શ્રીમદ્વાલ્મીકીય રામાયણે કિષ્કિંધાકાંડમ્ ।
અથ ષટ્ત્રિંશસ્સર્ગઃ ।
ઇત્યુક્તસ્તારયા વાક્યં પ્રશ્રિતં ધર્મસંહિતમ્ ।
મૃદુસ્વભાવસ્સૌમિત્રિઃ પ્રતિજગ્રાહ તદ્વચઃ ॥ 1 ॥
તસ્મિન્પ્રતિગૃહીતે તુ વાક્યે હરિગણેશ્વરઃ ।
લક્ષ્મણાત્સુમહત્ત્રાસં વસ્ત્રં ક્લિન્નમિવાત્યજત્ ॥ 2 ॥
તતઃ કંઠગતં માલ્યં ચિત્રં બહુગુણં મહત્ ।
ચિચ્છેદ વિમદશ્ચાસીત્સુગ્રીવો વાનરેશ્વરઃ ॥ 3 ॥
સ લક્ષ્મણં ભીમબલં સર્વવાનરસત્તમઃ ।
અબ્રવીત્પ્રશ્રિતં વાક્યં સુગ્રીવ સ્સંપ્રહર્ષયન્ ॥ 4 ॥
પ્રણષ્ટા શ્રીશ્ચ કીર્તિશ્ચ કપિરાજ્યં ચ શાશ્વતમ્ ।
રામપ્રસાદાત્સૌમિત્રે પુનઃ પ્રાપ્તમિદં મયા ॥ 5 ॥
કશ્શક્તસ્તસ્ય દેવસ્ય ખ્યાતસ્ય સ્વેન કર્મણા ।
તાદૃશં વિક્રમં વીર પ્રતિકર્તુમરિંદમ ॥ 6 ॥
સીતાં પ્રાપ્સ્યતિ ધર્માત્મા વધિષ્યતિ ચ રાવણમ્ ।
સહાયમાત્રેણ મયા રાઘવ સ્સ્વેન તેજસા ॥ 7 ॥
સહાયકૃત્યં કિં તસ્ય યેન સપ્ત મહાદ્રુમાઃ ।
શૈલશ્ચ વસુધા ચૈવ બાણેનૈકેન દારિતાઃ ॥ 8 ॥
ધનુર્વિષ્ફારયાનસ્ય યસ્ય શબ્દેન લક્ષ્મણ ।
સશૈલા કંપિતા ભૂમિસ્સહાયૈઃ કિન્નુ તસ્ય વૈ ॥ 9 ॥
અનુયાત્રાં નરેંદ્રસ્ય કરિષ્યેઽહં નરર્ષભ ।
ગચ્છતો રાવણં હંતું વૈરિણં સપુરસ્સરમ્ ॥ 10 ॥
યદિ કિંચિદતિક્રાંતં વિશ્વાસાત્પ્રણયેન વા ।
પ્રેષ્યસ્ય ક્ષમિતવ્યં મે ન કશ્ચિન્નાપરાધ્યતિ ॥ 11 ॥
તિ તસ્ય બ્રુવાણસ્ય સુગ્રીવસ્ય મહાત્મનઃ ।
અભવલ્લક્ષ્મણઃ પ્રીતઃ પ્રેમ્ણા ચૈવમુવાચ હ ॥ 12 ॥
સર્વથા હિ મમ ભ્રાતા સનાથો વાનરેશ્વર ।
ત્વયા નાથેન સુગ્રીવ પ્રશ્રિતેન વિશેષતઃ ॥ 13 ॥
યસ્તે પ્રભાવ સ્સુગ્રીવ યચ્ચ તે શૌચમાર્જવમ્ ।
અર્હસ્ત્વં કપિરાજ્યસ્ય શ્રિયં ભોક્તુમનુત્તમામ્ ॥ 14 ॥
સહાયેન તુ સુગ્રીવ ત્વયા રામઃ પ્રતાપવાન્ ।
વધિષ્યતિ રણે શત્રૂનચિરાન્નાત્ર સંશયઃ ॥ 15 ॥
ધર્મજ્ઞસ્ય કૃતજ્ઞસ્ય સંગ્રામેષ્વનિવર્તિનઃ ।
ઉપપન્નં ચ યુક્તં ચ સુગ્રીવ તવ ભાષિતમ્ ॥ 16 ॥
દોષજ્ઞસ્સતિ સામર્થ્યે કોઽન્યો ભાષિતુમર્હતિ ।
વર્જયિત્વા મમ જ્યેષ્ઠં ત્વાં ચ વાનરસત્તમ ॥ 17 ॥
સદૃશશ્ચાસિ રામસ્ય વિક્રમેણ બલેન ચ ।
સહાયો દૈવતૈર્દત્તશ્ચિરાય હરિપુંગવ ॥ 18 ॥
કિં તુ શીઘ્રમિતો વીર નિષ્ક્રમ ત્વં મયા સહ ।
સાંત્વયસ્વ વયસ્યં ચ ત્વં ભાર્યાહરણકર્શિતમ્ ॥ 19 ॥
યચ્ચ શોકાભિભૂતસ્ય શ્રુત્વા રામસ્ય ભાષિતમ્ ।
મયા ત્વં પરુષાણ્યુક્તસ્તચ્ચત્વં ક્ષંતુ મર્હસિ ॥ 20 ॥
ઇત્યાર્ષે શ્રીમદ્રામાયણે વાલ્મીકીય આદિકાવ્યે કિષ્કિંધાકાંડે ષટ્ત્રિંશસ્સર્ગઃ ॥
