𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌸𑌹 𑌤𑌾𑌰𑌾𑌂𑌗𑌦𑌾𑌭𑍍𑌯𑌾𑌂 𑌤𑍁 𑌗𑌤𑍍𑌵𑌾 𑌸 𑌹𑌨𑍁𑌮𑌾𑌨𑍍𑌕𑌪𑌿𑌃 ।
𑌸𑍁𑌗𑍍𑌰𑍀𑌵𑍇𑌣 𑌯𑌥𑍋𑌦𑍍𑌦𑌿𑌷𑍍𑌟𑌂 𑌤𑌂 𑌦𑍇𑌶𑌮𑍁𑌪𑌚𑌕𑍍𑌰𑌮𑍇 ॥ 1 ॥
𑌸 𑌤𑍁 𑌦𑍂𑌰𑌮𑍁𑌪𑌾𑌗𑌮𑍍𑌯 𑌸𑌰𑍍𑌵𑍈𑌸𑍍𑌤𑍈𑌃 𑌕𑌪𑌿𑌸𑌤𑍍𑌤𑌮𑍈𑌃 ।
𑌵𑌿𑌚𑌿𑌨𑍋𑌤𑌿 𑌸𑍍𑌮 𑌵𑌿𑌂𑌧𑍍𑌯𑌸𑍍𑌯 𑌗𑍁𑌹𑌾𑌶𑍍𑌚 𑌗𑌹𑌨𑌾𑌨𑌿 𑌚 ॥ 2 ॥
𑌪𑌰𑍍𑌵𑌤𑌾𑌗𑍍𑌰𑌾𑌨𑍍𑌨𑌦𑍀𑌦𑍁𑌰𑍍𑌗𑌾𑌨𑍍𑌸𑌰𑌾𑌂𑌸𑌿 𑌵𑌿𑌪𑍁𑌲𑌾𑌂𑌦𑍍𑌰𑍁𑌮𑌾𑌨𑍍 ।
𑌵𑍃𑌕𑍍𑌷𑌷𑌂𑌡𑌾𑌂𑌶𑍍𑌚 𑌵𑌿𑌵𑌿𑌧𑌾𑌨𑍍𑌪𑌰𑍍𑌵𑌤𑌾𑌨𑍍𑌘𑌨𑌪𑌾𑌦𑌪𑌾𑌨𑍍 ॥ 3 ॥
𑌅𑌨𑍍𑌵𑍇𑌷𑌮𑌾𑌣𑌾𑌸𑍍𑌤𑍇 𑌸𑌰𑍍𑌵𑍇 𑌵𑌾𑌨𑌰𑌾𑌸𑍍𑌸𑌰𑍍𑌵𑌤𑍋 𑌦𑌿𑌶𑌮𑍍 ।
𑌨 𑌸𑍀𑌤𑌾𑌂 𑌦𑌦𑍃𑌶𑍁𑌰𑍍𑌵𑍀𑌰𑌾 𑌮𑍈𑌥𑌿𑌲𑍀𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 4 ॥
𑌤𑍇 𑌭𑌕𑍍𑌷𑌯𑌂𑌤𑍋 𑌮𑍂𑌲𑌾𑌨𑌿 𑌫𑌲𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ।
𑌅𑌨𑍍𑌵𑍇𑌷𑌮𑌾𑌣𑌾 𑌦𑍁𑌰𑍍𑌧𑌰𑍍𑌷𑌾𑌨𑍍𑌯𑌵𑌸𑌂 𑌸𑍍𑌤𑌤𑍍𑌰 𑌤𑌤𑍍𑌰 𑌹 ॥ 5 ॥
𑌸 𑌤𑍁 𑌦𑍇𑌶𑍋 𑌦𑍁𑌰𑌨𑍍𑌵𑍇𑌷𑍋 𑌗𑍁𑌹𑌾𑌗𑌹𑌨𑌵𑌾𑌨𑍍𑌮𑌹𑌾𑌨𑍍 ।
𑌨𑌿𑌰𑍍𑌜𑌲𑌂 𑌨𑌿𑌰𑍍𑌜𑌨𑌂 𑌶𑍂𑌨𑍍𑌯𑌂 𑌗𑌹𑌨𑌂 𑌰𑍋𑌮𑌹𑌰𑍍𑌷𑌣𑌮𑍍 ॥ 6 ॥
𑌤𑍍𑌯𑌕𑍍𑌤𑍍𑌵𑌾 𑌤𑍁 𑌤𑌂 𑌤𑌦𑌾 𑌦𑍇𑌶𑌂 𑌸𑌰𑍍𑌵𑍇 𑌵𑍈 𑌹𑌰𑌿𑌯𑍂𑌥𑌪𑌾𑌃 ।
𑌤𑌾𑌦𑍃𑌶𑌾𑌨𑍍𑌯𑌪𑍍𑌯𑌰𑌣𑍍𑌯𑌾𑌨𑌿 𑌵𑌿𑌚𑌿𑌤𑍍𑌯 𑌭𑍃𑌶𑌪𑍀𑌡𑌿𑌤𑌾𑌃 ॥ ॥
𑌦𑍇𑌶𑌮𑌨𑍍𑌯𑌂 𑌦𑍁𑌰𑌾𑌧𑌰𑍍𑌷𑌂 𑌵𑌿𑌵𑌿𑌶𑍁 𑌶𑍍𑌚𑌾𑌕𑍁𑌤𑍋 𑌭𑌯𑌾𑌃 ।
𑌯𑌤𑍍𑌰 𑌵𑌂𑌧𑍍𑌯𑌫𑌲𑌾 𑌵𑍃𑌕𑍍𑌷𑌾 𑌵𑌿𑌪𑍁𑌷𑍍𑌪𑌾𑌃 𑌪𑌰𑍍𑌣𑌵𑌰𑍍𑌜𑌿𑌤𑌾𑌃 ॥ ॥
𑌨𑌿𑌸𑍍𑌤𑍋𑌯𑌾𑌸𑍍𑌸𑌰𑌿𑌤𑍋 𑌯𑌤𑍍𑌰 𑌮𑍂𑌲𑌂 𑌯𑌤𑍍𑌰 𑌸𑍁𑌦𑍁𑌰𑍍𑌲𑌭𑌮𑍍 ।
𑌨 𑌸𑌂𑌤𑌿 𑌮𑌹𑌿𑌷𑌾 𑌯𑌤𑍍𑌰 𑌨 𑌮𑍃𑌗𑌾 𑌨 𑌚 𑌹𑌸𑍍𑌤𑌿𑌨𑌃 ॥ ॥
𑌶𑌾𑌰𑍍𑌦𑍂𑌲𑌾𑌃 𑌪𑌕𑍍𑌷𑌿𑌣𑍋 𑌵𑌾𑌪𑌿 𑌯𑍇 𑌚𑌾𑌨𑍍𑌯𑍇 𑌵𑌨𑌗𑍋𑌚𑌰𑌾𑌃 ।
𑌨 𑌯𑌤𑍍𑌰𑌵𑍃𑌕𑍍𑌷𑌾 𑌨𑍌𑌷𑌧𑍍𑌯𑍋 𑌨 𑌵𑌲𑍍𑌲𑍍𑌯𑍋 𑌨𑌾𑌪𑌿 𑌵𑍀𑌰𑍁𑌧𑌃 ॥ 10 ॥
𑌸𑍍𑌨𑌿𑌗𑍍𑌧𑌪𑌤𑍍𑌰𑌾𑌸𑍍𑌸𑍍𑌥𑌲𑍇 𑌯𑌤𑍍𑌰 𑌪𑌦𑍍𑌮𑌿𑌨𑍍𑌯𑌃 𑌫𑍁𑌲𑍍𑌲𑌪𑌂𑌕𑌜𑌾𑌃 ।
𑌪𑍍𑌰𑍇𑌕𑍍𑌷𑌣𑍀𑌯𑌾𑌸𑍍𑌸𑍁𑌗𑌂𑌧𑌾𑌶𑍍𑌚 𑌭𑍍𑌰𑌮𑌰𑍈𑌶𑍍𑌚𑌾𑌪𑌿𑌵𑌰𑍍𑌜𑌿𑌤𑌾𑌃 ॥ 11 ॥
𑌕𑌂𑌡𑍁𑌰𑍍𑌨𑌾𑌮 𑌮𑌹𑌾𑌭𑌾𑌗𑌸𑍍𑌸𑌤𑍍𑌯𑌵𑌾𑌦𑍀 𑌤𑌪𑍋𑌧𑌨𑌃 ।
𑌮𑌹𑌰𑍍𑌷𑌿𑌃 𑌪𑌰𑌮𑌾𑌮𑌰𑍍𑌷𑍀 𑌨𑌿𑌯𑌮𑍈𑌰𑍍𑌦𑍁𑌷𑍍𑌪𑍍𑌰𑌧𑌰𑍍𑌷𑌣𑌃 ॥ 12 ॥
𑌤𑌸𑍍𑌯 𑌤𑌸𑍍𑌮𑌿𑌨𑍍𑌵𑌨𑍇 𑌪𑍁𑌤𑍍𑌰𑍋 𑌬𑌾𑌲𑌷𑍍𑌷𑍋𑌡𑌶𑌵𑌾𑌰𑍍𑌷𑌿𑌕𑌃 ।
𑌪𑍍𑌰𑌣𑌷𑍍𑌟𑍋 𑌜𑍀𑌵𑌿𑌤𑌾𑌂𑌤𑌾𑌯 𑌕𑍍𑌰𑍁𑌦𑍍𑌧𑌸𑍍𑌤𑌤𑍍𑌰 𑌮𑌹𑌾𑌮𑍁𑌨𑌿𑌃 ॥ 13 ॥
𑌤𑍇𑌨 𑌧𑌰𑍍𑌮𑌾𑌤𑍍𑌮𑌨𑌾 𑌶𑌪𑍍𑌤𑌂 𑌕𑍃𑌤𑍍𑌸𑍍𑌨𑌂 𑌤𑌤𑍍𑌰𑌮𑌹𑌦𑍍𑌵𑌨𑌮𑍍 ।
𑌅𑌶𑌰𑌣𑍍𑌯𑌂 𑌦𑍁𑌰𑌾𑌧𑌰𑍍𑌷𑌂 𑌮𑍃𑌗𑌪𑌕𑍍𑌷𑌿𑌵𑌿𑌵𑌰𑍍𑌜𑌿𑌤𑌮𑍍 ॥ 14 ॥
𑌤𑌸𑍍𑌯 𑌤𑍇 𑌕𑌾𑌨𑌨𑌾𑌂𑌤𑌾𑌶𑍍𑌚 𑌗𑌿𑌰𑍀𑌣𑌾𑌂 𑌕𑌂𑌦𑌰𑌾𑌣𑌿 𑌚 ।
𑌪𑍍𑌰𑌭𑌵𑌨𑌿 𑌨𑌦𑍀𑌨𑌾𑌂 𑌚 𑌵𑌿𑌚𑌿𑌨𑍍𑌵𑌂𑌤𑌿 𑌸𑌮𑌾𑌹𑌿𑌤𑌾𑌃 ॥ 15 ॥
𑌤𑌤𑍍𑌰 𑌚𑌾𑌪𑌿 𑌮𑌹𑌾𑌤𑍍𑌮𑌾𑌨𑍋 𑌨𑌾𑌪𑌶𑍍𑌯𑌂𑌜𑌨𑌕𑌾𑌤𑍍𑌮𑌜𑌾𑌮𑍍 ।
𑌹𑌰𑍍𑌤𑌾𑌰𑌂 𑌰𑌾𑌵𑌣𑌂 𑌵𑌾𑌪𑌿 𑌸𑍁𑌗𑍍𑌰𑍀𑌵𑌪𑍍𑌰𑌿𑌯𑌕𑌾𑌰𑌿𑌣𑌃 ॥ 16 ॥
𑌤𑍇 𑌪𑍍𑌰𑌵𑌿𑌶𑍍𑌯𑌾𑌽𑌶𑍁 𑌤𑌂 𑌭𑍀𑌮𑌂 𑌲𑌤𑌾𑌗𑍁𑌲𑍍𑌮𑌸𑌮𑌾𑌵𑍃𑌤𑌮𑍍 ।
𑌦𑌦𑍍𑌦𑍃𑌶𑍁𑌃 𑌕𑍍𑌰𑍂𑌰𑌕𑌰𑍍𑌮𑌾𑌣𑌮𑌸𑍁𑌰𑌂 𑌸𑍁𑌰𑌨𑌿𑌰𑍍𑌭𑌯𑌮𑍍 ॥ 1 ॥
𑌤𑌂 𑌦𑍃𑌷𑍍𑌟𑍍𑌵𑌾 𑌵𑌾𑌨𑌰𑌾 𑌘𑍋𑌰𑌂 𑌸𑍍𑌥𑌿𑌤𑌂 𑌶𑍈𑌲𑌮𑌿𑌵𑌾𑌪𑌰𑌮𑍍 ।
𑌗𑌾𑌢𑌂 𑌪𑌰𑌿𑌹𑌿𑌤𑌾𑌸𑍍𑌸𑌰𑍍𑌵𑍇 𑌦𑍃𑌷𑍍𑌟𑍍𑌵𑌾 𑌤𑌾𑌨𑍍𑌪𑌰𑍍𑌵𑌤𑍋𑌪𑌮𑌮𑌾𑌨𑍍 ॥ 1 ॥
𑌸𑍋𑌽𑌪𑌿 𑌤𑌾𑌨𑍍𑌵𑌾𑌨𑌰𑌾𑌨𑍍𑌸𑌰𑍍𑌵𑌾𑌨𑍍 𑌨𑌷𑍍𑌟𑌾 𑌸𑍍𑌸𑍍𑌥𑍇𑌤𑍍𑌯𑌬𑍍𑌰𑌵𑍀𑌦𑍍𑌬𑌲𑍀 ।
𑌅𑌭𑍍𑌯𑌧𑌾𑌵𑌤 𑌸𑌂𑌕𑍃𑌦𑍍𑌧𑍋 𑌮𑍁𑌷𑍍𑌟𑌿𑌮𑍁𑌦𑍍𑌯𑌮𑍍𑌯 𑌸𑌂𑌹𑌿𑌤𑌮𑍍 ॥ 1 ॥
𑌤𑌮𑌾𑌪𑌤𑌂𑌤𑌂 𑌸𑌹𑌸𑌾 𑌵𑌾𑌲𑌿𑌪𑍁𑌤𑍍𑌰𑍋𑌽𑌂𑌗𑌦𑌸𑍍𑌤𑌦𑌾 ।
𑌰𑌾𑌵𑌣𑍋𑌽𑌯𑌮𑌿𑌤𑌿 𑌜𑍍𑌞𑌾𑌤𑍍𑌵𑌾 𑌤𑌲𑍇𑌨𑌾𑌭𑌿𑌜𑌘𑌾𑌨 𑌹 ॥ 20 ॥
𑌸 𑌵𑌾𑌲𑌿𑌪𑍁𑌤𑍍𑌰𑌾𑌭𑌿𑌹𑌤𑍋 𑌵𑌕𑍍𑌤𑍍𑌰𑌾𑌚𑍍𑌛𑍋𑌣𑌿𑌤𑌮𑍁𑌦𑍍𑌵𑌮𑌨𑍍 ।
𑌅𑌸𑍁𑌰𑍋𑌽𑌭𑍍𑌯𑌪𑌤𑌦𑍍𑌭𑍂𑌮𑍌 𑌪𑌰𑍍𑌯𑌸𑍍𑌤 𑌇𑌵 𑌪𑌰𑍍𑌵𑌤𑌃 ॥ 21 ॥
𑌤𑍇𑌽𑌪𑌿 𑌤𑌸𑍍𑌮𑌿𑌨𑍍𑌨𑌿𑌰𑍁𑌚𑍍𑌛𑌵𑌾𑌸𑍇 𑌵𑌾𑌨𑌰𑌾 𑌜𑌿𑌤𑌕𑌾𑌶𑌿𑌨𑌃 ।
𑌵𑍍𑌯𑌚𑌿𑌨𑍍𑌵𑌨𑍍𑌪𑍍𑌰𑌾𑌯𑌶𑌸𑍍𑌤𑌤𑍍𑌰 𑌸𑌰𑍍𑌵𑌂 𑌤𑌦𑍍𑌗𑌿𑌰𑌿𑌗𑌹𑍍𑌵𑌰𑌮𑍍 ॥ 22 ॥
𑌵𑌿𑌚𑌿𑌤𑌂 𑌤𑍁 𑌤𑌤𑌃 𑌕𑍃𑌤𑍍𑌵𑌾 𑌸𑌰𑍍𑌵𑍇 𑌤𑍇 𑌕𑌾𑌨𑌨𑌂 𑌪𑍁𑌨𑌃 ।
𑌅𑌨𑍍𑌯𑌦𑍇𑌵𑌾𑌪𑌰𑌂 𑌘𑍋𑌰𑌂 𑌵𑌿𑌵𑌿𑌶𑍁𑌰𑍍𑌗𑌿𑌰𑌿𑌗𑌹𑍍𑌵𑌰𑌮𑍍 ॥ 23 ॥
𑌤𑍇 𑌵𑌿𑌚𑌿𑌤𑍍𑌯 𑌪𑍁𑌨𑌃 𑌖𑌿𑌨𑍍𑌨𑌾 𑌵𑌿𑌨𑌿𑌷𑍍𑌪𑌤𑍍𑌯 𑌸𑌮𑌾𑌗𑌤𑌾𑌃 ।
𑌏𑌕𑌾𑌂𑌤𑍇 𑌵𑍃𑌕𑍍𑌷𑌮𑍂𑌲𑍇 𑌤𑍁 𑌨𑌿𑌷𑍇𑌦𑍁𑌰𑍍𑌦𑍀𑌨𑌮𑌾𑌨𑌸𑌾𑌃 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌅𑌷𑍍𑌟𑌚𑌤𑍍𑌵𑌾𑌰𑌿𑌂𑌶𑌸𑍍𑌸𑌰𑍍𑌗𑌃 ॥
