𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌥𑌾 𑌤𑍁 𑌵𑌿𑌲𑌪𑌂𑌤𑍀𑌂 𑌤𑌾𑌂 𑌕𑍌𑌸𑌲𑍍𑌯𑌾𑌂 𑌰𑌾𑌮𑌮𑌾𑌤𑌰𑌮𑍍 ।
𑌉𑌵𑌾𑌚 𑌲𑌕𑍍𑌷𑍍𑌮𑌣𑍋 𑌦𑍀𑌨𑌸𑍍𑌤𑌤𑍍𑌕𑌾𑌲𑌸𑌦𑍃𑌶𑌂 𑌵𑌚𑌃 ॥ 1 ॥
𑌨 𑌰𑍋𑌚𑌤𑍇 𑌮𑌮𑌾𑌪𑍍𑌯𑍇𑌤𑌦𑌾𑌰𑍍𑌯𑍇 𑌯𑌦𑍍𑌰𑌾𑌘𑌵𑍋 𑌵𑌨𑌮𑍍 ।
𑌤𑍍𑌯𑌕𑍍𑌤𑍍𑌵𑌾 𑌰𑌾𑌜𑍍𑌯𑌶𑍍𑌰𑌿𑌯𑌂 𑌗𑌚𑍍𑌛𑍇𑌤𑍍 𑌸𑍍𑌤𑍍𑌰𑌿𑌯𑌾 𑌵𑌾𑌕𑍍𑌯𑌵𑌶𑌂 𑌗𑌤𑌃 ॥ 2 ॥
𑌵𑌿𑌪𑌰𑍀𑌤𑌶𑍍𑌚 𑌵𑍃𑌦𑍍𑌧𑌶𑍍𑌚 𑌵𑌿𑌷𑌯𑍈𑌶𑍍𑌚 𑌪𑍍𑌰𑌧𑌰𑍍𑌷𑌿𑌤𑌃 ।
𑌨𑍃𑌪𑌃 𑌕𑌿𑌮𑌿𑌵 𑌨 𑌬𑍍𑌰𑍂𑌯𑌾𑌚𑍍𑌚𑍋𑌦𑍍𑌯𑌮𑌾𑌨𑌸𑍍𑌸𑌮𑌨𑍍𑌮𑌥𑌃 ॥ 3 ॥
𑌨𑌾𑌸𑍍𑌯𑌾𑌪𑌰𑌾𑌧𑌂 𑌪𑌶𑍍𑌯𑌾𑌮𑌿 𑌨𑌾𑌪𑌿 𑌦𑍋𑌷𑌂 𑌤𑌥𑌾𑌵𑌿𑌧𑌮𑍍 ।
𑌯𑍇𑌨 𑌨𑌿𑌰𑍍𑌵𑌾𑌸𑍍𑌯𑌤𑍇 𑌰𑌾𑌷𑍍𑌟𑍍𑌰𑌾𑌦𑍍𑌵𑌨𑌵𑌾𑌸𑌾𑌯 𑌰𑌾𑌘𑌵𑌃 ॥ 4 ॥
𑌨 𑌤𑌂 𑌪𑌶𑍍𑌯𑌾𑌮𑍍𑌯𑌹𑌂 𑌲𑍋𑌕𑍇 𑌪𑌰𑍋𑌕𑍍𑌷𑌮𑌪𑌿 𑌯𑍋 𑌨𑌰𑌃 ।
𑌸𑍍𑌵𑌮𑌿𑌤𑍍𑌰𑍋𑌽𑌪𑌿 𑌨𑌿𑌰𑌸𑍍𑌤𑍋𑌽𑌪𑌿 𑌯𑍋𑌽𑌸𑍍𑌯 𑌦𑍋𑌷𑌮𑍁𑌦𑌾𑌹𑌰𑍇𑌤𑍍 ॥ 5 ॥
𑌦𑍇𑌵𑌕𑌲𑍍𑌪𑌮𑍃𑌜𑍁𑌂 𑌦𑌾𑌂𑌤𑌂 𑌰𑌿𑌪𑍂𑌣𑌾𑌮𑌪𑌿 𑌵𑌤𑍍𑌸𑌲𑌮𑍍 ।
𑌅𑌵𑍇𑌕𑍍𑌷𑌮𑌾𑌣𑌃 𑌕𑍋 𑌧𑌰𑍍𑌮𑌂 𑌤𑍍𑌯𑌜𑍇𑌤𑍍𑌪𑍁𑌤𑍍𑌰𑌮𑌕𑌾𑌰𑌣𑌾𑌤𑍍 ॥ 6 ॥
𑌤𑌦𑌿𑌦𑌂 𑌵𑌚𑌨𑌂 𑌰𑌾𑌜𑍍𑌞𑌃𑌪𑍁𑌨𑌰𑍍𑌬𑌾𑌲𑍍𑌯𑌮𑍁𑌪𑍇𑌯𑍁𑌷𑌃 ।
𑌪𑍁𑌤𑍍𑌰𑌃 𑌕𑍋 𑌹𑍃𑌦𑌯𑍇 𑌕𑍁𑌰𑍍𑌯𑌾𑌦𑍍𑌰𑌾𑌜𑌵𑍃𑌤𑍍𑌤𑌮𑌨𑍁𑌸𑍍𑌮𑌰𑌨𑍍 ॥ ॥
𑌯𑌾𑌵𑌦𑍇𑌵 𑌨 𑌜𑌾𑌨𑌾𑌤𑌿 𑌕𑌶𑍍𑌚𑌿𑌦𑌰𑍍𑌥𑌮𑌿𑌮𑌂 𑌨𑌰𑌃 ।
𑌤𑌾𑌵𑌦𑍇𑌵 𑌮𑌯𑌾 𑌸𑌾𑌰𑍍𑌧𑌮𑌾𑌤𑍍𑌮𑌸𑍍𑌥𑌂 𑌕𑍁𑌰𑍁 𑌶𑌾𑌸𑌨𑌮𑍍 ॥ ॥
𑌮𑌯𑌾 𑌪𑌾𑌰𑍍𑌶𑍍𑌵𑍇 𑌸𑌧𑌨𑍁𑌷𑌾 𑌤𑌵 𑌗𑍁𑌪𑍍𑌤𑌸𑍍𑌯 𑌰𑌾𑌘𑌵 ।
𑌕 𑌸𑍍𑌸𑌮𑌰𑍍𑌥𑍋𑌽𑌧𑌿𑌕𑌂 𑌕𑌰𑍍𑌤𑍁𑌂 𑌕𑍃𑌤𑌾𑌂𑌤𑌸𑍍𑌯𑍇𑌵 𑌤𑌿𑌷𑍍𑌠𑌤𑌃 ॥ ॥
𑌨𑌿𑌰𑍍𑌮𑌨𑍁𑌷𑍍𑌯𑌾𑌮𑌿𑌮𑌾𑌂 𑌕𑍃𑌤𑍍𑌸𑍍𑌨𑌾𑌮𑌯𑍋𑌧𑍍𑌯𑌾𑌂 𑌮𑌨𑍁𑌜𑌰𑍍𑌷𑌭 ।
𑌕𑌰𑌿𑌷𑍍𑌯𑌾𑌮𑌿 𑌶𑌰𑍈𑌸𑍍𑌤𑍀𑌕𑍍𑌷𑍍𑌣𑍈𑌰𑍍𑌯𑌦𑌿 𑌸𑍍𑌥𑌾𑌸𑍍𑌯𑌤𑌿 𑌵𑌿𑌪𑍍𑌰𑌿𑌯𑍇 ॥ 10 ॥
𑌭𑌰𑌤𑌸𑍍𑌯𑌾𑌥 𑌪𑌕𑍍𑌷𑍍𑌯𑍋 𑌵𑌾 𑌯𑍋 𑌵𑌾𑌽𑌸𑍍𑌯 𑌹𑌿𑌤𑌮𑌿𑌚𑍍𑌛𑌤𑌿 ।
𑌸𑌰𑍍𑌵𑌾𑌨𑍇𑌤𑌾𑌨𑍍𑌵𑌧𑌿𑌷𑍍𑌯𑌾𑌮𑌿 𑌮𑍃𑌦𑍁𑌰𑍍𑌹𑌿 𑌪𑌰𑌿𑌭𑍂𑌯𑌤𑍇 ॥ 11 ॥
𑌪𑍍𑌰𑍋𑌤𑍍𑌸𑌾𑌹𑌿𑌤𑍋𑌽𑌯𑌂 𑌕𑍈𑌕𑍇𑌯𑍍𑌯𑌾 𑌸 𑌦𑍁𑌷𑍍𑌟𑍋 𑌯𑌦𑌿 𑌨𑌃 𑌪𑌿𑌤𑌾 ।
𑌅𑌮𑌿𑌤𑍍𑌰𑌭𑍂𑌤𑍋 𑌨𑌿𑌸𑍍𑌸𑌂𑌗𑌂 𑌵𑌧𑍍𑌯𑌤𑌾𑌂 𑌬𑌧𑍍𑌯𑌤𑌾𑌮𑌪𑌿 ॥ 12 ॥
𑌗𑍁𑌰𑍋𑌰𑌪𑍍𑌯𑌵𑌲𑌿𑌪𑍍𑌤𑌸𑍍𑌯 𑌕𑌾𑌰𑍍𑌯𑌾𑌕𑌾𑌰𑍍𑌯𑌮𑌜𑌾𑌨𑌤𑌃 ।
𑌉𑌤𑍍𑌪𑌥𑌂 𑌪𑍍𑌰𑌤𑌿𑌪𑌨𑍍𑌨𑌸𑍍𑌯 𑌕𑌾𑌰𑍍𑌯𑌂 𑌭𑌵𑌤𑌿 𑌶𑌾𑌸𑌨𑌮𑍍 ॥ 13 ॥
𑌬𑌲𑌮𑍇𑌷 𑌕𑌿𑌮𑌾𑌶𑍍𑌰𑌿𑌤𑍍𑌯 𑌹𑍇𑌤𑍁𑌂 𑌵𑌾𑌪𑍁𑌰𑍁𑌷𑌰𑍍𑌷𑌭 ।
𑌦𑌾𑌤𑍁𑌮𑌿𑌚𑍍𑌛𑌤𑌿 𑌕𑍈𑌕𑍇𑌯𑍍𑌯𑍈 𑌰𑌾𑌜𑍍𑌯𑌂 𑌸𑍍𑌥𑌿𑌤𑌮𑌿𑌦𑌂 𑌤𑌵 ॥ 14 ॥
𑌤𑍍𑌵𑌯𑌾 𑌚𑍈𑌵 𑌮𑌯𑌾 𑌚𑍈𑌵 𑌕𑍃𑌤𑍍𑌵𑌾 𑌵𑍈𑌰𑌮𑌨𑍁𑌤𑍍𑌤𑌮𑌮𑍍 ।
𑌕𑌾𑌽𑌸𑍍𑌯 𑌶𑌕𑍍𑌤𑌿𑌶𑍍𑌶𑍍𑌰𑌿𑌯𑌂 𑌦𑌾𑌤𑍁𑌂 𑌭𑌰𑌤𑌾𑌯𑌾𑌰𑌿𑌶𑌾𑌸𑌨 ॥ 15 ॥
𑌅𑌨𑍁𑌰𑌕𑍍𑌤𑍋𑌽𑌸𑍍𑌮𑌿 𑌭𑌾𑌵𑍇𑌨 𑌭𑍍𑌰𑌾𑌤𑌰𑌂 𑌦𑍇𑌵𑌿 𑌤𑌤𑍍𑌤𑍍𑌵𑌤𑌃 ।
𑌸𑌤𑍍𑌯𑍇𑌨 𑌧𑌨𑍁𑌷𑌾 𑌚𑍈𑌵 𑌦𑌤𑍍𑌤𑍇𑌨𑍇𑌷𑍍𑌟𑍇𑌨 𑌤𑍇 𑌶𑌪𑍇 ॥ 16 ॥
𑌦𑍀𑌪𑍍𑌤𑌮𑌗𑍍𑌨𑌿𑌮𑌰𑌣𑍍𑌯𑌂 𑌵𑌾 𑌯𑌦𑌿 𑌰𑌾𑌮𑌃 𑌪𑍍𑌰𑌵𑍇𑌕𑍍𑌷𑍍𑌯𑌤𑌿 ।
𑌪𑍍𑌰𑌵𑌿𑌷𑍍𑌟𑌂 𑌤𑌤𑍍𑌰 𑌮𑌾𑌂 𑌦𑍇𑌵𑌿 𑌤𑍍𑌵𑌂 𑌪𑍂𑌰𑍍𑌵𑌮𑌵𑌧𑌾𑌰𑌯 ॥ 1 ॥
𑌹𑌰𑌾𑌮𑌿 𑌵𑍀𑌰𑍍𑌯𑌾𑌦𑍍𑌦𑍁𑌃𑌖𑌂 𑌤𑍇 𑌤𑌮 𑌸𑍍𑌸𑍂𑌰𑍍𑌯 𑌇𑌵𑍋𑌦𑌿𑌤𑌃 ।
𑌦𑍇𑌵𑍀 𑌪𑌶𑍍𑌯𑌤𑍁 𑌮𑍇 𑌵𑍀𑌰𑍍𑌯𑌂 𑌰𑌾𑌘𑌵𑌶𑍍𑌚𑍈𑌵 𑌪𑌶𑍍𑌯𑌤𑍁 ॥ 1 ॥
𑌏𑌤𑌤𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌲𑌕𑍍𑌷𑍍𑌮𑌣𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌉𑌵𑌾𑌚 𑌰𑌾𑌮𑌂 𑌕𑍌𑌶𑌲𑍍𑌯𑌾 𑌰𑍁𑌦𑌂𑌤𑍀 𑌶𑍋𑌕𑌲𑌾𑌲𑌸𑌾 ॥ 1 ॥
𑌭𑍍𑌰𑌾𑌤𑍁𑌸𑍍𑌤𑍇 𑌵𑌦𑌤𑌃 𑌪𑍁𑌤𑍍𑌰 𑌲𑌕𑍍𑌷𑍍𑌮𑌣𑌸𑍍𑌯 𑌶𑍍𑌰𑍁𑌤𑌂 𑌤𑍍𑌵𑌯𑌾 ।
𑌯𑌦𑌤𑍍𑌰𑌾𑌨𑌂𑌤𑌰𑌂 𑌕𑌾𑌰𑍍𑌯𑌂 𑌕𑍁𑌰𑍁𑌷𑍍𑌵 𑌯𑌦𑌿 𑌰𑍋𑌚𑌤𑍇 ॥ 20 ॥
𑌨 𑌚𑌾𑌧𑌰𑍍𑌮𑍍𑌯𑌂 𑌵𑌚 𑌶𑍍𑌰𑍁𑌤𑍍𑌵𑌾 𑌸𑌪𑌤𑍍𑌨𑍍𑌯𑌾 𑌮𑌮 𑌭𑌾𑌷𑌿𑌤𑌮𑍍 ।
𑌵𑌿𑌹𑌾𑌯 𑌶𑍋𑌕𑌸𑌂𑌤𑌪𑍍𑌤𑌾𑌂 𑌗𑌂𑌤𑍁𑌮𑌰𑍍𑌹𑌸𑌿 𑌮𑌾𑌮𑌿𑌤𑌃 ॥ 21 ॥
𑌧𑌰𑍍𑌮𑌜𑍍𑌞 𑌯𑌦𑌿 𑌧𑌰𑍍𑌮𑌿𑌷𑍍𑌠𑍋 𑌧𑌰𑍍𑌮𑌂 𑌚𑌰𑌿𑌤𑍁𑌮𑌿𑌚𑍍𑌛𑌸𑌿 ।
𑌶𑍁𑌶𑍍𑌰𑍂𑌷 𑌮𑌾𑌮𑌿𑌹𑌸𑍍𑌥𑌸𑍍𑌤𑍍𑌵𑌂 𑌚𑌰 𑌧𑌰𑍍𑌮𑌮𑌨𑍁𑌤𑍍𑌤𑌮𑌮𑍍 ॥ 22 ॥
𑌶𑍁𑌶𑍍𑌰𑍂𑌷𑍁𑌰𑍍𑌜𑌨𑌨𑍀𑌂 𑌪𑍁𑌤𑍍𑌰 𑌸𑍍𑌵𑌗𑍃𑌹𑍇 𑌨𑌿𑌯𑌤𑍋 𑌵𑌸𑌨𑍍 ।
𑌪𑌰𑍇𑌣 𑌤𑌪𑌸𑌾 𑌯𑍁𑌕𑍍𑌤𑌃 𑌕𑌾𑌶𑍍𑌯𑌪𑌸𑍍𑌤𑍍𑌰𑌿𑌦𑌿𑌵𑌂 𑌗𑌤𑌃 ॥ 23 ॥
𑌯𑌥𑍈𑌵 𑌰𑌾𑌜𑌾 𑌪𑍂𑌜𑍍𑌯𑌸𑍍𑌤𑍇 𑌗𑍌𑌰𑌵𑍇𑌣 𑌤𑌥𑌾𑌽𑌸𑍍𑌮𑍍𑌯𑌹𑌮𑍍 ।
𑌤𑍍𑌵𑌾𑌂 𑌨𑌾𑌹𑌮𑌨𑍁𑌜𑌾𑌨𑌾𑌮𑌿 𑌨 𑌗𑌂𑌤𑌵𑍍𑌯𑌮𑌿𑌤𑍋 𑌵𑌨𑌮𑍍 ॥ 24 ॥
𑌤𑍍𑌵𑌦𑍍𑌵𑌿𑌯𑍋𑌗𑌾𑌨𑍍𑌨 𑌮𑍇 𑌕𑌾𑌰𑍍𑌯𑌂 𑌜𑍀𑌵𑌿𑌤𑍇𑌨 𑌸𑍁𑌖𑍇𑌨 𑌵𑌾 ।
𑌤𑍍𑌵𑌯𑌾 𑌸𑌹 𑌮𑌮 𑌶𑍍𑌰𑍇𑌯𑌸𑍍𑌤𑍃𑌣𑌾𑌨𑌾𑌮𑌪𑌿 𑌭𑌕𑍍𑌷𑌣𑌮𑍍 ॥ 25 ॥
𑌯𑌦𑌿 𑌤𑍍𑌵𑌂 𑌯𑌾𑌸𑍍𑌯𑌸𑌿 𑌵𑌨𑌂 𑌤𑍍𑌯𑌕𑍍𑌤𑍍𑌵𑌾 𑌮𑌾𑌂 𑌶𑍋𑌕𑌲𑌾𑌲𑌸𑌾𑌮𑍍 ।
𑌅𑌹𑌂 𑌪𑍍𑌰𑌾𑌯𑌮𑌿𑌹𑌾𑌸𑌿𑌷𑍍𑌯𑍇 𑌨 𑌹𑌿 𑌶𑌕𑍍𑌷𑍍𑌯𑌾𑌮𑌿 𑌜𑍀𑌵𑌿𑌤𑍁𑌮𑍍 ॥ 26 ॥
𑌤𑌤𑌸𑍍𑌤𑍍𑌵𑌂 𑌪𑍍𑌰𑌾𑌪𑍍𑌸𑍍𑌯𑌸𑍇 𑌪𑍁𑌤𑍍𑌰 𑌨𑌿𑌰𑌯𑌂 𑌲𑍋𑌕𑌵𑌿𑌶𑍍𑌰𑍁𑌤𑌮𑍍 ।
𑌬𑍍𑌰𑌹𑍍𑌮𑌹𑌤𑍍𑌯𑌾𑌮𑌿𑌵𑌾𑌧𑌰𑍍𑌮𑌾𑌤𑍍𑌸𑌮𑍁𑌦𑍍𑌰 𑌸𑍍𑌸𑌰𑌿𑌤𑌾𑌂 𑌪𑌤𑌿𑌃 ॥ 2 ॥
𑌵𑌿𑌲𑌪𑌂𑌤𑍀𑌂 𑌤𑌥𑌾 𑌦𑍀𑌨𑌾𑌂 𑌕𑍌𑌸𑌲𑍍𑌯𑌾𑌂 𑌜𑌨𑌨𑍀𑌂 𑌤𑌤𑌃 ।
𑌉𑌵𑌾𑌚 𑌰𑌾𑌮𑍋 𑌧𑌰𑍍𑌮𑌾𑌤𑍍𑌮𑌾 𑌵𑌚𑌨𑌂 𑌧𑌰𑍍𑌮𑌸𑌂𑌹𑌿𑌤𑌮𑍍 ॥ 2 ॥
𑌨𑌾𑌸𑍍𑌤𑌿 𑌶𑌕𑍍𑌤𑌿𑌃 𑌪𑌿𑌤𑍁𑌰𑍍𑌵𑌾𑌕𑍍𑌯𑌂 𑌸𑌮𑌤𑌿𑌕𑍍𑌰𑌮𑌿𑌤𑍁𑌂 𑌮𑌮 ।
𑌪𑍍𑌰𑌸𑌾𑌦𑌯𑍇 𑌤𑍍𑌵𑌾𑌂 𑌶𑌿𑌰𑌸𑌾 𑌗𑌂𑌤𑍁𑌮𑌿𑌚𑍍𑌛𑌾𑌮𑍍𑌯𑌹𑌂 𑌵𑌨𑌮𑍍 ॥ 2 ॥
𑌋𑌷𑌿𑌣𑌾 𑌚 𑌪𑌿𑌤𑍁𑌰𑍍𑌵𑌾𑌕𑍍𑌯𑌂 𑌕𑍁𑌰𑍍𑌵𑌤𑌾 𑌵𑍍𑌰𑌤𑌚𑌾𑌰𑌿𑌣𑌾 ।
𑌗𑍌𑌰𑍍𑌹𑌤𑌾 𑌜𑌾𑌨𑌤𑌾 𑌧𑌰𑍍𑌮𑌂 𑌕𑌂𑌡𑍁𑌨𑌾𑌽𑌪𑌿 𑌵𑌿𑌪𑌶𑍍𑌚𑌿𑌤𑌾 ॥ 30 ॥
𑌅𑌸𑍍𑌮𑌾𑌕𑌂 𑌚 𑌕𑍁𑌲𑍇 𑌪𑍂𑌰𑍍𑌵𑌂 𑌸𑌗𑌰𑌸𑍍𑌯𑌾𑌜𑍍𑌞𑌯𑌾 𑌪𑌿𑌤𑍁𑌃 ।
𑌖𑌨𑌦𑍍𑌭𑌿𑌸𑍍𑌸𑌾𑌗𑌰𑍈𑌰𑍍𑌭𑍂𑌮𑌿𑌮𑌵𑌾𑌪𑍍𑌤𑌸𑍍𑌸𑍁𑌮𑌹𑌾𑌨𑍍𑌵𑌧𑌃 ॥ 31 ॥
𑌜𑌾𑌮𑌦𑍍𑌗𑍍𑌨𑍍𑌯𑍇𑌨 𑌰𑌾𑌮𑍇𑌣 𑌰𑍇𑌣𑍁𑌕𑌾 𑌜𑌨𑌨𑍀 𑌸𑍍𑌵𑌯𑌮𑍍 ।
𑌕𑍃𑌤𑍍𑌤𑌾 𑌪𑌰𑌶𑍁𑌨𑌾𑌽𑌰𑌣𑍍𑌯𑍇 𑌪𑌿𑌤𑍁𑌰𑍍𑌵𑌚𑌨𑌕𑌾𑌰𑌿𑌣𑌾 ॥ 32 ॥
𑌏𑌤𑍈𑌰𑌨𑍍𑌯𑍈𑌶𑍍𑌚 𑌬𑌹𑍁𑌭𑌿𑌰𑍍𑌦𑍇𑌵𑌿 𑌦𑍇𑌵𑌸𑌮𑍈𑌃 𑌕𑍃𑌤𑌮𑍍 ।
𑌪𑌿𑌤𑍁𑌰𑍍𑌵𑌚𑌨𑌮𑌕𑍍𑌲𑍀𑌬𑌂 𑌕𑌰𑌿𑌷𑍍𑌯𑌾𑌮𑌿 𑌪𑌿𑌤𑍁𑌰𑍍𑌹𑌿𑌤𑌮𑍍 ॥ 33 ॥
𑌨 𑌖𑌲𑍍𑌵𑍇𑌤𑌨𑍍𑌮𑌯𑍈𑌕𑍇𑌨 𑌕𑍍𑌰𑌿𑌯𑌤𑍇 𑌪𑌿𑌤𑍃𑌶𑌾𑌸𑌨𑌮𑍍 ।
𑌏𑌤𑍈𑌰𑌪𑌿 𑌕𑍃𑌤𑌂 𑌦𑍇𑌵𑌿 𑌯𑍇 𑌮𑌯𑌾 𑌤𑌵 𑌕𑍀𑌰𑍍𑌤𑌿𑌤𑌾𑌃 ॥ 34 ॥
𑌨𑌾𑌹𑌂 𑌧𑌰𑍍𑌮𑌮𑌪𑍂𑌰𑍍𑌵𑌂 𑌤𑍇 𑌪𑍍𑌰𑌤𑌿𑌕𑍂𑌲𑌂 𑌪𑍍𑌰𑌵𑌰𑍍𑌤𑌯𑍇 ।
𑌪𑍂𑌰𑍍𑌵𑍈𑌰𑌯𑌮𑌭𑌿𑌪𑍍𑌰𑍇𑌤𑍋 𑌗𑌤𑍋 𑌮𑌾𑌰𑍍𑌗𑍋𑌽𑌨𑍁𑌗𑌮𑍍𑌯𑌤𑍇 ॥ 35 ॥
𑌤𑌦𑍇𑌤𑌤𑍍𑌤𑍁 𑌮𑌯𑌾 𑌕𑌾𑌰𑍍𑌯𑌂 𑌕𑍍𑌰𑌿𑌯𑌤𑍇 𑌭𑍁𑌵𑌿 𑌨𑌾𑌨𑍍𑌯𑌥𑌾 ।
𑌪𑌿𑌤𑍁𑌰𑍍𑌹𑌿 𑌵𑌚𑌨𑌂 𑌕𑍁𑌰𑍍𑌵𑌨𑍍𑌨 𑌕𑌶𑍍𑌚𑌿𑌨𑍍𑌨𑌾𑌮 𑌹𑍀𑌯𑌤𑍇 ॥ 36 ॥
𑌤𑌾𑌮𑍇𑌵𑌮𑍁𑌕𑍍𑌤𑍍𑌵𑌾 𑌜𑌨𑌨𑍀𑌂 𑌲𑌕𑍍𑌷𑍍𑌮𑌣𑌂 𑌪𑍁𑌨𑌰𑌬𑍍𑌰𑌵𑍀𑌤𑍍 ।
𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌦𑌾𑌂 𑌶𑍍𑌰𑍇𑌷𑍍𑌠𑌶𑍍𑌶𑍍𑌰𑍇𑌷𑍍𑌠𑌸𑍍𑌸𑌰𑍍𑌵𑌧𑌨𑍁𑌷𑍍𑌮𑌤𑌾𑌮𑍍 ॥ 3 ॥
𑌤𑌵 𑌲𑌕𑍍𑌷𑍍𑌮𑌣 𑌜𑌾𑌨𑌾𑌮𑌿 𑌮𑌯𑌿 𑌸𑍍𑌨𑍇𑌹𑌮𑌨𑍁𑌤𑍍𑌤𑌮𑌮𑍍 ।
𑌵𑌿𑌕𑍍𑌰𑌮𑌂 𑌚𑍈𑌵 𑌸𑌤𑍍𑌤𑍍𑌵𑌂 𑌚 𑌤𑍇𑌜𑌶𑍍𑌚 𑌸𑍁𑌦𑍁𑌰𑌾𑌸𑌦𑌮𑍍 ॥ 3 ॥
𑌮𑌮 𑌮𑌾𑌤𑍁𑌰𑍍𑌮𑌹𑌦𑍍𑌦𑍁𑌃𑌖𑌮𑌤𑍁𑌲𑌂 𑌶𑍁𑌭𑌲𑌕𑍍𑌷𑌣 ।
𑌅𑌭𑌿𑌪𑍍𑌰𑌾𑌯𑌮𑌵𑌿𑌜𑍍𑌞𑌾𑌯 𑌸𑌤𑍍𑌯𑌸𑍍𑌯 𑌚 𑌶𑌮𑌸𑍍𑌯 𑌚 ॥ 3 ॥
𑌧𑌰𑍍𑌮𑍋 𑌹𑌿 𑌪𑌰𑌮𑍋 𑌲𑍋𑌕𑍇 𑌧𑌰𑍍𑌮𑍇 𑌸𑌤𑍍𑌯𑌂 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ।
𑌧𑌰𑍍𑌮𑌸𑌂𑌶𑍍𑌰𑌿𑌤𑌮𑍇𑌤𑌚𑍍𑌚 𑌪𑌿𑌤𑍁𑌰𑍍𑌵𑌚𑌨𑌮𑍁𑌤𑍍𑌤𑌮𑌮𑍍 ॥ 40 ॥
𑌸𑌂𑌶𑍍𑌰𑍁𑌤𑍍𑌯 𑌚 𑌪𑌿𑌤𑍁𑌰𑍍𑌵𑌾𑌕𑍍𑌯𑌂 𑌮𑌾𑌤𑍁𑌰𑍍𑌵𑌾 𑌬𑍍𑌰𑌾𑌹𑍍𑌮𑌣𑌸𑍍𑌯 𑌵𑌾 ।
𑌨 𑌕𑌰𑍍𑌤𑌵𑍍𑌯𑌂 𑌵𑍃𑌥𑌾 𑌵𑍀𑌰 𑌧𑌰𑍍𑌮𑌮𑌾𑌶𑍍𑌰𑌿𑌤𑍍𑌯 𑌤𑌿𑌷𑍍𑌠𑌤𑌾 ॥ 41 ॥
𑌸𑍋𑌽𑌹𑌂 𑌨 𑌶𑌕𑍍𑌷𑍍𑌯𑌾𑌮𑌿 𑌪𑌿𑌤𑍁𑌰𑍍𑌨𑌿𑌯𑍋𑌗𑌮𑌤𑌿𑌵𑌰𑍍𑌤𑌿𑌤𑍁𑌮𑍍 ।
𑌪𑌿𑌤𑍁𑌰𑍍𑌹𑌿𑌵𑌚𑌨𑌾𑌦𑍍𑌵𑍀𑌰 𑌕𑍈𑌕𑍇𑌯𑍍𑌯𑌾𑌽𑌹𑌂 𑌪𑍍𑌰𑌚𑍋𑌦𑌿𑌤𑌃 ॥ 42 ॥
𑌤𑌦𑍇𑌤𑌾𑌂 𑌵𑌿𑌸𑍃𑌜𑌾𑌨𑌾𑌰𑍍𑌯𑌾𑌂 𑌕𑍍𑌷𑌤𑍍𑌰𑌧𑌰𑍍𑌮𑌾𑌶𑍍𑌰𑌿𑌤𑌾𑌂 𑌮𑌤𑌿𑌮𑍍 ।
𑌧𑌰𑍍𑌮𑌮𑌾𑌶𑍍𑌰𑌯 𑌮𑌾 𑌤𑍈𑌕𑍍𑌷𑍍𑌣𑍍𑌯𑌂 𑌮𑌦𑍍𑌬𑍁𑌦𑍍𑌧𑌿𑌰𑌨𑍁𑌗𑌮𑍍𑌯𑌤𑌾𑌮𑍍 ॥ 43 ॥
𑌤𑌮𑍇𑌵𑌮𑍁𑌤𑍍𑌤𑍍𑌵𑌾 𑌸𑍌𑌹𑌾𑌰𑍍𑌦𑌾𑌦𑍍𑌭𑍍𑌰𑌾𑌤𑌰𑌂 𑌲𑌕𑍍𑌷𑍍𑌮𑌣𑌾𑌗𑍍𑌰𑌜𑌃 ।
𑌉𑌵𑌾𑌚 𑌭𑍂𑌯𑌃 𑌕𑍌𑌸𑌲𑍍𑌯𑌾𑌂 𑌪𑍍𑌰𑌾𑌂𑌜𑌲𑌿𑌶𑍍𑌶𑌿𑌰𑌸𑌾𑌨𑌤𑌃 ॥ 44 ॥
𑌅𑌨𑍁𑌮𑌨𑍍𑌯𑌸𑍍𑌵 𑌮𑌾𑌂 𑌦𑍇𑌵𑌿 𑌗𑌮𑌿𑌷𑍍𑌯𑌂𑌤𑌮𑌿𑌤𑍋 𑌵𑌨𑌮𑍍 ।
𑌶𑌾𑌪𑌿𑌤𑌾𑌽𑌸𑌿 𑌮𑌮 𑌪𑍍𑌰𑌾𑌣𑍈𑌃 𑌕𑍁𑌰𑍁 𑌸𑍍𑌵𑌸𑍍𑌤𑍍𑌯𑌯𑌨𑌾𑌨𑌿 𑌮𑍇 ॥ 45 ॥
𑌤𑍀𑌰𑍍𑌣𑌪𑍍𑌰𑌤𑌿𑌜𑍍𑌞𑌶𑍍𑌚 𑌵𑌨𑌾𑌤𑍍𑌪𑍁𑌨𑌰𑍇𑌷𑍍𑌯𑌾𑌮𑍍𑌯𑌹𑌂 𑌪𑍁𑌰𑍀𑌮𑍍 ।
𑌯𑌯𑌾𑌤𑌿𑌰𑌿𑌵 𑌰𑌾𑌜𑌰𑍍𑌷𑌿𑌃𑌪𑍁𑌰𑌾 𑌹𑌿𑌤𑍍𑌵𑌾 𑌪𑍁𑌨𑌰𑍍𑌦𑌿𑌵𑌮𑍍 ॥ 46 ॥
𑌶𑍋𑌕𑌸𑍍𑌸𑌂𑌧𑌾𑌰𑍍𑌯𑌤𑌾𑌂 𑌮𑌾𑌤 𑌰𑍍𑌹𑍃𑌦𑌯𑍇 𑌸𑌾𑌧𑍁 𑌮𑌾 𑌶𑍁𑌚𑌃 ।
𑌵𑌨𑌵𑌾𑌸𑌾𑌦𑌿𑌹𑍈𑌷𑍍𑌯𑌾𑌮𑌿 𑌪𑍁𑌨𑌃 𑌕𑍃𑌤𑍍𑌵𑌾 𑌪𑌿𑌤𑍁𑌰𑍍𑌵𑌚𑌃 ॥ 4 ॥
𑌤𑍍𑌵𑌯𑌾 𑌮𑌯𑌾 𑌚 𑌵𑍈𑌦𑍇𑌹𑍍𑌯𑌾 𑌲𑌕𑍍𑌷𑍍𑌮𑌣𑍇𑌨 𑌸𑍁𑌮𑌿𑌤𑍍𑌰𑌯𑌾 ।
𑌪𑌿𑌤𑍁𑌰𑍍𑌨𑌿𑌯𑍋𑌗𑍇 𑌸𑍍𑌥𑌾𑌤𑌵𑍍𑌯𑌮𑍇𑌷 𑌧𑌰𑍍𑌮𑌸𑍍𑌸𑌨𑌾𑌤𑌨𑌃 ॥ 4 ॥
𑌅𑌂𑌬 𑌸𑌂𑌹𑍃𑌤𑍍𑌯 𑌸𑌂𑌭𑌾𑌰𑌾𑌨𑍍 𑌦𑍁𑌃𑌖𑌂 𑌹𑍃𑌦𑌿 𑌨𑌿𑌗𑍃𑌹𑍍𑌯 𑌚 ।
𑌵𑌨𑌵𑌾𑌸𑌕𑍃𑌤𑌾 𑌬𑍁𑌦𑍍𑌧𑌿𑌰𑍍𑌮𑌮 𑌧𑌰𑍍𑌮𑍍𑌯𑌾𑌽𑌨𑍁 𑌵𑌰𑍍𑌤𑍍𑌯𑌤𑌾𑌮𑍍 ॥ 4 ॥
𑌏𑌤𑌦𑍍𑌵𑌚𑌸𑍍𑌤𑌸𑍍𑌯 𑌨𑌿𑌶𑌮𑍍𑌯 𑌮𑌾𑌤𑌾 𑌸𑍁𑌧𑌰𑍍𑌮𑍍𑌯𑌮𑌵𑍍𑌯𑌗𑍍𑌰𑌮𑌵𑌿𑌕𑍍𑌲𑌬𑌂 𑌚 ।
𑌮𑍃𑌤𑍇𑌵 𑌸𑌂𑌜𑍍𑌞𑌾𑌂 𑌪𑍍𑌰𑌤𑌿𑌲𑌭𑍍𑌯 𑌦𑍇𑌵𑍀 𑌸𑌮𑍀𑌕𑍍𑌷𑍍𑌯 𑌰𑌾𑌮𑌂 𑌪𑍁𑌨𑌰𑌿𑌤𑍍𑌯𑍁𑌵𑌾𑌚 ॥ 50 ॥
𑌯𑌥𑍈𑌵 𑌤𑍇 𑌪𑍁𑌤𑍍𑌰 𑌪𑌿𑌤𑌾 𑌤𑌥𑌾𑌽𑌹𑌂 𑌗𑍁𑌰𑍁 𑌸𑍍𑌸𑍍𑌵𑌧𑌰𑍍𑌮𑍇𑌣 𑌸𑍁𑌹𑍃𑌤𑍍𑌤𑌯𑌾 𑌚 ।
𑌨 𑌤𑍍𑌵𑌾𑌽𑌨𑍁𑌜𑌾𑌨𑌾𑌮𑌿 𑌨 𑌮𑌾𑌂 𑌵𑌿𑌹𑌾𑌯 𑌸𑍁𑌦𑍁𑌃𑌖𑌿𑌤𑌾𑌮𑌰𑍍𑌹𑌸𑌿 𑌗𑌂𑌤𑍁𑌮𑍇𑌵𑌮𑍍 ॥ 51 ॥
𑌕𑌿𑌂 𑌜𑍀𑌵𑌿𑌤𑍇𑌨𑍇𑌹 𑌵𑌿𑌨𑌾 𑌤𑍍𑌵𑌯𑌾 𑌮𑍇 𑌲𑍋𑌕𑍇𑌨 𑌵𑌾 𑌕𑌿𑌂 𑌸𑍍𑌵𑌧𑌯𑌾𑌽𑌮𑍃𑌤𑍇𑌨 ।
𑌶𑍍𑌰𑍇𑌯𑍋 𑌮𑍁𑌹𑍂𑌰𑍍𑌤𑌂 𑌤𑌵 𑌸𑌨𑍍𑌨𑌿𑌧𑌾𑌨𑌂 𑌮𑌮𑍇𑌹 𑌕𑍃𑌤𑍍𑌸𑍍𑌨𑌾𑌦𑌪𑌿 𑌜𑍀𑌵𑌲𑍋𑌕𑌾𑌤𑍍 ॥ 52 ॥
𑌨𑌰𑍈𑌰𑌿𑌵𑍋𑌲𑍍𑌕𑌾𑌭𑌿𑌰𑌪𑍋𑌹𑍍𑌯𑌮𑌾𑌨𑍋 𑌮𑌹𑌾𑌗𑌜𑍋𑌽𑌧𑍍𑌵𑌾𑌨𑌮𑌨𑍁𑌪𑍍𑌰𑌵𑌿𑌷𑍍𑌟𑌃 ।
𑌭𑍂𑌯𑌃 𑌪𑍍𑌰𑌜𑌜𑍍𑌵𑌾𑌲 𑌵𑌿𑌲𑌾𑌪𑌮𑍇𑌵𑌂 𑌨𑌿𑌶𑌮𑍍𑌯 𑌰𑌾𑌮𑌃 𑌕𑌰𑍁𑌣𑌂 𑌜𑌨𑌨𑍍𑌯𑌾𑌃 ॥ 53 ॥
𑌸 𑌮𑌾𑌤𑌰𑌂 𑌚𑍈𑌵 𑌵𑌿𑌸𑌂𑌜𑍍𑌞𑌕𑌲𑍍𑌪𑌾 𑌮𑌾𑌰𑍍𑌤𑌂 𑌚 𑌸𑍌𑌮𑌿𑌤𑍍𑌰𑌿𑌮𑌭𑌿𑌪𑍍𑌰𑌤𑌪𑍍𑌤𑌮𑍍 ।
𑌧𑌰𑍍𑌮𑍇 𑌸𑍍𑌥𑌿𑌤𑍋 𑌧𑌰𑍍𑌮𑍍𑌯𑌮𑍁𑌵𑌾𑌚 𑌵𑌾𑌕𑍍𑌯𑌂 𑌯𑌥𑌾 𑌸 𑌏𑌵𑌾𑌰𑍍𑌹𑌤𑌿 𑌤𑌤𑍍𑌰 𑌵𑌕𑍍𑌤𑍁𑌮𑍍 ॥ 54 ॥
𑌅𑌹𑌂 𑌹𑌿 𑌤𑍇 𑌲𑌕𑍍𑌷𑍍𑌮𑌣 𑌨𑌿𑌤𑍍𑌯𑌮𑍇𑌵 𑌜𑌾𑌨𑌾𑌮𑌿 𑌭𑌕𑍍𑌤𑌿𑌂 𑌚 𑌪𑌰𑌾𑌕𑍍𑌰𑌮𑌂 𑌚 ।
𑌮𑌮 𑌤𑍍𑌵𑌭𑌿𑌪𑍍𑌰𑌾𑌯𑌮𑌸𑌨𑍍𑌨𑌿𑌰𑍀𑌕𑍍𑌷𑍍𑌯 𑌮𑌾𑌤𑍍𑌰𑌾 𑌸𑌹𑌾𑌭𑍍𑌯𑌰𑍍𑌦𑌸𑌿 𑌮𑌾𑌂 𑌸𑍁𑌦𑍁𑌃𑌖𑌮𑍍 ॥ 55 ॥
𑌧𑌰𑍍𑌮𑌾𑌰𑍍𑌥𑌕𑌾𑌮𑌾𑌃 𑌖𑌲𑍁 𑌤𑌾𑌤 𑌲𑍋𑌕𑍇 𑌸𑌮𑍀𑌕𑍍𑌷𑌿𑌤𑌾 𑌧𑌰𑍍𑌮𑌫𑌲𑍋𑌦𑌯𑍇𑌷𑍁 ।
𑌤𑍇 𑌤𑌤𑍍𑌰 𑌸𑌰𑍍𑌵𑍇 𑌸𑍍𑌯𑍁𑌰𑌸𑌂𑌶𑌯𑌂 𑌮𑍇 𑌭𑌾𑌰𑍍𑌯𑍇𑌵 𑌵𑌶𑍍𑌯𑌾𑌽𑌭𑌿𑌮𑌤𑌾 𑌸𑍁𑌪𑍁𑌤𑍍𑌰𑌾 ॥ 56 ॥
𑌯𑌸𑍍𑌮𑌿𑌂𑌸𑍍𑌤𑍁 𑌸𑌰𑍍𑌵𑍇 𑌸𑍍𑌯𑍁𑌰𑌸𑌨𑍍𑌨𑌿𑌵𑌿𑌷𑍍𑌟𑌾 𑌧𑌰𑍍𑌮𑍋 𑌯𑌤 𑌸𑍍𑌸𑍍𑌯𑌾𑌤𑍍𑌤𑌦𑍁𑌪𑌕𑍍𑌰𑌮𑍇𑌤 ।
𑌦𑍍𑌵𑍇𑌷𑍍𑌯𑍋 𑌭𑌵𑌤𑍍𑌯𑌰𑍍𑌥𑌪𑌰𑍋 𑌹𑌿 𑌲𑍋𑌕𑍇 𑌕𑌾𑌮𑌾𑌤𑍍𑌮𑌤𑌾 𑌖𑌲𑍍𑌵𑌪𑌿 𑌨 𑌪𑍍𑌰𑌶𑌸𑍍𑌤𑌾 ॥ 5 ॥
𑌗𑍁𑌰𑍁𑌶𑍍𑌚 𑌰𑌾𑌜𑌾 𑌚 𑌪𑌿𑌤𑌾 𑌚 𑌵𑍃𑌦𑍍𑌧𑌃 𑌕𑍍𑌰𑍋𑌧𑌾𑌤𑍍𑌪𑍍𑌰𑌹𑌰𑍍𑌷𑌾𑌦𑍍𑌯𑌦𑌿 𑌵𑌾𑌽𑌪𑌿 𑌕𑌾𑌮𑌾𑌤𑍍 ।
𑌯𑌦𑍍𑌵𑍍𑌯𑌾𑌦𑌿𑌶𑍇𑌤𑍍𑌕𑌾𑌰𑍍𑌯𑌮𑌵𑍇𑌕𑍍𑌷𑍍𑌯 𑌧𑌰𑍍𑌮𑌂 𑌕𑌸𑍍𑌤𑌨𑍍𑌨 𑌕𑍁𑌰𑍍𑌯𑌾𑌦𑌨𑍃𑌶𑌂𑌸𑌵𑍃𑌤𑍍𑌤𑌿𑌃 ॥ 5 ॥
𑌸 𑌵𑍈 𑌨 𑌶𑌕𑍍𑌨𑍋𑌮𑌿 𑌪𑌿𑌤𑍁𑌃 𑌪𑍍𑌰𑌤𑌿𑌜𑍍𑌞𑌾 𑌮𑌿𑌮𑌾𑌮𑌕𑌰𑍍𑌤𑍁𑌂 𑌸𑌕𑌲𑌾𑌂 𑌯𑌥𑌾𑌵𑌤𑍍 ।
𑌸 𑌹𑍍𑌯𑌾𑌵𑌯𑍋𑌸𑍍𑌤𑌾𑌤 𑌗𑍁𑌰𑍁𑌰𑍍𑌨𑌿𑌯𑍋𑌗𑍇 𑌦𑍇𑌵𑍍𑌯𑌾𑌶𑍍𑌚 𑌭𑌰𑍍𑌤𑌾 𑌸 𑌗𑌤𑌿 𑌸𑍍𑌸𑌧𑌰𑍍𑌮𑌃 ॥ 5 ॥
𑌤𑌸𑍍𑌮𑌿𑌨𑍍𑌪𑍁𑌨𑌰𑍍𑌜𑍀𑌵𑌤𑌿 𑌧𑌰𑍍𑌮𑌰𑌾𑌜𑍇 𑌵𑌿𑌶𑍇𑌷𑌤𑌸𑍍𑌸𑍍𑌵𑍇 𑌪𑌥𑌿 𑌵𑌰𑍍𑌤𑌮𑌾𑌨𑍇 ।
𑌦𑍇𑌵𑍀 𑌮𑌯𑌾 𑌸𑌾𑌰𑍍𑌧𑌮𑌿𑌤𑍋𑌽𑌪𑌗𑌚𑍍𑌛𑍇𑌤𑍍 𑌕𑌥𑌂 𑌸𑍍𑌵𑌿𑌦𑌨𑍍𑌯𑌾 𑌵𑌿𑌧𑌵𑍇𑌵 𑌨𑌾𑌰𑍀 ॥ 60 ॥
𑌸𑌾 𑌮𑌾𑌽𑌨𑍁𑌮𑌨𑍍𑌯𑌸𑍍𑌵 𑌵𑌨𑌂 𑌵𑍍𑌰𑌜𑌂𑌤𑌂 𑌕𑍁𑌰𑍁𑌷𑍍𑌵 𑌨 𑌸𑍍𑌸𑍍𑌵𑌸𑍍𑌤𑍍𑌯𑌯𑌨𑌾𑌨𑌿 𑌦𑍇𑌵𑌿 ।
𑌯𑌥𑌾 𑌸𑌮𑌾𑌪𑍍𑌤𑍇 𑌪𑍁𑌨𑌰𑌾𑌵𑍍𑌰𑌜𑍇𑌯𑌂 𑌯𑌥𑌾 𑌹𑌿 𑌸𑌤𑍍𑌯𑍇𑌨 𑌪𑍁𑌨𑌰𑍍𑌯𑌯𑌾𑌤𑌿𑌃 ॥ 61 ॥
𑌯𑌶𑍋 𑌹𑍍𑌯𑌹𑌂 𑌕𑍇𑌵𑌲𑌰𑌾𑌜𑍍𑌯𑌕𑌾𑌰𑌣𑌾 𑌨𑍍𑌨 𑌪𑍃𑌷𑍍𑌠𑌤𑌃 𑌕𑌰𑍍𑌤𑍁𑌮𑌲𑌂 𑌮𑌹𑍋𑌦𑌯𑌮𑍍 ।
𑌅𑌦𑍀𑌰𑍍𑌘𑌕𑌾𑌲𑍇 𑌨 𑌤𑍁 𑌦𑍇𑌵𑌿 𑌜𑍀𑌵𑌿𑌤𑍇 𑌵𑍃𑌣𑍇𑌽𑌵𑌰𑌾𑌮𑌦𑍍𑌯 𑌮𑌹𑍀𑌮𑌧𑌰𑍍𑌮𑌤𑌃 ॥ 62 ॥
𑌪𑍍𑌰𑌸𑌾𑌦𑌯𑌨𑍍𑌨𑌰𑌵𑍃𑌷𑌭 𑌸𑍍𑌸𑌮𑌾𑌤𑌰𑌂 𑌪𑌰𑌾𑌕𑍍𑌰𑌮𑌾𑌜𑍍𑌜𑌿𑌗𑌮𑌿𑌷𑍁𑌰𑍇𑌵 𑌦𑌂𑌡𑌕𑌾𑌨𑍍 ।
𑌅𑌥𑌾𑌨𑍁𑌜𑌂 𑌭𑍃𑌶𑌮𑌨𑍁𑌶𑌾𑌸𑍍𑌯 𑌦𑌰𑍍𑌶𑌨𑌂 𑌚𑌕𑌾𑌰 𑌤𑌾𑌂 𑌹𑍃𑌦𑌿 𑌜𑌨𑌨𑍀𑌂 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 63 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑌵𑌿𑌂𑌶𑌸𑍍𑌸𑌰𑍍𑌗𑌃 ॥
