śrīmadvālmīkīya rāmāyaṇē kiṣkindhākāṇḍam ।
atha ṣaṭtriṃśassargaḥ ।
ityuktastārayā vākyaṃ praśritaṃ dharmasaṃhitam ।
mṛdusvabhāvassaumitriḥ pratijagrāha tadvachaḥ ॥ 1 ॥
tasminpratigṛhītē tu vākyē harigaṇēśvaraḥ ।
lakṣmaṇātsumahattrāsaṃ vastraṃ klinnamivātyajat ॥ 2 ॥
tataḥ kaṇṭhagataṃ mālyaṃ chitraṃ bahuguṇaṃ mahat ।
chichChēda vimadaśchāsītsugrīvō vānarēśvaraḥ ॥ 3 ॥
sa lakṣmaṇaṃ bhīmabalaṃ sarvavānarasattamaḥ ।
abravītpraśritaṃ vākyaṃ sugrīva ssampraharṣayan ॥ 4 ॥
praṇaṣṭā śrīścha kīrtiścha kapirājyaṃ cha śāśvatam ।
rāmaprasādātsaumitrē punaḥ prāptamidaṃ mayā ॥ 5 ॥
kaśśaktastasya dēvasya khyātasya svēna karmaṇā ।
tādṛśaṃ vikramaṃ vīra pratikartumarindama ॥ 6 ॥
sītāṃ prāpsyati dharmātmā vadhiṣyati cha rāvaṇam ।
sahāyamātrēṇa mayā rāghava ssvēna tējasā ॥ 7 ॥
sahāyakṛtyaṃ kiṃ tasya yēna sapta mahādrumāḥ ।
śailaścha vasudhā chaiva bāṇēnaikēna dāritāḥ ॥ 8 ॥
dhanurviṣphārayānasya yasya śabdēna lakṣmaṇa ।
saśailā kampitā bhūmissahāyaiḥ kinnu tasya vai ॥ 9 ॥
anuyātrāṃ narēndrasya kariṣyē'haṃ nararṣabha ।
gachChatō rāvaṇaṃ hantuṃ vairiṇaṃ sapurassaram ॥ 10 ॥
yadi kiñchidatikrāntaṃ viśvāsātpraṇayēna vā ।
prēṣyasya kṣamitavyaṃ mē na kaśchinnāparādhyati ॥ 11 ॥
ti tasya bruvāṇasya sugrīvasya mahātmanaḥ ।
abhavallakṣmaṇaḥ prītaḥ prēmṇā chaivamuvācha ha ॥ 12 ॥
sarvathā hi mama bhrātā sanāthō vānarēśvara ।
tvayā nāthēna sugrīva praśritēna viśēṣataḥ ॥ 13 ॥
yastē prabhāva ssugrīva yachcha tē śauchamārjavam ।
arhastvaṃ kapirājyasya śriyaṃ bhōktumanuttamām ॥ 14 ॥
sahāyēna tu sugrīva tvayā rāmaḥ pratāpavān ।
vadhiṣyati raṇē śatrūnachirānnātra saṃśayaḥ ॥ 15 ॥
dharmajñasya kṛtajñasya saṅgrāmēṣvanivartinaḥ ।
upapannaṃ cha yuktaṃ cha sugrīva tava bhāṣitam ॥ 16 ॥
dōṣajñassati sāmarthyē kō'nyō bhāṣitumarhati ।
varjayitvā mama jyēṣṭhaṃ tvāṃ cha vānarasattama ॥ 17 ॥
sadṛśaśchāsi rāmasya vikramēṇa balēna cha ।
sahāyō daivatairdattaśchirāya haripuṅgava ॥ 18 ॥
kiṃ tu śīghramitō vīra niṣkrama tvaṃ mayā saha ।
sāntvayasva vayasyaṃ cha tvaṃ bhāryāharaṇakarśitam ॥ 19 ॥
yachcha śōkābhibhūtasya śrutvā rāmasya bhāṣitam ।
mayā tvaṃ paruṣāṇyuktastachchatvaṃ kṣantu marhasi ॥ 20 ॥
ityārṣē śrīmadrāmāyaṇē vālmīkīya ādikāvyē kiṣkindhākāṇḍē ṣaṭtriṃśassargaḥ ॥
