𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌸 𑌦𑍃𑌷𑍍𑌟𑍍𑌵𑌾 𑌲𑌕𑍍𑌷𑍍𑌮𑌣𑌂 𑌦𑍀𑌨𑌂 𑌶𑍂𑌨𑍍𑌯𑍇 𑌦𑌶𑌰𑌥𑌾𑌤𑍍𑌮𑌜𑌃 ।
𑌪𑌰𑍍𑌯𑌪𑍃𑌚𑍍𑌛𑌤 𑌧𑌰𑍍𑌮𑌾𑌤𑍍𑌮𑌾 𑌵𑍈𑌦𑍇𑌹𑍀𑌮𑌾𑌗𑌤𑌂 𑌵𑌿𑌨𑌾 ॥ 1 ॥
𑌪𑍍𑌰𑌸𑍍𑌥𑌿𑌤𑌂 𑌦𑌂𑌡𑌕𑌾𑌰𑌣𑍍𑌯𑌂 𑌯𑌾 𑌮𑌾𑌮𑌨𑍁𑌜𑌗𑌾𑌮 𑌹 ।
𑌕𑍍𑌵 𑌸𑌾 𑌲𑌕𑍍𑌷𑍍𑌮𑌣 𑌵𑍈𑌦𑍇𑌹𑍀 𑌯𑌾𑌂 𑌹𑌿𑌤𑍍𑌵𑌾 𑌤𑍍𑌵𑌮𑌿𑌹𑌾𑌗𑌤𑌃 ॥ 2 ॥
𑌰𑌾𑌜𑍍𑌯𑌭𑍍𑌰𑌷𑍍𑌟𑌸𑍍𑌯 𑌦𑍀𑌨𑌸𑍍𑌯 𑌦𑌂𑌡𑌕𑌾𑌨𑍍𑌪𑌰𑌿𑌧𑌾𑌵𑌤𑌃 ।
𑌕𑍍𑌵 𑌸𑌾 𑌦𑍁𑌃𑌖𑌸𑌹𑌾𑌯𑌾 𑌮𑍇 𑌵𑍈𑌦𑍇𑌹𑍀 𑌤𑌨𑍁𑌮𑌧𑍍𑌯𑌮𑌾 ॥ 3 ॥
𑌯𑌾𑌂 𑌵𑌿𑌨𑌾 𑌨𑍋𑌤𑍍𑌸𑌹𑍇 𑌵𑍀𑌰 𑌮𑍁𑌹𑍂𑌰𑍍𑌤𑌮𑌪𑌿 𑌜𑍀𑌵𑌿𑌤𑍁𑌮𑍍 ।
𑌕𑍍𑌵 𑌸𑌾 𑌪𑍍𑌰𑌾𑌣𑌸𑌹𑌾𑌯𑌾 𑌮𑍇 𑌸𑍀𑌤𑌾 𑌸𑍁𑌰𑌸𑍁𑌤𑍋𑌪𑌮𑌾 ॥ 4 ॥
𑌪𑌤𑌿𑌤𑍍𑌵𑌮𑌮𑌰𑌾𑌣𑌾𑌂 𑌵𑌾 𑌪𑍃𑌥𑌿𑌵𑍍𑌯𑌾𑌶𑍍𑌚𑌾𑌪𑌿 𑌲𑌕𑍍𑌷𑍍𑌮𑌣 ।
𑌤𑌾𑌂 𑌵𑌿𑌨𑌾 𑌤𑌪𑌨𑍀𑌯𑌾𑌭𑌾𑌂 𑌨𑍇𑌚𑍍𑌛𑍇𑌯𑌂 𑌜𑌨𑌕𑌾𑌤𑍍𑌮𑌜𑌾𑌮𑍍 ॥ 5 ॥
𑌕𑌚𑍍𑌚𑌿𑌜𑍍𑌜𑍀𑌵𑌤𑌿 𑌵𑍈𑌦𑍇𑌹𑌿 𑌪𑍍𑌰𑌾𑌣𑍈𑌃 𑌪𑍍𑌰𑌿𑌯𑌤𑌰𑌾 𑌮𑌮 ।
𑌕𑌚𑍍𑌚𑌿𑌤𑍍𑌪𑍍𑌰𑌵𑍍𑌰𑌾𑌜𑌨𑌂 𑌸𑍌𑌮𑍍𑌯 𑌨 𑌮𑍇 𑌮𑌿𑌥𑍍𑌯𑌾 𑌭𑌵𑌿𑌷𑍍𑌯𑌤𑌿 ॥ 6 ॥
𑌸𑍀𑌤𑌾𑌨𑌿𑌮𑌿𑌤𑍍𑌤𑌂 𑌸𑍌𑌮𑌿𑌤𑍍𑌰𑍇 𑌮𑍃𑌤𑍇 𑌮𑌯𑌿 𑌗𑌤𑍇 𑌤𑍍𑌵𑌯𑌿 ।
𑌕𑌚𑍍𑌚𑌿𑌤𑍍𑌸𑌕𑌾𑌮𑌾 𑌸𑍁𑌖𑌿𑌤𑌾 𑌕𑍈𑌕𑍇𑌯𑍀 𑌸𑌾 𑌭𑌵𑌿𑌷𑍍𑌯𑌤𑌿 ॥ ॥
𑌸𑌪𑍁𑌤𑍍𑌰𑌰𑌾𑌜𑍍𑌯𑌾𑌂 𑌸𑌿𑌦𑍍𑌧𑌾𑌰𑍍𑌥𑌾𑌂 𑌮𑍃𑌤𑌪𑍁𑌤𑍍𑌰𑌾 𑌤𑌪𑌸𑍍𑌵𑌿𑌨𑍀 ।
𑌉𑌪𑌸𑍍𑌥𑌾𑌸𑍍𑌯𑌤𑌿𑌕𑍌𑌸𑌲𑍍𑌯𑌾 𑌕𑌚𑍍𑌚𑌿𑌤𑍍𑌸𑍌𑌮𑍍𑌯 𑌨 𑌕𑍇𑌕𑌯𑍀𑌮𑍍 ॥ ॥
𑌯𑌦𑌿 𑌜𑍀𑌵𑌤𑌿 𑌵𑍈𑌦𑍇𑌹𑍀 𑌗𑌮𑌿𑌷𑍍𑌯𑌾𑌮𑍍𑌯𑌾𑌶𑍍𑌰𑌮𑌂 𑌪𑍁𑌨𑌃 ।
𑌸𑍁𑌵𑍃𑌤𑍍𑌤𑌾 𑌯𑌦𑌿 𑌵𑍃𑌤𑍍𑌤𑌾 𑌪𑍍𑌰𑌾𑌣𑌾𑌂𑌸𑍍𑌤𑍍𑌯𑌕𑍍𑌷𑍍𑌯𑌾𑌮𑌿 𑌲𑌕𑍍𑌷𑍍𑌮𑌣 ॥ ॥
𑌯𑌦𑌿 𑌮𑌾𑌮𑌾𑌶𑍍𑌰𑌮𑌗𑌤𑌂 𑌵𑍈𑌦𑍇𑌹𑍀 𑌨𑌾𑌭𑌿𑌭𑌾𑌷𑌤𑍇 ।
𑌪𑍁𑌨𑌃 𑌪𑍍𑌰𑌹𑌸𑌿𑌤𑌾 𑌸𑍀𑌤𑌾 𑌵𑌿𑌨𑌶𑌿𑌷𑍍𑌯𑌾𑌮𑌿 𑌲𑌕𑍍𑌷𑍍𑌮𑌣 ॥ 10 ॥
𑌬𑍍𑌰𑍂𑌹𑌿 𑌲𑌕𑍍𑌷𑍍𑌮𑌣 𑌵𑍈𑌦𑍇𑌹𑍀 𑌯𑌦𑌿 𑌜𑍀𑌵𑌤𑌿 𑌵𑌾 𑌨 𑌵𑌾 ।
𑌤𑍍𑌵𑌯𑌿 𑌪𑍍𑌰𑌮𑌤𑍍𑌤𑍇 𑌰𑌕𑍍𑌷𑍋𑌭𑌿𑌰𑍍𑌭𑌕𑍍𑌷𑌿𑌤𑌾 𑌵𑌾 𑌤𑌪𑌸𑍍𑌵𑌿𑌨𑍀 ॥ 11 ॥
𑌸𑍁𑌕𑍁𑌮𑌾𑌰𑍀 𑌚 𑌬𑌾𑌲𑌾 𑌚 𑌨𑌿𑌤𑍍𑌯𑌂 𑌚𑌾𑌦𑍁𑌃𑌖𑌦𑌰𑍍𑌶𑌿𑌨𑍀 ।
𑌮𑌦𑍍𑌵𑌿𑌯𑍋𑌗𑍇𑌨 𑌵𑍈𑌦𑍇𑌹𑍀 𑌵𑍍𑌯𑌕𑍍𑌤𑌂 𑌶𑍋𑌚𑌤𑌿 𑌦𑍁𑌰𑍍𑌮𑌨𑌾𑌃 ॥ 12 ॥
𑌸𑌰𑍍𑌵𑌦𑌾 𑌰𑌕𑍍𑌷𑌸𑌾 𑌤𑍇𑌨 𑌜𑌿𑌹𑍍𑌮𑍇𑌨 𑌸𑍁𑌦𑍁𑌰𑌾𑌤𑍍𑌮𑌨𑌾 ।
𑌵𑌦𑌤𑌾 𑌲𑌕𑍍𑌷𑍍𑌮𑌣𑍇𑌤𑍍𑌯𑍁𑌚𑍍𑌚𑍈𑌸𑍍𑌤𑌵𑌾𑌪𑌿 𑌜𑌨𑌿𑌤𑌂 𑌭𑌯𑌮𑍍 ॥ 13 ॥
𑌶𑍍𑌰𑍁𑌤𑌸𑍍𑌤𑍁 𑌶𑌂𑌕𑍇 𑌵𑍈𑌦𑍇𑌹𑍍𑌯𑌾 𑌸 𑌸𑍍𑌵𑌰𑌸𑍍𑌸𑌦𑍃𑌶𑍋 𑌮𑌮 ।
𑌤𑍍𑌰𑌸𑍍𑌤𑌯𑌾 𑌪𑍍𑌰𑍇𑌷𑌿𑌤𑌸𑍍𑌤𑍍𑌵𑌂 𑌚 𑌦𑍍𑌰𑌷𑍍𑌟𑍁𑌂 𑌮𑌾𑌂 𑌶𑍀𑌘𑍍𑌰𑌮𑌾𑌗𑌤𑌃 ॥ 14 ॥
𑌸𑌰𑍍𑌵𑌥𑌾 𑌤𑍁 𑌕𑍃𑌤𑌂 𑌕𑌷𑍍𑌟𑌂 𑌸𑍀𑌤𑌾𑌮𑍁𑌤𑍍𑌸𑍃𑌜𑌤𑌾 𑌵𑌨𑍇 ।
𑌪𑍍𑌰𑌤𑌿𑌕𑌰𑍍𑌤𑍁𑌂 𑌨𑍃𑌶𑌂𑌸𑌾𑌨𑌾𑌂 𑌰𑌕𑍍𑌷𑌸𑌾𑌂 𑌦𑌤𑍍𑌤𑌮𑌂𑌤𑌰𑌮𑍍 ॥ 15 ॥
𑌦𑍁𑌃𑌖𑌿𑌤𑌾𑌃 𑌖𑌰𑌘𑌾𑌤𑍇𑌨 𑌰𑌾𑌕𑍍𑌷𑌸𑌾𑌃 𑌪𑌿𑌶𑌿𑌤𑌾𑌶𑌨𑌾𑌃 ।
𑌤𑍈𑌸𑍍𑌸𑍀𑌤𑌾 𑌨𑌿𑌹𑌤𑌾 𑌘𑍋𑌰𑍈𑌰𑍍𑌭𑌵𑌿𑌷𑍍𑌯𑌤𑌿 𑌨 𑌸𑌂𑌶𑌯𑌃 ॥ 16 ॥
𑌅𑌹𑍋𑌽𑌸𑍍𑌮𑌿𑌨𑍍 𑌵𑍍𑌯𑌸𑌨𑍇 𑌮𑌗𑍍𑌨𑌸𑍍𑌸𑌰𑍍𑌵𑌥𑌾 𑌶𑌤𑍍𑌰𑍁𑌸𑍂𑌦𑌨 ।
𑌕𑌿𑌂 𑌨𑍍𑌵𑌿𑌦𑌾𑌨𑍀𑌂 𑌕𑌰𑌿𑌷𑍍𑌯𑌾𑌮𑌿 𑌶𑌂𑌕𑍇 𑌪𑍍𑌰𑌾𑌪𑍍𑌤𑌵𑍍𑌯𑌮𑍀𑌦𑍃𑌶𑌮𑍍 ॥ 1 ॥
𑌇𑌤𑌿 𑌸𑍀𑌤𑌾𑌂 𑌵𑌰𑌾𑌰𑍋𑌹𑌾𑌂 𑌚𑌿𑌂𑌤𑌯𑌨𑍍𑌨𑍇𑌵 𑌰𑌾𑌘𑌵𑌃 ।
𑌆𑌜𑌗𑌾𑌮 𑌜𑌨𑌸𑍍𑌥𑌾𑌨𑌂 𑌤𑍍𑌵𑌰𑌯𑌾 𑌸𑌹 𑌲𑌕𑍍𑌷𑍍𑌮𑌣𑌃 ॥ 1 ॥
𑌵𑌿𑌗𑌰𑍍𑌹𑌮𑌾𑌣𑍋𑌽𑌨𑍁𑌜𑌮𑌾𑌰𑍍𑌤𑌰𑍂𑌪𑌂 𑌕𑍍𑌷𑍁𑌧𑌾 𑌶𑍍𑌰𑌮𑌾𑌚𑍍𑌚𑍈𑌵 𑌪𑌿𑌪𑌾𑌸𑌯𑌾 𑌚 ।
𑌵𑌿𑌨𑌿𑌶𑍍𑌶𑍍𑌵𑌸𑌨𑍍 𑌶𑍁𑌷𑍍𑌕𑌮𑍁𑌖𑍋 𑌵𑌿𑌵𑌰𑍍𑌣𑌃 𑌪𑍍𑌰𑌤𑌿𑌶𑍍𑌰𑌯𑌂 𑌪𑍍𑌰𑌾𑌪𑍍𑌯 𑌸𑌮𑍀𑌕𑍍𑌷𑍍𑌯 𑌶𑍂𑌨𑍍𑌯𑌮𑍍 ॥ 1 ॥
𑌸𑍍𑌵𑌮𑌾𑌶𑍍𑌰𑌮𑌂 𑌸𑌂𑌪𑍍𑌰𑌵𑌿𑌗𑌾𑌹𑍍𑌯 𑌵𑍀𑌰𑍋 𑌵𑌿𑌹𑌾𑌰𑌦𑍇𑌶𑌾𑌨𑌨𑍁𑌸𑍃𑌤𑍍𑌯 𑌕𑌾𑌂𑌶𑍍𑌚𑌿𑌤𑍍 ।
𑌏𑌤𑌤𑍍𑌤𑌦𑌿𑌤𑍍𑌯𑍇𑌵 𑌨𑌿𑌵𑌾𑌸𑌭𑍂𑌮𑍌 𑌪𑍍𑌰𑌹𑍃𑌷𑍍𑌟𑌰𑍋𑌮𑌾 𑌵𑍍𑌯𑌥𑌿𑌤𑍋 𑌬𑌭𑍂𑌵 ॥ 20 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌅𑌷𑍍𑌟𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
