𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌸𑌪𑍍𑌤𑌮𑌸𑍍𑌸𑌰𑍍𑌗𑌃 ।
𑌜𑍍𑌞𑌾𑌤𑌿𑌦𑌾𑌸𑍀 𑌯𑌤𑍋 𑌜𑌾𑌤𑌾 𑌕𑍈𑌕𑍇𑌯𑍍𑌯𑌾𑌸𑍍𑌤𑍁 𑌸𑌹𑍋𑌷𑌿𑌤𑌾 ।
𑌪𑍍𑌰𑌾𑌸𑌾𑌦𑌂 𑌚𑌂𑌦𑍍𑌰𑌸𑌂𑌕𑌾𑌶𑌮𑌾𑌰𑍁𑌰𑍋𑌹 𑌯𑌦𑍃𑌚𑍍𑌛𑌯𑌾 ॥ 1 ॥
𑌸𑌿𑌕𑍍𑌤𑌰𑌾𑌜𑌪𑌥𑌾𑌂 𑌕𑍃𑌤𑍍𑌸𑍍𑌨𑌾𑌂 𑌪𑍍𑌰𑌕𑍀𑌰𑍍𑌣𑌕𑍁𑌸𑍁𑌮𑍋𑌤𑍍𑌕𑌰𑌾𑌮𑍍 ।
𑌅𑌯𑍋𑌧𑍍𑌯𑌾𑌂 𑌮𑌂𑌥𑌰𑌾 𑌤𑌸𑍍𑌮𑌾𑌤𑍍𑌪𑍍𑌰𑌾𑌸𑌾𑌦𑌾𑌦𑌨𑍍𑌵𑌵𑍈𑌕𑍍𑌷𑌤 ॥ 2 ॥
𑌪𑌤𑌾𑌕𑌾𑌭𑌿𑌰𑍍𑌵𑌰𑌾𑌰𑍍𑌹𑌾𑌭𑌿𑌰𑍍𑌧𑍍𑌵𑌜𑍈𑌶𑍍𑌚 𑌸𑌮𑌲𑌂𑌕𑍃𑌤𑌾𑌮𑍍 ।
𑌵𑍃𑌤𑌾𑌂 𑌛𑌂𑌦𑌪𑌥𑍈𑌶𑍍𑌚𑌾𑌪𑌿 𑌶𑌿𑌰𑌸𑍍𑌸𑍍𑌨𑌾𑌤𑌜𑌨𑍈𑌰𑍍𑌵𑍃𑌤𑌾𑌮𑍍 ॥ 3 ॥
𑌮𑌾𑌲𑍍𑌯𑌮𑍋𑌦𑌕𑌹𑌸𑍍𑌤𑍈𑌶𑍍𑌚 𑌦𑍍𑌵𑌿𑌜𑍇𑌂𑌦𑍍𑌰𑍈𑌰𑌭𑌿𑌨𑌾𑌦𑌿𑌤𑌾𑌮𑍍 ।
𑌶𑍁𑌕𑍍𑌲𑌦𑍇𑌵𑌗𑍃𑌹𑌦𑍍𑌵𑌾𑌰𑌾𑌂 𑌸𑌰𑍍𑌵𑌵𑌾𑌦𑌿𑌤𑍍𑌰𑌨𑌿𑌸𑍍𑌵𑌨𑌾𑌮𑍍 ॥ 4 ॥
𑌸𑌂𑌪𑍍𑌰𑌹𑍃𑌷𑍍𑌟𑌜𑌨𑌾𑌕𑍀𑌰𑍍𑌣𑌾𑌂 𑌬𑍍𑌰𑌹𑍍𑌮𑌘𑍋𑌷𑌾𑌭𑌿𑌨𑌾𑌦𑌿𑌤𑌾𑌮𑍍 ।
𑌪𑍍𑌰𑌹𑍃𑌷𑍍𑌟𑌵𑌰𑌹𑌸𑍍𑌤𑍍𑌯𑌶𑍍𑌵𑌾𑌂 𑌸𑌂𑌪𑍍𑌰𑌣𑌰𑍍𑌦𑌿𑌤𑌗𑍋𑌵𑍃𑌷𑌾𑌮𑍍 ॥ 5 ॥
𑌪𑍍𑌰𑌹𑍃𑌷𑍍𑌟𑌮𑍁𑌦𑌿𑌤𑍈𑌃 𑌪𑍌𑌰𑍈𑌰𑍁𑌚𑍍𑌛𑍍𑌰𑌿𑌤𑌧𑍍𑌵𑌜𑌮𑌾𑌲𑌿𑌨𑍀𑌮𑍍 ।
𑌅𑌯𑍋𑌧𑍍𑌯𑌾𑌂 𑌮𑌂𑌥𑌰𑌾 𑌦𑍃𑌷𑍍𑌟𑍍𑌵𑌾 𑌪𑌰𑌂 𑌵𑌿𑌸𑍍𑌮𑌯𑌮𑌾𑌗𑌤𑌾 ॥ 6 ॥
𑌪𑍍𑌰𑌹𑌰𑍍𑌷𑍋𑌤𑍍𑌫𑍁𑌲𑍍𑌲𑌨𑌯𑌨𑌾𑌂 𑌪𑌾𑌂𑌡𑍁𑌰𑌕𑍍𑌷𑍌𑌮𑌵𑌾𑌸𑌿𑌨𑍀𑌮𑍍 ।
𑌅𑌵𑌿𑌦𑍂𑌰𑍇 𑌸𑍍𑌥𑌿𑌤𑌾𑌂 𑌦𑍃𑌷𑍍𑌟𑍍𑌵𑌾 𑌧𑌾𑌤𑍍𑌰𑍀𑌂 𑌪𑌪𑍍𑌰𑌚𑍍𑌛 𑌮𑌂𑌥𑌰𑌾 ॥ ॥
𑌉𑌤𑍍𑌤𑌮𑍇𑌨𑌾𑌭𑌿𑌸𑌂𑌯𑍁𑌕𑍍𑌤𑌾 𑌹𑌰𑍍𑌷𑍇𑌣𑌾𑌰𑍍𑌥𑌪𑌰𑌾 𑌸𑌤𑍀 ।
𑌰𑌾𑌮𑌮𑌾𑌤𑌾 𑌧𑌨𑌂 𑌕𑌿𑌨𑍍𑌨𑍁 𑌜𑌨𑍇𑌭𑍍𑌯𑌸𑍍𑌸𑌂𑌪𑍍𑌰𑌯𑌚𑍍𑌛𑌤𑌿 ॥ ॥
𑌅𑌤𑌿𑌮𑌾𑌤𑍍𑌰𑌪𑍍𑌰𑌹𑌰𑍍𑌷𑍋𑌽𑌯𑌂 𑌕𑌿𑌂 𑌜𑌨𑌸𑍍𑌯 𑌚 𑌶𑌂𑌸 𑌮𑍇 ।
𑌕𑌾𑌰𑌯𑌿𑌷𑍍𑌯𑌤𑌿 𑌕𑌿𑌂 𑌵𑌾𑌪𑌿 𑌸𑌂𑌪𑍍𑌰𑌹𑍃𑌷𑍍𑌟𑍋 𑌮𑌹𑍀𑌪𑌤𑌿𑌃 ॥ ॥
𑌵𑌿𑌦𑍀𑌰𑍍𑌯𑌮𑌾𑌣𑌾 𑌹𑌰𑍍𑌷𑍇𑌣 𑌧𑌾𑌤𑍍𑌰𑍀 𑌤𑍁 𑌪𑌰𑌯𑌾 𑌮𑍁𑌦𑌾 ।
𑌆𑌚𑌚𑌕𑍍𑌷𑍇𑌽𑌥 𑌕𑍁𑌬𑍍𑌜𑌾𑌯𑍈 𑌭𑍂𑌯𑌸𑍀𑌂 𑌰𑌾𑌘𑌵 𑌶𑍍𑌰𑌿𑌯𑌮𑍍 ॥ 10 ॥
𑌶𑍍𑌵𑌃 𑌪𑍁𑌷𑍍𑌯𑍇𑌣 𑌜𑌿𑌤𑌕𑍍𑌰𑍋𑌧𑌂 𑌯𑍌𑌵𑌰𑌾𑌜𑍍𑌯𑍇𑌨 𑌰𑌾𑌘𑌵𑌮𑍍 ।
𑌰𑌾𑌜𑌾 𑌦𑌶𑌰𑌥𑍋 𑌰𑌾𑌮𑌮𑌭𑌿𑌷𑍇𑌚𑌯𑌿𑌤𑌾𑌽𑌨𑌘𑌮𑍍 ॥ 11 ॥
𑌧𑌾𑌤𑍍𑌰𑍍𑌯𑌾𑌸𑍍𑌤𑍁 𑌵𑌚𑌨𑌂 𑌶𑍃𑌤𑍍𑌵𑌾 𑌕𑍁𑌬𑍍𑌜𑌾 𑌕𑍍𑌷𑌿𑌪𑍍𑌰𑌮𑌮𑌰𑍍𑌷𑌿𑌤𑌾 ।
𑌕𑍈𑌲𑌾𑌸𑌶𑌿𑌖𑌰𑌾𑌕𑌾𑌰𑌾 𑌤𑍍𑌪𑍍𑌰𑌾𑌸𑌾𑌦𑌾𑌦𑌵𑌰𑍋𑌹𑌤 ॥ 12 ॥
𑌸𑌾 𑌦𑌹𑍍𑌯𑌮𑌾𑌨𑌾 𑌕𑍋𑌪𑍇𑌨 𑌮𑌂𑌥𑌰𑌾 𑌪𑌾𑌪𑌦𑌰𑍍𑌶𑌿𑌨𑍀 ।
𑌶𑌯𑌾𑌨𑌾𑌮𑍇𑌤𑍍𑌯 𑌕𑍈𑌕𑍇𑌯𑍀𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 13 ॥
𑌉𑌤𑍍𑌤𑌿𑌷𑍍𑌠 𑌮𑍂𑌢𑍇 𑌕𑌿𑌂 𑌶𑍇𑌷𑍇 𑌭𑌯𑌂 𑌤𑍍𑌵𑌾𑌮𑌭𑌿𑌵𑌰𑍍𑌤𑌤𑍇 ।
𑌉𑌪𑌪𑍍𑌲𑍁𑌤𑌾𑌮𑍌𑌘𑍇𑌨 𑌕𑌿𑌮𑌾𑌤𑍍𑌮𑌾𑌨𑌂 𑌨 𑌬𑍁𑌧𑍍𑌯𑌸𑍇 ॥ 14 ॥
𑌅𑌨𑌿𑌷𑍍𑌟𑍇 𑌸𑍁𑌭𑌗𑌾𑌕𑌾𑌰𑍇 𑌸𑍌𑌭𑌾𑌗𑍍𑌯𑍇𑌨 𑌵𑌿𑌕𑌤𑍍𑌥𑌸𑍇 ।
𑌚𑌲𑌂 𑌹𑌿 𑌤𑌵 𑌸𑍌𑌭𑌾𑌗𑍍𑌯𑌂 𑌨𑌦𑍍𑌯𑌾𑌸𑍍𑌸𑍍𑌰𑍋𑌤 𑌇𑌵𑍋𑌷𑍍𑌣𑌗𑍇 ॥ 15 ॥
𑌏𑌵𑌮𑍁𑌕𑍍𑌤𑌾 𑌤𑍁 𑌕𑍈𑌕𑍇𑌯𑍀 𑌰𑍁𑌷𑍍𑌟𑌯𑌾 𑌪𑌰𑍁𑌷𑌂 𑌵𑌚𑌃 ।
𑌕𑍁𑌬𑍍𑌜𑌯𑌾 𑌪𑌾𑌪𑌦𑌰𑍍𑌶𑌿𑌨𑍍𑌯𑌾 𑌵𑌿𑌷𑌾𑌦𑌮𑌗𑌮𑌤𑍍𑌪𑌰𑌮𑍍 ॥ 16 ॥
𑌕𑍈𑌕𑍇𑌯𑍀 𑌤𑍍𑌵𑌬𑍍𑌰𑌵𑍀𑌤𑍍𑌕𑍁𑌬𑍍𑌜𑌾𑌂 𑌕𑌚𑍍𑌚𑌿𑌤𑍍𑌕𑍍𑌷𑍇𑌮𑌂 𑌨𑍁 𑌮𑌂𑌥𑌰𑍇 ।
𑌵𑌿𑌷𑌣𑍍𑌣𑌵𑌦𑌨𑌾𑌂 𑌹𑌿 𑌤𑍍𑌵𑌾𑌂 𑌲𑌕𑍍𑌷𑌯𑍇 𑌭𑍃𑌶𑌦𑍁𑌃𑌖𑌿𑌤𑌾𑌮𑍍 ॥ 1 ॥
𑌮𑌂𑌥𑌰𑌾 𑌤𑍁 𑌵𑌚 𑌶𑍍𑌶𑍍𑌰𑍁𑌤𑍍𑌵𑌾 𑌕𑍈𑌕𑍇𑌯𑍍𑌯𑌾 𑌮𑌧𑍁𑌰𑌾𑌕𑍍𑌷𑌰𑌮𑍍 ।
𑌉𑌵𑌾𑌚 𑌕𑍍𑌰𑍋𑌧𑌸𑌂𑌯𑍁𑌕𑍍𑌤𑌾 𑌵𑌾𑌕𑍍𑌯𑌂 𑌵𑌾𑌕𑍍𑌯𑌵𑌿𑌶𑌾𑌰𑌦𑌾 ॥ 1 ॥
𑌸𑌾 𑌵𑌿𑌷𑌣𑍍𑌣𑌤𑌰𑌾 𑌭𑍂𑌤𑍍𑌵𑌾 𑌕𑍁𑌬𑍍𑌜𑌾 𑌤𑌸𑍍𑌯𑌾 𑌹𑌿𑌤𑍈𑌷𑌿𑌣𑍀 ।
𑌵𑌿𑌷𑌾𑌦𑌯𑌂𑌤𑍀 𑌪𑍍𑌰𑍋𑌵𑌾𑌚 𑌭𑍇𑌦𑌯𑌂𑌤𑍀 𑌚 𑌰𑌾𑌘𑌵𑌮𑍍 ॥ 1 ॥
𑌅𑌕𑍍𑌷𑌯𑍍𑌯𑌂 𑌸𑍁𑌮𑌹𑌦𑍍𑌦𑍇𑌵𑌿 𑌪𑍍𑌰𑌵𑍃𑌤𑍍𑌤𑌂 𑌤𑍍𑌵𑌦𑍍𑌵𑌿𑌨𑌾𑌶𑌨𑌮𑍍 ।
𑌰𑌾𑌮𑌂 𑌦𑌶𑌰𑌥𑍋 𑌰𑌾𑌜𑌾 𑌯𑍌𑌵𑌰𑌾𑌜𑍍𑌯𑍇𑌽𑌭𑌿𑌷𑍇𑌕𑍍𑌷𑍍𑌯𑌤𑌿 ॥ 20 ॥
𑌸𑌾𑌽𑌸𑍍𑌮𑍍𑌯𑌗𑌾𑌧𑍇 𑌭𑌯𑍇 𑌮𑌗𑍍𑌨𑌾 𑌦𑍁𑌃𑌖𑌶𑍋𑌕𑌸𑌮𑌨𑍍𑌵𑌿𑌤𑌾 ।
𑌦𑌹𑍍𑌯𑌮𑌾𑌨𑌾𑌽𑌨𑌲𑍇𑌨𑍇𑌵 𑌤𑍍𑌵𑌦𑍍𑌧𑌿𑌤𑌾𑌰𑍍𑌥𑌮𑌿𑌹𑌾𑌗𑌤𑌾 ॥ 21 ॥
𑌤𑌵 𑌦𑍁𑌃𑌖𑍇𑌨 𑌕𑍈𑌕𑍇𑌯𑌿 𑌮𑌮 𑌦𑍁𑌃𑌖𑌂 𑌮𑌹𑌦𑍍𑌭𑌵𑍇𑌤𑍍 ।
𑌤𑍍𑌵𑌦𑍍𑌵𑍃𑌦𑍍𑌧𑍌 𑌮𑌮 𑌵𑍃𑌦𑍍𑌧𑌿𑌶𑍍𑌚 𑌭𑌵𑍇𑌦𑌤𑍍𑌰 𑌨 𑌸𑌂𑌶𑌯𑌃 ॥ 22 ॥
𑌨𑌰𑌾𑌧𑌿𑌪𑌕𑍁𑌲𑍇 𑌜𑌾𑌤𑌾 𑌮𑌹𑌿𑌷𑍀 𑌤𑍍𑌵𑌂 𑌮𑌹𑍀𑌪𑌤𑍇𑌃 ।
𑌉𑌗𑍍𑌰𑌤𑍍𑌵𑌂 𑌰𑌾𑌜𑌧𑌰𑍍𑌮𑌾𑌣𑌾𑌂 𑌕𑌥𑌂 𑌦𑍇𑌵𑌿 𑌨 𑌬𑍁𑌧𑍍𑌯𑌸𑍇 ॥ 23 ॥
𑌧𑌰𑍍𑌮𑌾𑌵𑌾𑌦𑍀 𑌶𑌠𑍋 𑌭𑌰𑍍𑌤𑌾 𑌶𑍍𑌲𑌕𑍍𑌷𑍍𑌣𑌵𑌾𑌦𑍀 𑌚 𑌦𑌾𑌰𑍁𑌣𑌃 ।
𑌶𑍁𑌦𑍍𑌧𑌭𑌾𑌵𑍇 𑌨 𑌜𑌾𑌨𑍀𑌷𑍇 𑌤𑍇𑌨𑍈𑌵 𑌮𑌤𑌿𑌸𑌂𑌧𑌿𑌤𑌾 ॥ 24 ॥
𑌉𑌪𑌸𑍍𑌥𑌿𑌤𑌃 𑌪𑍍𑌰𑌯𑍁𑌂𑌜𑌾𑌨𑌸𑍍𑌤𑍍𑌵𑌯𑌿 𑌸𑌾𑌂𑌤𑍍𑌵𑌮𑌨𑌰𑍍𑌥𑌕𑌮𑍍 ।
𑌅𑌰𑍍𑌥𑍇𑌨𑍈𑌵𑌾𑌦𑍍𑌯 𑌤𑍇 𑌭𑌰𑍍𑌤𑌾 𑌕𑍌𑌸𑌲𑍍𑌯𑌾𑌂 𑌯𑍋𑌜𑌯𑌿𑌷𑍍𑌯𑌤𑌿 ॥ 25 ॥
𑌉𑌪𑌵𑌾𑌹𑍍𑌯 𑌸 𑌦𑍁𑌷𑍍𑌟𑌾𑌤𑍍𑌮𑌾 𑌭𑌰𑌤𑌂 𑌤𑌵 𑌬𑌂𑌧𑍁𑌷𑍁 ।
𑌕𑌾𑌲𑍍𑌯𑍇 𑌸𑍍𑌥𑌾𑌪𑌯𑌿𑌤𑌾 𑌰𑌾𑌮𑌂 𑌰𑌾𑌜𑍍𑌯𑍇 𑌨𑌿𑌹𑌤𑌕𑌂𑌟𑌕𑍇 ॥ 26 ॥
𑌶𑌤𑍍𑌰𑍁𑌃 𑌪𑌤𑌿𑌪𑍍𑌰𑌵𑌾𑌦𑍇𑌨 𑌮𑌾𑌤𑍍𑌰𑍇𑌵 𑌹𑌿𑌤𑌕𑌾𑌮𑍍𑌯𑌯𑌾 ।
𑌆𑌶𑍀𑌵𑌿𑌷 𑌇𑌵𑌾𑌂𑌕𑍇𑌨 𑌬𑌾𑌲𑍇 𑌪𑌰𑌿𑌧𑍃𑌤𑌸𑍍𑌤𑍍𑌵𑌯𑌾 ॥ 2 ॥
𑌯𑌥𑌾 𑌹𑌿 𑌕𑍁𑌰𑍍𑌯𑌾𑌤𑍍𑌸𑌰𑍍𑌪𑍋 𑌵𑌾 𑌶𑌤𑍍𑌰𑍁𑌰𑍍𑌵𑌾 𑌪𑍍𑌰𑌤𑍍𑌯𑍁𑌪𑍇𑌕𑍍𑌷𑌿𑌤𑌃 ।
𑌰𑌾𑌜𑍍𑌞𑌾 𑌦𑌶𑌰𑌥𑍇𑌨𑌾𑌦𑍍𑌯 𑌸𑌪𑍁𑌤𑍍𑌰𑌾 𑌤𑍍𑌵𑌂 𑌤𑌥𑌾 𑌕𑍃𑌤𑌾 ॥ 2 ॥
𑌪𑌾𑌪𑍇𑌨𑌾𑌨𑍃𑌤𑌸𑌾𑌂𑌤𑍍𑌵𑍇𑌨 𑌬𑌾𑌲𑍇 𑌨𑌿𑌤𑍍𑌯𑌸𑍁𑌖𑍋𑌚𑌿𑌤𑍇 ।
𑌰𑌾𑌮𑌂 𑌸𑍍𑌥𑌾𑌪𑌯𑌤𑌾 𑌰𑌾𑌜𑍍𑌯𑍇 𑌸𑌾𑌨𑍁𑌬𑌂𑌧𑌾 𑌹𑌤𑌾 𑌹𑍍𑌯𑌸𑌿 ॥ 2 ॥
𑌸𑌾 𑌪𑍍𑌰𑌾𑌪𑍍𑌤𑌕𑌾𑌲𑌂 𑌕𑍈𑌕𑍇𑌯𑌿 𑌕𑍍𑌷𑌿𑌪𑍍𑌰𑌂 𑌕𑍁𑌰𑍁 𑌹𑌿𑌤𑌂 𑌤𑌵 ।
𑌤𑍍𑌰𑌾𑌯𑌸𑍍𑌵 𑌪𑍁𑌤𑍍𑌰𑌮𑌾𑌤𑍍𑌮𑌾𑌨𑌂 𑌮𑌾𑌂 𑌚 𑌵𑌿𑌸𑍍𑌮𑌯𑌦𑌰𑍍𑌶𑌨𑍇 ॥ 30 ॥
𑌮𑌂𑌥𑌾𑌰𑌾𑌯𑌾 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌶𑌯𑌾𑌨𑌾 𑌸𑌾 𑌶𑍁𑌭𑌾𑌨𑌨𑌾 ।
𑌉𑌤𑍍𑌤𑌸𑍍𑌥𑍌 𑌹𑌰𑍍𑌷𑌸𑌂𑌪𑍂𑌰𑍍𑌣𑌾 𑌚𑌂𑌦𑍍𑌰𑌲𑍇𑌖𑍇𑌵 𑌶𑌾𑌰𑌦𑍀 ॥ 31 ॥
𑌅𑌤𑍀𑌵 𑌸𑌾 𑌤𑍁 𑌸𑌂𑌹𑍃𑌷𑍍𑌟𑌾 𑌕𑍈𑌕𑍇𑌯𑍀 𑌵𑌿𑌸𑍍𑌮𑌯𑌾𑌨𑍍𑌵𑌿𑌤𑌾 ।
𑌏𑌕𑌮𑌾𑌭𑌰𑌣𑌂 𑌤𑌸𑍍𑌯𑍈 𑌕𑍁𑌬𑍍𑌜𑌾𑌯𑍈 𑌪𑍍𑌰𑌦𑌦𑍌 𑌶𑍁𑌭𑌮𑍍 ॥ 32 ॥
𑌦𑌤𑍍𑌵𑌾 𑌤𑍍𑌵𑌾𑌭𑌰𑌣𑌂 𑌤𑌸𑍍𑌯𑍈 𑌕𑍁𑌬𑍍𑌜𑌾𑌯𑍈 𑌪𑍍𑌰𑌮𑌦𑍋𑌤𑍍𑌤𑌮𑌾 ।
𑌕𑍈𑌕𑍇𑌯𑍀 𑌮𑌂𑌥𑌰𑌾𑌂 𑌦𑍃𑌷𑍍𑌟𑍍𑌵𑌾 𑌪𑍁𑌨𑌰𑍇𑌵𑌾𑌬𑍍𑌰𑌵𑍀𑌦𑌿𑌦𑌮𑍍 ॥ 33 ॥
𑌇𑌦𑌂 𑌤𑍁 𑌮𑌂𑌥𑌰𑍇 𑌮𑌹𑍍𑌯𑌮𑌾𑌖𑍍𑌯𑌾𑌸𑌿 𑌪𑌰𑌮𑌂 𑌪𑍍𑌰𑌿𑌯𑌮𑍍 ।
𑌏𑌤𑌨𑍍𑌮𑍇 𑌪𑍍𑌰𑌿𑌯𑌮𑌾𑌖𑍍𑌯𑌾𑌤𑍁𑌃 𑌕𑌿𑌂 𑌵𑌾 𑌭𑍂𑌯𑌃 𑌕𑌰𑍋𑌮𑌿 𑌤𑍇 ॥ 34 ॥
𑌰𑌾𑌮𑍇 𑌵𑌾 𑌭𑌰𑌤𑍇 𑌵𑌾𑌽𑌹𑌂 𑌵𑌿𑌶𑍇𑌷𑌂 𑌨𑍋𑌪𑌲𑌕𑍍𑌷𑌯𑍇 ।
𑌤𑌸𑍍𑌮𑌾𑌤𑍍𑌤𑍁𑌷𑍍𑌟𑌾𑌽𑌸𑍍𑌮𑌿 𑌯𑌦𑍍𑌰𑌾𑌜𑌾 𑌰𑌾𑌮𑌂 𑌰𑌾𑌜𑍍𑌯𑍇𑌽𑌭𑌿𑌷𑍇𑌕𑍍𑌷𑍍𑌯𑌤𑌿 ॥ 35 ॥
𑌨 𑌮𑍇 𑌪𑌰𑌂 𑌕𑌿𑌂𑌚𑌿𑌦𑌿𑌤𑌸𑍍𑌤𑍍𑌵𑌯𑌾 𑌪𑍁𑌨𑌃 𑌪𑍍𑌰𑌿𑌯𑌂 𑌪𑍍𑌰𑌿𑌯𑌾𑌰𑍍𑌹𑍇 𑌸𑍁𑌵𑌚𑌂 𑌵𑌚𑌃𑌪𑌰𑌮𑍍 ।
𑌤𑌥𑌾 𑌹𑍍𑌯𑌵𑍋𑌚𑌸𑍍𑌤𑍍𑌵𑌮𑌤𑌃 𑌪𑍍𑌰𑌿𑌯𑍋𑌤𑍍𑌤𑌰𑌂 𑌵𑌰𑌂 𑌪𑌰𑌂 𑌤𑍇 𑌪𑍍𑌰𑌦𑌦𑌾𑌮𑌿 𑌤𑌂 𑌵𑍃𑌣𑍁 ॥ 36 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌸𑌪𑍍𑌤𑌮𑌸𑍍𑌸𑌰𑍍𑌗𑌃 ॥
