𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌷𑍋𑌡𑌶𑌸𑍍𑌸𑌰𑍍𑌗𑌃 ।
𑌵𑌸𑌤𑌸𑍍𑌤𑌸𑍍𑌯 𑌤𑍁 𑌸𑍁𑌖𑌂 𑌰𑌾𑌘𑌵𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌶𑌰𑌦𑍍𑌵𑍍𑌯𑌪𑌾𑌯𑍇 𑌹𑍇𑌮𑌂𑌤𑌋𑌤𑍁𑌰𑌿𑌷𑍍𑌟𑌃 𑌪𑍍𑌰𑌵𑌰𑍍𑌤𑌤 ॥ 1 ॥
𑌸 𑌕𑌦𑌾𑌚𑌿𑌤𑍍𑌪𑍍𑌰𑌭𑌾𑌤𑌾𑌯𑌾𑌂 𑌶𑌰𑍍𑌵𑌰𑍍𑌯𑌾𑌂 𑌰𑌘𑍁𑌨𑌂𑌦𑌨𑌃 ।
𑌪𑍍𑌰𑌯𑌯𑌾𑌵𑌭𑌿𑌷𑍇𑌕𑌾𑌰𑍍𑌥𑌂 𑌰𑌮𑍍𑌯𑌾𑌂 𑌗𑍋𑌦𑌾𑌵𑌰𑍀𑌂 𑌨𑌦𑍀𑌮𑍍 ॥ 2 ॥
𑌪𑍍𑌰𑌹𑍍𑌵𑌃 𑌕𑌲𑌶𑌹𑌸𑍍𑌤𑌸𑍍𑌤𑌂 𑌸𑍀𑌤𑌯𑌾 𑌸𑌹 𑌵𑍀𑌰𑍍𑌯𑌵𑌾𑌨𑍍 ।
𑌪𑍃𑌷𑍍𑌠𑌤𑍋𑌽𑌨𑍁𑌵𑍍𑌰𑌜𑌨𑍍𑌭𑍍𑌰𑌾𑌤𑌾 𑌸𑍌𑌮𑌿𑌤𑍍𑌰𑌿𑌰𑌿𑌦𑌮𑌬𑍍𑌰𑌵𑍀𑌤𑍍 ॥ 3 ॥
𑌅𑌯𑌂 𑌸 𑌕𑌾𑌲𑌃 𑌸𑌂𑌪𑍍𑌰𑌾𑌪𑍍𑌤𑌃 𑌪𑍍𑌰𑌿𑌯𑍋 𑌯𑌸𑍍𑌤𑍇 𑌪𑍍𑌰𑌿𑌯𑌂𑌵𑌦 ।
𑌅𑌲𑌂𑌕𑍃𑌤 𑌇𑌵𑌾𑌭𑌾𑌤𑌿 𑌯𑍇𑌨 𑌸𑌂𑌵𑌤𑍍𑌸𑌰𑌃 𑌶𑍁𑌭𑌃 ॥ 4 ॥
𑌨𑍀𑌹𑌾𑌰𑌪𑌰𑍁𑌷𑍋 𑌲𑍋𑌕𑌃 𑌪𑍃𑌥𑌿𑌵𑍀 𑌸𑌸𑍍𑌯𑌶𑌾𑌲𑌿𑌨𑍀 ।
𑌜𑌲𑌾𑌨𑍍𑌯𑌨𑍁𑌪𑌭𑍋𑌗𑍍𑌯𑌾𑌨𑌿 𑌸𑍁𑌭𑌗𑍋 𑌹𑌵𑍍𑌯𑌵𑌾𑌹𑌨𑌃 ॥ 5 ॥
𑌨𑌵𑌾𑌗𑍍𑌰𑌯𑌣𑌪𑍂𑌜𑌾𑌭𑌿𑌰𑌭𑍍𑌯𑌰𑍍𑌚𑍍𑌯 𑌪𑌿𑌤𑍃𑌦𑍇𑌵𑌤𑌾𑌃 ।
𑌕𑍃𑌤𑌾𑌗𑍍𑌰𑌯𑌣𑌕𑌾𑌃 𑌕𑌾𑌲𑍇 𑌸𑌂𑌤𑍋 𑌵𑌿𑌗𑌤𑌕𑌲𑍍𑌮𑌷𑌾𑌃 ॥ 6 ॥
𑌪𑍍𑌰𑌾𑌜𑍍𑌯𑌕𑌾𑌮𑌾 𑌜𑌨𑌪𑌦𑌾𑌸𑍍𑌸𑌂𑌪𑌨𑍍𑌨𑌤𑌰𑌗𑍋𑌰𑌸𑌾𑌃 ।
𑌵𑌿𑌚𑌰𑌂𑌤𑌿 𑌮𑌹𑍀𑌪𑌾𑌲𑌾 𑌯𑌾𑌤𑍍𑌰𑌾𑌸𑍍𑌥𑌾 𑌵𑌿𑌜𑌿𑌗𑍀𑌷𑌵𑌃 ॥ ॥
𑌸𑍇𑌵𑌮𑌾𑌨𑍇 𑌦𑍃𑌢𑌂 𑌸𑍂𑌰𑍍𑌯𑍇 𑌦𑌿𑌶𑌮𑌂𑌤𑌕 𑌸𑍇𑌵𑌿𑌤𑌾𑌮𑍍 ।
𑌵𑌿𑌹𑍀𑌨𑌤𑌿𑌲𑌕𑍇𑌵 𑌸𑍍𑌤𑍍𑌰𑍀 𑌨𑍋𑌤𑍍𑌤𑌰𑌾 𑌦𑌿𑌕𑍍𑌪𑍍𑌰𑌕𑌾𑌶𑌤𑍇 ॥ ॥
𑌪𑍍𑌰𑌕𑍃𑌤𑍍𑌯𑌾 𑌹𑌿𑌮𑌕𑍋𑌶𑌾𑌢𑍍𑌯𑍋 𑌦𑍂𑌰𑌸𑍂𑌰𑍍𑌯𑌶𑍍𑌚 𑌸𑌾𑌂𑌪𑍍𑌰𑌤𑌮𑍍 ।
𑌯𑌥𑌾𑌰𑍍𑌥𑌨𑌾𑌮𑌾 𑌸𑍁𑌵𑍍𑌯𑌕𑍍𑌤𑌂 𑌹𑌿𑌮𑌵𑌾𑌨𑍍𑌹𑌿𑌮𑌵𑌾𑌨𑍍𑌗𑌿𑌰𑌿𑌃 ॥ ॥
𑌅𑌤𑍍𑌯𑌂𑌤𑌸𑍁𑌖𑌸𑌂𑌚𑌾𑌰𑌾 𑌮𑌧𑍍𑌯𑌾𑌹𑍍𑌨𑍇 𑌸𑍍𑌪𑌰𑍍𑌶𑌤𑌸𑍍𑌸𑍁𑌖𑌾𑌃 ।
𑌦𑌿𑌵𑌸𑌾𑌸𑍍𑌸𑍁𑌭𑌗𑌾𑌦𑌿𑌤𑍍𑌯𑌾𑌶𑍍𑌚𑌾𑌯𑌾𑌸𑌲𑌿𑌲𑌦𑍁𑌰𑍍𑌭𑌗𑌾𑌃 ॥ 10 ॥
𑌮𑍃𑌦𑍁𑌸𑍂𑌰𑍍𑌯𑌾𑌸𑍍𑌸𑌨𑍀𑌹𑌾𑌰𑌾𑌃 𑌪𑌟𑍁𑌶𑍀𑌤𑌾𑌸𑍍𑌸𑌮𑌾𑌰𑍁𑌤𑌾𑌃 ।
𑌶𑍂𑌨𑍍𑌯𑌾𑌰𑌣𑍍𑌯𑌾 𑌹𑌿𑌮𑌧𑍍𑌵𑌸𑍍𑌤𑌾 𑌦𑌿𑌵𑌸𑌾 𑌭𑌾𑌂𑌤𑌿𑌸𑌾𑌂𑌪𑍍𑌰𑌤𑌮𑍍 ॥ 11 ॥
𑌨𑌿𑌵𑍃𑌤𑍍𑌤𑌾𑌕𑌾𑌶𑌶𑌯𑌨𑌾𑌃 𑌪𑍁𑌷𑍍𑌯𑌨𑍀𑌤𑌾 𑌹𑌿𑌮𑌾𑌰𑍁𑌣𑌾𑌃 ।
𑌶𑍀𑌤𑌾 𑌵𑍃𑌦𑍍𑌧𑌤𑌰𑌾𑌯𑌾𑌮𑌾𑌸𑍍𑌤𑍍𑌰𑌿𑌯𑌾𑌮𑌾 𑌯𑌾𑌂𑌤𑌿 𑌸𑌾𑌂𑌪𑍍𑌰𑌤𑌮𑍍 ॥ 12 ॥
𑌰𑌵𑌿𑌸𑌂𑌕𑍍𑌰𑌾𑌂𑌤𑌸𑍌𑌭𑌾𑌗𑍍𑌯 𑌸𑍍𑌤𑍁𑌷𑌾𑌰𑌾𑌰𑍁𑌣𑌮𑌂𑌡𑌲𑌃 ।
𑌨𑌿𑌶𑍍𑌶𑍍𑌵𑌾𑌸𑌾𑌂𑌧 𑌇𑌵𑌾𑌦𑌰𑍍𑌶𑌨𑍍𑌛𑌂𑌦𑍍𑌰𑌮𑌾 𑌨 𑌪𑍍𑌰𑌕𑌾𑌶𑌤𑍇 ॥ 13 ॥
𑌜𑍍𑌯𑍋𑌤𑍍𑌸𑍍𑌨 𑌤𑍁𑌷𑌾𑌰𑌮𑌲𑌿𑌨𑌾 𑌪𑍌𑌰𑍍𑌣𑌮𑌾𑌸𑍍𑌯𑌾𑌂 𑌨 𑌰𑌾𑌜𑌤𑍇 ।
𑌸𑍀𑌤𑍇𑌵 𑌚𑌾𑌤𑌪𑌶𑍍𑌯𑌾𑌮𑌾 𑌲𑌕𑍍𑌷𑍍𑌯𑌤𑍇 𑌨 𑌤𑍁 𑌶𑍋𑌭𑌤𑍇 ॥ 14 ॥
𑌪𑍍𑌰𑌕𑍃𑌤𑍍𑌯𑌾 𑌶𑍀𑌤𑌲𑌸𑍍𑌪𑌰𑍍𑌶𑍋 𑌹𑌿𑌮𑌵𑌿𑌦𑍍𑌧𑌶𑍍𑌚 𑌸𑌾𑌂𑌪𑍍𑌰𑌤𑌮𑍍 ।
𑌪𑍍𑌰𑌵𑌾𑌤𑌿 𑌪𑌶𑍍𑌚𑌿𑌮𑍋 𑌵𑌾𑌯𑍁𑌃 𑌕𑌾𑌲𑍇 𑌦𑍍𑌵𑌿𑌗𑍁𑌣𑌶𑍀𑌤𑌲𑌃 ॥ 15 ॥
𑌬𑌾𑌷𑍍𑌪𑌚𑍍𑌛𑌨𑍍𑌨𑌾𑌨𑍍𑌯𑌰𑌣𑍍𑌯𑌾𑌨𑌿 𑌯𑌵𑌗𑍋𑌧𑍂𑌮𑌵𑌂𑌤𑌿 𑌚 ।
𑌶𑍋𑌭𑌂𑌤𑍇𑌽𑌭𑍍𑌯𑍁𑌦𑌿𑌤𑍇 𑌸𑍂𑌰𑍍𑌯𑍇 𑌨𑌦𑍍𑌭𑌿 𑌕𑍍𑌰𑍌𑌂𑌚𑌸𑌾𑌰𑌸𑍈𑌃 ॥ 16 ॥
𑌖𑌰𑍍𑌜𑍂𑌰𑌪𑍁𑌷𑍍𑌪𑌾𑌕𑍃𑌤𑌿𑌭𑌿𑌶𑍍𑌶𑌿𑌰𑍋𑌭𑌿𑌃 𑌪𑍂𑌰𑍍𑌣𑌤𑌂𑌡𑍁𑌲𑍈𑌃 ।
𑌶𑍋𑌭𑌂𑌤𑍇 𑌕𑌿𑌂𑌚𑌿𑌦𑌾𑌨𑌮𑍍𑌰𑌾𑌶𑍍𑌶𑌾𑌲𑌯𑌃 𑌕𑌨𑌕𑌪𑍍𑌰𑌭𑌾𑌃 ॥ 1 ॥
𑌮𑌯𑍂𑌖𑍈𑌰𑍁𑌪𑌸𑌰𑍍𑌪𑌦𑍍𑌭𑌿𑌰𑍍𑌹𑌿𑌮𑌨𑍀𑌹𑌾𑌰𑌸𑌂𑌵𑍃𑌤𑍈𑌃 ।
𑌦𑍂𑌰𑌮𑌭𑍍𑌯𑍁𑌦𑌿𑌤𑌸𑍍𑌸𑍂𑌰𑍍𑌯𑌶𑍍𑌶𑌶𑌾𑌂𑌕 𑌇𑌵 𑌲𑌕𑍍𑌷𑍍𑌯𑌤𑍇 ॥ 1 ॥
𑌅𑌗𑍍𑌰𑌾𑌹𑍍𑌯𑌵𑍀𑌰𑍍𑌯𑌃 𑌪𑍂𑌰𑍍𑌵𑌾𑌹𑍍𑌣𑍇 𑌮𑌧𑍍𑌯𑌾𑌹𑍍𑌨𑍇 𑌸𑍍𑌪𑌰𑍍𑌶𑌤𑌸𑍍𑌸𑍁𑌖𑌃 ।
𑌸𑌂𑌰𑌕𑍍𑌤𑌃 𑌕𑌿𑌂𑌚𑌿𑌦𑌾𑌪𑌾𑌂𑌡𑍁𑌰𑌾𑌤𑌪𑌶𑍍𑌶𑍋𑌭𑌤𑍇 𑌕𑍍𑌷𑌿𑌤𑍌 ॥ 1 ॥
𑌅𑌵𑌶𑍍𑌯𑌾𑌯𑌨𑌿𑌪𑌾𑌤𑍇𑌨 𑌕𑌿𑌂𑌚𑌿𑌤𑍍𑌪𑍍𑌰𑌕𑍍𑌲𑌿𑌨𑍍𑌨𑌶𑌾𑌦𑍍𑌵𑌲𑌾 ।
𑌵𑌨𑌾𑌨𑌾𑌂 𑌶𑍋𑌭𑌤𑍇 𑌭𑍂𑌮𑌿𑌰𑍍𑌨𑌿𑌵𑌿𑌷𑍍𑌟𑌤𑌰𑍁𑌣𑌾𑌤𑌪𑌾 ॥ 20 ॥
𑌸𑍍𑌪𑍃𑌶𑌂𑌸𑍍𑌤𑍁 𑌵𑌿𑌮𑌲𑌂 𑌶𑍀𑌤𑌮𑍁𑌦𑌕𑌂 𑌦𑍍𑌵𑌿𑌰𑌦𑌸𑍍𑌸𑍁𑌖𑌮𑍍 ।
𑌅𑌤𑍍𑌯𑌂𑌤𑌤𑍃𑌷𑌿𑌤𑍋 𑌵𑌨𑍍𑌯𑌃 𑌪𑍍𑌰𑌤𑌿𑌸𑌂𑌹𑌰𑌤𑍇 𑌕𑌰𑌮𑍍 ॥ 21 ॥
𑌏𑌤𑍇 𑌹𑌿 𑌸𑌮𑍁𑌪𑌾𑌸𑍀𑌨𑌾 𑌵𑌿𑌹𑌗𑌾 𑌜𑌲𑌚𑌾𑌰𑌿𑌣𑌃 ।
𑌨𑌾𑌵𑌗𑌾𑌹𑌂𑌤𑌿 𑌸𑌲𑌿𑌲𑌮𑌪𑍍𑌰𑌗𑌲𑍍𑌭𑌾 𑌇𑌵𑌾𑌹𑌵𑌮𑍍 ॥ 22 ॥
𑌅𑌵𑌶𑍍𑌯𑌾𑌯𑌤𑌮𑍋𑌨𑌦𑍍𑌧𑌾 𑌨𑍀𑌹𑌾𑌰𑌤𑌮𑌸𑌾𑌽𑌵𑍃𑌤𑌾𑌃 ।
𑌪𑍍𑌰𑌸𑍁𑌪𑍍𑌤𑌾 𑌇𑌵 𑌲𑌕𑍍𑌷𑍍𑌯𑌂𑌤𑍇 𑌵𑌿𑌪𑍁𑌷𑍍𑌪𑌾 𑌵𑌨𑌰𑌾𑌜𑌯𑌃 ॥ 23 ॥
𑌬𑌾𑌷𑍍𑌪𑌸𑌂𑌛𑌨𑍍𑌨𑌸𑌲𑌿𑌲𑌾 𑌰𑍁𑌤𑌵𑌿𑌜𑍍𑌞𑍇𑌯𑌸𑌾𑌰𑌸𑌾𑌃 ।
𑌹𑌿𑌮𑌾𑌰𑍍𑌦𑍍𑌰𑌵𑌾𑌲𑍁𑌕𑍈𑌸𑍍𑌤𑍀𑌰𑍈𑌸𑍍𑌸𑌰𑌿𑌤𑍋 𑌭𑌾𑌂𑌤𑌿 𑌸𑌾𑌂𑌪𑍍𑌰𑌤𑌮𑍍 ॥ 24 ॥
𑌤𑍁𑌷𑌾𑌰𑌪𑌤𑌨𑌾𑌚𑍍𑌚𑍈𑌵 𑌮𑍃𑌦𑍁𑌤𑍍𑌵𑌾𑌦𑍍𑌭𑌾𑌸𑍍𑌕𑌰𑌸𑍍𑌯 𑌚 ।
𑌶𑍈𑌤𑍍𑌯𑌾𑌦𑌗𑌾𑌗𑍍𑌰𑌸𑍍𑌥𑌮𑌪𑌿 𑌪𑍍𑌰𑌾𑌯𑍇𑌣 𑌰𑌸𑌵𑌜𑍍𑌜𑌲𑌮𑍍 ॥ 25 ॥
𑌜𑌰𑌾𑌜𑌰𑍍𑌜𑌰𑌿𑌤𑍈𑌃 𑌪𑌦𑍍𑌮𑍈𑌶𑌶𑍀𑌰𑍍𑌣𑌕𑍇𑌸𑌰𑌕𑌰𑍍𑌣𑌿𑌕𑍈𑌃 ।
𑌨𑌾𑌲𑌷𑍇𑌰𑍍𑌹𑌿𑌮𑌧𑍍𑌵𑌸𑍍𑌸𑍈𑌰𑍍𑌨 𑌭𑌂𑌤𑌿 𑌕𑌮𑌲𑌾𑌕𑌰𑌾𑌃 ॥ 26 ॥
𑌅𑌸𑍍𑌮𑌿𑌂𑌸𑍍𑌤𑍁 𑌪𑍁𑌰𑍁𑌷𑌵𑍍𑌯𑌾𑌘𑍍𑌰𑌃 𑌕𑌾𑌲𑍇 𑌦𑍁𑌃𑌖𑌸𑌮𑌨𑍍𑌵𑌿𑌤𑌃 ।
𑌤𑌪𑌶𑍍𑌚𑌰𑌤𑌿 𑌧𑌰𑍍𑌮𑌾𑌤𑍍𑌮𑌾 𑌤𑍍𑌵𑌦𑍍𑌭𑌕𑍍𑌤𑍍𑌯𑌾 𑌭𑌰𑌤𑌃 𑌪𑍁𑌰𑍇 ॥ 2 ॥
𑌤𑍍𑌯𑌕𑍍𑌤𑍍𑌵𑌾 𑌰𑌾𑌜𑍍𑌯𑌂 𑌚 𑌮𑌾𑌨𑌂 𑌚 𑌭𑍋𑌗𑌾𑌂𑌶𑍍𑌚 𑌵𑌿𑌵𑌿𑌧𑌾𑌨𑍍𑌬𑌹𑍂𑌨𑍍 ।
𑌤𑌪𑌸𑍍𑌸𑍍𑌵𑍀 𑌨𑌿𑌯𑌤𑌾𑌹𑌾𑌰𑌶𑍍𑌶𑍇𑌤𑍇 𑌶𑍀𑌤𑍇 𑌮𑌹𑍀𑌤𑌲𑍇 ॥ 2 ॥
𑌸𑍋𑌽𑌪𑌿 𑌵𑍇𑌲𑌾𑌮𑌿𑌮𑌾𑌂 𑌨𑍂𑌨𑌮𑌭𑌿𑌷𑍇𑌕𑌾𑌰𑍍𑌥𑌮𑍁𑌦𑍍𑌯𑌤𑌃 ।
𑌵𑍃𑌤𑌃 𑌪𑍍𑌰𑌕𑍃𑌤𑌿𑌭𑌿𑌰𑍍𑌨𑌿𑌤𑍍𑌯𑌂 𑌪𑍍𑌰𑌯𑌾𑌤𑌿 𑌸𑌰𑌯𑍂𑌂 𑌨𑌦𑍀𑌮𑍍 ॥ 2 ॥
𑌅𑌤𑍍𑌯𑌂𑌤𑌸𑍁𑌖𑌸𑌂𑌵𑍃𑌦𑍍𑌧𑌸𑍍𑌸𑍁𑌕𑍁𑌮𑌾𑌰𑌸𑍍𑌸𑍁𑌖𑍋𑌚𑌿𑌤𑌃 ।
𑌕𑌥𑌂 𑌨𑍍𑌵𑌪𑌰𑌰𑌾𑌤𑍍𑌰𑍇𑌷𑍁 𑌸𑌰𑌯𑍂𑌮𑌵𑌗𑌾𑌹𑌤𑍇 ॥ 30 ॥
𑌪𑌦𑍍𑌮𑌪𑌤𑍍𑌰𑍇𑌕𑍍𑌷𑌣𑍋 𑌵𑍀𑌰𑌶𑍍𑌶𑍍𑌯𑌾𑌮𑍋 𑌨𑌿𑌰𑍁𑌦𑌰𑍋 𑌮𑌹𑌾𑌨𑍍 ।
𑌧𑌰𑍍𑌮𑌜𑍍𑌞 𑌸𑍍𑌸𑌤𑍍𑌯𑌵𑌾𑌦𑍀 𑌚 𑌹𑍍𑌰𑍀𑌨𑌿𑌷𑍇𑌧𑍋 𑌜𑌿𑌤𑍇𑌂𑌦𑍍𑌰𑌿𑌯𑌃 ॥ 31 ॥
𑌪𑍍𑌰𑌿𑌯𑌾𑌭𑌿𑌭𑌾𑌷𑍀 𑌮𑌧𑍁𑌰𑍋 𑌦𑍀𑌰𑍍𑌘𑌬𑌾𑌹𑍁𑌰𑌰𑌿𑌂𑌦𑌮𑌃 ।
𑌸𑌂𑌤𑍍𑌯𑌜𑍍𑌯 𑌵𑌿𑌵𑌿𑌧𑌾𑌨𑍍𑌭𑍋𑌗𑌾𑌨𑌾𑌰𑍍𑌯𑌂 𑌸𑌰𑍍𑌵𑌾𑌤𑍍𑌮𑌨𑌾 𑌶𑍍𑌰𑌿𑌤𑌃 ॥ 32 ॥
𑌜𑌿𑌤𑌸𑍍𑌸𑍍𑌵𑌰𑍍𑌗𑌸𑍍𑌤𑌵 𑌭𑍍𑌰𑌾𑌤𑍍𑌰𑌾 𑌭𑌰𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌵𑌨𑌸𑍍𑌥𑌮𑌪𑌿 𑌤𑌾𑌪𑌸𑍍𑌯𑍇 𑌯𑌸𑍍𑌤𑍍𑌵𑌾𑌮𑌨𑍁𑌵𑌿𑌧𑍀𑌯𑌤𑍇 ॥ 33 ॥
𑌨 𑌪𑌿𑌤𑍍𑌰𑍍𑌯𑌮𑌨𑍁𑌵𑌰𑍍𑌤𑌂𑌤𑍇 𑌮𑌾𑌤𑍃𑌕𑌂 𑌦𑍍𑌵𑌿𑌪𑌦𑌾 𑌇𑌤𑌿 ।
𑌖𑍍𑌯𑌾𑌤𑍋 𑌲𑍋𑌕𑌪𑍍𑌰𑌵𑌾𑌦𑍋𑌽𑌯𑌂 𑌭𑌰𑌤𑍇𑌨𑌾𑌨𑍍𑌯𑌥𑌾 𑌕𑍃𑌤𑌃 ॥ 34 ॥
𑌭𑌰𑍍𑌤𑌾 𑌦𑌶𑌰𑌥𑍋 𑌯𑌸𑍍𑌯𑌾𑌸𑍍𑌸𑌾𑌧𑍁𑌶𑍍𑌚 𑌭𑌰𑌤𑌸𑍍𑌸𑍁𑌤𑌃 ।
𑌕𑌥𑌂 𑌨𑍁 𑌸𑌾𑌽𑌂𑌬𑌾 𑌕𑍈𑌕𑍇𑌯𑍀 𑌤𑌾𑌦𑍃𑌶𑍀 𑌕𑍍𑌰𑍂𑌰𑌶𑍀𑌲𑌿𑌨𑍀 ॥ 35 ॥
𑌇𑌤𑍍𑌯𑍇𑌵𑌂 𑌲𑌕𑍍𑌷𑍍𑌮𑌣𑍇 𑌵𑌾𑌕𑍍𑌯𑌂 𑌸𑍍𑌨𑍇𑌹𑌾𑌦𑍍𑌬𑍍𑌰𑍁𑌵𑌤𑌿 𑌧𑌾𑌰𑍍𑌮𑌿𑌕𑍇 ।
𑌪𑌰𑌿𑌵𑌾𑌦𑌂 𑌜𑌨𑌨𑍍𑌯𑌾𑌸𑍍𑌤𑌮𑌸𑌹𑌨𑍍𑌰𑌾𑌘𑌵𑍋𑌽𑌬𑍍𑌰𑌵𑍀𑌤𑍍 ॥ 36 ॥
𑌸 𑌤𑍇𑌽𑌂𑌬𑌾 𑌮𑌧𑍍𑌯𑌮𑌾 𑌤𑌾𑌤 𑌗𑌰𑍍𑌹𑌿𑌤𑌵𑍍𑌯𑌾 𑌕𑌥𑌂𑌚𑌨 ।
𑌤𑌾𑌮𑍇𑌵𑍇𑌕𑍍𑌷𑍍𑌵𑌾𑌕𑍁𑌨𑌾𑌥𑌸𑍍𑌯 𑌭𑌰𑌤𑌸𑍍𑌯 𑌕𑌥𑌾𑌂 𑌕𑍁𑌰𑍁 ॥ 3 ॥
𑌨𑌿𑌶𑍍𑌚𑌿𑌤𑌾𑌽𑌪𑌿 𑌹𑌿 𑌮𑍇 𑌬𑍁𑌦𑍍𑌧𑌿𑌰𑍍𑌵𑌨𑌵𑌾𑌸𑍇 𑌦𑍃𑌢𑌵𑍍𑌰𑌤𑌾 ।
𑌭𑌰𑌤𑌸𑍍𑌨𑍇𑌹𑌸𑌂𑌤𑌪𑍍𑌤𑌾 𑌬𑌾𑌲𑌿𑌶𑍀𑌕𑍍𑌰𑌿𑌯𑌤𑍇 𑌪𑍁𑌨𑌃 ॥ 3 ॥
𑌸𑌂𑌸𑍍𑌮𑌰𑌾𑌮𑍍𑌯𑌸𑍍𑌯 𑌵𑌾𑌕𑍍𑌯𑌾𑌨𑌿 𑌪𑍍𑌰𑌿𑌯𑌾𑌣𑌿 𑌮𑌧𑍁𑌰𑌾𑌣𑌿 𑌚 ।
𑌹𑍃𑌦𑍍𑌯𑌾𑌨𑍍𑌯𑌮𑍃𑌤𑌕𑌲𑍍𑌪𑌾𑌨𑌿 𑌮𑌨𑌃𑌪𑍍𑌰𑌹𑍍𑌲𑌾𑌦𑌨𑌾𑌨𑌿 𑌚 ॥ 3 ॥
𑌕𑌦𑌾𑌨𑍍𑌵𑌹𑌂 𑌸𑌮𑍇𑌷𑍍𑌯𑌾𑌮𑌿 𑌭𑌰𑌤𑍇𑌨 𑌮𑌹𑌾𑌤𑍍𑌮𑌨𑌾 ।
𑌶𑌤𑍍𑌰𑍁𑌘𑍍𑌨𑍇𑌨 𑌚 𑌵𑍀𑌰𑍇𑌣 𑌤𑍍𑌵𑌯𑌾 𑌚 𑌰𑌘𑍁𑌨𑌂𑌦𑌨 ॥ 40 ॥
𑌇𑌤𑍍𑌯𑍇𑌵𑌂 𑌵𑌿𑌲𑌪𑌂𑌸𑍍𑌤𑌤𑍍𑌰 𑌪𑍍𑌰𑌾𑌪𑍍𑌯 𑌗𑍋𑌦𑌾𑌵𑌰𑍀𑌂 𑌨𑌦𑍀𑌮𑍍 ।
𑌚𑌕𑍍𑌰𑍇𑌽𑌭𑌿𑌷𑍇𑌕𑌂 𑌕𑌾𑌕𑍁𑌤𑍍𑌸𑍍𑌥𑌸𑍍𑌸𑌾𑌨𑍁𑌜𑌸𑍍𑌸𑌹 𑌸𑍀𑌤𑌯𑌾 ॥ 41 ॥
𑌤𑌰𑍍𑌪𑌯𑌿𑌤𑍍𑌵𑌾𑌽𑌥 𑌸𑌲𑌿𑌲𑍈𑌸𑍍𑌤𑍇 𑌪𑌿𑌤𑍃𑌂𑌦𑍈𑌵𑌤𑌾𑌨𑌿 𑌚 ।
𑌸𑍍𑌤𑍁𑌵𑌂𑌤𑌿 𑌸𑍍𑌮𑍋𑌦𑌿𑌤𑌂 𑌸𑍂𑌰𑍍𑌯𑌂 𑌦𑍇𑌵𑌤𑌾𑌶𑍍𑌚 𑌸𑌮𑌾𑌹𑌿𑌤𑌾𑌃 ॥ 42 ॥
𑌕𑍃𑌤𑌾𑌭𑌿𑌷𑍇𑌕𑌸𑍍𑌸𑌰𑌰𑌾𑌜 𑌰𑌾𑌮𑌃 𑌸𑍀𑌤𑌾𑌦𑍍𑌵𑌿𑌤𑍀𑌯𑌸𑍍𑌸𑌹 𑌲𑌕𑍍𑌷𑍍𑌮𑌣𑍇𑌨 ।
𑌕𑍃𑌤𑌾𑌭𑌿𑌷𑍇𑌕𑍋 𑌗𑌿𑌰𑌿𑌰𑌾𑌜𑌪𑍁𑌤𑍍𑌰𑍍𑌯𑌾 𑌰𑍁𑌦𑍍𑌰𑌸𑍍𑌸𑌨𑌂𑌦𑍀 𑌭𑌗𑌵𑌾𑌨𑌿𑌵𑍇𑌶𑌃 ॥ 43 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌷𑍋𑌡𑌶𑌸𑍍𑌸𑌰𑍍𑌗𑌃 ॥
