𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌤𑍃𑌤𑍀𑌯𑌸𑍍𑌸𑌰𑍍𑌗𑌃 ।
𑌇𑌤𑍍𑌯𑍁𑌕𑍍𑌤𑍍𑌵𑌾 𑌲𑌕𑍍𑌷𑍍𑌮𑌣𑌶𑍍𑌶𑍍𑌰𑍀𑌮𑌾𑌨𑍍𑌵𑌿𑌰𑌾𑌧𑍇 𑌪𑍍𑌰𑌹𑌸𑌨𑍍𑌨𑌿𑌵 ।
𑌕𑍋𑌭𑌵𑌾𑌨𑍍𑌵𑌨𑌮𑌭𑍍𑌯𑍇𑌤𑍍𑌯 𑌚𑌰𑌿𑌷𑍍𑌯𑌸𑌿 𑌯𑌥𑌾𑌸𑍁𑌖𑌮𑍍 ॥ 1 ॥
𑌅𑌥𑍋𑌵𑌾𑌚 𑌪𑍁𑌨𑌰𑍍𑌵𑌾𑌕𑍍𑌯𑌂 𑌵𑌿𑌰𑌾𑌧𑌃 𑌪𑍂𑌰𑌯𑌨𑍍𑌵𑌨𑌮𑍍 ।
𑌪𑍃𑌚𑍍𑌛𑌤𑍋 𑌮𑌮 𑌹𑌿 𑌬𑍍𑌰𑍂𑌤𑌂 𑌕𑍌 𑌯𑍁𑌵𑌾𑌂 𑌕𑍍𑌵 𑌗𑌮𑌿𑌷𑍍𑌯𑌥𑌃 ॥ 2 ॥
. ।
𑌤𑌮𑍁𑌵𑌾𑌚 𑌤𑌤𑍋 𑌰𑌾𑌮𑍋 𑌰𑌾𑌕𑍍𑌷𑌸𑌂 𑌜𑍍𑌵𑌲𑌿𑌤𑌾𑌨𑌨𑌮𑍍 ।
𑌪𑍃𑌚𑍍𑌛𑌂𑌤𑌂 𑌸𑍁𑌮𑌹𑌾𑌤𑍇𑌜𑌾 𑌇𑌕𑍍𑌷𑍍𑌵𑌾𑌕𑍁𑌕𑍁𑌲𑌮𑌾𑌤𑍍𑌮𑌨𑌃 ॥ 3 ॥
𑌕𑍍𑌷𑌤𑍍𑌰𑌿𑌯𑍌 𑌵𑍃𑌤𑍍𑌤𑌸𑌂𑌪𑌨𑍍𑌨𑍌 𑌵𑌿𑌦𑍍𑌧𑌿 𑌨𑍌 𑌵𑌨𑌗𑍋𑌚𑌰𑍌 ।
𑌤𑍍𑌵𑌾𑌂 𑌤𑍁 𑌵𑍇𑌦𑌿𑌤𑍁𑌮𑌿𑌚𑍍𑌛𑌾𑌵𑌃 𑌕𑌸𑍍𑌤𑍍𑌵𑌂 𑌚𑌰𑌸𑌿 𑌦𑌂𑌡𑌕𑌾𑌨𑍍 ॥ 4 ॥
𑌤𑌮𑍁𑌵𑌾𑌚 𑌵𑌿𑌰𑌾𑌧𑌸𑍍𑌤𑍁 𑌰𑌾𑌮𑌂 𑌸𑌤𑍍𑌯𑌪𑌰𑌾𑌕𑍍𑌰𑌮𑌮𑍍 ।
𑌹𑌂𑌤 𑌵𑌕𑍍𑌷𑍍𑌯𑌾𑌮𑌿 𑌤𑍇 𑌰𑌾𑌜𑌨𑍍𑌨𑌿𑌬𑍋𑌧 𑌮𑌮 𑌰𑌾𑌘𑌵 ॥ 5 ॥
𑌪𑍁𑌤𑍍𑌰𑌃 𑌕𑌿𑌲 𑌜𑌯𑌸𑍍𑌯𑌾𑌹𑌂 𑌮𑌾𑌤𑌾 𑌮𑌮 𑌶𑌤𑌹𑍍𑌰𑌦𑌾 ।
𑌵𑌿𑌰𑌾𑌧 𑌇𑌤𑌿 𑌮𑌾𑌮𑌾𑌹𑍁𑌃 𑌪𑍃𑌥𑌿𑌵𑍍𑌯𑌾𑌂 𑌸𑌰𑍍𑌵𑌰𑌾𑌕𑍍𑌷𑌸𑌾𑌃 ॥ 6 ॥
𑌤𑌪𑌸𑌾 𑌚𑌾𑌭𑌿𑌸𑌂𑌪𑍍𑌰𑌾𑌪𑍍𑌤𑌾 𑌬𑍍𑌰𑌹𑍍𑌮𑌣𑍋 𑌹𑌿 𑌪𑍍𑌰𑌸𑌾𑌦𑌜𑌾 ।
𑌶𑌸𑍍𑌤𑍍𑌰𑍇𑌣𑌾𑌵𑌧𑍍𑌯𑌤𑌾 𑌲𑍋𑌕𑍇𑌽𑌚𑍍𑌛𑍇𑌦𑍍𑌯𑌾𑌭𑍇𑌦𑍍𑌯𑌤𑍍𑌵𑌮𑍇𑌵 𑌚 ॥ ॥
𑌉𑌤𑍍𑌸𑍃𑌜𑍍𑌯 𑌪𑍍𑌰𑌮𑌦𑌾𑌮𑍇𑌨𑌾𑌮𑌨𑌪𑍇𑌕𑍍𑌷𑍌 𑌯𑌥𑌾𑌗𑌤𑌮𑍍 ।
𑌤𑍍𑌵𑌰𑌮𑌾𑌣𑍌 𑌪𑌲𑌾𑌯𑍇𑌥𑌾𑌂 𑌨 𑌵𑌾𑌂 𑌜𑍀𑌵𑌿𑌤𑌮𑌾𑌦𑌦𑍇 ॥ ॥
𑌤𑌂 𑌰𑌾𑌮𑌃 𑌪𑍍𑌰𑌤𑍍𑌯𑍁𑌵𑌾𑌚𑍇𑌦𑌂 𑌕𑍋𑌪𑌸𑌂𑌰𑌕𑍍𑌤𑌲𑍋𑌚𑌨𑌃 ।
𑌰𑌾𑌕𑍍𑌷𑌸𑌂 𑌵𑌿𑌕𑍃𑌤𑌾𑌕𑌾𑌰𑌂 𑌵𑌿𑌰𑌾𑌧𑌂 𑌪𑌾𑌪𑌚𑍇𑌤𑌸𑌮𑍍 ॥ ॥
𑌕𑍍𑌷𑍁𑌦𑍍𑌰 𑌧𑌿𑌕𑍍𑌤𑍍𑌵𑌾𑌂 𑌤𑍁 𑌹𑍀𑌨𑌾𑌰𑍍𑌥𑌂 𑌮𑍃𑌤𑍍𑌯𑍁𑌮𑌨𑍍𑌵𑍇𑌷𑌸𑍇 𑌧𑍍𑌰𑍁𑌵𑌮𑍍 ।
𑌰𑌣𑍇 𑌪𑍍𑌰𑌾𑌪𑍍𑌸𑍍𑌯𑌸𑍇 𑌸𑌂𑌤𑌿𑌷𑍍𑌠 𑌨 𑌮𑍇 𑌜𑍀𑌵𑌨𑍍 𑌗𑌮𑌿𑌷𑍍𑌯𑌾𑌸𑌿 ॥ 10 ॥
𑌤𑌤𑌃 𑌸𑌜𑍍𑌯𑌂 𑌧𑌨𑍁𑌃 𑌕𑍃𑌤𑍍𑌵𑌾 𑌰𑌾𑌮𑌸𑍍𑌸𑍁𑌨𑌿𑌶𑌿𑌤𑌾𑌂𑌛𑌰𑌾𑌨𑍍 ।
𑌸𑍁𑌶𑍀𑌘𑍍𑌰𑌮𑌭𑌿𑌸𑌂𑌧𑌾𑌯 𑌰𑌾𑌕𑍍𑌷𑌸𑌂 𑌨𑌿𑌜𑌘𑌾𑌨 𑌹 ॥ 11 ॥
𑌧𑌨𑍁𑌷𑌾 𑌜𑍍𑌯𑌾𑌗𑍁𑌣𑌵𑌤𑌾 𑌸𑌪𑍍𑌤 𑌬𑌾𑌣𑌾𑌨𑍍𑌮𑍁𑌮𑍋𑌚 𑌹 ।
𑌰𑍁𑌕𑍍𑌮𑌪𑍁𑌂𑌖𑌾𑌨𑍍𑌮𑌹𑌾𑌵𑍇𑌗𑌾𑌨𑍍𑌸𑍁𑌪𑌰𑍍𑌣𑌾𑌨𑌿𑌲𑌤𑍁𑌲𑍍𑌯𑌗𑌾𑌨𑍍 ॥ 12 ॥
𑌤𑍇 𑌶𑌰𑍀𑌰𑌂 𑌵𑌿𑌰𑌾𑌧𑌸𑍍𑌯 𑌭𑌿𑌤𑍍𑌤𑍍𑌵𑌾𑌬𑌰𑍍𑌹𑌿𑌣𑌵𑌾𑌸𑌸𑌃 ।
𑌨𑌿𑌪𑍇𑌤𑍁𑌶𑍍𑌶𑍋𑌣𑌿𑌤𑌾𑌦𑌿𑌗𑍍𑌧𑌾 𑌧𑌰𑌣𑍍𑌯𑌾𑌂 𑌪𑌾𑌵𑌕𑍋𑌪𑌮𑌾𑌃 ॥ 13 ॥
𑌸 𑌵𑌿𑌦𑍍𑌧𑍋 𑌨𑍍𑌯𑌸𑍍𑌯 𑌵𑍈𑌦𑍇𑌹𑍀𑌂 𑌶𑍂𑌲𑌮𑍁𑌦𑍍𑌯𑌮𑍍𑌯 𑌰𑌾𑌕𑍍𑌷𑌸𑌃 ।
𑌅𑌭𑍍𑌯𑌦𑍍𑌰𑌵𑌤𑍍𑌸𑍁𑌸𑌂𑌕𑍃𑌦𑍍𑌧𑌸𑍍𑌤𑌦𑌾 𑌰𑌾𑌮𑌂 𑌸𑌲𑌕𑍍𑌷𑍍𑌮𑌣𑌮𑍍 ॥ 14 ॥
𑌸 𑌵𑌿𑌨𑌦𑍍𑌯 𑌮𑌹𑌾𑌨𑌾𑌦𑌂 𑌶𑍂𑌲𑌂 𑌶𑌕𑍍𑌰𑌧𑍍𑌵𑌜𑍋𑌪𑌮𑌮𑍍 ।
𑌪𑍍𑌰𑌗𑍃𑌹𑍍𑌯𑌾𑌶𑍋𑌭𑌤 𑌤𑌦𑌾 𑌵𑍍𑌯𑌾𑌤𑍍𑌤𑌾𑌨𑌨 𑌇𑌵𑌾𑌂𑌤𑌕𑌃 ॥ 15 ॥
𑌅𑌥 𑌤𑍌 𑌭𑍍𑌰𑌾𑌤𑌰𑍌 𑌦𑍀𑌪𑍍𑌤𑌂 𑌶𑌰𑌵𑌰𑍍𑌷𑌂 𑌵𑌵𑌰𑍍𑌷𑌤𑍁𑌃 ।
𑌵𑌿𑌰𑌾𑌧𑍇 𑌰𑌾𑌕𑍍𑌷𑌸𑍇 𑌤𑌸𑍍𑌮𑌿𑌨𑍍 𑌕𑌾𑌲𑌾𑌂𑌤𑌕𑌯𑌮𑍋𑌪𑌮𑍇 ॥ 16 ॥
𑌸 𑌪𑍍𑌰𑌹𑌸𑍍𑌯 𑌮𑌹𑌾𑌰𑍌𑌦𑍍𑌰𑌃 𑌸𑍍𑌥𑌿𑌤𑍍𑌵𑌾𑌜𑍃𑌂𑌭𑌤 𑌰𑌾𑌕𑍍𑌷𑌸𑌃 ।
𑌜𑍃𑌂𑌭𑌮𑌾𑌣𑌸𑍍𑌯 𑌤𑍇 𑌬𑌾𑌣𑌾𑌃 𑌕𑌾𑌯𑌾𑌨𑍍𑌨𑌿𑌷𑍍𑌪𑍇𑌤𑍁𑌰𑌾𑌶𑍁𑌗𑌾𑌃 ॥ 1 ॥
𑌸𑍍𑌪𑌰𑍍𑌶𑌾𑌤𑍍𑌤𑍁 𑌵𑌰𑌦𑌾𑌨𑍇𑌨 𑌪𑍍𑌰𑌾𑌣𑌾𑌨𑍍𑌸𑌮𑍍𑌰𑍋𑌧𑍍𑌯 𑌰𑌾𑌕𑍍𑌷𑌸𑌃 ।
𑌵𑌿𑌰𑌾𑌧𑌃 𑌶𑍂𑌲𑌮𑍁𑌦𑍍𑌯𑌮𑍍𑌯 𑌰𑌾𑌘𑌵𑌾𑌵𑌭𑍍𑌯𑌧𑌾𑌵𑌤 ॥ 1 ॥
𑌤𑌚𑍍𑌛𑍂𑌲𑌂 𑌵𑌜𑍍𑌰𑌸𑌂𑌕𑌾𑌶𑌂 𑌗𑌗𑌨𑍇 𑌜𑍍𑌵𑌲𑌨𑍋𑌪𑌮𑌮𑍍 ।
𑌦𑍍𑌵𑌾𑌭𑍍𑌯𑌾𑌂 𑌶𑌰𑌾𑌭𑍍𑌯𑌾𑌂 𑌚𑌿𑌚𑍍𑌛𑍇𑌦 𑌰𑌾𑌮𑌃 𑌶𑌸𑍍𑌤𑍍𑌰𑌭𑍃𑌤𑌾𑌂𑌵𑌰𑌃 ॥ 1 ॥
𑌤𑌦𑍍𑌰𑌾𑌮𑌵𑌿𑌶𑌿𑌖𑌚𑍍𑌛𑌿𑌨𑍍𑌨𑌂 𑌶𑍂𑌲𑌂 𑌤𑌸𑍍𑌯𑌕𑌰𑌾𑌦𑍍𑌭𑍁𑌵𑌿 ।
𑌪𑌪𑌾𑌤𑌾𑌶𑌨𑌿𑌨𑌾 𑌛𑌿𑌨𑍍𑌨𑌂 𑌮𑍇𑌰𑍋𑌰𑌿𑌵 𑌶𑌿𑌲𑌾𑌤𑌲𑌮𑍍 ॥ 20 ॥
𑌤𑍌 𑌖𑌡𑍍𑌗𑍌 𑌕𑍍𑌷𑌿𑌪𑍍𑌰𑌮𑍁𑌦𑍍𑌯𑌮𑍍𑌯 𑌕𑍃𑌷𑍍𑌣𑌸𑌰𑍍𑌪𑍋𑌪𑌮𑍌𑌶𑍁𑌭𑍌 ।
𑌤𑍂𑌰𑍍𑌣𑌮𑌾𑌪𑍇𑌤𑌤𑍁𑌸𑍍𑌤𑌸𑍍𑌯 𑌤𑌦𑌾 𑌪𑍍𑌰𑌹𑌰𑌤𑌾𑌂 𑌬𑌲𑌾𑌤𑍍 ॥ 21 ॥
𑌸 𑌵𑌧𑍍𑌯𑌮𑌾𑌨𑌃 𑌸𑍁𑌭𑍃𑌶𑌂 𑌭𑍁𑌜𑌾𑌭𑍍𑌯𑌾𑌂 𑌪𑌰𑌿𑌰𑌭𑍍𑌯𑌤𑍌 ।
𑌅𑌪𑍍𑌰𑌕𑌂𑌪𑍍𑌯𑍌 𑌨𑌰𑌵𑍍𑌯𑌾𑌘𑍍𑌰𑍌 𑌰𑍌𑌦𑍍𑌰𑌃 𑌪𑍍𑌰𑌸𑍍𑌥𑌾𑌤𑍁𑌮𑍈𑌚𑍍𑌛𑌤 ॥ 22 ॥
𑌤𑌸𑍍𑌯𑌾𑌭𑌿𑌪𑍍𑌰𑌾𑌯𑌮𑌾𑌜𑍍𑌞𑌾𑌯 𑌰𑌾𑌮𑍋 𑌲𑌕𑍍𑌷𑍍𑌮𑌣𑌮𑌬𑍍𑌰𑌵𑍀𑌤𑍍 ।
𑌵𑌹𑌤𑍍𑌵𑌯𑌮𑌲𑌂 𑌤𑌾𑌵𑌤𑍍𑌪𑌥𑌾𑌽𑌨𑍇𑌨 𑌤𑍁 𑌰𑌾𑌕𑍍𑌷𑌸𑌃 ॥ 23 ॥
𑌯𑌥𑌾 𑌚𑍇𑌚𑍍𑌛𑌤𑌿 𑌸𑍌𑌮𑌿𑌤𑍍𑌰𑍇 𑌤𑌥𑌾 𑌵𑌹𑌤𑍁 𑌰𑌾𑌕𑍍𑌷𑌸𑌃 ।
𑌅𑌯𑌮𑍇𑌵 𑌹𑌿 𑌨𑌃 𑌪𑌂𑌥𑌾 𑌯𑍇𑌨 𑌯𑌾𑌤𑌿 𑌨𑌿𑌶𑌾𑌚𑌰𑌃 ॥ 24 ॥
𑌸 𑌤𑍁 𑌸𑍍𑌵𑌬𑌲𑌵𑍀𑌰𑍍𑌯𑍇𑌣 𑌸𑌮𑍁𑌤𑍍𑌕𑍍𑌷𑌿𑌪𑍍𑌯 𑌨𑌿𑌶𑌾𑌚𑌰𑌃 ।
𑌬𑌾𑌲𑌾𑌵𑌿𑌵 𑌸𑍍𑌕𑌂𑌧𑌗𑌤𑍌 𑌚𑌕𑌾𑌰𑌾𑌤𑌿𑌬𑌲𑍋𑌦𑍍𑌧𑌤𑌃 ॥ 25 ॥
𑌤𑌾𑌵𑌾𑌰𑍋𑌪𑍍𑌯 𑌤𑌤𑌃 𑌸𑍍𑌕𑌂𑌧𑌂 𑌰𑌾𑌘𑌵𑍌 𑌰𑌜𑌨𑍀𑌚𑌰𑌃 ।
𑌵𑌿𑌰𑌾𑌧𑍋 𑌵𑌿𑌨𑌦𑌨𑍍𑌘𑍋𑌰𑌂 𑌜𑌗𑌾𑌮𑌾𑌭𑌿𑌮𑍁𑌖𑍋 𑌵𑌨𑌮𑍍 ॥ 26 ॥
𑌵𑌨𑌂 𑌮𑌹𑌾𑌮𑍇𑌘𑌨𑌿𑌭𑌂 𑌪𑍍𑌰𑌵𑌿𑌷𑍍𑌟𑍋 𑌦𑍍𑌰𑍁𑌮𑍈𑌰𑍍𑌮𑌹𑌦𑍍𑌭𑌿𑌰𑍍𑌵𑌿𑌵𑌿𑌧𑍈𑌰𑍁𑌪𑍇𑌤𑌮𑍍 ।
𑌨𑌾𑌨𑌾𑌵𑌿𑌧𑍈𑌃 𑌪𑌕𑍍𑌷𑌿𑌕𑍁𑌲𑍈𑌰𑍍𑌵𑌿𑌚𑌿𑌤𑍍𑌰𑌂 𑌶𑌿𑌵𑌾𑌯𑍁𑌤𑌂 𑌵𑍍𑌯𑌾𑌲𑌮𑍃𑌗𑍈𑌰𑍍𑌵𑌿𑌕𑍀𑌰𑍍𑌣𑌮𑍍 ॥ 2 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌤𑍃𑌤𑍀𑌯𑌸𑍍𑌸𑌰𑍍𑌗𑌃 ॥
