𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ।
𑌅𑌵𑌧𑍂𑌯 𑌚 𑌤𑌾𑌂 𑌬𑍁𑌦𑍍𑌧𑌿𑌂 𑌬𑌭𑍂𑌵𑌾𑌵𑌸𑍍𑌥𑌿𑌤𑌸𑍍𑌤𑌦𑌾 ।
𑌜𑌗𑌾𑌮 𑌚𑌾𑌪𑌰𑌾𑌂 𑌚𑌿𑌂𑌤𑌾𑌂 𑌸𑍀𑌤𑌾𑌂 𑌪𑍍𑌰𑌤𑌿 𑌮𑌹𑌾𑌕𑌪𑌿𑌃 ॥ 1 ॥
𑌨 𑌰𑌾𑌮𑍇𑌣 𑌵𑌿𑌯𑍁𑌕𑍍𑌤𑌾 𑌸𑌾 𑌸𑍍𑌵𑌪𑍍𑌤𑍁𑌮𑌰𑍍𑌹𑌤𑌿 𑌭𑌾𑌮𑌿𑌨𑍀 ।
𑌨 𑌭𑍋𑌕𑍍𑌤𑍁𑌂 𑌵𑌾𑌪𑍍𑌯𑌲𑌂𑌕𑌰𑍍𑌤𑍁𑌂 𑌨 𑌪𑌾𑌨𑌮𑍁𑌪𑌸𑍇𑌵𑌿𑌤𑍁𑌮𑍍 ॥ 2 ॥
𑌨𑌾𑌨𑍍𑌯𑌂 𑌨𑌰𑌮𑍁𑌪𑌸𑍍𑌥𑌾𑌤𑍁𑌂 𑌸𑍁𑌰𑌾𑌣𑌾𑌮𑌪𑌿 𑌚𑍇𑌶𑍍𑌵𑌰𑌮𑍍 ।
𑌨 𑌹𑌿 𑌰𑌾𑌮𑌸𑌮𑌃 𑌕𑌶𑍍𑌚𑌿𑌦𑍍𑌵𑌿𑌦𑍍𑌯𑌤𑍇 𑌤𑍍𑌰𑌿𑌦𑌶𑍇𑌷𑍍𑌵𑌪𑌿 ॥ 3 ॥
𑌅𑌨𑍍𑌯𑍇𑌯𑌮𑌿𑌤𑌿 𑌨𑌿𑌶𑍍𑌚𑌿𑌤𑍍𑌯 𑌪𑌾𑌨𑌭𑍂𑌮𑍌 𑌚𑌚𑌾𑌰 𑌸𑌃 ।
𑌕𑍍𑌰𑍀𑌡𑌿𑌤𑍇𑌨𑌾𑌪𑌰𑌾𑌃 𑌕𑍍𑌲𑌾𑌂𑌤𑌾 𑌗𑍀𑌤𑍇𑌨 𑌚 𑌤𑌥𑌾𑌽𑌪𑌰𑌾𑌃 ॥ 4 ॥
𑌨𑍃𑌤𑍍𑌤𑍇𑌨 𑌚𑌾𑌪𑌰𑌾𑌃 𑌕𑍍𑌲𑌾𑌂𑌤𑌾𑌃 𑌪𑌾𑌨𑌵𑌿𑌪𑍍𑌰𑌹𑌤𑌾𑌸𑍍𑌤𑌥𑌾 ।
𑌮𑍁𑌰𑌜𑍇𑌷𑍁 𑌮𑍃𑌦𑌂𑌗𑍇𑌷𑍁 𑌪𑍀𑌠𑌿𑌕𑌾𑌸𑍁 𑌚 𑌸𑌂𑌸𑍍𑌥𑌿𑌤𑌾𑌃 ॥ 5 ॥
𑌤𑌥𑌾𑌽𑌽𑌸𑍍𑌤𑌰𑌣𑌮𑍁𑌖𑍍𑌯𑍇𑌷𑍁 𑌸𑌂𑌵𑌿𑌷𑍍𑌟𑌾𑌶𑍍𑌚𑌾𑌪𑌰𑌾𑌃 𑌸𑍍𑌤𑍍𑌰𑌿𑌯𑌃 ।
𑌅𑌂𑌗𑌨𑌾𑌨𑌾𑌂 𑌸𑌹𑌸𑍍𑌰𑍇𑌣 𑌭𑍂𑌷𑌿𑌤𑍇𑌨 𑌵𑌿𑌭𑍂𑌷𑌣𑍈𑌃 ॥ 6 ॥
𑌰𑍂𑌪𑌸𑌲𑍍𑌲𑌾𑌪𑌶𑍀𑌲𑍇𑌨 𑌯𑍁𑌕𑍍𑌤𑌗𑍀𑌤𑌾𑌰𑍍𑌥𑌭𑌾𑌷𑌿𑌣𑌾 ।
𑌦𑍇𑌶𑌕𑌾𑌲𑌾𑌭𑌿𑌯𑍁𑌕𑍍𑌤𑍇𑌨 𑌯𑍁𑌕𑍍𑌤𑌵𑌾𑌕𑍍𑌯𑌾𑌭𑌿𑌧𑌾𑌯𑌿𑌨𑌾 ॥ ॥
𑌰𑌤𑌾𑌭𑌿𑌰𑌤𑌸𑌂𑌸𑍁𑌪𑍍𑌤𑌂 𑌦𑌦𑌰𑍍𑌶 𑌹𑌰𑌿𑌯𑍂𑌥𑌪𑌃 ।
𑌤𑌾𑌸𑌾𑌂 𑌮𑌧𑍍𑌯𑍇 𑌮𑌹𑌾𑌬𑌾𑌹𑍁𑌃 𑌶𑍁𑌶𑍁𑌭𑍇 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ॥ ॥
𑌗𑍋𑌷𑍍𑌠𑍇 𑌮𑌹𑌤𑌿 𑌮𑍁𑌖𑍍𑌯𑌾𑌨𑌾𑌂 𑌗𑌵𑌾𑌂 𑌮𑌧𑍍𑌯𑍇 𑌯𑌥𑌾 𑌵𑍃𑌷𑌃 ।
𑌸 𑌰𑌾𑌕𑍍𑌷𑌸𑍇𑌂𑌦𑍍𑌰𑌃 𑌶𑍁𑌶𑍁𑌭𑍇 𑌤𑌾𑌭𑌿𑌃 𑌪𑌰𑌿𑌵𑍃𑌤𑌸𑍍𑌸𑍍𑌵𑌯𑌮𑍍 ॥ ॥
𑌕𑌰𑍇𑌣𑍁𑌭𑌿𑌰𑍍𑌯𑌥𑌾𑌽𑌰𑌣𑍍𑌯𑍇 𑌪𑌰𑌿𑌕𑍀𑌰𑍍𑌣𑍋 𑌮𑌹𑌾𑌦𑍍𑌵𑌿𑌪𑌃 ।
𑌸𑌰𑍍𑌵𑌕𑌾𑌮𑍈𑌰𑍁𑌪𑍇𑌤𑌾𑌂 𑌚 𑌪𑌾𑌨𑌭𑍂𑌮𑌿𑌂 𑌮𑌹𑌾𑌤𑍍𑌮𑌨𑌃 ॥ 10 ॥
𑌦𑌦𑌰𑍍𑌶 𑌹𑌰𑌿𑌶𑌾𑌰𑍍𑌦𑍂𑌲𑌸𑍍𑌤𑌸𑍍𑌯 𑌰𑌕𑍍𑌷𑌃𑌪𑌤𑍇𑌰𑍍𑌗𑍃𑌹𑍇 ।
𑌮𑍃𑌗𑌾𑌣𑌾𑌂 𑌮𑌹𑌿𑌷𑌾𑌣𑌾𑌂 𑌚 𑌵𑌰𑌾𑌹𑌾𑌣𑌾𑌂 𑌚 𑌭𑌾𑌗𑌶𑌃 ॥ 11 ॥
𑌤𑌤𑍍𑌰 𑌨𑍍𑌯𑌸𑍍𑌤𑌾𑌨𑌿 𑌮𑌾𑌂𑌸𑌾𑌨𑌿 𑌪𑌾𑌨𑌭𑍂𑌮𑍌 𑌦𑌦𑌰𑍍𑌶 𑌸𑌃 ।
𑌰𑍌𑌕𑍍𑌮𑍇𑌷𑍁 𑌚 𑌵𑌿𑌶𑌾𑌲𑍇𑌷𑍁 𑌭𑌾𑌜𑌨𑍇𑌷𑍍𑌵𑌰𑍍𑌧𑌭𑌕𑍍𑌷𑌿𑌤𑌾𑌨𑍍 ॥ 12 ॥
𑌦𑌦𑌰𑍍𑌶 𑌹𑌰𑌿𑌶𑌾𑌰𑍍𑌦𑍂𑌲𑍋 𑌮𑌯𑍂𑌰𑌾𑌨𑍍 𑌕𑍁𑌕𑍍𑌕𑍁𑌟𑌾𑌂𑌸𑍍𑌤𑌥𑌾 ।
𑌵𑌰𑌾𑌹𑌵𑌾𑌰𑍍𑌧𑍍𑌰𑌾𑌣𑌸𑌕𑌾𑌨𑍍 𑌦𑌧𑌿𑌸𑍌𑌵𑌰𑍍𑌚𑌲𑌾𑌯𑍁𑌤𑌾𑌨𑍍 ॥ 13 ॥
𑌶𑌲𑍍𑌯𑌾𑌨𑍍 𑌮𑍃𑌗𑌮𑌯𑍂𑌰𑌾𑌂𑌶𑍍𑌚 𑌹𑌨𑍁𑌮𑌾𑌨𑌨𑍍𑌵𑌵𑍈𑌕𑍍𑌷𑌤 ।
𑌕𑍍𑌰𑌕𑌰𑌾𑌨𑍍𑌵𑌿𑌵𑌿𑌧𑌾𑌨𑍍 𑌸𑌿𑌦𑍍𑌧𑌾𑌂𑌶𑍍𑌚𑌕𑍋𑌰𑌾𑌨𑌰𑍍𑌧𑌭𑌕𑍍𑌷𑌿𑌤𑌾𑌨𑍍 ॥ 14 ॥
𑌮𑌹𑌿𑌷𑌾𑌨𑍇𑌕𑌶𑌲𑍍𑌯𑌾𑌂𑌶𑍍𑌚 𑌛𑌾𑌗𑌾𑌂𑌶𑍍𑌚 𑌕𑍃𑌤𑌨𑌿𑌷𑍍𑌠𑌿𑌤𑌾𑌨𑍍 ।
𑌲𑍇𑌹𑍍𑌯𑌾𑌨𑍁𑌚𑍍𑌚𑌾𑌵𑌚𑌾𑌨𑍍𑌪𑍇𑌯𑌾𑌨𑍍 𑌭𑍋𑌜𑍍𑌯𑌾𑌨𑌿 𑌵𑌿𑌵𑌿𑌧𑌾𑌨𑌿 𑌚 ॥ 15 ॥
𑌤𑌥𑌾𑌽𑌽𑌮𑍍𑌲𑌲𑌵𑌣𑍋𑌤𑍍𑌤𑌂𑌸𑍈𑌰𑍍𑌵𑌿𑌵𑌿𑌧𑍈𑌰𑌾𑌗𑌷𑌾𑌡𑌬𑍈𑌃 ।
𑌹𑌾𑌰𑌨𑍂𑌪𑍁𑌰𑌕𑍇𑌯𑍂𑌰𑍈𑌰𑌪𑌵𑌿𑌦𑍍𑌧𑍈𑌰𑍍𑌮𑌹𑌾𑌧𑌨𑍈𑌃 ॥ 16 ॥
𑌪𑌾𑌨𑌭𑌾𑌜𑌨𑌵𑌿𑌕𑍍𑌷𑌿𑌪𑍍𑌤𑍈𑌃 𑌫𑌲𑍈𑌶𑍍𑌚 𑌵𑌿𑌵𑌿𑌧𑍈𑌰𑌪𑌿 ।
𑌕𑍃𑌤𑌪𑍁𑌷𑍍𑌪𑍋𑌪𑌹𑌾𑌰𑌾 𑌭𑍂𑌰𑌧𑌿𑌕𑌂 𑌪𑍁𑌷𑍍𑌯𑌤𑌿 𑌶𑍍𑌰𑌿𑌯𑌮𑍍 ॥ 1 ॥
𑌤𑌤𑍍𑌰 𑌤𑌤𑍍𑌰 𑌚 𑌵𑌿𑌨𑍍𑌯𑌸𑍍𑌤𑍈𑌃 𑌸𑍁𑌶𑍍𑌲𑌿𑌷𑍍𑌟𑍈𑌶𑍍𑌶𑌯𑌨𑌾𑌸𑌨𑍈𑌃 ।
𑌪𑌾𑌨𑌭𑍂𑌮𑌿𑌰𑍍𑌵𑌿𑌨𑌾 𑌵𑌹𑍍𑌨𑌿𑌂 𑌪𑍍𑌰𑌦𑍀𑌪𑍍𑌤𑍇𑌵𑍋𑌪𑌲𑌕𑍍𑌷𑍍𑌯𑌤𑍇 ॥ 1 ॥
𑌬𑌹𑍁𑌪𑍍𑌰𑌕𑌾𑌰𑍈𑌰𑍍𑌵𑌿𑌵𑌿𑌧𑍈𑌰𑍍𑌵𑌰𑌸𑌂𑌸𑍍𑌕𑌾𑌰𑌸𑌂𑌸𑍍𑌕𑍃𑌤𑍈𑌃 ।
𑌮𑌾𑌂𑌸𑍈𑌃 𑌕𑍁𑌶𑌲𑌸𑌂𑌪𑍃𑌕𑍍𑌤𑍈𑌃 𑌪𑌾𑌨𑌭𑍂𑌮𑌿𑌗𑌤𑍈𑌃 𑌪𑍃𑌥𑌕𑍍 ॥ 1 ॥
𑌦𑌿𑌵𑍍𑌯𑌾𑌃 𑌪𑍍𑌰𑌸𑌨𑍍𑌨𑌾 𑌵𑌿𑌵𑌿𑌧𑌾𑌃 𑌸𑍁𑌰𑌾𑌃 𑌕𑍃𑌤𑌸𑍁𑌰𑌾 𑌅𑌪𑌿 ।
𑌶𑌰𑍍𑌕𑌰𑌾𑌽𑌸𑌵𑌮𑌾𑌧𑍍𑌵𑍀𑌕𑌪𑍁𑌷𑍍𑌪𑌾𑌸𑌵𑌫𑌲𑌾𑌸𑌵𑌾𑌃 ॥ 20 ॥
𑌵𑌾𑌸𑌚𑍂𑌰𑍍𑌣𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌮𑍃𑌷𑍍𑌟𑌾𑌸𑍍𑌤𑍈𑌸𑍍𑌤𑍈𑌃 𑌪𑍃𑌥𑌕𑍍 𑌪𑍃𑌥𑌕𑍍 ।
𑌸𑌂𑌤𑌤𑌾 𑌶𑍁𑌶𑍁𑌭𑍇 𑌭𑍂𑌮𑌿𑌰𑍍𑌮𑌾𑌲𑍍𑌯𑍈𑌶𑍍𑌚 𑌬𑌹𑍁𑌸𑌂𑌸𑍍𑌥𑌿𑌤𑍈𑌃 ॥ 21 ॥
𑌹𑌿𑌰𑌣𑍍𑌮𑌯𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌭𑌾𑌜𑌨𑍈𑌃 𑌸𑍍𑌫𑌾𑌟𑌿𑌕𑍈𑌰𑌪𑌿 ।
𑌜𑌾𑌂𑌬𑍂𑌨𑌦𑌮𑌯𑍈𑌶𑍍𑌚𑌾𑌨𑍍𑌯𑍈𑌃 𑌕𑌰𑌕𑍈𑌰𑌭𑌿𑌸𑌂𑌵𑍃𑌤𑌾 ॥ 22 ॥
𑌰𑌾𑌜𑌤𑍇𑌷𑍁 𑌚 𑌕𑍁𑌂𑌭𑍇𑌷𑍁 𑌜𑌾𑌂𑌬𑍂𑌨𑌦𑌮𑌯𑍇𑌷𑍁 𑌚 ।
𑌪𑌾𑌨𑌶𑍍𑌰𑍇𑌷𑍍𑌠𑌂 𑌤𑌦𑌾 𑌭𑍂𑌰𑌿 𑌕𑌪𑌿𑌸𑍍𑌤𑌤𑍍𑌰 𑌦𑌦𑌰𑍍𑌶 𑌹 ॥ 23 ॥
𑌸𑍋𑌽𑌪𑌶𑍍𑌯𑌚𑍍𑌛𑌾𑌤𑌕𑍁𑌂𑌭𑌾𑌨𑌿 𑌸𑍀𑌧𑍋𑌰𑍍𑌮𑌣𑌿𑌮𑌯𑌾𑌨𑌿 𑌚 ।
𑌰𑌾𑌜𑌤𑌾𑌨𑌿 𑌚 𑌪𑍂𑌰𑍍𑌣𑌾𑌨𑌿 𑌭𑌾𑌜𑌨𑌾𑌨𑌿 𑌮𑌹𑌾𑌕𑌪𑌿𑌃 ॥ 24 ॥
𑌕𑍍𑌵𑌚𑌿𑌦𑌲𑍍𑌪𑌾𑌵𑌶𑍇𑌷𑌾𑌣𑌿 𑌕𑍍𑌵𑌚𑌿𑌤𑍍𑌪𑍀𑌤𑌾𑌨𑌿 𑌸𑌰𑍍𑌵𑌶𑌃 ।
𑌕𑍍𑌵𑌚𑌿𑌨𑍍𑌨𑍈𑌵 𑌪𑍍𑌰𑌪𑍀𑌤𑌾𑌨𑌿 𑌪𑌾𑌨𑌾𑌨𑌿 𑌸 𑌦𑌦𑌰𑍍𑌶 𑌹 ॥ 25 ॥
𑌕𑍍𑌵𑌚𑌿𑌦𑍍 𑌭𑌕𑍍𑌷𑍍𑌯𑌾𑌂𑌶𑍍𑌚 𑌵𑌿𑌵𑌿𑌧𑌾𑌨𑍍 𑌕𑍍𑌵𑌚𑌿𑌤𑍍𑌪𑌾𑌨𑌾𑌨𑌿 𑌭𑌾𑌗𑌶𑌃 ।
𑌕𑍍𑌵𑌚𑌿𑌦𑌨𑍍𑌨𑌾𑌵𑌶𑍇𑌷𑌾𑌣𑌿 𑌪𑌶𑍍𑌯𑌨𑍍𑌵𑍈 𑌵𑌿𑌚𑌚𑌾𑌰 𑌹 ॥ 26 ॥
𑌕𑍍𑌵𑌚𑌿𑌤𑍍𑌪𑍍𑌰𑌭𑌿𑌨𑍍𑌨𑍈𑌃 𑌕𑌰𑌕𑍈𑌃 𑌕𑍍𑌵𑌚𑌿𑌦𑌾𑌲𑍋𑌲𑌿𑌤𑍈𑌰𑍍𑌘𑌟𑍈𑌃 ।
𑌕𑍍𑌵𑌚𑌿𑌤𑍍𑌸𑌂𑌪𑍃𑌕𑍍𑌤𑌮𑌾𑌲𑍍𑌯𑌾𑌨𑌿 𑌜𑌲𑌾𑌨𑌿 𑌚 𑌫𑌲𑌾𑌨𑌿 𑌚 ॥ 2 ॥
𑌶𑌯𑌨𑌾𑌨𑍍𑌯𑌤𑍍𑌰 𑌨𑌾𑌰𑍀𑌣𑌾𑌂 𑌶𑍁𑌭𑍍𑌰𑌾𑌣𑌿 𑌬𑌹𑍁𑌧𑌾 𑌪𑍁𑌨𑌃 ।
𑌪𑌰𑌸𑍍𑌪𑌰𑌂 𑌸𑌮𑌾𑌶𑍍𑌲𑌿𑌷𑍍𑌯 𑌕𑌾𑌶𑍍𑌚𑌿𑌤𑍍𑌸𑍁𑌪𑍍𑌤𑌾 𑌵𑌰𑌾𑌂𑌗𑌨𑌾𑌃 ॥ 2 ॥
𑌕𑌾𑌶𑍍𑌚𑌿𑌚𑍍𑌚 𑌵𑌸𑍍𑌤𑍍𑌰𑌮𑌨𑍍𑌯𑌸𑍍𑌯𑌾𑌸𑍍𑌸𑍍𑌵𑌪𑌂𑌤𑍍𑌯𑌾𑌃 𑌪𑌰𑌿𑌧𑌾𑌯 𑌚 ।
𑌆𑌹𑍃𑌤𑍍𑌯 𑌚𑌾𑌬𑌲𑌾𑌃 𑌸𑍁𑌪𑍍𑌤𑌾 𑌨𑌿𑌦𑍍𑌰𑌾𑌬𑌲𑌪𑌰𑌾𑌜𑌿𑌤𑌾𑌃 ॥ 2 ॥
𑌤𑌾𑌸𑌾𑌮𑍁𑌚𑍍𑌛𑌵𑌾𑌸𑌵𑌾𑌤𑍇𑌨 𑌵𑌸𑍍𑌤𑍍𑌰𑌂 𑌮𑌾𑌲𑍍𑌯𑌂 𑌚 𑌗𑌾𑌤𑍍𑌰𑌜𑌮𑍍 ।
𑌨𑌾𑌤𑍍𑌯𑌰𑍍𑌥𑌂 𑌸𑍍𑌪𑌂𑌦𑌤𑍇 𑌚𑌿𑌤𑍍𑌰𑌂 𑌪𑍍𑌰𑌾𑌪𑍍𑌯 𑌮𑌂𑌦𑌮𑌿𑌵𑌾𑌨𑌿𑌲𑌮𑍍 ॥ 30 ॥
𑌚𑌂𑌦𑌨𑌸𑍍𑌯 𑌚 𑌶𑍀𑌤𑌸𑍍𑌯 𑌶𑍀𑌧𑍋𑌰𑍍𑌮𑌧𑍁𑌰𑌸𑌸𑍍𑌯 𑌚 ।
𑌵𑌿𑌵𑌿𑌧𑌸𑍍𑌯 𑌚 𑌮𑌾𑌲𑍍𑌯𑌸𑍍𑌯 𑌧𑍂𑌪𑌸𑍍𑌯 𑌵𑌿𑌵𑌿𑌧𑌸𑍍𑌯 𑌚 ॥ 31 ॥
𑌬𑌹𑍁𑌧𑌾 𑌮𑌾𑌰𑍁𑌤𑌸𑍍𑌤𑌤𑍍𑌰 𑌗𑌂𑌧𑌂 𑌵𑌿𑌵𑌿𑌧𑌮𑍁𑌦𑍍𑌵𑌹𑌨𑍍 ।
𑌸𑍍𑌨𑌾𑌨𑌾𑌨𑌾𑌂 𑌚𑌂𑌦𑌨𑌾𑌨𑌾𑌂 𑌚 𑌧𑍂𑌪𑌾𑌨𑌾𑌂 𑌚𑍈𑌵 𑌮𑍂𑌰𑍍𑌛𑌿𑌤𑌃 ॥ 32 ॥
𑌪𑍍𑌰𑌵𑌵𑍌 𑌸𑍁𑌰𑌭𑌿𑌰𑍍𑌗𑌂𑌧𑍋 𑌵𑌿𑌮𑌾𑌨𑍇 𑌪𑍁𑌷𑍍𑌪𑌕𑍇 𑌤𑌦𑌾 ।
𑌶𑍍𑌯𑌾𑌮𑌾𑌵𑌦𑌾𑌤𑌾𑌸𑍍𑌤𑌤𑍍𑌰𑌾𑌨𑍍𑌯𑌾𑌃 𑌕𑌾𑌶𑍍𑌚𑌿𑌤𑍍𑌕𑍃𑌷𑍍𑌣𑌾 𑌵𑌰𑌾𑌂𑌗𑌨𑌾𑌃 ॥ 33 ॥
𑌕𑌾𑌶𑍍𑌚𑌿𑌤𑍍 𑌕𑌾𑌂𑌚𑌨𑌵𑌰𑍍𑌣𑌾𑌂𑌗𑍍𑌯𑌃 𑌪𑍍𑌰𑌮𑌦𑌾 𑌰𑌾𑌕𑍍𑌷𑌸𑌾𑌲𑌯𑍇 ।
𑌤𑌾𑌸𑌾𑌂 𑌨𑌿𑌦𑍍𑌰𑌾𑌵𑌶𑌤𑍍𑌵𑌾𑌚𑍍𑌚 𑌮𑌦𑌨𑍇𑌨 𑌵𑌿𑌮𑍂𑌰𑍍𑌛𑌿𑌤𑌮𑍍 ॥ 34 ॥
𑌪𑌦𑍍𑌮𑌿𑌨𑍀𑌨𑌾𑌂 𑌪𑍍𑌰𑌸𑍁𑌪𑍍𑌤𑌾𑌨𑌾𑌂 𑌰𑍂𑌪𑌮𑌾𑌸𑍀𑌦𑍍𑌯𑌥𑍈𑌵 𑌹𑌿 ।
𑌏𑌵𑌂 𑌸𑌰𑍍𑌵𑌮𑌶𑍇𑌷𑍇𑌣 𑌰𑌾𑌵𑌣𑌾𑌂𑌤𑌃 𑌪𑍁𑌰𑌂 𑌕𑌪𑌿𑌃 ॥ 35 ॥
𑌦𑌦𑌰𑍍𑌶 𑌸𑍁𑌮𑌹𑌾𑌤𑍇𑌜𑌾𑌃 𑌨 𑌦𑌦𑌰𑍍𑌶 𑌚 𑌜𑌾𑌨𑌕𑍀𑌮𑍍 ।
𑌨𑌿𑌰𑍀𑌕𑍍𑌷𑌮𑌾𑌣𑌶𑍍𑌚 𑌤𑌦𑌾 𑌤𑌾𑌃 𑌸𑍍𑌤𑍍𑌰𑌿𑌯𑌃 𑌸 𑌮𑌹𑌾𑌕𑌪𑌿𑌃 ॥ 36 ॥
𑌜𑌗𑌾𑌮 𑌮𑌹𑌤𑍀𑌂 𑌚𑌿𑌂𑌤𑌾𑌂 𑌧𑌰𑍍𑌮𑌸𑌾𑌧𑍍𑌵𑌸𑌶𑌂𑌕𑌿𑌤𑌃 ।
𑌪𑌰𑌦𑌾𑌰𑌾𑌵𑌰𑍋𑌧𑌸𑍍𑌯 𑌪𑍍𑌰𑌸𑍁𑌪𑍍𑌤𑌸𑍍𑌯 𑌨𑌿𑌰𑍀𑌕𑍍𑌷𑌣𑌮𑍍 ॥ 3 ॥
𑌇𑌦𑌂 𑌖𑌲𑍁 𑌮𑌮𑌾𑌤𑍍𑌯𑌰𑍍𑌥𑌂 𑌧𑌰𑍍𑌮𑌲𑍋𑌪𑌂 𑌕𑌰𑌿𑌷𑍍𑌯𑌤𑌿 ।
𑌨 𑌹𑌿 𑌮𑍇 𑌪𑌰𑌦𑌾𑌰𑌾𑌣𑌾𑌂 𑌦𑍃𑌷𑍍𑌟𑌿𑌰𑍍𑌵𑌿𑌷𑌯𑌵𑌰𑍍𑌤𑌿𑌨𑍀 ॥ 3 ॥
𑌅𑌯𑌂 𑌚𑌾𑌤𑍍𑌰 𑌮𑌯𑌾 𑌦𑍃𑌷𑍍𑌟𑌃 𑌪𑌰𑌦𑌾𑌰𑌾𑌪𑌰𑌿𑌗𑍍𑌰𑌹𑌃 ।
𑌤𑌸𑍍𑌯 𑌪𑍍𑌰𑌾𑌦𑍁𑌰𑌭𑍂𑌚𑍍𑌚𑌿𑌂𑌤𑌾 𑌪𑍁𑌨𑌰𑌨𑍍𑌯𑌾 𑌮𑌨𑌸𑍍𑌵𑌿𑌨𑌃 ॥ 3 ॥
𑌨𑌿𑌶𑍍𑌚𑌿𑌤𑍈𑌕𑌾𑌂𑌤𑌚𑌿𑌤𑍍𑌤𑌸𑍍𑌯 𑌕𑌾𑌰𑍍𑌯𑌨𑌿𑌶𑍍𑌚𑌯𑌦𑌰𑍍𑌶𑌿𑌨𑍀 ।
𑌕𑌾𑌮𑌂 𑌦𑍃𑌷𑍍𑌟𑌾 𑌮𑌯𑌾 𑌸𑌰𑍍𑌵𑌾 𑌵𑌿𑌶𑍍𑌵𑌸𑍍𑌤𑌾 𑌰𑌾𑌵𑌣𑌸𑍍𑌤𑍍𑌰𑌿𑌯𑌃 ॥ 40 ॥
𑌨 𑌹𑌿 𑌮𑍇 𑌮𑌨𑌸𑌃 𑌕𑌿𑌂𑌚𑌿𑌦𑍍𑌵𑍈𑌕𑍃𑌤𑍍𑌯𑌮𑍁𑌪𑌜𑌾𑌯𑌤𑍇 ।
𑌮𑌨𑍋 𑌹𑌿 𑌹𑍇𑌤𑍁𑌃 𑌸𑌰𑍍𑌵𑍇𑌷𑌾𑌮𑌿𑌂𑌦𑍍𑌰𑌿𑌯𑌾𑌣𑌾𑌂 𑌪𑍍𑌰𑌵𑌰𑍍𑌤𑌨𑍇 ॥ 41 ॥
𑌶𑍁𑌭𑌾𑌶𑍁𑌭𑌾𑌸𑍍𑌵𑌵𑌸𑍍𑌥𑌾𑌸𑍁 𑌤𑌚𑍍𑌚 𑌮𑍇 𑌸𑍁𑌵𑍍𑌯𑌵𑌸𑍍𑌥𑌿𑌤𑌮𑍍 ।
𑌨𑌾𑌨𑍍𑌯𑌤𑍍𑌰 𑌹𑌿 𑌮𑌯𑌾 𑌶𑌕𑍍𑌯𑌾 𑌵𑍈𑌦𑍇𑌹𑍀 𑌪𑌰𑌿𑌮𑌾𑌰𑍍𑌗𑌿𑌤𑍁𑌮𑍍 ॥ 42 ॥
𑌸𑍍𑌤𑍍𑌰𑌿𑌯𑍋 𑌹𑌿 𑌸𑍍𑌤𑍍𑌰𑍀𑌷𑍁 𑌦𑍃𑌶𑍍𑌯𑌂𑌤𑍇 𑌸𑌦𑌾 𑌸𑌂𑌪𑌰𑌿𑌮𑌾𑌰𑍍𑌗𑌣𑍇 ।
𑌯𑌸𑍍𑌯 𑌸𑌤𑍍𑌤𑍍𑌵𑌸𑍍𑌯 𑌯𑌾 𑌯𑍋𑌨𑌿𑌸𑍍𑌤𑌸𑍍𑌯𑌾𑌂 𑌤𑌤𑍍𑌪𑌰𑌿𑌮𑌾𑌰𑍍𑌗𑍍𑌯𑌤𑍇 ।
𑌨 𑌶𑌕𑍍𑌯𑌾 𑌪𑍍𑌰𑌮𑌦𑌾 𑌨𑌷𑍍𑌟𑌾 𑌮𑍃𑌗𑍀𑌷𑍁 𑌪𑌰𑌿𑌮𑌾𑌰𑍍𑌗𑌿𑌤𑍁𑌮𑍍 ॥ 43 ॥
𑌤𑌦𑌿𑌦𑌂 𑌮𑌾𑌰𑍍𑌗𑌿𑌤𑌂 𑌤𑌾𑌵𑌚𑍍𑌛𑍁𑌦𑍍𑌧𑍇𑌨 𑌮𑌨𑌸𑌾 𑌮𑌯𑌾 ॥ 44 ॥
𑌰𑌾𑌵𑌣𑌾𑌂𑌤𑌃𑌪𑍁𑌰𑌂 𑌸𑌰𑍍𑌵𑌂 𑌦𑍃𑌶𑍍𑌯𑌤𑍇 𑌨 𑌤𑍁 𑌜𑌾𑌨𑌕𑍀 ।
𑌦𑍇𑌵𑌗𑌂𑌧𑌰𑍍𑌵𑌕𑌨𑍍𑌯𑌾𑌶𑍍𑌚 𑌨𑌾𑌗𑌕𑌨𑍍𑌯𑌾𑌶𑍍𑌚 𑌵𑍀𑌰𑍍𑌯𑌵𑌾𑌨𑍍 ॥ 45 ॥
𑌅𑌵𑍇𑌕𑍍𑌷𑌮𑌾𑌣𑍋 𑌹𑌨𑍁𑌮𑌾𑌨𑍍𑌨𑍈𑌵𑌾𑌪𑌶𑍍𑌯𑌤 𑌜𑌾𑌨𑌕𑍀𑌮𑍍 ।
𑌤𑌾𑌮𑌪𑌶𑍍𑌯𑌨𑍍𑌕𑌪𑌿𑌸𑍍𑌤𑌤𑍍𑌰 𑌪𑌶𑍍𑌯𑌞𑍍𑌶𑍍𑌚𑌾𑌨𑍍𑌯𑌾 𑌪𑌰𑌸𑍍𑌤𑍍𑌰𑌿𑌯𑌃 ॥ 46 ॥
𑌅𑌪𑌕𑍍𑌰𑌮𑍍𑌯 𑌤𑌦𑌾 𑌵𑍀𑌰𑌃 𑌪𑍍𑌰𑌧𑍍𑌯𑌾𑌤𑍁𑌮𑍁𑌪𑌚𑌕𑍍𑌰𑌮𑍇 ।
𑌸 𑌭𑍂𑌯𑌸𑍍𑌤𑍁 𑌪𑌰𑌂 𑌶𑍍𑌰𑍀𑌮𑌾𑌨𑍍 𑌮𑌾𑌰𑍁𑌤𑌿𑌰𑍍𑌯𑌤𑍍𑌨𑌮𑌾𑌸𑍍𑌥𑌿𑌤𑌃 ॥ 4 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌏𑌕𑌾𑌦𑌶𑌸𑍍𑌸𑌰𑍍𑌗𑌃 ॥
