𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌤𑌸𑍍𑌯 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌕𑍁𑌶𑌨𑌾𑌭𑌸𑍍𑌯 𑌧𑍀𑌮𑌤𑌃 ।
𑌶𑌿𑌰𑍋𑌭𑌿𑌶𑍍𑌚𑌰𑌣𑍌 𑌸𑍍𑌪𑍃𑌷𑍍𑌟𑍍𑌵𑌾 𑌕𑌨𑍍𑌯𑌾𑌶𑌤𑌮𑌭𑌾𑌷𑌤 ॥ 1 ॥
𑌵𑌾𑌯𑍁𑌸𑍍𑌸𑌰𑍍𑌵𑌾𑌤𑍍𑌮𑌕𑍋 𑌰𑌾𑌜𑌨𑍍 𑌪𑍍𑌰𑌧𑌰𑍍𑌷𑌯𑌿𑌤𑍁𑌮𑌿𑌚𑍍𑌛𑌤𑌿 ।
𑌅𑌶𑍁𑌭𑌂 𑌮𑌾𑌰𑍍𑌗𑌮𑌾𑌸𑍍𑌥𑌾𑌯 𑌨 𑌧𑌰𑍍𑌮𑌂 𑌪𑍍𑌰𑌤𑍍𑌯𑌵𑍇𑌕𑍍𑌷𑌤𑍇 ॥ 2 ॥
𑌪𑌿𑌤𑍃𑌮𑌤𑍍𑌯𑌸𑍍𑌸𑍍𑌮 𑌭𑌦𑍍𑌰𑌂 𑌤𑍇 𑌸𑍍𑌵𑌚𑍍𑌛𑌂𑌦𑍇 𑌨 𑌵𑌯𑌂 𑌸𑍍𑌥𑌿𑌤𑌾𑌃 ।
𑌪𑌿𑌤𑌰𑌂 𑌨𑍋 𑌵𑍃𑌣𑍀𑌷𑍍𑌵 𑌤𑍍𑌵𑌂 𑌯𑌦𑌿 𑌨𑍋 𑌦𑌾𑌸𑍍𑌯𑌤𑍇 𑌤𑌵 ॥ 3 ॥
𑌤𑍇𑌨 𑌪𑌾𑌪𑌾𑌨𑍁𑌬𑌂𑌧𑍇𑌨 𑌵𑌚𑌨𑌂 𑌨 𑌪𑍍𑌰𑌤𑍀𑌚𑍍𑌛𑌤𑌾 ।
𑌏𑌵𑌂 𑌬𑍍𑌰𑍁𑌵𑌂𑌤𑍍𑌯𑌸𑍍𑌸𑌰𑍍𑌵𑌾𑌸𑍍𑌸𑍍𑌮 𑌵𑌾𑌯𑍁𑌨𑌾 𑌨𑌿𑌹𑌤𑌾 𑌭𑍃𑌶𑌮𑍍 ॥ 4 ॥
𑌤𑌾𑌸𑌾𑌂 𑌤𑌦𑍍𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌰𑌾𑌜𑌾 𑌪𑌰𑌮𑌧𑌾𑌰𑍍𑌮𑌿𑌕𑌃 ।
𑌪𑍍𑌰𑌤𑍍𑌯𑍁𑌵𑌾𑌚 𑌮𑌹𑌾𑌤𑍇𑌜𑌾𑌃 𑌕𑌨𑍍𑌯𑌾𑌶𑌤𑌮𑌨𑍁𑌤𑍍𑌤𑌮𑌮𑍍 ॥ 5 ॥
𑌕𑍍𑌷𑌾𑌂𑌤𑌂 𑌕𑍍𑌷𑌮𑌾𑌵𑌤𑌾𑌂 𑌪𑍁𑌤𑍍𑌰𑍍𑌯𑌃 𑌕𑌰𑍍𑌤𑌵𑍍𑌯𑌂 𑌸𑍁𑌮𑌹𑌤𑍍𑌕𑍃𑌤𑌮𑍍 ।
𑌐𑌕𑌮𑌤𑍍𑌯𑌮𑍁𑌪𑌾𑌗𑌮𑍍𑌯 𑌕𑍁𑌲𑌂 𑌚𑌾𑌵𑍇𑌕𑍍𑌷𑌿𑌤𑌂 𑌮𑌮 ॥ 6 ॥
𑌅𑌲𑌂𑌕𑌾𑌰𑍋 𑌹𑌿 𑌨𑌾𑌰𑍀𑌣𑌾𑌂 𑌕𑍍𑌷𑌮𑌾 𑌤𑍁 𑌪𑍁𑌰𑍁𑌷𑌸𑍍𑌯 𑌵𑌾 ।
𑌦𑍁𑌷𑍍𑌕𑌰𑌂 𑌤𑌚𑍍𑌚 𑌯𑌤𑍍 𑌕𑍍𑌷𑌾𑌂𑌤𑌂 𑌤𑍍𑌰𑌿𑌦𑌶𑍇𑌷𑍁 𑌵𑌿𑌶𑍇𑌷𑌤𑌃 ॥ ॥
𑌯𑌾𑌦𑍃𑌶𑍀 𑌵𑌃 𑌕𑍍𑌷𑌮𑌾 𑌪𑍁𑌤𑍍𑌰𑍍𑌯𑌸𑍍𑌸𑌰𑍍𑌵𑌾𑌸𑌾𑌮𑌵𑌿𑌶𑍇𑌷𑌤𑌃 ।
𑌕𑍍𑌷𑌮𑌾 𑌦𑌾𑌨𑌂 𑌕𑍍𑌷𑌮𑌾 𑌯𑌜𑍍𑌞𑌃 𑌕𑍍𑌷𑌮𑌾 𑌸𑌤𑍍𑌯𑌂 𑌹𑌿 𑌪𑍁𑌤𑍍𑌰𑌿𑌕𑌾𑌃 ॥ ॥
𑌕𑍍𑌷𑌮𑌾 𑌯𑌶𑌃 𑌕𑍍𑌷𑌮𑌾 𑌧𑌰𑍍𑌮𑌃 𑌕𑍍𑌷𑌮𑌯𑌾 𑌨𑌿𑌷𑍍𑌠𑌿𑌤𑌂 𑌜𑌗𑌤𑍍 ।
𑌵𑌿𑌸𑍃𑌜𑍍𑌯 𑌕𑌨𑍍𑌯𑌾𑌃 𑌕𑌾𑌕𑍁𑌤𑍍𑌸𑍍𑌥 𑌰𑌾𑌜𑌾 𑌤𑍍𑌰𑌿𑌦𑌶𑌵𑌿𑌕𑍍𑌰𑌮𑌃 ॥ ॥
𑌮𑌂𑌤𑍍𑌰𑌜𑍍𑌞𑍋 𑌮𑌂𑌤𑍍𑌰𑌯𑌾𑌮𑌾𑌸 𑌪𑍍𑌰𑌦𑌾𑌨𑌂 𑌸𑌹 𑌮𑌂𑌤𑍍𑌰𑌿𑌭𑌿𑌃 ।
𑌦𑍇𑌶𑌕𑌾𑌲𑍌 𑌪𑍍𑌰𑌦𑌾𑌨𑌸𑍍𑌯 𑌸𑌦𑍃𑌶𑍇 𑌪𑍍𑌰𑌤𑌿𑌪𑌾𑌦𑌨𑌮𑍍 ॥ 10 ॥
𑌏𑌤𑌸𑍍𑌮𑌿𑌨𑍍𑌨𑍇𑌵 𑌕𑌾𑌲𑍇 𑌤𑍁 𑌚𑍂𑌲𑍀 𑌨𑌾𑌮 𑌮𑌹𑌾𑌤𑌪𑌾𑌃 ।
𑌊𑌰𑍍𑌧𑍍𑌵𑌰𑍇𑌤𑌾𑌶𑍍𑌶𑍁𑌭𑌾𑌚𑌾𑌰𑍋 𑌬𑍍𑌰𑌾𑌹𑍍𑌮𑌂 𑌤𑌪 𑌉𑌪𑌾𑌗𑌮𑌤𑍍 ॥ 11 ॥
𑌤𑌪𑍍𑌯𑌂𑌤𑌂 𑌤𑌮𑍃𑌷𑌿𑌂 𑌤𑌤𑍍𑌰 𑌗𑌂𑌧𑌰𑍍𑌵𑍀 𑌪𑌰𑍍𑌯𑍁𑌪𑌾𑌸𑌤𑍇 ।
𑌸𑍋𑌮𑌦𑌾 𑌨𑌾𑌮 𑌭𑌦𑍍𑌰𑌂 𑌤𑍇 𑌊𑌰𑍍𑌮𑌿𑌲𑌾 𑌤𑌨𑌯𑌾 𑌤𑌦𑌾 ॥ 12 ॥
𑌸𑌾 𑌚 𑌤𑌂 𑌪𑍍𑌰𑌣𑌤𑌾 𑌭𑍂𑌤𑍍𑌵𑌾 𑌶𑍁𑌶𑍍𑌰𑍂𑌷𑌣𑌪𑌰𑌾𑌯𑌣𑌾 ।
𑌉𑌵𑌾𑌸 𑌕𑌾𑌲𑍇 𑌧𑌰𑍍𑌮𑌿𑌷𑍍𑌠𑌾 𑌤𑌸𑍍𑌯𑌾𑌸𑍍𑌤𑍁𑌷𑍍𑌟𑍋𑌽𑌭𑌵𑌦𑍍𑌗𑍁𑌰𑍁𑌃 ॥ 13 ॥
𑌸 𑌚 𑌤𑌾𑌂 𑌕𑌾𑌲𑌯𑍋𑌗𑍇𑌨 𑌪𑍍𑌰𑍋𑌵𑌾𑌚 𑌰𑌘𑍁𑌨𑌂𑌦𑌨 ।
𑌪𑌰𑌿𑌤𑍁𑌷𑍍𑌟𑍋𑌽𑌸𑍍𑌮𑌿 𑌭𑌦𑍍𑌰𑌂 𑌤𑍇 𑌕𑌿𑌂 𑌕𑌰𑍋𑌮𑌿 𑌤𑌵 𑌪𑍍𑌰𑌿𑌯𑌮𑍍 ॥ 14 ॥
𑌪𑌰𑌿𑌤𑍁𑌷𑍍𑌟𑌂 𑌮𑍁𑌨𑌿𑌂 𑌜𑍍𑌞𑌾𑌤𑍍𑌵𑌾 𑌗𑌂𑌧𑌰𑍍𑌵𑍀 𑌮𑌧𑍁𑌰𑌸𑍍𑌵𑌰𑌾 ।
𑌉𑌵𑌾𑌚 𑌪𑌰𑌮𑌪𑍍𑌰𑍀𑌤𑌾 𑌵𑌾𑌕𑍍𑌯𑌜𑍍𑌞𑌾 𑌵𑌾𑌕𑍍𑌯𑌕𑍋𑌵𑌿𑌦𑌮𑍍 ॥ 15 ॥
𑌲𑌕𑍍𑌷𑍍𑌮𑍍𑌯𑌾 𑌸𑌮𑍁𑌦𑌿𑌤𑍋 𑌬𑍍𑌰𑌾𑌹𑍍𑌮𑍍𑌯𑌾 𑌬𑍍𑌰𑌹𑍍𑌮𑌭𑍂𑌤𑍋 𑌮𑌹𑌾𑌤𑌪𑌾𑌃 ।
𑌬𑍍𑌰𑌾𑌹𑍍𑌮𑍇𑌣 𑌤𑌪𑌸𑌾 𑌯𑍁𑌕𑍍𑌤𑌂 𑌪𑍁𑌤𑍍𑌰𑌮𑌿𑌚𑍍𑌛𑌾𑌮𑌿 𑌧𑌾𑌰𑍍𑌮𑌿𑌕 ॥ 16 ॥
𑌅𑌪𑌤𑌿𑌶𑍍𑌚𑌾𑌸𑍍𑌮𑌿 𑌭𑌦𑍍𑌰𑌂 𑌤𑍇 𑌭𑌾𑌰𑍍𑌯𑌾 𑌚𑌾𑌸𑍍𑌮𑌿 𑌨 𑌕𑌸𑍍𑌯𑌚𑌿𑌤𑍍 ।
𑌬𑍍𑌰𑌾𑌹𑍍𑌮𑍇𑌣𑍋𑌪𑌗𑌤𑌾𑌯𑌾𑌶𑍍𑌚 𑌦𑌾𑌤𑍁𑌮𑌰𑍍𑌹𑌸𑌿 𑌮𑍇 𑌸𑍁𑌤𑌮𑍍 ॥ 1 ॥
𑌤𑌸𑍍𑌯𑌾𑌃 𑌪𑍍𑌰𑌸𑌨𑍍𑌨𑍋 𑌬𑍍𑌰𑌹𑍍𑌮𑌰𑍍𑌷𑌿𑌰𑍍𑌦𑌦𑍌 𑌪𑍁𑌤𑍍𑌰𑌮𑌨𑍁𑌤𑍍𑌤𑌮𑌮𑍍 ।
𑌬𑍍𑌰𑌹𑍍𑌮𑌦𑌤𑍍𑌤 𑌇𑌤𑌿 𑌖𑍍𑌯𑌾𑌤𑌂 𑌮𑌾𑌨𑌸𑌂 𑌚𑍂𑌲𑌿𑌨𑌸𑍍𑌸𑍁𑌤𑌮𑍍 ॥ 1 ॥
𑌸 𑌰𑌾𑌜𑌾 𑌸𑍌𑌮𑌦𑍇𑌯𑌸𑍍𑌤𑍁 𑌪𑍁𑌰𑍀𑌮𑌧𑍍𑌯𑌵𑌸𑌤𑍍𑌤𑌦𑌾 ।
𑌕𑌾𑌂𑌪𑌿𑌲𑍍𑌯𑌾𑌂 𑌪𑌰𑌯𑌾 𑌲𑌕𑍍𑌷𑍍𑌮𑍍𑌯𑌾 𑌦𑍇𑌵𑌰𑌾𑌜𑍋 𑌯𑌥𑌾 𑌦𑌿𑌵𑌮𑍍 ॥ 1 ॥
𑌸 𑌬𑍁𑌦𑍍𑌧𑌿𑌂 𑌕𑍃𑌤𑌵𑌾𑌨𑍍 𑌰𑌾𑌜𑌾 𑌕𑍁𑌶𑌨𑌾𑌭𑌸𑍍𑌸𑍁𑌧𑌾𑌰𑍍𑌮𑌿𑌕𑌃 ।
𑌬𑍍𑌰𑌹𑍍𑌮𑌦𑌤𑍍𑌤𑌾𑌯 𑌕𑌾𑌕𑍁𑌤𑍍𑌸𑍍𑌥 𑌦𑌾𑌤𑍁𑌂 𑌕𑌨𑍍𑌯𑌾𑌶𑌤𑌂 𑌤𑌦𑌾 ॥ 20 ॥
𑌤𑌮𑌾𑌹𑍂𑌯 𑌮𑌹𑌾𑌤𑍇𑌜𑌾 𑌬𑍍𑌰𑌹𑍍𑌮𑌦𑌤𑍍𑌤𑌂 𑌮𑌹𑍀𑌪𑌤𑌿𑌃 ।
𑌦𑌦𑍌 𑌕𑌨𑍍𑌯𑌾𑌶𑌤𑌂 𑌰𑌾𑌜𑌾 𑌸𑍁𑌪𑍍𑌰𑍀𑌤𑍇𑌨𑌾𑌂𑌤𑌰𑌾𑌤𑍍𑌮𑌨𑌾 ॥ 21 ॥
𑌯𑌥𑌾𑌕𑍍𑌰𑌮𑌂 𑌤𑌤𑌃 𑌪𑌾𑌣𑍀𑌨𑍍 𑌜𑌗𑍍𑌰𑌾𑌹 𑌰𑌘𑍁𑌨𑌂𑌦𑌨 ।
𑌬𑍍𑌰𑌹𑍍𑌮𑌦𑌤𑍍𑌤𑍋 𑌮𑌹𑍀𑌪𑌾𑌲𑌸𑍍𑌤𑌾𑌸𑌾𑌂 𑌦𑍇𑌵𑌪𑌤𑌿𑌰𑍍𑌯𑌥𑌾 ॥ 22 ॥
𑌸𑍍𑌪𑍃𑌷𑍍𑌟𑌮𑌾𑌤𑍍𑌰𑍇 𑌤𑌤𑌃 𑌪𑌾𑌣𑍌 𑌵𑌿𑌕𑍁𑌬𑍍𑌜𑌾 𑌵𑌿𑌗𑌤𑌜𑍍𑌵𑌰𑌾𑌃 ।
𑌯𑍁𑌕𑍍𑌤𑌾𑌃 𑌪𑌰𑌮𑌯𑌾 𑌲𑌕𑍍𑌷𑍍𑌮𑍍𑌯𑌾 𑌬𑌭𑍁𑌃 𑌕𑌨𑍍𑌯𑌾𑌶𑌤𑌂 𑌤𑌦𑌾 ॥ 23 ॥
𑌸 𑌦𑍃𑌷𑍍𑌟𑍍𑌵𑌾 𑌵𑌾𑌯𑍁𑌨𑌾 𑌮𑍁𑌕𑍍𑌤𑌾𑌃 𑌕𑍁𑌶𑌨𑌾𑌭𑍋 𑌮𑌹𑍀𑌪𑌤𑌿𑌃 ।
𑌬𑌭𑍂𑌵 𑌪𑌰𑌮𑌪𑍍𑌰𑍀𑌤𑍋 𑌹𑌰𑍍𑌷𑌂 𑌲𑍇𑌭𑍇 𑌪𑍁𑌨𑌃𑌪𑍁𑌨𑌃 ॥ 24 ॥
𑌕𑍃𑌤𑍋𑌦𑍍𑌵𑌾𑌹𑌂 𑌤𑍁 𑌰𑌾𑌜𑌾𑌨𑌂 𑌬𑍍𑌰𑌹𑍍𑌮𑌦𑌤𑍍𑌤𑌂 𑌮𑌹𑍀𑌪𑌤𑌿𑌃 ।
𑌸𑌦𑌾𑌰𑌂 𑌪𑍍𑌰𑍇𑌷𑌯𑌾𑌮𑌾𑌸 𑌸𑍋𑌪𑌾𑌧𑍍𑌯𑌾𑌯𑌗𑌣𑌂 𑌤𑌦𑌾 ॥ 25 ॥
𑌸𑍋𑌮𑌦𑌾𑌽𑌪𑌿 𑌸𑍁𑌸𑌂𑌹𑍃𑌷𑍍𑌟𑌾 𑌪𑍁𑌤𑍍𑌰𑌸𑍍𑌯 𑌸𑌦𑍃𑌶𑍀𑌂 𑌕𑍍𑌰𑌿𑌯𑌾𑌮𑍍 ।
𑌯𑌥𑌾𑌨𑍍𑌯𑌾𑌯𑌂 𑌚 𑌗𑌂𑌧𑌰𑍍𑌵𑍀 𑌸𑍍𑌨𑍁𑌷𑌾𑌸𑍍𑌤𑌾𑌃 𑌪𑍍𑌰𑌤𑍍𑌯𑌨𑌂𑌦𑌤 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌤𑍍𑌰𑌯𑌸𑍍𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
