𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌅𑌰𑌣𑍍𑌯𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌦𑌶𑌸𑍍𑌸𑌰𑍍𑌗𑌃 ।
𑌤𑌤𑌃 𑌪𑌂𑌚𑌵𑌟𑍀𑌂 𑌗𑌤𑍍𑌵𑌾 𑌨𑌾𑌨𑌾𑌵𑍍𑌯𑌾𑌲𑌮𑍃𑌗𑌾𑌯𑍁𑌤𑌾𑌮𑍍 ।
𑌉𑌵𑌾𑌚 𑌭𑍍𑌰𑌾𑌤𑌰𑌂 𑌰𑌾𑌮𑌸𑍍𑌸𑍌𑌮𑌿𑌤𑍍𑌰𑌿𑌂 𑌦𑍀𑌪𑍍𑌤𑌤𑍇𑌜𑌸𑌮𑍍 ॥ 1 ॥
𑌆𑌗𑌤𑌾𑌃 𑌸𑍍𑌮 𑌯𑌥𑍋𑌦𑍍𑌦𑌿𑌷𑍍𑌟𑌮𑌮𑍁𑌂 𑌦𑍇𑌶𑌂 𑌮𑌹𑌰𑍍𑌷𑌿𑌣𑌾 ।
𑌅𑌯𑌂 𑌪𑌂𑌚𑌵𑌟𑍀𑌦𑍇𑌶𑌸𑍍𑌸𑍌𑌮𑍍𑌯 𑌪𑍁𑌷𑍍𑌪𑌿𑌤𑌪𑌾𑌦𑌪𑌃 ॥ 2 ॥
𑌸𑌰𑍍𑌵𑌤𑌶𑍍𑌚𑌾𑌰𑍍𑌯𑌤𑌾𑌂 𑌦𑍃𑌷𑍍𑌟𑌿𑌃 𑌕𑌾𑌨𑌨𑍇 𑌨𑌿𑌪𑍁𑌣𑍋𑌹𑍍𑌯𑌸𑌿 ।
𑌆𑌶𑍍𑌰𑌮𑌃 𑌕𑌤𑌰𑌸𑍍𑌮𑌿𑌨𑍍𑌨𑍋 𑌦𑍇𑌶𑍇 𑌭𑌵𑌤𑌿 𑌸𑌮𑍍𑌮𑌤𑌃 ॥ 3 ॥
𑌰𑌮𑌤𑍇 𑌯𑌤𑍍𑌰 𑌵𑍈𑌦𑍇𑌹𑍀 𑌤𑍍𑌵𑌮𑌹𑌂 𑌚𑍈𑌵 𑌲𑌕𑍍𑌷𑍍𑌮𑌣 ।
𑌤𑌾𑌦𑍃𑌶𑍋 𑌦𑍃𑌶𑍍𑌯𑌤𑌾𑌂 𑌦𑍇𑌶𑌸𑍍𑌸𑌨𑍍𑌨𑌿𑌕𑍃𑌷𑍍𑌟𑌜𑌲𑌾𑌶𑌯𑌃 ॥ 4 ॥
𑌵𑌨𑌰𑌾𑌮𑌣𑍍𑌯𑌕𑌂 𑌯𑌤𑍍𑌰 𑌸𑍍𑌥𑌲𑌰𑌾𑌮𑌣𑍍𑌯𑌕𑌂 𑌤𑌥𑌾 ।
𑌸𑌨𑍍𑌨𑌿𑌕𑍃𑌷𑍍𑌟𑌂 𑌚 𑌯𑌤𑍍𑌰 𑌸𑍍𑌯𑌾𑌤𑍍𑌸𑌮𑌿𑌤𑍍𑌪𑍁𑌷𑍍𑌪𑌕𑍁𑌶𑍋𑌦𑌕𑌮𑍍 ॥ 5 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌲𑌕𑍍𑌷𑍍𑌮𑌣 𑌸𑌂𑌯𑌤𑌾𑌂𑌜𑌲𑌿𑌃 ।
𑌸𑍀𑌤𑌾𑌸𑌮𑌕𑍍𑌷𑌂 𑌕𑌾𑌕𑍁𑌤𑍍𑌸𑍍𑌥𑌮𑌿𑌦𑌂 𑌵𑌚𑌨𑌮𑌬𑍍𑌰𑌵𑍀𑌤𑍍 ॥ 6 ॥
𑌪𑌰𑌵𑌾𑌨𑌸𑍍𑌮𑌿 𑌕𑌾𑌕𑍁𑌤𑍍𑌸𑍍𑌥 𑌤𑍍𑌵𑌯𑌿 𑌵𑌰𑍍𑌷𑌶𑌤𑌂 𑌸𑍍𑌥𑌿𑌤𑍇 ।
𑌸𑍍𑌵𑌯𑌂 𑌤𑍁 𑌰𑍁𑌚𑌿𑌰𑍇 𑌦𑍇𑌶𑍇 𑌕𑍍𑌰𑌿𑌯𑌤𑌾𑌮𑌿𑌤𑌿 𑌮𑌾𑌂 𑌵𑌦 ॥ ॥
𑌸𑍁𑌪𑍍𑌰𑍀𑌤𑌸𑍍𑌤𑍇𑌨 𑌵𑌾𑌕𑍍𑌯𑍇𑌨 𑌲𑌕𑍍𑌷𑍍𑌮𑌣𑌸𑍍𑌯 𑌮𑌹𑌾𑌤𑍍𑌮𑌨𑌃 ।
𑌵𑌿𑌮𑍃𑌶𑌨𑍍𑌰𑍋𑌚𑌯𑌾𑌮𑌾𑌸 𑌦𑍇𑌶𑌂 𑌸𑌰𑍍𑌵𑌗𑍁𑌣𑌾𑌨𑍍𑌵𑌿𑌤𑌮𑍍 ॥ ॥
𑌸 𑌤𑌂 𑌰𑍁𑌚𑌿𑌰𑌮𑌾𑌕𑍍𑌰𑌮𑍍𑌯 𑌦𑍇𑌶𑌮𑌾𑌶𑍍𑌰𑌮𑌕𑌰𑍍𑌮𑌣𑌿 ।
𑌹𑌸𑍍𑌤𑍌 𑌗𑍃𑌹𑍀𑌤𑍍𑌵𑌾 𑌹𑌸𑍍𑌤𑍇𑌨 𑌰𑌾𑌮𑌸𑍍𑌸𑍌𑌮𑌿𑌤𑍍𑌰𑌿𑌮𑌬𑍍𑌰𑌵𑍀𑌤𑍍 ॥ ॥
𑌅𑌯𑌂 𑌦𑍇𑌶𑌸𑍍𑌸𑌮𑌶𑍍𑌰𑍀𑌮𑌾𑌨𑍍 𑌪𑍁𑌷𑍍𑌪𑌿𑌤𑍈𑌸𑍍𑌤𑌰𑍁𑌭𑌿𑌰𑍍𑌵𑍃𑌤𑌃 ।
𑌇𑌹𑌾𑌽𑌶𑍍𑌰𑌮𑌪𑌦𑌂 𑌸𑍌𑌮𑍍𑌯 𑌯𑌥𑌾𑌵𑌤𑍍𑌕𑌰𑍍𑌤𑍁𑌮𑌰𑍍𑌹𑌸𑌿 ॥ 10 ॥
𑌇𑌯𑌮𑌾𑌦𑌿𑌤𑍍𑌯𑌸𑌂𑌕𑌾𑌶𑍈𑌃 𑌪𑌦𑍍𑌮𑍈𑌸𑍍𑌸𑍁𑌰𑌭𑌿𑌗𑌂𑌧𑌿𑌭𑌿𑌃 ।
𑌅𑌦𑍂𑌰𑍇 𑌦𑍃𑌶𑍍𑌯𑌤𑍇 𑌰𑌮𑍍𑌯𑌾 𑌪𑌦𑍍𑌮𑌿𑌨𑍀 𑌪𑌦𑍍𑌮𑌶𑍋𑌭𑌿𑌤𑌾 ॥ 11 ॥
𑌯𑌥𑌾𑌤𑌖𑍍𑌯𑌾𑌤𑌮𑌗𑌸𑍍𑌤𑍍𑌯𑍇𑌨 𑌮𑍁𑌨𑌿𑌨𑌾 𑌭𑌾𑌵𑌿𑌤𑌾𑌤𑍍𑌮𑌨𑌾 ।
𑌇𑌯𑌂 𑌗𑍋𑌦𑌾𑌵𑌰𑍀 𑌰𑌮𑍍𑌯𑌾 𑌪𑍁𑌷𑍍𑌪𑌿𑌤𑍈𑌸𑍍𑌤𑌰𑍁𑌭𑌿𑌰𑍍𑌵𑍃𑌤𑌾 ॥ 12 ॥
𑌹𑌂𑌸𑌕𑌾𑌰𑌂𑌡𑌵𑌾𑌕𑍀𑌰𑍍𑌣𑌾 𑌚𑌕𑍍𑌰𑌵𑌾𑌕𑍋𑌪𑌶𑍋𑌭𑌿𑌤𑌾 ।
𑌨𑌾𑌤𑌿𑌦𑍂𑌰𑍇 𑌨 𑌚𑌾𑌸𑌨𑍍𑌨𑍇 𑌮𑍃𑌗𑌯𑍂𑌥𑌪𑌿𑌪𑍀𑌡𑌿𑌤𑌾𑌃 ॥ 13 ॥
𑌮𑌯𑍂𑌰𑌨𑌾𑌦𑌿𑌤𑌾 𑌰𑌮𑍍𑌯𑌾𑌃 𑌪𑍍𑌰𑌾𑌂𑌶𑌵𑍋 𑌬𑌹𑍁𑌕𑌂𑌦𑌰𑌾𑌃 ।
𑌦𑍃𑌶𑍍𑌯𑌂𑌤𑍇 𑌗𑌿𑌰𑌯𑌃 𑌸𑍌𑌮𑍍𑌯 𑌫𑍁𑌲𑍍𑌲𑍈𑌸𑍍𑌤𑌰𑍁𑌭𑌿𑌰𑌾𑌵𑍃𑌤𑌾𑌃 ॥ 14 ॥
𑌸𑍌𑌵𑌰𑍍𑌣𑍈𑌰𑌾𑌜𑌤𑍈𑌸𑍍𑌤𑌾𑌮𑍍𑌰𑍈𑌰𑍍𑌦𑍇𑌶𑍇 𑌦𑍇𑌶𑍇 𑌚 𑌧𑌾𑌤𑍁𑌭𑌿𑌃 ।
𑌗𑌵𑌾𑌕𑍍𑌷𑌿𑌤𑌾 𑌇𑌵𑌾𑌭𑌾𑌂𑌤𑌿 𑌗𑌜𑌾𑌃 𑌪𑌰𑌮𑌭𑌕𑍍𑌤𑌿𑌭𑌿𑌃 ॥ 15 ॥
𑌸𑌾𑌲𑍈𑌸𑍍𑌤𑌾𑌲𑍈𑌸𑍍𑌤𑌮𑌾𑌲𑍈𑌶𑍍𑌚 𑌖𑌰𑍍𑌜𑍂𑌰𑌪𑌨𑌸𑌾𑌮𑍍𑌰𑌕𑍈𑌃 ।
𑌨𑍀𑌵𑌾𑌰𑍈𑌸𑍍𑌤𑌿𑌮𑌿𑌶𑍈𑌶𑍍𑌚𑍈𑌵 𑌪𑍁𑌨𑍍𑌨𑌾𑌗𑍈𑌶𑍍𑌚𑍋𑌪𑌶𑍋𑌭𑌿𑌤𑌾𑌃 ॥ 16 ॥
𑌚𑍂𑌤𑍈𑌰𑌶𑍋𑌕𑍈𑌸𑍍𑌤𑌿𑌲𑌕𑍈𑌶𑍍𑌚𑌂𑌪𑌕𑍈𑌃 𑌕𑍇𑌤𑌕𑍈𑌰𑌪𑌿 ।
𑌪𑍁𑌷𑍍𑌪𑌗𑍁𑌲𑍍𑌮𑌲𑌤𑍋𑌪𑍇𑌤𑍈𑌸𑍍𑌤𑍈𑌸𑍍𑌤𑍈𑌸𑍍𑌤𑌰𑍁𑌭𑌿𑌰𑌾𑌵𑍃𑌤𑌾𑌃 ॥ 1 ॥
𑌚𑌂𑌦𑌨𑍈𑌸𑍍𑌪𑌂𑌦𑌨𑍈𑌰𑍍𑌨𑍀𑌪𑍈𑌃 𑌪𑌰𑍍𑌣𑌾𑌸𑍈𑌰𑍍𑌲𑌿𑌕𑍁𑌚𑍈𑌰𑌪𑌿 ।
𑌧𑌵𑌾𑌶𑍍𑌵𑌕𑌰𑍍𑌣𑌖𑌦𑌿𑌰𑍈𑌃 𑌶𑌮𑍀𑌕𑌿𑌂𑌶𑍁𑌕𑌪𑌾𑌟𑌲𑍈𑌃 ॥ 1 ॥
𑌇𑌦𑌂 𑌪𑍁𑌣𑍍𑌯𑌮𑌿𑌦𑌂 𑌮𑍇𑌧𑍍𑌯𑌮𑌿𑌦𑌂 𑌬𑌹𑍁𑌮𑍃𑌗𑌦𑍍𑌵𑌿𑌜𑌮𑍍 ।
𑌇𑌹 𑌵𑌤𑍍𑌸𑍍𑌯𑌾𑌮 𑌸𑍌𑌮𑌿𑌤𑍍𑌰𑍇 𑌸𑌾𑌰𑍍𑌧𑌮𑍇𑌤𑍇𑌨 𑌪𑌕𑍍𑌷𑌿𑌣𑌾 ॥ 1 ॥
𑌏𑌵𑌮𑍁𑌕𑍍𑌤𑌸𑍍𑌤𑍁 𑌰𑌾𑌮𑍇𑌣 𑌲𑌕𑍍𑌷𑍍𑌮𑌣𑌃 𑌪𑌰𑌵𑍀𑌰𑌹𑌾 ।
𑌅𑌚𑌿𑌰𑍇𑌣𑌾𑌽𑌶𑍍𑌰𑌮𑌂 𑌭𑍍𑌰𑌾𑌤𑍁𑌶𑍍𑌚𑌕𑌾𑌰 𑌸𑍁𑌮𑌹𑌾𑌬𑌲𑌃 ॥ 20 ॥
𑌪𑌰𑍍𑌣𑌶𑌾𑌲𑌾𑌂 𑌸𑍁𑌵𑌿𑌪𑍁𑌲𑌾𑌂 𑌤𑌤𑍍𑌰 𑌸𑌂𑌖𑌾𑌤𑌮𑍃𑌤𑍍𑌤𑌿𑌕𑌾𑌮𑍍 ।
𑌸𑍁𑌸𑍍𑌤𑌂𑌭𑌾𑌂 𑌮𑌸𑍍𑌕𑌰𑍈𑌰𑍍𑌦𑍀𑌰𑍍𑌘𑍈𑌃 𑌕𑍃𑌤𑌵𑌂𑌶𑌾𑌂 𑌸𑍁𑌶𑍋𑌭𑌨𑌾𑌮𑍍 ॥ 21 ॥
𑌶𑌮𑍀𑌶𑌾𑌖𑌾𑌭𑌿𑌰𑌾𑌸𑍍𑌤𑍀𑌰𑍍𑌯 𑌦𑍃𑌢𑌪𑌾𑌶𑌾𑌵𑌪𑌾𑌶𑌿𑌤𑌾𑌮𑍍 ।
𑌕𑍁𑌶𑌕𑌾𑌶𑌶𑌰𑍈𑌃 𑌪𑌰𑍍𑌣𑍈𑌸𑍍𑌸𑍁𑌪𑌰𑌿𑌚𑍍𑌛𑌾𑌦𑌿𑌤𑌾𑌂 𑌤𑌥𑌾 ॥ 22 ॥
𑌸𑌮𑍀𑌕𑍃𑌤𑌤𑌲𑌾𑌂 𑌰𑌮𑍍𑌯𑌾𑌂 𑌚𑌕𑌾𑌰 𑌲𑌘𑍁𑌵𑌿𑌕𑍍𑌰𑌮𑌃 ।
𑌨𑌿𑌵𑌾𑌸𑌂 𑌰𑌾𑌘𑌵𑌸𑍍𑌯𑌾𑌰𑍍𑌥𑍇 𑌪𑍍𑌰𑍇𑌕𑍍𑌷𑌣𑍀𑌯𑌮𑌨𑍁𑌤𑍍𑌤𑌮𑌮𑍍 ॥ 23 ॥
𑌸𑌹𑌸𑌾 𑌲𑌕𑍍𑌷𑍍𑌮𑌣𑌃 𑌶𑍍𑌰𑍀𑌮𑌾𑌨𑍍 𑌨𑌦𑍀𑌂 𑌗𑍋𑌦𑌾𑌵𑌰𑍀𑌂 𑌤𑌦𑌾 ।
𑌸𑍍𑌨𑌾𑌤𑍍𑌵𑌾 𑌪𑌦𑍍𑌮𑌾𑌨𑌿 𑌚𑌾𑌦𑌾𑌯 𑌸𑌫𑌲𑌃 𑌪𑍁𑌨𑌰𑌾𑌗𑌤𑌃 ॥ 24 ॥
𑌤𑌤𑌃 𑌪𑍁𑌷𑍍𑌪𑌬𑌲𑌿𑌂 𑌕𑍃𑌤𑍍𑌵𑌾 𑌶𑌾𑌂𑌤𑌿𑌂 𑌚 𑌸 𑌯𑌥𑌾𑌵𑌿𑌧𑌿 ।
𑌦𑌰𑍍𑌶𑌯𑌾𑌮𑌾𑌸 𑌰𑌾𑌮𑌾𑌯 𑌤𑌦𑌾𑌶𑍍𑌰𑌮𑌪𑌦𑌂 𑌕𑍃𑌤𑌮𑍍 ॥ 25 ॥
𑌸 𑌤𑌂 𑌦𑍃𑌷𑍍𑌟𑍍𑌵𑌾 𑌕𑍃𑌤𑌂 𑌸𑍌𑌮𑍍𑌯𑌮𑌾𑌶𑍍𑌰𑌮𑌂 𑌸𑍀𑌤𑌯𑌾 𑌸𑌹 ।
𑌰𑌾𑌘𑌵𑌃 𑌪𑌰𑍍𑌣𑌶𑌾𑌲𑌾𑌯𑌾𑌂 𑌹𑌰𑍍𑌷𑌮𑌾𑌹𑌾𑌰𑌯𑌤𑍍𑌪𑌰𑌮𑍍 ॥ 26 ॥
𑌸𑍁𑌸𑌂𑌹𑍃𑌷𑍍𑌟𑌃 𑌪𑌰𑌿𑌷𑍍𑌵𑌜𑍍𑌯 𑌬𑌾𑌹𑍁𑌭𑍍𑌯𑌾𑌂 𑌲𑌕𑍍𑌷𑍍𑌮𑌣𑌂 𑌤𑌦𑌾 ।
𑌅𑌤𑌿𑌸𑍍𑌨𑌿𑌗𑍍𑌧𑌂 𑌚 𑌗𑌾𑌢𑌂 𑌚 𑌵𑌚𑌨𑌂 𑌚𑍇𑌦𑌮𑌬𑍍𑌰𑌵𑍀𑌤𑍍 ॥ 2 ॥
𑌪𑍍𑌰𑍀𑌤𑍋𑌽𑌸𑍍𑌮𑌿 𑌤𑍇 𑌮𑌹𑌤𑍍𑌕𑌰𑍍𑌮 𑌤𑍍𑌵𑌯𑌾 𑌕𑍃𑌤𑌮𑌿𑌦𑌂 𑌪𑍍𑌰𑌭𑍋 ।
𑌪𑍍𑌰𑌦𑍇𑌯𑍋 𑌯𑌨𑍍𑌨𑌿𑌮𑌿𑌤𑍍𑌤𑌂 𑌤𑍇 𑌪𑌰𑌿𑌷𑍍𑌵𑌂𑌗𑍋 𑌮𑌯𑌾 𑌕𑍃𑌤𑌃 ॥ 2 ॥
𑌭𑌾𑌵𑌜𑍍𑌞𑍇𑌨 𑌕𑍃𑌤𑌜𑍍𑌞𑍇𑌨 𑌧𑌰𑍍𑌮𑌜𑍍𑌞𑍇𑌨 𑌚 𑌲𑌕𑍍𑌷𑍍𑌮𑌣 ।
𑌤𑍍𑌵𑌯𑌾 𑌪𑍁𑌤𑍍𑌰𑍇𑌣 𑌧𑌰𑍍𑌮𑌾𑌤𑍍𑌮𑌾 𑌨 𑌸𑌂𑌵𑍃𑌤𑍍𑌤𑌃 𑌪𑌿𑌤𑌾 𑌮𑌮 ॥ 2 ॥
𑌏𑌵𑌂 𑌲𑌕𑍍𑌷𑍍𑌮𑌣𑌮𑍁𑌕𑍍𑌤𑍍𑌵𑌾 𑌤𑍁 𑌰𑌾𑌘𑌵𑍋 𑌲𑌕𑍍𑌷𑍍𑌮𑌿𑌵𑌰𑍍𑌧𑌨𑌃 ।
𑌤𑌸𑍍𑌮𑌿𑌨𑍍 𑌦𑍇𑌶𑍇 𑌬𑌹𑍁𑌫𑌲𑍇 𑌨𑍍𑌯𑌵𑌸𑌤𑍍𑌸𑍁𑌸𑍁𑌖𑌂 𑌵𑌶𑍀 ॥ 30 ॥
𑌕𑌂𑌚𑌿𑌤𑍍𑌕𑌾𑌲𑌂 𑌸 𑌧𑌰𑍍𑌮𑌾𑌤𑍍𑌮𑌾 𑌸𑍀𑌤𑌯𑌾 𑌲𑌕𑍍𑌷𑍍𑌮𑌣𑍇𑌨 𑌚 ।
𑌅𑌨𑍍𑌵𑌾𑌸𑍍𑌯𑌮𑌾𑌨𑍋 𑌨𑍍𑌯𑌵𑌸𑌤𑍍𑌸𑍍𑌵𑌰𑍍𑌗𑌲𑍋𑌕𑍇 𑌯𑌥𑌾𑌮𑌰𑌃 ॥ 31 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌅𑌰𑌣𑍍𑌯𑌕𑌾𑌂𑌡𑍇 𑌪𑌂𑌚𑌦𑌶𑌸𑍍𑌸𑌰𑍍𑌗𑌃 ॥
