𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌦𑍍𑌵𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌥𑌾 𑌵𑌸𑌿𑌷𑍍𑌠𑍇 𑌬𑍍𑌰𑍁𑌵𑌤𑌿 𑌰𑌾𑌜𑌾 𑌦𑌶𑌰𑌥𑌸𑍍𑌸𑍁𑌤𑌮 𑌪𑍍𑌰𑌹𑍃𑌷𑍍𑌟𑌵𑌦𑌨𑍋 𑌰𑌾𑌮𑌮𑌾𑌜𑍁𑌹𑌾𑌵 𑌸𑌲𑌕𑍍𑌷𑍍𑌮𑌣𑌮𑍍 ॥ 1 ॥
𑌕𑍃𑌤𑌸𑍍𑌵𑌸𑍍𑌤𑍍𑌯𑌯𑌨𑌂 𑌮𑌾𑌤𑍍𑌰𑌾 𑌪𑌿𑌤𑍍𑌰𑌾 𑌦𑌶𑌰𑌥𑍇𑌨 𑌚 ।
𑌪𑍁𑌰𑍋𑌧𑌸𑌾 𑌵𑌸𑌿𑌷𑍍𑌠𑍇𑌨 𑌮𑌂𑌗𑌲𑍈𑌰𑌭𑌿𑌮𑌂𑌤𑍍𑌰𑌿𑌤𑌮𑍍 ॥ 2 ॥
𑌸 𑌪𑍁𑌤𑍍𑌰𑌂 𑌮𑍂𑌰𑍍𑌧𑍍𑌨𑍍𑌯𑍁𑌪𑌾𑌘𑍍𑌰𑌾𑌯 𑌰𑌾𑌜𑌾 𑌦𑌶𑌰𑌥𑌃 𑌪𑍍𑌰𑌿𑌯𑌮𑍍 ।
𑌦𑌦𑍌 𑌕𑍁𑌶𑌿𑌕𑌪𑍁𑌤𑍍𑌰𑌾𑌯 𑌸𑍁𑌪𑍍𑌰𑍀𑌤𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 3 ॥
𑌤𑌤𑍋 𑌵𑌾𑌯𑍁𑌸𑍍𑌸𑍁𑌖𑌸𑍍𑌪𑌰𑍍𑌶𑍋 𑌨𑍀𑌰𑌜𑌸𑍍𑌕𑍋 𑌵𑌵𑍌 𑌤𑌦𑌾 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌗𑌤𑌂 𑌦𑍃𑌷𑍍𑌟𑍍𑌵𑌾 𑌰𑌾𑌮𑌂 𑌰𑌾𑌜𑍀𑌵𑌲𑍋𑌚𑌨𑌮𑍍 ॥ 4 ॥
𑌪𑍁𑌷𑍍𑌪𑌵𑍃𑌷𑍍𑌟𑌿𑌰𑍍𑌮𑌹𑌤𑍍𑌯𑌾𑌸𑍀𑌦𑍍𑌦𑍇𑌵𑌦𑍁𑌂𑌦𑍁𑌭𑌿𑌨𑌿𑌸𑍍𑌵𑌨𑍈𑌃 ।
𑌶𑌂𑌖𑌦𑍁𑌂𑌦𑍁𑌭𑌿𑌨𑌿𑌰𑍍𑌘𑍋𑌷𑌃 𑌪𑍍𑌰𑌯𑌾𑌤𑍇 𑌤𑍁 𑌮𑌹𑌾𑌤𑍍𑌮𑌨𑌿 ॥ 5 ॥
𑌵𑌿𑌶𑍍𑌵𑌾𑌮𑌿𑌤𑍍𑌰𑍋 𑌯𑌯𑌾𑌵𑌗𑍍𑌰𑍇 𑌤𑌤𑍋 𑌰𑌾𑌮𑍋 𑌧𑌨𑍁𑌰𑍍𑌧𑌰𑌃 ।
𑌕𑌾𑌕𑌪𑌕𑍍𑌷𑌧𑌰𑍋 𑌧𑌨𑍍𑌵𑍀 𑌤𑌂 𑌚 𑌸𑍌𑌮𑌿𑌤𑍍𑌰𑌿𑌰𑌨𑍍𑌵𑌗𑌾𑌤𑍍 ॥ 6 ॥
𑌕𑌲𑌾𑌪𑌿𑌨𑍌 𑌧𑌨𑍁𑌷𑍍𑌪𑌾𑌣𑍀 𑌶𑍋𑌭𑌮𑌾𑌨𑍌 𑌦𑌿𑌶𑍋 𑌦𑌶 ।
𑌵𑌿𑌶𑍍𑌵𑌾𑌮𑌿𑌤𑍍𑌰𑌂 𑌮𑌹𑌾𑌤𑍍𑌮𑌾𑌨𑌂 𑌤𑍍𑌰𑌿𑌶𑍀𑌰𑍍𑌷𑌾𑌵𑌿𑌵 𑌪𑌨𑍍𑌨𑌗𑍌 ॥ ॥
𑌅𑌨𑍁𑌜𑌗𑍍𑌮𑌤𑍁𑌰𑌕𑍍𑌷𑍁𑌦𑍍𑌰𑍌 𑌪𑌿𑌤𑌾𑌮𑌹𑌮𑌿𑌵𑌾𑌶𑍍𑌵𑌿𑌨𑍌 ।
𑌤𑌦𑌾 𑌕𑍁𑌶𑌿𑌕𑌪𑍁𑌤𑍍𑌰𑌂 𑌤𑍁 𑌧𑌨𑍁𑌷𑍍𑌪𑌾𑌣𑍀 𑌸𑍍𑌵𑌲𑌂𑌕𑍃𑌤𑍌 ॥ ॥
𑌬𑌦𑍍𑌧𑌗𑍋𑌧𑌾𑌂𑌗𑍁𑌲𑌿𑌤𑍍𑌰𑌾𑌣𑍌 𑌖𑌡𑍍𑌗𑌵𑌂𑌤𑍌 𑌮𑌹𑌾𑌦𑍍𑌯𑍁𑌤𑍀 ।
𑌕𑍁𑌮𑌾𑌰𑍌 𑌚𑌾𑌰𑍁𑌵𑌪𑍁𑌷𑍌 𑌭𑍍𑌰𑌾𑌤𑌰𑍌 𑌰𑌾𑌮𑌲𑌕𑍍𑌷𑍍𑌮𑌣𑍌 ॥ ॥
𑌅𑌨𑍁𑌯𑌾𑌤𑍌 𑌶𑍍𑌰𑌿𑌯𑌾 𑌦𑍀𑌪𑍍𑌤𑍌 𑌶𑍋𑌭𑌯𑍇𑌤𑌾𑌮𑌨𑌿𑌂𑌦𑌿𑌤𑍌 ।
𑌸𑍍𑌥𑌾𑌣𑍁𑌂 𑌦𑍇𑌵𑌮𑌿𑌵𑌾𑌚𑌿𑌂𑌤𑍍𑌯𑌂 𑌕𑍁𑌮𑌾𑌰𑌾𑌵𑌿𑌵 𑌪𑌾𑌵𑌕𑍀 ॥ 10 ॥
𑌅𑌧𑍍𑌯𑌰𑍍𑌧𑌯𑍋𑌜𑌨𑌂 𑌗𑌤𑍍𑌵𑌾 𑌸𑌰𑌯𑍍𑌵𑌾 𑌦𑌕𑍍𑌷𑌿𑌣𑍇 𑌤𑌟𑍇 ।
𑌰𑌾𑌮𑍇𑌤𑌿 𑌮𑌧𑍁𑌰𑌾𑌂 𑌵𑌾𑌣𑍀𑌂 𑌵𑌿𑌶𑍍𑌵𑌾𑌮𑌿𑌤𑍍𑌰𑍋𑌽𑌭𑍍𑌯𑌭𑌾𑌷𑌤 ॥ 11 ॥
𑌗𑍃𑌹𑌾𑌣 𑌵𑌤𑍍𑌸 𑌸𑌲𑌿𑌲𑌂 𑌮𑌾 𑌭𑍂𑌤𑍍𑌕𑌾𑌲𑌸𑍍𑌯 𑌪𑌰𑍍𑌯𑌯𑌃 ।
𑌮𑌂𑌤𑍍𑌰𑌗𑍍𑌰𑌾𑌮𑌂 𑌗𑍃𑌹𑌾𑌣 𑌤𑍍𑌵𑌂 𑌬𑌲𑌾𑌮𑌤𑌿𑌬𑌲𑌾𑌂 𑌤𑌥𑌾 ॥ 12 ॥
𑌨 𑌶𑍍𑌰𑌮𑍋 𑌨 𑌜𑍍𑌵𑌰𑍋 𑌵𑌾 𑌤𑍇 𑌨 𑌰𑍂𑌪𑌸𑍍𑌯 𑌵𑌿𑌪𑌰𑍍𑌯𑌯𑌃 ।
𑌨 𑌚 𑌸𑍁𑌪𑍍𑌤𑌂 𑌪𑍍𑌰𑌮𑌤𑍍𑌤𑌂 𑌵𑌾 𑌧𑌰𑍍𑌷𑌯𑌿𑌷𑍍𑌯𑌂𑌤𑌿 𑌨𑍈𑌰𑍃𑌤𑌾𑌃 ॥ 13 ॥
𑌨 𑌬𑌾𑌹𑍍𑌵𑍋𑌸𑍍𑌸𑌦𑍃𑌶𑍋 𑌵𑍀𑌰𑍍𑌯𑍇 𑌪𑍃𑌥𑌿𑌵𑍍𑌯𑌾𑌮𑌸𑍍𑌤𑌿 𑌕𑌶𑍍𑌚𑌨 ।
𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌵𑍈 𑌰𑌾𑌮 𑌨 𑌭𑌵𑍇𑌤𑍍𑌸𑌦𑍃𑌶𑌸𑍍𑌤𑌵 ॥ 14 ॥
𑌨 𑌸𑍌𑌭𑌾𑌗𑍍𑌯𑍇 𑌨 𑌦𑌾𑌕𑍍𑌷𑌿𑌣𑍍𑌯𑍇 𑌨 𑌜𑍍𑌞𑌾𑌨𑍇 𑌬𑍁𑌦𑍍𑌧𑌿𑌨𑌿𑌶𑍍𑌚𑌯𑍇 ।
𑌨𑍋𑌤𑍍𑌤𑌰𑍇 𑌪𑍍𑌰𑌤𑌿𑌵𑌕𑍍𑌤𑌵𑍍𑌯𑍇 𑌸𑌮𑍋 𑌲𑍋𑌕𑍇 𑌤𑌵𑌾𑌽𑌨𑌘 ॥ 15 ॥
𑌏𑌤𑌦𑍍𑌵𑌿𑌦𑍍𑌯𑌾𑌦𑍍𑌵𑌯𑍇 𑌲𑌬𑍍𑌧𑍇 𑌭𑌵𑌿𑌤𑌾 𑌨𑌾𑌸𑍍𑌤𑌿 𑌤𑍇 𑌸𑌮𑌃 ।
𑌬𑌲𑌾𑌤𑍍𑌵𑌤𑌿𑌬𑌲𑌾 𑌚𑍈𑌵 𑌸𑌰𑍍𑌵𑌜𑍍𑌞𑌾𑌨𑌸𑍍𑌯 𑌮𑌾𑌤𑌰𑍌 ॥ 16 ॥
𑌕𑍍𑌷𑍁𑌤𑍍𑌪𑌿𑌪𑌾𑌸𑍇 𑌨 𑌤𑍇 𑌰𑌾𑌮 𑌭𑌵𑌿𑌷𑍍𑌯𑍇𑌤𑍇 𑌨𑌰𑍋𑌤𑍍𑌤𑌮 ।
𑌬𑌲𑌾𑌮𑌤𑌿𑌬𑌲𑌾𑌂 𑌚𑍈𑌵 𑌪𑌠𑌤𑌃 𑌪𑌥𑌿 𑌰𑌾𑌘𑌵 ॥ 1 ॥
𑌵𑌿𑌦𑍍𑌯𑌾𑌦𑍍𑌵𑌯𑌮𑌧𑍀𑌯𑌾𑌨𑍇 𑌯𑌶𑌶𑍍𑌚𑌾𑌪𑍍𑌯𑌤𑍁𑌲𑌂 𑌤𑍍𑌵𑌯𑌿 ।
𑌪𑌿𑌤𑌾𑌮𑌹𑌸𑍁𑌤𑍇 𑌹𑍍𑌯𑍇𑌤𑍇 𑌵𑌿𑌦𑍍𑌯𑍇 𑌤𑍇𑌜𑌸𑍍𑌸𑌮𑌨𑍍𑌵𑌿𑌤𑍇 ॥ 1 ॥
𑌪𑍍𑌰𑌦𑌾𑌤𑍁𑌂 𑌤𑌵 𑌕𑌾𑌕𑍁𑌤𑍍𑌸𑍍𑌥 𑌸𑌦𑍃𑌶𑌸𑍍𑌤𑍍𑌵𑌂 𑌹𑌿 𑌧𑌾𑌰𑍍𑌮𑌿𑌕 ।
𑌕𑌾𑌮𑌂 𑌬𑌹𑍁𑌗𑍁𑌣𑌾𑌸𑍍𑌸𑌰𑍍𑌵𑍇 𑌤𑍍𑌵𑌯𑍍𑌯𑍇𑌤𑍇 𑌨𑌾𑌤𑍍𑌰 𑌸𑌂𑌶𑌯𑌃 ।
𑌤𑌪𑌸𑌾 𑌸𑌂𑌭𑍃𑌤𑍇 𑌚𑍈𑌤𑍇 𑌬𑌹𑍁𑌰𑍂𑌪𑍇 𑌭𑌵𑌿𑌷𑍍𑌯𑌤𑌃 ॥ 1 ॥
𑌤𑌤𑍋 𑌰𑌾𑌮𑍋 𑌜𑌲𑌂 𑌸𑍍𑌪𑍃𑌷𑍍𑌟𑍍𑌵𑌾 𑌪𑍍𑌰𑌹𑍃𑌷𑍍𑌟𑌵𑌦𑌨𑌶𑍍𑌶𑍁𑌚𑌿𑌃 ।
𑌪𑍍𑌰𑌤𑌿𑌜𑌗𑍍𑌰𑌾𑌹 𑌤𑍇 𑌵𑌿𑌦𑍍𑌯𑍇 𑌮𑌹𑌰𑍍𑌷𑍇𑌰𑍍𑌭𑌾𑌵𑌿𑌤𑌾𑌤𑍍𑌮𑌨𑌃 ॥ 20 ॥
𑌵𑌿𑌦𑍍𑌯𑌾𑌸𑌮𑍁𑌦𑌿𑌤𑍋 𑌰𑌾𑌮𑌶𑍍𑌶𑍁𑌶𑍁𑌭𑍇 𑌭𑍂𑌰𑌿𑌵𑌿𑌕𑍍𑌰𑌮𑌃 ।
𑌸𑌹𑌸𑍍𑌰𑌰𑌶𑍍𑌮𑌿𑌰𑍍𑌭𑌗𑌵𑌾𑌨𑍍 𑌶𑌰𑌦𑍀𑌵 𑌦𑌿𑌵𑌾𑌕𑌰𑌃 ॥ 21 ॥
𑌗𑍁𑌰𑍁𑌕𑌾𑌰𑍍𑌯𑌾𑌣𑌿 𑌸𑌰𑍍𑌵𑌾𑌣𑌿 𑌨𑌿𑌯𑍁𑌜𑍍𑌯 𑌕𑍁𑌶𑌿𑌕𑌾𑌤𑍍𑌮𑌜𑍇 ।
𑌊𑌷𑍁𑌸𑍍𑌤𑌾𑌂 𑌰𑌜𑌨𑍀𑌂 𑌤𑌤𑍍𑌰 𑌸𑌰𑌯𑍍𑌵𑌾𑌂 𑌸𑍁𑌸𑍁𑌖𑌂 𑌤𑍍𑌰𑌯𑌃 ॥ 22 ॥
𑌦𑌶𑌰𑌥𑌨𑍃𑌪𑌸𑍂𑌨𑍁𑌸𑌤𑍍𑌤𑌮𑌾𑌭𑍍𑌯𑌾𑌂 𑌤𑍃𑌣𑌶𑌯𑌨𑍇𑌽𑌨𑍁𑌚𑌿𑌤𑍇 𑌸𑌹𑍋𑌷𑌿𑌤𑌾𑌭𑍍𑌯𑌾𑌮𑍍 ।
𑌕𑍁𑌶𑌿𑌕𑌸𑍁𑌤𑌵𑌚𑍋𑌽𑌨𑍁𑌲𑌾𑌲𑌿𑌤𑌾𑌭𑍍𑌯𑌾𑌂 𑌸𑍁𑌖𑌮𑌿𑌵 𑌸𑌾 𑌵𑌿𑌬𑌭𑍌 𑌵𑌿𑌭𑌾𑌵𑌰𑍀 𑌚 ॥ 23 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌦𑍍𑌵𑌾𑌵𑌿𑌂𑌶𑌸𑍍𑌸𑌰𑍍𑌗𑌃 ॥
