𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌷𑍋𑌡𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌪𑍍𑌰𑌤𑌿𑌪𑍍𑌰𑌯𑌾𑌤𑍇 𑌭𑌰𑌤𑍇 𑌵𑌸𑌨𑍍𑌰𑌾𑌮𑌸𑍍𑌤𑌪𑍋𑌵𑌨𑍇 ।
𑌲𑌕𑍍𑌷𑌯𑌾𑌮𑌾𑌸 𑌸𑍋𑌦𑍍𑌵𑍇𑌗𑌮𑌥𑍌𑌤𑍍𑌸𑍁𑌕𑍍𑌯𑌂 𑌤𑌪𑌸𑍍𑌵𑌿𑌨𑌾𑌮𑍍 ॥ 1 ॥
𑌯𑍇 𑌤𑌤𑍍𑌰 𑌚𑌿𑌤𑍍𑌰𑌕𑍂𑌟𑌸𑍍𑌯 𑌪𑍁𑌰𑌸𑍍𑌤𑌾𑌤𑍍𑌤𑌾𑌪𑌸𑌾𑌶𑍍𑌰𑌮𑍇 ।
𑌰𑌾𑌮𑌮𑌾𑌶𑍍𑌰𑌿𑌤𑍍𑌯 𑌨𑌿𑌰𑌤𑌾𑌸𑍍𑌤𑌾𑌨𑌲𑌕𑍍𑌷𑌯𑌦𑍁𑌤𑍍𑌸𑍁𑌕𑌾𑌨𑍍 ॥ 2 ॥
𑌨𑌯𑌨𑍈𑌰𑍍𑌬𑍍𑌰𑍁𑌕𑍁𑌟𑍀𑌭𑌿𑌶𑍍𑌚 𑌰𑌾𑌮𑌂 𑌨𑌿𑌰𑍍𑌦𑌿𑌶𑍍𑌯 𑌶𑌂𑌕𑌿𑌤𑌾𑌃 ।
𑌅𑌨𑍍𑌯𑍋𑌨𑍍𑌯𑌮𑍁𑌪𑌜𑌲𑍍𑌪𑌂𑌤 𑌶𑍍𑌶𑌨𑍈𑌶𑍍𑌚𑌕𑍍𑌰𑍁𑌰𑍍𑌮𑌿𑌥𑌃 𑌕𑌥𑌾𑌃 ॥ 3 ॥
𑌤𑍇𑌷𑌾𑌮𑍌𑌤𑍍𑌸𑍁𑌕𑍍𑌯𑌮𑌾𑌲𑌕𑍍𑌷𑍍𑌯 𑌰𑌾𑌮𑌸𑍍𑌤𑍍𑌵𑌾𑌤𑍍𑌮𑌨𑌿 𑌶𑌂𑌕𑌿𑌤𑌃 ।
𑌕𑍃𑌤𑌾𑌂𑌜𑌲𑌿𑌰𑍁𑌵𑌾𑌚𑍇𑌦𑌮𑍃𑌷𑌿𑌂 𑌕𑍁𑌲𑌪𑌤𑌿𑌂 𑌤𑌤𑌃 ॥ 4 ॥
𑌨 𑌕𑌚𑍍𑌚𑌿𑌦𑍍𑌭𑌗𑌵𑌨𑍍𑌕𑌿𑌂𑌚𑌿𑌤𑍍𑌪𑍂𑌰𑍍𑌵𑌵𑍃𑌤𑍍𑌤𑌮𑌿𑌦𑌂 𑌮𑌯𑌿 ।
𑌦𑍃𑌶𑍍𑌯𑌤𑍇 𑌵𑌿𑌕𑍃𑌤𑌂 𑌯𑍇𑌨 𑌵𑌿𑌕𑍍𑌰𑌿𑌯𑌂𑌤𑍇 𑌤𑌪𑌸𑍍𑌵𑌿𑌨𑌃 ॥ 5 ॥
𑌪𑍍𑌰𑌮𑌾𑌦𑌾𑌚𑍍𑌚𑌰𑌿𑌤𑌂 𑌕𑌚𑍍𑌚𑌿𑌤𑍍𑌕𑌿𑌂𑌚𑌿𑌨𑍍𑌨𑌾𑌵𑌰𑌜𑌸𑍍𑌯 𑌮𑍇 ।
𑌲𑌕𑍍𑌷𑍍𑌮𑌣𑌸𑍍𑌯𑌰𑍍𑌷𑌿𑌭𑌿𑌦𑍃𑌷𑍍𑌟𑌂 𑌨𑌾𑌨𑍁𑌰𑍂𑌪𑌮𑌿𑌵𑌾𑌤𑍍𑌮𑌨𑌃 ॥ 6 ॥
𑌕𑌚𑍍𑌚𑌿𑌚𑍍𑌛𑍁𑌶𑍍𑌰𑍂𑌷𑌮𑌾𑌣𑌾 𑌵 𑌶𑍍𑌶𑍁𑌶𑍍𑌰𑍂𑌷𑌣𑌪𑌰𑌾 𑌮𑌯𑌿 ।
𑌪𑍍𑌰𑌮𑌦𑌾𑌽𑌭𑍍𑌯𑍁𑌚𑌿𑌤𑌾𑌂 𑌵𑍃𑌤𑍍𑌤𑌿𑌂 𑌸𑍀𑌤𑌾 𑌯𑍁𑌕𑍍𑌤𑌂 𑌨 𑌵𑌰𑍍𑌤𑌤𑍇 ॥ ॥
𑌅𑌥𑌰𑍍𑌷𑌿𑌰𑍍𑌜𑌰𑌯𑌾 𑌵𑍃𑌦𑍍𑌧𑌸𑍍𑌤𑌪𑌸𑌾 𑌚 𑌜𑌰𑌾𑌂 𑌗𑌤𑌃 ।
𑌵𑍇𑌪𑌮𑌾𑌨 𑌇𑌵𑍋𑌵𑌾𑌚 𑌰𑌾𑌮𑌂 𑌭𑍂𑌤𑌦𑌯𑌾𑌪𑌰𑌮𑍍 ॥ ॥
𑌕𑍁𑌤𑌃 𑌕𑌲𑍍𑌯𑌾𑌣𑌸𑌤𑍍𑌤𑍍𑌵𑌾𑌯𑌾𑌃 𑌕𑌲𑍍𑌯𑌾𑌣𑌾𑌭𑌿𑌰𑌤𑍇𑌸𑍍𑌤𑌥𑌾 ।
𑌚𑌲𑌨𑌂 𑌤𑌾𑌤 𑌵𑍈𑌦𑍇𑌹𑍍𑌯𑌾𑌸𑍍𑌤𑌪𑌸𑍍𑌵𑌿𑌷𑍁 𑌵𑌿𑌶𑍇𑌷𑌤𑌃 ॥ ॥
𑌤𑍍𑌵𑌨𑍍𑌨𑌿𑌮𑌿𑌤𑍍𑌤𑌮𑌿𑌦𑌂 𑌤𑌾𑌵𑌤𑍍𑌤𑌾𑌪𑌸𑌾𑌨𑍍𑌪𑍍𑌰𑌤𑌿𑌵𑌰𑍍𑌤𑌤𑍇 ।
𑌰𑌕𑍍𑌷𑍋𑌭𑍍𑌯𑌸𑍍𑌤𑍇𑌨 𑌸𑌂𑌵𑌿𑌗𑍍𑌨𑌾𑌃 𑌕𑌥𑌯𑌂𑌤𑌿 𑌮𑌿𑌥𑌃 𑌕𑌥𑌾𑌃 ॥ 10 ॥
𑌰𑌾𑌵𑌣𑌾𑌵𑌰𑌜𑌃 𑌕𑌶𑍍𑌚𑌿𑌤𑍍 𑌖𑌰𑍋 𑌨𑌾𑌮𑍇𑌹 𑌰𑌾𑌕𑍍𑌷𑌸𑌃 ।
𑌉𑌤𑍍𑌪𑌾𑌟𑍍𑌯 𑌤𑌾𑌪𑌸𑌾𑌨𑍍𑌸𑌰𑍍𑌵𑌾𑌂𑌜𑌨𑌸𑍍𑌥𑌾𑌨𑌨𑌿𑌕𑍇𑌤𑌨𑌾𑌨𑍍 ॥ 11 ॥
𑌧𑍃𑌷𑍍𑌟𑌶𑍍𑌚 𑌜𑌿𑌤𑌕𑌾𑌶𑍀 𑌚 𑌨𑍃𑌶𑌂𑌸𑌃 𑌪𑍁𑌰𑍁𑌷𑌾𑌦𑌕𑌃 ।
𑌅𑌵𑌲𑌿𑌪𑍍𑌤𑌶𑍍𑌚 𑌪𑌾𑌪𑌶𑍍𑌚 𑌤𑍍𑌵𑌾𑌂 𑌚 𑌤𑌾𑌤 𑌨 𑌮𑍃𑌷𑍍𑌯𑌤𑍇 ॥ 12 ॥
𑌤𑍍𑌵𑌂 𑌯𑌦𑌾𑌪𑍍𑌰𑌭𑍃𑌤𑌿 𑌹𑍍𑌯𑌸𑍍𑌮𑌿𑌨𑍍𑌨𑌾𑌶𑍍𑌰𑌮𑍇 𑌤𑌾𑌤 𑌵𑌰𑍍𑌤𑌸𑍇 ।
𑌤𑌦𑌾𑌪𑍍𑌰𑌭𑍃𑌤𑌿 𑌰𑌕𑍍𑌷𑌾𑌂𑌸𑌿 𑌵𑌿𑌪𑍍𑌰𑌕𑍁𑌰𑍍𑌵𑌂𑌤𑌿 𑌤𑌾𑌪𑌸𑌾𑌨𑍍 ॥ 13 ॥
𑌦𑌰𑍍𑌶𑌯𑌂𑌤𑌿 𑌹𑌿 𑌬𑍀𑌭𑌤𑍍𑌸𑍈𑌃 𑌕𑍍𑌰𑍂𑌰𑍈𑌰𑍍𑌭𑍀𑌷𑌣𑌕𑍈𑌰𑌪𑌿 ।
𑌨𑌾𑌨𑌾𑌰𑍂𑌪𑍈𑌰𑍍𑌵𑌿𑌰𑍂𑌪𑍈𑌶𑍍𑌚 𑌰𑍂𑌪𑍈𑌰𑍍𑌵𑌿𑌕𑍃𑌤𑌦𑌰𑍍𑌶𑌨𑍈𑌃 ॥ 14 ॥
𑌅𑌪𑍍𑌰𑌶𑌸𑍍𑌤𑍈𑌶𑍁𑌚𑌿𑌭𑌿𑌸𑍍𑌸𑌂𑌪𑍍𑌰𑌯𑍋𑌜𑍍𑌯 𑌚 𑌤𑌾𑌪𑌸𑌾𑌨𑍍 ।
𑌪𑍍𑌰𑌤𑌿𑌧𑍍𑌨𑌂𑌤𑍍𑌯𑌪𑌰𑌾𑌨𑍍𑌕𑍍𑌷𑌿𑌪𑍍𑌰𑌮𑌨𑌾𑌰𑍍𑌯𑌾𑌃 𑌪𑍁𑌰𑌤𑌃 𑌸𑍍𑌥𑌿𑌤𑌾𑌃 ॥ 15 ॥
𑌤𑍇𑌷𑍁 𑌤𑍇𑌷𑍍𑌵𑌾𑌶𑍍𑌰𑌮𑌸𑍍𑌥𑌾𑌨𑍇𑌷𑍍𑌵𑌬𑍁𑌦𑍍𑌧𑌮𑌵𑌲𑍀𑌯 𑌚 ।
𑌰𑌮𑌂𑌤𑍇 𑌤𑌾𑌪𑌸𑌾𑌂 𑌸𑍍𑌤𑌤𑍍𑌰 𑌨𑌾𑌶𑌯𑌂𑌤𑍋𑌽𑌲𑍍𑌪𑌚𑍇𑌤𑌸𑌃 ॥ 16 ॥
𑌅𑌪𑌕𑍍𑌷𑌿𑌪𑌂𑌤𑌿 𑌸𑍍𑌰𑍁𑌗𑍍𑌭𑌾𑌂𑌡𑌾𑌨𑌗𑍍𑌨𑍀𑌸𑍍𑌨𑌿𑌂𑌚𑌂𑌤𑌿 𑌵𑌾𑌰𑌿𑌣𑌾 ।
𑌕𑌲𑌶𑌾𑌂𑌶𑍍𑌚 𑌪𑍍𑌰𑌮𑌧𑍍𑌨𑌂𑌤𑌿 𑌹𑌵𑌨𑍇 𑌸𑌮𑍁𑌪𑌸𑍍𑌥𑌿𑌤𑍇 ॥ 1 ॥
𑌤𑍈𑌰𑍍𑌦𑍁𑌰𑌾𑌤𑍍𑌮𑌭𑌿𑌰𑌾𑌮𑍃𑌷𑍍𑌟𑌾𑌨𑌾𑌶𑍍𑌰𑌮𑌾𑌨𑍍𑌪𑍍𑌰𑌜𑌿𑌹𑌾𑌸𑌵𑌃 ।
𑌗𑌮𑌨𑌾𑌯𑌾𑌨𑍍𑌯𑌦𑍇𑌶𑌸𑍍𑌯 𑌚𑍋𑌦𑌯𑌂𑌤𑍍𑌯𑍃𑌷𑌯𑍋𑌽𑌦𑍍𑌯 𑌮𑌾𑌮𑍍 ॥ 1 ॥
𑌤𑌤𑍍𑌪𑍁𑌰𑌾 𑌰𑌾𑌮 𑌶𑌾𑌰𑍀𑌰𑌾𑌮𑍁𑌪𑌹𑌿𑌂𑌸𑌾𑌂 𑌤𑌪𑌸𑍍𑌵𑌿𑌷𑍁 ।
𑌦𑌰𑍍𑌶𑌯𑌂𑌤𑌿 𑌹𑌿 𑌦𑍁𑌷𑍍𑌟𑌾𑌸𑍍𑌤𑍇 𑌤𑍍𑌯𑌕𑍍𑌷𑍍𑌯𑌾𑌮 𑌇𑌮𑌮𑌾𑌶𑍍𑌰𑌮𑌮𑍍 ॥ 1 ॥
𑌬𑌹𑍁𑌮𑍂𑌲𑌫𑌲𑌂 𑌚𑌿𑌤𑍍𑌰𑌮𑌵𑌿𑌦𑍂𑌰𑌾𑌦𑌿𑌤𑍋 𑌵𑌨𑌮𑍍 ।
𑌪𑍁𑌰𑌾𑌣𑌾𑌶𑍍𑌰𑌮𑌮𑍇𑌵𑌾𑌹𑌂 𑌶𑍍𑌰𑌯𑌿𑌷𑍍𑌯𑍇 𑌸𑌗𑌣𑌃 𑌪𑍁𑌨𑌃 ॥ 20 ॥
𑌖𑌰𑌸𑍍𑌤𑍍𑌵𑌯𑍍𑌯𑌪𑌿 𑌚𑌾𑌯𑍁𑌕𑍍𑌤𑌂 𑌪𑍁𑌰𑌾 𑌤𑌾𑌤 𑌪𑍍𑌰𑌵𑌰𑍍𑌤𑌤𑍇 ।
𑌸𑌹𑌾𑌸𑍍𑌮𑌾𑌭𑌿𑌰𑌿𑌤𑍋 𑌗𑌚𑍍𑌛 𑌯𑌦𑌿 𑌬𑍁𑌦𑍍𑌧𑌿𑌃 𑌪𑍍𑌰𑌵𑌰𑍍𑌤𑌤𑍇 ॥ 21 ॥
𑌸𑌕𑌲𑌤𑍍𑌰𑌸𑍍𑌯 𑌸𑌂𑌦𑍇𑌹𑍋 𑌨𑌿𑌤𑍍𑌯𑌂 𑌯𑌤𑍍𑌤𑌸𑍍𑌯 𑌰𑌾𑌘𑌵 ।
𑌸𑌮𑌰𑍍𑌥𑌸𑍍𑌯𑌾𑌪𑌿 𑌹𑌿 𑌸𑌤𑍋 𑌵𑌾𑌸𑍋 𑌦𑍁𑌃𑌖𑌮𑌿𑌹𑌾𑌦𑍍𑌯 𑌤𑍇 ॥ 22 ॥
𑌇𑌤𑍍𑌯𑍁𑌕𑍍𑌤𑌵𑌂𑌤𑌂 𑌸𑍍𑌤𑌂𑌰𑌾𑌮 𑌰𑌾𑌜𑌪𑍁𑌤𑍍𑌰𑌸𑍍𑌤𑌪𑌸𑍍𑌵𑌿𑌨𑌮𑍍 ।
𑌨 𑌶𑌶𑌾𑌕𑍋𑌤𑍍𑌤𑌰𑍈𑌰𑍍𑌵𑌾𑌕𑍍𑌯𑍈𑌰𑌵𑌰𑍋𑌦𑍍𑌧𑍁𑌂 𑌸𑌮𑍁𑌤𑍍𑌸𑍁𑌕𑌮𑍍 ॥ 23 ॥
𑌅𑌭𑌿𑌨𑌂𑌦𑍍𑌯 𑌸𑌮𑌾𑌪𑍃𑌚𑍍𑌛𑍍𑌯 𑌸𑌮𑌾𑌧𑌾𑌯 𑌚 𑌰𑌾𑌘𑌵𑌮𑍍 ।
𑌸 𑌜𑌗𑌾𑌮𑌾𑌶𑍍𑌰𑌮𑌂 𑌤𑍍𑌯𑌕𑍍𑌤𑍍𑌵𑌾 𑌕𑍁𑌲𑍈𑌃 𑌕𑍁𑌲𑌪𑌤𑌿𑌸𑍍𑌸𑌹 ॥ 24 ॥
𑌰𑌾𑌮𑌃 𑌸𑌂𑌸𑌾𑌦𑍍𑌯 𑌋𑌷𑌿𑌗𑌣𑌮𑌨𑍁𑌗𑌮𑌨𑌾𑌦𑍍𑌦𑍇𑌶𑌾𑌤𑍍𑌤𑌸𑍍𑌮𑌾𑌤𑍍𑌕𑍁𑌲𑌪𑌤𑌿𑌮𑌭𑌿𑌵𑌾𑌦𑍍𑌯 𑌋𑌷𑌿𑌮𑍍 ।
𑌸𑌮𑍍𑌯𑌕𑍍𑌪𑍍𑌰𑍀𑌤𑍈𑌸𑍍𑌤𑍈𑌰𑌨𑍁𑌮𑌤 𑌉𑌪𑌦𑌿𑌷𑍍𑌟𑌾𑌰𑍍𑌥𑌃 𑌪𑍁𑌣𑍍𑌯𑌂 𑌵𑌾𑌸𑌾𑌯 𑌸𑍍𑌵𑌨𑌿𑌲𑌯𑌮𑍁𑌪𑌸𑌂𑌪𑍇𑌦𑍇 ॥ 25 ॥
𑌆𑌶𑍍𑌰𑌮𑌮𑍃𑌷𑌿𑌵𑌿𑌰𑌹𑌿𑌤𑌂 𑌪𑍍𑌰𑌭𑍁𑌃 𑌕𑍍𑌷𑌣𑌮𑌪𑌿𑌨 𑌜𑌹𑍌 𑌸 𑌰𑌾𑌘𑌵𑌃 ।
𑌰𑌾𑌘𑌵𑌂 𑌹𑌿 𑌸𑌤𑌤𑌮𑌨𑍁𑌗𑌤𑌾 𑌸𑍍𑌤𑌾𑌪𑌸𑌾𑌶𑍍𑌚𑌾𑌰𑍍𑌷𑌚𑌰𑌿𑌤 𑌧𑍃𑌤𑌗𑍁𑌣𑌾𑌃 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌷𑍋𑌡𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
