𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑌮𑍍 ।
𑌅𑌥 𑌚𑌤𑍁𑌰𑍍𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ।
𑌸𑍍𑌨𑌿𑌗𑍍𑌧𑌗𑌂𑌭𑍀𑌰𑌘𑍋𑌷𑍇𑌣 𑌸𑍍𑌯𑌂𑌦𑌨𑍇𑌨𑍋𑌪𑌯𑌾𑌨𑍍𑌪𑍍𑌰𑌭𑍁𑌃 ।
𑌅𑌯𑍋𑌧𑍍𑌯𑌾𑌂 𑌭𑌰𑌤𑌃 𑌕𑍍𑌷𑌿𑌪𑍍𑌰𑌂 𑌪𑍍𑌰𑌵𑌿𑌵𑍇𑌶 𑌮𑌹𑌾𑌯𑌶𑌾𑌃 ॥ 1 ॥
𑌬𑌿𑌡𑌾𑌲𑍋𑌲𑍂𑌕𑌚𑌰𑌿𑌤𑌾𑌮𑌾𑌲𑍀𑌨𑌨𑌰𑌵𑌾𑌰𑌣𑌾𑌮𑍍 ।
𑌤𑌿𑌮𑌿𑌰𑌾𑌭𑍍𑌯𑌾𑌹𑌤𑌾𑌂 𑌕𑌾𑌲𑍀𑌮𑌪𑍍𑌰𑌕𑌾𑌶𑌾𑌂 𑌨𑌿𑌶𑌾𑌮𑌿𑌵 ॥ 2 ॥
𑌰𑌾𑌹𑍁𑌶𑌤𑍍𑌰𑍋𑌃 𑌪𑍍𑌰𑌿𑌯𑌾𑌂 𑌪𑌤𑍍𑌨𑍀𑌂 𑌶𑍍𑌰𑌿𑌯𑌾 𑌪𑍍𑌰𑌜𑍍𑌵𑌲𑌿𑌤𑌪𑍍𑌰𑌭𑌾𑌮𑍍 ।
𑌗𑍍𑌰𑌹𑍇𑌣𑌾𑌭𑍍𑌯𑍁𑌤𑍍𑌥𑌿𑌤𑍇𑌨𑍈𑌕𑌾𑌂 𑌰𑍋𑌹𑌿𑌣𑍀𑌮𑌿𑌵 𑌪𑍀𑌡𑌿𑌤𑌾𑌮𑍍 ॥ 3 ॥
𑌅𑌲𑍍𑌪𑍋𑌷𑍍𑌣𑌕𑍍𑌷𑍁𑌬𑍍𑌧𑌸𑌲𑌿𑌲𑌾𑌂 𑌘𑌰𑍍𑌮𑍋𑌤𑍍𑌤𑌪𑍍𑌤𑌵𑌿𑌹𑌂𑌗𑌮𑌾𑌮𑍍 ।
𑌲𑍀𑌨𑌮𑍀𑌨𑌝𑌷𑌗𑍍𑌰𑌾𑌹𑌾𑌂 𑌕𑍃𑌶𑌾𑌂 𑌗𑌿𑌰𑌿𑌨𑌦𑍀𑌮𑌿𑌵 ॥ 4 ॥
𑌵𑌿𑌧𑍂𑌮𑌾𑌮𑌿𑌵 𑌹𑍇𑌮𑌾𑌭𑌾𑌮𑌧𑍍𑌵𑌰𑌾𑌗𑍍𑌨𑍇 𑌸𑍍𑌸𑌮𑍁𑌤𑍍𑌥𑌿𑌤𑌾𑌮𑍍 ।
𑌹𑌵𑌿𑌰𑌭𑍍𑌯𑍁𑌕𑍍𑌷𑌿𑌤𑌾𑌂 𑌪𑌶𑍍𑌚𑌾𑌚𑍍𑌛𑌿𑌖𑌾𑌂 𑌵𑌿𑌪𑍍𑌰𑌲𑌯𑌂 𑌗𑌤𑌾𑌮𑍍 ॥ 5 ॥
𑌵𑌿𑌧𑍍𑌵𑌸𑍍𑌤𑌕𑌵𑌚𑌾𑌂 𑌰𑍁𑌗𑍍𑌣𑌗𑌜𑌵𑌾𑌜𑌿𑌰𑌥𑌧𑍍𑌵𑌜𑌾𑌮𑍍 ।
𑌹𑌤𑌪𑍍𑌰𑌵𑍀𑌰𑌾𑌮𑌾𑌪𑌨𑍍𑌨𑌾𑌂 𑌚𑌮𑍂𑌮𑌿𑌵 𑌮𑌹𑌾𑌹𑌵𑍇 ॥ 6 ॥
𑌸𑌫𑍇𑌨𑌾𑌂 𑌸𑌸𑍍𑌵𑌨𑌾𑌂 𑌭𑍂𑌤𑍍𑌵𑌾 𑌸𑌾𑌗𑌰𑌸𑍍𑌯 𑌸𑌮𑍁𑌤𑍍𑌥𑌿𑌤𑌾𑌮𑍍 ।
𑌪𑍍𑌰𑌶𑌾𑌂𑌤𑌮𑌾𑌰𑍁𑌤𑍋𑌦𑍍𑌧𑍂𑌤𑌾𑌂 𑌜𑌲𑍋𑌰𑍍𑌮𑌿𑌮𑌿𑌵 𑌨𑌿𑌸𑍍𑌸𑍍𑌵𑌨𑌾𑌮𑍍 ॥ ॥
𑌤𑍍𑌯𑌕𑍍𑌤𑌾𑌂 𑌯𑌜𑍍𑌞𑌾𑌯𑍁𑌧𑍈𑌃 𑌸𑌰𑍍𑌵𑍈𑌰𑌭𑌿𑌰𑍂𑌪𑍈𑌶𑍍𑌚 𑌯𑌾𑌜𑌕𑍈𑌃 ।
𑌸𑍁𑌤𑍍𑌯𑌾𑌕𑌾𑌲𑍇 𑌸𑍁𑌨𑌿𑌰𑍍𑌵𑍃𑌤𑍍𑌤𑍇 𑌵𑍇𑌦𑌿𑌂 𑌗𑌤𑌰𑌵𑌾𑌮𑌿𑌵 ॥ ॥
𑌗𑍋𑌷𑍍𑌠𑌮𑌧𑍍𑌯𑍇 𑌸𑍍𑌥𑌿𑌤𑌾𑌮𑌾𑌰𑍍𑌤𑌾𑌮𑌚𑌰𑌂𑌤𑍀𑌂 𑌤𑍃𑌣𑌂 𑌨𑌵𑌮𑍍 ।
𑌗𑍋𑌵𑍃𑌷𑍇𑌣 𑌪𑌰𑌿𑌤𑍍𑌯𑌕𑍍𑌤𑌾𑌂 𑌗𑌵𑌾𑌂 𑌪𑌕𑍍𑌤𑌿𑌮𑌿𑌵𑍋𑌤𑍍𑌸𑍁𑌕𑌾𑌮𑍍 ॥ ॥
𑌪𑍍𑌰𑌭𑌾𑌕𑌰𑌾𑌦𑍍𑌯𑍈 𑌸𑍍𑌸𑍁𑌸𑍍𑌨𑌿𑌗𑍍𑌧𑍈𑌃 𑌪𑍍𑌰𑌜𑍍𑌵𑌲𑌦𑍍𑌭𑌿𑌰𑌿𑌵𑍋𑌤𑍍𑌤𑌮𑍈𑌃 ।
𑌵𑌿𑌯𑍁𑌕𑍍𑌤𑌾𑌂 𑌮𑌣𑌿𑌭𑌿𑌰𑍍𑌜𑌾𑌤𑍍𑌯𑍈𑌰𑍍𑌨𑌵𑌾𑌂 𑌮𑍁𑌕𑍍𑌤𑌾𑌵𑌲𑍀𑌮𑌿𑌵 ॥ 10 ॥
𑌸𑌹𑌸𑌾 𑌚𑌲𑌿𑌤𑌾𑌂 𑌸𑍍𑌥𑌾𑌨𑌾𑌨𑍍𑌮𑌹𑍀𑌂 𑌪𑍁𑌣𑍍𑌯𑌕𑍍𑌷𑌯𑌾𑌦𑍍𑌗𑌤𑌾𑌮𑍍 ।
𑌸𑌂𑌵𑍃𑌤𑌦𑍍𑌯𑍁𑌤𑌿𑌵𑌿𑌸𑍍𑌤𑌾𑌰𑌾𑌂 𑌤𑌾𑌰𑌾𑌮𑌿𑌵 𑌦𑌿𑌵𑌶𑍍𑌚𑍍𑌯𑍁𑌤𑌾𑌮𑍍 ॥ 11 ॥
𑌪𑍁𑌷𑍍𑌪𑌨𑌦𑍍𑌧𑌾𑌂 𑌵𑌸𑌂𑌤𑌾𑌂𑌤𑍇 𑌮𑌤𑍍𑌤𑌭𑍍𑌰𑌮𑌰𑌨𑌾𑌦𑌿𑌤𑌾𑌮𑍍 ।
𑌦𑍍𑌰𑍁𑌤𑌦𑌾𑌵𑌾𑌗𑍍𑌨𑌿 𑌵𑌿𑌪𑍍𑌲𑍁𑌷𑍍𑌟𑌾𑌂 𑌕𑍍𑌲𑌾𑌂𑌤𑌾𑌂 𑌵𑌨𑌲𑌤𑌾𑌮𑌿𑌵 ॥ 12 ॥
𑌸𑌮𑍍𑌮𑍂𑌢𑌨𑌿𑌗𑌮𑌾𑌂𑌸𑍍𑌤𑌬𑍍𑌧𑌾𑌂 𑌸𑌂𑌕𑍍𑌷𑌿𑌪𑍍𑌤𑌵𑌿𑌪𑌣𑌾𑌪𑌣𑌾𑌮𑍍 ।
𑌪𑍍𑌰𑌚𑍍𑌛𑌨𑍍𑌨𑌶𑌶𑌿𑌨𑌕𑍍𑌷𑌤𑍍𑌰𑌾𑌂 𑌦𑍍𑌯𑌾𑌮𑌿𑌵𑌾𑌂𑌬𑍁𑌧𑌰𑍈𑌰𑍍𑌵𑍃𑌤𑌾𑌮𑍍 ॥ 13 ॥
𑌕𑍍𑌷𑍀𑌣𑌪𑌾𑌨𑍋𑌤𑍍𑌤𑌮𑍈𑌰𑍍𑌭𑌗𑍍𑌨𑍈𑌃 𑌶𑌰𑌾𑌵𑍈𑌰𑌭𑌿𑌸𑌂𑌵𑍃𑌤𑌾𑌮𑍍 ।
𑌹𑌤𑌶𑍌𑌂𑌡𑌾𑌮𑌿𑌵 𑌧𑍍𑌵𑌸𑍍𑌤𑌾𑌂𑌂 𑌪𑌾𑌨𑌭𑍂𑌮𑌿𑌮𑌸𑌂𑌸𑍍𑌕𑍃𑌤𑌾𑌮𑍍 ॥ 14 ॥
𑌵𑍃𑌕𑍍𑌣𑌭𑍂𑌮𑌿𑌤𑌲𑌾𑌂 𑌨𑌿𑌮𑍍𑌨𑌾𑌂 𑌵𑍃𑌕𑍍𑌣𑌪𑌾𑌤𑍍𑌰𑍈𑌸𑍍𑌸𑌮𑌾𑌵𑍃𑌤𑌾𑌮𑍍 ।
𑌉𑌪𑌯𑍁𑌕𑍍𑌤𑍋𑌦𑌕𑌾𑌂 𑌭𑌗𑍍𑌨𑌾𑌂 𑌪𑍍𑌰𑌪𑌾𑌂 𑌨𑌿𑌪𑌤𑌿𑌤𑌾𑌮𑌿𑌵 ॥ 15 ॥
𑌵𑌿𑌪𑍁𑌲𑌾𑌂 𑌵𑌿𑌤𑌤𑌾𑌂 𑌚𑍈𑌵 𑌯𑍁𑌕𑍍𑌤𑌪𑌾𑌶𑌾𑌂 𑌤𑌰𑌸𑍍𑌵𑌿𑌨𑌾𑌮𑍍 ।
𑌭𑍂𑌮𑍌 𑌬𑌾𑌣𑍈𑌰𑍍𑌵𑌿𑌨𑌿𑌷𑍍𑌕𑍃𑌤𑍍𑌤𑌾𑌂 𑌪𑌤𑌿𑌤𑌾𑌂 𑌜𑍍𑌯𑌾𑌮𑌿𑌵𑌾𑌯𑍁𑌧𑌾𑌤𑍍 ॥ 16 ॥
𑌸𑌹𑌸𑌾 𑌯𑍁𑌦𑍍𑌧𑌶𑍌𑌂𑌡𑍇𑌨 𑌹𑌯𑌾𑌰𑍋𑌹𑍇𑌣 𑌵𑌾𑌹𑌿𑌤𑌾𑌮𑍍 ।
𑌨𑌿𑌹𑌤𑌾𑌂 𑌪𑍍𑌰𑌤𑌿𑌸𑍈𑌨𑍍𑌯𑍇𑌨 𑌵𑌡𑌵𑌾𑌮𑌿𑌵 𑌪𑌾𑌤𑌿𑌤𑌾𑌮𑍍 ॥ 1 ॥
𑌶𑍁𑌷𑍍𑌕𑌤𑍋𑌯𑌾𑌂 𑌮𑌹𑌾𑌮𑌤𑍍𑌸𑍍𑌯𑍈𑌃 𑌕𑍂𑌰𑍍𑌮𑍈𑌶𑍍𑌚 𑌬𑌹𑍁𑌭𑌿𑌰𑍍𑌵𑍃𑌤𑌾𑌮𑍍 ।
𑌪𑍍𑌰𑌭𑌿𑌨𑍍𑌨𑌤𑌟𑌵𑌿𑌸𑍍𑌤𑍀𑌰𑍍𑌣𑌾𑌂 𑌵𑌾𑌪𑍀𑌮𑌿𑌵 𑌹𑍃𑌤𑍋𑌤𑍍𑌪𑌲𑌾𑌮𑍍 ॥ 1 ॥
𑌪𑍁𑌰𑍁𑌷𑌸𑍍𑌯𑌾𑌪𑍍𑌰𑌹𑍃𑌷𑍍𑌟𑌸𑍍𑌯 𑌪𑍍𑌰𑌤𑌿𑌷𑌿𑌦𑍍𑌧𑌾𑌨𑍁𑌲𑍇𑌪𑌨𑌾𑌮𑍍 ।
𑌸𑌂𑌤𑌪𑍍𑌤𑌾𑌮𑌿𑌵 𑌶𑍋𑌕𑍇𑌨 𑌗𑌾𑌤𑍍𑌰𑌯𑌷𑍍𑌟𑌿𑌮𑌭𑍂𑌷𑌣𑌾𑌮𑍍 ॥ 1 ॥
𑌪𑍍𑌰𑌾𑌵𑍃𑌷𑌿 𑌪𑍍𑌰𑌵𑌿𑌗𑌾𑌢𑌾𑌯𑌾𑌂 𑌪𑍍𑌰𑌵𑌿𑌷𑍍𑌟𑌸𑍍𑌯𑌾𑌭𑍍𑌰𑌮𑌂𑌡𑌲𑌮𑍍 ।
𑌪𑍍𑌰𑌚𑍍𑌛𑌨𑍍𑌨𑌾𑌂 𑌨𑍀𑌲𑌜𑍀𑌮𑍂𑌤𑍈𑌰𑍍𑌭𑌾𑌸𑍍𑌕𑌰𑌸𑍍𑌯 𑌪𑍍𑌰𑌭𑌾𑌮𑌿𑌵 ॥ 20 ॥
𑌭𑌰𑌤𑌸𑍍𑌤𑍁 𑌰𑌥𑌸𑍍𑌥 𑌸𑍍𑌸𑌨𑍍 𑌶𑍍𑌰𑍀𑌮𑌾𑌂𑌦𑌶𑌰𑌥𑌾𑌤𑍍𑌮𑌜𑌃 ।
𑌵𑌾𑌹𑌯𑌂𑌤𑌂 𑌰𑌥𑌶𑍍𑌰𑍇𑌷𑍍𑌠𑌂 𑌸𑌾𑌰𑌥𑌿𑌂 𑌵𑌾𑌕𑍍𑌯𑌮𑌬𑍍𑌰𑌵𑍀𑌤𑍍 ॥ 21 ॥
𑌕𑌿𑌂 𑌨𑍁 𑌖𑌲𑍍𑌵𑌦𑍍𑌯 𑌗𑌂𑌭𑍀𑌰𑍋 𑌮𑍂𑌰𑍍𑌛𑌿𑌤𑍋 𑌨 𑌨𑌿𑌶𑌮𑍍𑌯𑌤𑍇 ।
𑌯𑌥𑌾𑌪𑍁𑌰𑌮𑌯𑍋𑌧𑍍𑌯𑌾𑌯𑌾𑌂 𑌗𑍀𑌤𑌵𑌾𑌦𑌿𑌤𑍍𑌰𑌨𑌿𑌸𑍍𑌵𑌨𑌃 ॥ 22 ॥
𑌵𑌾𑌰𑍁𑌣𑍀𑌮𑌦𑌗𑌂𑌧𑌶𑍍𑌚 𑌮𑌾𑌲𑍍𑌯𑌗𑌂𑌧𑌶𑍍𑌚 𑌮𑍂𑌰𑍍𑌛𑌿𑌤𑌃 ।
𑌧𑍂𑌪𑌿𑌤𑌾𑌗𑍁𑌰𑍁𑌗𑌂𑌧𑌶𑍍𑌚 𑌨 𑌪𑍍𑌰𑌵𑌾𑌤𑌿 𑌸𑌮𑌂𑌤𑌤𑌃 ॥ 23 ॥
𑌯𑌾𑌨𑌪𑍍𑌰𑌵𑌰𑌘𑍋𑌷𑌶𑍍𑌚 𑌸𑍍𑌨𑌿𑌗𑍍𑌧𑌶𑍍𑌚 𑌹𑌯𑌨𑌿𑌸𑍍𑌵𑌨𑌃 ।
𑌪𑍍𑌰𑌮𑌤𑍍𑌤𑌗𑌜𑌨𑌾𑌦𑌶𑍍𑌚 𑌮𑌹𑌾𑌂𑌶𑍍𑌚 𑌰𑌥𑌨𑌿𑌸𑍍𑌵𑌨𑌃 ॥ 24 ॥
𑌨𑍇𑌦𑌾𑌨𑍀𑌂 𑌶𑍍𑌰𑍂𑌯𑌤𑍇 𑌪𑍁𑌰𑍍𑌯𑌾𑌮𑌸𑍍𑌯𑌾𑌂 𑌰𑌾𑌮𑍇 𑌵𑌿𑌵𑌾𑌸𑌿𑌤𑍇 ।
𑌚𑌂𑌦𑌨𑌾𑌗𑌰𑍁𑌗𑌂𑌧𑌾𑌂𑌶𑍍𑌚 𑌮𑌹𑌾𑌰𑍍𑌹𑌾𑌶𑍍𑌚 𑌨𑌵𑌸𑍍𑌰𑌜𑌃 ।
𑌗𑌤𑍇 𑌹𑌿 𑌰𑌾𑌮𑍇 𑌤𑌰𑍁𑌣𑌾 𑌸𑍍𑌸𑌂𑌤𑌪𑍍𑌤𑌾 𑌨𑍋𑌪𑌭𑍁𑌂𑌜𑌤𑍇 ॥ 25 ॥
𑌬𑌹𑌿𑌰𑍍𑌯𑌾𑌤𑍍𑌰𑌾𑌂 𑌨 𑌗𑌚𑍍𑌛𑌂𑌤𑌿 𑌚𑌿𑌤𑍍𑌰𑌮𑌾𑌲𑍍𑌯𑌧𑌰𑌾 𑌨𑌰𑌾𑌃 ।
𑌨𑍋𑌤𑍍𑌸𑌵𑌾 𑌸𑍍𑌸𑌂𑌪𑍍𑌰𑌵𑌰𑍍𑌤𑌂𑌤𑍇 𑌰𑌾𑌮𑌶𑍋𑌕𑌾𑌰𑍍𑌦𑌿𑌤𑍇 𑌪𑍁𑌰𑍇 ॥ 26 ॥
𑌸𑌹 𑌨𑍂𑌨𑌂 𑌮𑌮 𑌭𑍍𑌰𑌾𑌤𑍍𑌰𑌾 𑌪𑍁𑌰𑌸𑍍𑌯𑌾𑌸𑍍𑌯 𑌦𑍍𑌯𑍁𑌤𑌿𑌰𑍍𑌗𑌤𑌾 ।
𑌨 𑌹𑌿 𑌰𑌾𑌜𑌤𑍍𑌯𑌯𑍋𑌧𑍍𑌯𑍇𑌯𑌂 𑌸𑌾𑌸𑌾𑌰𑍇𑌵𑌾𑌰𑍍𑌜𑍁𑌨𑍀 𑌕𑍍𑌷𑌪𑌾 ॥ 2 ॥
𑌕𑌦𑌾 𑌨𑍁 𑌖𑌲𑍁 𑌮𑍇 𑌭𑍍𑌰𑌾𑌤𑌾 𑌮𑌹𑍋𑌤𑍍𑌸𑌵 𑌇𑌵𑌾𑌽𑌗𑌤𑌃 ।
𑌜𑌨𑌯𑌿𑌷𑍍𑌯𑌤𑍍𑌯𑌯𑍋𑌧𑍍𑌯𑌾𑌯𑌾𑌂 𑌹𑌰𑍍𑌷𑌂 𑌗𑍍𑌰𑍀𑌷𑍍𑌮 𑌇𑌵𑌾𑌂𑌬𑍁𑌦𑌃 ॥ 2 ॥
𑌤𑌰𑍁𑌣𑍈𑌶𑍍𑌚𑌾𑌰𑍁𑌵𑍇𑌷𑍈𑌶𑍍𑌚 𑌨𑌰𑍈𑌰𑍁𑌨𑍍𑌨𑌤𑌗𑌾𑌮𑌿𑌭𑌿𑌃 ।
𑌸𑌂𑌪𑌤𑌦𑍍𑌭𑌿𑌰𑌯𑍋𑌧𑍍𑌯𑌾𑌯𑌾𑌂 𑌨𑌾𑌭𑌿𑌭𑌾𑌂𑌤𑌿 𑌮𑌹𑌾𑌪𑌥𑌾𑌃 ॥ 2 ॥
𑌏𑌵𑌂 𑌬𑌹𑍁𑌵𑌿𑌧𑌂 𑌜𑌲𑍍𑌪𑌨𑍍𑌵𑌿𑌵𑍇𑌶 𑌵𑌸𑌤𑌿𑌂 𑌪𑌿𑌤𑍁𑌃 ।
𑌤𑍇𑌨 𑌹𑍀𑌨𑌾𑌂 𑌨𑌰𑍇𑌂𑌦𑍍𑌰𑍇𑌣 𑌸𑌿𑌂𑌹𑌹𑍀𑌨𑌾𑌂 𑌗𑍁𑌹𑌾𑌮𑌿𑌵 ॥ 30 ॥
𑌤𑌦𑌾 𑌤𑌦𑌂𑌤𑌃 𑌪𑍁𑌰𑌮𑍁𑌂𑌝𑌿𑌤𑌪𑍍𑌰𑌭𑌂 𑌸𑍁𑌰𑍈𑌰𑌿𑌵𑍋𑌤𑍍𑌸𑍃𑌷𑍍𑌟𑌮𑌭𑌾𑌸𑍍𑌕𑌰𑌂 𑌦𑌿𑌨𑌮𑍍 ।
𑌨𑌿𑌰𑍀𑌕𑍍𑌷𑍍𑌯 𑌸𑌰𑍍𑌵𑌂 𑌤𑍁 𑌵𑌿𑌵𑌿𑌕𑍍𑌤𑌮𑌾𑌤𑍍𑌮𑌵𑌾𑌨𑍍𑌮𑍁𑌮𑍋𑌚 𑌬𑌾𑌷𑍍𑌪𑌂 𑌭𑌰𑌤𑌃 𑌸𑍁𑌦𑍁𑌃𑌖𑌿𑌤𑌃 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌯𑍋𑌧𑍍𑌯𑌾𑌕𑌾𑌂𑌡𑍇 𑌚𑌤𑍁𑌰𑍍𑌦𑌶𑌾𑌧𑌿𑌕𑌶𑌤𑌤𑌮𑌸𑍍𑌸𑌰𑍍𑌗𑌃 ॥
