𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌮𑌸𑍍𑌸𑌰𑍍𑌗𑌃 ।
𑌮𑌂𑌥𑌰𑌾 𑌤𑍍𑌵𑌭𑍍𑌯𑌸𑍂𑌯𑍈𑌨𑌾𑌮𑍁𑌤𑍍𑌸𑍃𑌜𑍍𑌯𑌾𑌭𑌰𑌣𑌂 𑌚 𑌤𑌤𑍍 ।
𑌉𑌵𑌾𑌚𑍇𑌦𑌂 𑌤𑌤𑍋 𑌵𑌾𑌕𑍍𑌯𑌂 𑌕𑍋𑌪𑌦𑍁𑌃𑌖𑌸𑌮𑌨𑍍𑌵𑌿𑌤𑌾 ॥ 1 ॥
𑌹𑌰𑍍𑌷𑌂 𑌕𑌿𑌮𑌿𑌦𑌮𑌸𑍍𑌥𑌾𑌨𑍇 𑌕𑍃𑌤𑌵𑌤𑍍𑌯𑌸𑌿 𑌬𑌾𑌲𑌿𑌶𑍇 ।
𑌶𑍋𑌕𑌸𑌾𑌗𑌰𑌮𑌧𑍍𑌯𑌸𑍍𑌥𑌮𑌾𑌤𑍍𑌮𑌾𑌨𑌂 𑌨𑌾𑌵𑌬𑍁𑌧𑍍𑌯𑌸𑍇 ॥ 2 ॥
𑌮𑌨𑌸𑌾 𑌪𑍍𑌰𑌹𑌸𑌾𑌮𑌿 𑌤𑍍𑌵𑌾𑌂 𑌦𑍇𑌵𑌿 𑌦𑍁𑌃𑌖𑌾𑌰𑍍𑌦𑌿𑌤𑌾 𑌸𑌤𑍀 ।
𑌯𑌚𑍍𑌛𑍋𑌚𑌿𑌤𑌵𑍍𑌯𑍇 𑌹𑍃𑌷𑍍𑌟𑌾𑌽𑌸𑌿 𑌪𑍍𑌰𑌾𑌪𑍍𑌯𑍇𑌦𑌂 𑌵𑍍𑌯𑌸𑌨𑌂 𑌮𑌹𑌤𑍍 ॥ 3 ॥
𑌶𑍋𑌚𑌾𑌮𑌿 𑌦𑍁𑌰𑍍𑌮𑌤𑌿𑌤𑍍𑌵𑌂 𑌤𑍇 𑌕𑌾 𑌹𑌿 𑌪𑍍𑌰𑌾𑌜𑍍𑌞𑌾 𑌪𑍍𑌰𑌹𑌰𑍍𑌷𑌯𑍇𑌤𑍍 ।
𑌅𑌰𑍇𑌸𑍍𑌸𑌪𑌤𑍍𑌨𑍀𑌪𑍁𑌤𑍍𑌰𑌸𑍍𑌯 𑌵𑍃𑌦𑍍𑌧𑌿𑌂 𑌮𑍃𑌤𑍍𑌯𑍋𑌰𑌿𑌵𑌾𑌗𑌤𑌾𑌮𑍍 ॥ 4 ॥
𑌭𑌰𑌤𑌾𑌦𑍇𑌵 𑌰𑌾𑌮𑌸𑍍𑌯 𑌰𑌾𑌜𑍍𑌯𑌸𑌾𑌧𑌾𑌰𑌣𑌾𑌦𑍍𑌭𑌯𑌮𑍍 ।
𑌤𑌦𑍍𑌵𑌿𑌚𑌿𑌂𑌤𑍍𑌯 𑌵𑌿𑌷𑌣𑍍𑌣𑌾𑌽𑌸𑍍𑌮𑌿 𑌭𑌯𑌂 𑌭𑍀𑌤𑌾𑌽𑌦𑍍𑌧𑌿 𑌜𑌾𑌯𑌤𑍇 ॥ 5 ॥
𑌲𑌕𑍍𑌷𑍍𑌮𑌣𑍋 𑌹𑌿 𑌮𑌹𑍇𑌷𑍍𑌵𑌾𑌸𑍋 𑌰𑌾𑌮𑌂 𑌸𑌰𑍍𑌵𑌾𑌤𑍍𑌮𑌨𑌾 𑌗𑌤𑌃 ।
𑌶𑌤𑍍𑌰𑍁𑌘𑍍𑌨𑌶𑍍𑌚𑌾𑌪𑌿 𑌭𑌰𑌤𑌂 𑌕𑌾𑌕𑍁𑌤𑍍𑌸𑍍𑌥𑌂 𑌲𑌕𑍍𑌷𑍍𑌮𑌣𑍋 𑌯𑌥𑌾 ॥ 6 ॥
𑌪𑍍𑌰𑌤𑍍𑌯𑌾𑌸𑌨𑍍𑌨𑌕𑍍𑌰𑌮𑍇𑌣𑌾𑌪𑌿 𑌭𑌰𑌤𑌸𑍍𑌯𑍈𑌵 𑌭𑌾𑌮𑌿𑌨𑌿 ।
𑌰𑌾𑌜𑍍𑌯𑌕𑍍𑌰𑌮𑍋 𑌵𑌿𑌪𑍍𑌰𑌕𑍃𑌷𑍍𑌟𑌸𑍍𑌤𑌯𑍋𑌸𑍍𑌤𑌾𑌵𑌤𑍍𑌕𑌨𑍀𑌯𑌸𑍋𑌃 ॥ ॥
𑌵𑌿𑌦𑍁𑌷𑌃 𑌕𑍍𑌷𑌤𑍍𑌰𑌚𑌾𑌰𑌿𑌤𑍍𑌰𑍇 𑌪𑍍𑌰𑌾𑌜𑍍𑌞𑌸𑍍𑌯 𑌪𑍍𑌰𑌾𑌪𑍍𑌤𑌕𑌾𑌰𑌿𑌣𑌃 ।
𑌭𑌯𑌾𑌤𑍍𑌪𑍍𑌰𑌵𑍇𑌪𑍇 𑌰𑌾𑌮𑌸𑍍𑌯 𑌚𑌿𑌂𑌤𑌯𑌂𑌤𑍀 𑌤𑌵𑌾𑌤𑍍𑌮𑌜𑌮𑍍 ॥ ॥
𑌸𑍁𑌭𑌗𑌾 𑌖𑌲𑍁 𑌕𑍌𑌶𑌲𑍍𑌯𑌾 𑌯𑌸𑍍𑌯𑌾𑌃 𑌪𑍁𑌤𑍍𑌰𑍋𑌽𑌭𑌿𑌷𑍇𑌕𑍍𑌷𑍍𑌯𑌤𑍇 ।
𑌯𑍌𑌵𑌰𑌾𑌜𑍍𑌯𑍇𑌨 𑌮𑌹𑌤𑌾 𑌶𑍍𑌵𑌃 𑌪𑍁𑌷𑍍𑌯𑍇𑌣 𑌦𑍍𑌵𑌿𑌜𑍋𑌤𑍍𑌤𑌮𑍈𑌃 ॥ ॥
𑌪𑍍𑌰𑌾𑌪𑍍𑌤𑌾𑌂 𑌸𑍁𑌮𑌹𑌤𑍀𑌂 𑌪𑍍𑌰𑍀𑌤𑌿𑌂 𑌪𑍍𑌰𑌤𑍀𑌤𑌾𑌂 𑌤𑌾𑌂 𑌹𑌤𑌦𑍍𑌵𑌿𑌷𑌮𑍍 ।
𑌉𑌪𑌸𑍍𑌥𑌾𑌸𑍍𑌯𑌸𑌿 𑌕𑍌𑌸𑌲𑍍𑌯𑌾𑌂 𑌦𑌾𑌸𑍀𑌵 𑌤𑍍𑌤𑍍𑌵𑌂 𑌕𑍃𑌤𑌾𑌂𑌜𑌲𑌿𑌃 ॥ 10 ॥
𑌏𑌵𑌂 𑌚𑍇𑌤𑍍𑌤𑍍𑌵𑌂 𑌸𑌹𑌾𑌸𑍍𑌮𑌾𑌭𑌿𑌸𑍍𑌤𑌸𑍍𑌯𑌾𑌃 𑌪𑍍𑌰𑍇𑌷𑍍𑌯𑌾 𑌭𑌵𑌿𑌷𑍍𑌯𑌸𑌿 ।
𑌪𑍁𑌤𑍍𑌰𑌶𑍍𑌚 𑌤𑌵 𑌰𑌾𑌮𑌸𑍍𑌯 𑌪𑍍𑌰𑍇𑌷𑍍𑌯𑌭𑌾𑌵𑌂 𑌗𑌮𑌿𑌷𑍍𑌯𑌤𑌿 ॥ 11 ॥
𑌹𑍃𑌷𑍍𑌟𑌾𑌃 𑌖𑌲𑍁 𑌭𑌵𑌿𑌷𑍍𑌯𑌂𑌤𑌿 𑌰𑌾𑌮𑌸𑍍𑌯 𑌪𑌰𑌮𑌾𑌸𑍍𑌸𑍍𑌤𑍍𑌰𑌿𑌯𑌃 ।
𑌅𑌪𑍍𑌰𑌹𑍃𑌷𑍍𑌟𑌾 𑌭𑌵𑌿𑌷𑍍𑌯𑌂𑌤𑌿 𑌸𑍍𑌨𑍁𑌷𑌾𑌸𑍍𑌤𑍇 𑌭𑌰𑌤𑌕𑍍𑌷𑌯𑍇 ॥ 12 ॥
𑌤𑌾𑌂 𑌦𑍃𑌷𑍍𑌟𑍍𑌵𑌾 𑌪𑌰𑌮𑌪𑍍𑌰𑍀𑌤𑌾𑌂 𑌬𑍍𑌰𑍁𑌵𑌂𑌤𑍀𑌂 𑌮𑌂𑌥𑌰𑌾𑌂 𑌤𑌤𑌃 ।
𑌰𑌾𑌮𑌸𑍍𑌯𑍈𑌵 𑌗𑍁𑌣𑌾𑌂𑌦𑍇𑌵𑍀 𑌕𑍈𑌕𑍇𑌯𑍀 𑌪𑍍𑌰𑌶𑌶𑌂𑌸 𑌹 ॥ 13 ॥
𑌧𑌰𑍍𑌮𑌜𑍍𑌞𑍋 𑌗𑍁𑌰𑍁𑌭𑌿𑌰𑍍𑌦𑌾𑌂𑌤𑌃 𑌕𑍃𑌤𑌜𑍍𑌞𑌸𑍍𑌸𑌤𑍍𑌯𑌵𑌾𑌕𑍍𑌛𑍁𑌚𑌿𑌃 ।
𑌰𑌾𑌮𑍋 𑌰𑌾𑌜𑍍𑌞 𑌸𑍍𑌸𑍁𑌤𑍋 𑌜𑍍𑌯𑍇𑌷𑍍𑌠𑍋 𑌯𑍌𑌵𑌰𑌾𑌜𑍍𑌯𑌮𑌤𑍋𑌽𑌰𑍍𑌹𑌤𑌿 ॥ 14 ॥
𑌭𑍍𑌰𑌾𑌤𑍃𑌨𑍍𑌭𑍃𑌤𑍍𑌯𑌾𑌂𑌶𑍍𑌚 𑌦𑍀𑌰𑍍𑌘𑌾𑌯𑍁𑌃 𑌪𑌿𑌤𑍃𑌵𑌤𑍍𑌪𑌾𑌲𑌯𑌿𑌷𑍍𑌯𑌤𑌿 ।
𑌸𑌂𑌤𑌪𑍍𑌸𑍍𑌯𑌸𑍇 𑌕𑌥𑌂 𑌕𑍁𑌬𑍍𑌜𑍇 𑌶𑍍𑌰𑍁𑌤𑍍𑌵𑌾 𑌰𑌾𑌮𑌾𑌭𑌿𑌷𑍇𑌚𑌨𑌮𑍍 ॥ 15 ॥
𑌭𑌰𑌤𑌶𑍍𑌚𑌾𑌪𑌿 𑌰𑌾𑌮𑌸𑍍𑌯 𑌧𑍍𑌰𑍁𑌵𑌂 𑌵𑌰𑍍𑌷𑌶𑌤𑌾𑌤𑍍𑌪𑌰𑌮𑍍 ।
𑌪𑌿𑌤𑍃𑌪𑍈𑌤𑌾𑌮𑌹𑌂 𑌰𑌾𑌜𑍍𑌯𑌮𑌵𑌾𑌪𑍍𑌤𑌾 𑌪𑍁𑌰𑍁𑌷𑌰𑍍𑌷𑌭𑌃 ॥ 16 ॥
𑌸𑌾 𑌤𑍍𑌵𑌮𑌭𑍍𑌯𑍁𑌦𑌯𑍇 𑌪𑍍𑌰𑌾𑌪𑍍𑌤𑍇 𑌵𑌰𑍍𑌤𑌮𑌾𑌨𑍇 𑌚 𑌮𑌂𑌥𑌰𑍇 ।
𑌭𑌵𑌿𑌷𑍍𑌯𑌤𑌿 𑌚 𑌕𑌲𑍍𑌯𑌾𑌣𑍇 𑌕𑌿𑌮𑌰𑍍𑌥𑌂 𑌪𑌰𑌿𑌤𑌪𑍍𑌯𑌸𑍇 ॥ 1 ॥
𑌯𑌥𑌾 𑌮𑍇 𑌭𑌰𑌤𑍋 𑌮𑌾𑌨𑍍𑌯𑌸𑍍𑌤𑌥𑌾 𑌭𑍂𑌯𑍋𑌽𑌪𑌿 𑌰𑌾𑌘𑌵𑌃 ।
𑌕𑍌𑌶𑌲𑍍𑌯𑌾𑌤𑍋𑌽𑌤𑌿𑌰𑌿𑌕𑍍𑌤𑌂 𑌚 𑌸𑍋𑌽𑌨𑍁𑌶𑍁𑌶𑍍𑌰𑍂𑌷𑌤𑍇 𑌹𑌿 𑌮𑌾𑌮𑍍 ॥ 1 ॥
𑌰𑌾𑌜𑍍𑌯𑌂 𑌯𑌦𑌿 𑌹𑌿 𑌰𑌾𑌮𑌸𑍍𑌯 𑌭𑌰𑌤𑌸𑍍𑌯𑌾𑌪𑌿 𑌤𑌤𑍍𑌤𑌦𑌾 ।
𑌮𑌨𑍍𑌯𑌤𑍇 𑌹𑌿 𑌯𑌥𑌾𑌤𑍍𑌮𑌾𑌨𑌂 𑌤𑌥𑌾 𑌭𑍍𑌰𑌾𑌤𑍃𑌂𑌶𑍍𑌚 𑌰𑌾𑌘𑌵𑌃 ॥ 1 ॥
𑌕𑍈𑌕𑍇𑌯𑍀𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌮𑌂𑌥𑌰𑌾 𑌭𑍃𑌶𑌦𑍁𑌃𑌖𑌿𑌤𑌾 ।
𑌦𑍀𑌰𑍍𑌘𑌮𑍁𑌷𑍍𑌣𑌂 𑌚 𑌵𑌿𑌨𑌿𑌶𑍍𑌵𑌸𑍍𑌯 𑌕𑍈𑌕𑍇𑌯𑍀𑌮𑌿𑌦𑌮𑌬𑍍𑌰𑌵𑍀𑌤𑍍 ॥ 20 ॥
𑌅𑌨𑌰𑍍𑌥𑌦𑌰𑍍𑌶𑌿𑌨𑍀 𑌮𑍌𑌰𑍍𑌖𑍍𑌯𑌾𑌨𑍍𑌨𑌾𑌤𑍍𑌮𑌾𑌨𑌮𑌵𑌬𑍁𑌧𑍍𑌯𑌸𑍇 ।
𑌶𑍋𑌕𑌵𑍍𑌯𑌸𑌨𑌵𑌿𑌸𑍍𑌤𑍀𑌰𑍍𑌣𑍇 𑌮𑌜𑍍𑌜𑌂𑌤𑍀 𑌦𑍁𑌃𑌖𑌸𑌾𑌗𑌰𑍇 ॥ 21 ॥
𑌭𑌵𑌿𑌤𑌾 𑌰𑌾𑌘𑌵𑍋 𑌰𑌾𑌜𑌾 𑌰𑌾𑌘𑌵𑌸𑍍𑌯𑌾𑌨𑍁 𑌯𑌸𑍍𑌸𑍁𑌤𑌃 ।
𑌰𑌾𑌜𑌵𑌂𑌶𑌾𑌤𑍍𑌤𑍁 𑌕𑍈𑌕𑍇𑌯𑌿 𑌭𑌰𑌤𑌃𑌪𑌰𑌿𑌹𑌾𑌸𑍍𑌯𑌤𑍇 ॥ 22 ॥
𑌨 𑌹𑌿 𑌰𑌾𑌜𑍍𑌞𑌸𑍍𑌸𑍁𑌤𑌾 𑌸𑍍𑌸𑌰𑍍𑌵𑍇 𑌰𑌾𑌜𑍍𑌯𑍇 𑌤𑌿𑌷𑍍𑌠𑌂𑌤𑌿 𑌭𑌾𑌮𑌿𑌨𑌿 ।
𑌸𑍍𑌥𑌾𑌪𑍍𑌯𑌮𑌾𑌨𑍇𑌷𑍁 𑌸𑌰𑍍𑌵𑍇𑌷𑍁 𑌸𑍁𑌮𑌹𑌾𑌨𑌨𑌯𑍋 𑌭𑌵𑍇𑌤𑍍 ॥ 23 ॥
𑌤𑌸𑍍𑌮𑌾𑌜𑍍𑌜𑍍𑌯𑍇𑌷𑍍𑌠𑍇 𑌹𑌿 𑌕𑍈𑌕𑍇𑌯𑌿 𑌰𑌾𑌜𑍍𑌯𑌤𑌂𑌤𑍍𑌰𑌾𑌣𑌿 𑌪𑌾𑌰𑍍𑌥𑌿𑌵𑌾𑌃 ।
𑌸𑍍𑌥𑌾𑌪𑌯𑌂𑌤𑍍𑌯𑌨𑌵𑌦𑍍𑌯𑌾𑌂𑌗𑌿 𑌗𑍁𑌣𑌵𑌤𑍍𑌸𑍍𑌵𑌿𑌤𑌰𑍇𑌷𑍍𑌵𑌪𑌿 ॥ 24 ॥
𑌅𑌸𑌾𑌵𑌤𑍍𑌯𑌂𑌤𑌨𑌿𑌰𑍍𑌭𑌗𑍍𑌨𑌸𑍍𑌤𑌵 𑌪𑍁𑌤𑍍𑌰𑍋 𑌭𑌵𑌿𑌷𑍍𑌯𑌤𑌿 ।
𑌅𑌨𑌾𑌥𑌵𑌤𑍍𑌸𑍁𑌖𑍇𑌭𑍍𑌯𑌶𑍍𑌚 𑌰𑌾𑌜𑌵𑌂𑌶𑌾𑌚𑍍𑌚 𑌵𑌤𑍍𑌸𑌲𑍇 ॥ 25 ॥
𑌸𑌾𑌽𑌹𑌂 𑌤𑍍𑌵𑌦𑌰𑍍𑌥𑍇 𑌸𑌂𑌪𑍍𑌰𑌾𑌪𑍍𑌤𑌾 𑌤𑍍𑌵𑌂 𑌤𑍁 𑌮𑌾𑌂 𑌨𑌾𑌵𑌬𑍁𑌦𑍍𑌧𑍍𑌯𑌸𑍇 ।
𑌸𑌪𑌤𑍍𑌨𑌿 𑌵𑍃𑌦𑍍𑌧𑍌 𑌯𑌾 𑌮𑍇 𑌤𑍍𑌵𑌂 𑌪𑍍𑌰𑌦𑍇𑌯𑌂 𑌦𑌾𑌤𑍁𑌮𑌿𑌚𑍍𑌛𑌸𑌿 ॥ 26 ॥
𑌧𑍍𑌰𑍁𑌵𑌂 𑌤𑍁 𑌭𑌰𑌤𑌂 𑌰𑌾𑌮𑌃 𑌪𑍍𑌰𑌾𑌪𑍍𑌯 𑌰𑌾𑌜𑍍𑌯𑌮𑌕𑌂𑌟𑌕𑌮𑍍 ।
𑌦𑍇𑌶𑌾𑌂𑌤𑌰𑌂 𑌵𑌾 𑌨𑌯𑌿𑌤𑌾 𑌲𑍋𑌕𑌾𑌂𑌤𑌰𑌮𑌥𑌾𑌽𑌪𑌿 𑌵𑌾 ॥ 2 ॥
𑌬𑌾𑌲 𑌏𑌵 𑌹𑌿 𑌮𑌾𑌤𑍁𑌲𑍍𑌯𑌂 𑌭𑌰𑌤𑍋 𑌨𑌾𑌯𑌿𑌤𑌸𑍍𑌤𑍍𑌵𑌯𑌾 ।
𑌸𑌨𑍍𑌨𑌿𑌕𑌰𑍍𑌷𑌾𑌚𑍍𑌚 𑌸𑍌𑌹𑌾𑌰𑍍𑌦𑌂 𑌜𑌾𑌯𑌤𑍇 𑌸𑍍𑌥𑌾𑌵𑌰𑍇𑌷𑍍𑌵𑌪𑌿 ॥ 2 ॥
𑌭𑌰𑌤𑌸𑍍𑌯𑌾𑌪𑍍𑌯𑌨𑍁𑌵𑌶𑌶𑍍𑌶𑌤𑍍𑌰𑍁𑌘𑍍𑌨𑍋𑌽𑌪𑌿 𑌸𑌮𑌂 𑌗𑌤𑌃 ।
𑌲𑌕𑍍𑌷𑍍𑌮𑌣𑍋 𑌹𑌿 𑌯𑌥𑌾 𑌰𑌾𑌮𑌂 𑌤𑌥𑌾𑌽𑌸𑍌 𑌭𑌰𑌤𑌂 𑌗𑌤𑌃 ॥ 2 ॥
𑌶𑍍𑌰𑍂𑌯𑌤𑍇 𑌹𑌿 𑌦𑍍𑌰𑍁𑌮𑌃 𑌕𑌶𑍍𑌚𑌿𑌚𑍍𑌛𑍇𑌤𑍍𑌤𑌵𑍍𑌯𑍋 𑌵𑌨𑌜𑍀𑌵𑌿𑌭𑌿𑌃 ।
𑌸𑌨𑍍𑌨𑌿𑌕𑌰𑍍𑌷𑌾𑌦𑌿𑌷𑍀𑌕𑌾𑌭𑌿𑌰𑍍𑌮𑍋𑌚𑌿𑌤𑌃 𑌪𑌰𑌮𑌾𑌦𑍍𑌭𑌯𑌾𑌤𑍍 ॥ 30 ॥
𑌗𑍋𑌪𑍍𑌤𑌾 𑌹𑌿 𑌰𑌾𑌮𑌂 𑌸𑍌𑌮𑌿𑌤𑍍𑌰𑌿𑌰𑍍𑌲𑌕𑍍𑌷𑍍𑌮𑌣𑌂 𑌚𑌾𑌪𑌿 𑌰𑌾𑌘𑌵𑌃 ।
𑌅𑌶𑍍𑌵𑌿𑌨𑍋𑌰𑌿𑌵 𑌸𑍌𑌭𑍍𑌰𑌾𑌤𑍍𑌰𑌂 𑌤𑌯𑍋𑌰𑍍𑌲𑍋𑌕𑍇𑌷𑍁 𑌵𑌿𑌶𑍍𑌰𑍁𑌤𑌮𑍍 ॥ 31 ॥
𑌤𑌸𑍍𑌮𑌾𑌨𑍍𑌨 𑌲𑌕𑍍𑌷𑍍𑌮𑌣𑍇 𑌰𑌾𑌮𑌃 𑌪𑌾𑌪𑌂 𑌕𑌿𑌂𑌚𑌿𑌤𑍍𑌕𑌰𑌿𑌷𑍍𑌯𑌤𑌿 ।
𑌰𑌾𑌮𑌸𑍍𑌤𑍁 𑌭𑌰𑌤𑍇 𑌪𑌾𑌪𑌂 𑌕𑍁𑌰𑍍𑌯𑌾𑌦𑌿𑌤𑌿 𑌨 𑌸𑌂𑌶𑌯𑌃 ॥ 32 ॥
𑌤𑌸𑍍𑌮𑌾𑌦𑍍𑌰𑌾𑌜𑌗𑍃𑌹𑌾𑌦𑍇𑌵 𑌵𑌨𑌂 𑌗𑌚𑍍𑌛𑌤𑍁 𑌤𑍇 𑌸𑍁𑌤𑌃 ।
𑌏𑌤𑌦𑍍𑌧𑌿 𑌰𑍋𑌚𑌤𑍇 𑌮𑌹𑍍𑌯𑌂 𑌭𑍃𑌶𑌂 𑌚𑌾𑌪𑌿 𑌹𑌿𑌤𑌂 𑌤𑌵 ॥ 33 ॥
𑌏𑌵𑌂 𑌤𑍇 𑌜𑍍𑌞𑌾𑌤𑌿𑌪𑌕𑍍𑌷𑌸𑍍𑌯 𑌶𑍍𑌰𑍇𑌯𑌶𑍍𑌚𑍈𑌵 𑌭𑌵𑌿𑌷𑍍𑌯𑌤𑌿 ।
𑌯𑌦𑌿 𑌚𑍇𑌦𑍍𑌭𑌰𑌤𑍋 𑌧𑌰𑍍𑌮𑌾𑌤𑍍𑌪𑌿𑌤𑍍𑌰𑍍𑌯𑌂 𑌰𑌾𑌜𑍍𑌯𑌮𑌵𑌾𑌪𑍍𑌸𑍍𑌯𑌸𑌿 ॥ 34 ॥
𑌸 𑌤𑍇 𑌸𑍁𑌖𑍋𑌚𑌿𑌤𑍋 𑌬𑌾𑌲𑍋 𑌰𑌾𑌮𑌸𑍍𑌯 𑌸𑌹𑌜𑍋 𑌰𑌿𑌪𑍁𑌃 ।
𑌸𑌮𑍃𑌦𑍍𑌧𑌾𑌰𑍍𑌥𑌸𑍍𑌯 𑌨𑌷𑍍𑌟𑌾𑌰𑍍𑌥𑍋 𑌜𑍀𑌵𑌿𑌷𑍍𑌯𑌤𑌿 𑌕𑌥𑌂 𑌵𑌶𑍇 ॥ 35 ॥
𑌅𑌭𑌿𑌦𑍍𑌰𑍁𑌤𑌮𑌿𑌵𑌾𑌰𑌣𑍍𑌯𑍇 𑌸𑌿𑌂𑌹𑍇𑌨 𑌗𑌜𑌯𑍂𑌥𑌪𑌮𑍍 ।
𑌪𑍍𑌰𑌚𑍍𑌛𑌾𑌦𑍍𑌯𑌮𑌾𑌨𑌂 𑌰𑌾𑌮𑍇𑌣 𑌭𑌰𑌤𑌂 𑌤𑍍𑌰𑌾𑌤𑍁𑌮𑌰𑍍𑌹𑌸𑌿 ॥ 36 ॥
𑌦𑌰𑍍𑌪𑌾𑌨𑍍𑌨𑌿𑌰𑌾𑌕𑍃𑌤𑌾 𑌪𑍂𑌰𑍍𑌵𑌂 𑌤𑍍𑌵𑌯𑌾 𑌸𑍌𑌭𑌾𑌗𑍍𑌯𑌵𑌤𑍍𑌤𑌯𑌾 ।
𑌰𑌾𑌮𑌮𑌾𑌤𑌾 𑌸𑌪𑌤𑍍𑌨𑍀 𑌤𑍇 𑌕𑌥𑌂 𑌵𑍈𑌰𑌂 𑌨 𑌶𑌾𑌤𑌯𑍇𑌤𑍍 ॥ 3 ॥
𑌯𑌦𑌾 𑌹𑌿 𑌰𑌾𑌮𑌃 𑌪𑍃𑌥𑌿𑌵𑍀𑌮𑌵𑌾𑌪𑍍𑌸𑍍𑌯𑌤𑌿 𑌪𑍍𑌰𑌭𑍂𑌤𑌰𑌤𑍍𑌨𑌾𑌕𑌰𑌶𑍈𑌲𑌪𑌤𑍍𑌤𑌨𑌾𑌮𑍍 ।
𑌤𑌦𑌾 𑌗𑌮𑌿𑌷𑍍𑌯𑌸𑍍𑌯𑌶𑍁𑌭𑌂 𑌪𑌰𑌾𑌭𑌵𑌂 𑌸𑌹𑍈𑌵 𑌦𑍀𑌨𑌾 𑌭𑌰𑌤𑍇𑌨 𑌭𑌾𑌮𑌿𑌨𑌿 ॥ 3 ॥
𑌯𑌦𑌾 𑌹𑌿 𑌰𑌾𑌮𑌃 𑌪𑍃𑌥𑌿𑌵𑍀𑌮𑌵𑌾𑌪𑍍𑌸𑍍𑌯𑌤𑌿 𑌧𑍍𑌰𑍁𑌵𑌂 𑌪𑍍𑌰𑌣𑌷𑍍𑌟𑍋 𑌭𑌰𑌤𑍋 𑌭𑌵𑌿𑌷𑍍𑌯𑌤𑌿 ।
𑌅𑌤𑍋 𑌹𑌿 𑌸𑌂𑌚𑌿𑌂𑌤𑌯 𑌰𑌾𑌜𑍍𑌯𑌮𑌾𑌤𑍍𑌮𑌜𑍇 𑌪𑌰𑌸𑍍𑌯 𑌚𑍈𑌵𑌾𑌦𑍍𑌯 𑌵𑌿𑌵𑌾𑌸𑌕𑌾𑌰𑌣𑌮𑍍 ॥ 3 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌅𑌷𑍍𑌟𑌮𑌸𑍍𑌸𑌰𑍍𑌗𑌃 ॥
