𑌪𑍁𑌤𑍍𑌰𑍌 𑌵𑌿𑌨𑌤𑌾𑌯𑌾𑌸𑍍𑌤𑍁 𑌗𑌰𑍁𑌡𑍋𑌽𑌰𑍁𑌣 𑌏𑌵 𑌚 ॥ 31 ॥
𑌤𑌸𑍍𑌮𑌾𑌜𑍍𑌜𑌾𑌤𑍋𑌽𑌹𑌮𑌰𑍁𑌣𑌾𑌤𑍍𑌸𑌂𑌪𑌾𑌤𑌿𑌸𑍍𑌤𑍁 𑌮𑌮𑌾𑌗𑍍𑌰𑌜𑌃 ।
𑌜𑌟𑌾𑌯𑍁𑌰𑌿𑌤𑌿 𑌮𑌾𑌂 𑌵𑌿𑌦𑍍𑌧𑌿 𑌶𑍍𑌯𑍇𑌨𑍀𑌪𑍁𑌤𑍍𑌰𑌮𑌰𑌿𑌂𑌦𑌮 ॥ 32 ॥
𑌸𑍋𑌽𑌹𑌂 𑌵𑌾𑌸𑌸𑌹𑌾𑌯𑌸𑍍𑌤𑍇 𑌭𑌵𑌿𑌷𑍍𑌯𑌾𑌮𑌿 𑌯𑌦𑍀𑌚𑍍𑌛𑌸𑌿 ।
𑌇𑌦𑌂 𑌦𑍁𑌰𑍍𑌗𑌂 𑌹𑌿 𑌕𑌾𑌂𑌤𑌾𑌰𑌂 𑌮𑍃𑌗𑌰𑌾𑌕𑍍𑌷𑌸 𑌸𑍇𑌵𑌿𑌤𑌮𑍍 ॥ 33 ॥
𑌸𑍀𑌤𑌾𑌂 𑌚 𑌤𑌾𑌤 𑌰𑌕𑍍𑌷𑌿𑌷𑍍𑌯𑍇 𑌤𑍍𑌵𑌯𑌿 𑌯𑌾𑌤𑍇 𑌸𑌲𑌕𑍍𑌷𑍍𑌮𑌣𑍇 ।
𑌜𑌟𑌾𑌯𑍁𑌷𑌂 𑌤𑌂 𑌪𑍍𑌰𑌤𑌿𑌪𑍂𑌜𑍍𑌯 𑌰𑌾𑌘𑌵𑍋 𑌮𑍁𑌦𑌾 𑌪𑌰𑌿𑌷𑍍𑌵𑌜𑍍𑌯 𑌚 𑌸𑌨𑍍𑌨𑌤𑍋𑌽𑌭𑌵𑌤𑍍 ।
𑌪𑌿𑌤𑍁𑌰𑍍𑌹𑌿 𑌶𑍁𑌶𑍍𑌰𑌾𑌵 𑌸𑌖𑌿𑌤𑍍𑌵𑌮𑌾𑌤𑍍𑌮𑌵𑌾𑌨𑍍 𑌜𑌟𑌾𑌯𑍁𑌷𑌾 𑌸𑌂𑌕𑌥𑌿𑌤𑌂 𑌪𑍁𑌨𑌃 𑌪𑍁𑌨𑌃 ॥ 34 ॥
𑌸 𑌤𑌤𑍍𑌰 𑌸𑍀𑌤𑌾𑌂 𑌪𑌰𑌿𑌦𑌾𑌯 𑌮𑍈𑌥𑌿𑌲𑍀𑌂 𑌸𑌹𑍈𑌵 𑌤𑍇𑌨𑌾𑌤𑌿𑌬𑌲𑍇𑌨 𑌪𑌕𑍍𑌷𑌿𑌣𑌾 ।
𑌜𑌗𑌾𑌮 𑌤𑌾𑌂 𑌪𑌂𑌚𑌵𑌟𑍀𑌂 𑌸𑌲𑌕𑍍𑌷𑍍𑌮𑌣𑍋 𑌰𑌿𑌪𑍂𑌂𑌦𑌿𑌧𑌕𑍍𑌷𑌂𑌛𑌲𑌭𑌾𑌨𑌿 𑌵𑌾𑌨𑌲𑌃 ॥ 35 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌚𑌤𑍁𑌰𑍍𑌦𑌶𑌸𑍍𑌸𑌰𑍍𑌗𑌃 ॥
