𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌤𑌃 𑌪𑍍𑌰𑌭𑌾𑌤𑍇 𑌜𑌨𑌕𑌃 𑌕𑍃𑌤𑌕𑌰𑍍𑌮𑌾 𑌮𑌹𑌰𑍍𑌷𑌿𑌭𑌿𑌃 ।
𑌉𑌵𑌾𑌚 𑌵𑌾𑌕𑍍𑌯𑌂 𑌵𑌾𑌕𑍍𑌯𑌜𑍍𑌞 𑌶𑍍𑌶𑌤𑌾𑌨𑌂𑌦𑌂 𑌪𑍁𑌰𑍋𑌹𑌿𑌤𑌮𑍍 ॥ 1 ॥
𑌭𑍍𑌰𑌾𑌤𑌾 𑌮𑌮 𑌮𑌹𑌾𑌤𑍇𑌜𑌾 𑌯𑌵𑍀𑌯𑌾𑌨𑌤𑌿𑌧𑌾𑌰𑍍𑌮𑌿𑌕𑌃 ।
𑌕𑍁𑌶𑌧𑍍𑌵𑌜 𑌇𑌤𑌿 𑌖𑍍𑌯𑌾𑌤𑌃 𑌪𑍁𑌰𑍀𑌮𑌧𑍍𑌯𑌵𑌸𑌚𑍍𑌛𑍁𑌭𑌾𑌮𑍍 ॥ 2 ॥
𑌵𑌾𑌰𑍍𑌯𑌾𑌫𑌲𑌕𑌪𑌰𑍍𑌯𑌂𑌤𑌾𑌂 𑌪𑌿𑌬𑌨𑍍𑌨𑌿𑌕𑍍𑌷𑍁𑌮𑌤𑍀𑌂 𑌨𑌦𑍀𑌮𑍍 ।
𑌸𑌾𑌂𑌕𑌾𑌶𑍍𑌯𑌾𑌂 𑌪𑍁𑌣𑍍𑌯𑌸𑌂𑌕𑌾𑌶𑌾𑌂 𑌵𑌿𑌮𑌾𑌨𑌮𑌿𑌵 𑌪𑍁𑌷𑍍𑌪𑌕𑌮𑍍 ॥ 3 ॥
𑌤𑌮𑌹𑌂 𑌦𑍍𑌰𑌷𑍍𑌟𑍁𑌮𑌿𑌚𑍍𑌛𑌾𑌮𑌿 𑌯𑌜𑍍𑌞𑌗𑍋𑌪𑍍𑌤𑌾 𑌸 𑌮𑍇 𑌮𑌤𑌃 ।
𑌪𑍍𑌰𑍀𑌤𑌿𑌂 𑌸𑍋𑌽𑌪𑌿 𑌮𑌹𑌾𑌤𑍇𑌜𑌾 𑌇𑌮𑌾𑌂 𑌭𑍋𑌕𑍍𑌤𑌾 𑌮𑌯𑌾 𑌸𑌹 ॥ 4 ॥
𑌏𑌵𑌮𑍁𑌕𑍍𑌤𑍇 𑌤𑍁 𑌵𑌚𑌨𑍇 𑌶𑌤𑌾𑌨𑌂𑌦𑌸𑍍𑌯 𑌸𑌨𑍍𑌨𑌿𑌧𑍌 ।
𑌆𑌗𑌤𑌾𑌃 𑌕𑍇𑌚𑌿𑌦𑌵𑍍𑌯𑌗𑍍𑌰𑌾 𑌜𑌨𑌕𑌸𑍍𑌤𑌾𑌨𑍍 𑌸𑌮𑌾𑌦𑌿𑌶𑌤𑍍 ॥ 5 ॥
𑌶𑌾𑌸𑌨𑌾𑌤𑍍𑌤𑍁 𑌨𑌰𑍇𑌂𑌦𑍍𑌰𑌸𑍍𑌯 𑌪𑍍𑌰𑌯𑌯𑍁𑌶𑍍𑌶𑍀𑌘𑍍𑌰𑌵𑌾𑌜𑌿𑌭𑌿𑌃 ।
𑌸𑌮𑌾𑌨𑍇𑌤𑍁𑌂 𑌨𑌰𑌵𑍍𑌯𑌾𑌘𑍍𑌰𑌂 𑌵𑌿𑌷𑍍𑌣𑍁𑌮𑌿𑌂𑌦𑍍𑌰𑌾𑌜𑍍𑌞𑌯𑌾 𑌯𑌥𑌾 ॥ 6 ॥
𑌸𑌾𑌂𑌕𑌾𑌶𑍍𑌯𑌾𑌂 𑌤𑍇 𑌸𑌮𑌾𑌗𑌤𑍍𑌯 𑌦𑌦𑍃𑌶𑍁𑌶𑍍𑌚 𑌕𑍁𑌶𑌧𑍍𑌵𑌜𑌮𑍍 ।
𑌨𑍍𑌯𑌵𑍇𑌦𑌯𑌨𑍍𑌯𑌥𑌾𑌵𑍃𑌤𑍍𑌤𑌂 𑌜𑌨𑌕𑌸𑍍𑌯 𑌚 𑌚𑌿𑌂𑌤𑌿𑌤𑌮𑍍 ॥ ॥
𑌤𑌦𑍍𑌵𑍃𑌤𑍍𑌤𑌂 𑌨𑍃𑌪𑌤𑌿 𑌶𑍍𑌶𑍃𑌤𑍍𑌵𑌾 𑌦𑍂𑌤𑌶𑍍𑌰𑍇𑌷𑍍𑌠𑍈𑌰𑍍𑌮𑌹𑌾𑌬𑌲𑍈𑌃 ।
𑌅𑌜𑍍𑌞𑌾𑌯𑌾𑌽𑌥 𑌨𑌰𑍇𑌂𑌦𑍍𑌰𑌸𑍍𑌯 𑌆𑌜𑌗𑌾𑌮 𑌕𑍁𑌶𑌧𑍍𑌵𑌜𑌃 ॥ ॥
𑌸 𑌦𑌦𑌰𑍍𑌶 𑌮𑌹𑌾𑌤𑍍𑌮𑌾𑌨𑌂 𑌜𑌨𑌕𑌂 𑌧𑌰𑍍𑌮𑌵𑌤𑍍𑌸𑌲𑌮𑍍 ।
𑌸𑍋𑌽𑌭𑌿𑌵𑌾𑌦𑍍𑌯 𑌶𑌤𑌾𑌨𑌂𑌦𑌂 𑌰𑌾𑌜𑌾𑌨𑌂 𑌚𑌾𑌪𑌿 𑌧𑌾𑌰𑍍𑌮𑌿𑌕𑌮𑍍 ॥ ॥
𑌰𑌾𑌜𑌾𑌰𑍍𑌹𑌂 𑌪𑌰𑌮𑌂 𑌦𑌿𑌵𑍍𑌯𑌮𑌾𑌸𑌨𑌂 𑌚𑌾𑌽𑌧𑍍𑌯𑌰𑍋𑌹𑌤 ।
𑌉𑌪𑌵𑌿𑌷𑍍𑌟𑌾𑌵𑍁𑌭𑍌 𑌤𑍌 𑌤𑍁 𑌭𑍍𑌰𑌾𑌤𑌰𑌾𑌵𑌤𑌿𑌤𑍇𑌜𑌸𑍌 ॥ 10 ॥
𑌪𑍍𑌰𑍇𑌷𑌯𑌾𑌮𑌾𑌸𑌤𑍁𑌰𑍍𑌵𑍀𑌰𑍌 𑌮𑌂𑌤𑍍𑌰𑌿𑌶𑍍𑌰𑍇𑌷𑍍𑌠𑌂 𑌸𑍁𑌦𑌾𑌮𑌨𑌮𑍍 ।
𑌗𑌚𑍍𑌛 𑌮𑌂𑌤𑍍𑌰𑌿𑌪𑌤𑍇 𑌶𑍀𑌘𑍍𑌰𑌮𑍈𑌕𑍍𑌷𑍍𑌵𑌾𑌕𑍁𑌮𑌮𑌿𑌤𑌪𑍍𑌰𑌭𑌮𑍍 ॥ 11 ॥
𑌆𑌤𑍍𑌮𑌜𑍈𑌸𑍍𑌸𑌹 𑌦𑍁𑌰𑍍𑌧𑌰𑍍𑌷𑌮𑌾𑌨𑌯𑌸𑍍𑌵 𑌸𑌮𑌂𑌤𑍍𑌰𑌿𑌣𑌮𑍍 ।
𑌔𑌪𑌕𑌾𑌰𑍍𑌯𑌾𑌂 𑌸 𑌗𑌤𑍍𑌵𑌾 𑌤𑍁 𑌰𑌘𑍂𑌣𑌾𑌂 𑌕𑍁𑌲𑌵𑌰𑍍𑌧𑌨𑌮𑍍 ॥ 12 ॥
𑌦𑌦𑌰𑍍𑌶 𑌶𑌿𑌰𑌸𑌾 𑌚𑍈𑌨𑌮𑌭𑌿𑌵𑌾𑌦𑍍𑌯𑍇𑌦𑌮𑌬𑍍𑌰𑌵𑍀𑌤𑍍 ।
𑌅𑌯𑍋𑌧𑍍𑌯𑌾𑌧𑌿𑌪𑌤𑍇 𑌵𑍀𑌰 𑌵𑍈𑌦𑍇𑌹𑍋 𑌮𑌿𑌥𑌿𑌲𑌾𑌧𑌿𑌪𑌃 ॥ 13 ॥
𑌸 𑌤𑍍𑌵𑌾𑌂 𑌦𑍍𑌰𑌷𑍍𑌟𑍁𑌂 𑌵𑍍𑌯𑌵𑌸𑌿𑌤𑌸𑍍𑌸𑍋𑌪𑌾𑌧𑍍𑌯𑌾𑌯𑌪𑍁𑌰𑍋𑌹𑌿𑌤𑌮𑍍 ।
𑌮𑌂𑌤𑍍𑌰𑌿𑌶𑍍𑌰𑍇𑌷𑍍𑌠𑌵𑌚 𑌶𑍍𑌶𑍃𑌤𑍍𑌵𑌾 𑌰𑌾𑌜𑌾 𑌸𑌰𑍍𑌷𑌿𑌗𑌣𑌸𑍍𑌤𑌦𑌾 ॥ 14 ॥
𑌸𑌬𑌂𑌧𑍁𑌰𑌗𑌮𑌤𑍍𑌤𑌤𑍍𑌰 𑌜𑌨𑌕𑍋 𑌯𑌤𑍍𑌰 𑌵𑌰𑍍𑌤𑌤𑍇 ।
𑌸 𑌰𑌾𑌜𑌾 𑌮𑌂𑌤𑍍𑌰𑌿𑌸𑌹𑌿𑌤 𑌸𑍍𑌸𑍋𑌪𑌾𑌧𑍍𑌯𑌾𑌯𑌃 𑌸𑌬𑌾𑌂𑌧𑌵𑌃 ॥ 15 ॥
𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌦𑌾𑌂 𑌶𑍍𑌰𑍇𑌷𑍍𑌠𑍋 𑌵𑍈𑌦𑍇𑌹𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌵𑌿𑌦𑌿𑌤𑌂 𑌤𑍇 𑌮𑌹𑌾𑌰𑌾𑌜 𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌦𑍈𑌵𑌤𑌮𑍍 ॥ 16 ॥
𑌵𑌕𑍍𑌤𑌾 𑌸𑌰𑍍𑌵𑍇𑌷𑍁 𑌕𑍃𑌤𑍍𑌯𑍇𑌷𑍁 𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍃𑌷𑌿𑌃 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌾𑌭𑍍𑌯𑌨𑍁𑌜𑍍𑌞𑌾𑌤𑌸𑍍𑌸𑌹 𑌸𑌰𑍍𑌵𑍈𑌰𑍍𑌮𑌹𑌰𑍍𑌷𑌿𑌭𑌿𑌃 ॥ 1 ॥
𑌏𑌷 𑌵𑌕𑍍𑌷𑍍𑌯𑌤𑌿 𑌧𑌰𑍍𑌮𑌾𑌤𑍍𑌮𑌾 𑌵𑌸𑌿𑌷𑍍𑌠𑍋 𑌮𑍇 𑌯𑌥𑌾𑌕𑍍𑌰𑌮𑌮𑍍 ।
𑌏𑌵𑌮𑍁𑌕𑍍𑌤𑍍𑌵𑌾 𑌨𑌰𑌶𑍍𑌰𑍇𑌷𑍍𑌠𑍇 𑌰𑌾𑌜𑍍𑌞𑌾𑌂 𑌮𑌧𑍍𑌯𑍇 𑌮𑌹𑌾𑌤𑍍𑌮𑌨𑌾𑌮𑍍 ॥ 1 ॥
𑌤𑍂𑌷𑍍𑌣𑍀𑌂𑌭𑍂𑌤𑍇 𑌦𑌶𑌰𑌥𑍇 𑌵𑌸𑌿𑌷𑍍𑌠𑍋 𑌭𑌗𑌵𑌾𑌨𑍃𑌷𑌿𑌃 ।
𑌉𑌵𑌾𑌚 𑌵𑌾𑌕𑍍𑌯𑌂 𑌵𑌾𑌕𑍍𑌯𑌜𑍍𑌞𑍋 𑌵𑍈𑌦𑍇𑌹𑌂 𑌸𑌪𑍁𑌰𑍋𑌧𑌸𑌮𑍍 ॥ 1 ॥
𑌅𑌵𑍍𑌯𑌕𑍍𑌤𑌪𑍍𑌰𑌭𑌵𑍋 𑌬𑍍𑌰𑌹𑍍𑌮𑌾 𑌶𑌾𑌶𑍍𑌵𑌤𑍋 𑌨𑌿𑌤𑍍𑌯 𑌅𑌵𑍍𑌯𑌯𑌃 ।
𑌤𑌸𑍍𑌮𑌾𑌨𑍍𑌮𑌰𑍀𑌚𑌿 𑌸𑍍𑌸𑌂𑌜𑌜𑍍𑌞𑍇 𑌮𑌰𑍀𑌚𑍇𑌃 𑌕𑌾𑌶𑍍𑌯𑌪𑌃 𑌸𑍁𑌤𑌃 ॥ 20 ॥
𑌵𑌿𑌵𑌸𑍍𑌵𑌾𑌨𑍍 𑌕𑌾𑌶𑍍𑌯𑌪𑌾𑌜𑍍𑌜𑌜𑍍𑌞𑍇 𑌮𑌨𑍁𑌰𑍍𑌵𑍈𑌵𑌸𑍍𑌵𑌤 𑌸𑍍𑌸𑍍𑌮𑍃𑌤𑌃 ।
𑌮𑌨𑍁𑌃 𑌪𑍍𑌰𑌜𑌾𑌪𑌤𑌿𑌃 𑌪𑍂𑌰𑍍𑌵𑌮𑌿𑌕𑍍𑌷𑍍𑌵𑌾𑌕𑍁𑌸𑍍𑌤𑍁 𑌮𑌨𑍋𑌸𑍍𑌸𑍁𑌤𑌃 ॥ 21 ॥
𑌤𑌮𑌿𑌕𑍍𑌷𑍍𑌵𑌾𑌕𑍁𑌮𑌯𑍋𑌧𑍍𑌯𑌾𑌯𑌾𑌂 𑌰𑌾𑌜𑌾𑌨𑌂 𑌵𑌿𑌦𑍍𑌧𑌿 𑌪𑍂𑌰𑍍𑌵𑌕𑌮𑍍 ।
𑌇𑌕𑍍𑌷𑍍𑌵𑌾𑌕𑍋𑌸𑍍𑌤𑍁 𑌸𑍁𑌤𑌶𑍍𑌶𑍍𑌰𑍀𑌮𑌾𑌨𑍍 𑌕𑍁𑌕𑍍𑌷𑌿𑌰𑌿𑌤𑍍𑌯𑍇𑌵 𑌵𑌿𑌶𑍍𑌰𑍁𑌤𑌃 ॥ 22 ॥
𑌕𑍁𑌕𑍍𑌷𑍇𑌰𑌥𑌾𑌤𑍍𑌮𑌜𑌃 𑌶𑍍𑌰𑍀𑌮𑌾𑌨𑍍 𑌵𑌿𑌕𑍁𑌕𑍍𑌷𑌿𑌰𑍁𑌦𑌪𑌦𑍍𑌯𑌤 ।
𑌵𑌿𑌕𑍁𑌕𑍍𑌷𑍇𑌸𑍍𑌤𑍁 𑌮𑌹𑌾𑌤𑍇𑌜𑌾 𑌬𑌾𑌣𑌃 𑌪𑍁𑌤𑍍𑌰𑌃 𑌪𑍍𑌰𑌤𑌾𑌪𑌵𑌾𑌨𑍍 ॥ 23 ॥
𑌬𑌾𑌣𑌸𑍍𑌯 𑌤𑍁 𑌮𑌹𑌾𑌤𑍇𑌜𑌾 𑌅𑌨𑌰𑌣𑍍𑌯𑌃 𑌪𑍍𑌰𑌤𑌾𑌪𑌵𑌾𑌨𑍍 ।
𑌅𑌨𑌰𑌣𑍍𑌯𑌾𑌤𑍍𑌪𑍃𑌥𑍁𑌰𑍍𑌜𑌜𑍍𑌞𑍇 𑌤𑍍𑌰𑌿𑌶𑌂𑌕𑍁𑌸𑍍𑌤𑍁 𑌪𑍃𑌥𑍋𑌸𑍍𑌸𑍁𑌤𑌃 ॥ 24 ॥
𑌤𑍍𑌰𑌿𑌶𑌂𑌕𑍋𑌰𑌭𑌵𑌤𑍍𑌪𑍁𑌤𑍍𑌰𑍋 𑌦𑍁𑌂𑌦𑍁𑌮𑌾𑌰𑍋 𑌮𑌹𑌾𑌯𑌶𑌾𑌃 ।
𑌯𑍁𑌵𑌨𑌾𑌶𑍍𑌵𑌸𑍁𑌤𑌸𑍍𑌤𑍍𑌵𑌾𑌸𑍀𑌨𑍍𑌮𑌾𑌂𑌧𑌾𑌤𑌾 𑌪𑍃𑌥𑌿𑌵𑍀𑌪𑌤𑌿𑌃 ॥ 25 ॥
𑌮𑌾𑌂𑌧𑌾𑌤𑍁𑌸𑍍𑌤𑍁 𑌸𑍁𑌤 𑌶𑍍𑌶𑍍𑌰𑍀𑌮𑌾𑌨𑍍 𑌸𑍁𑌸𑌂𑌧𑌿𑌰𑍁𑌦𑌪𑌦𑍍𑌯𑌤 ।
𑌸𑍁𑌸𑌂𑌧𑍇𑌰𑌪𑌿 𑌪𑍁𑌤𑍍𑌰𑍌 𑌦𑍍𑌵𑍌 𑌧𑍍𑌰𑍁𑌵𑌸𑌂𑌧𑌿𑌃 𑌪𑍍𑌰𑌸𑍇𑌨𑌜𑌿𑌤𑍍 ॥ 26 ॥
𑌯𑌶𑌸𑍍𑌵𑍀 𑌧𑍍𑌰𑍁𑌵𑌸𑌂𑌧𑍇𑌸𑍍𑌤𑍁 𑌭𑌰𑌤𑍋 𑌨𑌾𑌮 𑌨𑌾𑌮𑌤𑌃 ।
𑌭𑌰𑌤𑌾𑌤𑍍𑌤𑍁 𑌮𑌹𑌾𑌤𑍇𑌜𑌾 𑌅𑌸𑌿𑌤𑍋 𑌨𑌾𑌮 𑌜𑌾𑌤𑌵𑌾𑌨𑍍 ॥ 2 ॥
𑌯𑌸𑍍𑌯𑍈𑌤𑍇 𑌪𑍍𑌰𑌤𑌿𑌰𑌾𑌜𑌾𑌨 𑌉𑌦𑌪𑌦𑍍𑌯𑌂𑌤 𑌶𑌤𑍍𑌰𑌵𑌃 ।
𑌹𑍈𑌹𑌯𑌾𑌸𑍍𑌤𑌾𑌲𑌜𑌂𑌘𑌾𑌶𑍍𑌚 𑌶𑍂𑌰𑌾𑌶𑍍𑌚 𑌶𑌶𑌿𑌬𑌿𑌂𑌦𑌵𑌃 ॥ 2 ॥
𑌤𑌾𑌂𑌸𑍍𑌤𑍁 𑌸 𑌪𑍍𑌰𑌤𑌿𑌯𑍁𑌧𑍍𑌯𑌨𑍍 𑌵𑍈 𑌯𑍁𑌦𑍍𑌧𑍇 𑌰𑌾𑌜𑌾 𑌪𑍍𑌰𑌵𑌾𑌸𑌿𑌤𑌃 ।
𑌹𑌿𑌮𑌵𑌂𑌤𑌮𑍁𑌪𑌾𑌗𑌮𑍍𑌯 𑌭𑍃𑌗𑍁𑌪𑍍𑌰𑌸𑍍𑌰𑌵𑌣𑍇𑌽𑌵𑌸𑌤𑍍 ॥ 2 ॥
𑌅𑌸𑌿𑌤𑍋𑌽𑌲𑍍𑌪𑌬𑌲𑍋 𑌰𑌾𑌜𑌾 𑌮𑌂𑌤𑍍𑌰𑌿𑌭𑌿𑌸𑍍𑌸𑌹𑌿𑌤𑌸𑍍𑌤𑌦𑌾 ।
𑌦𑍍𑌵𑍇 𑌚𑌾𑌸𑍍𑌯 𑌭𑌾𑌰𑍍𑌯𑍇 𑌗𑌰𑍍𑌭𑌿𑌣𑍍𑌯𑍌 𑌬𑌭𑍂𑌵𑌤𑍁𑌰𑌿𑌤𑌿 𑌶𑍍𑌰𑍁𑌤𑌮𑍍 ॥ 30 ॥
𑌏𑌕𑌾 𑌗𑌰𑍍𑌭𑌵𑌿𑌨𑌾𑌶𑌾𑌯 𑌸𑌪𑌤𑍍𑌨𑍍𑌯𑍈 𑌸𑌗𑌰𑌂 𑌦𑌦𑍌 ।
𑌤𑌤 𑌶𑍍𑌶𑍈𑌲𑌵𑌰𑌂 𑌰𑌮𑍍𑌯𑌂 𑌬𑌭𑍂𑌵𑌾𑌭𑌿𑌰𑌤𑍋 𑌮𑍁𑌨𑌿𑌃 ॥ 31 ॥
𑌭𑌾𑌰𑍍𑌗𑌵𑌶𑍍𑌚𑍍𑌯𑌵𑌨𑍋 𑌨𑌾𑌮 𑌹𑌿𑌮𑌵𑌂𑌤𑌮𑍁𑌪𑌾𑌶𑍍𑌰𑌿𑌤𑌃 ।
𑌤𑌤𑍍𑌰𑍈𑌕𑌾 𑌤𑍁 𑌮𑌹𑌾𑌭𑌾𑌗𑌾 𑌭𑌾𑌰𑍍𑌗𑌵𑌂 𑌦𑍇𑌵𑌵𑌰𑍍𑌚𑌸𑌮𑍍 ॥ 32 ॥
𑌵𑌵𑌂𑌦𑍇 𑌪𑌦𑍍𑌮𑌪𑌤𑍍𑌰𑌾𑌕𑍍𑌷𑍀 𑌕𑌾𑌂𑌕𑍍𑌷𑌂𑌤𑍀 𑌸𑍁𑌤𑌮𑌾𑌤𑍍𑌮𑌨𑌃 ।
𑌤𑌮𑍃𑌷𑌿𑌂 𑌸𑌾𑌽𑌭𑍍𑌯𑍁𑌪𑌾𑌗𑌮𑍍𑌯 𑌕𑌾𑌲𑌿𑌂𑌦𑍀 𑌚𑌾𑌭𑍍𑌯𑌵𑌾𑌦𑌯𑌤𑍍 ॥ 33 ॥
𑌸 𑌤𑌾𑌮𑌭𑍍𑌯𑌵𑌦𑌦𑍍𑌵𑌿𑌪𑍍𑌰𑌃 𑌪𑍁𑌤𑍍𑌰𑍇𑌪𑍍𑌸𑍁𑌂 𑌪𑍁𑌤𑍍𑌰𑌜𑌨𑍍𑌮𑌨𑌿 ।
𑌤𑌵 𑌕𑍁𑌕𑍍𑌷𑍌 𑌮𑌹𑌾𑌭𑌾𑌗𑍇 𑌸𑍁𑌪𑍁𑌤𑍍𑌰𑌸𑍍𑌸𑍁𑌮𑌹𑌾𑌬𑌲𑌃 ॥ 34 ॥
𑌮𑌹𑌾𑌵𑍀𑌰𑍍𑌯𑍋 𑌮𑌹𑌾𑌤𑍇𑌜𑌾 𑌅𑌚𑌿𑌰𑌾𑌤𑍍𑌸𑌂𑌜𑌨𑌿𑌷𑍍𑌯𑌤𑌿 ।
𑌗𑌰𑍇𑌣 𑌸𑌹𑌿𑌤 𑌶𑍍𑌶𑍍𑌰𑍀𑌮𑌾𑌨𑍍 𑌮𑌾 𑌶𑍁𑌚𑌃 𑌕𑌮𑌲𑍇𑌕𑍍𑌷𑌣𑍇 ॥ 35 ॥
𑌚𑍍𑌯𑌵𑌨𑌂 𑌤𑍁 𑌨𑌮𑌸𑍍𑌕𑍃𑌤𑍍𑌯 𑌰𑌾𑌜𑌪𑍁𑌤𑍍𑌰𑍀 𑌪𑌤𑌿𑌵𑍍𑌰𑌤𑌾 ।
𑌪𑌤𑌿𑌶𑍋𑌕𑌾𑌤𑍁𑌰𑌾 𑌤𑌸𑍍𑌮𑌾𑌤𑍍𑌪𑍁𑌤𑍍𑌰𑌂 𑌦𑍇𑌵𑍀 𑌵𑍍𑌯𑌜𑌾𑌯𑌤 ॥ 36 ॥
𑌸𑌪𑌤𑍍𑌨𑍍𑌯𑌾 𑌤𑍁 𑌗𑌰𑌸𑍍𑌤𑌸𑍍𑌯𑍈 𑌦𑌤𑍍𑌤𑍋 𑌗𑌰𑍍𑌭𑌜𑌿𑌘𑌾𑌂𑌸𑌯𑌾 ।
𑌸𑌹 𑌤𑍇𑌨 𑌗𑌰𑍇𑌣𑍈𑌵 𑌜𑌾𑌤𑌃 𑌸 𑌸𑌗𑌰𑍋𑌽𑌭𑌵𑌤𑍍 ॥ 3 ॥
𑌸𑌗𑌰𑌸𑍍𑌯𑌾𑌸𑌮𑌂𑌜𑌸𑍍𑌤𑍁 𑌅𑌸𑌮𑌂𑌜𑌾𑌤𑍍𑌤𑌥𑌾𑌂𑌽𑌶𑍁𑌮𑌾𑌨𑍍 ।
𑌦𑌿𑌲𑍀𑌪𑍋𑌂𑌽𑌶𑍁𑌮𑌤𑌃 𑌪𑍁𑌤𑍍𑌰𑍋 𑌦𑌿𑌲𑍀𑌪𑌸𑍍𑌯 𑌭𑌗𑍀𑌰𑌥𑌃 ॥ 3 ॥
𑌭𑌗𑍀𑌰𑌥𑌾𑌤𑍍𑌕𑌕𑍁𑌤𑍍𑌸𑍍𑌥𑌶𑍍𑌚 𑌕𑌕𑍁𑌤𑍍𑌸𑍍𑌥𑌸𑍍𑌯 𑌰𑌘𑍁𑌸𑍍𑌸𑍁𑌤𑌃 ।
𑌰𑌘𑍋𑌸𑍍𑌤𑍁 𑌪𑍁𑌤𑍍𑌰𑌸𑍍𑌤𑍇𑌜𑌸𑍍𑌵𑍀 𑌪𑍍𑌰𑌵𑍃𑌦𑍍𑌧𑌃 𑌪𑍁𑌰𑍁𑌷𑌾𑌦𑌕𑌃 ॥ 3 ॥
𑌕𑌲𑍍𑌮𑌾𑌷𑌪𑌾𑌦𑍋 𑌹𑍍𑌯𑌭𑌵𑌤𑍍𑌤𑌸𑍍𑌮𑌾𑌜𑍍𑌜𑌾𑌤𑌸𑍍𑌤𑍁 𑌶𑌂𑌖𑌣𑌃 ।
𑌸𑍁𑌦𑌰𑍍𑌶𑌨𑌃 𑌶𑌂𑌘𑌣𑌸𑍍𑌯 𑌅𑌗𑍍𑌨𑌿𑌵𑌰𑍍𑌣 𑌸𑍍𑌸𑍁𑌦𑌰𑍍𑌶𑌨𑌾𑌤𑍍 ॥ 40 ॥
𑌶𑍀𑌘𑍍𑌰𑌗𑌸𑍍𑌤𑍍𑌵𑌗𑍍𑌨𑌿𑌵𑌰𑍍𑌣𑌸𑍍𑌯 𑌶𑍀𑌘𑍍𑌰𑌗𑌸𑍍𑌯 𑌮𑌰𑍁 𑌸𑍍𑌸𑍁𑌤𑌃 ।
𑌮𑌰𑍋𑌃 𑌪𑍍𑌰𑌶𑍁𑌶𑍍𑌰𑍁𑌕𑌸𑍍𑌤𑍍𑌵𑌾𑌸𑍀𑌦𑌂𑌬𑌰𑍀𑌷𑌃 𑌪𑍍𑌰𑌶𑍁𑌶𑍍𑌰𑍃𑌕𑌾𑌤𑍍 ॥ 41 ॥
𑌅𑌂𑌬𑌰𑍀𑌷𑌸𑍍𑌯 𑌪𑍁𑌤𑍍𑌰𑍋𑌽𑌭𑍂𑌨𑍍𑌨𑌹𑍁𑌷𑌃 𑌪𑍃𑌥𑌿𑌵𑍀𑌪𑌤𑌿𑌃 ।
𑌨𑌹𑍁𑌷𑌸𑍍𑌯 𑌯𑌯𑌾𑌤𑌿𑌸𑍍𑌤𑍁 𑌨𑌾𑌭𑌾𑌗𑌸𑍍𑌤𑍁 𑌯𑌯𑌾𑌤𑌿𑌜𑌃 ॥ 42 ॥
𑌨𑌾𑌭𑌾𑌗𑌸𑍍𑌯 𑌬𑌭𑍂𑌵𑌾𑌜𑌃 𑌅𑌜𑌾𑌦𑍍𑌦𑌶𑌰𑌥𑍋𑌽𑌭𑌵𑌤𑍍 ।
𑌅𑌸𑍍𑌮𑌾𑌦𑍍𑌦𑌶𑌰𑌥𑌾𑌜𑍍𑌜𑌾𑌤𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 43 ॥
𑌆𑌦𑌿𑌵𑌂𑌶𑌵𑌿𑌶𑍁𑌦𑍍𑌧𑌾𑌨𑌾𑌂 𑌰𑌾𑌜𑍍𑌞𑌾𑌂 𑌪𑌰𑌮𑌧𑌰𑍍𑌮𑌿𑌣𑌾𑌮𑍍 ।
𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌜𑌾𑌤𑌾𑌨𑌾𑌂 𑌵𑍀𑌰𑌾𑌣𑌾𑌂 𑌸𑌤𑍍𑌯𑌵𑌾𑌦𑌿𑌨𑌾𑌮𑍍 ॥ 44 ॥
𑌰𑌾𑌮𑌲𑌕𑍍𑌷𑍍𑌮𑌣𑌯𑍋𑌰𑌰𑍍𑌥𑍇 𑌤𑍍𑌵𑌤𑍍𑌸𑍁𑌤𑍇 𑌵𑌰𑌯𑍇 𑌨𑍃𑌪 ।
𑌸𑌦𑍃𑌶𑌾𑌭𑍍𑌯𑌾𑌂 𑌨𑍃𑌪𑌶𑍍𑌰𑍇𑌷𑍍𑌠 𑌸𑌦𑍃𑌶𑍇 𑌦𑌾𑌤𑍁𑌮𑌰𑍍𑌹𑌸𑌿 ॥ 45 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
