𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌅𑌥 𑌰𑌾𑌮𑌶𑍍𑌚 𑌸𑍀𑌤𑌾 𑌚 𑌲𑌕𑍍𑌷𑍍𑌮𑌣𑌶𑍍𑌚 𑌕𑍃𑌤𑌾𑌂𑌜𑌲𑌿𑌃 ।
𑌉𑌪𑌸𑌂𑌗𑍃𑌹𑍍𑌯 𑌰𑌾𑌜𑌾𑌨𑌂 𑌚𑌕𑍍𑌰𑍁𑌰𑍍𑌦𑍀𑌨𑌾𑌃 𑌪𑍍𑌰𑌦𑌕𑍍𑌷𑌿𑌣𑌮𑍍 ॥ 1 ॥
𑌤𑌂 𑌚𑌾𑌪𑌿 𑌸𑌮𑌨𑍁𑌜𑍍𑌞𑌾𑌪𑍍𑌯 𑌧𑌰𑍍𑌮𑌜𑍍𑌞𑌸𑍍𑌸𑍀𑌤𑌯𑌾 𑌸𑌹 ।
𑌰𑌾𑌘𑌵 𑌶𑍍𑌶𑍋𑌕𑌸𑌮𑍍𑌮𑍂𑌢𑍋 𑌜𑌨𑌨𑍀𑌮𑌭𑍍𑌯𑌵𑌾𑌦𑌯𑌤𑍍 ॥ 2 ॥
𑌅𑌨𑍍𑌵𑌕𑍍𑌷𑌂 𑌲𑌕𑍍𑌷𑍍𑌮𑌣𑍋 𑌭𑍍𑌰𑌾𑌤𑍁𑌃 𑌕𑍌𑌸𑌲𑍍𑌯𑌾𑌂 𑌅𑌭𑍍𑌯𑌵𑌾𑌦𑌯𑌤𑍍 ।
𑌅𑌥 𑌮𑌾𑌤𑍁𑌃 𑌸𑍁𑌮𑌿𑌤𑍍𑌰𑌾𑌯𑌾 𑌜𑌗𑍍𑌰𑌾𑌹 𑌚𑌰𑌣𑍌 𑌪𑍁𑌨𑌃 ॥ 3 ॥
𑌤𑌂 𑌵𑌂𑌦𑌮𑌾𑌨𑌂 𑌰𑍁𑌦𑌤𑍀 𑌮𑌾𑌤𑌾 𑌸𑍌𑌮𑌿𑌤𑍍𑌰𑌿𑌮𑌬𑍍𑌰𑌵𑍀𑌤𑍍 ।
𑌹𑌿𑌤𑌕𑌾𑌮𑌾 𑌮𑌹𑌾𑌬𑌾𑌹𑍁𑌂 𑌮𑍂𑌧𑍍𑌨𑌰𑍍𑌯𑍁𑌪𑌾𑌘𑍍𑌰𑌾𑌯 𑌲𑌕𑍍𑌷𑍍𑌮𑌣𑌮𑍍 ॥ 4 ॥
𑌸𑍃𑌷𑍍𑌟𑌸𑍍𑌤𑍍𑌵𑌂 𑌵𑌨𑌵𑌾𑌸𑌾𑌯 𑌸𑍍𑌵𑌨𑍁𑌰𑌕𑍍𑌤𑌸𑍍𑌸𑍁𑌹𑍃𑌜𑍍𑌜𑌨𑍇 ।
𑌰𑌾𑌮𑍇 𑌪𑍍𑌰𑌮𑌾𑌦𑌂 𑌮𑌾 𑌕𑌾𑌰𑍍𑌷𑍀𑌃 𑌪𑍁𑌤𑍍𑌰 𑌭𑍍𑌰𑌾𑌤𑌰𑌿 𑌗𑌚𑍍𑌛𑌤𑌿 ॥ 5 ॥
𑌵𑍍𑌯𑌸𑌨𑍀 𑌵𑌾 𑌸𑌮𑍃𑌦𑍍𑌧𑍋 𑌵𑌾 𑌗𑌤𑌿𑌰𑍇𑌷 𑌤𑌵𑌾𑌨𑌘 ।
𑌏𑌷 𑌲𑍋𑌕𑍇 𑌸𑌤𑌾𑌂 𑌧𑌰𑍍𑌮𑍋 𑌯𑌜𑍍𑌜𑍍𑌯𑍇𑌷𑍍𑌠𑌵𑌶𑌗𑍋 𑌭𑌵𑍇𑌤𑍍 ॥ 6 ॥
𑌇𑌦𑌂 𑌹𑌿 𑌵𑍃𑌤𑍍𑌤𑌮𑍁𑌚𑌿𑌤𑌂 𑌕𑍁𑌲𑌸𑍍𑌯𑌾𑌸𑍍𑌯 𑌸𑌨𑌾𑌤𑌨𑌮𑍍 ।
𑌦𑌾𑌨𑌂 𑌦𑍀𑌕𑍍𑌷𑌾 𑌚 𑌯𑌜𑍍𑌞𑍇𑌷𑍁 𑌤𑌨𑍁𑌤𑍍𑌯𑌾𑌗𑍋 𑌮𑍃𑌧𑍇𑌷𑍁 𑌚 ॥ ॥
𑌲𑌕𑍍𑌷𑍍𑌮𑌣𑌂 𑌤𑍍𑌵𑍇𑌵𑌮𑍁𑌕𑍍𑌤𑍍𑌵𑌾 𑌸𑌾 𑌸𑌂𑌸𑌿𑌦𑍍𑌧𑌂 𑌪𑍍𑌰𑌿𑌯𑌰𑌾𑌘𑌵𑌮𑍍 ।
𑌸𑍁𑌮𑌿𑌤𑍍𑌰𑌾 𑌗𑌚𑍍𑌛 𑌗𑌚𑍍𑌛𑍇𑌤𑌿 𑌪𑍁𑌨𑌃 𑌪𑍁𑌨𑌰𑍁𑌵𑌾𑌚 𑌤𑌮𑍍 ॥ ॥
𑌰𑌾𑌮𑌂 𑌦𑌶𑌰𑌥𑌂 𑌵𑌿𑌦𑍍𑌧𑌿 𑌮𑌾𑌂 𑌵𑌿𑌦𑍍𑌧𑌿 𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌅𑌯𑍋𑌧𑍍𑌯𑌾𑌮𑌟𑌵𑍀𑌂 𑌵𑌿𑌧𑍍𑌦𑌿 𑌗𑌚𑍍𑌛 𑌤𑌾𑌤 𑌯𑌥𑌾𑌸𑍁𑌖𑌮𑍍 ॥ ॥
𑌤𑌤𑌃 𑌸𑍁𑌮𑌂𑌤𑍍𑌰𑌃 𑌕𑌾𑌕𑍁𑌤𑍍𑌸𑍍𑌥𑌂 𑌪𑍍𑌰𑌾𑌂𑌜𑌲𑌿𑌰𑍍𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ।
𑌵𑌿𑌨𑍀𑌤𑍋 𑌵𑌿𑌨𑌯𑌜𑍍𑌞𑌶𑍍𑌚 𑌮𑌾𑌤𑌲𑌿𑌰𑍍𑌵𑌾𑌸𑌵𑌂 𑌯𑌥𑌾 ॥ 10 ॥
𑌰𑌰𑌥𑌮𑌾𑌰𑍋𑌹 𑌭𑌦𑍍𑌰𑌂 𑌤𑍇 𑌰𑌾𑌜𑌪𑍁𑌤𑍍𑌰 𑌮𑌹𑌾𑌯𑌶𑌃 ।
𑌕𑍍𑌷𑌿𑌪𑍍𑌰𑌂 𑌤𑍍𑌵𑌾𑌂 𑌪𑍍𑌰𑌾𑌪𑌯𑌿𑌷𑍍𑌯𑌾𑌮𑌿 𑌯𑌤𑍍𑌰 𑌮𑌾𑌂 𑌰𑌾𑌮 𑌵𑌕𑍍𑌷𑍍𑌯𑌸𑌿 ॥ 11 ॥
𑌚𑌤𑍁𑌰𑍍𑌦𑌶 𑌹𑌿 𑌵𑌰𑍍𑌷𑌾𑌣𑌿 𑌵𑌸𑍍𑌤𑌵𑍍𑌯𑌾𑌨𑌿 𑌵𑌨𑍇 𑌤𑍍𑌵𑌯𑌾 ।
𑌤𑌾𑌨𑍍𑌯𑍁𑌪𑌕𑍍𑌰𑌮𑌿𑌤𑌵𑍍𑌯𑌾𑌨𑌿 𑌯𑌾𑌨𑌿 𑌦𑍇𑌵𑍍𑌯𑌾𑌸𑌿 𑌚𑍋𑌦𑌿𑌤𑌃 ॥ 12 ॥
𑌤𑌂 𑌰𑌥𑌂 𑌸𑍂𑌰𑍍𑌯𑌸𑌂𑌕𑌾𑌶𑌂 𑌸𑍀𑌤𑌾 𑌹𑍃𑌷𑍍𑌟𑍇𑌨 𑌚𑍇𑌤𑌸𑌾 ।
𑌆𑌰𑍁𑌰𑍋𑌹 𑌵𑌰𑌾𑌰𑍋𑌹𑌾 𑌕𑍃𑌤𑍍𑌵𑌾𑌲𑌂𑌕𑌾𑌰𑌮𑌾𑌤𑍍𑌮𑌨𑌃 ॥ 13 ॥
𑌅𑌥𑍋 𑌜𑍍𑌵𑌲𑌨𑌸𑌂𑌕𑌾𑌶𑌂 𑌚𑌾𑌮𑍀𑌕𑌰𑌵𑌿𑌭𑍂𑌷𑌿𑌤𑌮𑍍 ।
𑌤𑌮𑌾𑌰𑍁𑌰𑍁𑌹𑌤𑍁𑌸𑍍𑌤𑍂𑌰𑍍𑌣𑌂 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ 14 ॥
𑌵𑌨𑌵𑌾𑌸𑌂 𑌹𑌿 𑌸𑌂𑌖𑍍𑌯𑌾𑌯 𑌵𑌾𑌸𑌾𑌂𑌸𑍍𑌯𑌾𑌭𑌰𑌣𑌾𑌨𑌿 𑌚 ।
𑌭𑌰𑍍𑌤𑌾𑌰𑌮𑌨𑍁𑌗𑌚𑍍𑌛𑌂𑌤𑍍𑌯𑍈 𑌸𑍀𑌤𑌾𑌯𑍈 𑌶𑍍𑌵𑌶𑍁𑌰𑍋 𑌦𑌦𑍌 ॥ 15 ॥
𑌤𑌥𑍈𑌵𑌾𑌯𑍁𑌧𑌜𑌾𑌲𑌾𑌨𑌿 𑌭𑍍𑌰𑌾𑌤𑍃𑌭𑍍𑌯𑌾𑌂 𑌕𑌵𑌚𑌾𑌨𑌿 𑌚 ।
𑌰𑌥𑍋𑌪𑌸𑍍𑌥𑍇 𑌪𑍍𑌰𑌤𑌿𑌨𑍍𑌯𑌸𑍍𑌯 𑌸𑌚𑌰𑍍𑌮 𑌕𑌠𑌿𑌨𑌂 𑌚 𑌤𑌤𑍍 ॥ 16 ॥
𑌸𑍀𑌤𑌾𑌤𑍃𑌤𑍀𑌯𑌾𑌨𑌾𑌰𑍂𑌢𑌾𑌨𑍍 𑌦𑍃𑌷𑍍𑌟𑍍𑌵𑌾 𑌦𑍃𑌷𑍍𑌟𑌮𑌚𑍋𑌦𑌯𑌤𑍍 ।
𑌸𑍁𑌮𑌂𑌤𑍍𑌰𑌸𑍍𑌸𑌮𑍍𑌮𑌤𑌾𑌨𑌶𑍍𑌵𑌾𑌨𑍍 𑌵𑌾𑌯𑍁𑌵𑍇𑌗𑌸𑌮𑌾𑌨𑍍𑌜𑌵𑍇 ॥ 1 ॥
𑌪𑍍𑌰𑌤𑌿𑌯𑌾𑌤𑍇 𑌮𑌹𑌾𑌰𑌣𑍍𑌯𑌂 𑌚𑌿𑌰𑌰𑌾𑌤𑍍𑌰𑌾𑌯 𑌰𑌾𑌘𑌵𑍇 ।
𑌬𑌭𑍂𑌵 𑌨𑌗𑌰𑍇 𑌮𑍂𑌰𑍍𑌛𑌾 𑌬𑌲𑌮𑍂𑌰𑍍𑌛𑌾 𑌜𑌨𑌸𑍍𑌯 𑌚 ॥ 1 ॥
𑌤𑌤𑍍𑌸𑌮𑌾𑌕𑍁𑌲𑌸𑌂𑌭𑍍𑌰𑌾𑌂𑌤𑌂 𑌮𑌤𑍍𑌤𑌸𑌂𑌕𑍁𑌪𑌿𑌤𑌦𑍍𑌵𑌿𑌪𑌮𑍍 ।
𑌹𑌯𑌶𑌿𑌂𑌜𑌿𑌤𑌨𑌿𑌰𑍍𑌘𑍋𑌷𑌂 𑌪𑍁𑌰𑌮𑌾𑌸𑍀𑌨𑍍𑌮𑌹𑌾𑌸𑍍𑌵𑌨𑌮𑍍 ॥ 1 ॥
𑌤𑌤 𑌸𑍍𑌸𑌬𑌾𑌲𑌵𑍃𑌦𑍍𑌧𑌾 𑌸𑌾 𑌪𑍁𑌰𑍀 𑌪𑌰𑌮𑌪𑍀𑌡𑌿𑌤𑌾 ।
𑌰𑌾𑌮𑌮𑍇𑌵𑌾𑌭𑌿𑌦𑍁𑌦𑍍𑌰𑌾𑌵 𑌘𑌰𑍍𑌮𑌾𑌰𑍍𑌤𑌾 𑌸𑌲𑌿𑌲𑌂 𑌯𑌥𑌾 ॥ 20 ॥
𑌪𑌾𑌰𑍍𑌶𑍍𑌵𑌤𑌃 𑌪𑍃𑌷𑍍𑌠𑌤𑌶𑍍𑌚𑌾𑌪𑌿 𑌲𑌂𑌬𑌮𑌾𑌨𑌾𑌸𑍍𑌤𑌦𑍁𑌨𑍍𑌮𑍁𑌖𑌾𑌃 ।
𑌬𑌾𑌷𑍍𑌪𑌪𑍂𑌰𑍍𑌣𑌮𑍁𑌖𑌾𑌸𑍍𑌸𑌰𑍍𑌵𑍇 𑌤𑌮𑍂𑌚𑍁𑌰𑍍𑌭𑍃𑌶𑌨𑌿𑌸𑍍𑌵𑌨𑌾𑌃 ॥ 21 ॥
𑌸𑌂𑌯𑌚𑍍𑌛 𑌵𑌾𑌜𑌿𑌨𑌾𑌂 𑌰𑌶𑍍𑌮𑍀𑌨𑍍 𑌸𑍂𑌤 𑌯𑌾𑌹𑌿 𑌶𑌨𑍈𑌶𑍍𑌶𑌨𑍈𑌃 ।
𑌮𑍁𑌖𑌂 𑌦𑍍𑌰𑌕𑍍𑌷𑍍𑌯𑌾𑌮 𑌰𑌾𑌮𑌸𑍍𑌯 𑌦𑍁𑌰𑍍𑌦𑌰𑍍𑌶𑌂 𑌨𑍋 𑌭𑌵𑌿𑌷𑍍𑌯𑌤𑌿 ॥ 22 ॥
𑌆𑌯𑌸𑌂 𑌹𑍃𑌦𑌯𑌂 𑌨𑍂𑌨𑌂 𑌰𑌾𑌮𑌮𑌾𑌤𑍁𑌰𑌸𑌂𑌶𑌯𑌮𑍍 ।
𑌯𑌦𑍍𑌦𑍇𑌵𑌗𑌰𑍍𑌭𑌪𑍍𑌰𑌤𑌿𑌮𑍇 𑌵𑌨𑌂 𑌯𑌾𑌤𑌿 𑌨 𑌭𑌿𑌦𑍍𑌯𑌤𑍇 ॥ 23 ॥
𑌕𑍃𑌤𑌕𑍃𑌤𑍍𑌯𑌾 𑌹𑌿 𑌵𑍈𑌦𑍇𑌹𑍀 𑌛𑌾𑌯𑍇𑌵𑌾𑌨𑍁𑌗𑌤𑌾 𑌪𑌤𑌿𑌮𑍍 ।
𑌨 𑌜𑌹𑌾𑌤𑌿 𑌰𑌤𑌾 𑌧𑌰𑍍𑌮𑍇 𑌮𑍇𑌰𑍁𑌮𑌰𑍍𑌕𑌪𑍍𑌰𑌭𑌾 𑌯𑌥𑌾 ॥ 24 ॥
𑌅𑌹𑍋 𑌲𑌕𑍍𑌷𑍍𑌮𑌣 𑌸𑌿𑌦𑍍𑌧𑌾𑌰𑍍𑌥 𑌸𑍍𑌸𑌤𑌤𑌂 𑌪𑍍𑌰𑌿𑌯𑌵𑌾𑌦𑌿𑌨𑌮𑍍 ।
𑌭𑍍𑌰𑌾𑌤𑌰𑌂 𑌦𑍇𑌵𑌸𑌂𑌕𑌾𑌶𑌂 𑌯𑌸𑍍𑌤𑍍𑌵𑌂 𑌪𑌰𑌿𑌚𑌰𑌿𑌷𑍍𑌯𑌸𑌿 ॥ 25 ॥
𑌮𑌹𑌤𑍍𑌯𑍇𑌷𑌾 𑌹𑌿 𑌤𑍇 𑌸𑌿𑌧𑍍𑌦𑌿𑌰𑍇𑌷 𑌚𑌾𑌭𑍍𑌯𑍁𑌦𑌯𑍋 𑌮𑌹𑌾𑌨𑍍 ।
𑌏𑌷 𑌸𑍍𑌵𑌰𑍍𑌗𑌸𑍍𑌯 𑌮𑌾𑌰𑍍𑌗𑌶𑍍𑌚 𑌯𑌦𑍇𑌨𑌮𑌨𑍁𑌗𑌚𑍍𑌛𑌸𑌿 ॥ 26 ॥
𑌏𑌵𑌂 𑌵𑌦𑌂𑌤𑌸𑍍𑌤𑍇 𑌸𑍋𑌢𑍁𑌂 𑌨 𑌶𑍇𑌕𑍁𑌰𑍍𑌬𑌾𑌷𑍍𑌪𑌮𑌾𑌗𑌤𑌮𑍍 ।
𑌨𑌰𑌾𑌸𑍍𑌤𑌮𑌨𑍁𑌗𑌚𑍍𑌛𑌂𑌤𑌃 𑌪𑍍𑌰𑌿𑌯𑌮𑌿𑌕𑍍𑌷𑍍𑌵𑌾𑌕𑍁𑌨𑌂𑌦𑌨𑌮𑍍 ॥ 2 ॥
𑌅𑌥 𑌰𑌾𑌜𑌾 𑌵𑍃𑌤 𑌸𑍍𑌤𑍍𑌰𑍀𑌭𑌿𑌰𑍍𑌦𑍀𑌨𑌾𑌭𑌿𑌰𑍍𑌦𑍀𑌨𑌚𑍇𑌤𑌨𑌃 ।
𑌨𑌿𑌰𑍍𑌜𑌗𑌾𑌮 𑌪𑍍𑌰𑌿𑌯𑌂 𑌪𑍁𑌤𑍍𑌰𑌂 𑌦𑍍𑌰𑌕𑍍𑌷𑍍𑌯𑌾𑌮𑍀𑌤𑌿 𑌬𑍍𑌰𑍁𑌵𑌨𑍍 𑌗𑍃𑌹𑌾𑌤𑍍 ॥ 2 ॥
𑌶𑍁𑌶𑍍𑌰𑍁𑌵𑍇 𑌚𑌾𑌗𑍍𑌰𑌤𑌃 𑌸𑍍𑌤𑍍𑌰𑍀𑌣𑌾𑌂 𑌰𑍁𑌦𑌂𑌤𑍀𑌨𑌾𑌂 𑌮𑌹𑌾𑌸𑍍𑌵𑌨𑌃 ।
𑌯𑌥𑌾 𑌨𑌾𑌦𑌃 𑌕𑌰𑍇𑌣𑍂𑌨𑌾𑌂 𑌬𑌦𑍍𑌧𑍇 𑌮𑌹𑌤𑌿 𑌕𑍁𑌂𑌜𑌰𑍇 ॥ 2 ॥
𑌪𑌿𑌤𑌾 𑌹𑌿 𑌰𑌾𑌜𑌾 𑌕𑌾𑌕𑍁𑌤𑍍𑌸𑍍𑌥𑌃 𑌶𑍍𑌰𑍀𑌮𑌾𑌨𑍍 𑌸𑌨𑍍𑌨𑌸𑍍𑌤𑌦𑌾𑌽𑌭𑌵𑌤𑍍 ।
𑌪𑌰𑌿𑌪𑍂𑌰𑍍𑌣𑌃 𑌶𑌶𑍀 𑌕𑌾𑌲𑍇 𑌗𑍍𑌰𑌹𑍇𑌣𑍋𑌪𑌪𑍍𑌲𑍁𑌤𑍋 𑌯𑌥𑌾 ॥ 30 ॥
𑌸 𑌚 𑌶𑍍𑌰𑍀𑌮𑌾𑌨𑌚𑌿𑌂𑌤𑍍𑌯𑌾𑌤𑍍𑌮𑌾 𑌰𑌾𑌮𑍋 𑌦𑌶𑌰𑌥𑌾𑌤𑍍𑌮𑌜𑌃 ।
𑌸𑍂𑌤𑌂 𑌸𑌂𑌚𑍋𑌦𑌯𑌾𑌮𑌾𑌸 𑌤𑍍𑌵𑌰𑌿𑌤𑌂 𑌵𑌾𑌹𑍍𑌯𑌤𑌾𑌮𑌿𑌤𑌿 ॥ 31 ॥
𑌰𑌾𑌮𑍋 𑌯𑌾𑌹𑍀𑌤𑌿 𑌸𑍂𑌤𑌂 𑌤𑌂 𑌤𑌿𑌷𑍍𑌠𑍇𑌤𑌿 𑌸 𑌜𑌨𑌸𑍍𑌤𑌦𑌾 ।
𑌉𑌭𑌯𑌂 𑌨𑌾𑌶𑌕𑌤𑍍𑌸𑍂𑌤𑌃 𑌕𑌰𑍍𑌤𑍁𑌮𑌧𑍍𑌵𑌨𑌿 𑌚𑍋𑌦𑌿𑌤𑌃 ॥ 32 ॥
𑌨𑌿𑌰𑍍𑌗𑌚𑍍𑌛𑌤𑌿 𑌮𑌹𑌾𑌬𑌾𑌹𑍌 𑌰𑌾𑌮𑍇 𑌪𑍌𑌰𑌜𑌨𑌾𑌶𑍍𑌰𑍁𑌭𑌿𑌃 ।
𑌪𑌤𑌿𑌤𑍈𑌰𑌭𑍍𑌯𑌵𑌹𑌿𑌤𑌂 𑌪𑍍𑌰𑌶𑌶𑌾𑌮 𑌮𑌹𑍀𑌰𑌜𑌃 ॥ 33 ॥
𑌰𑍁𑌦𑌿𑌤𑌾𑌶𑍍𑌰𑍁𑌪𑌰𑌿𑌦𑍍𑌯𑍂𑌨𑌂 𑌹𑌾𑌹𑌾𑌕𑍃𑌤𑌮𑌚𑍇𑌤𑌨𑌮𑍍 ।
𑌪𑍍𑌰𑌯𑌾𑌣𑍇 𑌰𑌾𑌘𑌵𑌸𑍍𑌯𑌾𑌸𑍀𑌤𑍍𑌪𑍁𑌰𑌂 𑌪𑌰𑌮𑌪𑍀𑌡𑌿𑌤𑌮𑍍 ॥ 34 ॥
𑌸𑍁𑌸𑍍𑌰𑌾𑌵 𑌨𑌯𑌨𑍈𑌃 𑌸𑍍𑌤𑍍𑌰𑍀𑌣𑌾𑌮𑌸𑍍𑌰𑌮𑌾𑌯𑌾𑌸𑌸𑌂𑌭𑌵𑌮𑍍 ।
𑌮𑍀𑌨𑌸𑌂𑌕𑍍𑌷𑍋𑌭𑌚𑌲𑌿𑌤𑍈 𑌸𑍍𑌸𑌲𑌿𑌲𑌂 𑌪𑌂𑌕𑌜𑍈𑌰𑌿𑌵 ॥ 35 ॥
𑌦𑍃𑌷𑍍𑌟𑍍𑌵𑌾 𑌤𑍁 𑌨𑍃𑌪𑌤𑌿 𑌶𑍍𑌶𑍍𑌰𑍀𑌮𑌾𑌨𑍇𑌕𑌚𑌿𑌤𑍍𑌤𑌗𑌤𑌂 𑌪𑍁𑌰𑌮𑍍 ।
𑌨𑌿𑌪𑌪𑌾𑌤𑍈𑌵 𑌦𑍁𑌃𑌖𑍇𑌨 𑌹𑌤𑌮𑍂𑌲 𑌇𑌵 𑌦𑍍𑌰𑍁𑌮𑌃 ॥ 36 ॥
𑌤𑌤𑍋 𑌹𑌲𑌹𑌲𑌾𑌶𑌬𑍍𑌦𑍋 𑌜𑌜𑍍𑌞𑍇 𑌰𑌾𑌮𑌸𑍍𑌯 𑌪𑍃𑌷𑍍𑌠𑌤𑌃 ।
𑌨𑌰𑌾𑌣𑌾𑌂 𑌪𑍍𑌰𑍇𑌕𑍍𑌷𑍍𑌯 𑌰𑌾𑌜𑌾𑌨𑌂 𑌸𑍀𑌦𑌂𑌤𑌂 𑌭𑍃𑌶𑌦𑍁𑌃𑌖𑌿𑌤𑌮𑍍 ॥ 3 ॥
𑌹𑌾 𑌰𑌾𑌮𑍇𑌤𑌿 𑌜𑌨𑌾𑌃 𑌕𑍇𑌚𑌿𑌦𑍍𑌰𑌾𑌮𑌮𑌾𑌤𑍇𑌤𑌿 𑌚𑌾𑌪𑌰𑍇 ।
𑌅𑌂𑌤𑌃𑌪𑍁𑌰𑌂 𑌸𑌮𑍃𑌦𑍍𑌧𑌂 𑌚 𑌕𑍍𑌰𑍋𑌶𑌂𑌤𑌃 𑌪𑌰𑍍𑌯𑌦𑍇𑌵𑌯𑌨𑍍 ॥ 3 ॥
𑌅𑌨𑍍𑌵𑍀𑌕𑍍𑌷𑌮𑌾𑌣𑍋 𑌰𑌾𑌮𑌸𑍍𑌤𑍁 𑌵𑌿𑌷𑌣𑍍𑌣𑌂 𑌭𑍍𑌰𑌾𑌂𑌤𑌚𑍇𑌤𑌸𑌮𑍍 ।
𑌰𑌾𑌜𑌾𑌨𑌂 𑌮𑌾𑌤𑌰𑌂 𑌚𑍈𑌵 𑌦𑌦𑌰𑍍𑌶𑌾𑌨𑍁𑌗𑌤𑍌 𑌪𑌥𑌿 ॥ 3 ॥
𑌸 𑌬𑌦𑍍𑌧 𑌇𑌵 𑌪𑌾𑌶𑍇𑌨 𑌕𑌿𑌶𑍋𑌰𑍋 𑌮𑌾𑌤𑌰𑌂 𑌯𑌥𑌾 ।
𑌧𑌰𑍍𑌮𑌪𑌾𑌶𑍇𑌨 𑌸𑌂𑌕𑍍𑌷𑌿𑌪𑍍𑌤𑌃 𑌪𑍍𑌰𑌕𑌾𑌶𑌂 𑌨𑌾𑌭𑍍𑌯𑍁𑌦𑍈𑌕𑍍𑌷𑌤 ॥ 40 ॥
𑌪𑌦𑌾𑌤𑌿𑌨𑍌 𑌚 𑌯𑌾𑌨𑌾𑌰𑍍𑌹𑌾𑌵𑌦𑍁𑌃𑌖𑌾𑌰𑍍𑌹𑍌 𑌸𑍁𑌖𑍋𑌚𑌿𑌤𑍌 ।
𑌦𑍃𑌷𑍍𑌟𑍍𑌵𑌾 𑌸𑌂𑌚𑍋𑌦𑌯𑌾𑌮𑌾𑌸 𑌶𑍀𑌘𑍍𑌰𑌂 𑌯𑌾𑌹𑍀𑌤𑌿 𑌸𑌾𑌰𑌥𑌿𑌮𑍍 ॥ 41 ॥
𑌨 𑌹𑌿 𑌤𑌤𑍍𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑍋 𑌦𑍁𑌃𑌖𑌦𑌂 𑌦𑌰𑍍𑌶𑌨𑌂 𑌪𑌿𑌤𑍁𑌃 ।
𑌮𑌾𑌤𑍁𑌶𑍍𑌚 𑌸𑌹𑌿𑌤𑍁𑌂 𑌶𑌕𑍍𑌤𑌸𑍍𑌤𑍋𑌤𑍍𑌰𑌾𑌰𑍍𑌦𑌿𑌤 𑌇𑌵 𑌦𑍍𑌵𑌿𑌪𑌃 ॥ 42 ॥
𑌪𑍍𑌰𑌤𑍍𑌯𑌗𑌾𑌰𑌮𑌿𑌵𑌾𑌯𑌾𑌂𑌤𑍀 𑌵𑌤𑍍𑌸𑌲𑌾 𑌵𑌤𑍍𑌸𑌕𑌾𑌰𑌣𑌾𑌤𑍍 ।
𑌬𑌦𑍍𑌧𑌵𑌤𑍍𑌸𑌾 𑌯𑌥𑌾 𑌧𑍇𑌨𑍂 𑌰𑌾𑌮𑌮𑌾𑌤𑌾𑌭𑍍𑌯𑌧𑌾𑌵𑌤 ॥ 43 ॥
𑌤𑌥𑌾 𑌰𑍁𑌦𑌂𑌤𑍀𑌂 𑌕𑍌𑌸𑌲𑍍𑌯𑌾𑌂 𑌰𑌥𑌂 𑌤𑌮𑌨𑍁𑌧𑌾𑌵𑌤𑍀𑌮𑍍 ।
𑌕𑍍𑌰𑍋𑌶𑌂𑌤𑍀𑌂 𑌰𑌾𑌮 𑌰𑌾𑌮𑍇𑌤𑌿 𑌹𑌾 𑌸𑍀𑌤𑍇 𑌲𑌕𑍍𑌷𑍍𑌮𑌣𑍇𑌤𑌿 𑌚 ॥ 44 ॥
𑌰𑌾𑌮𑌲𑌕𑍍𑌷𑍍𑌮𑌣𑌸𑍀𑌤𑌾𑌰𑍍𑌥𑌂 𑌸𑍍𑌰𑌵𑌂𑌤𑍀𑌂 𑌵𑌾𑌰𑌿 𑌨𑍇𑌤𑍍𑌰𑌜𑌮𑍍 ।
𑌅𑌸𑌕𑍃𑌤𑍍𑌪𑍍𑌰𑍈𑌕𑍍𑌷𑌤 𑌤𑌦𑌾 𑌨𑍃𑌤𑍍𑌯𑌂𑌤𑍀𑌮𑌿𑌵 𑌮𑌾𑌤𑌰𑌮𑍍 ॥ 45 ॥
𑌤𑌿𑌷𑍍𑌠𑍇𑌤𑌿 𑌰𑌾𑌜𑌾 𑌚𑍁𑌕𑍍𑌰𑍋𑌶 𑌯𑌾𑌹𑌿 𑌯𑌾𑌹𑍀𑌤𑌿 𑌰𑌾𑌘𑌵𑌃 ।
𑌸𑍁𑌮𑌂𑌤𑍍𑌰𑌸𑍍𑌯 𑌬𑌭𑍂𑌵𑌾𑌤𑍍𑌮𑌾 𑌚𑌕𑍍𑌰𑌯𑍋𑌰𑌿𑌵 𑌚𑌾𑌂𑌤𑌰𑌾 ॥ 46 ॥
𑌨𑌾𑌶𑍍𑌰𑍌𑌷𑌮𑌿𑌤𑌿 𑌰𑌾𑌜𑌾𑌨𑌮𑍁𑌪𑌾𑌲𑌬𑍍𑌧𑍋𑌽𑌪𑌿 𑌵𑌕𑍍𑌷𑍍𑌯𑌸𑌿 ।
𑌚𑌿𑌰𑌂 𑌦𑍁𑌃𑌖𑌸𑍍𑌯 𑌪𑌾𑌪𑌿𑌷𑍍𑌠𑌮𑌿𑌤𑌿 𑌰𑌾𑌮𑌸𑍍𑌤𑌮𑌬𑍍𑌰𑌵𑍀𑌤𑍍 ॥ 4 ॥
𑌰𑌾𑌮𑌸𑍍𑌯 𑌸 𑌵𑌚𑌃 𑌕𑍁𑌰𑍍𑌵𑌨𑍍𑌨𑌨𑍁𑌜𑍍𑌞𑌾𑌪𑍍𑌯 𑌚 𑌤𑌂 𑌜𑌨𑌮𑍍 ।
𑌵𑍍𑌰𑌜𑌤𑍋𑌽𑌪𑌿 𑌹𑌯𑌾𑌨𑍍 𑌶𑍀𑌘𑍍𑌰𑌂 𑌚𑍋𑌦𑌯𑌾𑌮𑌾𑌸 𑌸𑌾𑌰𑌥𑌿𑌃 ॥ 4 ॥
𑌨𑍍𑌯𑌵𑌰𑍍𑌤𑌤 𑌜𑌨𑍋 𑌰𑌾𑌜𑍍𑌞𑍋 𑌰𑌾𑌮𑌂 𑌕𑍃𑌤𑍍𑌵𑌾 𑌪𑍍𑌰𑌦𑌕𑍍𑌷𑌿𑌣𑌮𑍍 ।
𑌮𑌨𑌸𑌾𑌪𑍍𑌯𑌶𑍍𑌰𑍁𑌵𑍇𑌗𑍈𑌶𑍍𑌚 𑌨 𑌨𑍍𑌯𑌵𑌰𑍍𑌤𑌤 𑌮𑌾𑌨𑍁𑌷𑌮𑍍 ॥ 4 ॥
𑌯𑌮𑌿𑌚𑍍𑌛𑍇𑌤𑍍𑌪𑍁𑌨𑌰𑌾𑌯𑌾𑌂𑌤𑌂 𑌨𑍈𑌨𑌂 𑌦𑍂𑌰𑌮𑌨𑍁𑌵𑍍𑌰𑌜𑍇𑌤𑍍 ।
𑌇𑌤𑍍𑌯𑌮𑌾𑌤𑍍𑌯𑌾 𑌮𑌹𑌾𑌰𑌾𑌜𑌮𑍂𑌚𑍁𑌰𑍍𑌦𑌶𑌰𑌥𑌂 𑌵𑌚𑌃 ॥ 50 ॥
𑌤𑍇𑌷𑌾𑌂 𑌵𑌚𑌃 𑌸𑌰𑍍𑌵𑌗𑍁𑌣𑍋𑌪𑌪𑌨𑍍𑌨𑌂 𑌪𑍍𑌰𑌸𑍍𑌵𑌿𑌨𑍍𑌨𑌗𑌾𑌤𑍍𑌰𑌃 𑌪𑍍𑌰𑌵𑌿𑌷𑌣𑍍𑌣𑌰𑍂𑌪𑌃 ।
𑌨𑌿𑌶𑌮𑍍𑌯 𑌰𑌾𑌜𑌾 𑌕𑍃𑌪𑌣𑌃 𑌸𑌭𑌾𑌰𑍍𑌯𑍋 𑌵𑍍𑌯𑌵𑌸𑍍𑌥𑌿𑌤𑌸𑍍𑌤𑌂 𑌸𑍁𑌤𑌮𑍀𑌕𑍍𑌷𑌮𑌾𑌣𑌃 ॥ 51 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
