𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌆𑌰𑍍𑌤𑌸𑍍𑌵𑌰𑌂 𑌤𑍁 𑌤𑌂 𑌭𑌰𑍍𑌤𑍁𑌰𑍍𑌵𑌿𑌜𑍍𑌞𑌾𑌯 𑌸𑌦𑍃𑌶𑌂 𑌵𑌨𑍇 ।
𑌉𑌵𑌾𑌚 𑌲𑌕𑍍𑌷𑍍𑌮𑌣𑌂 𑌸𑍀𑌤𑌾 𑌗𑌚𑍍𑌛 𑌜𑍀𑌨𑍀𑌹𑌿 𑌰𑌾𑌘𑌵𑌮𑍍 ॥ 1 ॥
𑌨 𑌹𑌿 𑌮𑍇 𑌹𑍃𑌦𑌯𑌂 𑌸𑍍𑌥𑌾𑌨𑍇 𑌜𑍀𑌵𑌿𑌤𑌂 𑌵𑌾𑌽𑌵𑌤𑌿𑌷𑍍𑌠𑌤𑌿 ।
𑌕𑍍𑌰𑍋𑌶𑌤𑌃 𑌪𑌰𑌮𑌾𑌰𑍍𑌤𑌸𑍍𑌯 𑌶𑍍𑌰𑍁𑌤𑌶𑍍𑌶𑌬𑍍𑌦𑍋 𑌮𑌯𑌾 𑌭𑍃𑌶𑌮𑍍 ॥ 2 ॥
𑌆𑌕𑍍𑌰𑌂𑌦𑌮𑌾𑌨𑌂 𑌤𑍁 𑌵𑌨𑍇 𑌭𑍍𑌰𑌾𑌤𑌰𑌂 𑌤𑍍𑌰𑌾𑌤𑍁𑌮𑌰𑍍𑌹𑌸𑌿 ।
𑌤𑌂 𑌕𑍍𑌷𑌿𑌪𑍍𑌰𑌮𑌭𑌿𑌧𑌾𑌵 𑌤𑍍𑌵𑌂 𑌭𑍍𑌰𑌾𑌤𑌰𑌂 𑌶𑌰𑌣𑍈𑌷𑌿𑌣𑌮𑍍 ॥ 3 ॥
𑌰𑌕𑍍𑌷𑌸𑌾𑌂 𑌵𑌶𑌮𑌾𑌪𑌨𑍍𑌨𑌂 𑌸𑌿𑌂𑌹𑌾𑌨𑌾𑌮𑌿𑌵 𑌗𑍋𑌵𑍃𑌷𑌮𑍍 ।
𑌨 𑌜𑌗𑌾𑌮 𑌤𑌥𑍋𑌕𑍍𑌤𑌸𑍍𑌤𑍁 𑌭𑍍𑌰𑌾𑌤𑍁𑌰𑌾𑌜𑍍𑌞𑌾𑌯 𑌶𑌾𑌸𑌨𑌮𑍍 ॥ 4 ॥
𑌤𑌮𑍁𑌵𑌾𑌚 𑌤𑌤𑌸𑍍𑌤𑌤𑍍𑌰 𑌕𑍁𑌪𑌿𑌤𑌾 𑌜𑌨𑌕𑌾𑌤𑍍𑌮𑌜𑌾 ।
𑌸𑍌𑌮𑌿𑌤𑍍𑌰𑍇 𑌮𑌿𑌤𑍍𑌰𑌰𑍂𑌪𑍇𑌣 𑌭𑍍𑌰𑌾𑌤𑍁𑌸𑍍𑌤𑍍𑌵𑌮𑌸𑌿 𑌶𑌤𑍍𑌰𑍁𑌵𑌤𑍍 ॥ 5 ॥
𑌯𑌸𑍍𑌤𑍍𑌵𑌮𑌸𑍍𑌯𑌾𑌮𑌵𑌸𑍍𑌥𑌾𑌯𑌾𑌂 𑌭𑍍𑌰𑌾𑌤𑌰𑌂 𑌨𑌾𑌭𑌿𑌪𑌤𑍍𑌸𑍍𑌯𑌸𑍇 ।
𑌇𑌚𑍍𑌛𑌸𑌿 𑌤𑍍𑌵𑌂 𑌵𑌿𑌨𑌶𑍍𑌯𑌂𑌤𑌂 𑌰𑌾𑌮𑌂 𑌲𑌕𑍍𑌷𑍍𑌮𑌣 𑌮𑌤𑍍𑌕𑍃𑌤𑍇 ॥ 6 ॥
𑌲𑍋𑌭𑌾𑌤𑍍𑌤𑍍𑌵𑌂 𑌮𑌤𑍍𑌕𑍃𑌤𑍇 𑌨𑍂𑌨𑌂 𑌨𑌾𑌨𑍁𑌗𑌚𑍍𑌛𑌸𑌿 𑌰𑌾𑌘𑌵𑌮𑍍 ।
𑌵𑍍𑌯𑌸𑌨𑌂 𑌤𑍇 𑌪𑍍𑌰𑌿𑌯𑌂 𑌮𑌨𑍍𑌯𑍇 𑌸𑍍𑌨𑍇𑌹𑍋 𑌭𑍍𑌰𑌾𑌤𑌰𑌿𑌨𑌾𑌸𑍍𑌤𑌿𑌤𑍇 ॥ ॥
𑌤𑍇𑌨 𑌤𑌿𑌷𑍍𑌠𑌸𑌿 𑌵𑌿𑌶𑍍𑌰𑌬𑍍𑌧𑌂𑌤𑌮𑌪𑌶𑍍𑌯𑌨𑍍𑌮𑌹𑌾𑌦𑍍𑌯𑍁𑌤𑌿𑌮𑍍 ।
𑌕𑌿𑌂 𑌹𑌿 𑌸𑌂𑌶𑌯𑌮𑌾𑌪𑌨𑍍𑌨𑍇 𑌤𑌸𑍍𑌮𑌿𑌨𑍍𑌨𑌿𑌹 𑌮𑌯𑌾 𑌭𑌵𑍇𑌤𑍍 ॥ ॥
𑌕𑌰𑍍𑌤𑌵𑍍𑌯𑌮𑌿𑌹 𑌤𑌿𑌷𑍍𑌠𑌂𑌤𑍍𑌯𑌾 𑌯𑌤𑍍𑌪𑍍𑌰𑌧𑌾𑌨𑌸𑍍𑌤𑍍𑌵𑌮𑌾𑌗𑌤𑌃 ।
𑌇𑌤𑌿 𑌬𑍍𑌰𑍁𑌵𑌾𑌣𑌾𑌂 𑌵𑍈𑌦𑍇𑌹𑍀𑌂 𑌬𑌾𑌷𑍍𑌪𑌶𑍋𑌕𑌪𑌰𑌿𑌪𑍍𑌲𑍁𑌤𑌾𑌮𑍍 ॥ ॥
𑌅𑌬𑍍𑌰𑌵𑍀𑌲𑍍𑌲𑌕𑍍𑌷𑍍𑌮𑌣𑌸𑍍𑌤𑍍𑌰𑌸𑍍𑌤𑌾𑌂 𑌸𑍀𑌤𑌾𑌂 𑌮𑍃𑌗𑌵𑌧𑍂𑌮𑌿𑌵 ।
𑌪𑌨𑍍𑌨𑌗𑌾𑌸𑍁𑌰𑌗𑌂𑌧𑌰𑍍𑌵𑌦𑍇𑌵𑌮𑌾𑌨𑍁𑌷𑌰𑌾𑌕𑍍𑌷𑌸𑍈𑌃 ॥ 10 ॥
𑌅𑌶𑌕𑍍𑌯𑌸𑍍𑌤𑌵 𑌵𑍈𑌦𑍇𑌹𑌿 𑌭𑌰𑍍𑌤𑌾 𑌜𑍇𑌤𑍁𑌂 𑌨 𑌸𑌂𑌶𑌯𑌃 ।
𑌦𑍇𑌵𑌿 𑌦𑍇𑌵𑌮𑌨𑍁𑌷𑍍𑌯𑍇𑌷𑍁 𑌗𑌂𑌧𑌰𑍍𑌵𑍇𑌷𑍁 𑌪𑌤𑌤𑍍𑌰𑌿𑌷𑍁 ॥ 11 ॥
𑌰𑌾𑌕𑍍𑌷𑌸𑍇𑌷𑍁 𑌪𑌿𑌶𑌾𑌚𑍇𑌷𑍁 𑌕𑌿𑌨𑍍𑌨𑌰𑍇𑌷𑍁 𑌮𑍃𑌗𑍇𑌷𑍁 𑌚 ।
𑌦𑌾𑌨𑌵𑍇𑌷𑍁 𑌚 𑌘𑍋𑌰𑍇𑌷𑍁 𑌸 𑌨 𑌵𑌿𑌦𑍍𑌯𑍇𑌤 𑌶𑍋𑌭𑌨𑍇 ॥ 12 ॥
𑌯𑍋 𑌰𑌾𑌮𑌂 𑌪𑍍𑌰𑌤𑌿𑌯𑍁𑌧𑍍𑌯𑍇𑌤 𑌸𑌮𑌰𑍇 𑌵𑌾𑌸𑌵𑍋𑌪𑌮𑌮𑍍 ।
𑌅𑌵𑌧𑍍𑌯𑌸𑍍𑌸𑌮𑌰𑍇 𑌰𑌾𑌮𑍋 𑌨𑍈𑌵𑌂 𑌤𑍍𑌵𑌂 𑌵𑌕𑍍𑌤𑍁𑌮𑌰𑍍𑌹𑌸𑌿 ॥ 13 ॥
𑌨 𑌤𑍍𑌵𑌾𑌮𑌸𑍍𑌮𑌿𑌨𑍍𑌵𑌨𑍇 𑌹𑌾𑌤𑍁𑌮𑍁𑌤𑍍𑌸𑌹𑍇 𑌰𑌾𑌘𑌵𑌂 𑌵𑌿𑌨𑌾 ।
𑌅𑌨𑌿𑌵𑌾𑌰𑍍𑌯𑌂 𑌬𑌲𑌂 𑌤𑌸𑍍𑌯 𑌬𑌲𑍈𑌰𑍍𑌬𑌲𑌵𑌤𑌾𑌮𑌪𑌿 ॥ 14 ॥
𑌤𑍍𑌰𑌿𑌭𑌿𑌰𑍍𑌲𑍋𑌕𑍈𑌸𑍍𑌸𑌮𑍁𑌦𑍍𑌯𑍁𑌕𑍍𑌤𑍈𑌸𑍍𑌸𑍇𑌶𑍍𑌵𑌰𑍈𑌰𑌪𑌿 𑌸𑌾𑌮𑌰𑍈𑌃 ।
𑌹𑍃𑌦𑌯𑌂 𑌨𑌿𑌰𑍍𑌵𑍃𑌤𑌂 𑌤𑍇𑌽𑌸𑍍𑌤𑍁𑌸𑌂𑌤𑌾𑌪𑌸𑍍𑌤𑍍𑌯𑌜𑍍𑌯𑌤𑌾𑌮𑌯𑌮𑍍 ॥ 15 ॥
𑌆𑌗𑌮𑌿𑌷𑍍𑌯𑌤𑌿 𑌤𑍇 𑌭𑌰𑍍𑌤𑌾 𑌶𑍍𑌰𑍀𑌘𑍍𑌰𑌂 𑌹𑌤𑍍𑌵𑌾 𑌮𑍃𑌗𑍋𑌤𑍍𑌤𑌮𑌮𑍍 ।
𑌨 𑌚 𑌤𑌸𑍍𑌯 𑌸𑍍𑌵𑌰𑍋 𑌵𑍍𑌯𑌕𑍍𑌤𑌂 𑌮𑌾𑌯𑌯𑌾 𑌕𑍇𑌨 𑌚𑌿𑌤𑍍𑌕𑍃𑌤𑌃 ।
𑌗𑌂𑌧𑌰𑍍𑌵𑌨𑌗𑌰𑌪𑍍𑌰𑌖𑍍𑌯𑌾 𑌮𑌾𑌯𑌾 𑌸𑌾 𑌤𑌸𑍍𑌯 𑌰𑌕𑍍𑌷𑌸𑌃 ॥ 16 ॥
𑌨𑍍𑌯𑌾𑌸𑌭𑍂𑌤𑌾𑌸𑌿 𑌵𑍈𑌦𑍇𑌹𑌿 𑌨𑍍𑌯𑌸𑍍𑌤𑌾 𑌮𑌯𑌿 𑌮𑌹𑌾𑌤𑍍𑌮𑌨𑌾 ॥ 1 ॥
𑌰𑌾𑌮𑍇𑌣 𑌤𑍍𑌵𑌂 𑌵𑌰𑌾𑌰𑍋𑌹𑍇 𑌨 𑌤𑍍𑌵𑌾𑌂 𑌤𑍍𑌯𑌕𑍍𑌤𑍁𑌮𑌿𑌹𑍋𑌤𑍍𑌸𑌹𑍇 ।
𑌕𑍃𑌤𑌵𑍈𑌰𑌾𑌶𑍍𑌚 𑌵𑍈𑌦𑍇𑌹𑌿 𑌵𑌯𑌮𑍇𑌤𑍈𑌰𑍍𑌨𑌿𑌶𑌾𑌚𑌰𑍈𑌃 ॥ 1 ॥
𑌖𑌰𑌸𑍍𑌯 𑌨𑌿𑌧𑌨𑌾𑌦𑍇𑌵 𑌜𑌨𑌸𑍍𑌥𑌾𑌨𑌵𑌧𑌂 𑌪𑍍𑌰𑌤𑌿 ।
𑌰𑌾𑌕𑍍𑌷𑌸𑌾 𑌵𑌿𑌵𑌿𑌧𑌾 𑌵𑌾𑌚𑍋 𑌵𑌿𑌸𑍃𑌜𑌂𑌤𑌿 𑌮𑌹𑌾𑌵𑌨𑍇 ॥ 1 ॥
𑌹𑌿𑌂𑌸𑌾𑌵𑌿𑌹𑌾𑌰𑌾 𑌵𑍈𑌦𑍇𑌹𑌿 𑌨 𑌚𑌿𑌂𑌤𑌯𑌿𑌤𑍁𑌮𑌰𑍍𑌹𑌸𑌿 ।
𑌲𑌕𑍍𑌷𑍍𑌮𑌣𑍇𑌨𑍈𑌵𑌮𑍁𑌕𑍍𑌤𑌾 𑌸𑌾 𑌕𑍍𑌰𑍁𑌦𑍍𑌧𑌾 𑌸𑌂𑌰𑌕𑍍𑌤𑌲𑍋𑌚𑌨𑌾 ॥ 20 ॥
𑌅𑌬𑍍𑌰𑌵𑍀𑌤𑍍𑌪𑌰𑍁𑌷𑌂 𑌵𑌾𑌕𑍍𑌯𑌂 𑌲𑌕𑍍𑌷𑍍𑌮𑌣𑌂 𑌸𑌤𑍍𑌯𑌵𑌾𑌦𑌿𑌨𑌮𑍍 ।
𑌅𑌨𑌾𑌰𑍍𑌯𑌾𑌕𑌰𑌣𑌾𑌰𑌂𑌭 𑌨𑍃𑌶𑌂𑌸 𑌕𑍁𑌲𑌪𑌾𑌂𑌸𑌨 ॥ 21 ॥
𑌅𑌹𑌂 𑌤𑌵 𑌪𑍍𑌰𑌿𑌯𑌂 𑌮𑌨𑍍𑌯𑍇 𑌰𑌾𑌮𑌸𑍍𑌯 𑌵𑍍𑌯𑌸𑌨𑌂 𑌮𑌹𑌤𑍍 ।
𑌰𑌾𑌮𑌸𑍍𑌯 𑌵𑍍𑌯𑌸𑌨𑌂 𑌦𑍃𑌷𑍍𑌟𑍍𑌵𑌾 𑌤𑍇𑌨𑍈𑌤𑌾𑌨𑌿 𑌪𑍍𑌰𑌭𑌾𑌷𑌸𑍇 ॥ 22 ॥
𑌨𑍈𑌤𑌚𑍍𑌚𑌿𑌤𑍍𑌰𑌂 𑌸𑌪𑌤𑍍𑌨𑍇𑌷𑍁 𑌪𑌾𑌪𑌂 𑌲𑌕𑍍𑌷𑍍𑌮𑌣 𑌯𑌦𑍍𑌭𑌵𑍇𑌤𑍍 ।
𑌤𑍍𑌵𑌦𑍍𑌵𑌿𑌧𑍇𑌷𑍁 𑌨𑍃𑌶𑌂𑌸𑍇𑌷𑍁 𑌨𑌿𑌤𑍍𑌯𑌂 𑌪𑍍𑌰𑌚𑍍𑌛𑌨𑍍𑌨𑌚𑌾𑌰𑌿𑌷𑍁 ॥ 23 ॥
𑌸𑍁𑌦𑍁𑌷𑍍𑌟𑌸𑍍𑌤𑍍𑌵𑌂 𑌵𑌨𑍇 𑌰𑌾𑌮𑌮𑍇𑌕𑌮𑍇𑌕𑍋𑌽𑌨𑍁𑌗𑌚𑍍𑌛𑌸𑌿 ।
𑌮𑌮 𑌹𑍇𑌤𑍋𑌃 𑌪𑍍𑌰𑌤𑌿𑌚𑍍𑌛𑌨𑍍𑌨𑌃 𑌪𑍍𑌰𑌯𑍁𑌕𑍍𑌤𑍋𑌭𑌰𑌤𑍇𑌨 𑌵𑌾 ॥ 24 ॥
𑌤𑌨𑍍𑌨𑌸𑌿𑌧𑍍𑌯𑌤𑌿 𑌸𑍌𑌮𑌿𑌤𑍍𑌰𑍇 𑌤𑌵 𑌵𑌾 𑌭𑌰𑌤𑌸𑍍𑌯 𑌵𑌾 ।
𑌕𑌥𑌮𑌿𑌂𑌦𑍀𑌵𑌰𑌶𑍍𑌯𑌾𑌮𑌂 𑌪𑌦𑍍𑌮𑌪𑌤𑍍𑌰𑌨𑌿𑌭𑍇𑌕𑍍𑌷𑌣𑌮𑍍 ॥ 25 ॥
𑌉𑌪𑌸𑌂𑌶𑍍𑌰𑌿𑌤𑍍𑌯 𑌭𑌰𑍍𑌤𑌾𑌰𑌂 𑌕𑌾𑌮𑌯𑍇𑌯𑌂 𑌪𑍃𑌥𑌗𑍍𑌜𑌨𑌮𑍍 ।
𑌸𑌮𑌕𑍍𑌷𑌂 𑌤𑌵 𑌸𑍌𑌮𑌿𑌤𑍍𑌰𑍇 𑌪𑍍𑌰𑌾𑌣𑌾𑌂𑌸𑍍𑌤𑍍𑌯𑌕𑍍𑌷𑍇 𑌨 𑌸𑌂𑌶𑌯𑌃 ।
𑌰𑌾𑌮𑌂 𑌵𑌿𑌨𑌾 𑌕𑍍𑌷𑌣𑌮𑌪𑌿 𑌨 𑌹𑌿 𑌜𑍀𑌵𑌾𑌮𑌿 𑌭𑍂𑌤𑌲𑍇 ॥ 26 ॥
𑌇𑌤𑍍𑌯𑍁𑌕𑍍𑌤𑌃 𑌪𑌰𑍁𑌷𑌂 𑌵𑌾𑌕𑍍𑌯𑌂 𑌸𑍀𑌤𑌯𑌾 𑌰𑍋𑌮𑌹𑌰𑍍𑌷𑌣𑌮𑍍 ॥ 2 ॥
𑌅𑌬𑍍𑌰𑌵𑍀𑌲𑍍𑌲𑌕𑍍𑌷𑍍𑌮𑌣𑌸𑍍𑌸𑍀𑌤𑌾𑌂 𑌪𑍍𑌰𑌾𑌂𑌜𑌲𑌿𑌰𑍍𑌵𑌿𑌜𑌿𑌤𑍇𑌂𑌦𑍍𑌰𑌿𑌯𑌃 ।
𑌉𑌤𑍍𑌤𑌰𑌂 𑌨𑍋𑌤𑍍𑌸𑌹𑍇 𑌵𑌕𑍍𑌤𑍁𑌂 𑌦𑍈𑌵𑌤𑌂 𑌭𑌵𑌤𑍀 𑌮𑌮 ॥ 2 ॥
𑌵𑌾𑌕𑍍𑌯𑌮𑌪𑍍𑌰𑌤𑌿𑌰𑍂𑌪𑌂 𑌤𑍁 𑌨 𑌚𑌿𑌤𑍍𑌰𑌂 𑌸𑍍𑌤𑍍𑌰𑍀𑌷𑍁 𑌮𑍈𑌥𑌿𑌲𑌿 ।
𑌸𑍍𑌵𑌭𑌾𑌵𑌸𑍍𑌤𑍍𑌵𑍇𑌷 𑌨𑌾𑌰𑍀𑌣𑌾𑌮𑍇𑌵𑌂 𑌲𑍋𑌕𑍇𑌷𑍁 𑌦𑍃𑌶𑍍𑌯𑌤𑍇 ॥ 2 ॥
𑌵𑌿𑌮𑍁𑌕𑍍𑌤𑌧𑌰𑍍𑌮𑌾𑌶𑍍𑌚𑌪𑌲𑌾𑌸𑍍𑌤𑍀𑌕𑍍𑌷𑍍𑌣𑌾 𑌭𑍇𑌦𑌕𑌰𑌾𑌃 𑌸𑍍𑌤𑍍𑌰𑌿𑌯𑌃 ।
𑌨 𑌸𑌹𑍇 𑌹𑍀𑌦𑍃𑌶𑌂 𑌵𑌾𑌕𑍍𑌯𑌂 𑌵𑍈𑌦𑍇𑌹𑌿 𑌜𑌨𑌕𑌾𑌤𑍍𑌮𑌜𑍇 ॥ 30 ॥
𑌶𑍍𑌰𑍋𑌤𑍍𑌰𑌯𑍋𑌰𑍁𑌭𑌯𑍋𑌰𑍍𑌮𑍇𑌦𑍍𑌯 𑌤𑌪𑍍𑌤𑌨𑌾𑌰𑌾𑌚𑌸𑌨𑍍𑌨𑌿𑌭𑌮𑍍 ।
𑌉𑌪𑌶𑍃𑌣𑍍𑌵𑌂𑌤𑍁 𑌮𑍇 𑌸𑌰𑍍𑌵𑍇 𑌸𑌾𑌕𑍍𑌷𑌿𑌭𑍂𑌤𑌾 𑌵𑌨𑍇𑌚𑌰𑌾𑌃 ॥ 31 ॥
𑌨𑍍𑌯𑌾𑌯𑌵𑌾𑌦𑍀 𑌯𑌥𑌾𑌨𑍍𑌯𑌾𑌯𑌮𑍁𑌕𑍍𑌤𑍋𑌽𑌹𑌂 𑌪𑌰𑍁𑌷𑌂 𑌤𑍍𑌵𑌯𑌾 ।
𑌧𑌿𑌕𑍍𑌤𑍍𑌵𑌾𑌮𑌦𑍍𑌯 𑌪𑍍𑌰𑌣𑌶𑍍𑌯 𑌤𑍍𑌵𑌂 𑌯𑌨𑍍𑌮𑌾𑌮𑍇𑌵𑌂 𑌵𑌿𑌶𑌂𑌕𑌸𑍇 ।
𑌸𑍍𑌤𑍍𑌰𑍀𑌤𑍍𑌵𑌲𑌦𑍁𑌷𑍍𑌟𑌂 𑌸𑍍𑌵𑌭𑌾𑌵𑍇𑌨 𑌗𑍁𑌰𑍁𑌵𑌾𑌕𑍍𑌯𑍇 𑌵𑍍𑌯𑌵𑌸𑍍𑌥𑌿𑌤𑌮𑍍 ॥ 32 ॥
𑌗𑌮𑌿𑌷𑍍𑌯𑍇 𑌯𑌤𑍍𑌰 𑌕𑌾𑌕𑍁𑌤𑍍𑌸𑍍𑌥 𑌸𑍍𑌵𑌸𑍍𑌤𑌿 𑌤𑍇𑌽𑌸𑍍𑌤𑍁 𑌵𑌰𑌾𑌨𑌨𑍇 ॥ 33 ॥
𑌰𑌕𑍍𑌷𑌂𑌤𑍁 𑌤𑍍𑌵𑌾𑌂 𑌵𑌿𑌶𑌾𑌲𑌾𑌕𑍍𑌷𑌿 𑌸𑌮𑌗𑍍𑌰𑌾 𑌵𑌨𑌦𑍇𑌵𑌤𑌾𑌃 ।
𑌨𑌿𑌮𑌿𑌤𑍍𑌤𑌾𑌨𑌿 𑌚 𑌘𑍋𑌰𑌾𑌣𑌿 𑌯𑌾𑌨𑌿 𑌪𑍍𑌰𑌾𑌦𑍁𑌰𑍍𑌭𑌵𑌂𑌤𑌿 𑌮𑍇 ॥ 34 ॥
𑌅𑌪𑌿 𑌤𑍍𑌵𑌾𑌂 𑌸𑌹 𑌰𑌾𑌮𑍇𑌣 𑌪𑌶𑍍𑌯𑍇𑌯𑌂 𑌪𑍁𑌨𑌰𑌾𑌗𑌤𑌃 ।
𑌨 𑌵𑍇𑌤𑍍𑌯𑍇𑌤𑌨𑍍𑌨 𑌜𑌾𑌨𑌾𑌮𑌿 𑌵𑍈𑌦𑍇𑌹𑌿 𑌜𑌨𑌕𑌾𑌤𑍍𑌮𑌜𑍇 ॥ 35 ॥
𑌲𑌕𑍍𑌷𑍍𑌮𑌣𑍇𑌨𑍈𑌵𑌮𑍁𑌕𑍍𑌤𑌾 𑌸𑌾 𑌰𑍁𑌦𑌂𑌤𑍀 𑌜𑌨𑌕𑌾𑌤𑍍𑌮𑌜𑌾 ।
𑌪𑍍𑌰𑌤𑍍𑌯𑍁𑌵𑌾𑌚 𑌤𑌤𑍋 𑌵𑌾𑌕𑍍𑌯𑌂 𑌤𑍀𑌵𑍍𑌰𑌂 𑌬𑌾𑌷𑍍𑌪𑌪𑌰𑌿𑌪𑍍𑌲𑍁𑌤𑌾 ॥ 36 ॥
𑌗𑍋𑌦𑌾𑌵𑌰𑍀𑌂 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌵𑌿𑌨𑌾 𑌰𑌾𑌮𑍇𑌣 𑌲𑌕𑍍𑌷𑍍𑌮𑌣 ।
𑌅𑌬𑌂𑌧𑌿𑌷𑍍𑌯𑍇𑌽𑌥𑌵𑌾 𑌤𑍍𑌯𑌕𑍍𑌷𑍍𑌯𑍇 𑌵𑌿𑌷𑌮𑍇 𑌦𑍇𑌹𑌮𑌾𑌤𑍍𑌮𑌨𑌃 ॥ 3 ॥
𑌪𑌿𑌬𑌾𑌮𑍍𑌯𑌹𑌂 𑌵𑌿𑌷𑌂 𑌤𑍀𑌕𑍍𑌷𑍍𑌣𑌂 𑌪𑍍𑌰𑌵𑍇𑌕𑍍𑌷𑍍𑌯𑌾𑌮𑌿 𑌹𑍁𑌤𑌾𑌶𑌨𑌮𑍍 ।
𑌨 𑌤𑍍𑌵𑌹𑌂 𑌰𑌾𑌘𑌵𑌾𑌦𑌨𑍍𑌯𑌂 𑌪𑌦𑌾𑌪𑌿 𑌪𑍁𑌰𑍁𑌷𑌂 𑌸𑍍𑌪𑍃𑌶𑍇 ॥ 3 ॥
𑌇𑌤𑌿 𑌲𑌕𑍍𑌷𑍍𑌮𑌣𑌮𑌾𑌕𑍍𑌰𑍁𑌶𑍍𑌯 𑌸𑍀𑌤𑌾 𑌦𑍁𑌃𑌖𑌸𑌮𑌨𑍍𑌵𑌿𑌤𑌾 ।
𑌪𑌾𑌣𑌿𑌭𑍍𑌯𑌾𑌂 𑌰𑍁𑌦𑌤𑍀 𑌦𑍁𑌃𑌖𑌾𑌦𑍁𑌦𑌰𑌂 𑌪𑍍𑌰𑌜𑌘𑌾𑌨 𑌹 ॥ 3 ॥
𑌤𑌾𑌮𑌾𑌰𑍍𑌤𑌰𑍂𑌪𑌾𑌂 𑌵𑌿𑌮𑌨𑌾 𑌰𑍁𑌦𑌂𑌤𑍀𑌂 𑌸𑍌𑌮𑌿𑌤𑍍𑌰𑌿𑌰𑌾𑌲𑍋𑌕𑍍𑌯 𑌵𑌿𑌶𑌾𑌲𑌨𑍇𑌤𑍍𑌰𑌾𑌮𑍍 ।
𑌆𑌶𑍍𑌵𑌾𑌸𑌯𑌾𑌮𑌾𑌸 𑌨 𑌚𑍈𑌵 𑌭𑌰𑍍𑌤𑍁 𑌸𑍍𑌤𑌂 𑌭𑍍𑌰𑌾𑌤𑌰𑌂𑌕𑌿𑌂𑌚𑌿𑌦𑍁𑌵𑌾𑌚 𑌸𑍀𑌤𑌾 ॥ 40 ॥
𑌤𑌤𑌸𑍍𑌤𑍁 𑌸𑍀𑌤𑌾𑌮𑌭𑌿𑌵𑌾𑌦𑍍𑌯 𑌲𑌕𑍍𑌷𑍍𑌮𑌣𑌃 𑌕𑍃𑌤𑌾𑌂𑌜𑌲𑌿𑌃 𑌕𑌿𑌂𑌚𑌿𑌦𑌭𑌿𑌪𑍍𑌰𑌣𑌮𑍍𑌯 𑌚 ।
𑌅𑌨𑍍𑌵𑍀𑌕𑍍𑌷𑌮𑌾𑌣𑍋 𑌬𑌹𑍁𑌶𑌶𑍍𑌚 𑌮𑍈𑌥𑌿𑌲𑍀𑌂 𑌜𑌗𑌾𑌮 𑌰𑌾𑌮𑌸𑍍𑌯 𑌸𑌮𑍀𑌪𑌮𑌾𑌤𑍍𑌮𑌵𑌾𑌨𑍍 ॥ 41 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌪𑌂𑌚𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
