𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌅𑌭𑌿𑌷𑌿𑌕𑍍𑌤𑍇 𑌤𑍁 𑌸𑍁𑌗𑍍𑌰𑍀𑌵𑍇 𑌪𑍍𑌰𑌵𑌿𑌷𑍍𑌟𑍇 𑌵𑌾𑌨𑌰𑍇 𑌗𑍁𑌹𑌾𑌮𑍍 ।
𑌆𑌜𑌗𑌾𑌮 𑌸𑌹 𑌭𑍍𑌰𑌾𑌤𑍍𑌰𑌾 𑌰𑌾𑌮𑌃 𑌪𑍍𑌰𑌸𑍍𑌰𑌵𑌣𑌂 𑌗𑌿𑌰𑌿𑌮𑍍 ॥ 1 ॥
𑌶𑌾𑌰𑍍𑌦𑍂𑌲𑌮𑍃𑌗𑌸𑌂𑌘𑍁𑌷𑍍𑌟𑌂 𑌸𑌿𑌂𑌹𑍈𑌰𑍍𑌭𑍀𑌮𑌰𑌵𑍈𑌰𑍍𑌵𑍃𑌤𑌮𑍍 ।
𑌨𑌾𑌨𑌾𑌗𑍁𑌲𑍍𑌮𑌲𑌤𑌾𑌗𑍂𑌢𑌂 𑌬𑌹𑍁𑌪𑌾𑌦𑌪𑌸𑌂𑌕𑍁𑌲𑌮𑍍 ॥ 2 ॥
𑌋𑌕𑍍𑌷𑌵𑌾𑌨𑌰𑌗𑍋𑌪𑍁𑌚𑍍𑌛𑍈𑌰𑍍𑌮𑌾𑌰𑍍𑌜𑌾𑌰𑍈𑌶𑍍𑌚 𑌨𑌿𑌷𑍇𑌵𑌿𑌤𑌮𑍍 ।
𑌮𑍇𑌘𑌰𑌾𑌶𑌿𑌨𑌿𑌭𑌂 𑌶𑍈𑌲𑌂 𑌨𑌿𑌤𑍍𑌯𑌂 𑌶𑍁𑌚𑌿𑌜𑌲𑌾𑌶𑌯𑌮𑍍 ॥ 3 ॥
𑌤𑌸𑍍𑌯 𑌶𑍈𑌲𑌸𑍍𑌯 𑌶𑌿𑌖𑌰𑍇 𑌮𑌹𑌤𑍀𑌮𑌾𑌯𑌤𑌾𑌂 𑌗𑍁𑌹𑌾𑌮𑍍 ।
𑌪𑍍𑌰𑌤𑍍𑌯𑌗𑍃𑌹𑍍𑌣𑌤 𑌵𑌾𑌸𑌾𑌰𑍍𑌥𑌂 𑌰𑌾𑌮𑌸𑍍𑌸𑍌𑌮𑌿𑌤𑍍𑌰𑌿𑌣𑌾 𑌸𑌹 ॥ 4 ॥
𑌕𑍃𑌤𑍍𑌵𑌾 𑌚 𑌸𑌮𑌯𑌂 𑌰𑌾𑌮𑌸𑍍𑌸𑍁𑌗𑍍𑌰𑍀𑌵𑍇𑌣 𑌸𑌹𑌾𑌨𑌘𑌃 ।
𑌕𑌾𑌲𑌯𑍁𑌕𑍍𑌤𑌂 𑌮𑌹𑌦𑍍𑌵𑌾𑌕𑍍𑌯𑌮𑍁𑌵𑌾𑌚 𑌰𑌘𑍁𑌨𑌂𑌦𑌨𑌃 ॥ 5 ॥
𑌵𑌿𑌨𑍀𑌤𑌂 𑌭𑍍𑌰𑌾𑌤𑌰𑌂 𑌭𑍍𑌰𑌾𑌤𑌾 𑌲𑌕𑍍𑌷𑍍𑌮𑌣𑌂 𑌲𑌕𑍍𑌷𑍍𑌮𑌿𑌵𑌰𑍍𑌧𑌨𑌮𑍍 ।
𑌇𑌯𑌂 𑌗𑌿𑌰𑌿𑌗𑍁𑌹𑌾 𑌰𑌮𑍍𑌯𑌾 𑌵𑌿𑌶𑌾𑌲𑌾 𑌯𑍁𑌕𑍍𑌤𑌮𑌾𑌰𑍁𑌤𑌾 ।
𑌅𑌸𑍍𑌯𑌾𑌂 𑌵𑌤𑍍𑌸𑍍𑌯𑌾𑌮 𑌸𑍌𑌮𑌿𑌤𑍍𑌰𑍇 𑌵𑌰𑍍𑌷𑌰𑌾𑌤𑍍𑌰𑌮𑌰𑌿𑌂𑌦𑌮 ॥ 6 ॥
𑌗𑌿𑌰𑌿𑌶𑍃𑌂𑌗𑌮𑌿𑌦𑌂 𑌰𑌮𑍍𑌯𑌮𑍁𑌨𑍍𑌨𑌤𑌂 𑌪𑌾𑌰𑍍𑌥𑌿𑌵𑌾𑌤𑍍𑌮𑌜 ॥ ॥
𑌶𑍍𑌵𑍇𑌤𑌾𑌭𑌿𑌃 𑌕𑍃𑌷𑍍𑌣𑌤𑌾𑌮𑍍𑌰𑌾𑌭𑌿𑌶𑍍𑌶𑌿𑌲𑌾𑌭𑌿𑌰𑍁𑌪𑌶𑍋𑌭𑌿𑌤𑌮𑍍 ।
𑌨𑌾𑌨𑌾𑌧𑌾𑌤𑍁𑌸𑌮𑌾𑌕𑍀𑌰𑍍𑌣𑌂 𑌦𑌰𑍀𑌨𑌿𑌰𑍍𑌝𑌰𑌶𑍋𑌭𑌿𑌤𑌮𑍍 ॥ ॥
𑌵𑌿𑌵𑌿𑌧𑍈𑌰𑍍𑌵𑍃𑌕𑍍𑌷𑌷𑌂𑌡𑍈𑌶𑍍𑌚 𑌚𑌾𑌰𑍁𑌚𑌿𑌤𑍍𑌰𑌲𑌤𑌾𑌯𑍁𑌤𑌮𑍍 ।
𑌨𑌾𑌨𑌾𑌵𑌿𑌹𑌗𑌸𑌂𑌘𑍁𑌷𑍍𑌟𑌂 𑌮𑌯𑍂𑌰𑌰𑌵𑌨𑌾𑌦𑌿𑌤𑌮𑍍 ॥ ॥
𑌮𑌾𑌲𑌤𑍀𑌕𑍁𑌂𑌦𑌗𑍁𑌲𑍍𑌮𑍈𑌶𑍍𑌚 𑌸𑌿𑌂𑌧𑍁𑌵𑌾𑌰𑍈𑌶𑍍𑌶𑌿𑌰𑍀𑌷𑌕𑍈𑌃 ।
𑌕𑌦𑌂𑌬𑌾𑌰𑍍𑌜𑍁𑌨𑌸𑌰𑍍𑌜𑍈𑌶𑍍𑌚 𑌪𑍁𑌷𑍍𑌪𑌿𑌤𑍈𑌰𑍁𑌪𑌶𑍋𑌭𑌿𑌤𑌮𑍍 ॥ 10 ॥
𑌇𑌯𑌂 𑌚 𑌨𑌲𑌿𑌨𑍀 𑌰𑌮𑍍𑌯𑌾 𑌫𑍁𑌲𑍍𑌲𑌪𑌂𑌕𑌜𑌮𑌂𑌡𑌿𑌤𑌾 ।
𑌨𑌾𑌤𑌿𑌦𑍂𑌰𑍇 𑌗𑍁𑌹𑌾𑌯𑌾𑌨𑍌 𑌭𑌵𑌿𑌷𑍍𑌯𑌤𑌿 𑌨𑍃𑌪𑌾𑌤𑍍𑌮𑌜 ॥ 11 ॥
𑌪𑍍𑌰𑌾𑌗𑍁𑌦𑌕𑍍𑌪𑍍𑌰𑌵𑌣𑍇 𑌦𑍇𑌶𑍇 𑌗𑍁𑌹𑌾 𑌸𑌾𑌧𑍁 𑌭𑌵𑌿𑌷𑍍𑌯𑌤𑌿 ।
𑌪𑌶𑍍𑌚𑌾𑌚𑍍𑌚𑍈𑌵𑍋𑌨𑍍𑌨𑌤𑌾 𑌸𑍌𑌮𑍍𑌯 𑌨𑌿𑌵𑌾𑌤𑍇𑌯𑌂 𑌭𑌵𑌿𑌷𑍍𑌯𑌤𑌿 ॥ 12 ॥
𑌗𑍁𑌹𑌾𑌦𑍍𑌵𑌾𑌰𑍇 𑌚 𑌸𑍌𑌮𑌿𑌤𑍍𑌰𑍇 𑌶𑌿𑌲𑌾 𑌸𑌮𑌤𑌲𑌾 𑌶𑍁𑌭𑌾 ।
𑌶𑍍𑌲𑌕𑍍𑌷𑍍𑌣𑌾 𑌚𑍈𑌵𑌾𑌯𑌤𑌾 𑌚𑍈𑌵 𑌭𑌿𑌨𑍍𑌨𑌾𑌂𑌜𑌨𑌚𑌯𑍋𑌪𑌮𑌾 ॥ 13 ॥
𑌗𑌿𑌰𑌿𑌶𑍃𑌂𑌗𑌮𑌿𑌦𑌂 𑌤𑌾𑌤 𑌪𑌶𑍍𑌯 𑌚𑍋𑌤𑍍𑌤𑌰𑌤𑌃 𑌶𑍁𑌭𑌮𑍍 ।
𑌭𑌿𑌨𑍍𑌨𑌾𑌂𑌜𑌨𑌚𑌯𑌾𑌕𑌾𑌰𑌮𑌂𑌭𑍋𑌧𑌰𑌮𑌿𑌵𑍋𑌤𑍍𑌥𑌿𑌤𑌮𑍍 ॥ 14 ॥
𑌦𑌕𑍍𑌷𑌿𑌣𑌸𑍍𑌯𑌾𑌮𑌪𑌿 𑌦𑌿𑌶𑌿 𑌸𑍍𑌥𑌿𑌤𑌂 𑌶𑍍𑌵𑍇𑌤𑌮𑌿𑌵𑌾𑌪𑌰𑌮𑍍 ।
𑌕𑍈𑌲𑌾𑌸𑌶𑌿𑌖𑌰𑌪𑍍𑌰𑌖𑍍𑌯𑌂 𑌨𑌾𑌨𑌾𑌧𑌾𑌤𑍁𑌵𑌿𑌭𑍂𑌷𑌿𑌤𑌮𑍍 ॥ 15 ॥
𑌪𑍍𑌰𑌾𑌚𑍀𑌨𑌵𑌾𑌹𑌿𑌨𑍀𑌂 𑌚𑍈𑌵 𑌨𑌦𑍀𑌂 𑌭𑍃𑌶𑌮𑌕𑌰𑍍𑌦𑌮𑌾𑌮𑍍 ।
𑌗𑍁𑌹𑌾𑌯𑌾𑌃 𑌪𑍂𑌰𑍍𑌵𑌤𑌃 𑌪𑌶𑍍𑌯 𑌤𑍍𑌰𑌿𑌕𑍂𑌟𑍇 𑌜𑌾𑌹𑍍𑌨𑌵𑍀𑌮𑌿𑌵 ॥ 16 ॥
𑌚𑌂𑌦𑌨𑍈𑌸𑍍𑌤𑌿𑌲𑌕𑍈𑌸𑍍𑌤𑌾𑌲𑍈𑌸𑍍𑌤𑌮𑌾𑌲𑍈𑌰𑌤𑌿𑌮𑍁𑌕𑍍𑌤𑌕𑍈𑌃 ।
𑌪𑌦𑍍𑌮𑌕𑍈𑌃 𑌸𑌰𑌲𑍈𑌶𑍍𑌚𑍈𑌵 𑌅𑌶𑍋𑌕𑍈𑌶𑍍𑌚𑍈𑌵 𑌶𑍋𑌭𑌿𑌤𑌾𑌮𑍍 ॥ 1 ॥
𑌵𑌾𑌨𑍀𑌰𑍈𑌸𑍍𑌤𑌿𑌮𑌿𑌶𑍈𑌶𑍍𑌚𑍈𑌵 𑌵𑌕𑍁𑌲𑍈𑌃 𑌕𑍇𑌤𑌕𑍈𑌰𑍍𑌧𑌵𑍈𑌃 ।
𑌹𑌿𑌂𑌤𑌾𑌲𑍈𑌸𑍍𑌤𑌿𑌨𑌿𑌶𑍈𑌰𑍍𑌨𑍀𑌪𑍈𑌰𑍍𑌵𑍇𑌤𑍍𑌰𑌕𑍈𑌃 𑌕𑍃𑌤𑌮𑌾𑌲𑌕𑍈𑌃 ॥ 1 ॥
𑌤𑍀𑌰𑌜𑍈𑌶𑍍𑌶𑍋𑌭𑌿𑌤𑌾 𑌭𑌾𑌤𑌿 𑌨𑌾𑌨𑌾𑌰𑍂𑌪𑍈 𑌸𑍍𑌤𑌤𑌸𑍍𑌤𑌤𑌃 ।
𑌵𑌸𑌨𑌾𑌭𑌰𑌣𑍋𑌪𑍇𑌤𑌾 𑌪𑍍𑌰𑌮𑌦𑍇𑌵𑌾𑌭𑍍𑌯𑌲𑌂𑌕𑍃𑌤𑌾 ॥ 1 ॥
𑌶𑌤𑌶𑌃 𑌪𑌕𑍍𑌷𑌿𑌸𑌂𑌘𑍈𑌶𑍍𑌚 𑌨𑌾𑌨𑌾𑌨𑌾𑌦𑍈𑌰𑍍𑌵𑌿𑌨𑌾𑌦𑌿𑌤𑌾 ।
𑌏𑌕𑍈𑌕𑌮𑌨𑍁𑌰𑌕𑍍𑌤𑍈𑌶𑍍𑌚 𑌚𑌕𑍍𑌰𑌵𑌾𑌕𑍈𑌰𑌲𑌂𑌕𑍃𑌤𑌾 ॥ 20 ॥
𑌪𑍁𑌲𑌿𑌨𑍈𑌰𑌤𑌿𑌰𑌮𑍍𑌯𑍈𑌶𑍍𑌚 𑌹𑌂𑌸𑌸𑌾𑌰𑌸𑌸𑍇𑌵𑌿𑌤𑍈𑌃 ।
𑌪𑍍𑌰𑌹𑌸𑌂𑌤𑍀𑌵𑌭𑌾𑌤𑍍𑌯𑍇𑌷𑌾 𑌨𑌾𑌰𑍀 𑌸𑌰𑍍𑌵𑌵𑌿𑌭𑍂𑌷𑌿𑌤𑌾 ॥ 21 ॥
𑌕𑍍𑌵𑌚𑌿𑌨𑍍𑌨𑍀𑌲𑍋𑌤𑍍𑌪𑌲𑍈𑌶𑍍𑌛𑌨𑍍𑌨𑌾 𑌭𑌾𑌤𑌿 𑌰𑌕𑍍𑌤𑍋𑌤𑍍𑌪𑌲𑍈𑌃 𑌕𑍍𑌵𑌚𑌿𑌤𑍍 ।
𑌕𑍍𑌵𑌚𑌿𑌦𑌾𑌭𑌾𑌤𑌿 𑌶𑍁𑌕𑍍𑌲𑍈𑌶𑍍𑌚 𑌦𑌿𑌵𑍍𑌯𑍈𑌃 𑌕𑍁𑌮𑍁𑌦𑌕𑍁𑌟𑍍𑌮𑌲𑍈𑌃 ॥ 22 ॥
𑌪𑌾𑌰𑌿𑌪𑍍𑌲𑌵𑌶𑌤𑍈𑌰𑍍𑌜𑍁𑌷𑍍𑌟𑌾 𑌬𑌰𑍍𑌹𑌿𑌕𑍍𑌰𑍌𑌂𑌚𑌵𑌿𑌨𑌾𑌦𑌿𑌤𑌾 ।
𑌰𑌮𑌣𑍀𑌯𑌾 𑌨𑌦𑍀 𑌸𑍌𑌮𑍍𑌯 𑌮𑍁𑌨𑌿𑌸𑌂𑌘𑍈𑌰𑍍𑌨𑌿𑌷𑍇𑌵𑌿𑌤𑌾 ॥ 23 ॥
𑌪𑌶𑍍𑌯 𑌚𑌂𑌦𑌨𑌵𑍃𑌕𑍍𑌷𑌾𑌣𑌾𑌂 𑌪𑌂𑌕𑍍𑌤𑍀𑌸𑍍𑌸𑍁𑌰𑌚𑌿𑌤𑌾 𑌇𑌵 ।
𑌕𑌕𑍁𑌭𑌾𑌨𑌾𑌂 𑌚 𑌦𑍃𑌶𑍍𑌯𑌂𑌤𑍇 𑌮𑌨𑌸𑍇𑌵𑍋𑌦𑌿𑌤𑌾𑌸𑍍𑌸𑌮𑌮𑍍 ॥ 24 ॥
𑌅𑌹𑍋 𑌸𑍁𑌰𑌮𑌣𑍀𑌯𑍋𑌽𑌯𑌂 𑌦𑍇𑌶𑌶𑍍𑌶𑌤𑍍𑌰𑍁𑌨𑌿𑌷𑍂𑌦𑌨 ।
𑌦𑍃𑌢𑌂 𑌰𑌂𑌸𑍍𑌯𑌾𑌵 𑌸𑍌𑌮𑌿𑌤𑍍𑌰𑍇 𑌸𑌾𑌧𑍍𑌵𑌤𑍍𑌰 𑌨𑌿𑌵𑌸𑌾𑌵𑌹𑍈 ॥ 25 ॥
𑌇𑌤𑌶𑍍𑌚 𑌨𑌾𑌤𑌿𑌦𑍂𑌰𑍇 𑌸𑌾 𑌕𑌿𑌷𑍍𑌕𑌿𑌂𑌧𑌾 𑌚𑌿𑌤𑍍𑌰𑌕𑌾𑌨𑌨𑌾 ।
𑌸𑍁𑌗𑍍𑌰𑍀𑌵𑌸𑍍𑌯 𑌪𑍁𑌰𑍀 𑌰𑌮𑍍𑌯𑌾 𑌭𑌵𑌿𑌷𑍍𑌯𑌤𑌿 𑌨𑍃𑌪𑌾𑌤𑍍𑌮𑌜 ॥ 26 ॥
𑌗𑍀𑌤𑌵𑌾𑌦𑌿𑌤𑍍𑌰𑌨𑌿𑌰𑍍𑌘𑍋𑌷𑌶𑍍𑌶𑍍𑌰𑍂𑌯𑌤𑍇 𑌜𑌯𑌤𑌾𑌂 𑌵𑌰 ।
𑌨𑌰𑍍𑌦𑌤𑌾𑌂 𑌵𑌾𑌨𑌰𑌾𑌣𑌾𑌂 𑌚 𑌮𑍃𑌦𑌂𑌗𑌾𑌡𑌂𑌬𑌰𑍈 𑌸𑍍𑌸𑌹 ॥ 2 ॥
𑌲𑌬𑍍𑌧𑍍𑌵𑌾 𑌭𑌾𑌰𑍍𑌯𑌾𑌂 𑌕𑌪𑌿𑌵𑌰𑌃 𑌪𑍍𑌰𑌾𑌪𑍍𑌯 𑌰𑌾𑌜𑍍𑌯𑌂 𑌸𑍁𑌹𑍃𑌦𑍍𑌵𑍃𑌤𑌃 ।
𑌧𑍍𑌰𑍁𑌵𑌂 𑌨𑌂𑌦𑌤𑌿 𑌸𑍁𑌗𑍍𑌰𑍀𑌵𑌸𑍍𑌸𑌂𑌪𑍍𑌰𑌾𑌪𑍍𑌯 𑌮𑌹𑌤𑍀𑌂 𑌶𑍍𑌰𑌿𑌯𑌮𑍍 ॥ 2 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌨𑍍𑌯𑌵𑌸𑌤𑍍𑌤𑌤𑍍𑌰 𑌰𑌾𑌘𑌵𑌸𑍍𑌸𑌹𑌲𑌕𑍍𑌷𑍍𑌮𑌣𑌃 ।
𑌬𑌹𑍁𑌦𑍃𑌶𑍍𑌯𑌦𑌰𑍀𑌕𑍁𑌂𑌜𑍇 𑌤𑌸𑍍𑌮𑌿𑌨𑍍𑌪𑍍𑌰𑌸𑍍𑌰𑌵𑌣𑍇 𑌗𑌿𑌰𑍌 ॥ 2 ॥
𑌸𑍁𑌸𑍁𑌖𑍇𑌽𑌪𑌿 𑌬𑌹𑍁𑌦𑍍𑌰𑌵𑍍𑌯𑍇 𑌤𑌸𑍍𑌮𑌿𑌨𑍍𑌹𑌿 𑌧𑌰𑌣𑍀𑌧𑌰𑍇 ।
𑌵𑌸𑌤𑌸𑍍𑌤𑌸𑍍𑌯 𑌰𑌾𑌮𑌸𑍍𑌯 𑌰𑌤𑌿𑌰𑌲𑍍𑌪𑌾𑌪𑌿𑌨𑌾 𑌭𑌵𑍇𑌤𑍍 ॥ 30 ॥
𑌹𑍃𑌤𑌾𑌂 𑌹𑌿 𑌭𑌾𑌰𑍍𑌯𑌾𑌂 𑌸𑍍𑌮𑌰𑌤𑌃 𑌪𑍍𑌰𑌾𑌣𑍇𑌭𑍍𑌯𑍋𑌽𑌪𑌿 𑌗𑌰𑍀𑌯𑌸𑍀𑌮𑍍 ।
𑌉𑌦𑌯𑌾𑌭𑍍𑌯𑍁𑌦𑌿𑌤𑌂 𑌦𑍃𑌷𑍍𑌟𑍍𑌵𑌾 𑌶𑌶𑌾𑌂𑌕𑌂 𑌚 𑌵𑌿𑌶𑍇𑌷𑌤𑌃 ॥ 31 ॥
𑌆𑌵𑌿𑌵𑍇𑌶 𑌨 𑌤𑌂 𑌨𑌿𑌦𑍍𑌰𑌾 𑌨𑌿𑌶𑌾𑌸𑍁 𑌶𑌯𑌨𑌂 𑌗𑌤𑌮𑍍 ।
𑌤𑌤𑍍𑌸𑌮𑍁𑌤𑍍𑌥𑍇𑌨 𑌶𑍋𑌕𑍇𑌨 𑌬𑌾𑌷𑍍𑌪𑍋𑌪𑌹𑌤𑌚𑍇𑌤𑌸𑌮𑍍 ॥ 32 ॥
𑌤𑌂 𑌶𑍋𑌚𑌮𑌾𑌨𑌂 𑌕𑌾𑌕𑍁𑌤𑍍𑌸𑍍𑌥𑌂 𑌨𑌿𑌤𑍍𑌯𑌂 𑌶𑍋𑌕𑌪𑌰𑌾𑌯𑌣𑌮𑍍 ।
𑌤𑍁𑌲𑍍𑌯𑌦𑍁𑌃𑌖𑍋𑌽𑌬𑍍𑌰𑌵𑍀𑌦𑍍𑌭𑍍𑌰𑌾𑌤𑌾 𑌲𑌕𑍍𑌷𑍍𑌮𑌣𑍋𑌽𑌨𑍁𑌨𑌯𑌨𑍍𑌵𑌚𑌃 ॥ 33 ॥
𑌅𑌲𑌂 𑌵𑍀𑌰 𑌵𑍍𑌯𑌥𑌾𑌂 𑌗𑌤𑍍𑌵𑌾 𑌨 𑌤𑍍𑌵𑌂 𑌶𑍋𑌚𑌿𑌤𑍁𑌮𑌰𑍍𑌹𑌸𑌿 ।
𑌶𑍋𑌚𑌤𑍋 𑌵𑍍𑌯𑌵𑌸𑍀𑌦𑌂𑌤𑌿 𑌸𑌰𑍍𑌵𑌾𑌰𑍍𑌥𑌾 𑌵𑌿𑌦𑌿𑌤𑌂 𑌹𑌿 𑌤𑍇 ॥ 34 ॥
𑌭𑌵𑌾𑌨𑍍𑌕𑍍𑌰𑌿𑌯𑌾𑌪𑌰𑍋 𑌲𑍋𑌕𑍇 𑌭𑌵𑌾𑌨𑍍 𑌦𑍇𑌵𑌪𑌰𑌾𑌯𑌣𑌃 ।
𑌆𑌸𑍍𑌤𑌿𑌕𑍋 𑌧𑌰𑍍𑌮𑌶𑍀𑌲𑌶𑍍𑌚 𑌵𑍍𑌯𑌵𑌸𑌾𑌯𑍀 𑌚 𑌰𑌾𑌘𑌵 ॥ 35 ॥
𑌨 𑌹𑍍𑌯𑌵𑍍𑌯𑌵𑌸𑌿𑌤𑌶𑍍𑌶𑌤𑍍𑌰𑍁𑌂 𑌰𑌾𑌕𑍍𑌷𑌸𑌂 𑌤𑌂 𑌵𑌿𑌶𑍇𑌷𑌤𑌃 ।
𑌸𑌮𑌰𑍍𑌥𑌸𑍍𑌤𑍍𑌵𑌂 𑌰𑌣𑍇 𑌹𑌂𑌤𑍁𑌂 𑌵𑌿𑌕𑍍𑌰𑌮𑍈𑌰𑍍𑌜𑌿𑌹𑍍𑌮𑌕𑌾𑌰𑌿𑌣𑌮𑍍 ॥ 36 ॥
𑌸𑌮𑍁𑌨𑍍𑌮𑍂𑌲𑌯 𑌶𑍋𑌕𑌂 𑌤𑍍𑌵𑌂 𑌵𑍍𑌯𑌵𑌸𑌾𑌯𑌂 𑌸𑍍𑌥𑌿𑌰𑌂 𑌕𑍁𑌰𑍁 ।
𑌤𑌤𑌸𑍍𑌸𑌪𑌰𑌿𑌵𑌾𑌰𑌂 𑌤𑌂 𑌨𑌿𑌰𑍍𑌮𑍂𑌲𑌂 𑌕𑍁𑌰𑍁 𑌰𑌾𑌕𑍍𑌷𑌸𑌮𑍍 ॥ 3 ॥
𑌪𑍃𑌥𑌿𑌵𑍀𑌮𑌪𑌿 𑌕𑌾𑌕𑍁𑌤𑍍𑌸𑍍𑌥 𑌸𑌸𑌾𑌗𑌰𑌵𑌨𑌾𑌚𑌲𑌾𑌮𑍍 ।
𑌪𑌰𑌿𑌵𑌰𑍍𑌤𑌯𑌿𑌤𑍁𑌂 𑌶𑌕𑍍𑌤𑌃 𑌕𑌿𑌮𑌂𑌗𑌪𑍁𑌨 𑌰𑌾𑌵𑌣𑌮𑍍 ॥ 3 ॥
𑌶𑌰𑌤𑍍𑌕𑌾𑌲𑌂 𑌪𑍍𑌰𑌤𑍀𑌕𑍍𑌷𑌸𑍍𑌵 𑌪𑍍𑌰𑌾𑌵𑍃𑌟𑍍𑌕𑌾𑌲𑍋𑌽𑌯𑌮𑌾𑌗𑌤𑌃 ।
𑌤𑌤𑌸𑍍𑌸𑌰𑌾𑌷𑍍𑌟𑍍𑌰𑌂 𑌸𑌗𑌣𑌂 𑌰𑌾𑌵𑌣𑌂 𑌤𑍍𑌵𑌂 𑌵𑌧𑌿𑌷𑍍𑌯𑌸𑌿 ॥ 3 ॥
𑌅𑌹𑌂 𑌤𑍁 𑌖𑌲𑍁 𑌤𑍇 𑌵𑍀𑌰𑍍𑌯𑌂 𑌪𑍍𑌰𑌸𑍁𑌪𑍍𑌤𑌂 𑌪𑍍𑌰𑌤𑌿𑌬𑍋𑌧𑌯𑍇 ।
𑌦𑍀𑌪𑍍𑌸𑍈𑌰𑌾𑌹𑍁𑌤𑌿𑌭𑌿𑌃 𑌕𑌾𑌲𑍇 𑌭𑌸𑍍𑌮𑌚𑍍𑌛𑌨𑍍𑌨𑌮𑌿𑌵𑌾𑌨𑌲𑌮𑍍 ॥ 40 ॥
𑌲𑌕𑍍𑌷𑍍𑌮𑌣𑌸𑍍𑌯 𑌤𑍁 𑌤𑌦𑍍𑌵𑌾𑌕𑍍𑌯𑌂 𑌪𑍍𑌰𑌤𑌿𑌪𑍂𑌜𑍍𑌯 𑌹𑌿𑌤𑌂 𑌶𑍁𑌭𑌮𑍍 ।
𑌰𑌾𑌘𑌵𑌸𑍍𑌸𑍁𑌹𑍃𑌦𑌂 𑌸𑍍𑌨𑌿𑌗𑍍𑌧𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 41 ॥
𑌵𑌾𑌚𑍍𑌯𑌂 𑌯𑌦𑌨𑍁𑌰𑌕𑍍𑌤𑍇𑌨 𑌸𑍍𑌨𑌿𑌗𑍍𑌧𑍇𑌨 𑌚 𑌹𑌿𑌤𑍇𑌨 𑌚 ।
𑌸𑌤𑍍𑌯𑌵𑌿𑌕𑍍𑌰𑌮𑌯𑍁𑌕𑍍𑌤𑍇𑌨 𑌤𑌦𑍁𑌕𑍍𑌤𑌂 𑌲𑌕𑍍𑌷𑍍𑌮𑌣 𑌤𑍍𑌵𑌯𑌾 ॥ 42 ॥
𑌏𑌷 𑌶𑍋𑌕𑌃 𑌪𑌰𑌿𑌤𑍍𑌯𑌕𑍍𑌤𑌸𑍍𑌸𑌰𑍍𑌵𑌕𑌾𑌰𑍍𑌯𑌾𑌵𑌸𑌾𑌦𑌕𑌃 ।
𑌵𑌿𑌕𑍍𑌰𑌮𑍇𑌷𑍍𑌵𑌪𑍍𑌰𑌤𑌿𑌹𑌤𑌂 𑌤𑍇𑌜𑌃 𑌪𑍍𑌰𑍋𑌤𑍍𑌸𑌾𑌹𑌯𑌾𑌮𑍍𑌯𑌹𑌮𑍍 ॥ 43 ॥
𑌶𑌰𑌤𑍍𑌕𑌾𑌲𑌂 𑌪𑍍𑌰𑌤𑍀𑌕𑍍𑌷𑌿𑌷𑍍𑌯𑍇 𑌸𑍍𑌥𑌿𑌤𑍋𑌽𑌸𑍍𑌮𑌿 𑌵𑌚𑌨𑍇 𑌤𑌵 ।
𑌸𑍁𑌗𑍍𑌰𑍀𑌵𑌸𑍍𑌯 𑌨𑌦𑍀𑌨𑌾𑌂 𑌚 𑌪𑍍𑌰𑌸𑌾𑌦𑌮𑌨𑍁𑌪𑌾𑌲𑌯𑌨𑍍 ॥ 44 ॥
𑌉𑌪𑌕𑌾𑌰𑍇𑌣 𑌵𑍀𑌰𑌸𑍍𑌤𑍁 𑌪𑍍𑌰𑌤𑍀𑌕𑌾𑌰𑍇𑌣 𑌯𑍁𑌜𑍍𑌯𑌤𑍇 ।
𑌅𑌕𑍃𑌤𑌜𑍍𑌞𑍋𑌽𑌪𑍍𑌰𑌤𑌿𑌕𑍃𑌤𑍋 𑌹𑌂𑌤𑌿 𑌸𑌤𑍍𑌤𑍍𑌵𑌵𑌤𑌾𑌂 𑌮𑌨𑌃 ॥ 45 ॥
𑌅𑌥𑍈𑌵 𑌮𑍁𑌕𑍍𑌤𑌃𑌪𑍍𑌰𑌣𑌿𑌧𑌾𑌯 𑌲𑌕𑍍𑌷𑍍𑌮𑌣𑌃 𑌕𑍃𑌤𑌾𑌂𑌜𑌲𑌿𑌸𑍍𑌤𑌤𑍍𑌪𑍍𑌰𑌤𑌿𑌪𑍂𑌜𑍍𑌯 𑌭𑌾𑌷𑌿𑌤𑌮𑍍 ।
𑌉𑌵𑌾𑌚 𑌰𑌾𑌮𑌂 𑌸𑍍𑌵𑌭𑌿𑌰𑌾𑌮𑌦𑌰𑍍𑌶𑌨𑌂 𑌪𑍍𑌰𑌦𑌰𑍍𑌶𑌯𑌂𑌦𑌰𑍍𑌶𑌨𑌮𑌾𑌤𑍍𑌮𑌨𑌶𑍍𑌶𑍁𑌭𑌮𑍍 ॥ 46 ॥
𑌯𑌥𑍋𑌕𑍍𑌤𑌮𑍇𑌤𑌤𑍍𑌤𑌵 𑌸𑌰𑍍𑌵𑌮𑍀𑌪𑍍𑌸𑌿𑌤𑌂 𑌨𑌰𑍇𑌂𑌦𑍍𑌰 𑌕𑌰𑍍𑌤𑌾 𑌨 𑌚𑌿𑌰𑌾𑌦𑍍𑌧𑌰𑍀𑌶𑍍𑌵𑌰𑌃 ।
𑌶𑌰𑌤𑍍𑌪𑍍𑌰𑌤𑍀𑌕𑍍𑌷𑌃 𑌕𑍍𑌷𑌮𑌤𑌾𑌮𑌿𑌮𑌂 𑌭𑌵𑌾𑌨𑍍 𑌜𑌲𑌪𑍍𑌰𑌪𑌾𑌤𑌂 𑌰𑌿𑌪𑍁𑌨𑌿𑌗𑍍𑌰𑌹𑍇 𑌧𑍃𑌤𑌃 ॥ 4 ॥
𑌨𑌿𑌯𑌮𑍍𑌯 𑌕𑍋𑌪𑌂 𑌪𑍍𑌰𑌤𑌿𑌪𑌾𑌲𑍍𑌯𑌤𑌾𑌂 𑌶𑌰𑌤𑍍 𑌕𑍍𑌷𑌮𑌸𑍍𑌵 𑌮𑌾𑌸𑌾𑌂 𑌶𑍍𑌚𑌤𑍁𑌰𑍋 𑌮𑌯𑌾 𑌸𑌹 ।
𑌵𑌸𑌾𑌚𑌲𑍇𑌽𑌸𑍍𑌮𑌿𑌨𑍍𑌮𑍃𑌗𑌰𑌾𑌜𑌸𑍇𑌵𑌿𑌤𑍇 𑌸𑌂𑌵𑌰𑍍𑌧𑌯𑌨𑍍 𑌶𑌤𑍍𑌰𑍁𑌵𑌧𑍇 𑌸𑌮𑍁𑌦𑍍𑌯𑌮𑌮𑍍 ॥ 4 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌸𑌪𑍍𑌤𑌵𑌿𑌂𑌶𑌸𑍍𑌸𑌰𑍍𑌗𑌃 ॥
