𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌿𑌤𑍀𑌯𑌸𑍍𑌸𑌰𑍍𑌗𑌃 ।
𑌸 𑌸𑌾𑌗𑌰𑌮𑌨𑌾𑌦𑍃𑌷𑍍𑌯𑌮𑌤𑌿𑌕𑍍𑌰𑌮𑍍𑌯 𑌮𑌹𑌾𑌬𑌲𑌃 ।
𑌤𑍍𑌰𑌿𑌕𑍂𑌟𑌶𑌿𑌖𑌰𑍇 𑌲𑌂𑌕𑌾𑌂 𑌸𑍍𑌥𑌿𑌤𑌾𑌂 𑌸𑍍𑌵𑌸𑍍𑌥𑍋 𑌦𑌦𑌰𑍍𑌶 𑌹 ॥ 1 ॥
𑌤𑌤𑌃 𑌪𑌾𑌦𑌪𑌮𑍁𑌕𑍍𑌤𑍇𑌨 𑌪𑍁𑌷𑍍𑌪𑌵𑌰𑍍𑌷𑍇𑌣 𑌵𑍀𑌰𑍍𑌯𑌵𑌾𑌨𑍍 ।
𑌅𑌭𑌿𑌵𑍃𑌷𑍍𑌟𑌃 𑌸𑍍𑌥𑌿𑌤𑌸𑍍𑌤𑌤𑍍𑌰 𑌬𑌭𑍌 𑌪𑍁𑌷𑍍𑌪𑌮𑌯𑍋 𑌯𑌥𑌾 ॥ 2 ॥
𑌯𑍋𑌜𑌨𑌾𑌨𑌾𑌂 𑌶𑌤𑌂 𑌶𑍍𑌰𑍀𑌮𑌾𑌂𑌸𑍍𑌤𑍀𑌰𑍍𑌤𑍍𑌵𑌾𑌪𑍍𑌯𑍁𑌤𑍍𑌤𑌮𑌵𑌿𑌕𑍍𑌰𑌮𑌃 ।
𑌅𑌨𑌿𑌃𑌶𑍍𑌵𑌸𑌨𑍍 𑌕𑌪𑌿𑌸𑍍𑌤𑌤𑍍𑌰 𑌨 𑌗𑍍𑌲𑌾𑌨𑌿𑌮𑌧𑌿𑌗𑌚𑍍𑌛𑌤𑌿 ॥ 3 ॥
𑌶𑌤𑌾𑌨𑍍𑌯𑌹𑌂 𑌯𑍋𑌜𑌨𑌾𑌨𑌾𑌂 𑌕𑍍𑌰𑌮𑍇𑌯𑌂 𑌸𑍁𑌬𑌹𑍂𑌨𑍍𑌯𑌪𑌿 ।
𑌕𑌿𑌂 𑌪𑍁𑌨𑌃 𑌸𑌾𑌗𑌰𑌸𑍍𑌯𑌾𑌂𑌤𑌂 𑌸𑌂𑌖𑍍𑌯𑌾𑌤𑌂 𑌶𑌤𑌯𑍋𑌜𑌨𑌮𑍍 ॥ 4 ॥
𑌸 𑌤𑍁 𑌵𑍀𑌰𑍍𑌯𑌵𑌤𑌾𑌂 𑌶𑍍𑌰𑍇𑌷𑍍𑌠𑌃 𑌪𑍍𑌲𑌵𑌤𑌾𑌮𑌪𑌿 𑌚𑍋𑌤𑍍𑌤𑌮𑌃 ।
𑌜𑌗𑌾𑌮 𑌵𑍇𑌗𑌵𑌾𑌨𑍍 𑌲𑌂𑌕𑌾𑌂 𑌲𑌂𑌘𑌯𑌿𑌤𑍍𑌵𑌾 𑌮𑌹𑍋𑌦𑌧𑌿𑌮𑍍 ॥ 5 ॥
𑌶𑌾𑌦𑍍𑌵𑌲𑌾𑌨𑌿 𑌚 𑌨𑍀𑌲𑌾𑌨𑌿 𑌗𑌂𑌧𑌵𑌂𑌤𑌿 𑌵𑌨𑌾𑌨𑌿 𑌚 ।
𑌗𑌂𑌡𑌵𑌂𑌤𑌿 𑌚 𑌮𑌧𑍍𑌯𑍇𑌨 𑌜𑌗𑌾𑌮 𑌨𑌗𑌵𑌂𑌤𑌿 𑌚 ॥ 6 ॥
𑌶𑍈𑌲𑌾𑌂𑌶𑍍𑌚 𑌤𑌰𑍁𑌸𑌂𑌛𑌨𑍍𑌨𑌾𑌨𑍍 𑌵𑌨𑌾𑌰𑌾𑌜𑍀𑌶𑍍𑌚 𑌪𑍁𑌷𑍍𑌪𑌿𑌤𑌾𑌃 ।
𑌅𑌭𑌿𑌚𑌕𑍍𑌰𑌾𑌮 𑌤𑍇𑌜𑌸𑍍𑌵𑍀 𑌹𑌨𑍁𑌮𑌾𑌨𑍍 𑌪𑍍𑌲𑌵𑌗𑌰𑍍𑌷𑌭𑌃 ॥ ॥
𑌸 𑌤𑌸𑍍𑌮𑌿𑌨𑍍𑌨𑌚𑌲𑍇 𑌤𑌿𑌷𑍍𑌠𑌨𑍍𑌵𑌨𑌾𑌨𑍍𑌯𑍁𑌪𑌵𑌨𑌾𑌨𑌿 𑌚 ।
𑌸 𑌨𑌗𑌾𑌗𑍍𑌰𑍇 𑌚 𑌤𑌾𑌂 𑌲𑌂𑌕𑌾𑌂 𑌦𑌦𑌰𑍍𑌶 𑌪𑌵𑌨𑌾𑌤𑍍𑌮𑌜𑌃 ॥ ॥
𑌸𑌰𑌲𑌾𑌨𑍍 𑌕𑌰𑍍𑌣𑌿𑌕𑌾𑌰𑌾𑌂𑌶𑍍𑌚 𑌖𑌰𑍍𑌜𑍂𑌰𑌾𑌂𑌶𑍍𑌚 𑌸𑍁𑌪𑍁𑌷𑍍𑌪𑌿𑌤𑌾𑌨𑍍 ।
𑌪𑍍𑌰𑌿𑌯𑌾𑌲𑍂𑌨𑍍𑌮𑍁𑌚𑍁𑌲𑌿𑌂𑌦𑌾𑌂𑌶𑍍𑌚 𑌕𑍁𑌟𑌜𑌾𑌨𑍍 𑌕𑍇𑌤𑌕𑌾𑌨𑌪𑌿 ॥ ॥
𑌪𑍍𑌰𑌿𑌯𑌂𑌂𑌗𑍂𑌨𑍍 𑌗𑌂𑌧𑌪𑍂𑌰𑍍𑌣𑌾𑌂𑌶𑍍𑌚 𑌨𑍀𑌪𑌾𑌨𑍍 𑌸𑌪𑍍𑌤𑌚𑍍𑌛𑌦𑌾𑌂𑌸𑍍𑌤𑌥𑌾 ।
𑌆𑌸𑌨𑌾𑌨𑍍 𑌕𑍋𑌵𑌿𑌦𑌾𑌰𑌾𑌂𑌶𑍍𑌚 𑌕𑌰𑌵𑍀𑌰𑌾𑌂𑌶𑍍𑌚 𑌪𑍁𑌷𑍍𑌪𑌿𑌤𑌾𑌨𑍍 ॥ 10 ॥
𑌪𑍁𑌷𑍍𑌪𑌭𑌾𑌰𑌨𑌿𑌬𑌦𑍍𑌧𑌾𑌂𑌶𑍍𑌚 𑌤𑌥𑌾 𑌮𑍁𑌕𑍁𑌲𑌿𑌤𑌾𑌨𑌪𑌿 ।
𑌪𑌾𑌦𑌪𑌾𑌨𑍍 𑌵𑌿𑌹𑌗𑌾𑌕𑍀𑌰𑍍𑌣𑌾𑌨𑍍 𑌪𑌵𑌨𑌾𑌧𑍂𑌤𑌮𑌸𑍍𑌤𑌕𑌾𑌨𑍍 ॥ 11 ॥
𑌹𑌂𑌸𑌕𑌾𑌰𑌂𑌡𑌵𑌾𑌕𑍀𑌰𑍍𑌣𑌾 𑌵𑌾𑌪𑍀𑌃 𑌪𑌦𑍍𑌮𑍋𑌤𑍍𑌮𑌲𑌾𑌯𑍁𑌤𑌾𑌃 ।
𑌆𑌕𑍍𑌰𑍀𑌡𑌾𑌨𑍍 𑌵𑌿𑌵𑌿𑌧𑌾𑌨𑍍 𑌰𑌮𑍍𑌯𑌾𑌵𑌨𑍍 𑌵𑌿𑌵𑌿𑌧𑌾𑌂𑌶𑍍𑌚 𑌜𑌲𑌾𑌶𑌯𑌾𑌨𑍍 ॥ 12 ॥
𑌸𑌂𑌤𑌤𑌾𑌨𑍍 𑌵𑌿𑌵𑌿𑌧𑍈𑌰𑍍𑌵𑍃𑌕𑍍𑌷𑍈𑌃 𑌸𑌰𑍍𑌵𑌰𑍍𑌤𑍁𑌫𑌲𑌪𑍁𑌷𑍍𑌪𑌿𑌤𑍈𑌃 ।
𑌉𑌦𑍍𑌯𑌾𑌨𑌾𑌨𑌿 𑌚 𑌰𑌮𑍍𑌯𑌾𑌣𑌿 𑌦𑌦𑌰𑍍𑌶 𑌕𑌪𑌿𑌕𑍁𑌂𑌜𑌰𑌃 ॥ 13 ॥
𑌸𑌮𑌾𑌸𑌾𑌦𑍍𑌯 𑌚 𑌲𑌕𑍍𑌷𑍍𑌮𑍀𑌵𑌾𑌨𑍍 𑌲𑌂𑌕𑌾𑌂 𑌰𑌾𑌵𑌣𑌪𑌾𑌲𑌿𑌤𑌾𑌮𑍍 ।
𑌪𑌰𑌿𑌖𑌾𑌭𑌿𑌃 𑌸𑌪𑌦𑍍𑌮𑌾𑌭𑌿𑌃 𑌸𑍋𑌤𑍍𑌪𑌲𑌾𑌭𑌿𑌰𑌲𑌂𑌕𑍃𑌤𑌾𑌮𑍍 ॥ 14 ॥
𑌸𑍀𑌤𑌾𑌪𑌹𑌰𑌣𑌾𑌰𑍍𑌥𑍇𑌨 𑌰𑌾𑌵𑌣𑍇𑌨 𑌸𑍁𑌰𑌕𑍍𑌷𑌿𑌤𑌾𑌮𑍍 ।
𑌸𑌮𑌂𑌤𑌾𑌦𑍍𑌵𑌿𑌚𑌰𑌦𑍍𑌭𑌿𑌶𑍍𑌚 𑌰𑌾𑌕𑍍𑌷𑌸𑍈𑌰𑍁𑌗𑍍𑌰𑌧𑌨𑍍𑌵𑌿𑌭𑌿𑌃 ॥ 15 ॥
𑌕𑌾𑌂𑌚𑌨𑍇𑌨𑌾𑌵𑍃𑌤𑌾𑌂 𑌰𑌮𑍍𑌯𑌾𑌂 𑌪𑍍𑌰𑌾𑌕𑌾𑌰𑍇𑌣 𑌮𑌹𑌾𑌪𑍁𑌰𑍀𑌮𑍍 ।
𑌗𑍃𑌹𑍈𑌶𑍍𑌚 𑌗𑍍𑌰𑌹𑌸𑌂𑌕𑌾𑌶𑍈𑌃 𑌶𑌾𑌰𑌦𑌾𑌂𑌬𑍁𑌦𑌸𑌨𑍍𑌨𑌿𑌭𑍈𑌃 ॥ 16 ॥
𑌪𑌾𑌂𑌡𑍁𑌰𑌾𑌭𑌿𑌃 𑌪𑍍𑌰𑌤𑍋𑌲𑍀𑌭𑌿𑌰𑍁𑌚𑍍𑌚𑌾𑌭𑌿𑌰𑌭𑌿𑌸𑌂𑌵𑍃𑌤𑌾𑌮𑍍 ।
𑌅𑌟𑍍𑌟𑌾𑌲𑌕𑌶𑌤𑌾𑌕𑍀𑌰𑍍𑌣𑌾𑌂 𑌪𑌤𑌾𑌕𑌾𑌧𑍍𑌵𑌜𑌮𑌾𑌲𑌿𑌨𑍀𑌮𑍍 ॥ 1 ॥
𑌤𑍋𑌰𑌣𑍈𑌃 𑌕𑌾𑌂𑌚𑌨𑍈𑌰𑍍𑌦𑌿𑌵𑍍𑌯𑍈𑌰𑍍𑌲𑌤𑌾𑌪𑌙𑍍𑌤𑍍𑌕𑌿𑌵𑌿𑌚𑌿𑌤𑍍𑌰𑌿𑌤𑍈𑌃 ।
𑌦𑌦𑌰𑍍𑌶 𑌹𑌨𑍁𑌮𑌾𑌨𑍍 𑌲𑌂𑌕𑌾𑌂 𑌦𑌿𑌵𑌿 𑌦𑍇𑌵𑌪𑍁𑌰𑍀𑌂 𑌯𑌥𑌾 ॥ 1 ॥
𑌗𑌿𑌰𑌿𑌮𑍂𑌰𑍍𑌧𑍍𑌨𑌿𑌂 𑌸𑍍𑌥𑌿𑌤𑌾𑌂 𑌲𑌂𑌕𑌾𑌂 𑌪𑌾𑌂𑌡𑍁𑌰𑍈𑌰𑍍𑌭𑌵𑌨𑍈𑌃 𑌶𑍁𑌭𑍈𑌃 ।
𑌦𑌦𑌰𑍍𑌶 𑌸 𑌕𑌪𑌿𑌶𑍍𑌰𑍇𑌷𑍍𑌠𑌃 𑌪𑍁𑌰𑌮𑌾𑌕𑌾𑌶𑌗𑌂 𑌯𑌥𑌾 ॥ 1 ॥
𑌪𑌾𑌲𑌿𑌤𑌾𑌂 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌨𑌿𑌰𑍍𑌮𑌿𑌤𑌾𑌂 𑌵𑌿𑌶𑍍𑌵𑌕𑌰𑍍𑌮𑌣𑌾 ।
𑌪𑍍𑌲𑌵𑌮𑌾𑌨𑌮𑌿𑌵𑌾𑌕𑌾𑌶𑍇 𑌦𑌦𑌰𑍍𑌶 𑌹𑌨𑍁𑌮𑌾𑌨𑍍 𑌪𑍁𑌰𑍀𑌮𑍍 ॥ 20 ॥
𑌵𑌪𑍍𑌰𑌪𑍍𑌰𑌾𑌕𑌾𑌰𑌜𑌘𑌨𑌾𑌂 𑌵𑌿𑌪𑍁𑌲𑌾𑌂𑌬𑍁𑌨𑌵𑌾𑌂𑌬𑌰𑌾𑌮𑍍 ।
𑌶𑌤𑌘𑍍𑌨𑍀𑌶𑍂𑌲𑌕𑍇𑌶𑌾𑌂𑌤𑌾𑌮𑌟𑍍𑌟𑌾𑌲𑌕𑌵𑌤𑌂𑌸𑌕𑌾𑌮𑍍 ॥ 21 ॥
𑌮𑌨𑌸𑍇𑌵 𑌕𑍃𑌤𑌾𑌂 𑌲𑌂𑌕𑌾𑌂 𑌨𑌿𑌰𑍍𑌮𑌿𑌤𑌾𑌂 𑌵𑌿𑌶𑍍𑌵𑌕𑌰𑍍𑌮𑌣𑌾 ।
𑌦𑍍𑌵𑌾𑌰𑌮𑍁𑌤𑍍𑌤𑌰𑌮𑌾𑌸𑌾𑌦𑍍𑌯 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 22 ॥
𑌕𑍈𑌲𑌾𑌸𑌶𑌿𑌖𑌰𑌪𑍍𑌰𑌖𑍍𑌯𑌾𑌮𑌾𑌲𑌿𑌖𑌂𑌤𑍀𑌮𑌿𑌵𑌾𑌂𑌬𑌰𑌮𑍍 ।
𑌡𑍀𑌯𑌮𑌾𑌨𑌾𑌮𑌿𑌵𑌾𑌕𑌾𑌶𑌮𑍁𑌚𑍍𑌛𑍍𑌰𑌿𑌤𑍈𑌰𑍍𑌭𑌵𑌨𑍋𑌤𑍍𑌤𑌮𑍈𑌃 ॥ 23 ॥
𑌸𑌂𑌪𑍂𑌰𑍍𑌣𑌾𑌂 𑌰𑌾𑌕𑍍𑌷𑌸𑍈𑌰𑍍𑌘𑍋𑌰𑍈𑌰𑍍𑌨𑌾𑌗𑍈𑌰𑍍𑌭𑍋𑌗𑌵𑌤𑍀𑌮𑌿𑌵 ।
𑌅𑌚𑌿𑌂𑌤𑍍𑌯𑌾𑌂 𑌸𑍁𑌕𑍃𑌤𑌾𑌂 𑌸𑍍𑌪𑌷𑍍𑌟𑌾𑌂 𑌕𑍁𑌬𑍇𑌰𑌾𑌧𑍍𑌯𑍁𑌷𑌿𑌤𑌾𑌂 𑌪𑍁𑌰𑌾 ॥ 24 ॥
𑌦𑌂𑌷𑍍𑌟𑍍𑌰𑌿𑌭𑌿𑌰𑍍𑌬𑌹𑍁𑌭𑌿𑌃 𑌶𑍂𑌰𑍈𑌃 𑌶𑍂𑌲𑌪𑌟𑍍𑌟𑌸𑌪𑌾𑌣𑌿𑌭𑌿𑌃 ।
𑌰𑌕𑍍𑌷𑌿𑌤𑌾𑌂 𑌰𑌾𑌕𑍍𑌷𑌸𑍈𑌰𑍍𑌘𑍋𑌰𑍈𑌰𑍍𑌗𑍁𑌹𑌾𑌮𑌾𑌶𑍀𑌵𑌿𑌷𑍈𑌰𑌿𑌵 ॥ 25 ॥
𑌤𑌸𑍍𑌯𑌾𑌶𑍍𑌚 𑌮𑌹𑌤𑍀𑌂 𑌗𑍁𑌪𑍍𑌤𑌿𑌂 𑌸𑌾𑌗𑌰𑌂 𑌚 𑌨𑌿𑌰𑍀𑌕𑍍𑌷𑍍𑌯 𑌸𑌃 ।
𑌰𑌾𑌵𑌣𑌂 𑌚 𑌰𑌿𑌪𑍁𑌂 𑌘𑍋𑌰𑌂 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 26 ॥
𑌆𑌗𑌤𑍍𑌯𑌾𑌪𑍀𑌹 𑌹𑌰𑌯𑍋 𑌭𑌵𑌿𑌷𑍍𑌯𑌂𑌤𑌿 𑌨𑌿𑌰𑌰𑍍𑌥𑌕𑌾𑌃 ।
𑌨 𑌹𑌿 𑌯𑍁𑌦𑍍𑌧𑍇𑌨 𑌵𑍈 𑌲𑌂𑌕𑌾 𑌶𑌕𑍍𑌯𑌾 𑌜𑍇𑌤𑍁𑌂 𑌸𑍁𑌰𑍈𑌰𑌪𑌿 ॥ 2 ॥
𑌇𑌮𑌾𑌂 𑌤𑍁 𑌵𑌿𑌷𑌮𑌾𑌂 𑌦𑍁𑌰𑍍𑌗𑌾𑌂 𑌲𑌂𑌕𑌾𑌂 𑌰𑌾𑌵𑌣𑌪𑌾𑌲𑌿𑌤𑌾𑌮𑍍 ।
𑌪𑍍𑌰𑌾𑌪𑍍𑌯𑌾𑌪𑌿 𑌸 𑌮𑌹𑌾𑌬𑌾𑌹𑍁𑌃 𑌕𑌿𑌂 𑌕𑌰𑌿𑌷𑍍𑌯𑌤𑌿 𑌰𑌾𑌘𑌵𑌃 ॥ 2 ॥
𑌅𑌵𑌕𑌾𑌶𑍋 𑌨𑌸𑌾𑌂𑌤𑍍𑌵𑌸𑍍𑌯 𑌰𑌾𑌕𑍍𑌷𑌸𑍇𑌷𑍍𑌵𑌭𑌿𑌗𑌮𑍍𑌯𑌤𑍇 ।
𑌨 𑌦𑌾𑌨𑌸𑍍𑌯 𑌨 𑌭𑍇𑌦𑌸𑍍𑌯 𑌨𑍈𑌵 𑌯𑍁𑌦𑍍𑌧𑌸𑍍𑌯 𑌦𑍃𑌶𑍍𑌯𑌤𑍇 ॥ 2 ॥
𑌚𑌤𑍁𑌰𑍍𑌣𑌾𑌮𑍇𑌵 𑌹𑌿 𑌗𑌤𑌿𑌰𑍍𑌵𑌾𑌨𑌰𑌾𑌣𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ।
𑌵𑌾𑌲𑌿𑌪𑍁𑌤𑍍𑌰𑌸𑍍𑌯 𑌨𑍀𑌲𑌸𑍍𑌯 𑌮𑌮 𑌰𑌾𑌜𑍍𑌞𑌶𑍍𑌚 𑌧𑍀𑌮𑌤𑌃 ॥ 30 ॥
𑌯𑌾𑌵𑌜𑍍𑌜𑌾𑌨𑌾𑌮𑌿 𑌵𑍈𑌦𑍇𑌹𑍀𑌂 𑌯𑌦𑌿 𑌜𑍀𑌵𑌤𑌿 𑌵𑌾 𑌨 𑌵𑌾 ।
𑌤𑌤𑍍𑌰𑍈𑌵 𑌚𑌿𑌂𑌤𑌯𑌿𑌷𑍍𑌯𑌾𑌮𑌿 𑌦𑍃𑌷𑍍𑌟𑍍𑌵𑌾 𑌤𑌾𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 31 ॥
𑌤𑌤𑌃 𑌸 𑌚𑌿𑌂𑌤𑌯𑌾𑌮𑌾𑌸 𑌮𑍁𑌹𑍂𑌰𑍍𑌤𑌂 𑌕𑌪𑌿𑌕𑍁𑌂𑌜𑌰𑌃 ।
𑌗𑌿𑌰𑌿𑌶𑍃𑌂𑌗𑍇 𑌸𑍍𑌥𑌿𑌤𑌸𑍍𑌤𑌸𑍍𑌮𑌿𑌨𑍍 𑌰𑌾𑌮𑌸𑍍𑌯𑌾𑌭𑍍𑌯𑍁𑌦𑌯𑍇 𑌰𑌤𑌃 ॥ 32 ॥
𑌅𑌨𑍇𑌨 𑌰𑍂𑌪𑍇𑌣 𑌮𑌯𑌾 𑌨 𑌶𑌕𑍍𑌯𑌾 𑌰𑌕𑍍𑌷𑌸𑌾𑌂 𑌪𑍁𑌰𑍀 ।
𑌪𑍍𑌰𑌵𑍇𑌷𑍍𑌟𑍁𑌂 𑌰𑌾𑌕𑍍𑌷𑌸𑍈𑌰𑍍𑌗𑍁𑌪𑍍𑌤𑌾 𑌕𑍍𑌰𑍂𑌰𑍈𑌰𑍍𑌬𑌲𑌸𑌮𑌨𑍍𑌵𑌿𑌤𑍈𑌃 ॥ 33 ॥
𑌉𑌗𑍍𑌰𑍌𑌜𑌸𑍋 𑌮𑌹𑌾𑌵𑍀𑌰𑍍𑌯𑌾 𑌬𑌲𑌵𑌂𑌤𑌶𑍍𑌚 𑌰𑌾𑌕𑍍𑌷𑌸𑌾𑌃 ।
𑌵𑌂𑌚𑌨𑍀𑌯𑌾 𑌮𑌯𑌾 𑌸𑌰𑍍𑌵𑍇 𑌜𑌾𑌨𑌕𑍀𑌂 𑌪𑌰𑌿𑌮𑌾𑌰𑍍𑌗𑌤𑌾 ॥ 34 ॥
𑌲𑌕𑍍𑌷𑍍𑌯𑌾𑌲𑌕𑍍𑌷𑍍𑌯𑍇𑌣 𑌰𑍂𑌪𑍇𑌣 𑌰𑌾𑌤𑍍𑌰𑍌 𑌲𑌂𑌕𑌾 𑌪𑍁𑌰𑍀 𑌮𑌯𑌾 ।
𑌪𑍍𑌰𑌵𑍇𑌷𑍍𑌟𑍁𑌂 𑌪𑍍𑌰𑌾𑌪𑍍𑌤𑌕𑌾𑌲𑌂 𑌮𑍇 𑌕𑍃𑌤𑍍𑌯𑌂 𑌸𑌾𑌧𑌯𑌿𑌤𑍁𑌂 𑌮𑌹𑌤𑍍 ॥ 35 ॥
𑌤𑌾𑌂 𑌪𑍁𑌰𑍀𑌂 𑌤𑌾𑌦𑍃𑌶𑍀𑌂 𑌦𑍃𑌷𑍍𑌟𑍍𑌵𑌾 𑌦𑍁𑌰𑌾𑌧𑌰𑍍𑌷𑌾𑌂 𑌸𑍁𑌰𑌾𑌸𑍁𑌰𑍈𑌃 ।
𑌹𑌨𑍁𑌮𑌾𑌨𑍍 𑌚𑌿𑌂𑌤𑌯𑌾𑌮𑌾𑌸 𑌵𑌿𑌨𑌿𑌶𑍍𑌚𑌿𑌤𑍍𑌯 𑌮𑍁𑌹𑍁𑌰𑍍𑌮𑍁𑌹𑍁𑌃 ॥ 36 ॥
𑌕𑍇𑌨𑍋𑌪𑌾𑌯𑍇𑌨 𑌪𑌶𑍍𑌯𑍇𑌯𑌂 𑌮𑍈𑌥𑌿𑌲𑍀𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌅𑌦𑍃𑌷𑍍𑌟𑍋 𑌰𑌾𑌕𑍍𑌷𑌸𑍇𑌂𑌦𑍍𑌰𑍇𑌣 𑌰𑌾𑌵𑌣𑍇𑌨 𑌦𑍁𑌰𑌾𑌤𑍍𑌮𑌨𑌾 ॥ 3 ॥
𑌨 𑌵𑌿𑌨𑌶𑍍𑌯𑍇𑌤𑍍𑌕𑌥𑌂 𑌕𑌾𑌰𑍍𑌯𑌂 𑌰𑌾𑌮𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌏𑌕𑌾𑌮𑍇𑌕𑌶𑍍𑌚 𑌵𑌶𑍍𑌯𑍇𑌯𑌂 𑌰𑌹𑌿𑌤𑍇 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 3 ॥
𑌭𑍂𑌤𑌾𑌶𑍍𑌚𑌾𑌰𑍍𑌥𑌾 𑌵𑌿𑌪𑌦𑍍𑌯𑌂𑌤𑍇 𑌦𑍇𑌶𑌕𑌾𑌲𑌵𑌿𑌰𑍋𑌧𑌿𑌤𑌾𑌃 ।
𑌵𑌿𑌕𑍍𑌲𑌬𑌂 𑌦𑍂𑌤𑌮𑌾𑌸𑌾𑌦𑍍𑌯 𑌤𑌮𑌃 𑌸𑍂𑌰𑍍𑌯𑍋𑌦𑌯𑍇 𑌯𑌥𑌾 ॥ 3 ॥
𑌅𑌰𑍍𑌥𑌾𑌨𑌰𑍍𑌥𑌾𑌂𑌤𑌰𑍇 𑌬𑍁𑌦𑍍𑌧𑌿𑌰𑍍𑌨𑌿𑌶𑍍𑌚𑌿𑌤𑌾𑌪𑌿 𑌨 𑌶𑍋𑌭𑌤𑍇 ।
𑌘𑌾𑌤𑌯𑌂𑌤𑌿 𑌹𑌿 𑌕𑌾𑌰𑍍𑌯𑌾𑌣𑌿 𑌦𑍂𑌤𑌾𑌃 𑌪𑌂𑌡𑌿𑌤𑌮𑌾𑌨𑌿𑌨𑌃 ॥ 40 ॥
𑌨 𑌵𑌿𑌨𑌶𑍍𑌯𑍇𑌤𑍍𑌕𑌥𑌂 𑌕𑌾𑌰𑍍𑌯𑌂 𑌵𑍈𑌕𑍍𑌲𑌬𑍍𑌯𑌂 𑌨 𑌕𑌥𑌂 𑌭𑌵𑍇𑌤𑍍 ।
𑌲𑌂𑌘𑌨𑌂 𑌚 𑌸𑌮𑍁𑌦𑍍𑌰𑌸𑍍𑌯 𑌕𑌥𑌂 𑌨𑍁 𑌨 𑌵𑍃𑌥𑌾 𑌭𑌵𑍇𑌤𑍍 ॥ 41 ॥
𑌮𑌯𑌿 𑌦𑍃𑌷𑍍𑌟𑍇 𑌤𑍁 𑌰𑌕𑍍𑌷𑍋𑌭𑍀 𑌰𑌾𑌮𑌸𑍍𑌯 𑌵𑌿𑌦𑌿𑌤𑌾𑌤𑍍𑌮𑌨𑌃 ।
𑌭𑌵𑍇𑌦𑍍𑌵𑍍𑌯𑌰𑍍𑌥𑌮𑌿𑌦𑌂 𑌕𑌾𑌰𑍍𑌯𑌂 𑌰𑌾𑌵𑌣𑌾𑌨𑌰𑍍𑌥𑌮𑌿𑌚𑍍𑌛𑌤𑌃 ॥ 42 ॥
𑌨 𑌹𑌿 𑌶𑌕𑍍𑌯𑌂 𑌕𑍍𑌵𑌚𑌿𑌤𑍍 𑌸𑍍𑌥𑌾𑌤𑍁𑌮𑌵𑌿𑌜𑍍𑌞𑌾𑌤𑍇𑌨 𑌰𑌾𑌕𑍍𑌷𑌸𑍈𑌃 ।
𑌅𑌪𑌿 𑌰𑌾𑌕𑍍𑌷𑌸𑌰𑍂𑌪𑍇𑌣 𑌕𑌿𑌮𑍁𑌤𑌾𑌨𑍍𑌯𑍇𑌨 𑌕𑍇𑌨𑌚𑌿𑌤𑍍 ॥ 43 ॥
𑌵𑌾𑌯𑍁𑌰𑌪𑍍𑌯𑌤𑍍𑌰 𑌨𑌾𑌜𑍍𑌞𑌾𑌤𑌶𑍍𑌚𑌰𑍇𑌦𑌿𑌤𑌿 𑌮𑌤𑌿𑌰𑍍𑌮𑌮 ।
𑌨 𑌹𑍍𑌯 𑌸𑍍𑌤𑍍𑌯𑌵𑌿𑌦𑌿𑌤𑌂 𑌕𑌿𑌂𑌚𑌿𑌦𑍍𑌰𑌾𑌕𑍍𑌷𑌸𑌾𑌨𑌾𑌂 𑌬𑌲𑍀𑌯𑌸𑌾𑌮𑍍 ॥ 44 ॥
𑌇𑌹𑌾𑌹𑌂 𑌯𑌦𑌿 𑌤𑌿𑌷𑍍𑌠𑌾𑌮𑌿 𑌸𑍍𑌵𑍇𑌨 𑌰𑍂𑌪𑍇𑌣 𑌸𑌂𑌵𑍃𑌤𑌃 ।
𑌵𑌿𑌨𑌾𑌶𑌮𑍁𑌪𑌯𑌾𑌸𑍍𑌯𑌾𑌮𑌿 𑌭𑌰𑍍𑌤𑍁𑌰𑌰𑍍𑌥𑌶𑍍𑌚 𑌹𑍀𑌯𑌤𑍇 ॥ 45 ॥
𑌤𑌦𑌹𑌂 𑌸𑍍𑌵𑍇𑌨 𑌰𑍂𑌪𑍇𑌣 𑌰𑌜𑌨𑍍𑌯𑌾𑌂 𑌹𑍍𑌰𑌸𑍍𑌵𑌤𑌾𑌂 𑌗𑌤𑌃 ।
𑌲𑌂𑌕𑌾𑌮𑌭𑌿𑌪𑌤𑌿𑌷𑍍𑌯𑌾𑌮𑌿 𑌰𑌾𑌘𑌵𑌸𑍍𑌯𑌾𑌰𑍍𑌥𑌸𑌿𑌦𑍍𑌧𑌯𑍇 ॥ 46 ॥
𑌰𑌾𑌵𑌣𑌸𑍍𑌯 𑌪𑍁𑌰𑍀𑌂 𑌰𑌾𑌤𑍍𑌰𑍌 𑌪𑍍𑌰𑌵𑌿𑌶𑍍𑌯 𑌸𑍁𑌦𑍁𑌰𑌾𑌸𑌦𑌾𑌮𑍍 ।
𑌵𑌿𑌚𑌿𑌨𑍍𑌵𑌨𑍍 𑌭𑌵𑌨𑌂 𑌸𑌰𑍍𑌵𑌂 𑌦𑍍𑌰𑌕𑍍𑌷𑍍𑌯𑌾𑌮𑌿 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 4 ॥
𑌇𑌤𑌿 𑌸𑌂𑌚𑌿𑌂𑌤𑍍𑌯 𑌹𑌨𑍁𑌮𑌾𑌨𑍍 𑌸𑍂𑌰𑍍𑌯𑌸𑍍𑌯𑌾𑌸𑍍𑌤𑌮𑌯𑌂 𑌕𑌪𑌿𑌃 ।
𑌆𑌚𑌕𑌾𑌂𑌕𑍍𑌷𑍇 𑌤𑌦𑌾 𑌵𑍀𑌰𑍋 𑌵𑍈𑌦𑍇𑌹𑍍𑌯𑌾 𑌦𑌰𑍍𑌶𑌨𑍋𑌤𑍍𑌸𑍁𑌕𑌃 ॥ 4 ॥
𑌸𑍂𑌰𑍍𑌯𑍇 𑌚𑌾𑌸𑍍𑌤𑌂 𑌗𑌤𑍇 𑌰𑌾𑌤𑍍𑌰𑍌 𑌦𑍇𑌹𑌂 𑌸𑌂𑌕𑍍𑌷𑌿𑌪𑍍𑌯 𑌮𑌾𑌰𑍁𑌤𑌿𑌃 ।
𑌪𑍃𑌷𑌦𑌂𑌶𑌕𑌮𑌾𑌤𑍍𑌰𑌃 𑌸𑌨𑍍 𑌬𑌭𑍂𑌵𑌾𑌦𑍍𑌭𑍁𑌤𑌦𑌰𑍍𑌶𑌨𑌃 ॥ 4 ॥
𑌪𑍍𑌰𑌦𑍋𑌷𑌕𑌾𑌲𑍇 𑌹𑌨𑍁𑌮𑌾𑌂𑌸𑍍𑌤𑍂𑌰𑍍𑌣𑌮𑍁𑌤𑍍𑌪𑍍𑌲𑍁𑌤𑍍𑌯 𑌵𑍀𑌰𑍍𑌯𑌵𑌾𑌨𑍍 ।
𑌪𑍍𑌰𑌵𑌿𑌵𑍇𑌶 𑌪𑍁𑌰𑍀𑌂 𑌰𑌮𑍍𑌯𑌾𑌂 𑌸𑍁𑌵𑌿𑌭𑌕𑍍𑌤𑌮𑌹𑌾𑌪𑌥𑌾𑌮𑍍 ॥ 50 ॥
𑌪𑍍𑌰𑌾𑌸𑌾𑌦𑌮𑌾𑌲𑌾𑌵𑌿𑌤𑌤𑌾𑌂 𑌸𑍍𑌤𑌂𑌭𑍈𑌃 𑌕𑌾𑌂𑌚𑌨𑌰𑌾𑌜𑌤𑍈𑌃 ।
𑌶𑌾𑌤𑌕𑍁𑌂𑌭𑌮𑌯𑍈𑌰𑍍𑌜𑌾𑌲𑍈𑌰𑍍𑌗𑌂𑌥𑌰𑍍𑌵𑌨𑌗𑌰𑍋𑌪𑌮𑌾𑌮𑍍 ॥ 51 ॥
𑌸𑌪𑍍𑌤𑌭𑍌𑌮𑌾𑌷𑍍𑌟𑌭𑍌𑌮𑍈𑌶𑍍𑌚 𑌸 𑌦𑌦𑌰𑍍𑌶 𑌮𑌹𑌾𑌪𑍁𑌰𑍀𑌮𑍍 ।
𑌤𑌲𑍈𑌃 𑌸𑍍𑌫𑌾𑌟𑌿𑌕𑌸𑌂𑌕𑍀𑌰𑍍𑌣𑍈𑌃 𑌕𑌾𑌰𑍍𑌤𑌸𑍍𑌵𑌰𑌵𑌿𑌭𑍂𑌷𑌿𑌤𑍈𑌃 ॥ 52 ॥
𑌵𑍈𑌡𑍂𑌰𑍍𑌯𑌮𑌣𑌿𑌚𑌿𑌤𑍍𑌰𑍈𑌶𑍍𑌚 𑌮𑍁𑌕𑍍𑌤𑌾𑌜𑌾𑌲𑌵𑌿𑌭𑍂𑌷𑌿𑌤𑍈𑌃 ।
𑌤𑌲𑍈𑌃 𑌶𑍁𑌶𑍁𑌭𑌿𑌰𑍇 𑌤𑌾𑌨𑌿 𑌭𑌵𑌨𑌾𑌨𑍍𑌯𑌤𑍍𑌰 𑌰𑌕𑍍𑌷𑌸𑌾𑌮𑍍 ॥ 53 ॥
𑌕𑌾𑌂𑌚𑌨𑌾𑌨𑌿 𑌚 𑌚𑌿𑌤𑍍𑌰𑌾𑌣𑌿 𑌤𑍋𑌰𑌣𑌾𑌨𑌿 𑌚 𑌰𑌕𑍍𑌷𑌸𑌾𑌮𑍍 ।
𑌲𑌂𑌕𑌾𑌮𑍁𑌦𑍍𑌯𑍋𑌤𑌯𑌾𑌮𑌾𑌸𑍁𑌃 𑌸𑌰𑍍𑌵𑌤𑌃 𑌸𑌮𑌲𑌂𑌕𑍃𑌤𑌾𑌮𑍍 ॥ 54 ॥
𑌅𑌚𑌿𑌂𑌤𑍍𑌯𑌾𑌮𑌦𑍍𑌭𑍁𑌤𑌾𑌕𑌾𑌰𑌾𑌂 𑌦𑍃𑌷𑍍𑌟𑌵𑌾 𑌲𑌂𑌕𑌾𑌂 𑌮𑌹𑌾𑌕𑌪𑌿𑌃 ।
𑌆𑌸𑍀𑌦𑍍𑌵𑌿𑌷𑌣𑍍𑌣𑍋 𑌹𑍃𑌷𑍍𑌟𑌶𑍍𑌚 𑌵𑍈𑌦𑍇𑌹𑍍𑌯𑌾 𑌦𑌰𑍍𑌶𑌨𑍋𑌤𑍍𑌸𑍁𑌕𑌃 ॥ 55 ॥
𑌸 𑌪𑌾𑌂𑌡𑍁𑌰𑌾𑌵𑌿𑌦𑍍𑌧𑌵𑌿𑌮𑌾𑌨𑌮𑌾𑌲𑌿𑌨𑍀𑌂 𑌮𑌹𑌾𑌰𑍍𑌹𑌜𑌾𑌂𑌬𑍂𑌨𑌦𑌜𑌾𑌲𑌤𑍋𑌰𑌣𑌾𑌮𑍍 ।
𑌯𑌶𑌸𑍍𑌵𑌿𑌨𑍀𑌂 𑌰𑌾𑌵𑌣𑌬𑌾𑌹𑍁𑌪𑌾𑌲𑌿𑌤𑌾𑌂 𑌕𑍍𑌷𑌪𑌾𑌚𑌰𑍈𑌰𑍍𑌭𑍀𑌮𑌬𑌲𑍈𑌃 𑌸𑌮𑌾𑌵𑍃𑌤𑌾𑌮𑍍 ॥ 56 ॥
𑌚𑌂𑌦𑍍𑌰𑍋𑌽𑌪𑌿 𑌸𑌾𑌚𑌿𑌵𑍍𑌯𑌮𑌿𑌵𑌾𑌸𑍍𑌯 𑌕𑍁𑌰𑍍𑌵𑌂𑌸𑍍𑌤𑌾𑌰𑌾𑌗𑌣𑍈𑌰𑍍𑌮𑌧𑍍𑌯𑌗𑌤𑍋 𑌵𑌿𑌰𑌾𑌜𑌨𑍍 ।
𑌜𑍍𑌯𑍋𑌤𑍍𑌸𑍍𑌨𑌾𑌵𑌿𑌤𑌾𑌨𑍇𑌨 𑌵𑌿𑌤𑌤𑍍𑌯 𑌲𑍋𑌕 𑌮𑍁𑌤𑍍𑌤𑌿𑌷𑍍𑌠𑌤𑍇 𑌨𑍈𑌕𑌸𑌹𑌸𑍍𑌰𑌰𑌶𑍍𑌮𑌿𑌃 ॥ 5 ॥
𑌶𑌂𑌖𑌪𑍍𑌰𑌭𑌂 𑌕𑍍𑌷𑍀𑌰𑌮𑍃𑌣𑌾𑌲𑌵𑌰𑍍𑌣 𑌮𑍁𑌦𑍍𑌗𑌚𑍍𑌛𑌮𑌾𑌨𑌂 𑌵𑍍𑌯𑌵𑌭𑌾𑌸𑌮𑌾𑌨𑌮𑍍 ।
𑌦𑌦𑌰𑍍𑌶 𑌚𑌂𑌦𑍍𑌰𑌂 𑌸 𑌹𑌰𑌿𑌪𑍍𑌰𑌵𑍀𑌰𑌃 𑌪𑍋𑌪𑍍𑌲𑍂𑌯𑌮𑌾𑌨𑌂 𑌸𑌰𑌸𑍀𑌵 𑌹𑌂𑌸𑌮𑍍 ॥ 5 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌦𑍍𑌵𑌿𑌤𑍀𑌯𑌸𑍍𑌸𑌰𑍍𑌗𑌃 ॥
