𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ।
𑌏𑌤𑌤𑍍𑌤𑍁 𑌵𑌚𑌨𑌂 𑌶𑍍𑌰𑍁𑌤𑍍𑌵𑌾 𑌸𑍀𑌤𑌾 𑌰𑌾𑌮𑌸𑍍𑌯 𑌦𑍁𑌃𑌖𑌿𑌤𑌾 ।
𑌪𑍍𑌰𑌸𑌕𑍍𑌤𑌾𑌶𑍍𑌰𑍁𑌮𑍁𑌖𑍀 𑌮𑌂𑌦𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 1 ॥
𑌯𑍇 𑌤𑍍𑌵𑌯𑌾 𑌕𑍀𑌰𑍍𑌤𑌿𑌤𑌾 𑌦𑍋𑌷𑌾 𑌵𑌨𑍇 𑌵𑌸𑍍𑌤𑌵𑍍𑌯𑌤𑌾𑌂 𑌪𑍍𑌰𑌤𑌿 ।
𑌗𑍁𑌣𑌾𑌨𑌿𑌤𑍍𑌯𑍇𑌵 𑌤𑌾𑌨𑍍𑌵𑌿𑌦𑍍𑌧𑌿 𑌤𑌵 𑌸𑍍𑌨𑍇𑌹𑌪𑍁𑌰𑌸𑍍𑌕𑍃𑌤𑌾𑌨𑍍 ॥ 2 ॥
𑌮𑍃𑌗𑌾 𑌸𑍍𑌸𑌿𑌂𑌹𑌾 𑌗𑌜𑌾𑌶𑍍𑌚𑍈𑌵 𑌶𑌾𑌰𑍍𑌦𑍂𑌲𑌾 𑌶𑍍𑌶𑌰𑌭𑌾𑌸𑍍𑌤𑌥𑌾 ।
𑌪𑌕𑍍𑌷𑌿𑌣 𑌸𑍍𑌸𑍃𑌮𑌰𑌾𑌶𑍍𑌚𑍈𑌵 𑌯𑍇 𑌚𑌾𑌨𑍍𑌯𑍇 𑌵𑌨𑌚𑌾𑌰𑌿𑌣𑌃 ॥ 3 ॥
𑌅𑌦𑍃𑌷𑍍𑌟𑌪𑍂𑌰𑍍𑌵𑌰𑍂𑌪𑌤𑍍𑌵𑌾𑌤𑍍𑌸𑌰𑍍𑌵𑍇 𑌤𑍇 𑌤𑌵 𑌰𑌾𑌘𑌵 ।
𑌰𑍂𑌪𑌂 𑌦𑍃𑌷𑍍𑌟𑍍𑌵𑌾𑌽𑌪𑌸𑌰𑍍𑌪𑍇𑌯𑍁𑌰𑍍𑌭𑌯𑍇 𑌸𑌰𑍍𑌵𑍇 𑌹𑌿 𑌬𑌿𑌭𑍍𑌯𑌤𑌿 ॥ 4 ॥
𑌤𑍍𑌵𑌯𑌾 𑌚 𑌸𑌹 𑌗𑌂𑌤𑌵𑍍𑌯𑌂 𑌮𑌯𑌾 𑌗𑍁𑌰𑍁𑌜𑌨𑌾𑌜𑍍𑌞𑌯𑌾 ।
𑌤𑍍𑌵𑌦𑍍𑌵𑌿𑌯𑍋𑌗𑍇𑌨 𑌮𑍇 𑌰𑌾𑌮 𑌤𑍍𑌯𑌕𑍍𑌤𑌵𑍍𑌯𑌮𑌿𑌹 𑌜𑍀𑌵𑌿𑌤𑌮𑍍 ॥ 5 ॥
𑌨 𑌹𑌿 𑌮𑌾𑌂 𑌤𑍍𑌵𑌤𑍍𑌸𑌮𑍀𑌪𑌸𑍍𑌥𑌾𑌮𑌪𑌿 𑌶𑌕𑍍𑌨𑍋𑌤𑌿𑌰𑌾𑌘𑌵 ।
𑌸𑍁𑌰𑌾𑌣𑌾𑌮𑍀𑌶𑍍𑌵𑌰 𑌶𑍍𑌶𑌕𑍍𑌰𑌃 𑌪𑍍𑌰𑌧𑌰𑍍𑌷𑌯𑌿𑌤𑍁𑌮𑍋𑌜𑌸𑌾 ॥ 6 ॥
𑌪𑌤𑌿𑌹𑍀𑌨𑌾 𑌤𑍁 𑌯𑌾 𑌨𑌾𑌰𑍀 𑌨 𑌸𑌾 𑌶𑌕𑍍𑌷𑍍𑌯𑌤𑌿 𑌜𑍀𑌵𑌿𑌤𑍁𑌮𑍍 ।
𑌕𑌾𑌮𑌮𑍇𑌵𑌂 𑌵𑌿𑌧𑌂 𑌰𑌾𑌮 𑌤𑍍𑌵𑌯𑌾 𑌮𑌮 𑌨𑌿𑌦𑌰𑍍𑌶𑌿𑌤𑌮𑍍 ॥ ॥
𑌅𑌥 𑌚𑌾𑌪𑌿 𑌮𑌹𑌾𑌪𑍍𑌰𑌾𑌜𑍍𑌞 𑌬𑍍𑌰𑌾𑌹𑍍𑌮𑌣𑌾𑌨𑌾𑌂 𑌮𑌯𑌾 𑌶𑍍𑌰𑍁𑌤𑌮𑍍 ।
𑌪𑍁𑌰𑌾 𑌪𑌿𑌤𑍃𑌗𑍃𑌹𑍇 𑌸𑌤𑍍𑌯𑌂 𑌵𑌸𑍍𑌤𑌵𑍍𑌯𑌂 𑌕𑌿𑌲 𑌮𑍇 𑌵𑌨𑍇 ॥ ॥
𑌲𑌕𑍍𑌷𑌣𑌿𑌭𑍍𑌯𑍋 𑌦𑍍𑌵𑌿𑌜𑌾𑌤𑌿𑌭𑍍𑌯 𑌶𑍍𑌶𑍃𑌤𑍍𑌵𑌾𑌽𑌹𑌂 𑌵𑌚𑌨𑌂 𑌪𑍁𑌰𑌾 ।
𑌵𑌨𑌵𑌾𑌸𑌕𑍃𑌤𑍋𑌤𑍍𑌸𑌾𑌹𑌾 𑌨𑌿𑌤𑍍𑌯𑌮𑍇𑌵 𑌮𑌹𑌾𑌬𑌲 ॥ ॥
𑌆𑌦𑍇𑌶𑍋 𑌵𑌨𑌵𑌾𑌸𑌸𑍍𑌯 𑌪𑍍𑌰𑌾𑌪𑍍𑌤𑌵𑍍𑌯 𑌸𑍍𑌸 𑌮𑌯𑌾 𑌕𑌿𑌲 ।
𑌸𑌾 𑌤𑍍𑌵𑌯𑌾 𑌸𑌹 𑌤𑌤𑍍𑌰𑌾𑌹𑌂 𑌯𑌾𑌸𑍍𑌯𑌾𑌮𑌿 𑌪𑍍𑌰𑌿𑌯 𑌨𑌾𑌨𑍍𑌯𑌥𑌾 ॥ 10 ॥
𑌕𑍃𑌤𑌾𑌦𑍇𑌶𑌾 𑌭𑌵𑌿𑌷𑍍𑌯𑌾𑌮𑌿 𑌗𑌮𑌿𑌷𑍍𑌯𑌾𑌮𑌿 𑌸𑌹 𑌤𑍍𑌵𑌯𑌾 ।
𑌕𑌾𑌲𑌶𑍍𑌚𑌾𑌯𑌂 𑌸𑌮𑍁𑌤𑍍𑌪𑌨𑍍𑌨 𑌸𑍍𑌸𑌤𑍍𑌯𑌵𑌾𑌗𑍍𑌭𑌵𑌤𑍁 𑌦𑍍𑌵𑌿𑌜𑌃 ॥ 11 ॥
𑌵𑌨𑌵𑌾𑌸𑍇𑌽𑌭𑌿𑌜𑌾𑌨𑌾𑌮𑌿 𑌦𑍁𑌃𑌖𑌾𑌨𑌿 𑌬𑌹𑍁𑌥𑌾 𑌕𑌿𑌲 ।
𑌪𑍍𑌰𑌾𑌪𑍍𑌯𑌂𑌤𑍇 𑌨𑌿𑌯𑌤𑌂 𑌵𑍀𑌰 𑌪𑍁𑌰𑍁𑌷𑍈𑌰𑌕𑍃𑌤𑌾𑌤𑍍𑌮𑌭𑌿𑌃 ॥ 12 ॥
𑌕𑌨𑍍𑌯𑌯𑌾 𑌚 𑌪𑌿𑌤𑍁𑌰𑍍𑌗𑍇𑌹𑍇 𑌵𑌨𑌵𑌾𑌸 𑌶𑍍𑌶𑍃𑌤𑍋 𑌮𑌯𑌾 ।
𑌭𑌿𑌕𑍍𑌷𑌿𑌣𑍍𑌯𑌾 𑌸𑍍𑌸𑌾𑌧𑍁𑌵𑍃𑌤𑍍𑌤𑌾𑌯𑌾 𑌮𑌮 𑌮𑌾𑌤𑍁𑌰𑌿𑌹𑌾𑌗𑍍𑌰𑌤𑌃 ॥ 13 ॥
𑌪𑍍𑌰𑌸𑌾𑌦𑌿𑌤𑌶𑍍𑌚 𑌵𑍈 𑌪𑍂𑌰𑍍𑌵𑌂 𑌤𑍍𑌵𑌂 𑌮𑍇 𑌬𑌹𑍁𑌤𑌿𑌥𑌂 𑌪𑍍𑌰𑌭𑍋 ।
𑌗𑌮𑌨𑌂 𑌵𑌨𑌵𑌾𑌸𑌸𑍍𑌯 𑌕𑌾𑌂𑌕𑍍𑌷𑌿𑌤𑌂 𑌹𑌿 𑌸𑌹 𑌤𑍍𑌵𑌯𑌾 ॥ 14 ॥
𑌕𑍃𑌤𑌕𑍍𑌷𑌣𑌾𑌽𑌹𑌂 𑌭𑌦𑍍𑌰𑌂 𑌤𑍇 𑌗𑌮𑌨𑌂 𑌪𑍍𑌰𑌤𑌿 𑌰𑌾𑌘𑌵 ।
𑌵𑌨𑌵𑌾𑌸𑌸𑍍𑌯 𑌶𑍂𑌰𑌸𑍍𑌯 𑌚𑌰𑍍𑌯𑌾 𑌹𑌿 𑌮𑌮 𑌰𑍋𑌚𑌤𑍇 ॥ 15 ॥
𑌶𑍁𑌦𑍍𑌧𑌾𑌤𑍍𑌮𑌨𑍍𑌪𑍍𑌰𑍇𑌮𑌭𑌾𑌵𑌾𑌧𑍍𑌦𑌿 𑌭𑌵𑌿𑌷𑍍𑌯𑌾𑌮𑌿 𑌵𑌿𑌕𑌲𑍍𑌮𑌷𑌾 ।
𑌭𑌰𑍍𑌤𑌾𑌰𑌮𑌨𑍁𑌗𑌚𑍍𑌛𑌂𑌤𑍀 𑌭𑌰𑍍𑌤𑌾 𑌹𑌿 𑌮𑌮 𑌦𑍈𑌵𑌤𑌮𑍍 ॥ 16 ॥
𑌪𑍍𑌰𑍇𑌤𑍍𑌯𑌭𑌾𑌵𑍇 𑌹𑌿 𑌕𑌲𑍍𑌯𑌾𑌣 𑌸𑍍𑌸𑌂𑌗𑌮𑍋 𑌮𑍇 𑌸𑌹 𑌤𑍍𑌵𑌯𑌾 ।
𑌶𑍍𑌰𑍁𑌤𑌿𑌰𑍍𑌹𑌿 𑌶𑍍𑌰𑍂𑌯𑌤𑍇 𑌪𑍁𑌣𑍍𑌯𑌾 𑌬𑍍𑌰𑌾𑌹𑍍𑌮𑌣𑌾𑌨𑌾𑌂 𑌯𑌶𑌸𑍍𑌵𑌿𑌨𑌾𑌮𑍍 ॥ 1 ॥
𑌇𑌹𑌲𑍋𑌕𑍇 𑌚 𑌪𑌿𑌤𑍃𑌭𑌿𑌰𑍍𑌯𑌾 𑌸𑍍𑌤𑍍𑌰𑍀 𑌯𑌸𑍍𑌯 𑌮𑌹𑌾𑌮𑌤𑍇 ।
𑌅𑌦𑍍𑌭𑌿𑌰𑍍𑌦𑌤𑍍𑌤𑌾 𑌸𑍍𑌵𑌧𑌰𑍍𑌮𑍇𑌣 𑌪𑍍𑌰𑍇𑌤𑍍𑌯𑌭𑌾𑌵𑍇𑌽𑌪𑌿 𑌤𑌸𑍍𑌯 𑌸𑌾 ॥ 1 ॥
𑌏𑌵𑌮𑌸𑍍𑌮𑌾𑌤𑍍𑌸𑍍𑌵𑌕𑌾𑌂 𑌨𑌾𑌰𑍀𑌂 𑌸𑍁𑌵𑍃𑌤𑍍𑌤𑌾𑌂 𑌹𑌿 𑌪𑌤𑌿𑌵𑍍𑌰𑌤𑌾𑌮𑍍 ।
𑌨𑌾𑌭𑌿𑌰𑍋𑌚𑌯𑌸𑍇 𑌨𑍇𑌤𑍁𑌂 𑌤𑍍𑌵𑌂 𑌮𑌾𑌂 𑌕𑍇𑌨𑍇𑌹 𑌹𑍇𑌤𑍁𑌨𑌾 ॥ 1 ॥
𑌭𑌕𑍍𑌤𑌾𑌂 𑌪𑌤𑌿𑌵𑍍𑌰𑌤𑌾𑌂 𑌦𑍀𑌨𑌾𑌂 𑌮𑌾𑌂 𑌸𑌮𑌾𑌂 𑌸𑍁𑌖𑌦𑍁𑌃𑌖𑌯𑍋𑌃 ।
𑌨𑍇𑌤𑍁𑌮𑌰𑍍𑌹𑌸𑌿 𑌕𑌾𑌕𑍁𑌤𑍍𑌸𑍍𑌥 𑌸𑌮𑌾𑌨 𑌸𑍁𑌖𑌦𑍁𑌃𑌖𑌿𑌨𑍀𑌮𑍍 ॥ 20 ॥
𑌯𑌯𑌦𑌿 𑌮𑌾𑌂 𑌦𑍁𑌃𑌖𑌿𑌤𑌾𑌮𑍇𑌵𑌂 𑌵𑌨𑌂 𑌨𑍇𑌤𑍁𑌂 𑌨 𑌚𑍇𑌚𑍍𑌛𑌸𑌿 ।
𑌵𑌿𑌷𑌮𑌗𑍍𑌨𑌿𑌂 𑌜𑌲𑌂 𑌵𑌾𑌽𑌹𑌮𑌾𑌸𑍍𑌥𑌾𑌸𑍍𑌯𑍇 𑌮𑍃𑌤𑍍𑌯𑍁𑌕𑌾𑌰𑌣𑌾𑌤𑍍 ॥ 21 ॥
𑌏𑌵𑌂 𑌬𑌹𑍁𑌵𑌿𑌧𑌂 𑌤𑌂 𑌸𑌾 𑌯𑌾𑌚𑌤𑍇 𑌗𑌮𑌨𑌂 𑌪𑍍𑌰𑌤𑌿 ।
𑌨𑌾𑌨𑍁𑌮𑍇𑌨𑍇 𑌮𑌹𑌾𑌬𑌾𑌹𑍁𑌸𑍍𑌤𑌾𑌂 𑌨𑍇𑌤𑍁𑌂 𑌵𑌿𑌜𑌨𑌂 𑌵𑌨𑌮𑍍 ॥ 22 ॥
𑌏𑌵𑌮𑍁𑌕𑍍𑌤𑌾 𑌤𑍁 𑌸𑌾 𑌚𑌿𑌂𑌤𑌾𑌂 𑌮𑍈𑌥𑌿𑌲𑍀 𑌸𑌮𑍁𑌪𑌾𑌗𑌤𑌾 ।
𑌸𑍍𑌨𑌾𑌪𑌯𑌂𑌤𑍀𑌵 𑌗𑌾𑌮𑍁𑌷𑍍𑌣𑍈𑌰𑌶𑍍𑌰𑍁𑌭𑌿𑌰𑍍𑌨𑌯𑌨𑌚𑍍𑌯𑍁𑌤𑍈𑌃 ॥ 23 ॥
𑌚𑌿𑌂𑌤𑌯𑌂𑌤𑍀𑌂 𑌤𑌥𑌾 𑌤𑌾𑌂 𑌤𑍁 𑌨𑌿𑌵𑌰𑍍𑌤𑌯𑌿𑌤𑍁𑌮𑌾𑌤𑍍𑌮𑌵𑌾𑌨𑍍 ।
𑌤𑌾𑌮𑍍𑌰𑍋𑌷𑍍𑌠𑍀𑌂 𑌸 𑌤𑌦𑌾 𑌸𑍀𑌤𑌾𑌂 𑌕𑌾𑌕𑍁𑌤𑍍𑌸𑍍𑌥𑍋 𑌬𑌹𑍍𑌵𑌸𑌾𑌂𑌤𑍍𑌵𑌯𑌤𑍍 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌏𑌕𑍋𑌨𑌤𑍍𑌰𑌿𑌂𑌶𑌸𑍍𑌸𑌰𑍍𑌗𑌃 ॥
