𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑍋𑌵𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌸𑌮𑍁𑌪𑌜𑌿𑌘𑍍𑌰𑌂𑌤𑍀 𑌕𑌪𑌿𑌰𑌾𑌜𑌸𑍍𑌯 𑌤𑌨𑍍𑌮𑍁𑌖𑌮𑍍 ।
𑌪𑌤𑌿𑌂 𑌲𑍋𑌕𑌾𑌚𑍍𑌚𑍍𑌯𑍁𑌤𑌂 𑌤𑌾𑌰𑌾 𑌮𑍃𑌤𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 1 ॥
𑌶𑍇𑌷𑍇 𑌤𑍍𑌵𑌂 𑌵𑌿𑌷𑌮𑍇 𑌦𑍁𑌃𑌖𑌮𑌕𑍃𑌤𑍍𑌵𑌾 𑌵𑌚𑌨𑌂 𑌮𑌮 ।
𑌉𑌪𑌲𑍋𑌪𑌚𑌿𑌤𑍇 𑌵𑍀𑌰 𑌸𑍁𑌦𑍁𑌃𑌖𑍇 𑌵𑌸𑍁𑌧𑌾𑌤𑌲𑍇 ॥ 2 ॥
𑌮𑌤𑍍𑌤𑌃 𑌪𑍍𑌰𑌿𑌯𑌤𑌰𑌾 𑌨𑍂𑌨𑌂 𑌵𑌾𑌨𑌰𑍇𑌂𑌦𑍍𑌰 𑌮𑌹𑍀 𑌤𑌵 ।
𑌶𑍇𑌷𑍇 𑌹𑌿 𑌤𑌾𑌂 𑌪𑌰𑌿𑌷𑍍𑌵𑌜𑍍𑌯 𑌮𑌾𑌂 𑌚 𑌨 𑌪𑍍𑌰𑌤𑌿𑌭𑌾𑌷𑌸𑍇 ॥ 3 ॥
𑌸𑍁𑌗𑍍𑌰𑍀𑌵𑌸𑍍𑌯 𑌵𑌶𑌂 𑌪𑍍𑌰𑌾𑌪𑍍𑌤𑍋 𑌵𑌿𑌧𑌿𑌰𑍇𑌷𑌭𑌵𑌤𑍍𑌯𑌹𑍋 ।
𑌸𑍁𑌗𑍍𑌰𑍀𑌵 𑌏𑌵 𑌵𑌿𑌕𑍍𑌰𑌾𑌂𑌤𑍋 𑌵𑍀𑌰 𑌸𑌾𑌹𑌸𑌿𑌕𑌪𑍍𑌰𑌿𑌯 ॥ 4 ॥
𑌋𑌕𑍍𑌷𑌵𑌾𑌨𑌰𑌮𑍁𑌖𑍍𑌯𑌾𑌸𑍍𑌤𑍍𑌵𑌾𑌂 𑌬𑌲𑌿𑌨𑌃 𑌪𑌰𑍍𑌯𑍁𑌪𑌾𑌸𑌤𑍇 ।
𑌏𑌷𑌾𑌂 𑌵𑌿𑌲𑌪𑌿𑌤𑌂 𑌕𑍃𑌚𑍍𑌛𑍍𑌰𑌮𑌂𑌗𑌦𑌸𑍍𑌯 𑌚 𑌶𑍋𑌚𑌤𑌃 ॥ 5 ॥
𑌮𑌮 𑌚𑍇𑌮𑌾 𑌗𑌿𑌰𑌃 𑌶𑍍𑌰𑍁𑌤𑍍𑌵𑌾 𑌕𑌿𑌂 𑌤𑍍𑌵𑌂 𑌨 𑌪𑍍𑌰𑌤𑌿𑌬𑍁𑌧𑍍𑌯𑌸𑍇 ।
𑌇𑌦𑌂 𑌤𑌚𑍍𑌛𑍂𑌰𑌶𑌯𑌨𑌂 𑌯𑌤𑍍𑌰 𑌶𑍇𑌷𑍇 𑌹𑌤𑍋 𑌯𑍁𑌧𑌿 ।
𑌶𑌾𑌯𑌿𑌤𑌾 𑌨𑌿𑌹𑌤𑌾 𑌯𑌤𑍍𑌰 𑌤𑍍𑌵𑌯𑍈𑌵 𑌰𑌿𑌪𑌵𑌃 𑌪𑍁𑌰𑌾 ॥ 6 ॥
𑌵𑌿𑌶𑍁𑌦𑍍𑌧𑌸𑌤𑍍𑌤𑍍𑌵𑌾𑌭𑌿𑌜𑌨 𑌪𑍍𑌰𑌿𑌯𑌯𑍁𑌦𑍍𑌧 𑌮𑌮 𑌪𑍍𑌰𑌿𑌯 ।
𑌮𑌾𑌮𑌨𑌾𑌥𑌾𑌂 𑌵𑌿𑌹𑌾𑌯𑍈𑌕𑌾𑌂 𑌗𑌤𑌸𑍍𑌤𑍍𑌵𑌮𑌸𑌿 𑌮𑌾𑌨𑌦 ॥ ॥
𑌶𑍂𑌰𑌾𑌯 𑌨 𑌪𑍍𑌰𑌦𑌾𑌤𑌵𑍍𑌯𑌾 𑌕𑌨𑍍𑌯𑌾 𑌖𑌲𑍁 𑌵𑌿𑌪𑌶𑍍𑌚𑌿𑌤𑌾 ।
𑌶𑍂𑌰𑌭𑌾𑌰𑍍𑌯𑌾𑌂 𑌹𑌤𑌾𑌂 𑌪𑌶𑍍𑌯 𑌸𑌦𑍍𑌯𑍋 𑌮𑌾𑌂 𑌵𑌿𑌧𑌵𑌾𑌂 𑌕𑍃𑌤𑌾𑌮𑍍 ॥ ॥
𑌅𑌵𑌭𑌗𑍍𑌨𑌶𑍍𑌚 𑌮𑍇 𑌮𑌾𑌨𑍋 𑌭𑌗𑍍𑌨𑌾 𑌮𑍇 𑌶𑌾𑌶𑍍𑌵𑌤𑍀 𑌗𑌤𑌿𑌃 ॥ ॥
𑌅𑌗𑌾𑌧𑍇 𑌚 𑌨𑌿𑌮𑌗𑍍𑌨𑌾𑌽𑌸𑍍𑌮𑌿 𑌵𑌿𑌪𑍁𑌲𑍇 𑌶𑍋𑌕𑌸𑌾𑌗𑌰𑍇 ।
𑌅𑌶𑍍𑌮𑌸𑌾𑌰𑌮𑌯𑌂 𑌨𑍂𑌨𑌮𑌿𑌦𑌂 𑌮𑍇 𑌹𑍃𑌦𑌯𑌂 𑌦𑍃𑌢𑌮𑍍 ॥ 10 ॥
𑌭𑌰𑍍𑌤𑌾𑌰𑌂 𑌨𑌿𑌹𑌤𑌂 𑌦𑍃𑌷𑍍𑌟𑍍𑌵𑌾 𑌯𑌨𑍍𑌨𑌾𑌦𑍍𑌯 𑌶𑌤𑌧𑌾 𑌕𑍃𑌤𑌮𑍍 ।
𑌸𑍁𑌹𑍃𑌚𑍍𑌚𑍈𑌵 𑌹𑌿 𑌭𑌰𑍍𑌤𑌾 𑌚 𑌪𑍍𑌰𑌕𑍃𑌤𑍍𑌯𑌾 𑌮𑌮 𑌚 𑌪𑍍𑌰𑌿𑌯𑌃 ।
𑌆𑌹𑌵𑍇 𑌚 𑌪𑌰𑌾𑌕𑍍𑌰𑌾𑌂𑌤𑌶𑍍𑌶𑍂𑌰𑌃 𑌪𑌂𑌚𑌤𑍍𑌵𑌮𑌾𑌗𑌤𑌃 ॥ 11 ॥
𑌪𑌤𑌿𑌹𑍀𑌨𑌾 𑌤𑍁 𑌯𑌾 𑌨𑌾𑌰𑍀 𑌕𑌾𑌮𑌂 𑌭𑌵𑌤𑍁 𑌪𑍁𑌤𑍍𑌰𑌿𑌣𑍀 ।
𑌧𑌨𑌧𑌾𑌨𑍍𑌯𑍈𑌸𑍍𑌸𑍁𑌪𑍂𑌰𑍍𑌣𑌾𑌽𑌪𑌿 𑌵𑌿𑌧𑌵𑍇𑌤𑍍𑌯𑍁𑌚𑍍𑌯𑌤𑍇 𑌬𑍁𑌧𑍈𑌃 ॥ 12 ॥
𑌸𑍍𑌵𑌗𑌾𑌤𑍍𑌰𑌪𑍍𑌰𑌭𑌵𑍇 𑌵𑍀𑌰 𑌶𑍇𑌷𑍇 𑌰𑍁𑌧𑌿𑌰𑌮𑌂𑌡𑌲𑍇 ।
𑌕𑍍𑌰𑌿𑌮𑌿𑌰𑌾𑌗𑌪𑌰𑌿𑌸𑍍𑌤𑍋𑌮𑍇 𑌤𑍍𑌵𑌮𑌾𑌤𑍍𑌮𑌶𑌯𑌨𑍇 𑌯𑌥𑌾 ॥ 13 ॥
𑌰𑍇𑌣𑍁𑌶𑍋𑌣𑌿𑌤𑌸𑌂𑌵𑍀𑌤𑌂 𑌗𑌾𑌤𑍍𑌰𑌂 𑌤𑌵 𑌸𑌮𑌂𑌤𑌤𑌃 ।
𑌪𑌰𑌿𑌰𑌬𑍍𑌧𑍁𑌂 𑌨 𑌶𑌕𑍍𑌨𑍋𑌮𑌿 𑌭𑍁𑌜𑌾𑌭𑍍𑌯𑌾𑌂 𑌪𑍍𑌲𑌵𑌗𑌰𑍍𑌷𑌭 ॥ 14 ॥
𑌕𑍃𑌤𑌕𑍃𑌤𑍍𑌯𑍋𑌽𑌦𑍍𑌯 𑌸𑍁𑌗𑍍𑌰𑍀𑌵𑍋 𑌵𑍈𑌰𑍇𑌽𑌸𑍍𑌮𑌿𑌨𑍍𑌨𑌤𑌿𑌦𑌾𑌰𑍁𑌣𑍇 ।
𑌯𑌸𑍍𑌯 𑌰𑌾𑌮𑌵𑌿𑌮𑍁𑌕𑍍𑌤𑍇𑌨 𑌹𑍃𑌤𑌮𑍇𑌕𑍇𑌷𑍁𑌣𑌾 𑌭𑌯𑌮𑍍 ॥ 15 ॥
𑌶𑌰𑍇𑌣 𑌹𑍃𑌦𑌿 𑌲𑌗𑍍𑌨𑍇𑌨 𑌗𑌾𑌤𑍍𑌰𑌸𑌂𑌸𑍍𑌪𑌰𑍍𑌶𑌨𑍇 𑌤𑌵 ।
𑌵𑌾𑌰𑍍𑌯𑌾𑌮𑌿 𑌤𑍍𑌵𑌾𑌂 𑌨𑌿𑌰𑍀𑌕𑍍𑌷𑌂𑌤𑍀 𑌤𑍍𑌵𑌯𑌿 𑌪𑌂𑌚𑌤𑍍𑌵𑌮𑌾𑌗𑌤𑍇 ॥ 16 ॥
𑌉𑌦𑍍𑌵𑌵𑌰𑍍𑌹 𑌶𑌰𑌂 𑌨𑍀𑌲𑌸𑍍𑌤𑌸𑍍𑌯 𑌗𑌾𑌤𑍍𑌰𑌗𑌤𑌂 𑌤𑌦𑌾 ।
𑌗𑌿𑌰𑌿𑌗𑌹𑍍𑌵𑌰𑌸𑌂𑌲𑍀𑌨𑌂 𑌦𑍀𑌪𑍍𑌤𑌮𑌾𑌶𑍀𑌵𑌿𑌷𑌂 𑌯𑌥𑌾 ॥ 1 ॥
𑌤𑌸𑍍𑌯 𑌨𑌿𑌷𑍍𑌕𑍃𑌷𑍍𑌯𑌮𑌾𑌣𑌸𑍍𑌯 𑌬𑌾𑌣𑌸𑍍𑌯 𑌚 𑌬𑌭𑍌 𑌦𑍍𑌯𑍁𑌤𑌿𑌃 ।
𑌅𑌸𑍍𑌤𑌮𑌸𑍍𑌤𑌕𑌸𑌂𑌰𑍁𑌦𑍍𑌧𑍋 𑌰𑌶𑍍𑌮𑌿𑌰𑍍𑌦𑌿𑌨𑌕𑌰𑌾𑌦𑌿𑌵 ॥ 1 ॥
𑌪𑍇𑌤𑍁𑌃 𑌕𑍍𑌷𑌤𑌜𑌧𑌾𑌰𑌾𑌸𑍍𑌤𑍁 𑌵𑍍𑌰𑌣𑍇𑌭𑍍𑌯𑌸𑍍𑌤𑌸𑍍𑌯 𑌸𑌰𑍍𑌵𑌶𑌃 ।
𑌤𑌾𑌮𑍍𑌰𑌗𑍈𑌰𑌿𑌕𑌸𑌂𑌪𑍃𑌕𑍍𑌤𑌾 𑌧𑌾𑌰𑌾 𑌇𑌵 𑌧𑌰𑌾𑌧𑌰𑌾𑌤𑍍 ॥ 1 ॥
𑌅𑌵𑌕𑍀𑌰𑍍𑌣𑌂 𑌵𑌿𑌮𑌾𑌰𑍍𑌜𑌂𑌤𑍀 𑌭𑌰𑍍𑌤𑌾𑌰𑌂 𑌰𑌣𑌰𑍇𑌣𑍁𑌨𑌾 ।
𑌅𑌸𑍍𑌰𑍈𑌰𑍍𑌨𑌯𑌨𑌜𑍈𑌶𑍍𑌶𑍂𑌰𑌂 𑌸𑌿𑌷𑍇𑌚𑌾𑌸𑍍𑌤𑍍𑌰𑌸𑌮𑌾𑌹𑌤𑌮𑍍 ॥ 20 ॥
𑌰𑍁𑌧𑌿𑌰𑍋𑌕𑍍𑌷𑌿𑌤𑌸𑌰𑍍𑌵𑌾𑌂𑌗𑌂 𑌦𑍃𑌷𑍍𑌟𑍍𑌵𑌾 𑌵𑌿𑌨𑌿𑌹𑌤𑌂 𑌪𑌤𑌿𑌮𑍍 ।
𑌉𑌵𑌾𑌚 𑌤𑌾𑌰𑌾 𑌪𑌿𑌂𑌗𑌾𑌕𑍍𑌷𑌂 𑌪𑍁𑌤𑍍𑌰𑌮𑌂𑌗𑌦𑌮𑌂𑌗𑌨𑌾 ॥ 21 ॥
𑌅𑌵𑌸𑍍𑌥𑌾𑌂 𑌪𑌶𑍍𑌚𑌿𑌮𑌾𑌂 𑌪𑌶𑍍𑌯 𑌪𑌿𑌤𑍁𑌃 𑌪𑍁𑌤𑍍𑌰 𑌸𑍁𑌦𑌾𑌰𑍁𑌣𑌾𑌮𑍍 ।
𑌸𑌂𑌪𑍍𑌰𑌸𑌕𑍍𑌤𑌸𑍍𑌯 𑌵𑍈𑌰𑌸𑍍𑌯 𑌗𑌤𑍋𑌽𑌂𑌤𑌃 𑌪𑌾𑌪𑌕𑌰𑍍𑌮𑌣𑌾 ॥ 22 ॥
𑌬𑌾𑌲𑌸𑍂𑌰𑍍𑌯𑍋𑌦𑌯𑌤𑌨𑍁𑌂 𑌪𑍍𑌰𑌯𑌾𑌂𑌤𑌂 𑌯𑌮𑌸𑌦𑌨𑌮𑍍 ।
𑌅𑌭𑌿𑌵𑌾𑌦𑌯 𑌰𑌾𑌜𑌾𑌨𑌂 𑌪𑌿𑌤𑌰𑌂 𑌪𑍁𑌤𑍍𑌰 𑌮𑌾𑌨𑌦𑌮𑍍 ॥ 23 ॥
𑌏𑌵𑌮𑍁𑌕𑍍𑌤𑌸𑍍𑌸𑌮𑍁𑌤𑍍𑌥𑌾𑌯 𑌜𑌗𑍍𑌰𑌾𑌹 𑌚𑌰𑌣𑍌 𑌪𑌿𑌤𑍁𑌃 ।
𑌭𑍁𑌜𑌾𑌭𑍍𑌯𑌾𑌂 𑌪𑍀𑌨𑌵𑍃𑌤𑍍𑌤𑌾𑌭𑍍𑌯𑌾𑌮𑌂𑌗𑌦𑍋𑌽𑌹𑌮𑌿𑌤𑌿 𑌬𑍍𑌰𑍁𑌵𑌨𑍍 ॥ 24 ॥
𑌅𑌭𑌿𑌵𑌾𑌦𑌯𑌮𑌾𑌨𑌂 𑌤𑍍𑌵𑌾𑌮𑌂𑌗𑌦𑌂 𑌤𑍍𑌵𑌂 𑌯𑌥𑌾 𑌪𑍁𑌰𑌾 ।
𑌦𑍀𑌰𑍍𑌘𑌾𑌯𑍁𑌰𑍍𑌭𑌵 𑌪𑍁𑌤𑍍𑌰𑍇𑌤𑌿 𑌕𑌿𑌮𑌰𑍍𑌥𑌂 𑌨𑌾𑌭𑌿𑌭𑌾𑌷𑌸𑍇 ॥ 25 ॥
𑌅𑌹𑌂 𑌪𑍁𑌤𑍍𑌰𑌸𑌹𑌾𑌯𑌾 𑌤𑍍𑌵𑌾𑌮𑍁𑌪𑌾𑌸𑍇 𑌗𑌤𑌚𑍇𑌤𑌸𑌮𑍍 ।
𑌸𑌿𑌂𑌹𑍇𑌨 𑌨𑌿𑌹𑌤𑌂 𑌸𑌦𑍍𑌯𑍋 𑌗𑍌𑌸𑍍𑌸𑌵𑌤𑍍𑌸𑍇𑌵 𑌗𑍋𑌵𑍃𑌷𑌮𑍍 ॥ 26 ॥
𑌇𑌷𑍍𑌟𑍍𑌵𑌾 𑌸𑌂𑌗𑍍𑌰𑌾𑌮𑌯𑌜𑍍𑌞𑍇𑌨 𑌰𑌾𑌮𑌪𑍍𑌰𑌹𑌰𑌣𑌾𑌂𑌭𑌸𑌿 ।
𑌅𑌸𑍍𑌮𑌿𑌨𑍍𑌨𑌵𑌭𑍃𑌥𑍇 𑌸𑍍𑌨𑌾𑌤𑌃 𑌕𑌥𑌂 𑌪𑌤𑍍𑌨𑍍𑌯𑌾 𑌮𑌯𑌾 𑌵𑌿𑌨𑌾 ॥ 2 ॥
𑌯𑌾 𑌦𑌤𑍍𑌤𑌾 𑌦𑍇𑌵𑌰𑌾𑌜𑍇𑌨 𑌤𑌵 𑌤𑍁𑌷𑍍𑌟𑍇𑌨 𑌸𑌂𑌯𑍁𑌗𑍇 ।
𑌶𑌾𑌤𑌕𑍁𑌂𑌭𑌮𑌯𑍀𑌂 𑌮𑌾𑌲𑌾𑌂 𑌤𑌾𑌂 𑌤𑍇 𑌪𑌶𑍍𑌯𑌾𑌮𑌿 𑌨𑍇𑌹 𑌕𑌿𑌮𑍍 ॥ 2 ॥
𑌰𑌾𑌜𑍍𑌯𑌶𑍍𑌰𑍀𑌰𑍍𑌨 𑌜𑌹𑌾𑌤𑌿 𑌤𑍍𑌵𑌾𑌂 𑌗𑌤𑌾𑌸𑍁𑌮𑌪𑌿 𑌮𑌾𑌨𑌦 ।
𑌸𑍂𑌰𑍍𑌯𑌸𑍍𑌯𑌾𑌵𑌰𑍍𑌤𑌮𑌾𑌨𑌸𑍍𑌯 𑌶𑍈𑌲𑌰𑌾𑌜𑌮𑌿𑌵 𑌪𑍍𑌰𑌭𑌾 ॥ 2 ॥
𑌨 𑌮𑍇 𑌵𑌚𑌃 𑌪𑌥𑍍𑌯𑌮𑌿𑌦𑌂 𑌤𑍍𑌵𑌯𑌾 𑌕𑍃𑌤𑌂 𑌨 𑌚𑌾𑌸𑍍𑌮𑌿 𑌶𑌕𑍍𑌤𑌾 𑌹𑌿 𑌨𑌿𑌵𑌾𑌰𑌣𑍇 𑌤𑌵 ।
𑌹𑌤𑌾 𑌸𑌪𑍁𑌤𑍍𑌰𑌾𑌽𑌸𑍍𑌮𑌿 𑌹𑌤𑍇𑌨 𑌸𑌂𑌯𑍁𑌗𑍇 𑌸𑌹 𑌤𑍍𑌵𑌯𑌾 𑌶𑍍𑌰𑍀𑌰𑍍𑌵𑌿𑌜𑌹𑌾𑌤𑌿 𑌮𑌾𑌮𑌿𑌹 ॥ 30 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌕𑌿𑌷𑍍𑌕𑌿𑌂𑌧𑌾𑌕𑌾𑌂𑌡𑍇 𑌤𑍍𑌰𑌯𑍋𑌵𑌿𑌂𑌶𑌸𑍍𑌸𑌰𑍍𑌗𑌃 ॥
