Meaning, Multimedia
View this in:
| English | Devanagari | Telugu | Tamil | Kannada | Malayalam | Gujarati | Odia | Bengali  |
| Marathi | Assamese | Punjabi | Hindi | Samskritam | Konkani | Nepali | Sinhala | Grantha  |

5.10 𑌸𑍁𑌂𑌦𑌰𑌕𑌾𑌂𑌡 - 𑌦𑌶𑌮 𑌸𑌰𑍍𑌗𑌃

𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌦𑌶𑌮𑌸𑍍𑌸𑌰𑍍𑌗𑌃 ।

𑌤𑌤𑍍𑌰 𑌦𑌿𑌵𑍍𑌯𑍋𑌪𑌮𑌂 𑌮𑍁𑌖𑍍𑌯𑌂 𑌸𑍍𑌫𑌾𑌟𑌿𑌕𑌂 𑌰𑌤𑍍𑌨𑌭𑍂𑌷𑌿𑌤𑌮𑍍 ।
𑌅𑌵𑍇𑌕𑍍𑌷𑌮𑌾𑌣𑍋 𑌹𑌨𑍁𑌮𑌾𑌨𑍍 𑌦𑌦𑌰𑍍𑌶 𑌶𑌯𑌨𑌾𑌸𑌨𑌮𑍍 ॥ 1 ॥

𑌦𑌾𑌂𑌤𑌕𑌾𑌂𑌚𑌨𑌚𑌿𑌤𑍍𑌰𑌾𑌂𑌗𑍈𑌰𑍍𑌵𑍈𑌡𑍂𑌰𑍍𑌯𑍈𑌶𑍍𑌚 𑌵𑌰𑌾𑌸𑌨𑍈𑌃 ।
𑌮𑌹𑌾𑌰𑍍𑌹𑌾𑌸𑍍𑌤𑌰𑌣𑍋𑌪𑍇𑌤𑍈𑌰𑍁𑌪𑌪𑌨𑍍𑌨𑌂 𑌮𑌹𑌾𑌧𑌨𑍈𑌃 ॥ 2 ॥

𑌤𑌸𑍍𑌯 𑌚𑍈𑌕𑌤𑌮𑍇 𑌦𑍇𑌶𑍇 𑌸𑍋𑌽𑌗𑍍𑌯𑍍𑌰𑌮𑌾𑌲𑌾𑌵𑌿𑌭𑍂𑌷𑌿𑌤𑌮𑍍 ।
𑌦𑌦𑌰𑍍𑌶 𑌪𑌾𑌂𑌡𑍁𑌰𑌂 𑌛𑌤𑍍𑌰𑌂 𑌤𑌾𑌰𑌾𑌧𑌿𑌪𑌤𑌿𑌸𑌨𑍍𑌨𑌿𑌭𑌮𑍍 ॥ 3 ॥

𑌜𑌾𑌤𑌰𑍂𑌪𑌪𑌰𑌿𑌕𑍍𑌷𑌿𑌪𑍍𑌤𑌂 𑌚𑌿𑌤𑍍𑌰𑌭𑌾𑌨𑍁𑌸𑌮𑌪𑍍𑌰𑌭𑌮𑍍 ।
𑌅𑌶𑍋𑌕𑌮𑌾𑌲𑌾𑌵𑌿𑌤𑌤𑌂 𑌦𑌦𑌰𑍍𑌶 𑌪𑌰𑌮𑌾𑌸𑌨𑌮𑍍 ॥ 4 ॥

𑌵𑌾𑌲𑌵𑍍𑌯𑌜𑌨𑌹𑌸𑍍𑌤𑌾𑌭𑌿𑌰𑍍𑌵𑍀𑌜𑍍𑌯𑌮𑌾𑌨𑌂 𑌸𑌮𑌂𑌤𑌤𑌃 ।
𑌗𑌂𑌧𑍈𑌶𑍍𑌚 𑌵𑌿𑌵𑌿𑌧𑍈𑌰𑍍𑌜𑍁𑌷𑍍𑌟𑌂 𑌵𑌰𑌧𑍂𑌪𑍇𑌨 𑌧𑍂𑌪𑌿𑌤𑌮𑍍 ॥ 5 ॥

𑌪𑌰𑌮𑌾𑌸𑍍𑌤𑌰𑌣𑌾𑌸𑍍𑌤𑍀𑌰𑍍𑌣𑌮𑌾𑌵𑌿𑌕𑌾𑌜𑌿𑌨𑌸𑌂𑌵𑍃𑌤𑌮𑍍 ।
𑌦𑌾𑌮𑌭𑌿𑌰𑍍𑌵𑌰𑌮𑌾𑌲𑍍𑌯𑌾𑌨𑌾𑌂 𑌸𑌮𑌂𑌤𑌾𑌦𑍁𑌪𑌶𑍋𑌭𑌿𑌤𑌮𑍍 ॥ 6 ॥

𑌤𑌸𑍍𑌮𑌿𑌨𑍍 𑌜𑍀𑌮𑍂𑌤𑌸𑌂𑌕𑌾𑌶𑌂 𑌪𑍍𑌰𑌦𑍀𑌪𑍍𑌤𑍋𑌤𑍍𑌤𑌮𑌕𑍁𑌂𑌡𑌲𑌮𑍍 ।
𑌲𑍋𑌹𑌿𑌤𑌾𑌕𑍍𑌷𑌂 𑌮𑌹𑌾𑌬𑌾𑌹𑍁𑌂 𑌮𑌹𑌾𑌰𑌜𑌤𑌵𑌾𑌸𑌸𑌮𑍍 ॥ 𑍭 ॥

𑌲𑍋𑌹𑌿𑌤𑍇𑌨𑌾𑌨𑍁𑌲𑌿𑌪𑍍𑌤𑌾𑌂𑌗𑌂 𑌚𑌂𑌦𑌨𑍇𑌨 𑌸𑍁𑌗𑌂𑌧𑌿𑌨𑌾 ।
𑌸𑌂𑌧𑍍𑌯𑌾𑌰𑌕𑍍𑌤𑌮𑌿𑌵𑌾𑌕𑌾𑌶𑍇 𑌤𑍋𑌯𑌦𑌂 𑌸𑌤𑌟𑌿𑌦𑍍𑌗𑌣𑌮𑍍 ॥ 𑍮 ॥

𑌵𑍃𑌤𑌮𑌾𑌭𑌰𑌣𑍈𑌰𑍍𑌦𑌿𑌵𑍍𑌯𑍈𑌃 𑌸𑍁𑌰𑍂𑌪𑌂 𑌕𑌾𑌮𑌰𑍂𑌪𑌿𑌣𑌮𑍍 ।
𑌸𑌵𑍃𑌕𑍍𑌷𑌵𑌨𑌗𑍁𑌲𑍍𑌮𑌾𑌢𑍍𑌯𑌂 𑌪𑍍𑌰𑌸𑍁𑌪𑍍𑌤𑌮𑌿𑌵 𑌮𑌂𑌦𑌰𑌮𑍍 ॥ 𑍯 ॥

𑌕𑍍𑌰𑍀𑌡𑌿𑌤𑍍𑌵𑍋𑌪𑌰𑌤𑌂 𑌰𑌾𑌤𑍍𑌰𑍌 𑌵𑌰𑌾𑌭𑌰𑌣𑌭𑍂𑌷𑌿𑌤𑌮𑍍 ।
𑌪𑍍𑌰𑌿𑌯𑌂 𑌰𑌾𑌕𑍍𑌷𑌸𑌕𑌨𑍍𑌯𑌾𑌨𑌾𑌂 𑌰𑌾𑌕𑍍𑌷𑌸𑌾𑌨𑌾𑌂 𑌸𑍁𑌖𑌾𑌵𑌹𑌮𑍍 ॥ 10 ॥

𑌪𑍀𑌤𑍍𑌵𑌾𑌽𑌪𑍍𑌯𑍁𑌪𑌰𑌤𑌂 𑌚𑌾𑌪𑌿 𑌦𑌦𑌰𑍍𑌶 𑌸 𑌮𑌹𑌾𑌕𑌪𑌿𑌃 ।
𑌭𑌾𑌸𑍍𑌵𑌰𑍇 𑌶𑌯𑌨𑍇 𑌵𑍀𑌰𑌂 𑌪𑍍𑌰𑌸𑍁𑌪𑍍𑌤𑌂 𑌰𑌾𑌕𑍍𑌷𑌸𑌾𑌧𑌿𑌪𑌮𑍍 ॥ 11 ॥

𑌨𑌿𑌃𑌶𑍍𑌵𑌸𑌂𑌤𑌂 𑌯𑌥𑌾 𑌨𑌾𑌗𑌂 𑌰𑌾𑌵𑌣𑌂 𑌵𑌾𑌨𑌰𑌰𑍍𑌷𑌭𑌃 ।
𑌆𑌸𑌾𑌦𑍍𑌯 𑌪𑌰𑌮𑍋𑌦𑍍𑌵𑌿𑌗𑍍𑌨𑌸𑍍𑌸𑍋𑌪𑌾𑌸𑌰𑍍𑌪𑌤𑍍𑌸𑍁𑌭𑍀𑌤𑌵𑌤𑍍 ॥ 12 ॥

𑌅𑌥𑌾𑌽𑌽𑌰𑍋𑌹𑌣𑌮𑌾𑌸𑌾𑌦𑍍𑌯 𑌵𑍇𑌦𑌿𑌕𑌾𑌽𑌂𑌤𑌰𑌮𑌾𑌶𑍍𑌰𑌿𑌤𑌃 ।
𑌸𑍁𑌪𑍍𑌤𑌂 𑌰𑌾𑌕𑍍𑌷𑌸𑌶𑌾𑌰𑍍𑌦𑍂𑌲𑌂 𑌪𑍍𑌰𑍇𑌕𑍍𑌷𑌤𑍇 𑌸𑍍𑌮 𑌮𑌹𑌾𑌕𑌪𑌿𑌃 ॥ 13 ॥

𑌶𑍁𑌶𑍁𑌭𑍇 𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌯 𑌸𑍍𑌵𑌪𑌤𑌃 𑌶𑌯𑌨𑍋𑌤𑍍𑌤𑌮𑌮𑍍 ।
𑌗𑌂𑌧𑌹𑌸𑍍𑌤𑌿𑌨𑌿 𑌸𑌂𑌵𑌿𑌷𑍍𑌟𑍇 𑌯𑌥𑌾 𑌪𑍍𑌰𑌸𑍍𑌰𑌵𑌣𑌂 𑌮𑌹𑌤𑍍 ॥ 14 ॥

𑌕𑌾𑌂𑌚𑌨𑌾𑌂𑌗𑌦𑌸𑌨𑍍𑌨𑌧𑍍𑌦𑍈 𑌚 𑌦𑌦𑌰𑍍𑌶 𑌸 𑌮𑌹𑌾𑌤𑍍𑌮𑌨𑌃 ।
𑌵𑌿𑌕𑍍𑌷𑌿𑌪𑍍𑌤𑍌 𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌯 𑌭𑍁𑌜𑌾𑌵𑌿𑌂𑌦𑍍𑌰𑌧𑍍𑌵𑌜𑍋𑌪𑌮𑍌 ॥ 15 ॥

𑌐𑌰𑌾𑌵𑌤𑌵𑌿𑌷𑌾𑌣𑌾𑌗𑍍𑌰𑍈𑌰𑌾𑌪𑍀𑌡𑌨𑌕𑍃𑌤𑌵𑍍𑌰𑌣𑍌 ।
𑌵𑌜𑍍𑌰𑍋𑌲𑍍𑌲𑌿𑌖𑌿𑌤𑌪𑍀𑌨𑌾𑌂𑌸𑍌 𑌵𑌿𑌷𑍍𑌣𑍁𑌚𑌕𑍍𑌰𑌪𑌰𑌿𑌕𑍍𑌷𑌤𑍌 ॥ 16 ॥

𑌪𑍀𑌨𑍌 𑌸𑌮𑌸𑍁𑌜𑌾𑌤𑌾𑌂𑌸𑍌 𑌸𑌂𑌗𑌤𑍌 𑌬𑌲𑌸𑌂𑌯𑍁𑌤𑍌 ।
𑌸𑍁𑌲𑌕𑍍𑌷𑌣𑌨𑌖𑌾𑌂𑌗𑍁𑌷𑍍𑌠𑌾 𑌸𑍍𑌵𑌂𑌗𑍁𑌲𑍀𑌤𑌲𑌲𑌕𑍍𑌷𑌿𑌤𑍌 ॥ 1𑍭 ॥

𑌸𑌂𑌹𑌤𑍌 𑌪𑌰𑌿𑌘𑌾𑌕𑌾𑌰𑍌 𑌵𑍃𑌤𑍍𑌤𑍌 𑌕𑌰𑌿𑌕𑌰𑍋𑌪𑌮𑍌 ।
𑌵𑌿𑌕𑍍𑌷𑌿𑌪𑍍𑌤𑍌 𑌶𑌯𑌨𑍇 𑌶𑍁𑌭𑍍𑌰𑍇 𑌪𑌂𑌚𑌶𑍀𑌰𑍍𑌷𑌾𑌵𑌿𑌵𑍋𑌰𑌗𑍌 ॥ 1𑍮 ॥

𑌶𑌶𑌕𑍍𑌷𑌤𑌜𑌕𑌲𑍍𑌪𑍇𑌨 𑌸𑍁𑌶𑍀𑌤𑍇𑌨 𑌸𑍁𑌗𑌂𑌧𑌿𑌨𑌾 ।
𑌚𑌂𑌦𑌨𑍇𑌨 𑌪𑌰𑌾𑌰𑍍𑌧𑍍𑌯𑍇𑌨 𑌸𑍍𑌵𑌨𑍁𑌲𑌿𑌪𑍍𑌤𑍌 𑌸𑍍𑌵𑌲𑌂𑌕𑍃𑌤𑍌 ॥ 1𑍯 ॥

𑌉𑌤𑍍𑌤𑌮𑌸𑍍𑌤𑍍𑌰𑍀𑌵𑌿𑌮𑍃𑌦𑌿𑌤𑍌 𑌗𑌂𑌧𑍋𑌤𑍍𑌤𑌮𑌨𑌿𑌷𑍇𑌵𑌿𑌤𑍌 ।
𑌯𑌕𑍍𑌷𑌪𑌨𑍍𑌨𑌗𑌗𑌂𑌧𑌰𑍍𑌵𑌦𑍇𑌵𑌦𑌾𑌨𑌵𑌰𑌾𑌵𑌿𑌣𑍌 ॥ 20 ॥

𑌦𑌦𑌰𑍍𑌶 𑌸 𑌕𑌪𑌿𑌸𑍍𑌤𑌤𑍍𑌰 𑌬𑌾𑌹𑍂 𑌶𑌯𑌨𑌸𑌂𑌸𑍍𑌥𑌿𑌤𑍌 ।
𑌮𑌂𑌦𑌰𑌸𑍍𑌯𑌾𑌂𑌤𑌰𑍇 𑌸𑍁𑌪𑍍𑌤𑍌 𑌮𑌹𑌾𑌹𑍀 𑌰𑍁𑌷𑌿𑌤𑌾𑌵𑌿𑌵 ॥ 21 ॥

𑌤𑌾𑌭𑍍𑌯𑌾𑌂 𑌸 𑌪𑌰𑌿𑌪𑍂𑌰𑍍𑌣𑌾𑌭𑍍𑌯𑌾𑌂 𑌭𑍁𑌜𑌾𑌭𑍍𑌯𑌾𑌂 𑌰𑌾𑌕𑍍𑌷𑌸𑍇𑌶𑍍𑌵𑌰𑌃 ।
𑌶𑍁𑌶𑍁𑌭𑍇𑌽𑌚𑌲𑌸𑌂𑌕𑌾𑌶𑌃 𑌶𑍃𑌂𑌗𑌾𑌭𑍍𑌯𑌾𑌮𑌿𑌵 𑌮𑌂𑌦𑌰𑌃 ॥ 22 ॥

𑌚𑍂𑌤𑌪𑍁𑌨𑍍𑌨𑌾𑌗𑌸𑍁𑌰𑌭𑌿𑌰𑍍𑌵𑌕𑍁𑌲𑍋𑌤𑍍𑌤𑌮𑌸𑌂𑌯𑍁𑌤𑌃 ।
𑌮𑍃𑌷𑍍𑌟𑌾𑌨𑍍𑌨𑌰𑌸𑌸𑌂𑌯𑍁𑌕𑍍𑌤𑌃 𑌪𑌾𑌨𑌗𑌂𑌧𑌪𑍁𑌰𑌸𑍍𑌕𑍃𑌤𑌃 ॥ 23 ॥

𑌤𑌸𑍍𑌯 𑌰𑌾𑌕𑍍𑌷𑌸𑌸𑌿𑌂𑌹𑌸𑍍𑌯 𑌨𑌿𑌶𑍍𑌚𑌕𑍍𑌰𑌾𑌮 𑌮𑌹𑌾𑌮𑍁𑌖𑌾𑌤𑍍 ।
𑌶𑌯𑌾𑌨𑌸𑍍𑌯 𑌵𑌿𑌨𑌿𑌃𑌶𑍍𑌵𑌾𑌸𑌃 𑌪𑍂𑌰𑌯𑌨𑍍𑌨𑌿𑌵 𑌤𑌦𑍍 𑌗𑍃𑌹𑌮𑍍 ॥ 24 ॥

𑌮𑍁𑌕𑍍𑌤𑌾𑌮𑌣𑌿𑌵𑌿𑌚𑌿𑌤𑍍𑌰𑍇𑌣 𑌕𑌾𑌂𑌚𑌨𑍇𑌨 𑌵𑌿𑌰𑌾𑌜𑌿𑌤𑌮𑍍 ।
𑌮𑌕𑍁𑌟𑍇𑌨𑌾𑌪𑌵𑍃𑌤𑍍𑌤𑍇𑌨 𑌕𑍁𑌂𑌡𑌲𑍋𑌜𑍍𑌵𑌲𑌿𑌤𑌾𑌨𑌨𑌮𑍍 ॥ 25 ॥

𑌰𑌕𑍍𑌤𑌚𑌂𑌦𑌨𑌦𑌿𑌗𑍍𑌧𑍇𑌨 𑌤𑌥𑌾 𑌹𑌾𑌰𑍇𑌣 𑌶𑍋𑌭𑌿𑌨𑌾 ।
𑌪𑍀𑌨𑌾𑌯𑌤𑌵𑌿𑌶𑌾𑌲𑍇𑌨 𑌵𑌕𑍍𑌷𑌸𑌾𑌽𑌭𑌿𑌵𑌿𑌰𑌾𑌜𑌿𑌤𑌮𑍍 ॥ 26 ॥

𑌪𑌾𑌂𑌡𑌰𑍇𑌣𑌾𑌪𑌵𑌿𑌦𑍍𑌧𑍇𑌨 𑌕𑍍𑌷𑍌𑌮𑍇𑌣 𑌕𑍍𑌷𑌤𑌜𑍇𑌕𑍍𑌷𑌣𑌮𑍍 ।
𑌮𑌹𑌾𑌰𑍍𑌹𑍇𑌣 𑌸𑍁𑌸𑌂𑌵𑍀𑌤𑌂 𑌪𑍀𑌤𑍇𑌨𑍋𑌤𑍍𑌤𑌮𑌵𑌾𑌸𑌸𑌾 ॥ 2𑍭 ॥

𑌮𑌾𑌷𑌰𑌾𑌶𑌿𑌪𑍍𑌰𑌤𑍀𑌕𑌾𑌶𑌂 𑌨𑌿𑌶𑍍𑌶𑍍𑌵𑌸𑌂𑌤𑌂 𑌭𑍁𑌜𑌂𑌗𑌵𑌤𑍍 ।
𑌗𑌾𑌂𑌗𑍇 𑌮𑌹𑌤𑌿 𑌤𑍋𑌯𑌾𑌂𑌤𑍇 𑌪𑍍𑌰𑌸𑍁𑌪𑍍𑌤𑌮𑌿𑌵 𑌕𑍁𑌂𑌜𑌰𑌮𑍍 ॥ 2𑍮 ॥

𑌚𑌤𑍁𑌰𑍍𑌭𑌿𑌃 𑌕𑌾𑌂𑌚𑌨𑍈𑌰𑍍𑌦𑍀𑌪𑍈𑌦𑍍𑌧𑍀𑌪𑍍𑌯𑌮𑌾𑌨𑌚𑌤𑍁𑌰𑍍𑌦𑌿𑌶𑌮𑍍 ।
𑌪𑍍𑌰𑌕𑌾𑌶𑍀𑌕𑍃𑌤𑌸𑌰𑍍𑌵𑌾𑌂𑌗𑌂 𑌮𑍇𑌘𑌂 𑌵𑌿𑌦𑍍𑌯𑍁𑌦𑍍𑌗𑌣𑍈𑌰𑌿𑌵 ॥ 2𑍯 ॥

𑌪𑌾𑌦𑌮𑍂𑌲𑌗𑌤𑌾𑌶𑍍𑌚𑌾𑌪𑌿 𑌦𑌦𑌰𑍍𑌶 𑌸𑍁𑌮𑌹𑌾𑌤𑍍𑌮𑌨𑌃 ।
𑌪𑌤𑍍𑌨𑍀𑌃 𑌸 𑌪𑍍𑌰𑌿𑌯𑌭𑌾𑌰𑍍𑌯𑌸𑍍𑌯 𑌤𑌸𑍍𑌯 𑌰𑌕𑍍𑌷𑌃𑌪𑌤𑍇𑌰𑍍𑌗𑍃𑌹𑍇 ॥ 30 ॥

𑌶𑌶𑌿𑌪𑍍𑌰𑌕𑌾𑌶𑌵𑌦𑌨𑌾𑌶𑍍𑌚𑌾𑌰𑍁𑌕𑍁𑌂𑌡𑌲𑌭𑍂𑌷𑌿𑌤𑌾𑌃 ।
𑌅𑌮𑍍𑌲𑌾𑌨𑌮𑌾𑌲𑍍𑌯𑌾𑌭𑌰𑌣𑌾 𑌦𑌦𑌰𑍍𑌶 𑌹𑌰𑌿𑌯𑍂𑌥𑌪𑌃 ॥ 31 ॥

𑌨𑍃𑌤𑍍𑌤𑌵𑌾𑌦𑌿𑌤𑍍𑌰𑌕𑍁𑌶𑌲𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑌭𑍁𑌜𑌾𑌂𑌕𑌗𑌾𑌃 ।
𑌵𑌰𑌾𑌭𑌰𑌣𑌧𑌾𑌰𑌿𑌣𑍍𑌯𑍋 𑌨𑌿𑌷𑌣𑍍𑌣𑌾 𑌦𑌦𑍃𑌶𑍇 𑌹𑌰𑌿𑌃 ॥ 32 ॥

𑌵𑌜𑍍𑌰𑌵𑍈𑌡𑍂𑌰𑍍𑌯𑌗𑌰𑍍𑌭𑌾𑌣𑌿 𑌶𑍍𑌰𑌵𑌣𑌾𑌂𑌤𑍇𑌷𑍁 𑌯𑍋𑌷𑌿𑌤𑌾𑌮𑍍 ।
𑌦𑌦𑌰𑍍𑌶 𑌤𑌾𑌪𑌨𑍀𑌯𑌾𑌨𑌿 𑌕𑍁𑌂𑌡𑌲𑌾𑌨𑍍𑌯𑌂𑌗𑌦𑌾𑌨𑌿 𑌚 ॥ 33 ॥

𑌤𑌾𑌸𑌾𑌂 𑌚𑌂𑌦𑍍𑌰𑍋𑌪𑌮𑍈𑌰𑍍𑌵𑌕𑍍𑌤𑍍𑌰𑍈𑌶𑍍𑌶𑍁𑌭𑍈𑌰𑍍𑌲𑌲𑌿𑌤𑌕𑍁𑌂𑌡𑌲𑍈𑌃 ।
𑌵𑌿𑌰𑌰𑌾𑌜 𑌵𑌿𑌮𑌾𑌨𑌂 𑌤𑌨𑍍𑌨𑌭𑌸𑍍𑌤𑌾𑌰𑌾𑌗𑌣𑍈𑌰𑌿𑌵 ॥ 34 ॥

𑌮𑌦𑌵𑍍𑌯𑌾𑌯𑌾𑌮𑌖𑌿𑌨𑍍𑌨𑌾𑌸𑍍𑌤𑌾 𑌰𑌾𑌕𑍍𑌷𑌸𑍇𑌂𑌦𑍍𑌰𑌸𑍍𑌯 𑌯𑍋𑌷𑌿𑌤𑌃 ।
𑌤𑍇𑌷𑍁 𑌤𑍇𑌷𑍍𑌵𑌵𑌕𑌾𑌶𑍇𑌷𑍁 𑌪𑍍𑌰𑌸𑍁𑌪𑍍𑌤𑌾𑌸𑍍𑌤𑌨𑍁𑌮𑌧𑍍𑌯𑌮𑌾𑌃 ॥ 35 ॥

𑌅𑌂𑌗𑌹𑌾𑌰𑍈𑌸𑍍𑌤𑌥𑍈𑌵𑌾𑌨𑍍𑌯𑌾 𑌕𑍋𑌮𑌲𑍈𑌰𑍍𑌨𑍃𑌤𑍍𑌤𑌶𑌾𑌲𑌿𑌨𑍀 ।
𑌵𑌿𑌨𑍍𑌯𑌸𑍍𑌤𑌶𑍁𑌭𑌸𑌰𑍍𑌵𑌾𑌂𑌗𑍀 𑌪𑍍𑌰𑌸𑍁𑌪𑍍𑌤𑌾 𑌵𑌰𑌵𑌰𑍍𑌣𑌿𑌨𑍀 ॥ 36 ॥

𑌕𑌾𑌚𑌿𑌦𑍍𑌵𑍀𑌣𑌾𑌂 𑌪𑌰𑌿𑌷𑍍𑌵𑌜𑍍𑌯 𑌪𑍍𑌰𑌸𑍁𑌪𑍍𑌤𑌾 𑌸𑌂𑌪𑍍𑌰𑌕𑌾𑌶𑌤𑍇 ।
𑌮𑌹𑌾𑌨𑌦𑍀𑌪𑍍𑌰𑌕𑍀𑌰𑍍𑌣𑍇𑌵 𑌨𑌲𑌿𑌨𑍀 𑌪𑍋𑌤𑌮𑌾𑌶𑍍𑌰𑌿𑌤𑌾 ॥ 3𑍭 ॥

𑌅𑌨𑍍𑌯𑌾 𑌕𑌕𑍍𑌷𑌗𑌤𑍇𑌨𑍈𑌵 𑌮𑌡𑍍𑌡𑍁𑌕𑍇𑌨𑌾𑌸𑌿𑌤𑍇𑌕𑍍𑌷𑌣𑌾 ।
𑌪𑍍𑌰𑌸𑍁𑌪𑍍𑌤𑌾 𑌭𑌾𑌮𑌿𑌨𑍀 𑌭𑌾𑌤𑌿 𑌬𑌾𑌲𑌪𑍁𑌤𑍍𑌰𑍇𑌵 𑌵𑌤𑍍𑌸𑌲𑌾 ॥ 3𑍮 ॥

𑌪𑌟𑌹𑌂 𑌚𑌾𑌰𑍁𑌸𑌰𑍍𑌵𑌾𑌂𑌗𑍀 𑌪𑍀𑌡𑍍𑌯 𑌶𑍇𑌤𑍇 𑌶𑍁𑌭𑌸𑍍𑌤𑌨𑍀 ।
𑌚𑌿𑌰𑌸𑍍𑌯 𑌰𑌮𑌣𑌂 𑌲𑌬𑍍𑌧𑍍𑌵𑌾 𑌪𑌰𑌿𑌷𑍍𑌵𑌜𑍍𑌯𑍇𑌵 𑌭𑌾𑌮𑌿𑌨𑍀 ॥ 3𑍯 ॥

𑌕𑌾𑌚𑌿𑌦𑍍𑌵𑌂𑌶𑌂 𑌪𑌰𑌿𑌷𑍍𑌵𑌜𑍍𑌯 𑌸𑍁𑌪𑍍𑌤𑌾 𑌕𑌮𑌲𑌲𑍋𑌚𑌨𑌾 ।
𑌰𑌹𑌃 𑌪𑍍𑌰𑌿𑌯𑌤𑌮𑌂 𑌗𑍃𑌹𑍍𑌯 𑌸𑌕𑌾𑌮𑍇𑌵 𑌚 𑌕𑌾𑌮𑌿𑌨𑍀 ॥ 40 ॥

𑌵𑌿𑌪𑌂𑌚𑍀𑌂 𑌪𑌰𑌿𑌗𑍃𑌹𑍍𑌯𑌾𑌨𑍍𑌯𑌾 𑌨𑌿𑌯𑌤𑌾 𑌨𑍃𑌤𑍍𑌤𑌶𑌾𑌲𑌿𑌨𑍀 ।
𑌨𑌿𑌦𑍍𑌰𑌾𑌵𑌶𑌮𑌨𑍁𑌪𑍍𑌰𑌾𑌪𑍍𑌤𑌾 𑌸𑌹 𑌕𑌾𑌂𑌤𑍇𑌵 𑌭𑌾𑌮𑌿𑌨𑍀 ॥ 41 ॥

𑌅𑌨𑍍𑌯𑌾 𑌕𑌨𑌕𑌸𑌂𑌕𑌾𑌶𑍈𑌰𑍍𑌮𑍃𑌦𑍁𑌪𑍀𑌨𑍈𑌰𑍍𑌮𑌨𑍋𑌰𑌮𑍈𑌃 ।
𑌮𑍃𑌦𑌂𑌗𑌂 𑌪𑌰𑌿𑌪𑍀𑌡𑍍𑌯𑌾𑌂𑌗𑍈𑌃 𑌪𑍍𑌰𑌸𑍁𑌪𑍍𑌤𑌾 𑌮𑌤𑍍𑌤𑌲𑍋𑌚𑌨𑌾 ॥ 42 ॥

𑌭𑍁𑌜𑌪𑌾𑌰𑍍𑌶𑍍𑌵𑌾𑌂𑌤𑌰𑌸𑍍𑌥𑍇𑌨 𑌕𑌕𑍍𑌷𑌗𑍇𑌨 𑌕𑍃𑌶𑍋𑌦𑌰𑍀 ।
𑌪𑌣𑌵𑍇𑌵 𑌸𑌹𑌾𑌨𑌿𑌂𑌦𑍍𑌯𑌾 𑌸𑍁𑌪𑍍𑌤𑌾 𑌮𑌦𑌕𑍃𑌤𑌶𑍍𑌰𑌮𑌾 ॥ 43 ॥

𑌡𑌿𑌂𑌡𑌿𑌮𑌂 𑌪𑌰𑌿𑌗𑍃𑌹𑍍𑌯𑌾𑌨𑍍𑌯𑌾 𑌤𑌥𑍈𑌵𑌾𑌸𑌕𑍍𑌤𑌡𑌿𑌂𑌡𑌿𑌮𑌾 ।
𑌪𑍍𑌰𑌸𑍁𑌪𑍍𑌤𑌾 𑌤𑌰𑍁𑌣𑌂 𑌵𑌤𑍍𑌸𑌮𑍁𑌪𑌗𑍂𑌹𑍍𑌯𑍇𑌵 𑌭𑌾𑌮𑌿𑌨𑍀 ॥ 44 ॥

𑌕𑌾𑌚𑌿𑌦𑌾𑌡𑌂𑌬𑌰𑌂 𑌨𑌾𑌰𑍀 𑌭𑍁𑌜𑌸𑌂𑌯𑍋𑌗𑌪𑍀𑌡𑌿𑌤𑌮𑍍 ।
𑌕𑍃𑌤𑍍𑌵𑌾 𑌕𑌮𑌲𑌪𑌤𑍍𑌰𑌾𑌕𑍍𑌷𑍀 𑌪𑍍𑌰𑌸𑍁𑌪𑍍𑌤𑌾 𑌮𑌦𑌮𑍋𑌹𑌿𑌤𑌾 ॥ 45 ॥

𑌕𑌲𑌶𑍀𑌮𑌪𑌵𑌿𑌧𑍍𑌯𑌾𑌨𑍍𑌯𑌾 𑌪𑍍𑌰𑌸𑍁𑌪𑍍𑌤𑌾 𑌭𑌾𑌤𑌿 𑌭𑌾𑌮𑌿𑌨𑍀 ।
𑌵𑌸𑌂𑌤𑍇 𑌪𑍁𑌷𑍍𑌪𑌶𑌬𑌲𑌾 𑌮𑌾𑌲𑍇𑌵 𑌪𑌰𑌿𑌮𑌾𑌰𑍍𑌜𑌿𑌤𑌾 ॥ 46 ॥

𑌪𑌾𑌣𑌿𑌭𑍍𑌯𑌾𑌂 𑌚 𑌕𑍁𑌚𑍌 𑌕𑌾𑌚𑌿𑌤𑍍𑌸𑍁𑌵𑌰𑍍𑌣𑌕𑌲𑌶𑍋𑌪𑌮𑍌 ।
𑌉𑌪𑌗𑍂𑌹𑍍𑌯𑌾𑌬𑌲𑌾 𑌸𑍁𑌪𑍍𑌤𑌾 𑌨𑌿𑌦𑍍𑌰𑌾𑌬𑌲𑌪𑌰𑌾𑌜𑌿𑌤𑌾 ॥ 4𑍭 ॥

𑌅𑌨𑍍𑌯𑌾 𑌕𑌮𑌲𑌪𑌤𑍍𑌰𑌾𑌕𑍍𑌷𑍀 𑌪𑍂𑌰𑍍𑌣𑍇𑌂𑌦𑍁𑌸𑌦𑍃𑌶𑌾𑌨𑌨𑌾 ।
𑌅𑌨𑍍𑌯𑌾𑌮𑌾𑌲𑌿𑌂𑌗𑍍𑌯 𑌸𑍁𑌶𑍍𑌰𑍋𑌣𑍀𑌂 𑌪𑍍𑌰𑌸𑍁𑌪𑍍𑌤𑌾 𑌮𑌦𑌵𑌿𑌹𑍍𑌵𑌲𑌾 ॥ 4𑍮 ॥

𑌆𑌤𑍋𑌦𑍍𑌯𑌾𑌨𑌿 𑌵𑌿𑌚𑌿𑌤𑍍𑌰𑌾𑌣𑌿 𑌪𑌰𑌿𑌷𑍍𑌵𑌜𑍍𑌯 𑌵𑌰𑌸𑍍𑌤𑍍𑌰𑌿𑌯𑌃 ।
𑌨𑌿𑌪𑍀𑌡𑍍𑌯 𑌚 𑌕𑍁𑌚𑍈𑌸𑍍𑌸𑍁𑌪𑍍𑌤𑌾 𑌕𑌾𑌮𑌿𑌨𑍍𑌯𑌃 𑌕𑌾𑌮𑍁𑌕𑌾𑌨𑌿𑌵 ॥ 4𑍯 ॥

𑌤𑌾𑌸𑌾𑌮𑍇𑌕𑌾𑌂𑌤𑌵𑌿𑌨𑍍𑌯𑌸𑍍𑌤𑍇 𑌶𑌯𑌾𑌨𑌾𑌂 𑌶𑌯𑌨𑍇 𑌶𑍁𑌭𑍇 ।
𑌦𑌦𑌰𑍍𑌶 𑌰𑍂𑌪𑌸𑌂𑌪𑌨𑍍𑌨𑌾𑌮𑌪𑌰𑌾𑌂 𑌸 𑌕𑌪𑌿𑌃 𑌸𑍍𑌤𑍍𑌰𑌿𑌯𑌮𑍍 ॥ 50 ॥

𑌮𑍁𑌕𑍍𑌤𑌾𑌮𑌣𑌿𑌸𑌮𑌾𑌯𑍁𑌕𑍍𑌤𑍈𑌰𑍍𑌭𑍂𑌷𑌣𑍈𑌃 𑌸𑍁𑌵𑌿𑌭𑍂𑌷𑌿𑌤𑌾𑌮𑍍 ।
𑌵𑌿𑌭𑍂𑌷𑌯𑌂𑌤𑍀𑌮𑌿𑌵 𑌤𑌤𑍍𑌸𑍍𑌵𑌶𑍍𑌰𑌿𑌯𑌾 𑌭𑌵𑌨𑍋𑌤𑍍𑌤𑌮𑌮𑍍 ॥ 51 ॥

𑌗𑍌𑌰𑍀𑌂 𑌕𑌨𑌕𑌵𑌰𑍍𑌣𑌾𑌭𑌾𑌮𑌿𑌷𑍍𑌟𑌾𑌮𑌂𑌤𑌃 𑌪𑍁𑌰𑍇𑌶𑍍𑌵𑌰𑍀𑌮𑍍 ।
𑌕𑌪𑌿𑌰𑍍𑌮𑌂𑌦𑍋𑌦𑌰𑍀𑌂 𑌤𑌤𑍍𑌰 𑌶𑌯𑌾𑌨𑌾𑌂 𑌚𑌾𑌰𑍁𑌰𑍂𑌪𑌿𑌣𑍀𑌮𑍍 ॥ 52 ॥

𑌸 𑌤𑌾𑌂 𑌦𑍃𑌷𑍍𑌟𑍍𑌵𑌾 𑌮𑌹𑌾𑌬𑌾𑌹𑍁𑌰𑍍𑌭𑍂𑌷𑌿𑌤𑌾𑌂 𑌮𑌾𑌰𑍁𑌤𑌾𑌤𑍍𑌮𑌜𑌃 ।
𑌤𑌰𑍍𑌕𑌯𑌾𑌮𑌾𑌸 𑌸𑍀𑌤𑍇𑌤𑌿 𑌰𑍂𑌪𑌯𑍌𑌵𑌨𑌸𑌂𑌪𑌦𑌾 ॥ 53 ॥

𑌹𑌰𑍍𑌷𑍇𑌣 𑌮𑌹𑌤𑌾 𑌯𑍁𑌕𑍍𑌤𑍋 𑌨𑌨𑌂𑌦 𑌹𑌰𑌿𑌯𑍂𑌥𑌪𑌃 ।
𑌆𑌸𑍍𑌫𑍋𑌟𑌯𑌾𑌮𑌾𑌸 𑌚𑍁𑌚𑍁𑌂𑌬 𑌪𑍁𑌚𑍍𑌛𑌂 𑌨𑌨𑌂𑌦 𑌚𑌿𑌕𑍍𑌰𑍀𑌡 𑌜𑌗𑍌 𑌜𑌗𑌾𑌮 ।
𑌸𑍍𑌤𑌂𑌭𑌾𑌨𑌰𑍋𑌹𑌨𑍍𑌨𑌿𑌪𑌪𑌾𑌤 𑌭𑍂𑌮𑍌 𑌨𑌿𑌦𑌰𑍍𑌶𑌯𑌨𑍍 𑌸𑍍𑌵𑌾𑌂 𑌪𑍍𑌰𑌕𑍃𑌤𑌿𑌂 𑌕𑌪𑍀𑌨𑌾𑌮𑍍 ॥ 54 ॥

𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌦𑌶𑌮𑌸𑍍𑌸𑌰𑍍𑌗𑌃 ॥


Browse Related Categories: