𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ।
𑌤𑌂 𑌤𑌥𑌾 𑌶𑍋𑌕𑌸𑌂𑌤𑌪𑍍𑌤𑌂 𑌵𑌿𑌲𑌪𑌂𑌤𑌮𑌨𑌾𑌥𑌵𑌤𑍍 ।
𑌮𑍋𑌹𑍇𑌨 𑌮𑌹𑌤𑌾𑌵𑌿𑌷𑍍𑌟𑌂 𑌪𑌰𑌿𑌦𑍍𑌯𑍂𑌨𑌮𑌚𑍇𑌤𑌨𑌮𑍍 ॥ 1 ॥
𑌤𑌤𑌸𑍍𑌸𑍌𑌮𑌿𑌤𑍍𑌰𑌿𑌰𑌾𑌶𑍍𑌵𑌾𑌸𑍍𑌯 𑌮𑍁𑌹𑍂𑌰𑍍𑌤𑌾𑌦𑌿𑌵 𑌲𑌕𑍍𑌷𑍍𑌮𑌣𑌃 ।
𑌰𑌾𑌮𑌂 𑌸𑌂𑌬𑍋𑌧𑌯𑌾𑌮𑌾𑌸 𑌚𑌰𑌣𑍌 𑌚𑌾𑌭𑌿𑌪𑍀𑌡𑌯𑌨𑍍 ॥ 2 ॥
𑌮𑌹𑌤𑌾 𑌤𑌪𑌸𑌾 𑌰𑌾𑌮 𑌮𑌹𑌤𑌾 𑌚𑌾𑌪𑌿 𑌕𑌰𑍍𑌮𑌣𑌾 ।
𑌰𑌾𑌜𑍍𑌞𑌾 𑌦𑌶𑌰𑌥𑍇𑌨𑌾𑌸𑌿 𑌲𑌬𑍍𑌧𑍋𑌽𑌮𑍃𑌤𑌮𑌿𑌵𑌾𑌮𑌰𑍈𑌃 ॥ 3 ॥
𑌤𑌵 𑌚𑍈𑌵 𑌗𑍁𑌣𑍈𑌰𑍍𑌬𑌦𑍍𑌧𑌸𑍍𑌤𑍍𑌵𑌦𑍍𑌵𑌿𑌯𑍋𑌗𑌾𑌨𑍍𑌮𑌹𑍀𑌪𑌤𑌿𑌃 ।
𑌰𑌾𑌜𑌾 𑌦𑍇𑌵𑌤𑍍𑌵𑌮𑌾𑌪𑌨𑍍𑌨𑍋 𑌭𑌰𑌤𑌸𑍍𑌯 𑌯𑌥𑌾𑌶𑍍𑌰𑍁𑌤𑌮𑍍 ॥ 4 ॥
𑌯𑌦𑌿 𑌦𑍁𑌃𑌖𑌮𑌿𑌦𑌂 𑌪𑍍𑌰𑌾𑌪𑍍𑌤𑌂 𑌕𑌾𑌕𑍁𑌤𑍍𑌸𑍍𑌥 𑌨 𑌸𑌹𑌿𑌷𑍍𑌯𑌸𑍇 ।
𑌪𑍍𑌰𑌾𑌕𑍃𑌤𑌶𑍍𑌚𑌾𑌲𑍍𑌪𑌸𑌤𑍍𑌤𑍍𑌵𑌶𑍍𑌚 𑌇𑌤𑌰𑌃 𑌕𑌸𑍍𑌸𑌹𑌿𑌷𑍍𑌯𑌤𑌿 ॥ 5 ॥
𑌦𑍁𑌃𑌖𑌿𑌤𑍋 𑌹𑌿 𑌭𑌵𑌾𑌨𑍍𑌲𑍋𑌕𑌾𑌂𑌸𑍍𑌤𑍇𑌜𑌸𑌾 𑌯𑌦𑌿 𑌧𑌕𑍍𑌷𑍍𑌯𑌤𑍇 ।
𑌆𑌰𑍍𑌤𑌾𑌃 𑌪𑍍𑌰𑌜𑌾 𑌨𑌰𑌵𑍍𑌯𑌾𑌘𑍍𑌰 𑌕𑍍𑌵 𑌨𑍁 𑌯𑌾𑌸𑍍𑌯𑌂𑌤𑌿 𑌨𑌿𑌰𑍍𑌵𑍃𑌤𑌿𑌮𑍍 ॥ 6 ॥
𑌲𑍋𑌕𑌸𑍍𑌵𑌭𑌾𑌵 𑌏𑌵𑍈𑌷 𑌯𑌯𑌾𑌤𑌿𑌰𑍍𑌨𑌹𑍁𑌷𑌾𑌤𑍍𑌮𑌜𑌃 ।
𑌗𑌤𑌶𑍍𑌶𑌕𑍍𑌰𑍇𑌣 𑌸𑌾𑌲𑍋𑌕𑍍𑌯𑌮𑌨𑌯𑌸𑍍𑌤𑌂 𑌸𑌮𑌸𑍍𑌪𑍃𑌶𑌤𑍍 ॥ ॥
𑌮𑌹𑌰𑍍𑌷𑌿𑌰𑍍𑌯𑍋 𑌵𑌸𑌿𑌷𑍍𑌠𑌸𑍍𑌤𑍁 𑌯𑌃 𑌪𑌿𑌤𑍁𑌰𑍍𑌨𑌃 𑌪𑍁𑌰𑍋𑌹𑌿𑌤𑌃 ।
𑌅𑌹𑍍𑌨𑌾 𑌪𑍁𑌤𑍍𑌰𑌶𑌤𑌂 𑌜𑌜𑍍𑌞𑍇 𑌤𑌥𑍈𑌵𑌾𑌸𑍍𑌯 𑌪𑍁𑌨𑌰𑍍𑌹𑌤𑌮𑍍 ॥ ॥
𑌯𑌾 𑌚𑍇𑌯𑌂 𑌜𑌗𑌤𑌾𑌂 𑌮𑌾𑌤𑌾 𑌦𑍇𑌵𑍀 𑌲𑍋𑌕𑌨𑌮𑌸𑍍𑌕𑍃𑌤𑌾 ।
𑌅𑌸𑍍𑌯𑌾𑌶𑍍𑌚 𑌚𑌲𑌨𑌂 𑌭𑍂𑌮𑍇𑌰𑍍𑌦𑍃𑌶𑍍𑌯𑌤𑍇 𑌸𑌤𑍍𑌯𑌸𑌂𑌶𑍍𑌰𑌵 ॥ ॥
𑌯𑍌 𑌧𑌰𑍍𑌮𑍌 𑌜𑌗𑌤𑌾𑌂 𑌨𑍇𑌤𑍍𑌰𑍌 𑌯𑌤𑍍𑌰 𑌸𑌰𑍍𑌵𑌂 𑌪𑍍𑌰𑌤𑌿𑌷𑍍𑌠𑌿𑌤𑌮𑍍 ।
𑌆𑌦𑌿𑌤𑍍𑌯𑌚𑌂𑌦𑍍𑌰𑍌 𑌗𑍍𑌰𑌹𑌣𑌮𑌭𑍍𑌯𑍁𑌪𑍇𑌤𑍌 𑌮𑌹𑌾𑌬𑌲𑍌 ॥ 10 ॥
𑌸𑍁𑌮𑌹𑌾𑌂𑌤𑍍𑌯𑌪𑌿 𑌭𑍂𑌤𑌾𑌨𑌿 𑌦𑍇𑌵𑌾𑌶𑍍𑌚 𑌪𑍁𑌰𑍁𑌷𑌰𑍍𑌷𑌭 ।
𑌨 𑌦𑍈𑌵𑌸𑍍𑌯 𑌪𑍍𑌰𑌮𑍁𑌂𑌚𑌂𑌤𑌿 𑌸𑌰𑍍𑌵𑌭𑍂𑌤𑌾𑌨𑌿 𑌦𑍇𑌹𑌿𑌨𑌃 ॥ 11 ॥
𑌶𑌕𑍍𑌰𑌾𑌦𑌿𑌷𑍍𑌵𑌪𑌿 𑌦𑍇𑌵𑍇𑌷𑍁 𑌵𑌰𑍍𑌤𑌮𑌾𑌨𑍌 𑌨𑌯𑌾𑌨𑌯𑍌 ।
𑌶𑍍𑌰𑍂𑌯𑍇𑌤𑍇 𑌨𑌰𑌶𑌾𑌰𑍍𑌦𑍂𑌲 𑌨 𑌤𑍍𑌵𑌂 𑌶𑍋𑌚𑌿𑌤𑍁𑌮𑌰𑍍𑌹𑌸𑌿 ॥ 12 ॥
𑌨𑌷𑍍𑌟𑌾𑌯𑌾𑌮𑌪𑌿 𑌵𑍈𑌦𑍇𑌹𑍍𑌯𑌾𑌂 𑌹𑍃𑌤𑌾𑌯𑌾𑌮𑌪𑌿 𑌚𑌾𑌨𑌘 𑌶𑍋𑌚𑌿𑌤𑍁𑌂 𑌨𑌾𑌰𑍍𑌹𑌸𑍇 𑌵𑍀𑌰 𑌯𑌥𑌾𑌨𑍍𑌯𑌃 𑌪𑍍𑌰𑌾𑌕𑍃𑌤𑌸𑍍𑌤𑌥𑌾 ॥ 13 ॥
𑌤𑍍𑌵𑌵𑍍𑌦𑌿𑌧𑌾 𑌨 𑌹𑌿 𑌶𑍋𑌚𑌂𑌤𑌿 𑌸𑌤𑌤𑌂 𑌸𑌤𑍍𑌯𑌦𑌰𑍍𑌶𑌿𑌨𑌃 ।
𑌸𑍁𑌮𑌹𑌤𑍍𑌸𑍍𑌵𑌪𑌿 𑌕𑍃𑌚𑍍𑌛𑍍𑌰𑍇𑌷𑍁 𑌰𑌾𑌮𑌾𑌨𑌿𑌰𑍍𑌵𑌿𑌣𑍍𑌣𑌦𑌰𑍍𑌶𑌨𑌾𑌃 ॥ 14 ॥
𑌤𑌤𑍍𑌤𑍍𑌵𑌤𑍋 𑌹𑌿 𑌨𑌰𑌶𑍍𑌰𑍇𑌷𑍍𑌠 𑌬𑍁𑌦𑍍𑌧𑍍𑌯𑌾 𑌸𑌮𑌨𑍁𑌚𑌿𑌂𑌤𑌯 ।
𑌬𑍁𑌧𑍍𑌦𑍍𑌯𑌾 𑌯𑍁𑌕𑍍𑌤𑌾 𑌮𑌹𑌾𑌪𑍍𑌰𑌾𑌜𑍍𑌞𑌾 𑌵𑌿𑌜𑌾𑌨𑌂𑌤𑌿 𑌶𑍁𑌭𑌾𑌶𑍁𑌭𑍇 ॥ 15 ॥
𑌅𑌦𑍃𑌷𑍍𑌟𑌗𑍁𑌣𑌦𑍋𑌷𑌾𑌣𑌾𑌮𑌧𑍍𑌰𑍁𑌵𑌾𑌣𑌾𑌂 𑌤𑍁 𑌕𑌰𑍍𑌮𑌣𑌾𑌮𑍍 ।
𑌨𑌾𑌂𑌤𑌰𑍇𑌣 𑌕𑍍𑌰𑌿𑌯𑌾𑌂 𑌤𑍇𑌷𑌾𑌂 𑌫𑌲𑌮𑌿𑌷𑍍𑌟𑌂 𑌪𑍍𑌰𑌵𑌰𑍍𑌤𑌤𑍇 ॥ 16 ॥
𑌤𑍍𑌵𑌮𑍇𑌵 𑌹𑌿 𑌪𑍁𑌰𑌾 𑌰𑌾𑌮 𑌮𑌾𑌮𑍇𑌵𑌂 𑌬𑌹𑍁𑌶𑍋𑌽𑌨𑍍𑌵𑌶𑌾𑌃 ।
𑌅𑌨𑍁𑌶𑌿𑌷𑍍𑌯𑌾𑌦𑍍𑌧𑌿 𑌕𑍋 𑌨𑍁 𑌤𑍍𑌵𑌾𑌮𑌪𑌿 𑌸𑌾𑌕𑍍𑌷𑌾𑌦𑍍𑌬𑍃𑌹𑌸𑍍𑌪𑌤𑌿𑌃 ॥ 1 ॥
𑌬𑍁𑌦𑍍𑌧𑌿𑌶𑍍𑌚 𑌤𑍇 𑌮𑌹𑌾𑌪𑍍𑌰𑌾𑌜𑍍𑌞 𑌦𑍇𑌵𑍈𑌰𑌪𑌿 𑌦𑍁𑌰𑌨𑍍𑌵𑌯𑌾 ।
𑌶𑍋𑌕𑍇𑌨𑌾𑌭𑌿𑌪𑍍𑌰𑌸𑍁𑌪𑍍𑌤𑌂 𑌤𑍇 𑌜𑍍𑌞𑌾𑌨𑌂 𑌸𑌂𑌬𑍋𑌧𑌯𑌾𑌮𑍍𑌯𑌹𑌮𑍍 ॥ 1 ॥
𑌦𑌿𑌵𑍍𑌯𑌂 𑌚 𑌮𑌾𑌨𑍁𑌷𑌂 𑌚 𑌤𑍍𑌵𑌮𑌾𑌤𑍍𑌮𑌨𑌶𑍍𑌚 𑌪𑌰𑌾𑌕𑍍𑌰𑌮𑌮𑍍 ।
𑌇𑌕𑍍𑌷𑍍𑌵𑌾𑌕𑍁𑌵𑍃𑌷𑌭𑌾𑌵𑍇𑌕𑍍𑌷𑍍𑌯 𑌯𑌤𑌸𑍍𑌵 𑌦𑍍𑌵𑌿𑌷𑌤𑌾𑌂 𑌵𑌧𑍇 ॥ 1 ॥
𑌕𑌿𑌂 𑌤𑍇𑌨 𑌸𑌰𑍍𑌵𑌨𑌾𑌶𑍇𑌨 𑌕𑍃𑌤𑍇𑌨 𑌪𑍁𑌰𑍁𑌷𑌰𑍍𑌷𑌭 ।
𑌤𑌮𑍇𑌵 𑌤𑍍𑌵𑌂 𑌰𑌿𑌪𑍁𑌂 𑌪𑌾𑌪𑌂 𑌵𑌿𑌜𑍍𑌞𑌾𑌯𑍋𑌦𑍍𑌧𑌰𑍍𑌤𑍁𑌮𑌰𑍍𑌹𑌸𑌿 ॥ 20 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌷𑌟𑍍𑌷𑌷𑍍𑌟𑌿𑌤𑌮𑌸𑍍𑌸𑌰𑍍𑌗𑌃 ॥
