𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌅𑌥 𑌯𑌾𑌤𑍍𑌰𑌾𑌂 𑌸𑌮𑍀𑌹𑌂𑌤𑌂 𑌶𑌤𑍍𑌰𑍁𑌘𑍍𑌨𑍋 𑌲𑌕𑍍𑌷𑍍𑌮𑌣𑌾𑌨𑍁𑌜𑌃 ।
𑌭𑌰𑌤𑌂 𑌶𑍋𑌕𑌸𑌂𑌤𑌪𑍍𑌤𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 1 ॥
𑌗𑌤𑌿𑌰𑍍𑌯 𑌸𑍍𑌸𑌰𑍍𑌵𑌭𑍂𑌤𑌾𑌨𑌾𑌂 𑌦𑍁𑌃𑌖𑍇 𑌕𑌿𑌂 𑌪𑍁𑌨𑌰𑌾𑌤𑍍𑌮𑌨𑌃 ।
𑌸 𑌰𑌾𑌮 𑌸𑍍𑌸𑌤𑍍𑌤𑍍𑌵𑌸𑌂𑌪𑌨𑍍𑌨𑌃 𑌸𑍍𑌤𑍍𑌰𑌿𑌯𑌾 𑌪𑍍𑌰𑌵𑍍𑌰𑌾𑌜𑌿𑌤𑍋 𑌵𑌨𑌮𑍍 ॥ 2 ॥
𑌬𑌲𑌵𑌾𑌨𑍍𑌵𑍀𑌰𑍍𑌯𑌸𑌂𑌪𑌨𑍍𑌨𑍋 𑌲𑌕𑍍𑌷𑍍𑌮𑌣𑍋 𑌨𑌾𑌮 𑌯𑍋𑌽𑌪𑍍𑌯𑌸𑍌 ।
𑌕𑌿𑌂 𑌨 𑌮𑍋𑌚𑌯𑌤𑍇 𑌰𑌾𑌮𑌂 𑌕𑍃𑌤𑍍𑌵𑌾 𑌸𑍍𑌮 𑌪𑌿𑌤𑍃𑌨𑌿𑌗𑍍𑌰𑌹𑌮𑍍 ॥ 3 ॥
𑌪𑍂𑌰𑍍𑌵𑌮𑍇𑌵 𑌤𑍁 𑌨𑌿𑌗𑍍𑌰𑌾𑌹𑍍𑌯 𑌸𑍍𑌸𑌮𑌵𑍇𑌕𑍍𑌷𑍍𑌯 𑌨𑌯𑌾𑌨𑌯𑍌 ।
𑌉𑌤𑍍𑌪𑌥𑌂 𑌯𑌸𑍍𑌸𑌮𑌾𑌰𑍂𑌢𑍋 𑌰𑌾𑌜𑌾 𑌨𑌾𑌰𑍍𑌯𑌾 𑌵𑌶𑌂 𑌗𑌤𑌃 ॥ 4 ॥
𑌇𑌤𑌿 𑌸𑌂𑌭𑌾𑌷𑌮𑌾𑌣𑍇 𑌤𑍁 𑌶𑌤𑍍𑌰𑍁𑌘𑍍𑌨𑍇 𑌲𑌕𑍍𑌷𑍍𑌮𑌣𑌾𑌨𑍁𑌜𑍇 ।
𑌪𑍍𑌰𑌾𑌗𑍍𑌦𑍍𑌵𑌾𑌰𑍇𑌽𑌭𑍂𑌤𑍍𑌤𑌦𑌾 𑌕𑍁𑌬𑍍𑌜𑌾 𑌸𑌰𑍍𑌵𑌾𑌭𑌰𑌣𑌭𑍂𑌷𑌿𑌤𑌾 ॥ 5 ॥
𑌲𑌿𑌪𑍍𑌤𑌾 𑌚𑌂𑌦𑌨𑌸𑌾𑌰𑍇𑌣 𑌰𑌾𑌜𑌵𑌸𑍍𑌤𑍍𑌰𑌾𑌣𑌿 𑌬𑌿𑌭𑍍𑌰𑌤𑍀 ।
𑌵𑌿𑌵𑌿𑌧𑌂 𑌵𑌿𑌵𑌿𑌧𑍈 𑌸𑍍𑌤𑍈𑌸𑍍𑌤𑍈𑌰𑍍𑌭𑍂𑌷𑌣𑍈𑌶𑍍𑌚 𑌵𑌿𑌭𑍂𑌷𑌿𑌤𑌾 ॥ 6 ॥
𑌮𑍇𑌖𑌲𑌾𑌦𑌾𑌮𑌭𑌿𑌶𑍍𑌚𑌿𑌤𑍍𑌰𑍈𑌰𑌨𑍍𑌯𑍈𑌶𑍍𑌚 𑌶𑍁𑌭𑌭𑍂𑌷𑌣𑍈𑌃 ।
𑌬𑌭𑌾𑌸𑍇 𑌬𑌹𑍁𑌭𑌿𑌰𑍍𑌬𑌦𑍍𑌧𑌾 𑌰𑌜𑍍𑌜𑍁𑌬𑌦𑍍𑌧𑍇𑌵 𑌵𑌾𑌨𑌰𑍀 ॥ ॥
𑌤𑌾𑌂 𑌸𑌮𑍀𑌕𑍍𑌷𑍍𑌯 𑌤𑌦𑌾 𑌦𑍍𑌵𑌾𑌸𑍍𑌸𑍍𑌥𑌾𑌸𑍍𑌸𑍁𑌭𑍃𑌶𑌂 𑌪𑌾𑌪𑌕𑌾𑌰𑌿𑌣𑍀𑌮𑍍 ।
𑌗𑍃𑌹𑍀𑌤𑍍𑌵𑌾𑌽𑌕𑌰𑍁𑌣𑌾𑌂 𑌕𑍁𑌬𑍍𑌜𑌾𑌂 𑌶𑌤𑍍𑌰𑍁𑌘𑍍𑌨𑌾𑌯 𑌨𑍍𑌯𑌵𑍇𑌦𑌯𑌨𑍍 ॥ ॥
𑌯𑌸𑍍𑌯𑌾𑌃 𑌕𑍃𑌤𑍇 𑌵𑌨𑍇 𑌰𑌾𑌮𑍋 𑌨𑍍𑌯𑌸𑍍𑌤𑌦𑍇𑌹𑌶𑍍𑌚 𑌵𑌃 𑌪𑌿𑌤𑌾 ।
𑌸𑍇𑌯𑌂 𑌪𑌾𑌪𑌾 𑌨𑍃𑌶𑌂𑌸𑌾 𑌚 𑌤𑌸𑍍𑌯𑌾𑌃 𑌕𑍁𑌰𑍁 𑌯𑌥𑌾𑌮𑌤𑌿 ॥ ॥
𑌶𑌤𑍍𑌰𑍁𑌘𑍍𑌨𑌶𑍍𑌚 𑌤𑌦𑌾𑌜𑍍𑌞𑌾𑌯 𑌵𑌚𑌨𑌂 𑌭𑍃𑌶𑌦𑍁𑌃𑌖𑌿𑌤𑌃 ।
𑌅𑌂𑌤𑌃𑌪𑍁𑌰𑌚𑌰𑌾𑌨𑍍𑌸𑌰𑍍𑌵𑌾𑌨𑌿𑌤𑍍𑌯𑍁𑌵𑌾𑌚 𑌧𑍃𑌤 𑌵𑍍𑌰𑌤𑌃 ॥ 10 ॥
𑌤𑍀𑌵𑍍𑌰𑌮𑍁𑌤𑍍𑌪𑌾𑌦𑌿𑌤𑌂 𑌦𑍁𑌃𑌖𑌂 𑌭𑍍𑌰𑌾𑌤𑍍𑌰𑍂𑌣𑌾𑌂 𑌮𑍇 𑌤𑌥𑌾 𑌪𑌿𑌤𑍁𑌃 ।
𑌯𑌯𑌾 𑌸𑍇𑌯𑌂 𑌨𑍃𑌶𑌂𑌸𑌸𑍍𑌯 𑌕𑌰𑍍𑌮𑌣𑌃 𑌫𑌲𑌮𑌶𑍍𑌨𑍁𑌤𑌾𑌮𑍍 ॥ 11 ॥
𑌏𑌵𑌮𑍁𑌕𑍍𑌤𑍍𑌵𑌾 𑌤𑍁 𑌤𑍇𑌨𑌾𑌶𑍁 𑌸𑌖𑍀𑌜𑌨𑌸𑌮𑌾𑌵𑍃𑌤𑌾 ।
𑌗𑍃𑌹𑍀𑌤𑌾 𑌬𑌲𑌵𑌤𑍍𑌕𑍁𑌬𑍍𑌜𑌾 𑌸𑌾 𑌤𑌦𑍍𑌗𑍃𑌹𑌮𑌨𑌾𑌦𑌯𑌤𑍍 ॥ 12 ॥
𑌤𑌤 𑌸𑍍𑌸𑍁𑌭𑍃𑌶𑌸𑌂𑌤𑌪𑍍𑌤𑌸𑍍𑌤𑌸𑍍𑌯𑌾 𑌸𑍍𑌸𑌰𑍍𑌵 𑌸𑍍𑌸𑌖𑍀𑌜𑌨𑌃 ।
𑌕𑍍𑌰𑍁𑌦𑍍𑌧𑌮𑌾𑌜𑍍𑌞𑌾𑌯 𑌶𑌤𑍍𑌰𑍁𑌘𑍍𑌨𑌂 𑌵𑌿𑌪𑌲𑌾𑌯𑌤 𑌸𑌰𑍍𑌵𑌶𑌃 ॥ 13 ॥
𑌆𑌮𑌂𑌤𑍍𑌰𑌯𑌤 𑌕𑍃𑌤𑍍𑌸𑍍𑌨 𑌶𑍍𑌚 𑌤𑌸𑍍𑌯𑌾 𑌸𑍍𑌸𑌰𑍍𑌵 𑌸𑍍𑌸𑌖𑍀𑌜𑌨𑌃 ।
𑌯𑌥𑌾𑌽𑌯𑌂 𑌸𑌮𑍁𑌪𑌕𑍍𑌰𑌾𑌂𑌤𑍋 𑌨𑌿𑌶𑍍𑌶𑍇𑌷𑌾𑌂 𑌨𑌃 𑌕𑌰𑌿𑌷𑍍𑌯𑌤𑌿 ॥ 14 ॥
𑌸𑌾𑌨𑍁𑌕𑍍𑌰𑍋𑌶𑌾𑌂 𑌵𑌦𑌾𑌨𑍍𑌯𑌾𑌂 𑌚 𑌧𑌰𑍍𑌮𑌜𑍍𑌞𑌾𑌂 𑌚 𑌯𑌶𑌸𑍍𑌵𑌿𑌨𑍀𑌮𑍍 ।
𑌕𑍌𑌸𑌲𑍍𑌯𑌾𑌂 𑌶𑌰𑌣𑌂 𑌯𑌾𑌮 𑌸𑌾 𑌹𑌿 𑌨𑍋𑌽𑌸𑍍𑌤𑍁 𑌧𑍍𑌰𑍁𑌵𑌾 𑌗𑌤𑌿𑌃 ॥ 15 ॥
𑌸 𑌚 𑌰𑍋𑌷𑍇𑌣 𑌤𑌾𑌮𑍍𑌰𑌾𑌕𑍍𑌷 𑌶𑍍𑌶𑌤𑍍𑌰𑍁𑌘𑍍𑌨 𑌶𑍍𑌶𑌤𑍍𑌰𑍁𑌤𑌾𑌪𑌨𑌃 ।
𑌵𑌿𑌚𑌕𑌰𑍍𑌷 𑌤𑌦𑌾 𑌕𑍁𑌬𑍍𑌜𑌾𑌂 𑌕𑍍𑌰𑍋𑌶𑌂𑌤𑍀𑌂 𑌧𑌰𑌣𑍀𑌤𑌲𑍇 ॥ 16 ॥
𑌤𑌸𑍍𑌯𑌾 𑌹𑍍𑌯𑌾𑌕𑍃𑌷𑍍𑌯𑌮𑌾𑌣𑌾𑌯𑌾 𑌮𑌂𑌥𑌰𑌾𑌯𑌾 𑌸𑍍𑌤𑌤𑌸𑍍𑌤𑌤𑌃 ।
𑌚𑌿𑌤𑍍𑌰𑌂 𑌬𑌹𑍁𑌵𑌿𑌧𑌂 𑌭𑌾𑌂𑌡𑌂 𑌪𑍃𑌥𑌿𑌵𑍍𑌯𑌾𑌂 𑌤𑌦𑍍𑌵𑍍𑌯𑌶𑍀𑌰𑍍𑌯𑌤 ॥ 1 ॥
𑌤𑍇𑌨 𑌭𑌾𑌂𑌡𑍇𑌨 𑌸𑌂𑌸𑍍𑌤𑍀𑌰𑍍𑌣𑌂 𑌶𑍍𑌰𑍀𑌮𑌦𑍍𑌰𑌾𑌜𑌨𑌿𑌵𑍇𑌶𑌨𑌮𑍍 ।
𑌅𑌶𑍋𑌭𑌤 𑌤𑌦𑌾 𑌭𑍂𑌯𑌃 𑌶𑌾𑌰𑌦𑌂 𑌗𑌗𑌨𑌂 𑌯𑌥𑌾 ॥ 1 ॥
𑌸 𑌬𑌲𑍀 𑌬𑌲𑌵𑌤𑍍𑌕𑍍𑌰𑍋𑌧𑌾𑌦𑍍𑌗𑍃𑌹𑍀𑌤𑍍𑌵𑌾 𑌪𑍁𑌰𑍁𑌷𑌰𑍍𑌷𑌭𑌃 ।
𑌕𑍈𑌕𑍇𑌯𑍀𑌮𑌭𑌿𑌨𑌿𑌰𑍍𑌭𑌰𑍍𑌤𑍍𑌸𑍍𑌯 𑌬𑌭𑌾𑌷𑍇 𑌪𑌰𑍁𑌷𑌂 𑌵𑌚𑌃 ॥ 1 ॥
𑌤𑍈𑌰𑍍𑌵𑌾𑌕𑍍𑌯𑍈𑌃 𑌪𑌰𑍁𑌷𑍈𑌰𑍍𑌦𑍁𑌃𑌖𑍈𑌃 𑌕𑍈𑌕𑍇𑌯𑍀 𑌭𑍃𑌶𑌦𑍁𑌃𑌖𑌿𑌤𑌾 ।
𑌶𑌤𑍍𑌰𑍁𑌘𑍍𑌨𑌭𑌯𑌸𑌂𑌤𑍍𑌰𑌸𑍍𑌤𑌾 𑌪𑍁𑌤𑍍𑌰𑌂 𑌶𑌰𑌣𑌮𑌾𑌗𑌤𑌾 ॥ 20 ॥
𑌤𑌂 𑌪𑍍𑌰𑍇𑌕𑍍𑌷𑍍𑌯 𑌭𑌰𑌤𑌃 𑌕𑍍𑌰𑍁𑌦𑍍𑌧𑌂 𑌶𑌤𑍍𑌰𑍁𑌘𑍍𑌨𑌮𑌿𑌦𑌮𑌬𑍍𑌰𑌵𑍀𑌤𑍍 ।
𑌅𑌵𑌧𑍍𑌯𑌾 𑌸𑍍𑌸𑌰𑍍𑌵𑌭𑍂𑌤𑌾𑌨𑌾𑌂 𑌪𑍍𑌰𑌮𑌦𑌾𑌃 𑌕𑍍𑌷𑌮𑍍𑌯𑌤𑌾𑌮𑌿𑌤𑌿 ॥ 21 ॥
𑌹𑌨𑍍𑌯𑌾𑌮𑌹𑌮𑌿𑌮𑌾𑌂 𑌪𑌾𑌪𑌾𑌂 𑌕𑍈𑌕𑍇𑌯𑍀𑌂 𑌦𑍁𑌷𑍍𑌟𑌚𑌾𑌰𑌿𑌣𑍀𑌮𑍍 ।
𑌯𑌦𑌿 𑌮𑌾𑌂 𑌧𑌾𑌰𑍍𑌮𑌿𑌕𑍋 𑌰𑌾𑌮𑍋 𑌨𑌾𑌸𑍂𑌯𑍇𑌨𑍍𑌮𑌾𑌤𑍃𑌘𑌾𑌤𑌕𑌮𑍍 ॥ 22 ॥
𑌇𑌮𑌾𑌮𑌪𑌿 𑌹𑌤𑌾𑌂 𑌕𑍁𑌬𑍍𑌜𑌾𑌂 𑌯𑌦𑌿 𑌜𑌾𑌨𑌾𑌤𑌿 𑌰𑌾𑌘𑌵𑌃 ।
𑌤𑍍𑌵𑌾𑌂 𑌚 𑌮𑌾𑌂 𑌚 𑌹𑌿 𑌧𑌰𑍍𑌮𑌾𑌤𑍍𑌮𑌾 𑌨𑌾𑌭𑌿𑌭𑌾𑌷𑌿𑌷𑍍𑌯𑌤𑍇 𑌧𑍍𑌰𑍁𑌵𑌮𑍍 ॥ 23 ॥
𑌭𑌰𑌤𑌸𑍍𑌯 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌶𑌤𑍍𑌰𑍁𑌘𑍍𑌨𑍋 𑌲𑌕𑍍𑌷𑍍𑌮𑌣𑌾𑌨𑍁𑌜𑌃 ।
𑌨𑍍𑌯𑌵𑌰𑍍𑌤𑌤 𑌤𑌤𑍋 𑌰𑍋𑌷𑌾𑌤𑍍𑌤𑌾𑌂 𑌮𑍁𑌮𑍋𑌚 𑌚 𑌮𑌂𑌥𑌰𑌾𑌮𑍍 ॥ 24 ॥
𑌸𑌾 𑌪𑌾𑌦𑌮𑍂𑌲𑍇 𑌕𑍈𑌕𑍇𑌯𑍍𑌯𑌾 𑌮𑌂𑌥𑌰𑌾 𑌨𑌿𑌪𑌪𑌾𑌤 𑌹 ।
𑌨𑌿𑌶𑍍𑌶𑍍𑌵𑌸𑌂𑌤𑍀 𑌸𑍁𑌦𑍁𑌃𑌖𑌾𑌰𑍍𑌤𑌾 𑌕𑍃𑌪𑌣𑌂 𑌵𑌿𑌲𑌲𑌾𑌪 𑌚 ॥ 25 ॥
𑌶𑌤𑍍𑌰𑍁𑌘𑍍𑌨𑌵𑌿𑌕𑍍𑌷𑍇𑌪𑌵𑌿𑌮𑍂𑌢𑌸𑌂𑌜𑍍𑌞𑌾𑌂 𑌸𑌮𑍀𑌕𑍍𑌷𑍍𑌯 𑌕𑍁𑌬𑍍𑌜𑌾𑌂 𑌭𑌰𑌤𑌸𑍍𑌯 𑌮𑌾𑌤𑌾 ।
𑌶𑌨𑍈𑌸𑍍𑌸𑌮𑌾𑌶𑍍𑌵𑌾𑌸𑌯𑌦𑌾𑌰𑍍𑌤𑌰𑍂𑌪𑌾𑌂 𑌕𑍍𑌰𑍌𑌂𑌚𑍀𑌂 𑌵𑌿𑌲𑌗𑍍𑌨𑌾𑌮𑌿𑌵 𑌵𑍀𑌕𑍍𑌷𑌮𑌾𑌣𑌾𑌮𑍍 ॥ 26 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌅𑌷𑍍𑌟𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
