𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌤𑌤𑌸𑍍𑌤𑍁 𑌶𑌿𑌂𑌶𑍁𑌪𑌾𑌮𑍂𑌲𑍇 𑌜𑌾𑌨𑌕𑍀𑌂 𑌪𑌰𑍍𑌯𑍁𑌪𑌸𑍍𑌥𑌿𑌤𑌾𑌮𑍍 ।
𑌅𑌭𑌿𑌵𑌾𑌦𑍍𑌯𑌾𑌬𑍍𑌰𑌵𑍀𑌦𑍍𑌦𑌿𑌷𑍍𑌟𑍍𑌯𑌾 𑌪𑌶𑍍𑌯𑌾𑌮𑌿 𑌤𑍍𑌵𑌾𑌮𑌿𑌹𑌾𑌕𑍍𑌷𑌤𑌾𑌮𑍍 ॥ 1 ॥
𑌤𑌤𑌸𑍍𑌤𑌂 𑌪𑍍𑌰𑌸𑍍𑌥𑌿𑌤𑌂 𑌸𑍀𑌤𑌾 𑌵𑍀𑌕𑍍𑌷𑌮𑌾𑌣𑌾 𑌪𑍁𑌨𑌃 𑌪𑍁𑌨𑌃 ।
𑌭𑌰𑍍𑌤𑍃𑌸𑍍𑌨𑍇𑌹𑌾𑌨𑍍𑌵𑌿𑌤𑌂 𑌵𑌾𑌕𑍍𑌯𑌂 𑌹𑌨𑍁𑌮𑌂𑌤𑌮𑌭𑌾𑌷𑌤 ॥ 2 ॥
𑌕𑌾𑌮𑌮𑌸𑍍𑌯 𑌤𑍍𑌵𑌮𑍇𑌵𑍈𑌕𑌃 𑌕𑌾𑌰𑍍𑌯𑌸𑍍𑌯 𑌪𑌰𑌿𑌸𑌾𑌧𑌨𑍇 ।
𑌪𑌰𑍍𑌯𑌾𑌪𑍍𑌤𑌃 𑌪𑌰𑌵𑍀𑌰𑌘𑍍𑌨 𑌯𑌶𑌸𑍍𑌯𑌸𑍍𑌤𑍇 𑌬𑌲𑍋𑌦𑌯𑌃 ॥ 3 ॥
𑌶𑌰𑍈𑌸𑍍𑌤𑍁 𑌸𑌂𑌕𑍁𑌲𑌾𑌂 𑌕𑍃𑌤𑍍𑌵𑌾 𑌲𑌂𑌕𑌾𑌂 𑌪𑌰𑌬𑌲𑌾𑌰𑍍𑌦𑌨𑌃 ।
𑌮𑌾𑌂 𑌨𑌯𑍇𑌦𑍍𑌯𑌦𑌿 𑌕𑌾𑌕𑍁𑌤𑍍𑌸𑍍𑌥𑌸𑍍𑌤𑌤𑍍𑌤𑌸𑍍𑌯 𑌸𑌦𑍃𑌶𑌂 𑌭𑌵𑍇𑌤𑍍 ॥ 4 ॥
𑌤𑌦𑍍𑌯𑌥𑌾 𑌤𑌸𑍍𑌯 𑌵𑌿𑌕𑍍𑌰𑌾𑌂𑌤𑌮𑌨𑍁𑌰𑍂𑌪𑌂 𑌮𑌹𑌾𑌤𑍍𑌮𑌨𑌃 ।
𑌭𑌵𑌤𑍍𑌯𑌾𑌹𑌵𑌶𑍂𑌰𑌸𑍍𑌯 𑌤𑌥𑌾 𑌤𑍍𑌵𑌮𑍁𑌪𑌪𑌾𑌦𑌯 ॥ 5 ॥
𑌤𑌦𑌰𑍍𑌥𑍋𑌪𑌹𑌿𑌤𑌂 𑌵𑌾𑌕𑍍𑌯𑌂 𑌪𑍍𑌰𑌶𑍍𑌰𑌿𑌤𑌂 𑌹𑍇𑌤𑍁𑌸𑌂𑌹𑌿𑌤𑌮𑍍 ।
𑌨𑌿𑌶𑌮𑍍𑌯 𑌹𑌨𑍁𑌮𑌾𑌂𑌸𑍍𑌤𑌸𑍍𑌯𑌾 𑌵𑌾𑌕𑍍𑌯𑌮𑍁𑌤𑍍𑌤𑌰𑌮𑌬𑍍𑌰𑌵𑍀𑌤𑍍 ॥ 6 ॥
𑌕𑍍𑌷𑌿𑌪𑍍𑌰𑌮𑍇𑌷𑍍𑌯𑌤𑌿 𑌕𑌾𑌕𑍁𑌤𑍍𑌸𑍍𑌥𑌃 𑌹𑌰𑍍𑌯𑍃𑌕𑍍𑌷𑌪𑍍𑌰𑌵𑌰𑍈𑌰𑍍𑌵𑍃𑌤𑌃 ।
𑌯𑌸𑍍𑌤𑍇 𑌯𑍁𑌧𑌿 𑌵𑌿𑌜𑌿𑌤𑍍𑌯𑌾𑌰𑍀𑌨𑍍 𑌶𑍋𑌕𑌂 𑌵𑍍𑌯𑌪𑌨𑌯𑌿𑌷𑍍𑌯𑌤𑌿 ॥ ॥
𑌏𑌵𑌮𑌾𑌶𑍍𑌵𑌾𑌸𑍍𑌯 𑌵𑍈𑌦𑍇𑌹𑍀𑌂 𑌹𑌨𑍁𑌮𑌾𑌨𑍍 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌗𑌮𑌨𑌾𑌯 𑌮𑌤𑌿𑌂 𑌕𑍃𑌤𑍍𑌵𑌾 𑌵𑍈𑌦𑍇𑌹𑍀𑌮𑌭𑍍𑌯𑌵𑌾𑌦𑌯𑌤𑍍 ॥ ॥
𑌤𑌤𑌸𑍍𑌸 𑌕𑌪𑌿𑌶𑌾𑌰𑍍𑌦𑍂𑌲𑌃 𑌸𑍍𑌵𑌾𑌮𑌿𑌸𑌂𑌦𑌰𑍍𑌶𑌨𑍋𑌤𑍍𑌸𑍁𑌕𑌃 ।
𑌆𑌰𑍁𑌰𑍋𑌹 𑌗𑌿𑌰𑌿𑌶𑍍𑌰𑍇𑌷𑍍𑌠𑌮𑌰𑌿𑌷𑍍𑌟𑌮𑌰𑌿𑌮𑌰𑍍𑌦𑌨𑌃 ॥ ॥
𑌤𑍁𑌂𑌗𑌪𑌦𑍍𑌮𑌕𑌜𑍁𑌷𑍍𑌟𑌾𑌭𑌿𑌰𑍍𑌨𑍀𑌲𑌾𑌭𑌿𑌰𑍍𑌵𑌨𑌰𑌾𑌜𑌿𑌭𑌿𑌃 ।
𑌸𑍋𑌤𑍍𑌤𑌰𑍀𑌯𑌮𑌿𑌵𑌾𑌂𑌭𑍋𑌦𑍈𑌃 𑌶𑍃𑌂𑌗𑌾𑌂𑌤𑌰𑌵𑌿𑌲𑌂𑌬𑌿𑌭𑌿𑌃 ॥ 10 ॥
𑌬𑍋𑌧𑍍𑌯𑌮𑌾𑌨𑌮𑌿𑌵 𑌪𑍍𑌰𑍀𑌤𑍍𑌯𑌾 𑌦𑌿𑌵𑌾𑌕𑌰𑌕𑌰𑍈𑌶𑍍𑌶𑍁𑌭𑍈𑌃 ।
𑌉𑌨𑍍𑌮𑌿𑌷𑌂𑌤𑌮𑌿𑌵𑍋𑌦𑍍𑌧𑍂𑌤𑍈𑌰𑍍𑌲𑍋𑌚𑌨𑍈𑌰𑌿𑌵 𑌧𑌾𑌤𑍁𑌭𑌿𑌃 ॥ 11 ॥
𑌤𑍋𑌯𑍌𑌘𑌨𑌨𑌿𑌸𑍍𑌸𑍍𑌵𑌨𑍈𑌰𑍍𑌮𑌂𑌦𑍍𑌰𑍈𑌃 𑌪𑍍𑌰𑌾𑌧𑍀𑌤𑌮𑌿𑌵 𑌪𑌰𑍍𑌵𑌤𑌮𑍍 ।
𑌪𑍍𑌰𑌗𑍀𑌤𑌮𑌿𑌵 𑌵𑌿𑌸𑍍𑌪𑌷𑍍𑌟𑍈𑌰𑍍𑌨𑌾𑌨𑌾𑌪𑍍𑌰𑌸𑍍𑌰𑌵𑌣𑌸𑍍𑌵𑌨𑍈𑌃 ॥ 12 ॥
𑌦𑍇𑌵𑌦𑌾𑌰𑍁𑌭𑌿𑌰𑌤𑍍𑌯𑍁𑌚𑍍𑌚𑍈𑌰𑍂𑌰𑍍𑌧𑍍𑌵𑌬𑌾𑌹𑍁𑌮𑌿𑌵 𑌸𑍍𑌥𑌿𑌤𑌮𑍍 ।
𑌪𑍍𑌰𑌪𑌾𑌤𑌜𑌲𑌨𑌿𑌰𑍍𑌘𑍋𑌷𑍈𑌃 𑌪𑍍𑌰𑌾𑌕𑍍𑌰𑍁𑌷𑍍𑌟𑌮𑌿𑌵 𑌸𑌰𑍍𑌵𑌤𑌃 ॥ 13 ॥
𑌵𑍇𑌪𑌮𑌾𑌨𑌮𑌿𑌵 𑌶𑍍𑌯𑌾𑌮𑍈𑌃 𑌕𑌂𑌪𑌮𑌾𑌨𑍈𑌶𑍍𑌶𑌰𑌦𑍍𑌵𑌨𑍈𑌃 ।
𑌵𑍇𑌣𑍁𑌭𑌿𑌰𑍍𑌮𑌾𑌰𑍁𑌤𑍋𑌦𑍍𑌧𑍂𑌤𑍈𑌃 𑌕𑍂𑌜𑌂𑌤𑌮𑌿𑌵 𑌕𑍀𑌚𑌕𑍈𑌃 ॥ 14 ॥
𑌨𑌿𑌶𑍍𑌶𑍍𑌵𑌸𑌂𑌤𑌮𑌿𑌵𑌾𑌮𑌰𑍍𑌷𑌾𑌦𑍍𑌘𑍋𑌰𑍈𑌰𑌾𑌶𑍀𑌵𑌿𑌷𑍋𑌤𑍍𑌤𑌮𑍈𑌃 ।
𑌨𑍀𑌹𑌾𑌰𑌕𑍃𑌤𑌗𑌂𑌭𑍀𑌰𑍈𑌰𑍍𑌧𑍍𑌯𑌾𑌯𑌂𑌤𑌮𑌿𑌵 𑌗𑌹𑍍𑌵𑌰𑍈𑌃 ॥ 15 ॥
𑌮𑍇𑌘𑌪𑌾𑌦𑌨𑌿𑌭𑍈𑌃 𑌪𑌾𑌦𑍈𑌃 𑌪𑍍𑌰𑌕𑍍𑌰𑌾𑌂𑌤𑌮𑌿𑌵 𑌸𑌰𑍍𑌵𑌤𑌃 ।
𑌜𑍃𑌂𑌂𑌭𑌮𑌾𑌣𑌮𑌿𑌵𑌾𑌽𑌕𑌾𑌶𑍇 𑌶𑌿𑌖𑌰𑍈𑌰𑌭𑍍𑌰𑌮𑌾𑌲𑌿𑌭𑌿𑌃 ॥ 16 ॥
𑌕𑍂𑌟𑍈𑌶𑍍𑌚 𑌬𑌹𑍁𑌧𑌾 𑌕𑍀𑌰𑍍𑌣𑍈𑌶𑍍𑌶𑍋𑌭𑌿𑌤𑌂 𑌬𑌹𑍁𑌕𑌂𑌦𑌰𑍈𑌃 ।
𑌸𑌾𑌲𑌤𑌾𑌲𑌾𑌶𑍍𑌵𑌕𑌰𑍍𑌣𑍈𑌶𑍍𑌚 𑌵𑌂𑌶𑍈𑌶𑍍𑌚 𑌬𑌹𑍁𑌭𑌿𑌰𑍍𑌵𑍃𑌤𑌮𑍍 ॥ 1 ॥
𑌲𑌤𑌾𑌵𑌿𑌤𑌾𑌨𑍈𑌰𑍍𑌵𑌿𑌤𑌤𑍈𑌃 𑌪𑍁𑌷𑍍𑌪𑌵𑌦𑍍𑌭𑌿𑌰𑌲𑌂𑌕𑍃𑌤𑌮𑍍 ।
𑌨𑌾𑌨𑌾𑌮𑍃𑌗𑌗𑌣𑌾𑌕𑍀𑌰𑍍𑌣𑌂 𑌧𑌾𑌤𑍁𑌨𑌿𑌷𑍍𑌯𑌂𑌦𑌭𑍂𑌷𑌿𑌤𑌮𑍍 ॥ 1 ॥
𑌬𑌹𑍁𑌪𑍍𑌰𑌸𑍍𑌰𑌵𑌣𑍋𑌪𑍇𑌤𑌂 𑌶𑌿𑌲𑌾𑌸𑌂𑌚𑌯𑌸𑌂𑌕𑌟𑌮𑍍 ।
𑌮𑌹𑌰𑍍𑌷𑌿𑌯𑌕𑍍𑌷𑌗𑌂𑌧𑌰𑍍𑌵𑌕𑌿𑌨𑍍𑌨𑌰𑍋𑌰𑌗𑌸𑍇𑌵𑌿𑌤𑌮𑍍 ॥ 1 ॥
𑌲𑌤𑌾𑌪𑌾𑌦𑌪𑌸𑌂𑌘𑌾𑌤𑌂 𑌸𑌿𑌂𑌹𑌾𑌧𑍍𑌯𑍁𑌷𑌿𑌤𑌕𑌂𑌦𑌰𑌮𑍍 ।
𑌵𑍍𑌯𑌾𑌘𑍍𑌰𑌸𑌂𑌘𑌸𑌮𑌾𑌕𑍀𑌰𑍍𑌣𑌂 𑌸𑍍𑌵𑌾𑌦𑍁𑌮𑍂𑌲𑌫𑌲𑌦𑍍𑌰𑍁𑌮𑌮𑍍 ॥ 20 ॥
𑌤𑌮𑌾𑌰𑍁𑌰𑍋𑌹 𑌹𑌨𑍁𑌮𑌾𑌨𑍍 𑌪𑌰𑍍𑌵𑌤𑌂 𑌪𑌵𑌨𑌾𑌤𑍍𑌮𑌜𑌃 ।
𑌰𑌾𑌮𑌦𑌰𑍍𑌶𑌨𑌶𑍀𑌘𑍍𑌰𑍇𑌣 𑌪𑍍𑌰𑌹𑌰𑍍𑌷𑍇𑌣𑌾𑌭𑌿𑌚𑍋𑌦𑌿𑌤𑌃 ॥ 21 ॥
𑌤𑍇𑌨 𑌪𑌾𑌦𑌤𑌲𑌾𑌕𑍍𑌰𑌾𑌂𑌤𑌾 𑌰𑌮𑍍𑌯𑍇𑌷𑍁 𑌗𑌿𑌰𑌿𑌸𑌾𑌨𑍁𑌷𑍁 ।
𑌸𑌘𑍋𑌷𑌾𑌸𑍍𑌸𑌮𑌶𑍀𑌰𑍍𑌯𑌂𑌤 𑌶𑌿𑌲𑌾𑌶𑍍𑌚𑍂𑌰𑍍𑌣𑍀𑌕𑍃𑌤𑌾𑌸𑍍𑌤𑌤𑌃 ॥ 22 ॥
𑌸 𑌤𑌮𑌾𑌰𑍁𑌹𑍍𑌯 𑌶𑍈𑌲𑍇𑌂𑌦𑍍𑌰𑌂 𑌵𑍍𑌯𑌵𑌰𑍍𑌧𑌤 𑌮𑌹𑌾𑌕𑌪𑌿𑌃 ।
𑌦𑌕𑍍𑌷𑌿𑌣𑌾𑌦𑍁𑌤𑍍𑌤𑌰𑌂 𑌪𑌾𑌰𑌂 𑌪𑍍𑌰𑌾𑌰𑍍𑌥𑌯𑌨𑍍 𑌲𑌵𑌣𑌾𑌂𑌭𑌸𑌃 ॥ 23 ॥
𑌅𑌧𑌿𑌰𑍁𑌹𑍍𑌯 𑌤𑌤𑍋 𑌵𑍀𑌰𑌃 𑌪𑌰𑍍𑌵𑌤𑌂 𑌪𑌵𑌨𑌾𑌤𑍍𑌮𑌜𑌃 ।
𑌦𑌦𑌰𑍍𑌶 𑌸𑌾𑌗𑌰𑌂 𑌭𑍀𑌮𑌂 𑌮𑍀𑌨𑍋𑌰𑌗𑌨𑌿𑌷𑍇𑌵𑌿𑌤𑌮𑍍 ॥ 24 ॥
𑌸 𑌮𑌾𑌰𑍁𑌤 𑌇𑌵𑌾𑌽𑌕𑌾𑌶𑌂 𑌮𑌾𑌰𑍁𑌤𑌸𑍍𑌯𑌾𑌤𑍍𑌮𑌸𑌂𑌭𑌵𑌃 ।
𑌪𑍍𑌰𑌪𑍇𑌦𑍇 𑌹𑌰𑌿𑌶𑌾𑌰𑍍𑌦𑍂𑌲𑍋 𑌦𑌕𑍍𑌷𑌿𑌣𑌾𑌦𑍁𑌤𑍍𑌤𑌰𑌾𑌂 𑌦𑌿𑌶𑌮𑍍 ॥ 25 ॥
𑌸 𑌤𑌦𑌾 𑌪𑍀𑌡𑌿𑌤𑌸𑍍𑌤𑍇𑌨 𑌕𑌪𑌿𑌨𑌾 𑌪𑌰𑍍𑌵𑌤𑍋𑌤𑍍𑌤𑌮𑌃 ।
𑌰𑌰𑌾𑌸 𑌸𑌹 𑌤𑍈𑌰𑍍𑌭𑍂𑌤𑍈𑌃 𑌪𑍍𑌰𑌵𑌿𑌶𑌨𑍍𑌵𑌸𑍁𑌧𑌾𑌤𑌲𑌮𑍍 ॥ 26 ॥
𑌕𑌂𑌪𑌮𑌾𑌨𑍈𑌶𑍍𑌚 𑌶𑌿𑌖𑌰𑍈𑌃 𑌪𑌤𑌦𑍍𑌭𑌿𑌰𑌪𑌿 𑌚 𑌦𑍍𑌰𑍁𑌮𑍈𑌃 ।
𑌤𑌸𑍍𑌯𑍋𑌰𑍁𑌵𑍇𑌗𑍋𑌨𑍍𑌮𑌥𑌿𑌤𑌾𑌃 𑌪𑌾𑌦𑌪𑌾𑌃 𑌪𑍁𑌷𑍍𑌪𑌶𑌾𑌲𑌿𑌨𑌃 ॥ 2 ॥
𑌨𑌿𑌪𑍇𑌤𑍁𑌰𑍍𑌭𑍂𑌤𑌲𑍇 𑌰𑍁𑌗𑍍𑌣𑌾𑌶𑍍𑌶𑌕𑍍𑌰𑌾𑌯𑍁𑌧𑌹𑌤𑌾 𑌇𑌵 ।
𑌕𑌂𑌦𑌰𑌾𑌂𑌤𑌰𑌸𑌂𑌸𑍍𑌥𑌾𑌨𑌾𑌂 𑌪𑍀𑌡𑌿𑌤𑌾𑌨𑌾𑌂 𑌮𑌹𑍌𑌜𑌸𑌾𑌮𑍍 ॥ 2 ॥
𑌸𑌿𑌂𑌹𑌾𑌨𑌾𑌂 𑌨𑌿𑌨𑌦𑍋 𑌭𑍀𑌮𑍋 𑌨𑌭𑍋 𑌭𑌿𑌂𑌦𑌨𑍍 𑌸 𑌶𑍁𑌶𑍍𑌰𑍁𑌵𑍇 ।
𑌤𑍍𑌰𑌸𑍍𑌤𑌵𑍍𑌯𑌾𑌵𑍃𑌤𑍍𑌤𑌵𑌸𑌨𑌾 𑌵𑍍𑌯𑌾𑌕𑍁𑌲𑍀𑌕𑍃𑌤𑌭𑍂𑌷𑌣𑌾𑌃 ॥ 2 ॥
𑌵𑌿𑌦𑍍𑌯𑌾𑌧𑌰𑍍𑌯𑌃 𑌸𑌮𑍁𑌤𑍍𑌪𑍇𑌤𑍁𑌸𑍍𑌸𑌹𑌸𑌾 𑌧𑌰𑌣𑍀𑌧𑌰𑌾𑌤𑍍 ।
𑌅𑌤𑌿𑌪𑍍𑌰𑌮𑌾𑌣𑌾 𑌬𑌲𑌿𑌨𑍋 𑌦𑍀𑌪𑍍𑌤𑌜𑌿𑌹𑍍𑌵𑌾 𑌮𑌹𑌾𑌵𑌿𑌷𑌾𑌃 ॥ 30 ॥
𑌨𑌿𑌪𑍀𑌡𑌿𑌤𑌶𑌿𑌰𑍋𑌗𑍍𑌰𑍀𑌵𑌾 𑌵𑍍𑌯𑌚𑍇𑌷𑍍𑌟𑌂𑌤 𑌮𑌹𑌾𑌹𑌯𑌃 ।
𑌕𑌿𑌨𑍍𑌨𑌰𑍋𑌰𑌗𑌂𑌧𑌰𑍍𑌵𑌯𑌕𑍍𑌷𑌵𑌿𑌦𑍍𑌯𑌾𑌧𑌰𑌾𑌸𑍍𑌤𑌦𑌾 ॥ 31 ॥
𑌪𑍀𑌡𑌿𑌤𑌂 𑌤𑌂 𑌨𑌗𑌵𑌰𑌂 𑌤𑍍𑌯𑌕𑍍𑌤𑍍𑌵𑌾 𑌗𑌗𑌨𑌮𑌾𑌸𑍍𑌥𑌿𑌤𑌾𑌃 ।
𑌸 𑌚 𑌭𑍂𑌮𑌿𑌧𑌰𑌃 𑌶𑍍𑌰𑍀𑌮𑌾𑌨𑍍𑌬𑌲𑌿𑌨𑌾 𑌤𑍇𑌨 𑌪𑍀𑌡𑌿𑌤𑌃 ॥ 32 ॥
𑌸𑌵𑍃𑌕𑍍𑌷𑌶𑌿𑌖𑌰𑍋𑌦𑌗𑍍𑌰𑌃 𑌪𑍍𑌰𑌵𑌿𑌵𑍇𑌶 𑌰𑌸𑌾𑌤𑌲𑌮𑍍 ।
𑌦𑌶𑌯𑍋𑌜𑌨𑌵𑌿𑌸𑍍𑌤𑌾𑌰𑌸𑍍𑌤𑍍𑌰𑌿𑌂𑌶𑌦𑍍𑌯𑍋𑌜𑌨𑌮𑍁𑌚𑍍𑌛𑍍𑌰𑌿𑌤𑌃 ॥ 33 ॥
𑌧𑌰𑌣𑍍𑌯𑌾𑌂 𑌸𑌮𑌤𑌾𑌂 𑌯𑌾𑌤𑌃 𑌸 𑌬𑌭𑍂𑌵 𑌧𑌰𑌾𑌧𑌰𑌃 ।
𑌸 𑌲𑌿𑌲𑌂𑌘𑌯𑌿𑌷𑍁𑌰𑍍𑌭𑍀𑌮𑌂 𑌸𑌲𑍀𑌲𑌂 𑌲𑌵𑌣𑌾𑌰𑍍𑌣𑌵𑌮𑍍 ॥ 34 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌷𑌟𑍍𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
